festa

festa-e-grurit.jpg
G. P.15:45 | 23/06/2019

Në Pojan të Fierit, Festa e Grurit është kthyer në tradite. Në këtë ditë këndohet e kërcehet ndërsa sipas traditës pulat e detit piqen në saç.

Pojani i Fierit, një nga 100 fshatrat turistike shqiptare, u kthye në qendër të festimeve dhe traditës myzeqare. Dita e grurit, mblodhi bashkë me qindra banorë, të zonës. Myzeqesë si dikurshme mund t’i jenë ulur statistikat e sipërfaqeve me grurë, por jo këngët, vallet dhe gatimet që lindën 50 vite më parë dhe nuk u shuan kurrë.

Është Qershor dhe në Myzeqe, ky muaj është nga më të rëndësishmit për ekonominë bujqësore. Edhe pse në sipërfaqe më të vogla, rrallë gjen familje rurale fierake të mos kultivojë grurë.

Midis legjendave të dikurshme për sigurimin e bukës së përditshme, të garantimit të një ekonomie të qëndrueshme familjare, e përcjellë mes një gëzimi të pashoq folklorik dhe gastronomik, në Pojan të Fierit u festua Festa e Grurit.

“Festa është krejt e veçantë pasi vjen nga ajo që është thelbi i jetës, gruri, buka, nga mirëqenia, nga ajo çfarë përpiqemi të gjithë sëbashku për të krijuar më shumë mirëqenie për njerëzit dhe komunitetet”, tha Blendi Klosi.

“Ne do ta vazhdojmë këtë gjë edhe në muajt në vijim, edhe në vitet në vijim dhe duam që të promovojmë të gjitha vlerat e vendit tonë”, tha kryetari i Bashkisë së Fierit, Armando Subashi.

Aq i rëndësishëm është prodhimi i grurit dhe bukës në Myzeqe, saqë vit pas viti, myzeqarët e Fierit i krijuan gati një festival të tërë folklorik me këngë edhe valle.

Madje myzeqarët, për këtë festë, krijuan edhe një nga recetat kulinare më autentike dhe më me shije: bibën në saç. Gatuhet vetëm këtu dhe sapo bie drapri i parë në fushat me grurë.

Biba në saç shoqëron gjithë fushatën e korrjes dhe shirjes së grurit dhe ikën bashkë me të. Gatuhet në çdo familje myzeqare që korr grurë, ndërsa në restorantet tradicionale, për një muaj qëndron në top menynë e tyre.

Festa e Grurit, me një histori gati 50-vjeçare në Myzeqe, i solli të gjitha si dikur: bukën dhe grurin e ri, lëmin e fshatit dhe mekanikën, këngët dhe vallet, bibën në saç dhe dhallën e ftohtë./ABC News Albania 24/7

ATMOSFERA-FESTIVE-PER-FEMIJE-NE-TIRANE.mpg_snapshot_00.55-1280x720.jpg
ent ela15:30 | 01/06/2019

Protagonistët e festës, fëmijët në ditën ndërkombëtare të tyrë kanë festuar në sheshin “Skenderbej” një qershorin.  Shfaqje, muzikë, pikturë dhe forma të ndryshme argëtimi ishin pjesë e festës në kryeqytet.

Një qershori është dita ndërkombëtarë e fëmijëve, e cila festohet edhe në kryeqytet. Rrugët gumëzhijne nga gjallëria e tyre.

Protagonistët e festës fëmijët të shoqëruar nga prindërit u përfshinë në lojrat dhe format e argëtimit të improvizuara në çdo kënd të Tiranës.

Krahas muzikës, bandës së qytetit, këndeve të pikturës, nuk munguan edhe shfaqjet për fëmijë. muzikali të mirësjellshmit u shfaq në sheshin “Skënderbej”.

Në ndryshim nga të rriturit, protesta e fëmijëve bëhet me lojëra dhe festa.

Dita e fëmijëve u vendos në datën 1 qershor, sepse në këtë datë është mbajtur Konferenca Botërore e Mirëqënies së Fëmijëve në Gjenevë, në 1925. Në të njëjtën ditë, koinçidoi që konsulli i përgjithshëm kinez në San Francisko mblodhi së bashku një numër të konsiderueshëm fëmijësh jetimë kinezë të celebroninnë festivalin e “Anijes së Dragoit”. Dy vjet më pas Festa e 1 qershorit filloi të festohet në të gjithë botën.

Gazetare: Leontina Nika

 

 

GURRA-RREKE-FIER-abcm5t1.mpg_snapshot_00.11-1280x720.jpg
ent ela15:40 | 26/05/2019

Në Seman të Fierit u organizua dita e Gunës Rreke. Një festë që ka për qëllim të risjellë në vëmendje vallen e hershme myzeqare. Në këtë event edhe ambasadorët shijuan Gunën Rreke.

Këngët, vallet, ritualet tradicionale, veshjet folklorike pa fund, skenat gati butaforike me dekor e personazhe si nga Myzeqeja, e shndërruan fshatin e vogël në zemër të Myzeqesë së Fierit, Semanin, këtë fundjavë në një skenë madhështore folklori, ose “Guna me rrëké festë”.

I dedikohet një prej krijimeve më fantastike shpirtërore të kësaj zonë, gunës me rrëke, e cila me sharmin e saj ka arritur të identifikohet si veshja tradicionale që përfaqëson gjithë Myzeqenë nga pikëpamja etnokulturore.

Me qindra njerëz ndoqën skena të shumta që të kujtonin dasmën e moçme myzeqare, kalorës të pashëm mbi kuaj si qëmoti që shkonin për të marrë nusen, makineri që të kujtonin një Myzeqe të fuqishme bujqësore, veshje pa fund tradicionale që të sillnin ndër mend festat e mëdha ku këndonin i madh e i vogël.

Atmosfera folklorike e këngëve dhe valleve myzeqare ka befasuar edhe Ambasadorët e Kroacisë dhe Rumanisë, të pranishëm aty të cilët shijuan bukurinë e traditave të Semanit, rakinë dhe gatimet  vendase si myzeqarë të vërtetë.

Ambasadore e Kroacisë: “E shijova shumë. E dua shumë Shqipërinë dhe njerëzit këtu”

Ambasador i Rumanisë: “Njerëz të këndshëm të afrueshëm dhe ushqime të zonës”

Subashi: “Synojmë të përcjellim traditën, kulinarinë. Jam i kënaqur për prezencën e të rinjve që tregon se këto po trashëgohen brez pas brezi”.

Koloriti i veshjeve folklorike, kabaja dhe këngët myzeqare, i dhanë kësaj dite përmasat e një feste të madhe në Myzeqe, që risillte gjithë memorien dhe pasurinë shpirtërore që kishte kohë e harruar.

Gazetare e ABC News, Fier: Adriana Mile

PARTIZANI-FESTA-E-TITULLIT.mpg_snapshot_00.02-1280x720.jpg
ent ela13:26 | 22/05/2019

Do të zhvillohet të dielën festa e titullit e Partizanit. Kryeqytetasit do të kenë mundësi të kremtojnë bashkë me tifozët në “Selman Stërmasi”, pas ndeshjes së Superligës ndaj Kukësit.

Nuk ka pse të presë edhe një javë tjetër. Tifozët e Partizanit janë fatlumë që vendimi për festën e titullit u mor në Federatë, dhe u la për këtë të diel.

Trofeu do të dorëzohet, pra, një javë përpara përfundimit të Superligës, në “Selman Stërmasi”, pas ndeshjes së radhës, asaj ndaj Kukësit.

Për mbështetësit e zjarrtë të të kuqve, nuk do të jetë e nevojshme të bëjnë rrugën e gjatë dhe deri diku të vështirë drejt Gjirokastrës, aty ku disa herë ka ndodhur të kurorëzohen kampionët e Shqipërisë.

Kujtojmë Kukësin e vitit 2017, ndërsa vetë trajneri Skënder Gega aty e bëri festën e titullit në 1987, Dinamo e pati në 1986 dhe Tirana e dikurshme, 17 Nëntori, në 1982.

Do të jetë një përsëritje, më pak dramatike, më pak spontane, por më e qetë, më e organizuar dhe ndoshta më masive sesa festa kur titulli u fitua matematikisht në mbyllje të derbit ndaj Tiranës, po në “Selman Stërmasi”.

Tifozët shpresojnë që skuadra e tyre të kthehet tek fitorja, ndryshe nga sa ndodhi menjëherë pas derbit, kur në një farë mënyre iu fal ndeshja Teutës në Durrës, me rezultatin 2-0 për vendasit.

Për më tepër do të jetë sfida me rivalin e vetëm direkt këtë kampionat, Kukësin, si dhe hera e fundit që tifozët do të kenë pranë lojtarët e tyre në sezonin 2018-2019. /ABC News Albania 24/7

 

pashke-tirane.jpg
G. P.15:12 | 28/04/2019

Qytetarë të shumtë në kryeqytet kremtojnë festën e Pashkës. Në këtë ditë të shenjte ata urojnë  paqe, dashuri dhe mirëqenie.

Besimtarë të shumtë ortodoksë në kryeqytet iu janë drejtuar Katedrales “Ngjallja e Krishtit” për të festuar ringjalljen e Krishtit. Në këtë ditë të shenjtë ata urojnë paqe dashuri dhe mirëqenie. Pas lutjeve në kishë, ata ndezin edhe dritën e shpresë përmes qirinjve.

Mishi i qingjit kulaçi tradicional dhe simboli i vezës së kuqe janë pjesë e tavolinave tradicionale të besimtarëve ortodoksë.

“Krishti u ngjall”, është “refreni” i kësaj dite festive, i cili shprehet njëzëri nga të gjithë besimtarët, të cilët ndezin qirinje dhe trokasin vezën e kuqe të Pashkëve që simbolizon gjakun e Krishtit.

Pashka është një nga festat më të mëdha të ortodoksëve./abcnews.al

ushqimi-1280x732.jpg
Sej rie16:50 | 20/04/2019

Besimtarët katolikë i janë drejtuar gjatë së shtunës në mëngjes kishave në të gjithë vendin për të bekuar shportën e ushqimeve të festës së Pashkës, ku simbol i kësaj feste mbetet veza e kuqe dhe buka e Pashkës.

Kështu nis rituali i festës së Pashkës. Janë besimtarët katolikë e jo vetëm që bekojnë ushqimin për ditën më të rëndësishme, atë të ngjalljes së Jezu Krishtit.

Thonë se marrin bekimin e Zotit për ushqimet e familjes e për këtë në mënyrë të veçantë ata i drejtohen kishës katolike me vezët e kuqe, simboli i ngjalljes së Krishtit dhe ripërtëritjes, ku nuk mungon buka e Pashkës, një shishe vere, djathi dhe hudhra të njoma, paralajmëruese të ardhjes së pranverës.

E gjithë familja mblidhet në tryezën e mbushur me gatimet më të mira, e më pas… nisin dhe vizitat tek familjarë dhe të afërm për të uruar sa më shumë mbarësi.

Prej disa ditësh në prag të festës së Pashkës nëpër dyqane apo dhe rrugë nuk kanë munguar produktet e dekoret  nga më të ndryshmet.

Ndryshe nga vitet e tjera, festa e pashkëve nuk është shoqëruar me rritje të ndjeshme të çmimeve për disa nga produktet që nuk duhet ti mungojnë tavolinës dhe simbolikës së festës më të rëndësishme të besimtarëve të krishterë./abcnews.al

klosi-frakull-1280x853.jpg
nev ila15:47 | 20/04/2019

Në Fier është organizuar festa e luleshtrydhes. Ministri i turizmit dhe mjedisit Blendi Klosi ka vlerësuar rekordin historik që ka arritur prodhimi i këtij fruti këtë vit në 100 deri 150 kg për dynym.

Mesa duket ky vit ka qenë i mbarë për kultivuesit e luleshtrydheve në Kafaraj të Fierit.

Ulja e çmimit te luleshtrydhes nuk ka mundur t’i shqetësoj  kultivuesit me punëtorë ndër zonat rurale të Fierit, kafarjotët, sepse u shpërblyen 4 fish, me bollëkun e prodhimit të sivjetshëm.

Nëse një vit më parë, nga një dynym, kultivuesit morën 30 kg luleshtrydhe, këtë vit prodhimi kapi rekordin historik 100-150 kg për dynym.

Kështu “Festa e Luleshtrydhes” erdhi ndryshe për dhjetra fermer të Kafaraj, Ades, Kashishtes, Sheqit. 4 herë më shumë lider në tregun vendas në prodhimin e brandit “Strawberry made in Kafaraj”.

Kësaj feste i është bashkuar edhe ministri i mjedisit dhe turizmit Blendi Klosi, i shoqëruar nga kryebashkiaku Armando Subashi, deputetë të qarkut të Fierit dhe qindra qytetarë të ardhur nga zonat përreth dhe Fieri.

Festa e Luleshtrydhes, në vitin e 3 – të të saj, organizuar nga Bashkia e Fierit, si asnjëherë më parë solli panairin e madh të luleshtrydhes me pjesëmarrjen e mbi 50 fermerëve, të prodhimeve vendase, gatimeve tradicionale dhe ëmbëlsirave me luleshtrydhe, të gërshetuara me elementët festivë dhe argëtues.

Ajo mbetet një nga festat më të bukura tradicionale të fshatrave në zonën e Fierit, në kuadër të turit etnokulturor “Hajd dalim nga Myzeqeja”, organizuar nga Bashkia e Fierit./abcnews.al

veliaj-dhe-kjosi-1280x657.jpg
ent ela15:30 | 22/03/2019

Një ndër festat lokale të agroturizmit u zhvillua në Lundër të Tiranës. Të pranishëm ishin dhe ministri i Mjedisit dhe Turizmit Blendi Klosi dhe kryetari i Bashkisë  Erion Veliaj të cilët folën për më shumë vëmendje ndaj fshatit.

Erion Veliaj ka një tjetër dasmë dhe në të i fton të gjithë. Kryebashkiaku i Tiranes tregon datën dhe vendin. Kryetari i Bashkise i referohet Kongresit të Partisë Socialiste ku Kryeministri Edi Rama do ta zyrtarizojë si kandidatin e socialisteve ne garën për Tiranën.  Ndërkohë Erion Veliaj tregon planet nëse qytetaret i besojnë një tjetër mandat për të qeverisur kryeqytetin.

Këto ErionVeliaj i bëri të ditura nga Lundra ku bashkë me ministrin e Mjedisit dhe Turizmit Blendi Klosi mori pjesë në festen lokale të agroturizmit dhe produkteve bio të zonës. Agroturizmi po zë gjithnjë e më shumë vend në ekonominë e Tiranës. Shumë familje i janë kushtuar zhvillimit të tij duke u bazuar në produktet e zonës./abcnews.al

sulltan-1280x688.jpg
ent ela14:50 | 22/03/2019

Besimtarët bektashinj festojnë sot ditën e Sulltan Novruzit, një festë që simbolizon pranverën dhe rigjallërimin.

Është dita e Sulltan Novruzit, festë që për bektashinjtë simbolizon ardhjen e pranverës, ringjalljen e besimit dhe shpresës e që pritet me shumë hare në çdo familje. Dita e Sulltan Novruzit njihet si ditëlindja e Imam Aliut në Qabé. “Novruzi” vjen nga persishtja dhe do të thotë “Ditë e re”, ndërsa “Sulltan” është titulli i lartë që tregon rëndësinë e kësaj dite.

Besimtarët në këtë ditë të shënuar urojnë njëri- tjetrin për më shume mbarësi dhe shprese. Si edhe në festa të tjera fetare, gatime të caktuara që ruhen si tradite brez pas brezi, lidhen pikërisht me ditën e Sulltan Novruzit.

Qindra besimtare bektashinj vizitojnë në këtë ditë selinë e Bektashinjve në Tiranë, ku mbahet ceremonia kryesore. Kryegjyshi Botëror i bektashinjve, Haxhi Dede Edmond Brahimaj  përveç urimit për të gjithë besimtarët kishte edhe një mesazh drejtuar të rinjve. Dita e Sulltan Novruzit festohet edhe në vende të tjera të botës myslimane, në ditë te ndryshme mes datave 20 deri 26 Mars./abcnews.al

sultan-1280x718.jpg
ent ela13:45 | 22/03/2019

Ditë feste dhe optimizmi pranveror është për Presidentin e Republikës Ilir Meta, festa e Sulltan Nevruzit. Nëpërmjet një statusi në rrjetet sociale kryetari i shtetit uron të gjithë shqiptarët e në veçanti besimtarët bektashianë kudo ndodhen.  Mesazhet e urimeve nuk kanë munguar as nga kryetari i Parlamentit Gramoz Ruçi. Mirëkuptimi fetar është eliksiri drejt tolerancës politike, shkruan Ruçi në mesazhin e tij. Ndërsa kryeministri Edi Rama zgjodhi të bëjë urimin me anë të një videoje  ku shfaqet amfiteatri i rikonstruktuar në Tiranë. Me të  njëjtën mënyrë  uroi edhe ish kryedemokrati Sali Berisha ku rikujtoi 22 Marsin e vitit 1992 ditën e parë të Demokracisë, ditën që ndau epokat dhe shkëputi shqiptaret nga regjimi me barbar i Evropës./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono