erisa zykaj

eurodeputeti.jpg
G. P.22:15 | 26/02/2019

Një ditë para mbërritjes në Shqipëri, eurodeputeti Kristian Dan Preda, pjesë e delegacionit të Parlamentit Europian, thotë se vendi po kalon një krizë të thellë politike. Në një intervistë ekskluzive për ABC Neës, Preda shprehet se deputetët kanë përgjegjësi për mandatin e dalë nga populli. Sa i përket zgjedhjeve të parakohshme, eurodeputeti thekson se nëse forcat politike bien dakord, Europa do t’i mbështesë.

Pyetje: Misioni i delegacionit të komisionit të punëve të jashtme në Tiranë vjen në një situatë të re për vendin. Opozita ka hequr dorë nga mandatet parlamentare. Një vendim esktrem që ajo konsideron si një përgjigjje të jashtëzakonshme për një situatë të jashtëzakonshme. Cili është qëllimi i misionit të Parlamentit Europian në Tiranë?

Cristian Dan Preda, eurodeputet: Komisioni i punëve të jashtme të Parlamentit Europian ka vendosur të dërgojë një mision në Shqipëri dhe Maqedoninë e Veriut, në dy vendet që presin hapjen e negociatave të anëtarësimit të BE-së në qershor. Kam mbështetur gjithnjë hapjen e negociatave me të dyja vendet. Vendimi është shtyrë një vit, sepse ka patur bllokime, por vendet e meritojnë hapjen e negociatave. Por para mbërritjes tonë në Shqipëri, konstatojmë që ka një krizë të thellë, shumë shqetësuese. është një situatë që e hasim edhe në vendet e tjera të rajonit, pasi ka një vështirësi për të bërë opozitën në këto vende. Shumë shpesh ka bojkot të Parlamentit dhe tani ka një vendim esktrem të opozitës në Shqipëri që kanë lënë mandatet parlamentare. Një gjest i fortë. Personalisht mendoj se kultura parlamentare kërkon një prezencë të opozitës.Të zgjedhurit kanë përgjegjësi për mandatin. Është vullneti i popullit që duhet respektuar. Por nuk ka parti të opozitës që bojkotojnë apo marrin një vendim të tillë pa ju referuar karakterit të një situate të jashtëzakonshme në vend. Interesi i Shqipërisë është që të mos humbasë këtë rast të hapjes së negociatave. Ka rrezik që opozita të stigmatizohet si bllokuese dhe është për të ardhur keq, sepse e di që eurodeputetët e opozitës janë pro-europianë. Dhe nga ana tjetër, ekziston rreziku që pushteti të bëhet edhe më i fortë se ç’është sot, pra një devijim autoritar që është një pengesë edhe më e madhe lidhur me hapjen e negociatave të anëtarësimit të Shqipërisë në BE. Pra, unë si mik i popullit shqiptar do të isha shumë i trishtuar të shoh që kjo ndarje totale e qeverisë me opozitën rrezikon të bllokojë hapjen e negociatave. Sepse të jemi të qartë. Ka ende zëra në Bashkimin Europian që nuk janë shumë entuziastë për hapjen e negociatave të anëtarësimit me Shqipërinë dhe mund t’a përdorin situatën aktuale për të thënë jo. Mendoj se duhet dialog midis dy palëve. Nuk mendoj, se kemi kohë për një ndërmjetësim në Shqipëri, sepse të enjten duhet të nisemi për Shkup. Por mesazhi që do përçojmë është: Bini dakort për të negociuar.

Pyetje: A i mbështesni zgjedhjet e parakohshme? Eshtë një opsion i mundshëm për të cilin flitet këto kohë.

Cristian Dan Preda: Është një situatë krejtësisht e re. Nëse forcat politike bien dakord për organizimin e zgjedhjeve të reja, siç ka ndodhur më parë, Europa do ta mbështesë, por ne nuk mund të imponojmë një zgjidhje. Kriza duhet zgjidhur. Nëse situata është e tillë, që sytë janë i vetmi mjet komunikimi, atëherë duhet të shkohet në zgjedhje. Por nëse politikanët do të kenë pak më zgjuarsi sesa po na tregojnë këto ditë, mund të gjendet një zgjidhje që nuk kalon përmes zgjedhjeve.

Pyetje: Qytetarët që manifestojnë në rrugë kanë një mesazh jo vetëm për qeverinë që dhunon shtetin ligjor dhe të drejtat themelore, por edhe për Bashkimin Europian dhe veçanërisht Komisionit Europian për mbështetjen pa kufi, me raporte përgëzuese për një qeveri të tillë në Shqipëri apo vende të tjera të Ballkan dhe jo për vënien e gishtit te problemi. A mendoni, se qasja për zgjerimin duhet të ndryshojë?

Cristian Dan Preda: Unë vij nga një vend që ka kaluar nga këto faza, Rumania. Kemi njohur arritjen e standardeve europiane për t’u bërë shtet anëtar përmes hetimeve dhe vënien para drejtësisë të atyre që ishin përgjegjës nga të gjitha partitë. Tani njohim hapa prapa, ç’ka tregon se procesi është i vështirë. Ka një vullnet të politikanëve për të kontrolluar drejtësinë. Pra ka një përplasje midis atyre që duan shtetin ligjor, barazinë e të gjithë qytetarëve para ligjit dhe një drejtësi të pavarur dhe atyre që e duan korrupsionin, që duan të kontrollojnë gjykatat dhe drejtësinë, sepse ata kanë pushtetin, fuqinë. Problemi është se në Shqipëri kjo s’ka filluar ende. Korrupsioni është një shqetësim i madh për të gjitha vendet e Ballkanit. Personalisht mendoj, se është një nga pasojat perverse të komunizmit. Pra, korrupsionin e shohim më shumë në krah të atyre që kanë qenë të lidhur me komunizmin. Pasi ky ishte regjimi komunist. Kontrolli i drejtësisë, sigurimi i mosndëshkimit të parlamentarëve dhe populli që vuante. Tani kemi ndryshur sistem. Kemi zgjedhje kudo, por kemi korrupsion si një trashëgimi të rëndë të komunizmit. Unë mendoj, se duhet vendosur gishti te problemet. Duhet të themi: Ja kush janë institucionet që janë të politizuara dhe nuk kryejnë detyrën e tyre. Në Shqipëri, procesi i Vettingun e komplikoi shumë dialogun. Ne menduam se do shihnim një dalje nga situata dhe tani gjendemi me një krizë politike që mbart edhe çështjen e korrupsionit, trafiqeve, që e komplikon edhe më shumë perceptimin e shqiptarëve. Ka shtete anëtare që e kundërshtojnë hapjen e negociatave pasi tregojnë me gisht raste konkrete. Duhet një angazhim tërësor për të trajtuar këto çështje për të mirën e qytetarëve.

Pyetje: Ka protesta anti-qeveritare në Serbi, Shqipëri, Mal të Zi, në Bosnjë kudnër Dodik. Tregon një revoltë të qytarëve kundër dhunimit të shtetit ligjor dhe të drejtave, skandaleve të korrupsionit dhe krimit të organizuar dhe situatës shqetësuese ekonomike. A kuptohet ky mesazh në Parlamentin Europian. Pra, po integrimit europian, por jo fokusimit te BE-së vetëm te stabiliteti, por edhe cilësia e demokracisë dhe të drejtave në këto vende?

Cristian Dan Preda: Qytetarët e kanë kuptuar vërtet Europën. Bashkimi Europian do dy gjëra. Së pari, që shtetet e Ballkanit të anëtarësohen dhe paralelisht të kryhen reformat kyçe për pavarësinë e drejtësisë dhe zhdukjen e pandëshkueshmërisë. Edhe në Rumani shohim ikje masive, pasi qytetarët shohin kthimin në një periudhë ky nuk kishte drejtësi. Kur qytetarët shohin që nuk ka drejtësi, dalin masivisht në rrugë për të protestuar dhe nëse nuk ka ndryshim nga klasa politike dhe institucionet, atëherë ata zgjedhin të ikin nga vendi. Gjendemi në një situatë krize të ikjes masive të qytetarëve, që do rëndojë për një periudhë afatgjatë edhe për Ballkanin Perëndimor, por edhe vendet e Europës Qëndrore dhe Orientale. Pra, ky mesazh që vjen nga qytetarët e dëshpëruar që dalin në rrugë është një mesazh kyç. Një mesazh që është dëgjuar në Bruksel dhe do vazhdojmë që të luftojmë për popujt e Ballkanit Perëndimor./abcnews.al

ERISA-ME-KUKAN-ABC-1280x720.jpg
ent ela17:20 | 17/10/2018

Në një intervistë eskluzive për ABC News, raportuesi në hije për Shqipërinë, Eduard Kukan, shprehet se braktisja e takimit të 13 të MSA-së në Bruksel nga opozita nuk ishte një strategji e mirë, dhe pse opozita ka evidentuar akuza shumë serioze lidhur me Taulant Ballën dhe se vazhdon të marrë informacione me ato që ajo i quan si “aktivitete kriminale” të Taulant Ballës. Raportuesi Kukan flet edhe për deklaratën e përbashkët e aprovuar në fund të takimit.

Në gjirin e komitetit të MSA-së BE-Shqipëri në nivelin parlamentar jemi mësuar të shohim debate të ashpra, me tone të larta, por këtë rradhë opozita braktisi sallën e takimit në Bruksel. Ç’mendoni për këtë?

Eduard Kukan, eurodeputet: Ne morëm disa të dhëna, sipas të cilave, kolegët tanë të partisë demokratike kanë evidentuar disa probleme lidhur me bashkëdrejtuesin e seancës, Taulant Balla. Ata erdhën në takim dhe bënë një deklaratë për këtë. Ato që ata evidentojnë janë akuza shumë serioze. Dhe ata vazhdojnë të thonë që marrin gjithnjë e më shumë informacione lidhur me ato që ata i quajnë “ aktivitete kriminale” të Taulant Ballës. Por nuk mendoj, se ishte korrekte që të braktisej salla. Sado serioze të jenë gjërat, unë mendoj se kjo çështje duhet zgjidhur në Shqipëri, në Kuvendin e Shqipërisë dhe jo të tentohet të zgjidhet në Parlamentin Europian. Në këtë kuptim, vendimi i tyre nuk ishte i drejtë. Më pas, deputetët e opozitës nuk morën pjesë më në takim. Gjithsesi, ishte pozitive që takimi u zhvillua dhe mundëm të shpreheshim. Dhe ne aprovuam një deklaratë të përbashkët. Disa amendamente u aprovuan, disa u hodhën poshtë. Do mbetet në histori që në takimin e 13 të komitetit të MSA-së u aprovua një deklaratë e përbashkët e ekuilibruar. Këshilla ime për deputetët e Partisë demokratike është kjo. Nëse ata do të kishin qënduar, ata do të mund të kishin përsëritur akuzat shumë herë. Ata e bënë këtë vetëm një herë dhe pastaj ikën. Nuk mendoj, se ishte një strategji e mirë.

Çfarë elementesh të rinj përmban deklarata që mund të jenë si vlerë e shtuar ndaj rezolutës së aprovuar për Shqipërinë?

Eduard Kukan, eurodeputet: Deklarata e përbashkët është në vijueshmërinë e rezolutës së aprovuar për Shqipërinë nga Komisioni i Punëve të Jashtme. Rezolutën e vlerësoj si shumë të mirë për arritjet që ka bërë vendi dhe për çështjet që mbeten të hapura për t’u zgjidhur para qershorit 2019, ku pritet të jepet një datë për hapjen e negociatave të anëtarësimit. Nuk kishte ndonjë thelbësisht të re, por është konfirmim që Shqipëria merret seriozisht për hapjen e negociatave të anëtarësimit në BE.

Mesazhi kryesor i rezolutës për Shqipërinë ishte që përgëzohet fillimi i zbatimit të reformës në drejtësi dhe të procesit të Vettingut, por kërkohet vijimi i saj dhe më shumë rezultate konkrete në luftën kundër krimit të organizuar, korrupsionit dhe pastrimit të parave dhe drogês. Ju vetë deklaruat se këto fenomene po dëmtojnë progresin e vendit në integrimin europian.

Eduard Kukan, eurodeputet: Ne i thamë këto, sepse janë të vërteta. Reforma e drejtësisë dhe procesi i Vettingut është një reformë shumë e vështirë. Ne e kuptojmë shumë mirë që është e komplikuar. Por ia vlen vërtet, që të merren të gjitha masat për zbatimin e saj. Ne e dijmë që ka pengesa dhe vështirësi. Nuk ka mjaftueshëm gjyqtarë në Gjykatën e Lartë dhe atë Kushtetuese, por mesa u informova, kjo pritet të zgjidhet para fundit të vitit. I kuptojmë ngërçet, por duhet vazhduar puna, sepse nëse reforma zbatohet plotësisht, ju do keni një sistem gjyqësor më të mirë se disa shtete anëtare të BE-së. Prandaj ia vlen që të bëhen të gjitha përpjekjet për këtë. Problemet e tjera të cilat janë pasqyruar në rezolutë lidhur me krimin e organizuar, korrupsionin, pastrimin e parave dhe kultivimin e kanabisit janë një mesazh i qartë për lidershipin politik dhe për qeverinë, që ne i njohim problemet, i kemi shënuar ato dhe nëse nuk do ketë progres pasi i kemi artikuluar disa herë këto çështje, atëherë ky do bëhet problem edhe më i madh. /abcnews.al

Gazetare e ABC News: Erisa Zykaj

 

etilda-gjonaj-1.jpg
G. P.17:31 | 27/09/2018

Në një intervistë eskluzive për ABC News, ministrja e Drejtësisë, Etilda Gjonaj, tha se në Qershor 2019 pritet të merret vendimi i shteteve anëtare të BE-së për hapjen zyrtare të negociatave të anëtarësimit të Shqipërisë në BE. Gjithashtu nënvizoi se gjatë periudhës tranzitore për arkitekturën e re të drejtësisë do të duhet të pritet plotësimi i posteve vakante në Gjykatën e Lartë dhe atë Kushtetuese, por edhe të të gjithë institucioneve të reja që do të arrijnë të ngrihen para Qershorit 2019.

Etilda Gjonaj: “Sot në fakt zhvillohet takimi i parë për të filluar punën teknike midis punës teknike të Komisioit Europian dhe të dy shteteve që janë Maqedonia dhe Shqipëria. Ashtu siç dhe ne kemi përmendur në mënyrë të vazhdueshme qeveria shqiptare ka treguar gjithë angazhimin dhe vullnetin e saj politik, por edhe në aspektin teknik duke filluar në këtë proces të sotshëm lidhur me negociatat dhe me diskutimet për këto negociata. Padiskutim kapitulli 23 është kapitulli i parë që po diskutojmë dhe kjo është dhe për shkak të faktit që ne kemi miratuar reformën në drejtësi që është një reformë e rë dhe jemi në fazën e zbatimit të saj. Një reformë që është shumë e rëndësishme dhe që është e pakrahasueshme me çdo vend të Europës të cilat janë futur rishtaz në Union. Dhe duke mbajtur në konsideratë të gjitha proceset që zhvillohen nga zbatimi i reformës në drejtësi, për të cilën e gjithë qeveria shqiptare ka ofruar të gjithëë mbështetjen teknike, infrastrukturore dhe në aspektin financiar me qëllim që reforma në drejtësi të zbatohet ashtu siç është parashikuar në Kushtetutë dhe në ligjet përkatëse.”

Pyetje: “Pikërisht duke folur për reformën në drejtësi është e vërtetë që është një nga reformat më kryesore në letër, por kemi bllokime të institucioneve kyçe, siç është Gjykata Kushtetuese dhe e Lartë që nuk janë funksionale. Ju si ministre e Drejtësisë si ndiheni për këtë duke filluar pikërisht sot ekzaminimin e legjislacionit shqiptar me atë të BE-së”?

Etilda Gjonaj: “Ju jeni në dijeni që reforma në drejtësi është hartuar me mbështetjen teknike dhe politike të BE-së dhe KE-së në mënyrë të veçantë. Kjo do të thotë që çdo proces që ka qenë i diskutueshëm përsa i përket reformës në drejtësi, institucioneve të reja, përbërjes së tyre dhe gjithë këtij procesi tranzitor, padiskutim kanë qenë të diskutuara dhe miratuara që në atë kohë me Komisionin Europian. Ajo që do të thoja lidhur me vakancat në Gjykatën Kushtetuese dhe të Lartë, ashtu siç çdo sistem,  që kërkon një periudhë trnzitore për të rifilluar dhe për të rifilluar arkitektura e re e sistemit të drejtësisë do të duhet që të presim plotësimin e vakancave në Gjykatën Kushtetuese dhe të Lartë nuk na duhet të presim shumë se si Këshilli i Lartë Gjyqësor dhe Prokurorisë janë gati për t’u ngritur sapo të përfundojë procesi i anëtarëve të fundit të këtyre këshillave dhe gjithashtu KED do të bëjë të mundur që të rankojë të gjithë kandidatët që kanë konkurruar për vendet vakante në Gjykatën Kushtetuese dhe menjëherë sapo anëtarët e KED të përfundojnë Vettingun që është parashikuar të përfundojë në muajin Shtator, KED do të ketë mundësi të bëjë këtë rankim dhe më pas do të kenë mundësi të zgjidhen siç e parashikon ligji”.

Pyetje: “Ju sapo e thatë që ky proces lidhet ngushtë me procesin e Vettingut. A jeni e motivuar dhe a besoni se të gjtha këto ngërçe mund të zgjidhen para aprovimit nga shtetet anëtare të BE-së në Qershor të vitit ardhshëm”?

Etilda Gjonaj: “Zbatimi i reformës në drejtësi, i kësaj reforme që ndryshon sistemin tërësor përsa i përket drejtësisë, pa diskutim ka vështirësite e saj. Por jam e bindur që të gjitha institucionet e reja do arrijnë të ngrihen brenda Qershorit 2019 dhe njëkohësisht Vettingu ka dhënë rezultatet e veta më pozitive , më mbresëlënëse e thënë jo vetëm nga unë si ministre Drejtësie, por edhe nga të gjithë partnerët tanë të cilët kanë parë procesin nga afër nëpërmjet ONM, kështu që mendoj se nëpërmjet këtij procesi tranzitor të parashikuar për gjyqtarët dhe prokurorët do të përfitojmë një sistem drejtësie të pavarur, efektiv dhe ajo çfarë është shumë e rëndësishme të pakorruptuar”./abcnews.al

beeee.jpg
G. P.16:10 | 09/09/2018

Bashkimi Europian ka aprovuar sistemin e informimit dhe autorizimit për udhëtimet ETIAS. Në një intervistë eskluzive, zëdhënësja e komisionerit Avramopoulos, Tove Ernst, shprehet për ABC News, se në bazë të sistemit elektronik ETIAS, qytetarëve të Ballkanit do t’ju duhet gjithashtu të aplikojnë online për të marrë një autorizim për të udhëuar në zonën Shengen. Aplikimi është shumë i shpejtë, i lehtë për t’u bërë dhe merr 10 minuta vetëm duke qenë i pajisur me pasaportë. Verifikimi automatik bëhet në bazë të disa grupeve të të dhënave, siç është Sistemi i informacionit të Shengenit, Europoli, Interpoli. Nëse sistemi shënon problem, verifikimi do të bëhet në mënyrë manuale nga autoritetet e shtetit ku kërkon të udhëtojë përsoni, ose nga Rojet europiane kufitare. Në këtë rast, përgjigjja e aplikimit do të marrë disa ditë dhe nëse ka një problem që duhet zgjidhur do të marrë  maksimumi 4 javë.

Pyetje“Bashkimi Europian miratoi rregulloren lidhur me sistemin evropian të informimit dhe autorizimit të udhëtimit (ETIAS). Në bazë të këtij sistemi, qytetarëve Ballkanit, përshirë ata të Shqipërisë, do t’ju duhet të aplikojnë online para udhëtimit të tyre në zonën Shengen. Si funksionon sistemi ETIAS”?

Tove Ernst, zëdhënëse e KE-së: “Shumë vende, përfshirë qytetarët e Ballkanit, por edhe nga Kanadaja dhe SHBA do t’ju duhet të aplikojnë online për një autorizim para udhëtimit të tyre. ETIAS është një sistem autorizimi elektronik, siç është ai i Kanadasë, SHBA-së apo Australisë. Sipas statistikave që kemi, shumica dërmuese e aplikantëve nuk do kenë problem për të marrë një përgjigjje pozitive dhe autorizim për udhëtim. Aplikimi është shumë i shpejtë dhe i lehtë për t’u bërë. Ai merr normalisht 10 minuta dhe përfundon me një përgjigje pozitive dhe autorizim brenda. Ajo që duhet theksuar është që nuk është një vizë, por një autorizim udhëtimi”.

Pyetje: “Cilat janë kategoritë apo personat që rrezikojnë t’ju refuzohet aplikimi”?

Tove Ernst: “Në raste kur sistemi sinjalizon një anomali, verifikimi do të bëhet në mënyrë manuale. Edhe këtu ne presim që verifikimi të çojë në një rezultat pozitiv. Nëse nuk çon në një përgjigjje pozitive, kjo do të thotë që ka një alarm të caktuar për personin në fjalë”.

Pyetje: “Eshtë Europoli apo Interpoli që do t’i verifikojë të dhënat”?

Tove Ernst: “Për shumica dërmuese të rasteve, përgjigja është automatike. Kur bëhet aplikimi elektronik, duhet vetëm pasaporta. Sistemi pastaj bën verifikimin automatik në bazë të disa grupimeve të të dhënave, siç është Sistemi i informacionit të Shengenit, Europoli, etj. Nëse sinjalizohet një anomali, verifikimi do të bëhet në mënyrë manuale nga autoritetet e shtetit ku kërkon të udhëtojë përsoni, ose nga Rojet europiane kufitare. Në këtë rast, përgjigjja e aplikimit do të marrë disa ditë dhe nëse ka një problem që duhet zgjidhur, atëherë përgjigja do të marrë maksimumi 4 javë”.

Pyetje: “A është konceptuar ETIAS si një sistem që ndalon abuzimet në zonën Shengen, apo gjithashtu për të parandaluar terrorrizmin dhe krimin e organizuar”?

Tove Ernst: “Sistemi është konceptuar pikërisht për këtë. Kjo i jep mundësi shteteve anëtare që të verifikojnë paraprakisht nëse ka persona që duan të udhëtojnë në BE që përbëjnë rrezik sigurie,të tipit dyshime për kryerjen e një krimi, nëse është lëshuar një mandat arresti europian ndaj tyre dhe raste të tjera. Pra, ne do të dijmë paraprakisht nëse ka një rrezik lidhur me një person të caktuar para se ai të kalojë kufirin. Kjo na jep mundësi që ta parandalojmë rrezikun para se të depërtojë në territorin europian. Mbron Bashkimin Europian dhe qytetarët europianë. Momentalisht, nuk do të ndryshojë gjë për qytetarët e Ballkanit, por në vitin 2021, kur sistemi do të jetë operacional, atyre do ju kërkohet të bjënë aplikimin online ETIAS”.

/abcnews.al

 

trump-dhe-stoltenberg.jpg
G. P.14:18 | 11/07/2018

Në një takim me sekretarin e përgjithshëm të NATO-s në Bruksel, presidenti amerikan, Donald Trump, ka lëshuar akuza të rënda ndaj Gjermanisë dhe Francës. Kreu i Shtëpisë së Bardhë tha se këto dy shtete kontrollohen nga Rusia. Ndërsa, sekretari i përgjithshëm mbështeti qëndrimin e SHBA-ve rreth rritjes së shpenzimeve për mbrojtjen.

“Në kohë kur Aleanca Atlantike e Veriut përballet me sfida sigurie të jashtëzakonshme, ajo duhet të prodhojë rezultate pavarësisht ndasive dhe mosmarrëveshjeve në gjirin e NATO-s”.

Ky është mesazhi kryesor që sekretari i përgjithshëm i NATO-s, Jens Stoltenberg, ka përçuar para fillimit të samitit të liderëve të vendeve të NATO-s në Bruksel. Por ndasitë në gjirin e  NATO-s kanë filluar që me mëngjesin e punës midis sekretarit të përgjitshhëm të NATO-s me presidentin e Shteteve të Bashkuara të Amerikës, Donald Trump.

Kreu i Shtëpisë së Bardhë ka shprehur hapur pakënaqësinë për vendet anëtare të NATO-s që nuk shpenzojnë sa duhet në fushën e mbrojtjes dhe ka ironizuar me mbrojtjen që duhet t’u ofrojnë SHBA-të aleatëve europianë kundër Rusisë ndërkohë që sipas tij, Gjermania dhe Franca derdhin miliarda dollarë në gazësjellësat me Rusinë.

Donald Trump: “Shumë vende nuk paguajnë në nivelin që duhet për mbrojtjen. Shumë vende i detyrohen shuma të mëdha parash Shteteve të Bashkuara të Amerikës, që u është dashur të paguajë për to. Po të shihni periudhën e 20 viteve të shkuara, Shtetet e Bashkuara të Amerikës kanë derdhur shuma masive parash. Kjo situatë ka vijuar prej dekadash për shumë presidentë të Amerikës, por asnjë president nuk e ka ngritur këtë çështje si unë. Sekretari i përgjithshëm i NATO-s është angazhuar që vendet e tjera të rrisin buxhetin e mbrojtjes këtë vit dhe tani kemi angazhime për 40 miliardë dollarësh më shumë, por ky është një hap i vogël”.

Jens Stoltenberg: “Ky samit është i një rëndësie të veçantë sepse ne përmballemi me sfida sigurie të jashtëzakonshme dhe në të njëjtën kohë shohim qëndrime të ndryshme në gjirin e NATO-s. Të gjithë jemi dakord që në duhet të bëjmë më shumë lidhur me shpenzimet në fushën e mbrojtjes lajmi i mirë është se Aleatët po investojnë më shumë. Pas dhjetëvjeçarë shkurtimesh në fushën e mbrojtjes, Aleatët po shtojnë miliarda euro për shpenzimet për mbrojtjen. Ne parashikojmë 266 miliarda dollarë shtesë për shpenzimet deri në 2024-n. Forcimi i kapaciteteve tona është në interesin e përbashkët politik dhe gjeostrategjik dhe presim gjithashtu të dimë së bashku me liderët e NATO-s lidhur me kënvështrimin tuaj pas takimit që do keni me presidentin rus Vladimir Putin”.

Donald Trump: “Duhet të them, se është shumë e trishtueshme që Gjermania bën marrëveshje prej miliardash eurosh për gazin dhe naftën me Rusinë, ndërkohë që presupozohet se duhet t’ju mbrojmë ndaj Rusisë, Gjermania derdh miliarda në arkat e Rusisë. Pra, ne po mbrojmë Gjermaninë, Francën dhe vende të tjera, ndërkohë që disa shtete shkojnë e bëjnë marrëveshje gazësjellësash me Rusinë dhe derdhin miliarda dollarë në arkat e Rusisë. Ne duhet t’ju mbrojmë ju nga Rusia, ndërkohë që ata derdhin miliarda dollarë në arkat e Rusisë”.

Në seancën e hyrjes së samitit të NATO-s, Jens Stoltenberg, ka deklaruar, se NATO duhet të prodhojë rezultate për forcimin e trupave të NATO-s,  misionin për trajnimin në Irak, modernizimin e komandës së NATO-s në Virgjininë Veriore dhe Gjermani, por edhe për shpenzimet e NATO-s./abcnews.al

samiti-londres.jpg
G. P.22:43 | 09/07/2018

Zhvillimi ekonomik, arsimi dhe siguria kanë qenë shtyllat e ditës së parë të samitit të ministrave të Jashtëm të BE-së dhe Ballkanit, mbajtur në Londër. Polonia, që merr presidencën e radhës së Unionit, por edhe Gjermania kanë nënvizuar rëndësinë që ka për bllokun integrimi i vendeve të Ballkanit. 

Dita e parë e samitit të pestë për Ballkanin Perëndimor në kuadrin e procesit të Berlinit është zhvilluar në një sfond jo tipik politik britanik. Dorëheqja e ministrit të Jashtëm britanik, Boris Johnson, ka bërë që në samitin e Londrës të merrte pjesë sekretari i Shtetit për Europën dhe Amerikën, Alain Duncan.

Por  kjo nuk ka penguar ministrat e jashtëm të Ballkanin Perëndimor që së bashku me disa homologë të Bashkimit Europian dhe përfaqësues të institucioneve europiane të diskutojnë mbi tre boshtet kryesore të takimit: Nxitja e rritjes ekonomike në Balkan përmes mbështetjes së tregut ekonomik rajonal dhe ndihmës për bizneset e vogle dhe të mesme, siguria ligjore dhe migracioni, si dhe mbështetja e shkollimit dhe punësimit të të rinjve në Ballkanin Perëndimor.

Britania e Madhe ka anonçuar një ndihmë të rëndësishme për dixhitalizimin e shkollave në Ballkan.

Alan Duncan, sekretar i shtetit  britanik për Europën dhe Amerikën: “Ne kemi shpenzuar gjithë ditën duke diskutuar se si ta transformojmë vizionin tonë për Ballkanin Perëndimor në një realitet. Ne kemi bërë të mundur pjesëmarrjen e shumë të rinjve nga rajoni, duke qenë se zëri i tyre dhe vizioni i tyre është thelbësor për të ardhmen e rajonit. Në përfundim të këtij takimi, Britania e Madhe ka kënaqësinë që të deklarojë se do të investojë 10 milionë paundë për trajnimin dixhital të nxënësve në 4.5 mijë shkolla në Ballkanin Perëndimor. Ky investim substancial do t’i ofrojë mundësinë 1 milion nxënësve që të marrin njohjen dhe aftësitë e duhura për të transformuar ekonomitë e tyre. Ne gjithashtu kemi njohur përpjekjet që vendet e rajonit kanë bërë për të trajtuar çështjet e të shkuarës dhe përshëndetëm marrëveshjen e emrit të arritur midis ministrave të jashtëm grekë dhe maqedonas”.

Ministri i Jashtëm gjerman ka theksuar, se integrimi i vendeve të Ballkanit Perëndimor përbën një përfitim dypalësh, për Bashkimin Europian dhe vetë rajonin.

Michael Roth, ministër i Jashtëm gjerman: “Ne ofrojmë një kulturë demokratike për vendet e rajonit duke u fokusuar te forcimi i shtetit ligjor, te drejtësia e pavarur dhe të drejtat themelore, liria e medias dhe minoriteteve, ndërkohë që ne mund të mësojmë nga pasuria multietnike dhe multifetare e vendeve të Ballkanit dhe eksperienca e zgjidhjes së konflikteve. Pra, integrimi i këtij rajoni është dydimensional”.

Polonia që merr presidencën e procesit të Berlinit, konsideron, se eksperienca polake për forcimin e kapacitetit administrativ dhe thithjen e fondeve europiane është e vlefshme për rajonin.

Jacek Czaputoëicz, ministri i Jashtëm polak: “Ne kemi përfituar eksperiencë lidhur me reformën administrative dhe thithjen e fondeve të Bashkimit Europian. Ne duam që ta transmetojmë këtë eksperiencë dhe praktikat tona të mira duke e përfshirë në axhendën gjatë presiddencës tonë të procesit të Berlinit. Ne duam që të përqëndrohemi në ndërlidhjen, sigurinë, biznesin dhe arsimin. Ne po konsiderojmë që të punojmë gjithashtu për qeverisjen lokale. Do konsultohemi për këto çështje me partnerët tanë të Ballkanit, në mënyrë që t’i përgjigjemi atyre sa më mirë pritshmërisë së tyre”.

Johannes Hahn, komisioner për Zgjerimin: “Nga ana tjetër, çështja nuk është vetëm të ngrihet pyetja, se çfarë Bashkimi Europian mund të bëjë për ju, por çfarë mund të bëni ju për vendin tuaj? Ka një shprehje shumë të goditur të John Kennedy: “Mos pyet çfarë vendi mund të bëjë për ty, por çfarë mund të bësh ti për vendin”. Kjo është një pikë mbi të cilën ju ftoj të reflektoni”.

Dita e dytë e samitit të Londrës do të mbledhë 6 kryetarët e shteteve dhe të qeverive të Ballkanit Perëndimor dhe zyrtarë të Bashkimit Europian./abcnews.al

70853Bashkimi.jpg
G. P.15:38 | 29/06/2018

Komisioni Europian nis në korrik punën përgatitore për hapjen zyrtare të negociatave të anëtarësimit të Shqipërisë në BE në 2019-n. Kërkesa kryesore mbetet puna në forcimin e sundimit të ligjit dhe lufta kundër korrupsionit.

Pas miratimit të konkluzioneve për zgjerimin nga kryetarët e shteteve dhe të qeverive të Bashkimit Europian, Komisioni Europian, fillon menjëherë punën përgatitore drejt hapjes zyrtare të negociatave të anëtarësimit të Shqipërisë në BE në 2019. Në këtë kuadër do të vihet theksi te reformat kyçe lidhur me shtetin ligjor dhe luftën kundër korrupsionti dhe krimit të organizuar.

Kjo është konfirmuar edhe nga një letër e publikuar paralel me samitin e liderëve europianë nga përfaqësuesja e lartë e politikës së jashtme dhe të sigurisë së Bashkimit Europian, Federica Mognerini dhe komisioneri për politikën e fqinjësisë dhe negociatave të zgjerimit, Johannes Hahn.

Në këtë letër, përshëndetet progresi i bërë në reformat e integrimit europian të vendit, duke u theksuar, se tani është koha që Shqipëria të punojë me të njëtën vendosmëri për reformën e drejtësisë, luftës kundër korrupsionit dhe krimit të organizuar.

“Puna gjatë një viti është një investim për integrimin europian të vendit. Çdo hap ka rëndësi. Ndjekja e kësaj rruge jo vetëm që bën të mundur hapjen e negociatave, por e bën atë sa më efetkshme të mundshme. Në momentin kur të hapen negociatat, ju do jeni tashmë duke vrapuar”, shprehen në këtë letër shefja e diplomacisë europiane Federica Mogherini dhe komisioneri Hahn.

Sipas burimeve të Komisionit Europian, puna përgatitore për hapjen e negociatave të Shqipërisë në Bashkimin Europian do fillojë në Korrik./abcnews.al

erisa-zykaj.jpg
G. P.20:45 | 21/06/2018

Në Bruksel kanë vijuar debatet në lidhje me hapjen e negociatave të anëtarësimit mes Shqipërisë dhe BE-së. Franca dhe Holanda vijojnë me qëndrimin e tyre kundër, ndërsa Gjermania duket e ndarë institucionalisht.

Hapja e negociatave të anëtarësimit të Shqipërisë në BE ka shkaktuar debate në gjirin e shteteve anëtare të Bashkimit Europian. Presidenca bullgare ka konfirmuar se qëndrimet e shteteve anëtare janë të ndryshme dhe shtetet anëtare po negociojnë që të gjejnë një zgjidhje për Shqipërinë, por edhe për Maqedoninë.

Franca aktualisht është vendi që është kategorikisht kundër hapjes së negociatave të anëtarësimit të Shqipërisë në BE, por ky qëndrim nuk lidhet vetëm me qasjen e saj për procesin e zgjerimit. Franca konsideron se Shqipëria nuk i ka përmbushur 5 kriteret për hapjen e negociatave të anëtarësimit dhe se progres-raporti i Komisionit Europian është tepër optimist.

Të njëjtin qëndrim ndan edhe Holanda, duke bërë të qartë se nuk është dakord me progres-raportin e Komisionit Europian për përmbushjen e 5 kritereve nga Shqipëria. Gjermania është në favor të një rekomandimi të kushtëzuar për Shqipërinë, por ky vendim duhet të kalojë së pari në komisionin e çështjeve europiane dhe më pas në seancën plenare të Bundestagut.

Presidenca bullgare e ka të vështirë në këtë situatë të thotë me siguri nëse do të merret një vendim pozitiv më 26 Qershor nga ministrat e Brendshëm dhe ata të Çështjeve Europiane. Mbetet ende dilemë nëse vendimi përfundimtar do të kalojë përfundimisht në duart e 28 kryetarëve të shteteve dhe të qeverive të Bashkimit Europian më 28 dhe 29 Qershor./abcnews.al

 

kukan.jpg
G. P.14:35 | 04/05/2018

Raportuesi në hije për Shqipërinë në Parlamentin Europian, Eduard Kukan ka folur në një intervistë për ABC News lidhur me hapjen e negociatave të anëtarësimit. Ai nënvizon se diplomacia shqiptare duhet të bëjë ç’është e mundur për të bindur vendet skeptike të Unionit deri në vendimin e Këshillit të Qershorit.

Pyetje: “Cilat janë pritshmëritë nga samiti i Sofjes në planin politik të rikonfirmimit të zgjerimit të BE-së me vendet e Ballkanit, por edhe në atë të projekteve të ndërlidhjes? A pritet të mbështeten projekte të rëndësishme në Sofie”?

Eduard Kukan, eurodeputet: “Ne kemi pritshmëri të madhe realiste nga samiti i Sofies, duke qenë se presidenca bullgare nuk i ka fshehur ambiciet për një event të madh. Samiti i Sofies i 17 Majit konsiderohet si eventi tjetër i rëndësishëm për vendet e Ballkanit pas atij të Selanikut, që mbetet në histori si një datë e rëndësishme për perspektivën europiane të vendeve të Ballkanit. Ju u shprehët saktë kur folët për rikonfirm të perspektivës europiane. Ne presim pikërisht rikonfirmimin e institucioneve europiane për t’i dhënë kredibilitet zgjerimit të ardhshëm të Bashkimit Europian me vendet e Ballkanit. Dhe ne presim që dokumenti final apo deklarata e samitit të konfirmojë këtë gjë në gjuhën më të fortë të mundshme. Mendoj, se kjo do arrihet, pavarësisht problemeve që janë shfaqur midis përfaqësueseve të vendeve anëtare të BE-së apo jo anëntare. Sigurisht që kredibiliteti i zgjerimit shkon dorë për dore me projektete konkrete. Të arrish deklarata të bukura politike është e rëndësishme, por nuk e dijmë nëse do të ketë projekte konkrete që do dalin nga samiti i Sofies. Gjithsesi dokumenti do jetë i rëndësishëm dhe projektet mund të vijojnë në një të ardhme të shkurtër”.

Pyetje:Komisioni i punëve të jashtme mbështeti plotësisht rekomandimet e Komisionit Europian për hapjen e negociatave të anëtarësimit të Shqipërisë dhe Maqedonisë në BE. Edhe gjatë vizitës së Presidentit të Këshillit Europian, Donald Tusk në rajon, u konfirmua se progreset e bëra nga dy vendet janë të mjaftueshme për të filluar negociatat e anëtarësimit. A jemi aktualisht në këtë fazë”?

Eduard Kukan: “Jam dakort me vlerësimin e zotit Donald Tusk. Mendoj, se para vizitës së tij në Ballkan, ai është konsultuar edhe me institutionet e tjera europiane. Vizita e tij në rajon duhet parë si një tjetër konfirmim, se ne e marrim zgjerimin e Bashkimit Europian seriozisht dhe nuk mund të lejojmë humbjen e kredibilitetit të Bashkimit Europian që filloi të ndihej në gjirin e vendeve të Ballkanit. Pra është një tjetër hap për të arritur në këtë fazë, por nuk jemi ende aty”.

Pyetje:Presidenti Tusk tha gjithashtu, se qëndrimi i shteteve anëtare është një sfidë më vete. E dijmë që ka disa shtete anëtare skeptike për Shqipërinë. si Gjermania, Holanda, Franca, ndërkohë që Greqia pret gjitashtu marrëveshjne për çështjen e paktit detar. Cfarë duhet të bëjë Shqipëria për të bindur këto shtete anëtare skeptike deri në fund të Qershorit”?

Eduard Kukan: “Këtu ka dy pika. Progresi në Shqipëri dhe Maqedoni ishte i dukshëm dhe mund të themi që Komisioni Europian vëzhgoi me shumë vëmendje situatën dhe rekomandimi i dhënë për të dyja vendet ishte ishte pasqyra më  e mirë, më objektive dhe më e ndershme ndaj situatës në Shqipëri dhe Maqedoni. Pika tjetër është që autoriteti që merr vendimin është Këshilli Europian, që përbëhet nga shtetet anëtare të Bashkimit Europian. Sipas përvojës, në përgjithësi, shtetet anëtare kur marrin vendime të tilla shohin së pari marrëdhëniet e tyre bilaterale me vendin në fjalë dhe jo nëse vendi ka përmbushur kriteret që janë përcaktuar në nivelin europian. Vendimi merret shpesh në bazë të marrëdhënieve bilaterale, që në këndvështrimin tim është diçka e gabuar, por ky është vendimi i shteteve anëtare sovrane. Siç i kam thënë edhe në Shqipëri kryeministrit dhe ministrit të Jashtëm, ata duhen të fokusohen tek vizitat në këto vende dhe të përdorin argumentat e tyre më të mira politike, por dhe sharmin e tyre. Sharmi në politikë është gjithnjë i rëndësishëm. Kjo po ndodh. Kam ndjekur që kryeministri ka vizituar Berlinin dhe është takuar me kancelaren Angela Merkel. Ne nuk e njohim ende qëndrimin zyrtar të Gjermanisë, por dijmë jozyrtarisht se janë në fazën e përgatitjes, se cili do jetë vendimi i tyre për Shqipërinë. Pastaj është Franca dhe Holanda. Duhet thënë që Holanda  tradicionalisht është shumë e vështirë në këtë aspekt, por për arsyet e duhura. Kur flasim me holandezët, ata tregojnë që investojnë shumë para për zgjerimin dhe duan të dijnë nëse këto para janë përdorur në mënyrën e  duhur. Prandaj kanë një qasje të një kontrolli strikt. Por nëse paraqiten prova bindëse,ata bien dakort. Diplomacia shqiptare duhet të përqëndrohet për kohën që mbetet deri në Këshillin e qershorit në intensifikimin e marrëdhënieve bilaterale me vendet skeptike dhe të bëjë ç’është e mundur për të bindur këto vende deri në vendimin e Këshillit të Qershorit”./abcnews.al

komisioni-europian-1280x652.jpg
G. P.22:05 | 12/03/2018

Komisioni Europian përcakton saktë se çfarë klasifikon si keqinformim, duke u distancuar nga termi “fake news”. Komisionerja europiane për ekonominë dixhitale dhe shoqërinë nënvizon se nuk bëhet fjalë për të krijuar një ministri të së vërtetës, as për të favorizuar censurën dhe se nuk do ketë lista të zeza lidhur me këtë çështje.

Komisioni Europian distancohet nga termi “fake news” (informacion i rremë), duke përkrahur përkufizimin dezinformim (keqinformim) për problematikën e informacionit të pavërtetë që qarkullon në media online dhe jo vetëm. Përkufizimi vjen si rrjedhim i raportit të grupit të ekspertëve të nivelit të lartë mbi informacionin e rremë (fake news). dhe dezinformimin. Raporti i grupit të nivelit të lartë i prezantuar në konferencë për shtyp në Komisionin Europian e përcakton dezinformimin si informata të rreme, të pasakta ose mashtruese, të hartuara, të paraqitura dhe të promovuara me qëllim përfitim ose për të shkaktuar qëllimisht dëm publik.

Madeleine De Cock Bunning, drejtuesja e grupit të ekspertëve: “Informata të pasakta, të rreme ose mashtruese, që qëllimisht dhe në mënyrë të gabuar influencojnë individët, si djaloshi dhe gjysha e tij që u mor si shembull, mua, apo vetë gazetarët, është ajo për të cilën flasim sot”.

Komisionerja europiane për ekonominë dixhitale dhe shoqërinë, Mariya Gabriel ka nënvizuar, se nuk bëhet fjalë për të krijuar një ministri të së vërtetës, as për të favorizuar censurën dhe se nuk do ketë lista të zeza lidhur me këtë çështje.

Mariya Gabriel, komisionere për ekonominë dixhitale dhe shoqërinë: “Ne flasim për një qasje gjithëpërfhirëse, multidimensionale dhe prej shumë palësh. Në qendër të kësaj qasje nuk ka vend për një instancë që merr rolin e disponuesit të të vërtetës. Ne kemi qenë shumë të qartë që në fillim. Ne nuk duam të krijojmë një ministri të të vërtetës, dhe as të favorizmojë censurën. Por nëse ne favorizojmë bashkëpunimin, koordinimin, transparencën, dhe gjithëprfshirjen mund të arrihen hapa të rëndësishëm në këtë drejtim”.

Madeleine De Cock Bunning, drejtuesja e grupit të ekspertëve: “Nëse shihni në raportin tonë të grupi të ekspertëve, ne nuk sugjerojmë krijimin e listave të zeza. Përkundrazi, për ne është shumë e rëndësishme liria e shypit. Ajo që sugjerojmë është verifikimi i fakteve, por ne e sugjerojmë këtë në një mënyrë shumë të hapur dhe nëse ai bëhet korrektësisht nga disa persona, ai mund të na çojë te rezultati i duhur, pasi nuk ka vetëm një të vërtetë”.

Sipas grupit të lartë të ekspertëve, verifikimi i fakteve duhet të bëhet nga një organizëm i pavarur, por mbetet për t’u përcaktuar organizmi, procesi identifikimit të burimeve të keqinformimit dhe rrjedhojat që lidhen me të. Raporti i grupit të ekspertëve jep 10 rekomandime për një kod të parimeve, që duhet të respektohet nga platformat online dhe mediat sociale për të luftuar dezinformimin. Lidhur me këtë do ketë një komunikim zyrtar të mëtejshëm nga Komisioni Europian në 25 Prill./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono