Emiljano Shullazi

gjyq.jpg
G. P.11:17 | 15/03/2019

Dështon sërish seanca për Emiljano Shullazin dhe grupin e tij. Shkak është bërë mungesa e avokates e cila mbron kryesisht Gilmando Danin. Kjo mungesë i kushtoi rëndë avokates, pasi u gjobit nga gjykata. Por, kjo mungesë çoi edhe në pezullimin e paraburgimit, deri në seancën e ardhshme, më 25 Mars.
Në Nëntor të vitit të shkuar, Shullazi dhe grupi i tij u dënua nga Gjykata e Krimeve të Rënda me 54 vite burg në total. Ky vendim u ankimua nga mbrojtja si e padrejtë.

Sipas tyre, prokuroria nuk ka prova për akuzat që rëndojnë mbi të pandehurit. Ndërsa kujtojmë se mbi ta rëndojnë akuzat për, “Shtrëngim me anë të kanosjes për dhënie pasurie”, “Shkatërrim prone me eksploziv”, “Grup i strukturuar kriminal” dhe “Veprime në kuadër të grupit të strukturuar kriminal”./abcnews.al

ppdd.jpg
G. P.18:48 | 13/11/2018

Ka reaguar Partia Demokratike pas këtij vendimi. Në një deklaratë për shtyp thuhet se Shullazi i arrestuar vetëm falë denoncimit dhe betejës së pandërprerë të PD-së, si dhe mbështetjes së SHBA-së.

Sipas selisë blu, dënimi do ishte shumë më i rëndë nëse Shullazi nuk do kishte mbështetjen e qeverisë, për krime të tjera të rënda, që janë lënë pa zbuluar, pasi policia dhe drejtësia kanë mbyllur sytë.

Në deklaratën e PD-së thuhet se dënimi i bandës së Shullazit është një betejë ende e pafituar plotësisht, pasi pas hekurave duhet të jetë edhe deputeti i PS Jurgis Çyrbja, për të cilin ka përgjime të prokurorisë se informonte këtë grup për hetimet ndaj tij./abcnews.al

SHULLAZI-1280x720.jpg
G. P.16:40 | 13/11/2018

Gjykata për Krimet e Rënda shpalli vendimin përfundimtar ndaj Emiliano Shullazit dhe katër të bashkëpandehurve, duke i dënuar me 55 vite burg në total. Avokati i Shullazit e konsideroi vendimin e gjykatës nën presion dhe lajmëroi apelimin e tij.

 Të pestë të pandehurit u deklaruan fajtorë. Emiliano Shullazi, i konsideruar si kreu i grupit kriminal, u fajësua për “gjobëvënie” ndaj biznesmenëve Ylvi Beqja dhe Jani Zaka si dhe për “grup të strukturuar kriminal”.

Shullazi fitoi pafajësi për pesë akuza të tjera, “gjobëvënie” ndaj biznesmenit Adriatik Kërçuku, dy raste të “shkatërrimit të pronës me eksploziv”, si edhe për “kanosje për shkak të detyrës” ndaj akademikëve Mynyr Koni e Dhori Kule. Sipas gjykatës, nga provat e paraqitura në gjykim nuk rezultonte e provuar që i pandehuri të kishte kryer këto vepra penale.

I pafajshëm për një nga katër akuzat që i rëndonin mbi supe u deklarua edhe i pandehuri Gilmando Dani, por për tre të tjerat ai duhet të vuajë 12 vite burg. Për të pandehurit Endrit Zela dhe Endrit Qyqja gjykata dha nga 10 vjet burg, ndërsa për të pandehurin Blerim Shullazi 9 vite.

Në të njëjtin vendim gjykata u hoqi të pandehurve të drejtën e lirimit me kusht para përfundimit të kohës së plotë të dënimit. Vendimi u ndoq edhe nga disa përfaqësues të ambasadës amerikane. Avokati i Emiliano Shullazit tha se gjykata ishte ndikuar dhe paralajmëroi apelimin e vendimit.

“Vendimi është i padrejtë, do ta ankimojmë. Megjithatë fatkeqësia e kësaj gjykate është që nuk i shpëton dot presionit., Së dyta fusha në të cilën këta operojnë nuk janë në gjendje të bëjnë dallimin mes të drejtës civile, të drejtës administrative dhe të drejtës penale”, u shpreh Vladimir Meçe.

Gjatë paraditës se të martës gjykata u njoh me konkluzionet e avokatëve për të pandehurit Dani, Qyqja, Zela e Blerim Shullazi. Sipas avokatëve akuzat ndaj klientëvve të tyre ishin ndërtuar mbi absurd, në mungesë të provave dhe fakteve konkrete. Në pretencën e saj, të lexuar në 2 Tetor prokuroria kërkoi 64 vite burg në total për të pandehurit e kësaj dosjeje. /abcnews.al

emiljano-shullazi-1280x683.jpg
G. P.12:38 | 30/10/2018

Në Gjykatën e Krimeve të Rënda nisi sot paraqitja e konkluzioneve të palës mbrojtëse në procesin ndaj grupit të Shullazit. Avokati i Emiliano Shullazit, Vladimir Meçe kërkoi pafajësi për klientin e tij. Avokatët e tjerë vazhdojnë në 13 nëntor.

Pas disa seancash të dështuara, pala mbrojtëse e të pandehurve në procesin ndaj grupit “Shullazi” filloi leximin e konkluzioneve, në një seancë ku 5 të pandehurit nuk ishin të pranishëm. I pari e ka insur këtë proces avokati i Emiliano Shullazit, Vladimir Meçe, i cili pasi lexoi nje material voluminoz me konkluzionet përfundimtare, kerkoi pafajësi për klientin e tij.

Avokati Meçi argumentoi pse nuk i pranon akuzat e prokurorisë

 Vladimir Meçi: “Një proces i nisur keq dhe i paravendosur. Media, opinioni publik, politik dhe ai diplomatik e kishin vendosur dënimin e Emiljano Shullazit. Ishin të shumtë ata që më thonin mua se gjyqi ishte i paracaktuar, por unë dhe klienti im synojmë vetëm të vërtetën”.

 Më tej avokati Vladimir Meçe shpjegoi se nisi procesi ndaj Shullazit:

 “Më 17 prill të 2016-s ka nisur procedimi penal ndaj Emiljano Shullazit, pasi, sipas prokurorisë, kishte kërcënuar dy akademikët, Mynyr Koni dhe Dhori Kule. Ky hetim ka nisur në bazë të një denoncimi të bërë publik nga ish-Kryeministri Sali Berisha. Më pas në skenë del edhe një person tjetër i quajtuar Ylvi Beqja. Ky i fundit ka pasur marrëdhënie të mirë me Emiljanon dhe me disa nga të personat që janë nën hetim. Madje në një prononcim, Beqja ishte shprehur se: “Emiljano Shullazi më shpëtoi nga ai hall i madh që kisha dhe dhurimin i një pjese të ish hotel Vollgës ishte më e pakta që mund të bëja.”. Prokurorja e çështjes Elisabeta Imeraj i bëri presion Beqajt dhe më 27 korrik të 2016 dëshmitari i mbrojtur i drejtësisë ndryshoi qëndrim, duke akuzuar Shullazin për kërcënim dhe përvetësim me dhunë e armë zjarri të një pjesë të ish-Hotel Vollgës. Në deklarimet e Ylvi Beqajt ka kontradikta zoti gjyqtar dhe unë si mbrojtës kërkoj pafajësi për klientin tim, Emiljano Shullazi”.  

Avokatët  e 4 të pandehurve të tjerë në këtë proces, Gilmando Dani, Endri Qyqja, Endri Zela dhe Blerim Shullazi kërkuan kohë për paraqitjen e konkluzioneve. Seancë e rradhës në Gjykatën e Krimeve të Rënda u caktua në datën 13 nëntor.

Prokuroria e Krimeve të Rënda ka kërkuar në total një dënim me 64 vite burg për grupin e Shullazit. Për Emiliano Shullazin u kërkua dënimi me 17 vjet burg. Pretenca është përgatitur nga prokurorët Donika Prela, Besnik Muçi, Anton Martini dhe Gent Osmani. Grupi i Shullazit akuzohet për krijimin e grupit të strukturuar kriminal, kanosje për shkak të detyrës dhe shtrëngim me anë të kanosjes për dhënie pasurie./abcnews.al

ambasadorja.png
G. P.16:13 | 05/10/2018

Largimi nga detyra e ish-ambasadorit Donald Lu nuk e ka ulur vëmendjen e Shteteve të Bashkuara të Amerikës ndaj hetimit të dy prej dosjeve më të përfolura, atë të ish-ministrit Saimir Tahiri dhe tjetra që i përket Emiliano Shullazit.

“Ne do të vazhdojmë të qëndrojmë me ata shërbëtorë publikë të ndershëm dhe të guximshëm që po ndërtojnë një të ardhme më të ndritur dhe jetike për gjyqësorin e Shqipërisë. Na shihni ta bëjmë këtë për çështjen “Shullazi”, na shihini ta bëjmë këtë për hetimin “Tahiri”, tha zv/ambasadorja.

Në ceremoninë e diplomimit të magjistratëve të rinj, zv/ambasadorja amerikane Leyla Moses i kujtoi politikanëve se nuk duhet të vonojnë me reformën në drejtësi.

“SHBA do të vazhdojnë gjithashtu të nxisin drejtuesit politik të Shqipërisë që të bëjnë pjesën e tyre për të krijuar një sistem gjyqësor më të të mirë për të gjithë, të kërkojë që deputetët e Kuvendit të punojnë sëbashku. Ata duhet të punojnë së bashku për të ndryshuar ligjin e qeverisjes në mënyrë që Shkolla e Magjistraturës të mbushë këto karrige me të diplomuarit e ardhshëm. Sistemi i drejtësisë së nesërme varet nga veprimi i Kuvendit sot”, u shpeh Moses.

Shtetet e Bashkuara të Amerikës këmbëngulin për ngritjen e SPAK dhe BKH . Dy institucione që sipas zv/ambasadores amerikane përfaqësojnë epokën e re të daljes nga e shkuara e njëllosjes së korrupsionit dhe përfaqësojnë llogaridhënien  e re për popullin shqiptar./abcnews.al

emiljano-shullazi-1280x683.jpg
G. P.13:37 | 24/09/2018

“Çështja në ngarkim të Emiljano Shullazit, etj., ka qenë një ndër çështjet që në dy vitet e fundit ka tërhequr vëmendjen e opinionit publik. Emiljano Shullazi, Gilmando Dani, etj., janë akuzuar për vepra penale të rënda dhe opinionit i janë servirur si përfaqësuesit më të spikatur të botës së krimit. Jo gjithmonë e vërteta lidhur me këtë çështje është bërë e njohur dhe kjo ka krijuar në opinion idenë se po ndëshkohet një grup i rrezikshëm kriminal, ndërsa prokurorët e çështjes kanë marrë pamjen e kalorësve në këtë betejë kundër krimit.”

Kështu e kanë nisur avokatët mbrojtës të Emiljano Shullazit, Gilmando Danit dhe Endri Qyqjes letrën e tyre që i është nisur kryeprokurores Arta Marku dhe drejtueses së Prokurorisë së Krimeve të Rënda, Donika Prela.

Sipas avokatëve, kjo situatë ka dëmtuar shqyrtimin e paanshëm të çështjes dhe tashmë që dosja është duke u përfunduar rrezikon që të mos jepet vendim i bazuar mbi prova.

“Kjo situatë ka dëmtuar shqyrtimin e “ftohtë” dhe “të paanshëm” të kësaj çështjeje, ka dhunuar parimin madhor të prezumimit të pafajsisë dhe tashmë që çështja ka mbërritur në finish, rrezikon që paragjykimi dhe zhurma e krijuar rreth saj, të mos lejoje si përfaqësuesit e akuzës, ashtu dhe vetë gjykatën që të vendosin sipas “liberum arbitrium”, pra, sipas zgjedhjes së tyrë të lirë, sipas bindjes së bazuar mbi prova dhe vetëm mbi to”.

Në procesin kundër klientëve të tyre, avokatët rendisin disa shkelje ligjore dhe sipas tyre gjithashtu përmendet dhe fakti se çështja ka ndjeshmëri politike.

Letra e plotë dërguar Arta Markut dhe Donika Prelës:

letra1
letra2
letra3
letra4 (1)
letra4
letra5

/abcnews.al

lulzim-bbb.jpg
G. P.10:46 | 20/09/2018

Nga Vlora, ku mblodhi sot deputetët opozitarë, kreu demokrat Basha akuzoi qeverinë për atë që quan aferë kriminale dhe korruptive me ligjin special për Teatrin Kombëtar. PD dhe aleatët e saj vijojnë bojkotin e parlamentit që prej fillimin të këtij sesioni.

Opozita e bashkuar takimin e radhës të grupit parlamentar me aleatët e zhvilloi në Vlorë.

Duke denoncuar ashpër praktikën e vjedhjes me ligj, si e quan Lulzim Basha rivotimin në parlament të ligjit special për Teatrin Kombëtar, të rrëzuar si antikushtetues nga dekreti persidencial, rastin e servir si pasqyrim të situatës energjente ku ndodhet vendi.

“Drejtësia në kolaps, gjykata në kolaps, pa gjykatës dhe prokurorë nuk mund të jetë zgjidhje për vjedhjen me ligj që votohet sot në seancën plenare”, tha Basha.

Kjo zgjidhje nuk mund të vijë as nga institucionet që e kanë detyrë ndalimin e paligjshmërisë, thekson kryedemokrati, sa kohë gjenden nën kontroll politik.

“Cila është policia që duhet të arrestojë ligjvënësit që vjedhin me ligj. Policia është shtojcë e organizatave kriminale. Drejtësia e tregon rasti i Emiliano Shullazit ku u katandis, është pa prokuror. Kjo është vepra e Ramës në reformën në drejtësi. Ky është nderi i Ramës ndaj Shullazëve të tjerë”, tha Basha.

Pjesmarrjen e opozitës në Kuvend e sheh si përligje të asaj që quan fasadë parlamentare për llogari të kriminelëve, ndaj në një thuajse-thirrje për protestë, Basha identifikon të vetmen zgjidhje demokratike joinstitucionale.

“Çlirimi i parlamentit nga sovrani përmes mobilizimit qytetar është e vetmja mënyrë. Bashkimi i qytetarëve që kulmon në Tiranë do i provojë shqiptarëve se koha kur një tufë banditësh marrin peng Shqipërinë do të marrë fund shpejt”, u shpreh kreu i PD-së.

Betejën politike brenda institucioneve thotë se opozita e tij e ka mishëruar me propozimet kushtetuese për Vettingun e politikanëve, zgjidhja e vetme për Lulzim Bashën për pastrimin e mëtejshëm të institucioneve nga miqtë e kriminelëve, pas largimit të vetë këtyre të fundit, të arritur nga ligji i dekriminalizimit edhe kjo e fundit nismë e opozitës demokrate./abcnews.al

 

 

SHULLAZI-1280x720.jpg
G. P.11:19 | 12/06/2018

Në Gjykatën e Krimeve të Rënda ka përfunduar procesi i gjykimit për Emiliano Shullazin dhe 4 të pandehurit e tjerë, Gilmando Dani, Endrit Qyqja, Endri Zela dhe Blerim Shullazi. Më 26 Qershor, prokuroria do të paraqesë konkluzionet përfundimtare dhe do të kërkojë masën e dënimit për ta.

Në seancën e sotme, pala mbrojtëse kërkoi të thirren si dëshmitarë disa punonjës të një banke të nivelit të dytë për të dëshmuar mbi disa çeqe që kanë lëshuar në emër të Gilmando Danit dhe Endri Qyqes. Por kjo kërkesë nuk u pranua nga gjykata.

Mbi Emiliano Shullazin dhe 4 të pandehurit e tjerë rëndojnë tre akuza: “Shtrëngim me anë të kanosjes ose dhunës për dhënien e pasurisë”, “kanosje për shkak të detyrës “ dhe “krijim grupi të strukturuar kriminal”./abcnews.al

emiljano-shullazi-1280x683.jpg
G. P.17:44 | 13/03/2018

Emri i shoferit të biznesmenit Ylvi Beqja, Besnik Musai, dëshmia e të cilit rëndoi pozitën penale të Emiliano Shullazit u kthye në një “mollë sherri” mes palëve në seancën e të martës.

Avokatët u përfshinë në debate të ashpra me prokuroren, se përse dëshmitari Musai, bashkëjetueses së Beqjes, ishte marrë nën mbrojtje policore.

Gjuhës së tensionuar nuk i shpëtoi as i pandehuri Shullazi. Ai kërkoi llogari nëse dëshmitari Musai kishte dhënë deklarime në Prokurori, para se të pyetej në Gjykatë.

Prokurorja në sallën e gjyqit shpjegoi se Musai mbrohej si rreth familjar i Ylvi Beqjes dhe se ai nuk ishte pyetur prej saj në prokurori.

Pas kësaj përgjigje, Shullazi kërkoi rithirrjen në proces të dëshmitarit, për të sqaruar këtë moment.

Gjatë dëshmisë së tij në muajin Shtator 2017, Musai tha se kishte parë Shullazin t’i drejtonte pistoletën biznesmenit Ylvi Beqja./abcnews.al

vlcsnap-error634-1280x720.jpg
G. P.16:21 | 27/02/2018

Pesëshja gjykuese e dosjes në ngarkim të Emiliano Shullazit tek Krimet e Rënda do t’i drejtohet me shkresë zyrtare një banke të nivelit të dytë në Tiranë për t’i vënë në dispozicion 6 çeqe të thyera në sportelet e saj në Dhjetor të vitit 2014.

Çeqet  në fjalë, në shuma deri në 25 mijë euro, janë lëshuar nga biznesmeni Ylvi Beqja dhe janë tërhequr nga shoferi i tij dhe dy prej të pandehurve në proces. Ato u kërkuan për t’u paraqitur si provë në proces nga ana e avokatëve të të pandehurëve. Po ashtu, Gjykata do t’i kërkojë bankës identifikimin e sportelisteve që i kanë bërë këto veprime, për t’i thirrur si dëshmitare në gjyq.

Në seancën e të martës, Gjykata pranoi edhe kërkesën e avokatit të Endrit Zelës për shfaqjen në sallën e gjyqit të pamjeve filmike të marra nga Prokuroria nga kamerat e sigurisë të banesës së biznesmenit Ylvi Beqja. Procesi ndaj Shullazit dhe katër të bashkëpandehurve të akuzuar për “gjobëvënie” ndodhet në fazën e marrjes së provave të mbrojtjes./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono