Erion Veliaj

dita-pa-makina.jpg
ad min22:19 | 20/09/2019

E diela e 22 Shtatorit do të jetë ditë pa makina edhe në kryeqytetin shqiptar. Edhe këtë vit, Tirana i është bashkuar “Javës Europiane të Lëvizshmërisë”, e cila synon ndërgjegjësimin e qytetarëve për të përdorur sa më pak mjetet që ndotin mjedisin dhe të përqafojnë qasjet e reja të transportit alternativ, duket ecur ose pedaluar më shumë.

Bashkia e Tiranës ka planifikuar organizimin e një sërë aktivitetesh, që kanë për qëllim nxitjen e qytetarëve në përdorimin sa më shumë të biçikletës. Për të garantuar mbarëvajtjen e aktiviteteve, Bashkia e Tiranës, në bashkëpunim me Policinë e Shtetit dhe Policinë Bashkiake, ka marrë të gjitha masat për kufizimin e qarkullimit të automjeteve në disa prej rrugëve të qytetit.

Ditën e dielë do të ndalohet përkohësisht gjatë paradites qarkullimi i automjeteve në bulevardin “Dëshmorët e Kombit” dhe sheshin “Nënë Tereza”, ndërkohë devijim të lëvizjes do të ketë edhe për linjat e transportit urban./ABC News Albania 24/7

erion-veliajj.jpg
ad min15:54 | 12/09/2019

Bashkë me qytetin e Bazelit në Zvicër, Tirana do t’i bashkohet iniciativës ndërkombëtare për platformat e qyteteve inteligjente. Teknologjia e informacionit do të vendoset në dispozicion të qytetarëve për marrjen e shërbimeve qeveritare, bashkiake dhe në sektorin privat.

Kryetari i Bashkisë së Tiranës, Erion Veliaj, lajmin e dha nga Praga ku mori pjesë në Forumin e 27-të Ekonomik dhe Mjedisor të OSBE-së. Ky forum synon të stimulojë dialogun politik ndërmjet shteteve pjesëmarrëse të OSBE-së për çështjet kryesore ekonomike dhe mjedisore që lidhen me sigurinë.

Ndërkohë kryebashkiaku Veliaj vlerësoi si të jashtëzakonshëm lajmin që Shqipëria do të mbajë Presidencën e OSBE-së ndërsa e cilësoi si mundësi fantastike për kryeqytetin shqiptar. Duke filluar nga kjo vjeshtë, Tirana do të ketë mundësi për të mikpritur mbi 50 delegacione thuajse çdo javë./ABC News Albania 24/7

Veliaj-gjate-takimi-me-drejtoret-e-shkollave-2-1280x720.jpg
ad min15:30 | 10/09/2019

Gjatë një takimi me drejtuesit e shkollave në kryeqytet nisjen e vitit të ri mësimor, kryebashkiaku Erion Veliaj kërkoi që nxënësit të regjistrohen në shkollat pranë banesës së tyre, që të shmanget mbipopullimi në klasa.

Në prag të nisjes së vitit të ri shkollor, të gjitha shkollat e kryeqytetit do të jenë gati për të mikëpritur nxënësit. Këtë e bëri të ditur vetë kreu i Bashkisë së Tiranës, Erion Veliaj gjatë një takimi me drejtuesit e shkollave 9-vjeçare dhe të mesme të kryeqytetit në mjediset e shkollës “Dhora Leka”.

“Më vjen mirë që kemi një palestër të re, kemi transformuar gjithë hapësirat e tjera, si jashtë, ashtu dhe brenda shkollës. Njësoj si efekt domino, njëra pas tjetrës, nëse nuk kemi mbërritur ende tek shkolla juaj, është vetëm çështje kohe. Tre-katër vjet më parë ishte siklet se nuk kishim prekur shumicën e shkollave, kurse tani i kap me gishtat e dorës ato shkolla që ende kanë nevojë për një ndërhyrje”, tha Veliaj.

Që të shmanget mbipopullimi në klasa, Veliaj u kërkoi mësuesve dhe prindërve, që nxënësit të regjistrohen në shkollat sa më pranë banesës së tyre.

“Një sfidë e fundit është çështja e regjistrimeve. Legjenda e Tiranës së viteve ’80, ku vetëm dy shkolla janë të mira, nuk ekziston më. Shkollat, kur bëhet renditja, lëvizin me milimetra për performancë. Më rezulton se shkolla e Lundrës është ndër të parat. Portali ka arritur që të bëjë thuajse një barazi mes shkollave. Duhet një punë mjaft emancipuese. Prindërve duhet t’u themi: janë orë jetë njeriu që, o mund t’i kalojmë në trafik, duke shkuar te “Sami Frashëri”, ose në ato 600 orë mund të mësojmë piano, basketboll, programim ose gjuhë të huaj”, tha Veliaj.

Në kuadër të përgatitjeve për vitin e ri shkollor, Bashkia e Tiranës do të organizojë më 14 Shtator edhe një aksion të gjerë pastrim, për të siguruar që mjediset pranë shkollave të jenë sa më të pastra./ABC News Albania 24/7

edi-rama-1280x720.jpg
ad min15:37 | 09/09/2019

Rikonstruksioni i shkollës 9-vjeçare dhe shpërndarja e teksteve shkollore falas dërguan kryeministrin Edi Rama dhe kryebashkiakun e Tiranës Erion Veliaj tek “Mihal Grameno” në Tiranë. Sipas kryeministrit brenda dy vitesh, librat falas do t’i përfitojnë të gjithë nxënësit e shkollave nëntëvjeçare.

Dy ngjarje e çuan kryeministrin Edi Rama tek “Mihal Grameno” në Tiranë. Rikonstruksioni  i shkollës nëntëvjeçare. Shpërndarja e teksteve shkollore falas për nxënësit nga klasa e parë deri në klase të pestë. Brenda dy vitesh, thotë kryeministri, përfitues do të jenë të gjithë nxënësit në shkollat nëntëvjeçare.

“Këtë vit kemi shtuar klasën e pestë. Vitin tjetër do shtojmë të gjashtën dhe të shtatën, pastaj të tetën dhe të nëntën. Në fund, në sezonin 2021-2022 të gjithë librat nga klasa e parë te e nënta do jenë falas, por duhet t’i mbani mirë, se dëgjoj shumë që ankohen, thonë pse nuk kanë të drejtë t’i grisin, pse nuk kanë të drejtë t’i shkarravisin, pse nuk kanë të drejtë t’i humbin, pse nuk kanë të drejtë të bëjnë çfarë të duan, zyshat mund t’ua thonë, libri është shoku më i mirë. Të gjithë të tjerët shkojnë e vijnë libri mbetet”, tha Rama.

Sa i përket ndryshimit në infrastrukturën e shkollës nëntëvjeçare kryebashkiaku Erion Veliaj tregon se ka ende punë për t’u bërë.

“Tani duhet të bëjmë fushat e sportit mbrapa. Rëndësi ka që iku podrumi se ju ishit si anije, sipër mësim, poshtë ujë. Në pamundësi për t’i bërë të dyja, kemi bërë fillimisht shkollën, pastaj faza e dytë do të jenë të gjithë fushat sportive. ”

Shkolla 9-vjeçare “Mihal Grameno” ka rreth 1300 nxënës, të cilët mësojnë në 38 klasa mësimore si dhe 2 klasa parashkollore./ABC News Albania 24/7

Erion-Veiaj-gjate-inspektimit-te-punimeve-ne-cerdhen-nr.8-2-1280x1011.jpg
ad min13:25 | 08/09/2019

Për herë të parë në Tiranë, ashtu siç ndodh edhe në vendet e tjera europiane, bashkia po punon me kompanitë e mëdha private, që pranë tyre të hapen çerdhe dhe kopshte. Kryebashkiaku Erion Veliaj tha se kjo do të shmangte edhe mbingarkesën në çerdhet dhe kopshtet publike.

Për të ulur fluksin e kërkesës në çerdhet dhe kopshtet publike të kryeqytetit, Bashka e Tiranës po punon që institucionet për rritjen dhe kujdesin ndaj fëmijëve të hapen edhe pranë ndërmarrjeve apo kompanive të mëdha private. Ndërsa nё administratё parashikohet të shtohet dhoma e mjekut, e psikologut, si dhe dhoma pёr nёnat e latantёve.

“Këtë vit do të sjellim një risi: Siç e kërkon ligji dhe siç është tradita në të gjitha vendet e BE-së, kompanitë që kanë një numër të caktuar punonjësish, mbi 100 punonjës, si kompanitë e telekomunikacionit, bankave, të fillojnë të instalojnë në mjediset e tyre çerdhe dhe kopshte. Është një mënyrë për t’u siguruar që prindi që punon e ka shumë të afërt vendin ku po rritet fëmija i tij, por edhe për t’i hequr një ngarkesë qytetit”.

Kryebashkiaku Erion Veliaj, gjatë inspektimit të punimeve në një çerdhe pranë Njësisë 10 tha se përmirësimi i kushteve në institucionet parashkollore ka rritur ndjeshëm kërkesat e prindërve për frekuentimin e tyre.

“Kemi pasur një dyndje të jashtëzakonshme në çerdhet e Tiranës, kemi marrë ndoshta komplimentin më të madh kur njerëzit të fusin mik edhe për t’u futur në çerdhe e kopshte. Besimi se këto çerdhe e kopshte publike kanë një cilësi kaq të lartë, duhet shpërblyer me investime. Në vende si kjo hapësirë në zemër të Tiranës, ku edhe shpronësimi është i shtrenjtë, ku edhe toka e lirë është e paktë, po mundohemi të shfrytëzojmë maksimalisht; pra, kemi dyfishuar kapacitetin e çerdhes, duke shtuar 4 grupe të tjera dhe do të mundohemi që në të gjithë territorin, aty ku ka vend për hapësira të reja, të zgjerojmë hapësirat e akomodimit, të shtojmë grupet apo edhe terrenet sportive, siç do të bëjmë edhe këtu një kënd lodrash”.

Kreu i Bashkisë u bëri apel të gjithë prindërve që t’i regjistrojnë fëmijët e tyre në shkollat që janë më afër vendbanimit të tyre./ABC News Albania 24/7

48687009423_4e2c9e1d76_h-1280x720.jpg
ad min16:49 | 06/09/2019

Kreu i Bashkisë së Tiranës, Erion Veliaj mori pjesë në konferencën “Bridge for Cities 4.0”, e mbajtur në Vienë. E ku organizata e Kombeve të Bashkuara përzgjodhi Tiranën në 10 qytetet me performancë të mirë financiare. Veliaj  tha se ky vlerësim na inkurajon që ta kthejmë Tiranën në polin më të rëndësishëm ekonomik të gjithë rajonit.

Organizata e Kombeve të Bashkuara (OKB) përzgjedh Tiranën si një nga 10 qytetet që kanë patur performancën më të mirë financiare. Veliaj theksoi se ky vlerësim i dhënë nga OKB-ja, është një inkurajim që për katër vitet e ardhshme Tirana të kthehet jo vetëm në polin më të rëndësishëm ekonomik të Shqipërisë, por edhe të gjithë rajonit.

“Ajo që kemi prezantuar në OKB-në e Vjenës është se bashkia nuk është vetëm një realitet urban, bashkia është edhe një realitet ekonomik. Bashkia e Tiranës është përgjegjëse për 50% të ekonomisë së vendit dhe ka pasur rritjen më të madhe ekonomike të çdo rajoni të Shqipërisë. Sipas INSTAT-it, Bashkia dhe Qarku i Tiranës është rritur mbi 10%. Kjo do të thotë se duhet të përgatitemi që ta mbajmë këtë rritje”, deklaroi Veliaj.

Në këtë takim, kryebashkiaku prezantoi disa nga nismat e ndërmarra për të nxitur ekonominë e Tiranës në katër vitet e fundit, si dhe sfidat me të cilat përballet kryeqyteti shqiptar.

 “Po aplikojmë pranë qeverisë shqiptare që të licencohemi si operator i një zone të lirë ekonomike. Është një zonë që kemi përzgjedhur në Kashar, rreth 60-70 hektarë, të cilën duam t’ua ofrojmë kompanive që duan të zgjerojnë kapacitetet e tyre, kryesisht për kapanone dhe për linja prodhimi”, tha ai.

Gjithashtu, Bashkia e Tiranës pritet që të jenë një operator i rëndësishëm ekonomik edhe në fushën e energjisë, një nismë që synon të nxisë edhe shumë prej projekteve të tjera si transporti publik elektrik.

“Duam të vazhdojmë të jemi operator aktiv ekonomik edhe në fusha të tjera, siç është fusha energjetike. Bashkia ka një hidrocentral, duam të shfrytëzojmë ujëmbledhësin e Bovillës për ta kthyer jo vetëm si një vend nga ku marrim ujin, por edhe si një vend ku me panele solare, pluskuese, mund të marrim edhe energji elektrike, që pastaj të subvencionojmë transportin elektrik në Tiranë, me autobusët apo taksitë elektrike që kemi filluar t’i fusim në qytet”, u shpreh kryebashkiaku Veliaj.

Gjatë kësaj vizite, kryetari i Bashkisë së Tiranës pati një takim të rëndësishëm edhe me LI Yong, Drejtor i Përgjithshëm i Organizatës së Kombeve të Bashkuara për Zhvillimin Industrial (UNIDO)./ABC News Albania 24/7

qytet-sytudenti.jpg
ad min16:44 | 31/08/2019

Vijojnë punimet në konviktet në Qytetin Studenti. Kryeministri Rama dhe kryebashkiaku Veliaj inspektuan pasditen e së shtunës punimet, ku Veliaj tha se 11 godina janë përfunduar, 6 janë drejt fundit dhe pritet nisja e 3 godinave të tjera. Ndërsa kryeministri Rama u shpreh se dhe rezidencat studentore në qytetet e tjera do të rikonstruktohen.

Rikonstruksionit të konvikteve në Qytetin Studenti, po i jepet dora e fundit. Ecurinë e punimeve e inspektuan kryeministri Rama bashkë me kryetarin e bashkisë së Tiranës.

Veliaj tha se 11 godina janë gati e 6 drejt përfundimit, ndërsa në 3 të tjera, punimet nisin javën e ardhshme. Kryeministri Rama nënvizoi se edhe rezidencat studentore në qytetet e tjera do të rikonstruktohen.

“Ne jemi në kohë për t’i akomoduar pjesën më të madhe si duhet. Tani kanë mbetur disa këtu. Plus, Korça ka filluar, Shkodra po ashtu është në proces për të filluar, fillon këto ditë sepse gjithçka është bërë gati. Po ashtu për Elbasanin, Vlorën dhe Gjirokastrën”, tha Rama.

Për kryebashkiakun e Tiranës, sfida e radhës është mirëmbajtja e konvikteve.

“Çdo gjë ka nevojë për t’u mirëmbajtur. Menduam që ideja më e mirë, meqë specialistët janë më paga minimale, është që ne mund të punësojmë studentë. Pra, do të hapim disa vende pune dhe do t’u themi që kemi disa vende pune si administratorë. Po u prishën dushet, po ndodhi diçka, apo ndonjë problem tjetër kemi një administrator që është një prej studentëve”, tha Veliaj.

Rikonstruksioni i konvikteve ishte një nga kërkesat e studentëve në protestat e tyre të Dhjetorit të kaluar. Ndërkohë, një tjetër kërkesë, karta e studentit, pritet të fuqizohet nga 1 Tetori dhe ky model do të zbatohet edhe në qytete të tjera./ABC News Albania 24/7

erion-veliaj-servete-maci-1280x713.jpg
nev ila14:07 | 30/08/2019

Shkolla “Servete Maçi” në Tiranë është ndërtuar nga e para. Kryebashkiaku Erion Veliaj pasi inspektoi punimet tha se shkolla do të jetë gati për të pritur 600 nxënës në vitin e ri mësimor.

Punimeve po i jepet dora e fundit.  Shkolla “Servete Maçi” në Tiranë më 16 shtator do ti presë 600 nxënësit e saj me mjedise tërësisht të reja.

Kryebashkiku Erion Veliaj pasi pa punën e bërë e cilesoi si shkollën me arkitekturën më të veçantë.

 “Në 2011, plani i administratës së shkuar ishte ta mbyllte shkollën prej kushteve të rënduara dhe të lironte terrenin, nuk e di, për ndonjë pallat a diçka tjetër. Sa shpejt ndryshojnë gjërat, kur do të punosh për mirë! Bashkë me deputeten, me qeverinë, me të gjithë komunitetin e Njësisë 9, e kemi kthyer shkollën në një bizhu. Nëse shkolla “Kosova” mbahej si shkolla më e mirë e re, unë them se “Servete Maçi” e kalon me disa herë. Kemi parë bashki, ministri, por që ia mbërritëm ditës, që një ndërtesë publike, shkollë për fëmijët tanë, të jetë shumë herë më luksoze, shumë herë më cilësore, shumë herë në nivel më të lartë arkitekture e urbanistike, se ndërtesat publike të qeverisë dhe të Bashkisë, nuk e kishim menduar kurrë”

Me ndërtimin e kësaj shkolle kryebashkiaku Veliaj shprehet se në njësinë 8 dhe 9 merr fund problemi i mësimit me dy turne.

 “Dua të ftoj të gjithë banorët, jo vetëm të zonës, por edhe gjithë Tiranës, duke qenë se nuk është vetëm një shkollë lagjeje, por e gjithë qytetit, që të bëjnë përgatitjet e fundit për regjistrimet; ama, ne do të respektojmë kuotat, nuk do kalojmë mbi 600 nxënës, për t’u siguruar që shkollat e reja nuk pësojnë mallkimin e shkollave të vjetra. Sot kemi shkolla cilësore edhe tek “Kosova”, edhe tek “Betim Muço”, “Ardian Klosi”, “Servete Maçi” e të tjera, që kanë filluar të ndërtohen, si “Nënë Tereza” në Kodër-Kamzë, “Kristo Frashëri” te “Don Bosko”, dhe besoj se vetëm duke krijuar një mjedis cilësor për çunat e gocat e qytetit tonë, kemi vënë bastin më të mirë e të sigurt për të ardhmen e këtij qyteti”.

Shkolla “Servete Maçi” do të ketë dhoma të dedikuara, si tek Liceu Artistik, bibliotekë cilësore, një palestër moderne, si dhe një auditorium që mund të përdoret nga nxënësit për koncertet./ABC News Albania 24/7

69114539_888691964835215_1010273743647277056_n-1280x1026.jpg
ad min15:35 | 29/08/2019

Tirana dhe komunat arbëreshe do të organizojnë një kalendar të përbashkët me rastin e 100-vjetorit të shpalljes së Tiranës kryeqytet. Kryetari i bashkisë Erion Veliaj priti në një takim nënkryetarin e Këshillit të Komunës së Potencës, Antonio Vigilante.

Arbëreshët e Italisë do të kenë vend të veçantë në aktivitetet që do të organizohen nga bashkia me rastin e 100 vjetorit të shpalljes së Tiranës kryeqytet.  Kryebashkiaku  Erion Veliaj priti në një takim nënkryetarin me origjinë shqiptare të Këshillit të Komunës së Potencës, Antonio Vigilante.

“Do të doja shumë që në 100 vjetorin e Tiranës si kryeqytet i të gjithë shqiptarëve, jo vetëm i Shqipërisë, të fillonim punën për një kalendar të përbashkët, ku me miqtë tanë arbëreshë të kemi mundësi të tregojmë se vërtet mund të kemi qenë fizikisht të ndarë, por shpirtërisht dhe kulturalisht jemi gjithmonë pranë.

 Një ide e shkëlqyer është gjetja e një shtëpie muze për arbëreshët, siç kemi bërë me Shtëpinë e Gjetheve, BunkArtin ose Shtëpinë Kadare, që të përfaqësojë mbi 30 komuna, të cilat më shumë sforco dhe me shumë entuziazëm mbajnë gjallë kulturën tonë”, tha Veliaj.

Vizita e nënkryetarit të Këshillit të Komunës së Potencës sipas Veliajt do të forcojë më tej marrëdhëniet mes dy bashkive./ABC News Albania 24/7

Erion-Veliaj-gjate-inspektimit-te-rikonstruksionit-te-Rruges-Kadri-Kerciku-4-1280x854.jpg
ad min14:32 | 27/08/2019

Kryetari i Bashkisë së Tiranës Erion Veliaj inspektoi punimet që po kryhen në rrugën “Kadri Kërçiku” në njësinë numër dy. Rikonstruksioni  i kësaj rruge tha Veliaj, bëhet në përmbushje të premtimit të dhënë gjatë fushatës për një mandat të dytë në krye të bashkisë.

Punimet që po kryhen në rrugën e Elbasanit pritet të përfundojnë brenda 15 Shtatorit. Kryebashkiaku Erion Veliaj e bëri të ditur pasi inspektoi investimin që po kryhet në një lagje të ndërmjetme mes kësaj rruge dhe “Qytetit Studenti”.

“Dua t’u jap forcë dhe kurajë kolegëve në këto ditë të fundit të verës, që më pas edhe aksi kryesor i kanalizimit të ujërave të zeza, që merr të gjithë ujërat e “Qytetit Studenti”, për t’i çuar në Rrugën e “Elbasanit“, gjithashtu të mbarojë në datën 15 shtator, gjatë ditëve që përgatitemi për fillimin e shkollës”.

Rruga “Kadri Kërçiku” në Njësinë 2 dhe dy degëzimet e saj, po shtrohen me asfalt e po pajisen me kanalizime, trotuare dhe ndriçim LED.

“Vërtet është gusht, vapë, por kam qenë këtu në fushatë dhe kemi premtuar se Rr. “Kadri Kërçiku” do të bëhej këtë vit, ndaj nuk ka shans të mos bëhet këtë vit”.

Punimet në këtë rrugë po shkojnë drejt përfundimit./ABC News Albania 24/7

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono