ekonomia

petrit-vasili-lsi-1280x742.jpg
nev ila13:32 | 08/11/2019

Gënjeshtare dhe mashtruese është qeveria Rama për Lëvizjen Socialiste për Integrim.

Këtë e faktuan edhe në deklaratën e fundit të ministrisë së financave se rritja ekonomike për vitin 2020 do të jetë jetë 4,1 përqind vuri në dukje numri dy i kësaj partie.

Petrit Vasili argumenton edhe pse-në e kësaj akuze.

“Hap pas hapi Lëvizja socialiste për integrim sqaron se rritja ekonomike do të përgjysmohet krahasuar me çfarë deklaron qeveria. Në të dhënat e fundit që ka publikuar Banka Botërore, Petrit Vasili ka lexuar se bizneset shqiptare në masën 30 përqind ankohen se administrata tatimore publike u kërkon ryshfet. Këto shifra korrupsioni janë tre herë më të larta se mesatarja e vendeve të rajonit dhe dy herë më të larta se mesatarja në nivel botëror”– shprehet nënkryetari i Lsi.

Rritja ekonomike dhe mirëqenia imagjinare e qeverisë deklaron Petrit Vasili nuk duhet të pengojë shikimin e realitetit që sipas tij është shkatërrimi ekonomik dhe tronditja në themele të familjes shqiptare për shkak të varfërisë./abcnews.al

liperi.jpg
nev ila20:06 | 29/10/2019

E ftuar në Mbrëmje Abc me gazetaren Mirela Milori ishte gazetarja dhe kryeredaktorja e revistës “Monitor” Ornela Liperi. Liperi dha një panoramë të qartë për paketën fiskale të vitit 2020, e cila fillon të aplikohet në fillim të janarit, dhe situatën aktuale ekonomike. Liperi tha se Banka Botërore dhe FMN kanë raportuar se ekonomia në Shqipëri është ngadalësuar, dhe se rritja e saj këtë vit është e ulët në krahasim me vitin e kaluar.

Duke qenë në këtë situatë Liperi tha se viti i ardhshëm, 2020 do të jetë një vit i dobët ku ekonomia nuk do të pësojë rritje, për më tepër qeveria nuk do të ketë mundësi për investime të mëdha që sjellin të ardhura.

Ndërsa për sa i përket paketës fiskale Liperi tha se ka një rritje të gjobave duke përmendur edhe gjobën për tërheqjen e kuponit tatimor nga individi, e cila nga 10 mijë lek që ishte në paketën fiskale të kaluar tashmë është rritur në 20 mijë lek.

Liperi theksoi se Shqipëria është vendi me taksat më të larta dhe pagat më të ulëta në rajon.

“Me aplikimin e paketës së re fiskale në 2020 do të fillojë një sistem më automatik. Ka një rritje të gjobave për moslëshim faturash. Evazioni fiskal është i lartë ndërsa gjobat janë rritur. Individi që nuk tërhiqte kupon kishte një gjobë prej 10 mijë lekësh, tashmë kjo gjobë është rritur në 20 mijë lekë.

Fatkeqësisht viti 2020 nuk do të jetë një vit i mirë. Nëse do e krahasonim me vitin e kaluar theksojmë se rritja erdhi si pasojë e rënies së shirave, ku Shqipëria pati mundësi të prodhojë energjie ta shiste gjë që reflektoi në rritjen ekonomike me 4 %, ndërkohë këtë vit nuk ra shi, dhe rritja ekonomike ishte në 2 %. Në 2020 nuk pritet të ketë rritje ekonomike pasi projektet e mëdha janë në përfundim. Ne kemi ekonomi të dobët. Po ngushtohen koncesionet, nuk ka të ardhura ndërkohë është duke ikur edhe një prej investimeve më të mëdha siç është TAP apo të tjerë. Shqipëria ka qenë e fundit për sa i përket rritjes ekonomike. Jemi vendi me taksat më të larta dhe pagat i kemi të ulëta. Raportet e bankës botërore dhe FMN kanë raportuar se ekonomia është ngadalësuar por këtë qeveria jonë nuk e pranon, dhe deri sa nuk e pranon se ekonomia është në përkeqësim, atëherë nuk ka se si të marrë masa për përmirësim. Për sa kohë që nuk kemi të ardhura dhe jemi të detyruar të paguajmë koncesionet deri në 2024, shteti duhet të shtrëngojë rripin. Viti 2020 do të jetë një vit dietik“, tha Liperi./abcnews.al

gjergj-buxhuku-1280x720.jpg
ent ela12:25 | 27/10/2019

Rënia e ndjeshme e Shqipërisë në raportin e fundit të Bankës Botërore për klimën e biznesit, sipas Konfindustrisë, tregon se ekonomia gjendet në vështirësi dhe një nga shkaqet kryesore është mungesa e investimeve të huaja.

Konfindustria shpreh shqetësimin për rënien e ndjeshme të Shqipërisë në raportin e fundit të Bankës Botërore për klimën e biznesit në vitin 2018. Shqipëria ka humbur 19 pikë në klasifikimin e përgjithshëm botëror, duke u renditur në vendin e 65 nga 190 vende të përfshira në raport.

Konfindustria vlerëson, se rënia e fortë e Shqipërisë në këtë klasifikim është e lidhur para së gjithash me rritjen e shpejtë të vendeve të tjera konkurente të Rajonit për tërheqjen e investimeve të huaja.

“Shqipëria është në vend të parafundit, duke lënë prapa vetëm Bosnje-Hercegovinën e paqeverisur, por e ndarë praktikisht në 3 shtete. Treguesi i mesiperm është shenjë e qartë, se Shqipëria ka mbetur prapa në garën e konkurencës me vendet e tjera në tërheqjen e investimeve të vendit dhe të huaja. Mbyllja e projekteve të mëdha ndërkombëtare si TAP në transmetimin e gazit natyror nga Azerbaixhani në Itali dhe State-Crafti norvegjez në HEC-et e Devollit, praktikisht e kanë lënë Shqipërinë pa investime të huaja strategjike në vazhdim”.

Sipas administratorit të Përgjithshëm të Konfindustrisë, Gjergj Buxhuku edhe treguesit zyrtarë makro-ekonomikë për 9-mujorin e vitit 2019 tregojnë se gjendja e ekonomisë do të jetë e vështirë edhe për vitin në vazhdim.

“Rënia me pothuaj 50% të të ardhurave buxhetore nga TVSH/tatimi mbi vlerën e shtuar si zëri kryesor buxhetor dhe rënia e kahut të rritjes ekonomike PBB në gjysmën e parashikimit vjetor, janë tregues të qartë për vazhdimësinë e gjëndjes së vështirë ekonomike. Rritja ekonomike prej vetëm 2.2% e PBB në 6 mujorin e parë të vitit 2019 rrezikon të kapi me shpejtësi vlerën e vitit 2013 pas krizës globale financiare, që konsiderohet më e ulta e 20 viteve të fundit”.

Konfindustria thekson se gjendja e ekonomisë paraqitet mjaft më e vështirë, nëse vlerësohet se borxhi publik është të paktën 10% më i lartë, pa llogaritur detyrimet financiare për koncesionet dhe PPP, si dhe duke mos marrë parasysh se Kontrolli i Lartë i Shtetit ka përllogaritur rreth 500 milionë dollarë detyrime të shtetit ndaj të tretëve, që nuk bëjnë pjesë në treguesit zyrtarë.  /ABC news Albania 24/7

IMG_0683-1280x853.jpg
ad min11:14 | 18/10/2019

Sipas Partisë Demokratike, qeveria do të miratojë së shpejti në parlament aktin normativ që vulos dështimin e Edi Ramës me ekonominë edhe këtë vit. Sipas drejtorit të kabinetit, Dorian Teliti Rama do miratojë akti normativ që fsheh të vërtetën mbi dështimin e mbledhjes së të ardhurave, heq shpërblimet për pensionistët dhe ul ndjeshëm investimet.

Sipas tij, qeveria dështon në mbledhjen e të ardhurave, ku nga tatimet e doganat do të jenë 90 – 100 milionë dollarë më pak të ardhura.

DEKLARATË E PARTISË DEMOKRATIKE, DREJTORI I KABINETIT DORIAN TELITI

Qeveria do të miratojë së shpejti në parlament aktin normativ që vulos dështimin e Edi Ramës me ekonominë edhe këtë vit. Me gjithë përpjekjet tinëzare për të fshehur dështimin, të gjithë treguesit flasin për përkeqësimin e mëtejshëm të ekonomisë së vendit, për më pak punë, për më pak para në xhepat e shqiptarëve.

Akti normativ qeveritar:

  1. Fsheh të vërtetën mbi dështimin e mbledhjes së të ardhurave.
  2. Nuk parashikon shpërblime për pensionistët dhe të pamundurit.
  3. Ul ndjeshëm investimet në projekte zhvillimore dhe infrastrukturë.
  4. Braktis qëllimisht ish të përndjekurit.

Ecuria negative e mbledhjes së të ardhurave, ku vetëm nga tatimet dhe doganat në 8 muajt e parë, mungonin mbi 60 milion dollarë, do të vazhdojë të thellohet akoma edhe më shumë gjatë muajve të fundit të vitit. Edi Rama ka në tryezën e tij të punës një dokument konfidencial, ku parashikohet që, me ritmet aktuale, të ardhurat nga tatimet e doganat do të jenë 90 – 100 milionë dollarë më pak.

Akti normativ i qeverisë i ndan shqiptarët në qytetarë të dorës së parë dhe qytetarë të dorës së dytë.

Qeveria e Edi Ramës paguan me miliona oligarkët dhe klientët e vet, por nuk parashikon asnjë qindarkë për shpërblimin e fund vitit të pensionistëve dhe të familjeve  në nevojë.

Kjo qeveri që erdhi në pushtet me mashtrimin e dëmshpërblimit të plotë të ish të përndjekurve politikë, i ka braktisur ata. Me vetëm 12 milionë dollarë për dëmshpërblimin financiar, kjo qeveri e ka zgjatur mbi dy dekada afatin për të shlyer plotësisht faturën financiare.

Qeveria e Edi Ramës paguan qindra milionë për PPP, por shkurton investimet publike që gjenerojnë mirëqenie. Me këtë akt normativ, Qeveria ka vendosur të shkurtojë nga buxheti me 30 milionë dollarë nga shpenzimet për investime publike, duke ulur ndër të tjera, investimet në sigurinë ushqimore, zhvillimin rural, ujësjellës kanalizime, arsim profesional dhe universitar, duke shkelur për të disatën herë premtimet ndaj studenteve.

Me moton të vjelim sa më shumë nga djersa e shqiptarëve e t’i bëjmë paratë e tyre  “rrush e kumbulla” për t’u pasuruar me një grusht oligarkësh, kjo qeveri dëshmon çdo ditë kapitullimin e saj në politikat ekonomike dhe vulos rrënimin e shqiptarëve.

Partia Demokratike është e vetmja alternativë e besueshme qeverisëse! Me programin tonë që ka në bazë vullnetin e çeliktë për të siguruar konkurrencë të ndershme në treg dhe për të luftuar korrupsionin, ne do ta nxjerrim vendin nga kriza e besimit dhe e shpresës, do të rimëkëmbim ekonominë dhe do të punojmë për mirëqenien e çdo familjeje shqiptare./abcnews.al

EKONOMIA-NE-KUKES.mpg_snapshot_00.05-1280x720.jpg
ent ela16:15 | 05/10/2019

Në Kukës boshatisja e tregut nga blerësit tregon për një vend të varfër.  Tregtarët tregojnë se ka ditë që nuk fitojnë dot as një mijë lekë të vjetra dhe shumë prej tyre kalojnë kohën duke pirë cigare.

Në tregun e Kukësit rrallë do të shikosh njerëz që hyjnë e dalin. Blerësit  numërohen me gishta në një vend me 60 mijë banorë dhe dy dogana. Kurse tregtarët kalojnë kohën duke pirë cigare apo ndonjë kafe.

Kjo është ekonomia e Kukësit ku vetëm stadium ka kushtuar 4 milionë euro. Më shumë pak blerës e po aq pak shitje. Tregu industrial i ngjan një ekspozeje veshmbathjesh jo një vendtregetimi.

75 vjeç ky tregtar  prej 25 vitesh shet këtu. Thotë se kurrë s’ka njohur kaq pak lëvizje Quhen të vetëpunësuar, por nuk arrijnë të fitojnë as 100 lekë në ditë në qytetin që ka dhe aeroport. Ngjitur me tregun e ri është  ai i rrobave të përdorura. Ka më shumë lëvizje, por edhe aty shumë pak blerës.

Tregtarët thonë se njerëzit nuk kanë lekë. Ka nga ata kuksianë që tregun e bëjnë në Prizren. Një nga faktorët kryesorë të varfërisë në Kukës është emigrimi. Aty ka shumë pak të rinj. Në përmirësimin e ekonomisë në Kukës nuk kanë ndikuar as Rruga e Kombit, aeroporti, spitali apo stadiumi, investime këto që kanë kushtuar miliona euro.

Gazetar i ABC News, Kukës: Bujar Muçmata

 

jozefina-topalli.jpg
ad min15:22 | 25/09/2019

Ish-nënkryetarja e Kuvendit Jozefina Topalli I ka bërë thirrje të rinjve që të krijojnë një lëvizje të re pasi vendi është i papërfaqësuar. 4 politikanët që sot drejtojnë vendin sipas saj, duhen larguar.

U deshën të kalojnë 40 vjet që të rikthehej në auditore të Universitetit të Shkodrës. Përballja me të rinjtë e bënë të udhëtojë në kujtime, të ndalet në ditët kulminante të jetës të cilat e kanë bërë të prekë ekstremet majën dhe fundin. Ndjesitë ia përcolli edhe me mesazhe.

“Siç e dini tashmë unë kam dështuar për shumë vite, deri sa hyra në universitet. Unë kurrë nuk e kasha menduar të bëhesha kryetare parlamenti. Por kurrën e kurrës nuk mund ta besoja se në liri vendi ynë të vuante nga mungesa e përfaqësimit sepse dikujt për të ruajtur karrigen e vet i interesonte djegia e mandateve dhe mos hyrja në zgjedhje”.

Ndonëse zhgënjimin më të madh ia dhanë të vetët brenda partisë, të rinjve u kërkon që alternativën të mos e shohin as në kampet e tjerë politikë.

“Pas 3 dekadave politika është në krizë, vendi është pa përfaqësim. Ekonomia nuk ec. Nuk ka asnjë qeveri dhe as opozitë. Ata kanë deformuar demokracinë e brishtë. Ata ose bëjnë pazare ose bëjnë shantazhe ndaj njëri tjetrit. Është më mirë të ikin 4 shahistat e të rrinë shqiptarët”.

Meta, Rama, Basha, Kryemadhi kanë të përbashkët një frikë sipas ish kryetares së kuvendit, të rinjtë duke iu propozuar që të krijojnë një lëvizje të re kundër këtyre katër personave.

“Nëse forcat e vjetra nuk reformohen ka vetëm një zgjidhje: një lëvizje të re. lëvizje për ndryshim. Dhe mendimi im është tek të rinjtë e të rejat dhe ju që e keni gjithmonë zemrën e re”.

Në ketë ditë Jozefina Topalli u vlerësua nga universiteti “Luigj Gurakuqi” dhe shoqata “Alumni” me çmimin e karrierës. Vitet që ka lënë pas e kanë bërë të arrijë në një përfundim./ABC News Albania 24/7

ekonomia-greke-1280x684.jpg
ad min17:30 | 23/09/2019

Ekonomia greke po vijon trendin rritës dhe sipas ekspertëve në Greqi, një nga arsyet është pikërisht kryeministri i ri Mitsotakis; reformat që ai ka ndërmarrë dhe sidomos ulja e taksave.

Aleksis Tsipras tashmë është harruar prej disa muajsh dhe në krye të qeverisë greke është kryeministri konservator Mitsotakis. Përveçse shihet si më i sigurtë nga Europa, ai konsiderohet tërheqës për investitorët dhe botën e sipërmarrjes.

Lideri i Demokracisë së Re fitoi zgjedhjet në muajin Korrik me një program të mbështetur më shumë në lirinë ekonomike, uljen e taksave dhe privatizimeve. Kreditorët aktualisht ndodhen në Athinë për herë të katërt për të kuptuar nëse vendi është apo jo një vend i sigurtë për të investuar.

Sipas rezultateve të fundit treguesit makroekonomik janë të gjithë pozitivë. Një nga pikat kryesore të programit të qeverisë është dhe drita jeshile për projektin Helenikon prej 8 miliardë eurosh që do të bëjë të mundur krijimin e të paktën 10 mijë vendeve të punës./ABC News Albania 24/7

ekonomia-ne-krize-1280x708.jpg
ad min14:27 | 12/09/2019

Ekonomia shqiptare është duke kaluar një periudhë të vështirë, ku rritja ekonomike pritet të tkurret ndjeshëm, investimet vendase dhe të huaja janë në rënie dhe ku deficiti dhe borxhi vazhdojnë të mbeten në nivele kritike, bashkë me disnivelin e eksport-importeve. Kështu i përshkruan “Zëri i Amerikës” zhvillimet ekonomike të vendit, duke iu referuar ekspertëve të ekonomisë.

Ditë të vështira po kalon ekonomia shqiptare. Është ky konstatimi i studiuesve të ekonomisë i pasqyruar edhe nga Zëri i Amerikës. Shumë nga problemet e këtij viti kanë ardhur prej thatësirës dhe sigurimit të energjisë elektrike, po ashtu edhe me ndikime të forta mbi bujqësinë, që zë 20 për qind të prodhimit kombëtar-nënvizojnë ekspertët.

Jo vetëm kaq, por duke iu referuar edhe të dhënave zyrtare ka një përgjysmim të rritjes ekonomike nga 4% vjet në 2 për qind në 6 muajt e parë të këtij viti. Ndërsa një vit më parë rritja ekonomike erdhi kryesisht prej shirave dhe shitjes masive të energjisë elektrike.

Një tjetër problem që vë në dukje “Zëri i Amerikës” është mungesa e investimeve të huaja që shihet po ashtu si një problem kryesor, sepse Shqipëria nuk është tërheqëse prej taksave të larta dhe investimet e huaja po shkojnë në vendet fqinje.

Sipas ekspertëve e vetmja shpresë po mbetet turizmi, i cili duket se ka lëvizje, por fitimet e tij nuk po shfaqen në përmirësimin e treguesve, ose se ka evazion fiskal dhe fitimet fshihen, ose se konsumi i turistëve ka zëvendësuar konsumin e shqiptarëve tashmë të larguar nga vendi.

Papunësia është një tjetër problem kryesor. Shifrat tregojnë se në 6 muajt e parë të vitit janë punësuar vetëm 1 mijë e 200 persona, ose 200 vetë në muaj.

Ekspertët e ekonomisë pohojnë se paqëndrueshmëria e ligjeve ekonomike dhe trazirat politike janë faktorë shtesë që dëmtojnë ekonominë, po edhe kur ato kanë qenë të qëndrueshme, shifrat nuk kanë patur ndonjë përmirësim domethënës e të ndjeshëm./ABC News Albania 24/7

aa.jpg
ad min15:42 | 11/09/2019

Papunësia në vend ka pësuar rënie në 11. 5%. Këtë e bën të ditur Ministria e Financave, sipas të cilës, ky është niveli më i ulët historik.

Lajm i mirë për ekonominë! Nis kështu njoftimi i Ministrisë së Financave e cila  shpërndau për mediat të dhënat e anketës tremujore të forcave të punës publikuar nga Instituti i Statistikave.

Bëhet fjale për rënien e papunësisë në vend në 11.5%, niveli më i ulët historik theksojnë financat. Krahasuar me tremujorin e dytë të vitit 2018, shkalla zyrtare e papunësisë u ul me 0,9 % ndërsa me tremujorin e parë të 2019-s rënia vlerësohet me 0,6 %.

Nga muaji Prill deri në Qershor të këtij viti 61.4% e personave nga 15 deri në 64 vjeç kanë gjetur një punë. 3,4% më shumë se e njëjta periudhë e një viti më parë dhe 2.1% më tepër tre muajt e parë të vitit.

Shifra sipas ministrisë është ndër më të lartat në rajon dhe për këtë Shqipëria është vlerësuar nga Banka Botërore, Fondi Monetar Ndërkombëtar dhe Komisioni Evropian.

Rritje të punësimit kanë patur sektorët bujqësi, tregti, shërbimet mbështetëse, aktiviteti informatik dhe telekomunikacioni. Tendencë rënie po shfaq dhe papunësia tek të rinjtë.

Sipas Ministrisë së Financave raporti i publikuar nga INSTAT tregon efektivitetin e politikave të ndërmarra nga qeveria që shkon në favor të zhvillimit të qëndrueshëm ekonomik dhe nxitjes së punësimit./ABC News Albania 24/7

gjewrmani.jpg
ad min21:47 | 05/09/2019

Rënia e ndjeshme e kërkesës për produktet gjermane ka rritur frikën që ekonomia më e madhe e Europës të pësojë recesion në tremujorin e tretë të vitit. Përveç se nga rënia e kërkesës, tkurrja e ekonomisë gjermane i detyrohet edhe politikës proteksioniste të presidentit Donald Trump dhe daljes së planifikuar të Britanisë nga BE-ja.

Ekonomia më e madhe e Europës mund të hyjë në recesion në tremujorin e tretë të vitit, për shkak se dobësimi i kërkesave të jashtme për produktet gjermane ka çuar në një rënie të ndjeshme të prodhimit industrial.

Sipas agjencisë së lajmeve “Reuters”, ekonomia gjermane, e bazuar kryesisht tek eksportet, po vuan si pasojë e rritjes së ngadaltë globale dhe pasigurisë ekonomike, e shkaktuar nga politikat e presidentit amerikan Donald Trump dhe shtyrja e vazhdueshme e daljes së Britanisë nga BE-ja.

Sipas të dhënave të fundit të publikuara nga Ministria e Ekonomisë në Berlin, kërkesa për produktet gjermane ra me 2.7 për qind në periudhën Korrik-Gusht, e nxitur nga rënia e kërkesave nga vendet që janë jashtë zonës euro.

“Problemet në sektorin e manifakturës vazhdojnë dhe rënia e porosive të reja rrit ndjeshëm rrezikun e recesionit për ekonominë gjermane”, ka deklaruar analisti Thomas Gicel.

Edhe prodhimi i brendshëm gjerman u kontraktua me 0.1 për qind në tremujorin e dytë, pikërisht për shkak të dobësimit të eksporteve, shoqëruar me rënien e shitjeve jashtë vendit, edhe për shkak të rënies së kërkesave nga Britania dhe Kina.

“Rreziku është i madh që rritja negative të regjistrohet edhe në tremujorin e tretë”, shtoi Gicel.

Ministria e Ekonomisë deklaroi se porositë e reja për produktet gjermane kishin patur një fillim të dobët në tremujorin e tretë dhe parashikimet për sektorin industrial janë gjithashtu të zymta./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono