Fatmir Xhafaj

urdhri-i-xhafajt.jpg
G. P.17:40 | 11/04/2019

Grabitja për herë të dytë e parave në Rinas mund të ishte parandaluar. Kjo nëse policia do zbatonte një urdhër të ministrit të kohës Fatmir Xhafaj në Mars të 2018-s, që kërkonte shoqërimin e vlerave monetare gjatë transportit me forca policore.

Grabitja e parave brenda aeroportit “Nënë Tereza” mund të ishte parandaluar. Kjo mund të ndodhte nëse Policia e Shtetit do të kishte zbatuar urdhrin e Marsit të vitit 2018 të ish-ministrit të Brendshëm, Fatmir Xhafaj.

Ky urdhër parashikon “Ruajtjen dhe Sigurimin e Objekteve te Sektorit Bankar”, sigurimin dhe shoqërimin i vlerave monetare, materiale dhe sendeve të çmuara gjatë transportit.

Për transportin e vlerave monetare mbi shumën 900 e 50 milionë lekë, përveç masave të parashikuara ish-ministri Xhafaj urdhëronte shërbimin e sigurisë fizike dhe strukturat e policisë në territorin ku do të lëviztë eskorta të planifikonin dhe merrnin masa shtesë sigurie.

Për këtë çështje u pyet nga gazetarët dhe Sekretari i Përgjithshëm i Shoqatës së Bankave i cili dha këtë përgjigje.

“Kjo është sipas riskut. Shoqëritë e ruajtjes lajmërojnë policinë kur ka transport të vlerave monetare dhe nëse ka shumë të konsiderueshme dhe gjëra që bankat kërkojnë situata që paraqet rrezikshmëri është me risk të lartë mund të kërkojnë shoqërim edhe nga, por jo domosdoshmërisht duhet të jetë policia që t’i shoqërojë”, tha Spiro Brumbulli.

Urdhri parashikonte gjithashtu masa shtesë sigurie gjatë transportit të thasëve me valutë si përdorimi i GPS-it, bojës ngjyrosëse me kod për çdo bankë,  kamerat e regjistrimit apo radiot e komunikimit etj. Një pikë tjetër kjo që nuk u zbatua  më 9 Prill.

Në kushtet kur paratë e tre bankave me destinacion Austrinë ranë në duart e grabitësve e urdhri i një ministri u shkel, kush duhet teë mbajë përgjegjësi për vjedhjen në sheshin që duhet të jetë më i sigurti në vend?/abcnews.al

xxhafaj-dhe-lleshaj.jpg
G. P.16:38 | 28/03/2019

Akti i parë që kreu në detyrën e Ministrit të Brendshëm dy vjet më parë ishte nisja e procesit për organizimin e vettingut për të gjithë punonjësit e Policisë së Shtetit. Pritshmëritë për të larguar efektivët e lidhur me krimin ishin që në janar të vitit të shkuar, por nuk ndodhi. Dy vjet më pas pasardhësi i Fatmir Xhafajt vjen me një propozim të ri përpara deputetëve.

Lleshaj: “Problemi themelor  që lidhet me këtë situatë ka të bëjë me kohën, e cila është në dispozicion për të mbyllur procesi e Vettingut. Sipas ligjit aktual, procesi i Vettingut për 13 mijë punonjës të Ministrisë së Brendshme duhet të mbyllet në marsin e vitit të ardhshëm, ndërkohë që procesi ende nuk ka filluar dhe praktikisht është e vështirë, për të mos thënë e pamundur, që ky proces të mbyllet ashtu sikundër ligji e parashikon, pra në marsin e vitit të ardhshëm”.

Kjo është pika e parë që nuk e bind ish-ministrin Fatmir Xhafaj se ligji për vettingun në polici duhet ndryshuar.

Xhafaj: “Keqardhje që me alibi false nuk u bë i zbatueshëm në kohë, por për dy vite futëm në procesin e zbatimit në drejtësi. Gjithsesi më mirë se vonë se kurrë, nuk është herezi ndryshimi i një ligji, por në vlerësimin tim ndryshimet nuk janë të duhura në disa arsye, mund të cënohet pavarësia e procesit”.

Procesi i ri i kryerjes së vettingut në polici që propozon Ministri Lleshaj i jep mundësinë Shërbimit për çështjet e brendshme dhe ankesat që të kalojnë të shndrrohet në një strukturë të rëndësishme për realizimin e vettingut.Për këto ndryshime ish ministri shprehet kundër.

Lleshaj: “Ndryshimi i dytë që propozohet qëndron në faktin SHÇBA-ja do të shndërrohet në një strukturë, e cila do të kryejë më tej Vettingun për pjesën e mbetur të Policisë së Shtetit, pra fazën e dytë dhe të tretë, për punonjësit e nivelit të mesëm dhe atyre të nivelit bazë. Pra, ndryshe nga sa e parashikon ligji aktual ku ky vlerësim në fazën e dytë dhe të tretë do të kryhej nga struktura ad-hoc, me propozimet e bëra ky vlerësim duhet të bëhet nga vetë SHÇBA-ja”.

Xhafaj: “Kemi të bëjmë me skanim të vecantë, dhe nuk mund të bëhet nga SHCBA, në varësi të ministrit. Një nga sukseset e vettingut në drejtësi është se është i besueshëm nga të gjithë. Së dyti cënohet cilësia dhe shpejtësia e procesit. SHCBA-ja nuk ka kapacitetet për ta kryer këtë proces. Ti besojmë vettingun 13 mijë punonjësve një institucioni që ka 100 punonjës vlerësoj se do ta ngadalësojë procesin”.

Ministri Sandër Lleshaj nuk ka gjetur mirëkuptimin e ish ministrit Fatmir Xhafaj as për argumentin që i dha mbi faturën financiare.

Lleshaj: “Një arsye tjetër që ka të bëjë me kërkesën për të ndryshuar ligjin lidhet me volumin e madh administrative që kërkohet për të realizuar atë, kërkohet që rreth 240 punonjës me kohë të plotë, nga strukturat e Policisë dhe të SHÇBA, të shkëputen nga funksioni i tyre bazë dhe ti dedikohen Vettingut me kohë të plotë, pra kjo është një volum shumë i madh administrativ dhe këtij volumi administrativ  i bashkëshoqërohet dhe një faturë jo e parëndësishme financiare, e cila shkon rreth 3 milionë dollarë, kosto e parashikuar e këtij procesi”.

Xhafaj: “Argumenti financiar nuk është i justifikuar, ajo shumë që mendohet se do të kursehet 2 mln euro, është e papërfillshme nga ajo që pritet. Por një gjë është pozitive,nuk preket thelbi i vlerësimit dhe kriteret”.

Pavarësisht mos ndryshimit të thelbit, ish-ministri Fatmir Xhafaj zgjodhi të abstenojë ndërkohë që ndryshimet për ligjin e vettingut në total morën 76 vota pro  6 kundër e  6 abstenim. /abcnews.al

MBULIM-RAMA-CON-LLESHIN-TE-MINISTRIA-E-BRENDSHME.mpg_snapshot_00.09-1280x720.jpg
G. P.15:07 | 06/11/2018

Gjeneral Sandër Lleshi u zyrtarizua ministër i komanduar i punëve të Brendshme. Këshilli i Ministrave fillimisht ka emëruar Sandër Lleshin në postin e zv/ ministrit të Brendshëm, ndërsa më pas Rama e ka komanduar në drejtimin e këtij dikasteri në vendin e Fatmir Xhafajt.

Rreth orës 12:30 të së martës, kryeministri Edi Rama iu drejtua ministrisë së Brendshme bashkë me Gjeneral Sandër Lleshi, të cilin e kishte emëruar zëvendësministër të Brendshëm.

Në një akt të rrallë, kryeministri ka bërë vetë prezantimin e zëvendësministrit që do drejtojë në vazhdim Ministrinë e Brendshme, pas dorëheqjes së Fatmir Xhafajt.

Ky i fundit u paraqit në zyrën e tij më herët sesa të vinte shefi i qeverisë së bashkashku me pasuesin e tij.

Të njëjtën gjë bënë edhe zëvendësmistrat e tjerë si edhe Drejtori i Pëgjithshëm i Policisë, Ardi Veliu.

Tashmë ministria e Brendshme kthehet në superministri me pesë zëvendësministria dhe për herë të parë pa një titullar siç është posti i ministrit të Brendshëm. Kjo zgjidhje e kushtëzuar ndodhi pasi, Presidenti i Republikës, nuk dekretoi Sandër Lleshin në vendin e lënë bosh pas dorëheqjes së ish ministrit Fatmir Xhafaj.

Prezantimi i Leshit ka patur gjithë elementët ceremonialë e në ministri ishte i pranishëm edhe ministri i dorëhequr Fatmir Xhafaj për t’I kaluar detyrën pasardhësit të tij në funksionin e zëvendësministrit.

Gjithcka zgjati rreth 30 minuta pa praninë e mediave, ndërsa në dalje, nuk pati asnjë koment për gazetarët që prisnin para ministrisë së Brendshme.

Ishte po kryeministri Rama që njoftoi emërimin e Lleshit me vendim qeverie. Në profilin e tij në Instagram, Rama publikoi një foto me Sandër Lleshin në zyrën e kryeministrit, e me komentin “ Me drejuesin e ri të Punëve të brendshme, gjeneral Sandër Lleshin pas mbledhjes së qeverisë, që vendosi emërimin e tij z.ministër i Brendshëm”. /abcnews.al

Kuvend-933x445.jpg
G. P.10:46 | 06/11/2018

Kuvendi ka miratuar me 75 vota pro dekretin e presidentit për shkarkimin e ministrit të Brendshëm Fatmir Xhafaj. Në një seancë të jashtëzakonshme të thirrur nga grupi parlamentar socialist, mazhoranca vendosi ti hapë rrugë emërimit të Gjeneral Sandër Lleshit në postin e zëvendës ministrit të Brendshëm i cili do të ketë detyrat e numrit një të ministrisë. Këtë e konfirmoi kryeministri Edi Rama gjatë fjalës së tij në seancën e sotme parlamentare.

Kreu i qeverisë tha se po sot do të mblidhet qeveria për të emëruar Sandër Lleshin në këtë detyrë. Kryeministri Edi Rama ka deklaruar se presidenti i republikës ka shkelur kushtetutën me mos dekretimin e emrit të propozuar prej tij si ministër i Brendshëm. Mëgjithatë kreu i qeverisë shprehet se nuk i ka humbur shpresat se në ditët në vijim kryetari i shtetit do të reflektojë pavarësisht se afatet ligjore kanë përfunduar./abcnews.al

XHAFAJ-FJALIMI-FUNDIT-1280x720.jpg
ent ela21:50 | 05/11/2018

Në fjalimin e tij të fundit si Ministër i Brendshëm, 9 ditë pas dorëheqjes, Fatmir Xhafaj nuk zbuloi ndonjë motiv për largimin e tij. Por Xhafa nuk la pa përmendur shantazhe që i janë bërë nga agjensi ligjzbatuese vendase. Fatmir Xhafaj vlerësoi si të përmbushura 6 prioritetet në krye të Ministrisë së Brendshme.

Gjatë nëntë ditëve pasuese të doreheqjes së tij nga posti i ministrit të Brendshëm, Fatmir Xhafaj, nuk ndau publikisht arsyet që e ccuan në këtë vendim. Një motiv konkret ai nuk dha as në takimin e fundit me ish-vartësit në Ministrinë e Brendshme, një ditë para se Kuvendi të votojë shkarkimin e tij.

“Po largohem nga kjo detyrë, rrjedhojë e një vendimi të pa imponuar nga ndonjë rrethanë objektive, apo subjektive, por si një vendim i marrë besoj në kohën e duhur, pasi përmbusha, besoj, më së miri objektivat kryesore që i vura vetes në ditën kur vendosa ta pranoja dhe ripranoja këtë sfidë”.

Ish-ministri më i sulmuar nga opozita nuk la pa i faturuar asaj në fjalimin e fundit manipulimin e audio-përgjimit për vëllain e tij. Por veç saj, Xhafaj akuzoi direkt si të përfshira edhe segmente të institucioneve shtetërore, por pë i identifikuar me emër.

“Duke përfshirë këtu edhe manipulimin komplet kriminal të bërë në çështjen e audio- përgjimit me një qëllim final: shantazhin ndaj meje në funksionin e ministrit. E për fat të keq në këtë orkestrim duket se janë përfshirë edhe segmente të disa agjencive ligj zbatuese vendase. Dua të nënvizoj edhe faktin se ky sulm jo vetëm ka në themel diletantizmin politik të opozitës, por ai edhe për këtë shkak, ka pas tij interesat e botës së krimit”.

Xhafaj tha se nuk ka rëndësi se sa kohë rri ulur në një karrige pushteti, po se çfarë bën e se si sillesh me të.

“Ka njerëz që e quajnë të rëndësishme uljen në një karrige pushteti dhe qenien pjesë e administrimit të tij si forcë mbi të tjerët dhe një pjesë e tyre jo e vogël e shohin pushtetin edhe si mundësia e artë për pasuri e përfitime personale”.

Para ish-vartësve Xhafaj vlerësoi si të përmbushura gjashtë prioritetet, nga lufta me kanabisin, bllokimi i kufinjve për azilkërkuesit dhe operacionet “Forca e Ligjit” e “Ndërshkimi i ‘të fortëve'”.

“Shqipëria nuk është më në hartën e vendeve evropiane ku kultivimi i kanabisit është një fenomen.

“Me një punë të mirë organizuar, ne mundëm që brenda 12 muajve t’i kthejmë shifrat e azil kërkimit nga një histori dështimi në një histori suksesi”.

“Në afro 11 muaj janë zhvilluar rreth 22 operacione policore, janë goditur dhë ndëshkuar 11 grupe të strukturuara kriminale të skeduara nga TFSQ, me mbi 175 persona të arrestuar drejtues dhe anëtarë të këtyre grupeve kriminale, si dhe janë sekuestruar vetëm prej tyre rreth 20 milionë euro pasuri”.

Në përfundim të fjalës së tij, Xhafaj kërkoi nga ish-vartësit luftë pa kompromis ndaj krimit dhe paligjshmërisë, si shërbimi më i madh që mund t’i bënin vendit dhe të ardhmes./abcnews.al

 

MBULIM-GRUPI-PS.mpg_snapshot_00.11-1280x720.jpg
G. P.10:42 | 05/11/2018

Grupi parlamentar i Partisë Socialiste ka vendosur që nesër në orën 10:00 do zhvillohet seancë e jashtëzakonshme parlamentare, ku do të votohet dekreti i presidentit për shkarkimin e Fatmir Xhafës, pas dorëheqjes së tij si ministër i Brendshëm. Në mbledhjen e grupit të deputetëve socialistë është vendosur që Sandër Lleshi të emërohet zv/ministër i Brendshëm me kompetencat e ministrit. Ky vendim u mor një ditë pasi kryeministri Edi Rama u takua kokë më kokë me presidentin e republikës Ilir Meta./abcnews.al

KRONIKE-XHAFAJ-MBETET-NE-DETYRE-ABC-M-4-T-2-HD.mpg_snapshot_00.26-1280x720.jpg
G. P.17:55 | 01/11/2018

Fatmir Xhafaj do të ushtrojë funksionet e ministrit të Brendshëm deri në marrjen e detyrës nga pasardhësi i tij, sipas parimit kushtetuës të vazhdimësisë së punës së Këshillit të Ministrave. Kreu i shtetit ka afat deri të shtunën për dekretimin e Sandër Lleshit.

Prej të shtunës kryeministri ka përcjellë në presidencë dy vendime, një për pranimin e dorëheqjes së ministrit të Brendshëm Fatmir Xhafaj dhe një tjetër për emërimin e Sandër Lleshit në vend të tij. Edhe pse kanë kaluar 5 ditë nga largimi de jure i Fatmir Xhafajt nga posti i ministrit, de facto ky i fundit vijon të ushtrojë detyrën e ministrit të rendit. Arsye është bërë mungesa e shprehjes me dekret nga Presidenti Ilir Meta, për propozimin e kryeministrit për emërimin e Sandër lleshit në krye të diksterit të rendit.

Presidenti Ilir Meta edhe pse firmosi brenda pak orëve propozimin e largimit të Fatmir Xhafajt, nuk është shprehur ende lidhur me propozimin e dytë të shefit të ekzekutivit Rama. Bazuar në kushtetutë Presidenti ka një afat 7 ditor për t’u shprehur për shkarkimin dhe emërimin e minsitrave, dekret i cili më pas shqyrtohet nga Kuvendi brenda 10 ditëve. E ndërsa afati 7 ditor i presidentit për shprehjen me dekret për emërimin e Sandër Lleshit në postin e ministrit të Brendshëm, skadon të shtunën e 3 nëntorit, ministri i dorëhequr Xhafaj duhet të qëndrojë në detyrë deri në emërimin e pasardhësit të tij.

Kjo sipas nenit 106 të Kushtetutës i cili përcakton vijueshmërinë e punës së kryeminsitrit dhe kabinetit të tij deri në marrjen e detyrës nga zëvendësuesit. Duket se minsitri i dorëhequr Xhafaj, do duhet të ushtrojë funksionet nga të cilat u tërhoq edhe për pak kohë, deri në shprehjen me dekret të presidentit Meta lidhur me pasardhësin e propozuar nga kryeministri, si dhe finalizimin e këtij procesi përmes votimit në Kuvend./abcnews.al

xhafajjjj.png
G. P.17:28 | 30/10/2018

Ministri i Brendshëm në detyrë Fatmir Xhafaj, pas dorëheqjes nga detyra ka nisur fushatën për kryetarin e Bashkisë së Tiranës Erion Veliaj. Xhafaj bashkë me Veliajn takuan banorët e njësisë administrative numër 10.

Pas dorëheqjes nga drejtimi i Ministrisë se Brendshme Fatmir Xhafaj për herë të parë publikisht del në krah të kryetarit të Bashkisë së Tiranës. Banorëve të njësisë administrative numër dhjete, Xhafaj i kërkoi votat për Erion Veliajn në zgjedhjet e ardhshme vendore.

Fatmir Xhafaj, ministër i Brendshëm në detyrë: “Ka njerëz që ulen në një karrige dhe janë të kënaqur se kanë kapur një karrige; ka njerëz që marrin pushtet dhe janë të lumtur që janë të pushtetshëm; ka njerëz që vijnë për të shërbyer, që kanë një mision që duan të lenë një gjurmë përmes mundësisë që u jep pushteti dhe ky është Erion Veliaj! Katër vjet më parë na është dashur të flisnim se kush është Erion Veliaj, kurse sot nuk na duhet fare të flasim sepse ai dhe ekipi i tij duhet të tregojnë çfarë punësh kanë bërë dhe janë duke bërë. Puna dhe rezultatet janë treguesi më i mirë, CV-ja më e mirë për cilindo. Erion Veliaj hyri për një mision dhe me punë, me rezultate, me atë çfarë ka bërë, është duke kërkuar një mandat të dytë, jo për të vazhduar të qendrojë në atë karrige, por për të shërbyer dhe për ta çuar përpara këtë mision. Gjëja më e mirë e tij është puna”.

Ndërsa vetë kryetari i Bashkisë vijoi fushatën për Partinë Socialiste me qëllim tha Veliaj, që ritmi i punëve në qytet të mos ndalet. Ndërkohë shigjetoi opozitën në këshillin bashkiak të Tiranës.

Erion Veliaj, kryetar i Bashkisë së Tiranës: “Na duhet sot një shumicë në Këshillin Bashkiak, ashtu siç kemi një shumicë në Parlament. Buxheti që po diskutojmë duhet të kalojë në Këshillin Bashkiak, në të cilin sot fatkeqësisht nuk kemi shumicën absolute. Jam i sigurt se ata të opozitës do të vijnë në ditën e votimeve, por duhet t’i pyesim: Ej, ku keni qenë? Pse keni tre vjet që nuk shkoni në mbledhjet e Këshillit Bashkiak, që nuk votoni ndihmën ekonomike, pagesat e aftësisë së kufizuar, që nuk votoni kompensimin e energjisë, banesat sociale, bonusin e qirasë për familjet që s’përballojnë dot çmimet e tregut? Pse keni tre vite që nuk votoni asgjë në Bashkinë e Tiranës?”

Në dëgjesën me banorët e Njësinë 10 për buxhetin e vitit të ardhshëm, kryetari i bashkisë bëri të ditur se shumë shpejt do të nisë rehabilitimi i parkut “Rinia”./abcnews.al

MBULIM-BASHA-MANEZ.mpg_snapshot_00.13-1280x720.jpg
G. P.11:15 | 28/10/2018

Çfarëdo të thuhet nga kabineti qeveritar apo përkrahësit e qeverisë mbi arsyet që bindën ministrin e Brendshëm, Fatmir Xhafaj, të dorëhiqet nga detyra, e vërteta është ndryshe deklaron kryetari i Partisë Demokratike, Lulzim Basha.

“Fatmir Xhafaj u largua nga frika e përballjes me përgjegjësitë e tij ligjore dhe politike për manipulimin e hetimit ndaj vartësve të tij, drejtorit të Përgjithshëm Ardi Veliut dhe njerëzve të tjerë të përfshirë në manipulimin e dosjes hetimore për vëllain e tij”, tha Basha.

Kjo është e vërteta e vetme sipas Lulzim Bashës që i përgjigjet edhe atyre që dyshojnë se dorëheqja lidhet me njoftimin e një deklarate për shtyp të ish-ministrit Saimir Tahiri.

“Nuk ka meritë as ministri tjetër i Habilajve dhe askush tjetër për largimin e Fatmir Xhafës. Largimi i Fatmir Xhafës është dëshmi e forcës së pathyeshme të opozitës dhe Partisë Demokratike bashkë me qytetarët shqiptarë në luftën kundër krimit”, theksoi Basha.

Jo vetëm ia jep të gjitha meritat opozitës për dorëheqjen e Fatmir Xhafajt, por përfshin edhe faktorin ndërkombëtar, të cilit i janë janë hapur sytë sipas Lulzim Bashës.

“Operacioni policor i nisur me insistimin e faktorit ndërkombëtar nxorri në pah dhe vërtetoi atë që ne si opozitë e kemi thënë prej ditës së parë. Ky ishte momenti kur faktori ndërkombëtar e kuptoi se Fatmir Xhafaj nuk është gjë tjetër veçse një ushtar i bindur i Edi Ramës. Fatmir Xhafaj iku me turp. Iku i demaskuar para faktorit ndërkombëtar si njeriu i cili në fund të fundit është i detyruar të zbatojë urdhërat e bosit të tij si një vasal i Edi Ramës”, nënvizoi kreu i demokratëve.

Këto deklarata, kryetari i Partisë Demokratike i bëri nga Manza, një ndër zonat që qeverisen nga kryebashkiaku Vangjush Dako. Këtij të fundit i tregon se akrepat e orës së tij politike do të ndalen shumë shpejt.

“Vangjush Dako e ka vendin në burg, dhe në burg do të shkojë një orë e më parë, për korrupsionin, për vjedhjen, për bashkëpunimin me kriminelët”, u shpreh Basha.

E ka edhe një thirrje të fundit Lulzim Basha e kjo i drejtohet të gjithë qytetarëve. Për kryetarin demokrat duhet të largohet Edi Rama që beteja të quhet e fituar./abcnews.al

WEB-POLITIKA-NE-ABC-NEWS-SIKLETET-E-REJA-TE-EDI-RAMES-27.10.2018.mpg_snapshot_00.08-1280x720.jpg
G. P.19:00 | 27/10/2018

Qetësia e rifituar ditët e kaluara, duket se po merr fund për kryeministrin. Një tjetër bashkëpunëtor i ngushtë i tij, Vangjush Dako rezulton i lakuar në përgjimet e prokurorisë, në komunikim me persona me rekorde kriminale, ndërsa ministri i Brendshëm Fatmir Xhafaj, u largua nga detyra. Kësaj panorame i shtohet edhe paralajmërimi për riaktivizim publik, i Saimir Tahirit, ish ministrit të Brendshëm nën hetim për trafik droge. Këto dritëhije të pushtetit të Edi Ramnës, në vitin e gjashtë si kryeministër, sjell këtë javë Mimoza Koçiu me Politika në ABC News.

Nuk kanë të mbaruar sikletet për Edi Ramën. Emrat e njerëzve pranë tij, vijojnë të lakohen për lidhje me personazhe të krimit. Po e mban fort nën kontroll efektin publik edhe pse sikleti duket aq i madh, sa nuk kalon pa kosto. Këtë të shtunë u largua nga detyra ministri i Brendshëm Fatmir Xhafaj, i njëjti ministër të cilin nuk e lëshoi edhe kur u rishfaq historia e vëllait të dënuar në Itali për trafik ndërkombëtar droge. Paraardhësi nën hetim i Xhafajt, Saimir Tahiri, duket se do rifillojë komunikimin me mediat. Në fakt prej dy javësh Kryeministri ia ka dalë të ulë interesin publik e mediatik për emrat e të vetëve, që përmenden në çështjet Babale e Xhisiela. Mbyllja e lojërave të fatit ishte lëvizja që prodhoi efekt publik në kulmin e atij debati, e me qetësimin e saj, i hapi rrugë me një shpejtësi olimpike, një synimi të hershëm, prishjes së Teatrit Kombëtar. Por dalja e emrit të një prej personave të tij të arfërt Vangjush Dako në përgjimet e dosjes që çoi në prerjen e 44 fletëarresteve dhe operacionit policor Volvo 4, e riaktivizimi i pritshëm publik i Saimir Tahirit, duket një sfidë e re për Kryeministrin në vitin e gjashtë në pushtet.

Përse vallë Kryeministri nuk e mbrojti vetë Dakon siç kishte bërë për të tjerët pranë tij, pas akuzave të Lulzim Bashës? Misteri u bë edhe më i fortë, kur të premten, disa portale njoftuan se ish ministri i Brendshëm Saimir Tahiri do kishte një komunikim me gazetarët të shtunën. Por disa orë më vonë atë mbrëmje, u tha se ai komunikim mediatik ishte anulluar. Çfarë mungoi t’i thuhej vallë publikut ditën e shtunë?

Në fakt e shtuna e pati një komunikim të papritur. Kryeministri Rama me një postim krejt lakonik në Tuiter, bënte të ditur se kishte pranuar dorëheqjen e ministrit të Brendshëm Fatmir Xhafaj, duke i bashkangjitur edhe propozimin zyrtar drejtuar presidentit për emrin e pasardhësit, këshilltarin e tij Sandër Lleshi. Edhe Fatmir Xhafaj e konfirmoi përmes Tuiterit largimin e tij, njëlloj si Kryeministri, pa dhënë arsyen. U paraqit në zyrë për t’u përshëndetur me vartësit, po duket nuk e pati mundësinë e komunikimit mediatik të atij largimi. E bëri përmes këtij njoftimi në faqen e ministrisë së Brendshme, duke nënvizuar se kishte marrë një mision të vështirë, e kishte shërbyer me pasion e modesti shtetit. Padyshim që largimi i papritur i Fatmir Xhafajt ngre shumë pikëpyetje, për shkak të zhvillimeve të dukshme e të padukshme të javëve të fundit. A lidhet vallë me komunikimin e njoftuar mediatik e më pas të anulluar të Saimir Tahirit?
Sa lidhet ky largim me dosjen e operacionit Volvo 4, ku lakohet një nga njerëzit më të afërt të Kryeministrit, kryebashkiaku i Durrësit? Në fakt, po të shtunën, një ndryshim 180 gradësh pati edhe nga organi i akuzës. Korrigjoi deklaratën e një dite më parë për kryebashkiakun Vangjush Dako.

Por emri i Dakos nuk është regjistruar si pjesë e hetimit dhe ky sqarim shtesë i prokurorisë, veçse i thellon pikëpyetjet mbi këtë dosje, që ka vënë në pranga tashmë dy ish deputetë socialistë, e ka riaktivizuar akuzat ndaj Kryeministrit për njerëzit që ka zgjedhur të ketë në krah e me të cilët erdhi në pushtet. Një gjë duket e qartë: akrobacitë e kryera në hije tashmë po nisin të shfaqen. Se sa do ndikojnë ato në konfigurimin aktual politik, kjo mbetet për t’u parë./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono