Erdogan

ERDOGAN-OKB-1280x720.jpg
ent ela23:36 | 25/09/2018

Në fjalimin e tij në Asamblenë e Përgjithshme, presidenti turk Erdogan ka akuzuar OKB-në se ka dështuar në zgjidhjen e konflikteve botërore. Duke fajësuar 5 vendet anëtare të Këshillit të Sigurimit, Erdogan ka shtuar më tej se, edhe vendosja arbitrare e sanksioneve ekonomike është e papranueshme.

Presidenti turk Recep Taip Erdogan ka deklaruar të martën në selinë e Kombeve të Bashkuara se organizata ka dështuar në zgjidhjen e konflikteve botërore, që kanë marrë mijëra jetë. Sipas Erdogan, veprimi me standarde të dyfishta ka çuar në krijimin e mosbesimit, në humbjen e sensit të drejtësisë dhe në dëshpërimin e mijëra personave. “Indiferenca ndaj vrasjes së fëmijëve i shërbeu terrorizmit në mbarë botën”, ka thënë Erdogan. Sipas tij, mungesa e veprimit në kohën e duhur ka bërë që zgjidhja e problemeve ndërkombëtare të bëhet më e vështirë. Erdogan i është referuar në veçanti çështjes së Palestinës, zgjidhja e të cilës me opsionin e dy shteteve është shumë larg. “Bota është më e madhe se vetëm 5 vende”, ka thënë Erdogan, duke iu referuar Këshillit të Sigurimit, një organ sipas tij jofunksional pasi vetëm një vend, përmes së drejtës së vetos mund të bllokojë gjithçka. Sa i takon Turqisë, presidenti ka nënvizuar se vendi i tij nuk mund të heshtë përballë përdorimit të sanksioneve të njëanshme si armë ekonomike, duke iu referuar masave të Uashingtonit ndaj Ankarasë. Ai ka theksuar se Shtetet e Bashkuara duhet të respektojnë procesin e drejtësisë turke në lidhje me rastin e pastorit amerikan, Endriju Branson dhe të drejtën e vendit të tij për të blerë armatime nga Rusia. “Ne jemi në favor të zgjidhjes së kontesteve përmes dialogut në kushte të barabarta”, ka vijuar Erdogan. Kreu i shtetit turk u ka kujtuar të pranishëmve se sesioni i sivjetshëm i Asamblesë së Përgjithshme të OKB-së përkon me 100-vjetorin e Luftës së Parë Botërore, efektet e të cilës sipas tij ndihen edhe sot, kur ka kaluar një shekull. /abcnews.al

Steinmeier-Erdogan-696x379.jpg
G. P.23:07 | 25/09/2018

Presidenti i Turqisë, Rexhep Tajip Erdogan do të zhvillojë këtë javë një vizitë zyrtare në Gjermani. Disa politikanë kryesorë të këtij vendi, përfshirë kancelaren Angela Merkel, refuzuan ftesën për të marrë pjesë në darkën e shtruar në nder të Erdogan. Organizator i këtij eventi, i cili mbahet të premten, është presidenti gjerman Frank-Walter Steinmeier. “Prania e kancelares në bankete të organizuara nga presidenti nuk është rregull”, konfirmoi kabineti i presidentit gjerman, duke bërë të ditur se Merkel nuk do të marrë pjesë në darkë. Në njoftim thuhet se Merkel “vetëm herë pas here” merr pjesë në ceremonitë në rezidencën presidenciale. Hera e fundit ishte gjatë vizitës së Mbretëreshës Elizabeth II në Berlin, në vitin 2015./abcnews.al

TURQIA-NDERTIMI.mpg_snapshot_00.00-1280x620.jpg
G. P.11:29 | 15/09/2018

Përballë rënies së lirë të lirës turke dhe rritjes së inflacionit, presidenti turk Erdogan ka vendosur të ngrijë shpenzimet publike. Në një deklaratë, Erdogan ka bërë me dije se të gjitha investimet e planifikuara në infrastrukturë do të pezullohen.

Pas 15 vitesh boom në sektorin e ndërtimit, qeveria në Turqi ka ngrirë të gjitha projektet e investimeve. Duke njoftuar vendimin, presidenti Erdogan ka deklaruar se synimi është kursimi i të ardhurave dhe parandalimi i rritjes së inflacionit dyshifror. Komentet e tij, një ditë pasi banka qendrore rriti normat e interesit me 6.25 për qind, janë një tregues i qartë se qeveria duhet të pezullojë projektet për ndërtimin e urave, porteve dhe aeroporteve të mëdha, që kanë karakterizuar Turqinë nën qeverisjen e Erdogan. Sidoqoftë mbetet për t’u parë nëse lëvizja do të mjaftojë për të zbutur investitorët, të cilët kanë ndikuar në rënien e lirës turke me 40 për qind përballë dollarit amerikan.

Tregjet financiare janë prej kohësh të shqetësuara për kontrollin që Erdogan ka ndaj politikës monetare, që thuhet se ka minuar përpjekjet e bankës qendrore për të luftuar inflacionin, që aktualisht llogaritet në 18 për qind. “Për momentin nuk do të ketë investime të reja. Mund të ketë për ato të domosdoshme, por kjo është tjetër punë. Veç atyre nuk do të ketë”, ka deklaruar Erdogan. Presidenti i parë me pushtet ekzekutiv i Turqisë ka saktësuar se projektet që kanë avancuar deri në 70 për qind do të përfundohen, ndërsa të tjerat do të rishikohen dhe do të vendoset sipas prioriteteve./abcnews.al

MBROJTJA-TURQIA-1280x720.jpg
ent ela21:27 | 31/08/2018

Turqia vijon të sfidojë NATO-n dhe Shtetet e Bashkuara pasi vijon të blejë armatime nga Rusia. Presidenti i vendit Erdogan njoftoi se sistemi rus i mbrojtjes do të mbërrijë shumë shpejt.

“Turqia ka nevojë dhe së shpejti do të marrë në zotërim sistemet e mbrojtjes ajrore ruse S-400”, – tha te premten Presidenti Rexhep Tajip Erdogan, ndërkohë që në sfond ziejnë tensionet me Uashingtonin që kërcënon të bllokojë dorëzimin e avionëve luftarak në Ankara. “Marrëveshja mbi këtë çështje është e përfunduar dhe, me dëshirën e Zotit, ne do t’i marrim këto sisteme sa më shpejt që të jetë e mundur,” tha presidenti turk gjatë një ceremonie diplomimi kadetësh në Balikeshir, në perëndim të vendit.

Këto deklarata vijnë pasi marrëdhëniet midis Turqisë dhe Shteteve të Bashkuara janë tensionuar në javët e fundit dhe Uashingtoni ka shprehur shqetësimin se Ankaraja, një anëtare e NATO-s, po pajiset me armë ruse. Turqia dhe Rusia thonë se tashmë është arritur një marrëveshje dhe Ankaraja argumenton se shpërndarja e sistemeve anti-raketë dhe anti-ajror- një konkurrent i sistemit amerikan ajror “Patrioti” – mund të jetë efektiv vitin e ardhshëm. Për Shtetet e Bashkuara, blerja e sistemeve ruse S-400 nga Turqia do të përbënte një problem të dyfishtë: atë të përputhshmërisë me sistemet e NATO-s dhe atë të mbrojtjes së sekreteve teknologjike të avionëve luftarak amerikan F-35. Ankaraja dëshiron të blejë këtë tip avioni liuftarak, por sicc tha erdogan nuk dihet nëse Shtetet e Bashkuara do t’u sigurojnë ose nuk do t’i japin turqisë këto lloj avionësh. “Nëse i japin, ata do të tregojnë se po i mbajnë premtimet”, tha presidenti turk.

Marrëdhëniet midis Turqisë dhe Shteteve të Bashkuara janë tendosur ndjeshëm gjatë javëve të fundit si rezultat i burgosjes dhe pastaj arrestimit shtëpiak në Izmir të një pastori amerikan të akuzuar nga Ankaraja për “spiunim” dhe aktivitete “terroriste”. Këto tensione kanë shkaktuar rënien e lirës turke, e cila ka humbur rreth 40% të vlerës së saj që nga fillimi i vitit. /abcnews.al

1067538550.jpg
G. P.19:43 | 29/08/2018

Autoritetet gjermane kanë shkulur një statujë prej ari të presidentit turk Erdogan, e vendosur në sheshin e një qyteti në kuadër të një festivali. Prania e objektit kishte shkaktuar reagimin e banorëve dhe zyrtarët druheshin se mund të bëhej shkak për akte të dhunshme.

Zjarrfikësit në Gjermani kanë hequr një statujë prej ari të presidentit turk Recep Taip Erdogan në qytetin Vizbaden, pasi prania e saj shkaktoi një reagim të ashpër të banorëve vendas. Gjithashtu, mbi statujë u vizatuan grafiti, përfshirë etiketimin e presidentit si “Hitleri turk”. Sipas mediave gjermane, heqja e statujës është bërë për arsye sigurie pasi rreth 100 rezidentë kishin protestuar kundër saj. Policia tha se, nuk mund të garantonte më sigurinë e njerëzve, ndaj dhe thirri zjarrfikësit të cilët përdorën një vinç për ta shkulur në orët e para të mëngjesit të së mërkurës, kur ishte ende errësirë.

Rreth 3 milionë qytetarë me prejardhje turke jetojnë në Gjermani dhe Erdogan, që në qershor u rizgjodh president me pushtet të zgjeruar, pritet të bëjë një vizitë në Berlin në fund të shtatorit, në përpjekje për të riparuar marrëdhëniet. Gjermania ka kritikuar Turqinë për arrestimin e rreth 50 mijë personave dhe pezullimin nga detyra të 150 mijë të tjerëve, mes të cilëve mësues, gjyqtarë dhe ushtarë pas grushtit të shtetit të vitit 2016. Berlini akuzon qeverinë e Ankarasë për përdorim të tepruar të forcës dhe shkelje të të drejtave të njeriut. Nga ana e saj pala turke mbrohet me argumentin se veproi për të ruajtur sigurinë kombëtare. Në valën e arrestimeve që pasoi grushtin e shtetit pati edhe gazetarë gjermanë, gjë që çoi në ftohjen mes dy vendeve, deri para pak vitesh partnerë të rëndësishëm tregtarë./abcnews.al

DHENDRI-SANKSIONET-ABC-M4-T2.mpg_snapshot_00.09-1280x770.jpg
ent ela23:00 | 27/08/2018

Dhëndri i presidentit turk Erdogan ka paralajmëruar se sanksionet amerikane rrezikojnë të destabilizojnë Lindjen e Mesme, duke nxitur terrorizmin dhe rikthimin e fluksit të emigracionit.

Turqia ka paralajmëruar të hënën se sanksionet e Shteteve të Bashkuara mund të destabilizojnë Lindjen e Mesme, të nxisin terrorizmin dhe të rikthejnë krizën e refugjatëve. Ministri i Financave, Berat Albajrak, njëkohësisht dhëndër i presidentit Erdogan, përdori një vizitë në Paris për të vënë në dukje aksionet e Amerikës dhe interesin e Ankarasë për të përmirësuar lidhjet me Europën. “Këto hapa të motivuara politikisht jo vetëm do të kenë impakt në sistemin financiar global, por edhe në stabilitetin rajonal”, deklaroi Albajrak në një konferencë për shtyp me homologun francez Bruno Le Maire. “Dhe ky impakt do të kontribuojë në intensifikimin e kaosit që ushqen terrorizmin dhe krizën e refugjatëve”, vijoi Albajrak.

Sanksionet e vendosura nga Shtetet e Bashkuara në lidhje me burgosjen e pastorit amerikan në Turqi kanë çuar në minimumin historik vlerën e lirës turke kundrejt dollarit, duke futur në krizë ekonominë turke. Më herët gjatë muajit, presidenti Donald Trump autorizoi dyfishimin e tarifave për çelikun dhe aluminin e importuar nga Turqia. Gjithashtu, investitorët janë të shqetësuar për një hetim që po kryhet nga Departamenti i Thesarit ndaj bankës turke Halkbank, që rrezikon të gjobitet për shkeljen e sanksioneve amerikane ndaj Iranit. Por marrëdhëniet mes Turqisë dhe Shteteve të Bashkuara janë acaruar edhe për shkak të Sirisë dhe ambicjes së Ankarasë për të blerë sisteme mbrojtëse ruse./abcnews.al

5b717f1d2269a210387766a4-1280x852.jpg
G. P.12:31 | 14/08/2018

Presidenti i Turqisë Erdogan i ka premtuar popullit të tij se pavarësisht rënies rekord të monedhës vendase, ekonomia turke është e fortë dhe çdo gjë do të zgjidhet shumë shpejt. Ai akuzoi sërish Uashingtonin për krizën duke paralajmëruar plane për mbrojtjen e monedhës vendase.

Turqia do të ringrihet pas rënies së valutës së saj. Premtimi është bërë nga presidenti i vendit Erdoan, sipas të cilit themelet e ekonomisë në vend janë shumë të forta. Sidoqoftë, ai shpjegoi se do të ketë plane të tjera për të mbështetur monedhën vendase dhe se do të bëhet çdo gjë për të zgjidhur situatën. Ai akuzoi sërish Shtetet e Bashkuara të Amerikës për një komplot ekonomik dhe për goditjen pas shpine të Turqisë.
Kriza financiare në Turqi po thellohet si pasojë e tarifave të tjera të vendosura nga administrate Tramp për aluminin dhe hekurin. Një krizë që ka rrënjë politike dhe ekonomike e që rrezikon pasoja dhe në Europë sidomos në zonën euro. Vendi i drejtuar nga Erdogan tashmë konsiderohet si më i rrezikshmi në botë për investimet.

Por dhe monedha euro po paguan krizën ku ka rënë Turqia, duke shënuar pragun e 1.14 dollarëve, dhe një rekord minimal.
Sipas autoriteteve, kriza e lirës turke është shkaktuar dhe nga rrjetet sociale. Ministria e Brendshme turke deklaroi se ka marrë masa kundër 346 llogarive në mediat sociale, të cilat kanë publikuar përmbajtje dhe material që provokuan krizën e monedhës vendase.
Një zëdhënëse e Komisionit Europian u shpreh se po monitorohen pasojat e krizës turke në bankat europiane. Ndërsa një ditë më parë, kancelarja gjermane Angela Merkel u shpreh se askujt nuk i intereson një destabilizim ekonomik i Turqisë.
Ajo shtoi se dëshironte një Turqi të zhvilluar nga ana ekonomike, por Banka Qendrore Europiane duhet ketë një punë shumë të pavarur në të ardhmen./abcnews.al

erdogan-1.jpg
ent ela12:06 | 11/08/2018

Në një letër të hapur për Nju Jork Tajms, presidenti turk Erdogan paralajmëroi se veprimet e njëanshme të Shteteve të Bashkuara të Amerikës ndaj Turqisë vetëm sa do të minojnë interesat dhe sigurinë e amerikanëve.

“Nëse Shtetet e Bashkuara të Amerikës nuk heqin dorë nga njëanshmëria dhe mungesa e respektit do të jemi të detyruar të kërkojmë aleatë dhe miq të rinj”. Kështu shkruan ndër të tjera presidenti turk Erdogan në një letër të hapur për Nju Jork Tajms. Më tej ai shton se veprimet e njëanshme të SHBA ndaj Turqisë vetëm sa rrezikojnë interesat dhe sigurinë e amerikanëve.

Ai paralajmëron se para se të jetë shumë vonë Uashingtoni duhet të heqë dorë nga ideja se marrëdhëniet mes dy vendeve janë asimetrike, dhe të pranojnë faktin se Turqia ka alternative. Kreu i shtetit turk ka përmendur dhe gabimet që administrata amerikane ka bërë ndaj Ankarasë vitet e fundit duke e cilësuar si një partneritet që ka qenë gjithnjë në provë. Ndër të tjera kërkesa që nuk është pranuar asnjëherë, për ekstradimin e imamit në ekzil në Shtetet e Bashkuara të Amerikës Fetullah Gulen, i cili konsiderohet si përgjegjës i përpjekjes së dështuar për grusht shteti në Turqi në korrik të 2016-ës, dhe mbështetjes ndaj militantëve kurdo-sirianë, që Turqia i konsideron si krahu i armatosur i Partisë së Punës në Kurdistan.

Erdogan shton se fjalët e tij kanë shkuar kot, duke thënë se në javët e fundit Shtetet e Bashkuara të Amerikës kanë ndërmarrë hapa për të përshkallëzuar tensionet, si në rastin e arrestimit të pastorit amerikan Endrju Brunson, ku presidenti amerikan Tramp reagoi duke i vënë sanksione ministrave turq. Një vendim që për Presidentin turk është i papranueshëm dhe i paarsyeshëm.

Erdogan paralajmëroi se veprimet e njëanshme kundër Turqisë nga ana e SHBA, një vend aleat prej dekadash vetëm sa do të minojnë interesat dhe sigurinë amerikane. /abcnews.al

ERDOGAN-TURQI-1280x720.jpg
ent ela14:40 | 10/08/2018

Fushatë ndërkombëtare kundër Turqisë, është kjo bindja e presidentit turk Erdoan, i cili i ka bërë apel popullit të tij të shmangë panikun, në një moment që lira turke është në nivelin më të ulët historik.

Lira turke ka pësuar rënie të ndjeshme duke humbur më shumë se 7% të vlerës së saj përballë dollarit.

Kartmonedha turke ka arritur për herë të parë në pragun gjashtë për një dollar, pasi humbi rreth 12% të vlerës së saj. Ajo u këmbye në mëngjes me 5,96 për një dollar duke shënuar një rënie prej 7%.

Lira turke, vlera e të cilës ka rënë më shumë se një të tretën përballë dollarit dhe euros që prej fillimit të vitit, është ulur tashmë më shumë se 5% përballë dollarit.

Presidenti turk Erdoan deklaroi se po ndodhin fushata ndërkombëtare për të goditur vendin e tij, dhe i bëri thirrje popullit të mos bjerë pre e panikut për zhvlerësimin e lirës turke. Erdogan u shpreh se vendet e tjera kanë dollarët, ndërsa Turqia ka Zotin. Sipas Blumberg lira turke është aktualisht në nivelin më të ulët historik.

Rënia e lirës turke vazhdon dhe si pasojë e përshkallëzimit të tensioneve mes Ankarasë dhe Uashingtonit, por dhe nga shqetësimet për ekspozim jo të nevojshëm të kreditorëve të zonës së Bashkimit Europian, sipas asaj që shkruan Financial Times. /abcnews.al

 

TURQIT-SHBA.mpg_snapshot_01.25-1280x690.jpg
ent ela20:29 | 07/08/2018

Qeveria e re turke, me udhëzim të presidentit Erdogan ka nisur një ofensivë diplomatike me qëllim përmirësimin e marrëdhënieve me aleatët ushtarakë. Kështu, një delegacion është dërguar në Uashington për bisedime, ndërsa vetë Erdogan në shtator do të vizitojë Gjermaninë.

Turqia ka nisur një delegacion drejt Uashingtonit në përpjekje për të riparuar marrëdhëniet diplomatike me Shtetet e Bashkuara. Sipas CNN-it turk, takimi i parë mes zyrtarëve turq dhe atyre amerikanë do të zhvillohet të mërkurën. Zëvendës ministri i ri i Punëve të Jashtme, Sedat Onal mësohet se udhëheq delegacionin e Ankarasë. I njëjti burim mediatik raportoi më herët se Turqia dhe Shtetet e Bashkuara kanë arritur një sërë marrëveshjesh paraprake për çështje të caktuara dhe delegacioni është optimist për sheshimin e tensioneve dypalëshe. Ndërkohë, Ankaraja zyrtare ka ndërmarrë një tjetër aksion diplomatik, këtë herë për të rregulluar marrëdhëniet me Gjermaninë.

Dy aleatët në organizatën ushtarake të NATO-s shkëmbyen replika në lidhje me reagimin e presidentit Erdogan ndaj personave të konsideruar përgjegjës për grushtin e dështuar të shtetit të vitit 2016, që çoi në burgimin e dy gazetarëve gjermanë. Dhe në fakt do të jetë vetë Erdogan, tashmë president me pushtet të plotë ekzekutiv, që do të vizitojë Berlinin më 28 dhe 29 shtator. Një zëdhënëse e qeverisë gjermane ka deklaruar se Erdogan do të takohet me homologun Frank Ëalter Steinmeier, por nuk ka konfirmuar nëse ai do të pritet në takim nga Angela Merkel. Për momentin, zyra e kancelares ka refuzuar të bëjë komente. Sipas gazetës gjermane “Bild”, Erdogan do të pritet nga Steinmeier me nderime ushtarake dhe një banket. Më herët gjatë vitit, ministrat e Jashtëm të dy vendeve deklaruan se do të bënin gjithçka për përmirësimin e marrëdhënieve./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono