drejtesia

MBULIM-HESHTJA-PER-ATENTATIN.mpg_snapshot_00.08-1280x720.jpg
ent ela14:45 | 02/11/2019

Gati 24 orë nga momenti i atentatit me armë ku mbeti i plagosur prokurori i Durrësit, Arjan Ndoj dhe dy personat e tjerë që udhëtonin me të në të njëjtin mjet, të vetmet reagime për ngjarjen e rëndë kanë ardhur nga selia blu.

Qeveria dhe asnjë përfaqësues e i saj nuk ka bërë asnjë reagim qoftë edhe formal për të dënuar aktin e plagosjes së një pjesëtari të sistemit të drejtësisë, ndërkohë që në heshtje kanë qëndruar edhe të gjitha institucionet e tjera të këtij sistemi.

Për ngjarjen ndaj prokurorit Ndoj deri më tani ka munguar një reagim nga Prokuroria e Durrësit, pjesë e së cilës ai ishte që në vitin 2008. Asnjë reagim nuk ka ardhur as nga Prokuroria e Përgjithshme, ndonëse drejtuesja e saj e përkohshme Arta Marku u nis drejt Durrësit pas ngjarjes, ndërsa drejtuesja e Prokurorisë së Krimeve të Rënda, Donika Prela vizitoi prokurorin në Spitalin e Durrësit. Edhe Shoqata e Prokurorëve dhe Këshilli i Lartë i Prokurorisë kanë qëndruar në heshtje.

Ndoshta sulmet publike të bëra nga Kryeministri Rama dhe zëvendësi i tij Brace për prokurorin Arjan Ndoj kanë kompleksuar të gjitha këto institucione që të heshtin për atentatin. Pak orë pas ngjarjes në një reagim në rrjetet sociale, kreu i PD e ka cilësuar atentatin ndaj prokurorit Ndoji si ngjarjen më të rëndë mafioze në vend, që sipas tij u parapri nga kërcënimet direkte të Kryeministrit Rama dhe zëvendëskryeministrit. /abcnews.al

MBULIM-THACI-ZGJEDHJET-_-ABC-M5-T1.mpg_snapshot_00.03-1280x720.jpg
ent ela12:56 | 05/10/2019

Presidenti i Kosovës, Hashim Thaçi, është takuar me krerët e institucioneve të sigurisë e të drejtësisë, Drejtorin e Policisë Rashit Qalaj, Kryeprokurorin e Shtetit, Aleksandër Lumezi, dhe Drejtorin e AKI-së, Shpend Maxhuni, me të cilët ka biseduar për gjendjen e sigurisë në prag të zgjedhjeve të përgjithshme në Kosovë.

Thaçi është shprehur se Kosova ka ndërtuar traditë të zgjedhjeve të lira e demokratike dhe vlerësoi procesin e deritanishëm si të mirë dhe pa incidente që do të cenonin procesin elektoral.

Qalaj e njoftoi presidentin se Policia e Kosovës është në gjendje gatishmërie dhe është në koordinim të plotë me institucionet e tjera për të garantuar siguri të plotë në ditën e zgjedhjeve, me vëmendje të veçantë në Qendrat e Votimit. /ABC News Albania 24/7

rama1.jpg
ent ela10:38 | 04/10/2019

Në takimin rajonal të ministrave të drejtësisë të thirrur nga Majlinda Bregu, kryeministri Rama u shpreh i lodhur nga pretekstet e vazhdueshme të Bashkimit Evropian për të mos pranuar Shqipërinë. Gjithësesi, kreu i qeverisë tha se vendi ynë nuk ka rrugë tjetër, veçse të vazhdojë të dojë BE-në, me shpresën se një ditë do të jemi bashkë.

“Gjithçka ka të bëjë me drejtësinë”. Për këtë qëllim, Majlinda Bregu mblodhi në Tiranë ministrat e drejtësisë së Ballkanit Perëndimor, por Edi Rama, i cili erdhi me 20 minuta vonesë, solli me vete pesimizmin  se Brukseli nuk po tregohet i drejtë dhe i ndershëm me kushtet e herëpashershme.

Rama: Në fund na thoni, çuna të mirë e goca të mira po jo tamam. Por ne nuk kemi zgjedhje dhe alternativë tjetër, ne na duhet të vazhdojmë t’ju duam e të besojmë tek kjo martesë e jona. Është fruestruese, ne na thuhet gjithmonë që ju duam e një ditë do të jemi bashkë, por duhet të përmirësoheni, të përmirësoheni e të përmirësoheni.

Edhe Majlinda Bregu, ka dilemat e saj.

Bregu: Nuk arrij ta kuptoj se pse sa herë na duket që jemi më afër, krijojmë distanca edhe më të mëdha.

Për kryeminstrin Rama, kushtet e reja janë të pakuptimta.

Rama: Dhe tani, cili është problemi? Tani problemi është që nuk ka gjykatë kushtetuese. Ëëë?  Kjo? Po ne na u tha që duhet ta pastronim sistemin e drejtësisë nga të korruptuarit.

Sekretarja e Përgjithshme e Këshillit të Bashkëpunimit Rajonal thotë se reforma në drejtësi është një punë voluminoze që Shqipëria e ka bërë si askush tjetër.

Bregu: “Sikur të ishin të gjitha të hapura të gjitha diskutimet me kolegët tanë rajonalë mbi procesin e vettingut apo habia mbi numrin e lartë të gjyqtarëve dhe prokurorëve që dilnin jashtë sistemit, përmes dorëheqjeve dhe shkarkimeve të ishin po aq publike, jam e bindur që të gjithë do ta kuptonin më mirë se “it’s all about justice”. Duhet të paguash një çmim”.

Ambasadori i BE-së, është më optimisti për rrugëtimin e vendit tonë.

Soreca: Shumë pak vende në botë kanë bërë këtë lloj transformimi apo shndërrimi të thellë e kanë pasur këtë lloj monitorimi ndërkombëtar.  Pa reformën në drejtësi, është e qartë se Shqipëria do të kishte pritur për shumë vite të tëra për të arritur këtë moment të rëndësishëm në të cilin gjendemi.

Në kushtet kur Bashkimi Evropian i  dikurshëm, nuk ngjan aspak më të sotmin, Edi Rama ka një shpresë në botën e përtejme.

Rama: Çfarë të bëjmë? Duhet t’i referohemi Xhefersonit, Adenauret, De Golit e të shpresojmë që shpirtrat e tyre do të sjellin më shumë energji të mira për këta liderë që janë sot gjallë.

Merkel tha që Shqipëria nuk ka Gjykatë Kushtetuese dhe ky është dështim, por unë citoj kancelarin kur tha që ishim ne që kërkuam ta patronim sistemin dhe a kanë faj ata që pastruan sistemin a duhet t’u hedhim faj apo t’i përgëzojmë. Ne nuk po kërkojmë të jemi shtet anëtar por një rrugëtim që do kërkojë shumë kohë kohë të gjatë. Hapi tjetër do jetë një Gjykatë funksionale, por fakti që nuk ka Gjykatë Kushtetuese në këtë moment tregon sukses jo dështim dhe është një person në Komisionin Evropian që mendon si unë tashme jemi dhe qshqyr q ëpesoni tjetër ka mundësinë të bëjë Gjermaninë që të thotë PO.

Nuk ia hedh fajin Europës po kush tjetër më shumë se Franca ka të drejtë të thotë Evropa nuk po funksionin si duhet. Ajo që nuk kuptoj është që pasi Evropa të hyjë në proces të fillimit të reformës së vet atë që thotë Macron atëherë si mund të na kërkojnë ne thellimin e reformave”./abcnews.al

SINKRON-ALIBEAJ.mpg_snapshot_00.01-1280x720.jpg
ent ela16:15 | 21/09/2019

Partia Demokratike ka akuzuar Edi Ramën se ka vendosur një drejtësi me dy standarde, një në të cilën bashkëpunëtori i tij, Sajmir Tahiri rri në liri, ndërsa shqiptarët e pa mbrojtur, vrasin veten në burg edhe për vepra të lehta.

DEKLARATË E PARTISË DEMOKRATIKE, ENKELEJD ALIBEAJ

Saimir Tahiri nuk do të bëjë asnjë ditë burg.

Njeriu që zbatoi planin e Edi Ramës për të kanabizuar Shqipërinë në funksion të blerjes së pushtetit me paratë e drogës, nuk ndëshkohet nga drejtësia, sepse me Edi Ramën në krye të qeverisë, drejtësia ka dy standarde: Saimir Tahiri në liri, duke shijuar pushtetin, paratë dhe luksin, ndërsa shqiptarët e zakonshëm në burg, ku humbin jetën për asgjë.

Estref Halili, një 22 vjeçar nga Kolonja e Lushnjës u burgos për një cigare hashash ditën e Krishtlindjes dhe vrau veten në qelinë e burgut, ndërsa Saimir Tahiri nuk ka për të bërë as edhe një ditë burg, sepse ka mbrojtjen e Edi Ramës.

Qamil Zela kryefamiljari 52 vjeçar që mezi ushqente familjen e tij, vrau veten në burg se nuk kishte 35 mijë lekë për të paguar energjinë elektrike.

17 kuksianë u mbajtën në burg më shumë se 1 vit, sepse protestuan kundër korrupsionit të Edi Ramës, që u vuri traun me 5 euro për të shkuar në shtëpi.

Ky është shteti me dy standarde që ka ndërtuar Edi Rama. Liri për bashkëpunëtorët e tij në krim, burg për shqiptarët e zakonshëm dhe të pambrojtur.

Me Edi Ramën nuk ka drejtësi të barabartë për të gjithë. Ai do të vazhdojë ta vendosë drejtësinë në shërbim të politikanëve të korruptuar e të lidhur me krimin, si Saimir Tahiri, në shërbim të trafikantëve të drogës dhe krimit të organizuar, që i siguron mbajtjen e pushtetit me zgjedhje të vjedhura.

Shërbimi më i madh për drejtësinë dhe për vendin është ndarja e politikës nga krimi.

Aty është burimi i të gjitha të këqijave. Pa prerë lidhjet e politikës me krimin, në Shqipëri nuk ka për të patur drejtësi të vërtetë, më të pamundurit do të vuajnë burgjeve, ndërsa të pushtetshmit si Edi Rama dhe Saimir Tahiri, do të vazhdojnë të jetojnë në luks pa u ndëshkuar./ abcnews.al

OK-SINKRON-TAHIRI.mpg_snapshot_00.22-1280x720.jpg
ent ela12:43 | 21/09/2019

Në daljen para mediave pas dënimit nga gjykata për shpërdorim detyre Saimir Tahiri ka nënvizuar se ka ndërmend të vazhdojë të luftojë për të vërtetën e tij, duke apeluar vendimin. Ish ministri i brendshëm shprehu ndjesë për gjykime në të kaluarën, një reflektim në situatën ku ndodhet vetë.

“Nuk komentoj vendimet e gjykatave. Në kulturën time është normale ta presësh, ta lexosh dhe pastaj të japësh një opinion.

Po i shkoj deri në fund një rruge, duke respektuar dhe bërë time drejtësinë që kërkoj. Nëse sistemi do ishte gabim do e thoja me siguri, po shpresoj shumë që drejtësia të bëjë drejtësi edhe për qytetarët, dhe më vjen keq për të gjithë ata që janë dënuar padrejtësisht dhe gjithë të tjerëve që u kemi rënë më qafë e kam kuptuar shumë vonë këtë, po më vjen shumë keq”.

I pyetur nëse ka ndonjë emër konkret, Tahiri theksoi se më shumë e shqetëson fenomeni.

“Më shumë se emrat më shqetëson fenomeni, me emrat e zgjidh kollaj, më shqetëson fenomeni”

Ndërsa deklarata e ambasadave të huaja në vend pas vendimti të gjykatës për të, Tahiri i cilësoi dekurajuese. /abcnews.al

SINKRON-TAHIRI.mpg_snapshot_00.16-1280x720.jpg
ent ela12:07 | 21/09/2019

I pyetur nga gazetarët për të ardhmen në politkë dhe në PS, Tahiri u shpreh se ajo që vlen më shumë për të është drejtësia sesa partia. Ai tha se do i shkojë drejtësisë deri në fund i vetëm përballë të gjithëve.

“Më vlen më shumë drejtësia, sesa partia. Kurban nuk do të thotë të mos jesh në burg por të jesh i lirë, ka njërëz që nuk janë në burg, po janë kurbanë se nuk kanë qenë të lirë. Kam njohur burra që kanë qenë të lirë edhe kur kanë qenë në burg para dhe pas burgut. Ka të burgosur pafund që nuk  janë në burg dhe qeverisin”

Më intereson vetëm drejtësia dhe po e përballoj i vetëm përballë të gjithëve

Ai tha se nuk e ka në dorë partia se se çdo bëhet me të, por ai vetë dhe vetmja gjë e rëndësishme është drejtësia.

“Nuk do të thotë të kesh një karrige që të kesh kontribut të caktuar në publik . Nuk e kam menduar këtë çështje tani. Jam duke i shkuar rrugës sime deri në fund dhe çdo bëj me veten time nuk e ka në dorë as partia, as ndonjë individ, e kam në dorë vetëm unë. Shumë e rëndësishme për mua është për të bërë drejtësi, dhe nuk e ka askush në dorë veç meje”./abcnews.al

SINKRON-TAHIRI.mpg_snapshot_00.03-1280x720.jpg
ent ela11:46 | 21/09/2019

“Që ditën e parë që hyra në Politikë zgjodha rrugën e së vërtetës”. Me këto fjalë e nisi Sajmir Tahiri komunikimin parë me mediat pas dhënies së vendimit, ku u dënua, me 3.4 vjet burg për shpërdorim detyre.

‘Me ketë rrugë do edukoj fëmijët e mi, këtë rrugë zgjodha. Mbajta në kurriz akuza nga më monstruozet, më akuzuan se fitoja 5 mln euro në mua se harxhoja 20 mln euro në muaj. fati im ishte që prokuroria  italiane hetoi dhe e panë qartë. Kjo për mua nuk është drejtësi e plotë, beteja për të vërtetën  time është stacioni i parë, ka plot rrugë përpara. Do i shkoj deri në fund të vërtetës sime”.

Pjesë nga fjala e Saimir Tahirit

Pas dy vitesh hetimet nga prokuroria, karroca e prishur e dyshimeve mbi mua ndaloi në stacionin e parë. Heshta për të respektuar drejtësinë jo se nuk di të flasë. Unë kam besuar që ditën e parë që nuk duhet të ishte një gjyq popullor, por një gjyq shembullor. Unë heshta i bindur dhe e bëra vetëm në respekt të drejtësisë. Unë e kisha shumë kollaj të mbaja mandatin e deputetit. Unë lash mandatin e deputetit.

Gënjeshtrat morën një përgjigje edhe pse as e plotë, as përfundimtare. Vendimin unë do ta ankimoj sapo të zbardhet.

Kush mendon para se të merrja unë detyrën, që kanabis kishte vetëm në Lazarat, gabohet rëndë. Unë sot akuzohem për shpërdorim detyre. Unë edhe mbrojtjen për këtë akuzë do e bëj përballë gjykatës siç më takon. Ka pasur Shqipëria ministra të Brendshëm të tjerë, ministrja, Kryeministra. Një ministër i Brendshëm kur u vranë 4 qytetarë nuk u akuzua për shpërdorim detyre. Shesin mend e dëngla në emër të popullit dhe më bëjnë mua gjyqin në emër të popullit. Mua më intereson vetëm e vërteta ime dhe do t’i shkoj deri në fund. Mua më takon të rri e të pres, të marr vendimin e zbardhur të gjykatës dhe ta apeloj urgjentisht.

Ka shumë qytetarë që sot më besojnë. Ka plot të tjerë që s’më besojnë dhe as do më besojnë kurrë me gjasë. I falenderoj dhe gazetarët, analistët dhe komentatorët që nuk janë kursyer. Ju them të gjithëe prisni, bëni durim, prisni! Në këtë vend që duket sikur parimet vlejnë pak, në këtë vend mund të bëhet dhe ndryshe dhe Shqipëria e fëmijëve të mi nuk mund të jetë kjo. Unë do vazhdoj ta bëj këtë betejë. /abcnews.al

 

gazment-bardhi-1.jpg
ad min17:12 | 20/09/2019

Partia Demokratike akuzoi kryeministrin Rama për vendimin e marrë nga Gjykata e Krimeve të Rënda për ish-ministrin Tahiri. Në një dalje nga selia blu, sekretari i Përgjithshëm i PD, Gazment Bardhi deklaroi se kreu i qeverisë është peng i lidhjeve të krimit ndaj edhe ndikoi te gjyqtarët për ta dënuar Tahirin për shpërdorim detyre duke rrëzuar akuzat për trafik droge.  

Ish-ministri i Brendshëm Saimir Tahiri nuk përfundoi në burg sepse në mbrojtje të tij përgjatë dy viteve të gjykimit ishte kryeministri Edi Rama. Ky është qëndrimi që demokratët kanë për vendimin e dhënë nga Gjykata e Krimeve të Rënda për Tahirin, duke e cilësuar kreun e qeverisë peng të dosjeve të korrupsionit.

Sipas numrit dy të demokratëve, shqiptarët dhe kushdo që besoi deri në fund se mund të shikonte pas hekurave Tahirin morën një goditje të rëndë me vendimin që u dha, i cili njëkohësisht dëmton akoma më shumë imazhin e vendit.

Gjykata e Krimeve të Rënda dënoi me 5 vite burg Saimir Tahirin për shpërdorim detyre, dënim që për shkak të gjykimit të shkurtur u konvertua në 3.4 vite shërbim prove./ABC News Albania 24/7

TAHIRI-NGA-TRAFIKANT-NE-SHPERDORUES-DETYRE.mpg_snapshot_03.23-1280x720.jpg
ent ela15:11 | 20/09/2019

Përballjen me drejtësinë ish ministri i brendshëm Saimir Tahiri e ka nisur dy vjet më parë. Një përmbledhje e procesit që nisi me akuzat për trafikant të lëndëve narkotike e që përfundoi me vendimin e gjykatës për shpërdorim detyre.

Kështu nisi karriera e Saimir Tahirit si ministër i Brendshëm në vitin 2013. Në pak kohë u listua më i suksesshmi ndër ministrat e tjerë të qeverisë Rama 1. Një vit pasi kishte marrë detyrën, nisën edhe akuzat e para të opozitës.

“Audi me targë AA003GB në pronësi të Saimir Tahirit gjatë vitit 2014 kishte kaluar me qindra herë kufirin Shqipëri-Greqi dhe se kishte dyshime të forta se nën përdorimin e kushërinjve Habilaj të ministrit të Brendshëm, me atë mjet ishte trafikuar drogë”.

Një vit më vonë ish shefi i antidrogës në Vlorë Dritan Zagani e akuzoi se dekonspironte aksionet e policisë për kapjen e trafikantëve të drogës.

Opozita kërkoi heqjen e imunitetit të Saimir Tahirit dhe dorëzimit të tij drejtësisë. Por mazhoranca kërkoi më shumë prova që të bindej.

Me kohën po veniteshin edhe deklaratat si ministri më I sukssesshëm deri sa një ditë kryeministri Edi Rama i heq të gjitha funksionet politike dhe e lë të lirë të gjejë të drejtën e tij.

Në nëntorin e vitit 2017 Saimit Tahiri u vu nën hetim nën dyshimet se kishte lidhje me grupin e vëllezërve Habilaj, kushërinj të tij, të cilët ishin pjesë e një organizate italo-shqiptare që trafikonte marihuanë nga Shqipëria drejt Italisë.

Shkak për nisjen e hetimeve u bë goditja e kësaj organizate në Catania nga autoritetet italiane e cila ndeshi në përgjiet e kryera mes trafikantëve emrin e ish ministrit Tahiri.

Socialistët iu bënë mburojë kur Prokuroria kërkoi arrestimin e ish ministrit, me pretendimin  se nuk kishin paraqitur asnjë provë.

Por ishte vetë Saimir Tahiri që vendosi në vitin 2018 të japë dorëheqjen nga mandati i deputetit. Pas përsëritjes së kërkesës së Prokurorisë, ish ministri qëndroi në arrest shtëpie derisa Gjykata  e Apelit vendosi që ai të hetohej në gjendje të lirë.

Gjatë vitit 2018 prokuroria e krimeve të rënda sekuestroi dhjetra prona të grupit Habilaj me vlerë miliona euro.

Saimir Tahiri në cdo seancë gjyqësore ka mohuar akuzat për përfshirjen e tij në trafik narkotikësh, apo se ka patur lidhje me grupin e Habilajve. Ai ka përsëritur se ky proces është politik.

Gjykata e Krimeve të Rënda ka pranuar kërkesën e ish-ministrit Tahiri për gjykim të shkurtuar, duke e ulur automatikisht në një të tretën masën e dënimit. Prokuroria kërkoi fillimisht 12 vjet burg duke e akuzuar ish ministrin për të paktën tre vepra të rënda penale: Trafik i narkotikëve kryer në bashkëpunim në formën e grupit të struktuar kriminal; Pjesëmarrje në grup të strukturuar kriminal dhe Kryerja e veprës në grup të strukturuar kriminal.

Por pas një seance maratonë që nisi prej orën 9 të ditës së enjte, rreth orës 22 të mbremjes gjykata i komunikon vendimin, sipas të cilit nuk është një trafikant siç është dyshuar këto dy vjet, por thjesht një funksionar i lartë shtetëror që ka shpërdoruar detyrën.

Ish-Ministri u dënua me 5 vite burg në total, por për shkak të gjykimit të shkurtuar, atij iu ul masa e dënimit me 3.4 vite burg dhe në përfundim iu konvertua në 3 vite shërbim prove, çka do të thotë se Tahiri nuk do të kryejë as një ditë burg.

Por nuk ka mbaruar këtu beteja ligjore e Saimir Tahirit. Ai është i vendosur ta apelojë vendimin për ta hequr edhe këtë njollë nga vetja. Se sa kohë do t’i duhet e sa mesazhe të tjera do të përcjellë nga dyert e gjykatës, kjo ende nuk dihet. /ABC News Albania 24/7

 

KRONIKE-MINISTRI-GJERMAN.mpg_snapshot_00.13-1280x720.jpg
ent ela15:14 | 16/09/2019

Ministri gjerman i drejtësisë ndodhet në Shqipëri për të takuar krerët më të lartë të shtetit. Kristjan Lange tha sot se për Gjermaninë reforma në drejtësi është kusht për negociatat, ndërsa shtoi se tashmë është e rëndësishme që të ngrihet Gjykata Kushtetuese, ajo e Lartë dhe SPAK-u, në mënyrë që vendi të përparojë drejt BE-së.

Ky është Kristjan Lange. Sekretar i shtetit gjerman për drejtësinë. Ai ndodhet në Tiranë për një vizitë tre ditore për të takuar drejtuesit më të lartë të shtetit, nga Ilir Meta e Edi Rama deri tek drejtuesit e institucioneve të drejtësisë.

Ministri gjerman u takua edhe me Taulant Ballën nga ku nuk u prononcua, por më pas, ambasada saktësoi qëllimin e vizitës përmes një deklarate me shkrim.

“Me vizitën time dhe bisedat që po zhvilloj në Shqipëri dëshiroj të krijoj një ide për gjendjen e reformës në drejtësi. Reforma në drejtësi është një parakusht i rëndësishëm për procesin e përafrimit të Shqipërisë në Bashkimin Evropian. Qeveria Federale mbështet perspektivën evropiane të Ballkanit Perëndimor”.

Gjermania i njeh rezultatet e Shqipërisë në këtë drejtim, por kërkon më shumë.

“Unë përshëndes faktin që reforma në drejtësi po përparon në mënyrë të vazhdueshme dhe që institucionet e krijuara të drejtësisë kanë filluar punën. Tani më duket e rëndësishme që ndër të tjera Gjykata Kushtetuese, Gjykata e Lartë, SPAK dhe BKH të bëhen funksionale në muajt e ardhshëm. Në mënyrë që reforma në drejtësi të marre më tej vrull, duhet që të gjithë institucionet e përfshira të vazhdojnë të punojnë në mënyrë profesionale dhe të fokusuar”.

Ministri gjerman lë të kuptohet se për qeverinë federale, rezultatet konkrete të reformës në drejtësi, janë ato që do të ndihmojnë integrimin.

“Unë jam plotësisht i bindur që shteti i së drejtës në Shqipëri do të forcohet në mënyrë afatgjatë nëpërmjet reformës në drejtësi – me gjyqtarë dhe prokurorë profesionistë dhe të pavarur. Në fund këto përpjekje do të kontribuojnë, që shqiptarët të kenë përsëri më shumë besim në sistemin e drejtësisë dhe që Shqipëria të vazhdojë rrugëtimin e saj drejt Bashkimit Evropian”.

Taulant Balla tha se ministri Lounge i kishte bërë me dije se Partia Social Demokrate që ai përfaqëson, do të votojë pro çeljes së negociatave për Shqipërinë gjatë mbledhjes së Bundestagut gjerman javën e ardhshme. /ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono