Donald Trump

kim-dhe-trump.jpg
G. P.12:20 | 23/06/2019

Kim Jong Un ka marrë një letër personale nga presidenti amerikan Donald Trump. Lideri koreano-verior e ka vlerësuar maksimalisht letrën në fjalë, por megjithatë nuk dihet se cilat do të jenë hapat e ardhshëm mes Uashingtonit dhe Penianit lidhur me çështjen bërthamore.

Lideri koreano-verior Kim Jong Un mori një letër të dërguar personalisht nga presidenti i Shteteve të Bashkuara, Donald Trump. Sipas mediave ndërkombëtare, Kim e cilësoi letrën “të shkëlqyer” dhe deklaroi se do t’i shqyrtojë me seriozitet propozimet që mban ajo.

Ai gjithashtu vlerësoi lidershipin e Donald Trump, për të cilin tha se ka një “kurajë të jashtëzakonshme”. Sidoqoftë, nuk dihet data e saktë se kur letra ka mbërritur në Penian dhe se çfarë përmban ajo. Bisedimet mes Shteteve të Bashkuara dhe Koresë së Veriut kanë hyrë në ngërç që nga dështimi i samitit të Vietnamit, i mbajtur në shkurt, që u mbyll pa një marrëveshje mes palëve.

Ajo amerikane kërkon që vendi aziatik të heqë dorë nga programi bërthamor, ndërsa Peniani kërkon që Uashingtoni të nisë heqjen e sanksioneve. Në këtë drejtim, letra përbën një zhvillim të rëndësishëm në marrëdhëniet mes dy vendeve. Shtuar kësaj fjalët e ngrohta që presidenti Trump ka përdorur në drejtim të Kim kohët e fundit.

Më herët gjatë muajit ai tha se Koreja e Veriut ka një potencial të madh nën drejtimin e Kim, ndërsa gjatë një vizite në Japoni e cilësoi atë një “djalë shumë inteligjent” dhe paralajmëroi se pret që gjëra pozitive të ndodhin së shpejti për vendin e izoluar aziatik. Pak ditë më parë, Peniani u vizitua nga presidenti kinez Xi Jinping, i cili i përcolli Kim mesazhin se duhet të rikthehet në tryezën e bisedimeve me Shtetet e Bashkuara./ABC News Albania 24/7

aa-5.jpg
G. P.10:30 | 20/06/2019

Presidenti Trump do të nderojë të mërkurën ekonomistin Arthur Laffer me Medaljen Presidenciale të Lirisë, nderimi më i lartë civil në vend. Është një gjest që me siguri do të nxisë polemika mes atyre që e shohin ekonomistin e arsimuar në Yale dhe Stanford si një vizionar dhe atyre që e shohin si sharlatan.

Arritja më e madhe e ekonomistit është e ashtuquajtura “Kurba Laffer” – një koncept ekonomik që ai e skicoi fillimisht mbi një pecetë në një restorant në Uashington, D.C. në vitin 1974, ndërsa po darkonte me nënpresidentin e ardhshëm amerikan Dick Cheney, sekretarin e ardhshëm të Mbrojtjes Donald Rumsfeld, që shërbenin në atë kohë në administratën e presidentit Gerald Ford, si dhe me gazetarin e Wall Street Journal Jude Wanniski.

Në qendër të konceptit të Kurbës Laffer – koncept që vetë zoti Laffer thotë se nuk ishte origjinal – është se në një ekonomi të thjeshtëzuar ekziston një normë tatimore teorike që maksimizon të ardhurat qeveritare. Nëse norma e taksës do të ishte 100%, askush nuk do të punonte dhe qeveria nuk do të mblidhte dot taksa. Nëse norma do të ishte zero, njerëzit do të punonin me zell por qeveria përsëri nuk do të siguronte të ardhura. Diku në mes qëndron ekuilibri i përsosur.

Sfida e vërtetë ishte përcaktimi i atij niveli taksash që do të maksimizonte të ardhurat për qeverinë. Ajo që e bëri ekonomistin Laffer popullor te konservatorët, dhe veçanërisht te republikanët e kohës së Reaganit, ishte argumenti i tij i fuqishëm se normat e taksave në vitet 1980 ishin mbi nivelin që do të maksimizonte të ardhurat për qeverinë.

Nënkuptimi ishte se shkurtimet e taksave do të paguanin veten. Ishte një argument i fuqishëm që do të përdorej si justifikim për plane të shumta për të shkurtuar taksat federale gjatë katër dekadave të ardhshme. Ai vazhdoi pavarësisht nga provat në rritje, disa të mbledhura nga ekonomistë të tjerë konservatorë, se normat e taksave ishin tashmë nën nivelin që do të arrinte të ardhura maksimale për qeverinë dhe se ulja e normave do të ulte vetëm të ardhurat tatimore.

Kurba Laffer u bë një nga gurët themelorë të teorisë makroekonomike që argumenton se ulja e taksave dhe pakësimi i rregulloreve sjell rritje ekonomike dhe krijon vende pune. Ekonomisti Laffer vazhdoi të këshillonte presidentë dhe kandidatë të të dyja palëve mbi anët pozitive të taksave të ulëta dhe pakësimin e rregulloreve. Shumë nga idetë e tij u shndërruan në politika federale nga administratat republikane. Shkurtimet e thella të taksave dhe heqja e rregulloreve u bënë baza e politikave ekonomike të presidentit Trump gjatë dy viteve të fundit.

Por me kalimin e kohës, fama e Lafferit filloi të zbehej. Në vitin 1997, ekonomisti konservator N. Gregory Mankiw, i cili do të shërbente si kreu i Këshilltarëve Ekonomikë të Presidentit Xhorxh W. Bush, botoi një libër të njohur që mbetet në qarkullim edhe sot. Në të, koncepti i rritjes ekonomike përmes shkurtimit të taksave dhe përkrahësit e tij trajtohen në një kapitull të titulluar “Sharlatanët dhe Grindavecët.” Në vitin 2005, një studim i Zyrës së Buxhetit në Kongres, i drejtuar në atë kohë nga një tjetër ekonomist konservator, Douglas Holtz-Eakin, kreu një studim të plotë mbi ndikimet e mundshme të një shkurtimi të të gjitha taksave në nivelin prej 10%. Në kundërshtim me parashikimet e Kurbër Laffer, studimi zbuloi se ulja e taksave do të rezultonte në humbje të konsiderueshme të të ardhurave për qeverinë.

Polemikat rreth teorive ekonomike të Laferit nuk e kanë ulur prestigjin e tij tek shumë konservatorë dhe ai ende trajtohet si një zë i rëndësishëm në debatet ekonomike nga shumë republikanë konservatorë.

Në një intervistë me televizionin Fox këtë vit, ai tha se analiza e tij provoi se fitorja e ish presidentit demokrat Barak Obama në zgjedhjet e vitit 2008 shkaktoi Recesionin e Madh. “Ndërsa ai po i afrohej fitores, tregjet u shembën”, pohoi Laffer.

Recesioni i Madh, sipas Byrosë Kombëtare të Studimeve Ekonomike filloi në dhjetor të vitit 2007. Në atë periudhë, Obama kishte një mbështetje prej vetëm 27 përqind të votuesve në zgjedhjet paraprake. Ai nuk do të zgjidhej president edhe për një vit tjetër.

Dhënia e Medaljes Presidenciale të Lirisë për ekonomistin Laffer nga presidenti Trump vjen më pak se një vit pasi ai së bashku me një komentator të debatueshëm konservator për çështje ekonomike, Stephen Moore, përgëzuan politikat ekonomike të presidentit në librin Trumponomics.

Pas botimit të librit, presidenti Trump përdori llogarinë e tij në Twitter për ta promovuar librin, duke shkruar: “Stephen Moore dhe Arthur Laffer, dy burra shumë të talentuar, sapo kanë përfunduar një libër të jashtëzakonshëm mbi Politikat e mia Ekonomike, ose, siç e quajnë ata, TRUMPONOMIA. Ata me të vërtetë kanë bërë një punë të shkëlqyer për të paraqitur pikëpamjet dhe idetë e mia. Ky libër është tani në shitje – një libër i mirë për një temë vërtet interesante!”

Presidenti Trump u përpoq të emëronte zotin Moore në Bordin e Rezervës Federale në fillim të 2019, por propozimi dështoi për shkak të pikëpyetjeve rreth kualifikimit të tij. Ekonomisti Arthur Laffer do ta marrë medaljen më të lartë civile të vendit me një ceremoni në Shtëpinë e Bardhë./VOA

donald-Trump.jpg
G. P.12:59 | 19/06/2019

Presidenti amerikan Donald Trump nisi zyrtarisht fushatën elektorale duke premtuar realizimin e ëndrrës amerikane. Ai kërkoi votën për një mandat të dytë presidencial duke theksuar se një votë për demokratët do të ishte një votë për shkatërrimin e vendit.

“Ekonominë amerikane e ka zili e gjithë bota, vendi është i zhvilluar. Dhe deri kur do të ndiqni këtë skuadër e ardhmja do të jetë e shkëlqyeshme. Ëndrra amerikane është rikthyer dhe më e fortë se më parë.”

Ka qenë kjo deklarata e presidentit amerikan në hapjen zyrtare të fushatës së tij elektorale për zgjedhjet presidenciale të 2020-s. Ai shtoi se viti 2016 ka qenë një moment i rëndësishëm në histori.

I prezantuar në skenë nga zv/presidenti Mik Pence sipas të cilit Shtetet e Bashkuara të Amerikës kanë nevojë për katër vjet të tjera të presidencës Trump; presidenti amerikan është i impenjuar për të çuar përpara politikën e “Amerika në vend të parë” dhe  të luftojë kundër emigracionit të paligjshëm. Motoja e fushatës së tij është: “Të ruajmë Amerikën e madhe”.

I pritur nga mijëra mbështetës, Trump falenderoi bashkëpunëtorët e tij para se të niste sulmin. Në objektivin e tij ishte Barack Obama, por dhe Hillary Klinton me 33 mijë email-et e fshira: Nëse unë do të fshija një e-mail dashurie për Melaninë, do të kërkonin karrigen elektrike për mua, shtoi ai.

Trump më pas u përqendrua në çështjen e Russiagate, hetime që e kanë mbajtur në presion për dy vjet, por që në fund ai kishte fituar. Por kreu i Shtëpisë së Bardhë nuk kurseu kritikat as ndaj mediave dhe lajmeve të rreme.

“Jam këtu para jush për të nisur zyrtarisht fushatën time elektorale për mandatin e dytë presidencial. Po vendosim më në fund Amerikën në vend të parë. Një votë për demokratët është një votë për shkatërrimin e ëndrrës amerikane,” shtoi Trump.

Ai sulmoi demokratët dhe politikat e së majtës radikale sidomos ato për emigracionin. Sipas presidentit amerikan demokratët duan të shkatërrojnë vendin pasi atyre u intereson vetëm pushteti politik.

Kreu i Shtëpisë së Bardhë premtoi se Amerika nuk do të jetë asnjëherë një vend socialist pasi republikanët besojnë në liri, dhe amerikanët gjithashtu. Sipas tij këto zgjedhje nuk janë një test për progreset fantastike e bëra nga administrate e tij por është një vendim për sjelljen anti-amerikane të atyre që u përpoqën të rrezikonin demokracinë dhe amerikanët.

Më pas presidenti amerikan ia la fjalën zonjës së parë Melania Trump. “Ka qenë një nder të shërbej si Zonjë e Parë dhe jam e lumtur që të mund ta bëj këtë dhe në vazhdim”. Melani u shpreh krenare për atë që kishte arritur të bënte bashkëshorti i saj në kaq pak kohë./ABC News Albania 24/7

netanjahu-qyteti.jpg
ent ela11:03 | 17/06/2019

“TrumP City” është qyteti më i ri në lartësitë e Golan, kryemninistri izraelit Netaniau deklaroi se kishte marrë këtë vendim pasi kreu i Shtëpisë së Bardhë ishte i pari lider ndërkombëtar i cili kishte njohur sovranitetin e Izraelit në lartësitë e Golan.

Prej ditës së sotme një qytet në lartësitë e Golan mban emrin e presidentit të Shteteve të Bashkuara të Amerikës: jo më Bruchim, si quhej dikur, por Ramat Trump “Lartësitë e Trump”. Vendosjen e gurit të parë – që për momentin është një tabelë e madhe me emrin e ri – e kreu kryeministri i Izraelit Benyamin Netanyahu për të nderuar një mik të madh. Ai shpjegoi se Tramp ishte lideri i parë ndërkombëtar i cili  njohu sovranitetin izraelit në lartësitë e Golan.

Në prani të qeverisë së mbledhur në një seancë të jashtëzakonshme në vendin e ceremonisë dhe të ambasadorit amerikan në vend David Friedman, u formalizua pas një shtyrje të diskutueshme – një vendim i marrë dhe i shpallur menjëherë pas njohjes nga ana e Presidentit amerikan të sovranitetit izraelit në lartësitë e Golan, që iu mor Sirisë gjatë luftës në vitin 1967.

“Për ne është një ditë historike u shpreh Netaniau duke shtuar si ndihej krenar për këtë nder që po i bënte kreut të shtëpisë së Bardhë.

Duke filluar që nga mëngjesi i të hënës vendi është plot me gazetarë të cilët janë përqendruar në shtëpitë ku jetojnë 15 persona, pjesa më e madhe emigrant rusë. Ndërsa pyetja kryesore ishte se si ndiheshin ata si banorë të Trump City.

I vendosur në një kodër, qyteti duket si një parajsë por e izoluar. Ndërsa banorët janë shprehur të lumtur për ndryshimin e emrit, pasi sipas tyre kjo po shërben për të tërhequr njerëzit dhe për t’u zhvilluar. Por kishte dhe nga ata të cilët ishin më skeptikë duke thënë se duhen shkolla dhe spitale si dhe mjete transporti. Por meqënëse banorët janë të pakët në numër ato nuk mund të ndërtohen.

Kryeministri izraelit deklaroi se ndërtimet në Golan do të vazhdojnë për të gjithë banorët, hebrenj dhe jo, për të ardhmen e Izraelit.

Por opozita në vend nuk është dakord dhe akuzon qeverinë se po punon vetëm në fushën e marrëdhënieve publike. Por presidenti i këshillit rajonal të Golan, ka hedhur poshtë akuzat duke thënë se kishte marrë me qindra telefonata dhe nga hebrenj në Shtetet e Bashkuara të Amerikës dhe Kanadaja të cilët dëshironin të emigronin në “Trump City”. /ABC News Albania 24/7

Donald-Trump-e1526640469549.jpg
G. P.22:35 | 16/06/2019

Presidenti amerikan Donald Trump u është rikthyer sulmeve ndaj mediave që kundërshtojnë politikat e tij. Në shënjestër të kreut të shefit të Shtëpisë së Bardhë kanë qenë “New York Times” dhe “Washington Post”, të cilat ai i ka konsideruar turp për vendin.

“Në fund “New York Times” dhe “Washington Post”, që janë turp për vendin tonë dhe armike të njerëzve, do të falimentojnë dhe do të zhduken përgjithmonë”, ka thënë Trump.

Deklaratën presidenti amerikan e ka bërë në profilin e tij në Twitter, ku ka sugjeruar edhe zhvillimin e një sondazhi se cila nga dy të përditshmet është më mashtruesja.

Dy gazetat janë prej kohësh në shënjestër të kreut të shtetit, sidomos “New York Times” që mes të tjerash ka shkruar se pasuria e Donald Trump rrjedh nga i ati, duke zhbërë kështu mitin e presidentit si një njeri që ka arritur gjithçka me forcat e tij./ABC News Albania 24/7

junior.jpg
G. P.23:59 | 12/06/2019

Komisioni i Senatit amerikan që vazhdon të hetojë ndërhyrjen e përfolur ruse në politikën amerikane ka thirrur për të dëshmuar djalin e madh të presidentit Trump. Në përfundim të seancës, Donald Trump Junior ka deklaruar se nuk ka ndryshuar asgjë në qëndrimin e tij.

Donald Trump Junior, djali i madh i presidentit të Shteteve të Bashkuara, u paraqit të mërkurën në komisionin për shërbimet sekrete të Senatit amerikan, për të dëshmuar në një seancë me dyer të mbyllura në lidhje me ndërhyrjen ruse.

Konkretisht, intervista ka patur në fokus investimin privat të familjes Trump në Moskë dhe takimin e përfolur me një avokate ruse që pretendonte se kishte material që mund të ndihmonte presidentin Trump në zgjedhjet e 2016-s.

“Nuk mendoj se kam ndryshuar diçka në qëndrimin tim, sepse nuk ka patur asgjë për të ndryshuar”, deklaroi Trump Junior pas seancës.

Ai u shpreh i kënaqur që kjo çështje është mbyllur dhe sqaruar, si nga ana e tij ashtu edhe nga komisioni. I pyetur nga mediat nëse druhet se ka bërë një dëshmi të rremë, ai u përgjigj shkurt: “Aspak”.

Komisioni i Senatit për shërbimet sekrete, që udhëhiqet nga senatori republikan Riçard Burr, po kryen një hetim dypartiak mbi ndërhyrjen ruse në politikën amerikane, përfshirë këtu zgjedhjet presidenciale të tre viteve më parë.

Hetimi i Senatit vazhdon edhe pse hetuesi i posaçëm Robert Mueller e ka mbyllur hetimin e tij lidhur me marrëdhëniet e përfolura të stafit të Trump me rusët gjatë fushatës dhe nëse presidenti pengoi drejtësinë në hetime./ABC News Albania 24/7

palmer-ne-serbi.jpg
G. P.17:53 | 10/06/2019

Zëvendës sekretari amerikan i Shtetit Matthew Palmer, gjatë qëndrimit të tij në Beograd theksoi mbështetjen e Shteteve të Bashkuara të Amerikës për vazhdimin e dialogut. Ndërsa presidenti i Serbisë Vuçiç ftoi homologun amerikan Trump të vizitojë vendin.

I dërguari amerikan, zëvendës ndihmës sekretari, Mathew Palmer, ka arritur për paqe në kryeqytetin serb. Njëzet vjet më parë Serbia vuri firmë mbi marrëveshjen e Kumanovës për të ndaluar bombardimet e NATO-së.

Palmer dy dekada më vonë i tha Serbisë të vazhdoj dialogun me Kosovën dhe Prishtinën porositi për ta hequr taksën. Me presidentin, Aleksandër Vuçiç, tha bisedimet nuk kanë alternativë.

“SHBA mbështesin dialogun e udhëhequr nga BE për normalizim të plotë në mes të Beogradit dhe Prishtinës. Ne mendojmë se kjo është rëndësishme. E shohim taksën si një pengesë dhe do të donim t’i shohim të hiqen apo të suspendohen që të mundësojnë uljen në bisedime, për të mbështetur dhe siguruar një të ardhme Evropianë për Serbinë dhe Kosovës, por edhe për tërë Ballkanin Perëndimor”, tha Palmer.

Dekadat kanë kaluar që nga lufta, por në paqe qëndrimet për marrëveshje nuk janë përafruar. Vuçiç u shpreh skeptik për dialogun pa hequr tarifën. Falenderoj Amerikën për partneritet pavarësisht se ndan mendime të ndryshme për bombardimet. Presidenti serb shprehi dyshime për takimin e Parisit, duke u përgjigjur me pyetje se kur nuk mund të importohen as biskotat si mund të flitet për paqe?

“Nuk e di nëse takimi në Paris do të ndodh pasi nuk e di se sa do të jenë të gjithë të gatshëm të dëgjojmë të njëjtën histori dhe pa u hequr taksat si të diskutojmë për dicka tjetër. Por, unë dua që të kemi një marrëveshje të kompromisit dhe kërkojmë të kuptohet edhe pozita jonë”, tha Vuçiç.

Palmer premtoi mbështetjen e SHBA për dialogun. Vuçiç ftoi Donald Trump të vizitojë Serbinë në vendin ku siç tha ka mbështetjen më të madhe./ABC News Albania 24/7

donald-trump-1.jpg
G. P.14:39 | 08/06/2019

“Hëna, pjesë e planetit Mars”, është ky mesazhi më i fundit në Twitter i presidentit amerikan Donald Trump, i cili ka lënë të habitur shumëkënd dhe ka shkaktuar mjaft reagime.

Kreu i Shtëpisë së Bardhë Donald Trump ka bërë gafën e radhës në përpjekje për të kritikuar NASA, duke thënë se Hëna është pjesë e Marsit.

“Me të gjitha paratë që shpenzojmë, NASA nuk duhet të flasë për të shkuar në Hënë. E bëmë 50 vjet më parë. Duhet të përqendrohet në gjëra shumë më të mëdha që jemi duke bërë, përfshirë Marsin, ku bën pjesë dhe Hëna, Mbrojtjen dhe Shkencën”.

Ka qenë ky mesazhi në Twitter i Presidentit amerikan Trump, i cili ka befasuar të gjithë dhe ata që kanë njohuritë më bazike të astronomisë. Përveç kësaj në 13 Maj Trump deklaronte se Shtetet e Bashkuara të Amerikës do të riktheheshin në Hënë.

Kritikët e presidentit mendojnë se ai që e ka detyruar të ndryshojë qëndrim kanë qenë Fox News, një rrjet televiziv të cilin Trump e admiron shumë. Pak para deklaratës së Trump, drejtuesi i Fox News, Neil Kavuto u shpreh skeptik për planet e rikthimit në Hënë duke u shprehur: “Po përqendrohemi sërish tek udhëtimi në Hënë…por a nuk e bëmë një gjë të tillë shumë kohë më parë?”/ABC News Albania 24/7

trumpo.jpg
G. P.09:37 | 06/06/2019

Presidenti amerikan, Donald Trump, ka thënë se nuk është duke u bërë përparim i mjaftueshëm në negociatat me Meksikën, në mënyrë që të mënjanohen paralajmërimet e tij për vënie të tarifave.

Zyrtarët e administratës së Trumpit, do të takohen në ditën e dytë të bisedimeve me ministrin e Jashtëm të Meksikës, Marcelo Ebrard në Uashington. Takimi i tyre 90-minutësh një ditë më parë ka rezultuar pa ndonjë marrëveshje. Ebrard ka thënë më vonë në një konferencë për media se negociatat kanë qenë të mira, mirëpo tarifat as që janë përmendur.

“Dialogu është fokusuar në valën e migrantëve dhe rreth asaj se çfarë po bën Meksika apo çfarë u propozon Shteteve të Bashkuara, rreth situatës në Amerikën Qendrore”, është shprehur ai.

Trump është zotuar për të vendosur tarifa prej 5 për qind në importet e Meksikës nga dita e hënë, nëse ky shtet nuk ndalon valën e migrantëve që janë nisur në Shtetet e Bashkuara. Presidenti amerikan, i cili aktualisht është duke marrë pjesë në ceremonitë përkujtimore të Luftës së Dytë Botërore në Evropë, kërkon nga Meksika të ndalojë nisjen e migrantëve, meqë mijëra banorë të këtij shteti janë nisur drejt SHBA-së vetëm gjatë këtij viti./REL

lavrov.jpg
G. P.08:54 | 06/06/2019

Rusia mohoi se kishte informuar Presidentin amerikan Donald Trump për tërheqje të personelit ushtarak nga Venezuela, duke kundërshtuar një koment të bërë nga udhëheqësi amerikan.

“U befasova kur e lexova, nuk kemi njoftuar askënd. Me sa duket ai ka lexuar një artikull të gazetës The Wall Street Journal”, tha ministri i Jashtëm rus Sergei Lavrov, duke iu referuar një komenti të bërë më 3 qershor nga zoti Trump.

Në muajin mars presidenti Trump tha se Rusia “duhet të largohet” nga Venezuela duke iu referuar zbarkimit të avionëve rusë me furnizime e personel teknik për të ndihmuar Presidentin Nikolas Maduro i cili ndodhej në mesin e një kryengritjeje të brendshme.

Shtetet e Bashkuara kërkojnë rrëzimin e Nicolas Maduros, një aleat i presidentit rus Vladimir Putin, ndërsa mijëra qytetarë venezuelianë kanë dalë në rrugë për të protestuar kundër regjimit të tij.

Në një postim në Tweeter më 3 qershor Presidenti Trump shkruante se Rusia kishte informuar Shtetet e Bashkuara “se kishte larguar shumicën e personelit të tij nga Venezuela”.

Postimi erdhi një ditë pasi gazeta “The Wall Street Journal”, e cila citonte një burim të paidentifikuar pranë ministrisë ruse të Mbrojtjes, njoftoi se Moska kishte tërhequr shumë prej personelit ushtarak nga Venezuela.

Zëdhënësi i Kremlinit Dmitri Peskov tha se Rusia nuk e kishte njoftuar Uashingtonin për një vendim të tillë, duke shtuar se specialistët rusë po vazhdojnë të punojnë në Venezuelë./VOA


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono