fëmijë

drejtori-i-policie.jpg
G. P.13:34 | 14/09/2019

Me qëllim shmangien e trafikut ditën e parë të shkollës, Policia Bashkiake në Tiranë ka hartuar një plan masash. Shërbime të përforcuara të uniformave blu do të jenë në kryqëzimet kryesore të kryeqytetit, ndërsa qytetarëve u kërkohet që të shmangin përdorimin e automjeteve personale.

Shmangni makinat personale për të dërguar fëmijët në shkollë. Drejtori i Policisë Bashkiake në Tiranë këtë apel ja drejton prindërve në prag të nisjes së vitit të ri mësimor, me qëllim evitimin e trafikut të rënduar në rrugët e kryeqytetit.

“Do fillojnë në ditën e parë të shkollës rreth 55 mijë nxënës në Bashkinë e Tiranës. Nëse të gjithë prindërit dhe mësuesit do t’i dërgojnë fëmijët e tyre në shkollë me mjet, trafiku do të vështirësohet. E mira është që të na mirëkuptojnë dhe ditën e parë të shkollës t’i shmangin sa më shumë mjetet në ato distanca të shkurtra që mund të arrihen qoftë në këmbë, me mjete të transportit publik etj”, tha Kapllani.

Shërbimet e Policisë Bashkiake tregoi Kapllani do të jenë të pranishme në rrugët hyrëse të qytetit për të mos lejuar lëvizjen e furgonëve që transportojnë mallra në orët e mëngjesit.

Bizneset të shmangin orarin e kufizimit të lëvizjes së mjeteve. Që është ora 07:00 deri në orën 09:00”, tha ai.

Nën monitorim do të jenë dhe automjetet që dërgojnë nxënësit nëpër shkolla. Ato duhet të jenë të licensuar pranë Bashkisë së Tiranës dhe duhet të plotësojnë të gjitha kushtet e sigurisë./ABC News Albania 24/7

dy-minorene.jpg
G. P.11:37 | 13/09/2019

Në Luz të Rrogozhinës jetojnë dy minorenë të cilët kanë një fat tragjik. Nëna e tyre i braktisi që kur ishin foshnje kurse babai i tyre i dhunonte dhe aktualisht ndodhet në burg.

Frika i mbërthen sapo bie nata. Kasollja e tyre është e rrënuar dhe herë pas here flenë në tarracë. Janë vetëm këtu në Luz të Rrogozhinës.

“Kemi fjet lart në soletë sepse nuk u rrinte brenda. Ishte shumë shumë vapë. Herë ky i vogli, vëllai u rrëzua prej soletës, u vra dhe ishim shumë frikë”.

Lorenci 16 vjeç dhe Frederiku 13 vjeç të hënën nuk do të shkojnë në shkollë, por në sallën e gjyqit. Do të dëshmojnë kundër babait të tyre, i cili i dhunonte. Xhevdet Lecini është në pranga pas denoncimit të bërë nga djemtë e tij. Kurse nëna i ka braktisur kur ishin foshnje.

“Mamanë nuk e njoh sepse ka ikur, ndërsa babai është në burg se na rreh”.

“Babi është në shoqërim në Kavajë. Babi na ka pas dhunuar, shumë këtë të voglin dhe unë e denoncova”.

Vëllai më i madh mundohet të kujdeset për të voglin. E dinë se skanë më askënd pranë vetes. U kujtohet se pasi u stërmunduan nëpër dyert e policisë së tre bashkive, policët i zbriten nga makina. Tani shkoni vetëm në shtëpi, jeni të rritur u thanë.

“Na çuan në Durrës, Kavajë, na çuan në Rrogozhinë dhe na lanë tek rruga kryesore dhe na thanë shkoni në shtëpi tani. U thashë na çoni deri në shtëpi se është larg. Ecni se jeni çuna të rinj thanë”.

Banoret e lagjes po tentojnë të sensibilizojnë opinionin. Fëmijët nuk kanë para për të blerë librat e shkollës, as për ushqime apo veshmbathje.

“Këta janë në mëshirë të fatit. Është arrestuar i ati dhe nuk kanë as psikolog, as mbështetjen nga askush”.

Me të vegjlit nuk dihen çfarë do të bëjnë. E sigurtë është që pranë tyre pas kësaj dite, vështirë të gjendet ndonjë humanist që do t’i shpëtojë nga vetmia dhe varfëria./ABC News Albania 24/7

femije-ne-siri.jpg
G. P.17:05 | 02/09/2019

Në Kosovë ende nuk ka nisur mësimi për fëmijët e kthyer nga Siria. Kështu deklaroi ministri në detyrë  i Arsimit Shyqri Bytyqi. Por të kundërtën thotë kolegu i tij Ministri i Drejtësisë Abelard Tahiri, i cili u ka uruar fëmijëve të kthyer nga Siria një vit të mbarë shkollor.

Fëmijët e kthyer muaj më parë nga zonat dhe kampet e ISIS-it në Siri e Irak, megjithatë sot nuk janë ulur në bankat e shkollave në Kosovë bashkë me fëmijët e tjerë. Kjo për shkak se kanë nevojë për trajtime shtesë në mënyrë që të kenë më lehtë integrimin në shoqërinë të cilës i përkasin.

Ata mësimin do të nisin në mënyrë graduale. Por ministri në detyrë i Drejtësisë, Abelard Tahiri, thotë të kundërtën, ai nëpërmjet një komunikate ka uruar nxënësit e kthyer nga Siria fillimin e vitit shkollor. Ai ka thënë se me kthimin e tyre, në bankat shkollore kemi vendosur një standard të ri në rrafshin global.

Janë gjithsej 38 fëmijë nga 74 të kthyer që sivjet pritet të ulen në bankat shkollore. Dy fëmijë janë të moshës 16-vjeçare që ndjekin mësimet joformale, 22 të moshës mbi 6 vjeç që fillojnë nga klasa e parë, 5 fëmijë  në arsim parashkollor ndërsa 9 të tjerë në kopshte.

Gjatë gjithë verës ministria e Punëve të Brendshme është marrë me integrimin e 74 fëmijëve të kthyer nga zonat e luftës, Siria dhe Iraku në mënyrë që të kenë më të lehtë edhe përballjen e tyre me procesin mësimor.

Pas kthimit në mësim të fëmijëve të kthyer nga vatrat e luftës si Siria e Iraku sfidë tjetër për institucionet e Kosovës do të jetë me fëmijët nënat e të cilëve janë në arrest shtëpiak dhe nuk mund t’i shoqërojnë fëmijët e tyre në shkollë./ABC News Albania 24/7

kamp-veror.jpg
G. P.15:03 | 02/08/2019

Fëmijë të kategorive të ndryshme sociale të moshave nga 3 deri në 13 vjeç prej 15 korrikut, ora 9 e mëngjesit deri në 2 të drekës, nga e hëna në të premte, ndjekin kampin veror në liqenin artificial në Tiranë.

Kampi veror organizohet nga bashkia, e cila çdo ditë rezervon një aktivitet të ri për të vegjlit. Profesionistë të fushave të ndryshme çdo ditë ndajnë përvojën e tyre me fëmijët. Synimi i këtij kampi nuk është vetëm argëtimi, por edhe kalitja e trupit dhe e mendjes. Këto 15 ditë kampi është vizituar nga rreth 900 fëmijë./ABC News Albania 24/7

zjarri-ne-drashovice.jpg
G. P.13:45 | 18/07/2019

Një tjetër familje ka mbetur pa shtëpi pas shpërthimit të bombolës së gazit në një banesë në fshatin Drashovicë të Vlorës. Aktualisht familja Hoxha nuk ka një strehë, por fatmirësisht pjesëtarët e saj kanë shpëtuar pa lëndime nga ngjarja.

Enkelejda Hoxha bashkë me familjen e saj kanë mbetur në qiell të hapur. Një bombol gazi shpërtheu në banesë duke shkatërruar totalisht shtëpinë ku banonin. Familjarët ishin në banesë në momentin kur ndjenë erën e gazit dhe dolën menjëherë jashtë duke shpëtuar pa lëndime.

Pavarësisht ndërhyrjes së forcave zjarrfikëse dhe policisë nga shtëpia nuk shpëtoi asgjë. Tani 6 pjesëtarët e familjes nuk kanë ku të strehohen. Nusja e shtëpisë Enkelejda Hoxha mes lotëve bën apel për ndihmë.

“Fatkeqësisht më është djegur shtëpia, jam në qiell të hapur. Të ardhura nuk kam, kjo është familja ime. Nuk kemi gjendje ekonomike. Nuk kam mundësi që të ndërtoj shtëpinë”, tha Hoxha.

Shpërthimi i bombolës në fshatin Drashovicë ishte rasti i dytë i regjistruar gjatë këtyre ditëve në Vlorë. Një tjetër bombol gazi shpërtheu në familjen Selimi në Selenicë duke lënë të plagosur burrë e grua./ABC News Albania 24/7

LUSHNJE-1.jpg
G. P.08:54 | 17/07/2019

Një 30-vjeçar në Lushnje pas një sherri të çastit me të atin e ka qëlluar këtë të fundit me sëpatë në kokë duke e plagosur rëndë. Mësohet se konflikti ka ndodhur në hyrjen e pallatit ku banonin babë e bir për shkak se 60-vjeçari nuk i ka dhënë paratë që kërkonte djali.

Djali qëllon babain me sëpatë në kokë pasi ky i fundit nuk i dha paratë që i kërkoi i biri. Ngjarja ka ndodhur rreth orës 7:30 të mëngjesit në lagjen “Xhevdet Nepravishta” të qytetit Lushnje.

Sipas policisë në vendngjarje, at e bir Kujtim dhe Dritan Veliaj, kanë debatuar fillimisht në banesë, pastaj në hyrjen e pallatit djali 30-vjeçar pasi ka marrë sëpatën e ka qëlluar disa herë.

Kujtim Veliaj, 60 vjeç, mori plagë të rënda. I plagosuri fillimisht u transportua në spitalin e Lushnjes dhe më pas u dërgua drejt Tiranës dhe ndodhet në reanimacion.

Sipas policisë, autori i këtij krimi, Dritan Veliaj që u kap në flagrance njihet si person i dhunshëm në familje. Babai i tij ishte me urdhër mbrojtjeje ndaj të birit, megjithëse jetonin nën të njëjtin apartament në katin e pestë të këtij pallati.

Madje 30-vjeçari pesë vite më parë ka qenë i dënuar për dhunë në familje dhe sot ngjarja përsëritet. /ABC News Albania 24/7

velipoje.jpg
G. P.12:00 | 06/07/2019

Vetëm 30 kilometra larg nga qyteti i Shkodrës, ndodhet  plazhi i Velipojës.

Nga më të mëdhenjtë në bregdetin e Adriatikut, me një gjatësi prej 14 kilometrash ai frekuentohet kryesisht nga turistët Kosovarë, për shkak edhe të afërsisë gjeografike.

“Uji është shumë i mirë, për rërë mos të flasim fare. Kjo rërë është ar, por si duket ende nuk po ia dini vlerën”, thotë një Turist nga Kosova.

Thellësia e vogël e detit në brigjet pranë plazhit e bën atë të përshtatshëm për fëmijët e vegjël.

“Plazhi më perfekt për fëmijët të paktën. Ndoshta jugu mund të jetë më i bukur, por nuk është edhe aq i përshtatshëm për fëmijët”, thotë një nënë e re.

Si rrallë në Shqipëri, në plazhin e Velipojës nuk mungojnë vrojtuesit e plazhit, ndërsa kullat janë në një distancë shumë të afërt nga njëra tjetra.

Përveç shezllonave të privatëve, edhe plazhet publikë në Velipojë janë me bollëk.

Të gjitha këto kanë bërë që numri i turistëve të vijë në rritje nga viti në vit.

Për zezonin veror, edhe njësia administrative e Velipojës ka marrë masat e saj.

Për tu ardhur në ndihmë pushuesve shqiptarë dhe të huaj me informacione mbi Velipojën dhe zonat për-rreth është ngritur edhe një infopoint për turistët.

Nëse nuk e keni vendosur ende se ku do ti kaloni pushimet këtë verë, Velipoja mund të jetë një nga destinacionet më të përshtatshme për ju.

Klan Plus

semundje.jpg
G. P.16:00 | 03/07/2019

Në Kukës, temperaturat e larta kanë dhënë shumë probleme në shëndetin e fëmijëve. Brenda ditës në urgjencën e spitalit kërkojnë ndihmë më shumë se 50 fëmijë.

Të vegjlit në Kukës nuk po i përballojnë temperaturat e larta. Megjithëse në këtë rajon ato janë dy-tre gradë më ulët se pjesa e ultësirës, në spital ka fluks fëmijësh.

“Për sa i përket kësaj temperaturës së lartë që ekziston në rrethin tonë, rekomandojmë të gjithë prindërit për kujdesin që duhet të tregojnë që fëmijët të mbahen në ambiente të freskëta, të mos qarkullojnë në temperatura të larta, zakonisht të nxirren dhe të shëtiten nga ora 9:00 deri në 10:00. Në 10:00 të futen brenda”.

Çdo ditë paraqiten mesatarisht 50 fëmijë me shqetësime shëndetësore që sipas mjekeve janë shkak i motit.

“Numri i pacientëve që vijnë varion për 24 orë është nga 41-50 vizita. Zakonisht janë diarretë, të vjellat. Këto komplikacione vijë si rezultat i temperaturave, si rezultat i ushqimeve të ndenjura, ushqime jo të përshtatshëm për fëmijët”.

Metereologët parashikojnë se të paktën edhe kjo javë do të mbyllet me temperatura të larta, kurse mesi i javës tjetër në Kukës do të shënojë ulje deri në 28 gradë celsius./ABC News Albania 24/7

agresivitet.jpg
G. P.15:46 | 06/06/2019

Në Lezhë numri i divorceve është rritur ndjeshëm. Por pasojat e këtij fenomeni, duken shumë më problem. Prindërit agresivë pengojnë fëmijët të takohen me prindin tjetër.

Një baba që kërkon të takojë fëmijët e tij. I divorcuar me gruan, nuk është arritur një kompromis edhe as është gjetur ndonjë zgjidhje përmes ligjit.

“Unë kam dy fëmijë dhe që dy vite i kam takuar shumë rrallë. Arsyeja është s gruaja vazhdimisht ka influencuar fëmijët. Vazhdimisht u thotë fëmijëve se babai është i keq edhe unë po e vuaj shumë këtë pjesë”, u shpreh një i divorcuar.

Numri i divorceve në Lezhë ka ardhur në rritje. Vitin e kaluar u regjistruan 305 raste, kurse deri në fund të Majit të këtij viti 110 kërkesa për divorc. Por shqetësues është fakti që agresiviteti mes prindërve po reflektohet tek fëmijët.

Besmir Frroku, ekspert psikolog vlerësues pranë Gjykatës së Lezhës thotë se nevoja për të vlerësuar situatën duhet të jetë e menjëhershme. Sipas tij askush nuk sheh se çfarë ndodh me fëmijët.

“Fëmijët po rriten me shumë pasoja psikologjike që fillojnë dhe reflektohen në zhvillimin e tyre të më vonshme”, tha ai.

Sipas avokatit Erjon Gjoni kërkesat më të shumta për divorce bëhen nga femrat. Ato ankohen për dhunë dhe probleme ekonomike.

“Përgjithësisht janë femrat ato që synojnë dhe që drejtohen nga avokati, fillimisht për konsulenca. Ka raste kur këto femra vijnë nga një moment kur ndaj tyre është ushtruar dhunë”, tha ai.

Niveli kulturor i bashkëjetuesve që shkojnë drejt divorcit prezanton edhe situata të ndryshme tek fëmijët. Besmir Frroku flet për fenomenin e alenimit prindëror, kur njeri prind ndikon keq për prindin tjetër, nxit sjellje agresive.

Ky shqetësim ndodh edhe brenda dyerve të gjykatës thotë avokati Erjon Gjoni që sipas tij mes çifteve ka pothuajse mungese totale komunikimi dhe pasqyruar me konflikte verbale.

“Shumë herë ka raste kur prindërit në mënyrë të njëanshme jashtë ambienteve dhe sallave të gjyqit tentojnë të ndikojnë tek të miturit në lidhje me shprehjen e vullnetit se te cili prind dëshirojnë të rrinë. Kjo sjell një dualizim të mendimit që jep pastaj i mituri para gjykatës”, tha avokati.

“Shoh shumë fëmijë që po bëhen agresivë si pasojë e sjelljeve agresive që kanë prindërit”, tha psikologu.

Ekspertët kanë vërejtur se të divorcuarit që janë banorë në Shqipëri janë në konflikte shumë të ashpra. Kurse një situatë ndryshe ndodh me prindërit shqiptarë të divorcuar që jetojnë vendit./ABC News Albania 24/7

notre-dame-1280x853.jpg
G. P.15:05 | 04/06/2019

Fëmijët dhe gratë shtatzëna, të cilët jetojnë në zonën e Notre Dame, duhet të masin nivelin e plumbit të pranishëm në gjak, si pasojë e zjarrit që përfshiu katedralen në 15 Prill. Autoritetet shëndetësore e morën këtë vendim pas rastit të një fëmije, i cili kishte nivelin e plumbit në gjak tej normave të lejuara.

Familjeve me fëmijë nën moshën 7 vjeç, të cilët banojnë në zonën e Notre Dame dhe grave shtatzëna, iu është kërkuar nga autoritetet shëndetësore në Paris, që të shkojnë tek mjeku për të matur sasinë e plumbit në gjak.

Vendimi u mor pas regjistrimit të rastit të një fëmije, niveli i plumbit në gjakun e të cilit ishte mbi kufirin e lejuar. Agjencia rajonale e shëndetësisë e cila monitoron pasojat e zjarrit të katedrales në 15 prill, ka ndërmarrë dhe një hetim ambiental për të identifikuar praninë e plumbit në zonat e frekuentuara nga fëmija.

Por dhe për të sinjalizuar anomali të tjera si pasojë e zjarrit. Ky hetim ka si objektiv që faktorët e ekspozimit ndaj plumbit të mos ekzistojnë më. Autoritetet shëndetësore theksojnë se një nivel anomal plumbi i pranishëm në gjak për shkak të një arsye jot ë qartë, jo domosdoshmërisht kërkon një terapi të veçantë mjekësore./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono