Edi Rama

rama-me-merkel.jpg
gra moz17:35 | 25/04/2018

Gjermania vlerëson reformat e kryera nga Shqipëria në rrugën e integrimit, por do të vendosë më vonë për qëndrimin që do të mbajë në lidhje me hapjen e negociatave. Këtë mesazh përcolli në Berlin, kancelarja Merkel në krah të kryeministrit Rama, i cili po zhvillon një vizitë dy ditore në Gjermani.

Angela Merkel vlerëson rrugën e dritanishme të bërë nga Shqipëria drejt integrimit. Kancelarja gjermane ka deklaruar se Shqipëria ka nisur projekte të rëndësishme reformash dhe se është bërë përparim, sidomos me vetingun ne drejtësi.

Por sipas saj, vendimi përfundimtar për votën e qershorit, lidhur me hapjen e negociatave të anëtarësimit të Shqipërisë do të merret në ditët në vijim.

Dyshimi gjerman sipas kancelares Merkel lidhet me plotësimin e parakushteve nga Shqipëria.

Kancelarja garantoi ndihmë për arritjen e përparimit të nevojshëm, duke ritheksuar ndikimin e tij në vendimin përfundimtar.

Pasi përmendi reformat e ndërmarra, kryeministri Edi Rama shprehu besimin e një vote pro nga Gjermania.

Rama theksoi se Shqipëria e ka merituar çeljen e negociatave të anëtarësimit në BE.

Kryeministri e mbylli fjalën me fenë që sipas tij përfaqëson gjithë shqiptarët.

Konferenca për mediat u pasua me një takim 90 minutësh mes kryeministrit shqiptar dhe kancelares gjermane./abcnews.al

edi-raama.jpg
gra moz15:06 | 25/04/2018

Kreu i qeverisë shqiptare ka pritshmëri të mëdha nga vizita në Berlin. Këtë e pasqyrojnë mediat gjermane, të cilat publikojnë deklaratat e kryeministrit Rama, që  dëshiron të bindë sot Angela Merkel, se vendi i tij është gati për në Bashkimin Evropian. Mediat gjermane citojnë edhe krahasimin që Rama i bën takimit të pritshëm me kancelaren.

Kreu i qeverisë shqiptare ndodhet në Berlin me shpresa të mëdha. Këtë e pasqyrojnë mediat gjermane në shkrimet e tyre duke shtuar se Edi Rama dëshiron të bindë Kancelaren Angela Merkel se vendi i tij është gati për në Bashkimin Evropian.

Por shumë anëtarë të bashkësisë ndërkombëtare janë skeptikë lidhur me bisedimet e pranimit shkruan rrjeti editorial gjerman. Në intervistën me kryeministrin Rama citojnë krahasimin që kreu qeverisë shqipëtare i bën kësaj vizite.

“Angela Merkel është një kampione evropiane. I gjithë rajoni i Ballkanit shpreson tek ajo. Pra, është normale që çdo kryetar  qeverie në Ballkan që shkon në Berlin ndihet pak si pelegrin që dëshiron të shohë Papën”.

Ndërsa gazeta gjermane “Die Welt” sjell në një formë tjetër profilin e kryeministrit që kërkon të bëjë për vete kancelaren gjermane.

“Ish-basketbollisti dhe artisti në Berlin do të synojë me sharmin e tij të bëjë për vete kancelaren Merkel që të marrë mbeshtetjen për hapjen e negociatave të anëtarësimit me Shqipërinë”. 

Dhe vërtet Rama, një socialist, ka se ç’të tregojë shkruan, Die Welt, duke iu referuar ekonomisë në rritje, Tiranës që mbushet me fasada që shkëlqejnë, një reformë në drejtësi e kërkuar nga BE që ka marrë udhë. Ana tjetër e medaljes është skpeticizmi, sipas medias gjermane.

“Ka njerëz që janë skeptikë, kur shtrohet pyetja për Shqipërinë që të bëhet sa më shpejt anëtare e BE-së, kjo lidhet edhe me histori si kjo: Në Tetor prokuroria kërkoi heqjen e imunitetit të ish-ministrit të Brendshëm, Saimir Tahiri sepse emri i tij përmendej disa herë në telefonatat mes tregtarëve shqiptarë dhe italianë të drogës.”

Gazeta gjermane i kushton vëmendje të gjithë zhvillimeve lidhur me rastin Tahiri dhe konkludon me përgjigjen e  Ramës kur i pyetur nga “Die Welt” lidhur me rastin e sëkëlldisshëm Tahiri thotë:

“Besoj në radhë të parë se dyshimet ndaj një personi nuk mund të pengojnë përpjekjet e një vendi të tërë.”

Gazeta thekson se është një nga këto raste që e prishin dhe përcaktojnë imazhin e Shqipërisë në pjesën tjetër të Europës. Deri më sot nuk është i hequr plotësisht dyshimi se kriminaliteti i organizuar ka kapur fort ekonominë e vendit dhe tentakulat e tij arrijnë deri në nivelet më të larta të qeverisë./abcnews.al

edith-harxhi.jpg
gra moz20:52 | 24/04/2018

Kryeministri i vendit, Edi Rama do të zhvillojë një takim të mërkurën në Gjermani, ku do të takohet kancelaren gjermane, Angela Merkel. Takimi vjen pas rekomandimit të Komisionit Europian për çeljen e negociatave me Shqipërinë.

E pyetur në “Provokacija” nga Mustafa Nano nëse vlen një “ofensivë” e palës shqiptare drejt vendeve europiane me synimin që të hapen negociatat në Qershor, drejtoresha e “Albania Policy Center,” Edith Harxhi, është shprehur se kjo nuk vlen në këto momente.

Sipas Harxhit është shumë mirë që kryeministri takohet me Merkel dhe sipas saj duhet të takohet edhe me liderët e tjerë europiane, Macron dhe May.

Mustafa Nano: “Edi Rama do të shkojë të takojë Merkelin dhe Bushati do të ketë disa takime të vetat. Do të ketë një “ofensivë” le të themi shqiptare. Çfarë vlere ka kjo”?

Edith Harxhi: “Nuk ka të bëjë fare ofensiva në këto momente. Unë mendoj që është shumë e mirë që Kryeministri shqiptar takon kancelaren gjermane. Do të doja shumë që ai të takonte dhe presidentin Macron, përpara një vendimi në Qershor dhe kryeministren e Britanisë, Theresa May”.

Më tej, Harxhi shtoi se vendimi i Gjermanisë nuk varet drejtëpërdrejt vetëm nga dëshira e Angela Merkel, por nga vendimi që do të marrë Bundestagu gjerman.

“Dhe Bundestagu gjerman është duke formuluar ose e ka formuluar një qëndrim të caktuar dhe nuk varet shumë vetëm nga fjala e Kancelares Merkel, varet shumë nga grupi i CDU-së gjermane, që përkundër asaj çfarë ndodh sot për shembull në një parti të djathtë, siç është Partia Demokratike, lideri nuk është ai që merr vendimet vetë, por kalojnë të gjitha në një lloj konsultimi të përgjithsshëm me grupin. Pra çështja e Shqipërisë është një dëshirë që është përtej dëshirës së një kancelareje”.

Ndërkohë, Rama do të qëndrojë dy ditë në Gjermani. Në vizitën e tij në ditën e dytë, ai do të bashkëbisedojë në Bundestagun gjerman me Komisionin e Jashtëm të Bundestagut. Ky Komision drejtohet nga Gunther Krichbaum, i cili ditët e fundit ka qenë në qendër të debateve midis kryeministrit dhe kryetarit të Partisë Demokratike, Lulzim Basha./abcnews.al

merkel.jpg
gra moz17:53 | 24/04/2018

Kryeministri Edi Rama do të takohet nesër pasdite me kancelaren gjermane Angela Merkel në Berlin. Njoftimi është publikuar në faqjen zyrtare të kancelares Merkel.

Në të thuhet gjithashtu se fokusi i diskutimit do të jenë marrëdhëniet dypalëshe, çështjet rajonale dhe qëndrimi i Shqipërisë ndaj Bashkimit Europian. Pas takimit është parashikuar edhe një deklaratë e përbashkët për shtyp.

Në ditën e dytë të qëndrimit në Gjermani Kryeministri Rama do të shkojë në Bundestagun gjerman, ku është planifikuar një seancë bashkëbisedimi mes Kryeministrit dhe Komisionit të Jashtëm në Bundestag.

Ky Komision drejtohet nga Gunther Krichbaum, i cili ditët e fundit ka qenë në qendër të debateve midis kryeministrit dhe kryetarit të Partisë Demokratike./abcnews.al

michel-dhe-rama.jpg
gra moz18:04 | 23/04/2018

Belgjika mbështet parimisht hapjen e negociatave mes Shqipërisë dhe BE, por vendimi përfundimtar do të merret në Qershor. Këtë mesazh përcolli në Tiranë kryeministri belg Charles Michel, që u takua me homologun Edi Rama dhe autoritete të tjera politike.

E dha dhe e mbajti fjalën kryeministri i Belgjikës. Charles Michel erdhi të vizitojë Tiranën për të diskutuar prioritetet që e lidhin Shqipërinë me destinacionin europian.

Pas ceremonisë së mirëseardhjen, kryeministri Edi Rama dhe homologu belg patën një takim kokë më kokë, ku renditën jo vetëm bashkëpunimin ekonomik midis dy vendeve por edhe atë të hapjes së negociatave të Shqipërisë me Bashkimin Europian. Megjithatë vendimin e qeverisë belge kryeministri Michel ia lë Qershorit.

Charles Michel: “Nuk mund të them tani vendim zyrtar, por Belgjika do të shprehet në muajin Qershor. Megjithatë me shumë qartësi them që ne dëshirojmë në një mënyrë apo tjetër të vazhdojmë përpjekjet për afrimin e BE-së me Shqipërinë dhe për procesin e vendimmarrjes në gjirin e BE-së më duhet të respektoj kalendarin e përcaktuar. Nuk mund ta vë qerren përpara kaut”.

Kryeministri Rama përsëriti bindjen se Shqipëria e meriton hapjen e negociatave.

Edi Rama: “Ne besojmë që qeveria meriton një vendim për të hapur negociatat. Natyrisht jemi të vetëdijshëm që hapja e negociatave nuk është fundi i përpjekjeve tona por është fillimi i një faze të re dhe të gjatë përpjekjesh dhe kemi besim se në këtë përpjekje kemi dhe mbështetjen e Belgjikës, por edhe partnerëve tanë europianë”.

Pyetjes së gazetarëve nëse do të ishte e mundur që me kryetarin e Partisë Demokratike në krah të vzizitonte institucionet më të rëndësishme ndërkombëtare i dha një përgjigje shtesë krahas asaj të zakonshmes për opozitën, kur flitet anglisht.

Edi Rama: “Ju e dini që unë nuk flas asnjëherë për opozitën në gjuhë të huaj kështu që përgjigja ime shumë e shkurtër është që pyetja juaj nuk ka nevojë për përgjigje pasi do ishte një gjë shumë e vlefshme nëse do të ndodhte”.

Të martën kryeministri belg do të niset drejt Serbisë ku do të takohet me homologen e tij Ana Brnabiç dhe presidentin Aleksandër Vuçiç./abcnews.al

edi-ramam.jpg
gra moz16:26 | 21/04/2018

Kryeministri Edi Rama ka sqaruar pretendimet për taksat e rritura. Në aktivitetin për bashkëqeverisjen në Lushnje kreu i qeverisë ka deklaruar se vetëm dy janë taksat që ka rritur qeveria e tij: taksa e karburantit dhe taksa për të formalizuar biznesin e madh.

“Më gjeni të tretën dhe unë do të them të tretën. Taksa për ata që fitojnë më shumë. Unë di dy. Taksa për ata që fitojnë më shumë. Ne e bëmë 15% për të gjithë ata që janë të mëdhenj dhe e ulëm 5 për të vegjëlit, nga 5 milionë deri në 8 milionë xhiro dhe zero taksa për të gjithë biznesin e vogël deri në 5 milionë lekë xhiro. E dyta, ne kemi rritur taksën e karburantit”, tha Rama./abcnews.al

edi-rama-nuk.jpg
gra moz14:47 | 21/04/2018

Kryeministri i vendit Edi Rama ka reaguar në Facebbook lidhur me akuzat që ngriti këtë të shtunë në një konferencë për shtyp, kryetari i opozitës, Lulzim Basha, se qeveria ka sulmuar mediatikisht Kryetarin e Komisionit të Çështjeve të BE në Bundestag, Gunther Krichbaum.

Zoti kryetar i Partisë Demokratike!

Sapo paske thënë në shqip për publikun, atë që me ndihmën e “dashamirësve” të Shqipërisë, ke shkruar gjermanisht dhe dërguar dje në Berlin, për gjoja sulmin e financuar prej meje në kazanin mediatik të Tiranës, ndaj zotit Gunther Krischbaum!

Kjo është fiks ajo që ti dhe kanakarët e tu anglisht apo gjermanfolës, bëni papushim prej kohësh, kudo e kurdoherë gjeni veshë të huajsh për të derdhur baltën tuaj. Shani e shpifni për t’i lënë Shqipërisë faturën e dëshpërimit prej humbjeve thellë e më thellë, të betejave tuaja zgjedhore. Abuzoni si s’ka më keq me miqësitë e miqtë tuaj gjithnjë e më të paktë ndërkombëtarë, duke përfituar nga dëshira e tyre për t’ju dëgjuar dhe nga pamundësia apo në ndonjë rast, edhe mosdëshira e tyre për t’i verifikuar ngarkesat e rënda të baltës suaj. E quani të kryer me nder punën tuaj krejt të pandershme ndaj këtij vendi, kur dilni prej takimeve me ta pasi i keni shastisur me zeznajën e gjuhës suaj të shthurrur. Dhe meqë mua e Partinë Socialiste nuk na mundni dot në fushën e betejave politike përpara popullit shqiptar, mundni Shqipërinë në recitimet tuaja të turpshme përpara të huajve të interesuar për ecurinë e këtij vendi drejt Europës!

I dashur Lulëzim,

Gunther Krischbaum nuk është miku im dhe as nuk hyn ndër dashamirësit e Partisë Socialiste e të qeverisë sonë! Unë nuk jam aspak dakord me opinionin e tij për punën e qeverisë sime dhe këtë ai e di shumë mirë, sepse e ka dëgjuar nga unë, sy më sy dhe jo mbrapa krahëve. Por, zotëria në fjalë ka të gjithë respektin tim për ndihmën që dha kur zotrote bllokoje Reformën në Drejtësi dhe kurrën e kurrës, jo ai po asnjë i huaj i interesuar për Shqipërinë, nuk ka qenë e s’mund të jetë shënjestra e ndonjë sulmi të orkestruar prej meje apo prej Partisë Socialiste. Kurrë!

Unë dhe Partia Socialiste, jo vetëm s’jemi marrë me asnjë lloj shkrimi për mikun tënd gjerman, po s’jemi marrë asnjëherë as me vetë jetën tënde personale a me familjarët e tu, siç ti dhe Partia jote keni bërë e bëni papushim me zë e me figurë, me jetën time personale, me familjarët e mi dhe me jetën e familjarët e plot kolegëve të tjerë.

Një fjalë e mençur e një dijetari të famshëm gjerman thotë se kush të akuzon për çka nuk ke bërë, ose e ka bërë ose është në gjendje ta bëjë vetë atë për të cilën të akuzon! Mbase zoti Krischbaum nuk e ka të mundur ta bëjë dallimin e qartë mes nesh, sepse ai është miku yt e jo imi dhe nuk e ka as kohën, ndoshta as dëshirën, të thellohet në verifikimin e gënjeshtrave të tua të mëdha për mua e për qeverinë time. Por shqiptarët e kanë shumë të qartë këtë dallim dhe prandaj besueshmëria jote në sytë e tyre vetëm bie dhe udhëheqja jote vetëm thellon humbjet e partisë që ti drejton, në rrugën e saj pa lavdi e as shpresë, nga humbja në humbje.

Sa për portalet e për kanalet, e di e gjithë Shqipëria opinionin tim dhe kam kohë që nuk u kushtoj më minuta të ditëve të mia, sepse as nuk kam mundësi t’ua korrigjoj shënjestrat e as nuk më kanë penguar dot ndonjëherë t’i fitoj betejat! Kështu që mos u bëj edhe më qesharak se ç’je bërë përpara shqiptarëve, duke bërë rolin e të indinjuarit nga balta e hedhur mbi zotin Krischbaum, ndërkohë që balta jote e përditshme është e të njëjtës cilësi mizerabël. Dhe ndaloje të paktën deri në qershor eksportin e asaj balte nëpër Europë!

 

edi-rama-1.jpg
gra moz12:51 | 21/04/2018

Targeti i atyre që japin llogari për punën e bërë deri më tani janë edhe ministrat. Kreu i qeverisë Edi Rama njoftoi nisjen e një fushate të re, ku i gjithë kabineti qeveritar do t’i nënshtrohet transparencës për marrjen ose jo të përgjegjësive.

Llogari publike do të japë i gjithë kabineti qeveritar. Fushatën që pritet të nisë së shpejti e lajmëroi kryeministri Edi Rama nga Fieri.

Shumë shpejt fushatë kombëtare e llogaridhënies publike e të gjithë kabintetit qeveritar dhe të gjithë agjencive dhe zyrave qëndrore që operojnë në territoret e vendit për të garantuar transparencë dhe nxjerrjen në pah të të gjithë dobësive aktuale dhe marrjen e përgjegjësive të atyre që janë përgjegjës për mosçuarjen përpara të projektit të modernizimit, transparencës dhe eficencës së shërbimit”.

Nuk dha detaje kreu i qeverisë nëse do të ketë ndëshkime për ata ministra që mund do të rezultojnë se nuk e kanë bërë mirë punën e tyre. Për punonjësit e administratës publike idetë i ka më të qarta.

“Ende ka parazitë dhe grabitqarë që kanë shfrytëzuar detyrën për të përfituar në dëm të interesit dhe të drejtave të qytetarëve”.

Gishtin e drejton tek drejtuesit e hipotekave.

“Sot janë mbi 80 raste largimesh nga puna në Hipotekë për këtë shkak. Drejtuesit e Hipotekave do ta kenë shumë të qartë që ajo që kanë përsipër është detyrë me rëndësi shumë të madhe për qytetarët dhe zvarritjet janë përgjegjësi e tyre”.

Qytetarëve të Fierit e gjithë Shqipërisë i kujton se zgjidhja e problemit të tyre në zyrat e administratës publike nuk është rryshfeti por platforma e bashkëqeverisjes./abcnews.al

lulzim-bashaqw-1280x753.jpg
gra moz12:34 | 21/04/2018

Lulzim Basha në një konferencë për mediat ka dënuar sulmet e frymëzuara dhe të financuara nga Edi Rama kundër Kryetarit te Komisionit të Çështjeve të BE në Bundestag, Gunther Krichbaum.

“Krichbaum është një nga figurat më të respektuar të politikës gjermane. Ai e mbështet Shqipërinë dhe ai e ka shprehur hapur dhe me ndersh,ëri mendimin e tij, për të ndihmuar Shqipërinë”, tha Basha.

“Kjo sjellje dëmton Shqipërinë. Me sulmet e tij Rama shton radhën e poltikanëve që janë kundër Shqipërisë”, theksoi Basha.

Më tej, kryetari i opozitës shqiptare u shpreh se “Jam kundër kësaj fushate, e cila financohet nga paratë e krimit që kanë lidhje të drejtpërdrejt me Edi Ramën, Saimir Tahirin dhe Erion Veliajn”./abcnews.al

edi-rama-profesion.jpg
gra moz12:24 | 20/04/2018

Kjo është lista e mungesave në tregun e punës deri dje se sot kryeministri rendit të tjera shifra me krenari.

Kreu i qeverisë kërkon që më shumë të rinj duhet t’i drejtohen arsimit profesional që të mos lenë vendin të ecë vetëm me një këmbë.

Është ministri i Financave dhe Ekonomisë, Arben Ahmetaj, që tregon rezultatet e rritjes së numrit të nxënësve ndonëse edhe ai kërkon më shumë nga të rinjtë.

Nuk munguan edhe kupat simbolike e as batutat e kryeministrit në edicionin e tretë të olimpiadës së aftësive./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono