dita e veres

dita-e-veress.jpg
G. P.15:25 | 14/03/2019

Zbukurimet në bulevardin “Dëshmorët e Kombit” dhe tregtarët ambulantë të ballokumeve ishin të vetmet detaje që përcillnin atmosferën e festës në Tiranë. Dita e Verës nga bashkia është parashikuar të festohet më 17 Mars, kur pritet mot me diell.

Dita e Verës këtë vit në Tiranë erdhi me qiell të zymte dhe ulje temperaturash. Atmosferën festive në kryeqytet e përcjellin zbukurimet në bulevardin “Dëshmorët e Kombit” dhe tregtarët ambulantë që kanë dalë të nxjerrin të ardhura nga produktet e festës.

Tiranës i mungon gjallëria që e karakterizon në një ditë të zakonshme jave. 14 Marsi është zyrtarisht pushim, ndërsa bashkia festimet i ka zhvendosur me 17 Mars me argumentin e motit të keq.

Por si parashikohet të jetë koha të dielën?

“Për sa i përket ditës së dielë do të paraqitet kryesisht me mot të kthjellët dhe të ngrohtë. Pritet që të kemi rritje temperaturash mbi 20 gradë Celsius dita e dielë”.

Përmirësimi i motit në të gjithë vendin pritet të nisë që nga dita e premte. Meteorologët parashikojnë rikthim të kthjellimeve dhe rritje graduale të vlerave të termometrit.

“Veriu dhe qendra do të mbeten me reshje të pakta dhe të izoluara, ndërsa jugu gjatë pasdites pritet të marrë një sasi reshjesh pak më të madhe deri me intensitet pak mesatar. Duke filluar që nga orët e vona të mbrëmjes do të kemi përmirësim të motit dhe nga zonat jugore, ku do të kemi kryesisht kthjellime, do të bëjë që dita e premte, kryesisht fundjava të paraqiten me mot të kthjellët dhe vranësira kalimtare. Ndërsa për sa i përket temperaturave kemi pasur një luhatje në vlerat e mesditës. Nesër do të kemi rritje për sa i përket vlerave të mesditës, deri në 17-18”.

Ndërsa më 14 Mars qytetarët në Tiranë Ditën e Verës kanë zgjedhur të festojnë sipas mënyrës së tyre, më 17 Mars Bashkia ka premtuar se do të organizojë po për këtë rast rreth 50 aktivitete për të rritur dhe fëmijë./abcnews.al

bashkiaaa.jpg
G. P.15:13 | 14/03/2019

Në orë të ndryshme të ditës kanë përshkuar të njëjtat rrugë në Elbasan për të uruar ditën e verës, secili sipas mënyrës së tij.

“I uroj të gjithëve gëzuar Ditën e Verës këtu nga Elbasani. Është një vit i veçantë edhe për ditën e Verës. Lala me 14, Luli me 16 Lali me 16. Gëzuar të gjithëve”, tha Rama.

Iu shmangën njëri-tjetrit, por jo elbasanasve edhe në këtë 14 Mars. Kryeministri Edi Rama i shoqëruar nga ministra, deputetë e kryebashkiaku i Elbasanit përveç ballokumeve shijoi edhe ekspozitën e fotografëve austriakë dedikuar qytetit të Elbasanit. Ndërsa kryetari i Partisë Demokratike Lulzim Basha zhvilloi disa vizita në familje tradicionale elbasanase.

Pavarësisht motit të vrenjtur banorët, por edhe dashamirësit e kësaj feste nga qytete të tjera të vendit nuk iu trembën lajmërimeve për kushtet e këqija atmosferike por morën pjesë në të gjitha aktivitetet e organizuara.

Parada e karnavaleve! Veprimtari të ndryshme sportive, performanca, lojëra popullore dhe koncert në qendër të qytetit. Nuk mungoi panairi i librit dhe ai tregtar. Për qytetarët kjo festë është e rëndësishme sepse simbolizon ripërtëritjen, mirësinë e mbarësinë.

Këtë vit, Elbasani ishte qendra e vetme e festimeve pas shtyrjes për  në 17 Mars që kryebashkiaku i Tiranës Erion Veliaj i bëri organizimeve për të kremtuar ditën pagane në kalendarin shqiptar./abcnews.al

elbasani-kryeqytet.jpg
G. P.09:47 | 14/03/2019

Sot Elbasani është kryeqyteti i Ditës së Verës. Prej dy ditësh, qyteti ka zbukurimet e festës, ndërsa prej mbrëmjes së kaluar me mijëra njerëz kanë mbërritur në qytet, për të marrë pjesë në festimet e sotme. Në qendër te Elbasanit festa ka nisur me karnavalet, ndërsa nuk do mungojnë lojërat popullore, ekspozitat e koncertet.

Sipas traditës edhe politikanë të lartë vijnë në Elbasan për Ditën e Verës. Është festa që prej vitesh bashkon palët politike.

Lideri i opozitës, Lulzim Basha, në axhendën e sotme ka të planifikuar takime me familje elbasanase si dhe me përfaqësues të bizneseve. Festimeve dhe aktiviteteve të planifikuara për sot pritet t’i bashkohet dhe kryeministri Edi Rama.

“Ka vazhduar dhe sivjet tradita e bukur e festimeve të Ditës së Verës në qytetin e Elbasanit. Mijëra qytetarë të ardhur nga gjithë Shqipëria janë bërë pjesë e këtyre festimeve. Njëkohësisht në festime marrin pjesë edhe autoritetet më të larta të vendit”, raporton nga Elbasani gazetari Fatos Salliu.

“Them se mirë si gjithmonë. Në fakt ka një çikë njerëz më pak. Pse? Unë gjykoj që ëhtë përpunuar shumë në media e kudo jo do bjerë shi, sinoptikanët, jo do bjerë shi. Tani nuk është një dimër si të tjerat. Ka simbole sa të duash, ballokumja, verorja. Një traditë popullore që është shumë e bukur se është pagane, është shumë e vjetër”, tha një qytetar.

“Riti është ballokumja që është traditë e Elbasanit prej shumë vitesh. Edhe revania. Edhe këto festimet. Karnavalet janë prej shumë kohësh, që kur unë kam qenë e vogël. Ruhet dhe data nuk ndryshohet asnjëherë. Nga argëtimet e fëmijëve që nga mëngjesi, me piknik të qytetarëve nga dreka dhe pasdite argëtimet familjare”, tha një qytetare.

/abcnews.al

elbasan-dita-e-veres.jpg
G. P.16:10 | 13/03/2019

Elbasani po bëhet gati që Ditën e Verës të presë mysafirë pa fund. Ndërkohe bashkia ka organizuar një sërë aktivitetesh për këtë festë. Çfarë po ndodh në këtë qytet? 

Po bëhen përgatitjet e fundit. Elbasani kthehet në epiqendrën e Shqipërisë dhe mbarë trojeve shqiptare. Është kryeqyteti i Ditës së Verës, festës pagane që vjen nga thellësia e shekujve.

Në kalendarin e vjetër, kur njerëzit  orientoheshin nga Dielli, Hëna e gjelbërimi, ka ekzistuar një ditë adhurimi.

Të parët tanë, ilirët udhëtonin nga të katër anët për t’iu falur Perëndisë së ripërtëritjes dhe gjithësisë e njohur me emrin Diana Candieviensis.

Dita e Verës është festë e gjithë shqiptarëve, por Elbasani zemra e saj.

Tempulli i festës ka qenë në zonën e Çermenikës, në afërsi të Librazhdit të sotëm. Në rrjedhën e shekujve ajo dalëngadalë zbriti në qytetin e luleve.

Më 14 mars, të gjithë bashkohen për të festuar, sepse Dita e Verës është edhe festa e jetës, vazhdimësisë.

Gazetar i ABC News, Elbasan: Fatos Salliu

/abcnews.al

53698474_940493649674652_7900437988457316352_n.jpg
ent ela13:05 | 11/03/2019

Festimet e Ditës së Verës në Tiranë do të zhvillohen më 17 mars. Këtë e bëri të ditur kryetari i bashkisë Erion Veliaj i cili tha se 80% e qytetarëve duan që festimet të zhvendosen për të dielën.

Ditë vere në Tiranë do të jetë 17 marsi. Festimet bashkia ka vendosur t’i zhvendosë për të dielën  kur parashikohet dhe mot me diell. Vendimin kryebashkiaku Erion Veliaj tregon se e mori pas sondazhit të zhvilluar me qytetarët në rrjetet sociale.

 “Falë 10 mijë votave të qytetarëve kemi vendosur që Ditën e Verës ta festojmë në ditë me diell dhe jo me shi. Në fund të ditës, festojmë jo për qejf të kalendarit, por për qejf të njerëzve. Meqë shumica e njerëzve duan që të mos lagen dhe fëmijët ta gëzojnë Ditën e Verës për t’u argëtuar në Tiranë, ku do të ketë rreth 50 aktivitete, me mbi 80% të votave qytetarët vendosën se duan ta festojnë të dielën, sidomos edhe ata që janë në punë private dhe ndoshta të enjten nuk kanë mundësi”.

Kryebashkiaku bëri të ditur vendimin nga Njësia Administrative numer shtatë ku pa punimet e kryera në një prej pallateve të zonës. Ndërtesa është rikonstruktuar dhe veshur me sistem kapot çka mundëson uljen e kostos së energjisë për banorët. 50% e  investimit u financua nga bashkia, pasi banorët e pallatit aplikuan për Fondin e Komuniteteve.

“Ky është një nga tre mijë pallatet që ka administratorë, por nuk mjafton vetëm ta kesh të parin e fshatit, duhet edhe të komandojë. Ndaj, më vjen mirë që Natasha, si e para e këtij komuniteti, arriti të mblidhte fondin e banorëve, pastaj ky fond u barazua nga bashkia dhe të dyja bashkë realizuan në kohë rekord këtë investim: një pallat me termoizolim, i cili ka dalë në dritë. Dikur ishte një pallat skiç, prodhim i viteve ‘90, tani një pallat model, i riparuar, me pompë, me kamera dhe gjithë shërbimet e tjera”.

Vetëm 3 muajt e parë të vitit pranë Bashkisë së Tiranës, janë kryer 15 aplikime të reja për Fondin e Komunitetit. /abcnews.al

veliaj-1280x709.jpg
ent ela19:09 | 10/03/2019

Mijëra qytetarë kanë marrë pjesë në sondazhin e organizuar nga kryetari i Bashkisë së Tiranës Erion Veliaj në rrjetet sociale nëse festimet e ditës së verës të mbahen të enjten kur sinoptikanët kanë parashikuar shi të dendur apo të dielën e 17 marsit, kur pritet të kemi një ditë me diell. Në total në të trija rrjetet sociale (facebook, twitter dhe instagram) deri më tani, kanë marrë pjesë në total mbi 10 mijë qytetarë që kanë shprehur mendimin e tyre duke votuar. Gjithsesi duhet thënë se sondazhi është ende i hapur dhe pritet që deri nesër qytetarë të tjerë të kenë mundësi të votojnë. Po gjatë ditës së nesërme pritet që Bashkia e Tiranës të jap të detajet finale të organizimit të këtyre festimeve.

Ndërkohë që pavarësisht ardhjes së stinës së pranverës, java e ardhshme pritet që të sjellë një përkeqësim të motit të shoqëruar reshje shiu dhe ulje temperaturash. Meteorologët theksojnë se koha do fillojë të përkeqësohet që në nisje të javës dhe do të jetë e paqëndrueshme deri të enjten ku dhe pritet të ketë reshje të dendura shiu. “Dita e nesërme kryesisht gjatë mesditës, sjell një sistem vranësirash në veri të territorit, ku do të kemi prezencë të reshjeve. Më pas dita e martë sjell shtrirje të reshjeve në të gjithë territorin, do të kemi një pauzë ditën e mërkurë, për t’u rikthyer sërish ditën e enjte që përkon edhe me “Ditën e Verës”, ku do të jetë kryesisht me mot të paqëndrueshëm dhe reshje shiu”, tha Adiola Bani, meteoreologe.

Sipas saj moti me shi do të shoqërohet edhe me rënie të ndjeshme të temperaturave, ku në zonat malore pritet që ato të kapin vlerat nën 0 gradë Celcius. “Përsa u përket temperaturave, ditën e martë pritet që të kemi një rënie me të paktën 6 gradë, duke bërë që zonat malore nga 3 të zbresin në -3 gradë celsius mëngjesi, ndërsa mesdita nga 23 -224 gradë, do të shkojë deri në 16-17 gradë celsius”, shtoi Adiola Bani.

Nisur pikërisht nga këto parashikime kryetari i Bashkisë së Tiranës ka hapur një sondazh në rrjetet sociale ku kërkon mendimin e qytetarëve nëse aktivitetet festive me rastin e “Ditës së Verës” të shtyhen për të dielën apo jo. Bashkia e Tiranës ka parashikuar rreth 50 aktivitete festive për fëmijë e të rritur.

/abcnews.al

festime-1280x853.jpg
G. P.14:10 | 10/03/2019

14 Marsi ndonëse zyrtarisht ditë vere, meterologët parashikojnë se do të vijë me shi, duke e bërë të vështirë zhvillimin e aktiviteteve festive.

Kushtet e motit kanë vënë në dilemë dhe kryetarin e Bashkisë së Tiranës, Erion Veliaj. Përmes një postimi në Tëitter, Veliaj kërkon ndihmën e qytetarëve për të gjetur një zgjidhje.

Ai i pyet ndjekësit e tij në rrjetin social nëse janë dakord për të zhvendosur festimet e Ditës së Verës nga e enjtja e 14 Marsit, të dielën më 17 Mars, kur pritet dhe përmirësimi i kushteve të motit.

Ndërkohë, kryebashkiaku i Tiranës thotë se me rastin e Ditës së verës bashkia ka përgatitur 50 aktivitete, për fëmijë dhe të rritur./abcnews.al

dita-e-veres.jpg
G. P.15:51 | 01/03/2019

Në Korçë ikja e dimrit është festuar sipas riteve tradicionale. Banorët natën kanë ndezur zjarret si simbole të ndërrimit të stinëve.

Në Korçë, stina e ftohtë ka mbaruar. Dimri për korçarët, në mënyrë simbolike, largohet ditën e fundit të Shkurtit. Dita e parë e stinës së re, është festuar në çdo shesh dhe rrugicë të qytetit, ku të gjithë bashkë, fëmijë dhe të rritur kanë ndezur zjarret tradicionale të kësaj feste pagane, që nga shekujt vjen si Dita e Verës.

“Të tërë kontribuojmë si lagje dhe bëjmë një zjarr, domethënë për të larguar dimrin e fortë, dimrin e acartë”.

Kapërcimi i zjarreve, që mbart simbolikën e purifikimit dhe largimit të së keqes është pjesë e ritualit të festës, tradita e së cilës përcillet e pandryshuar ndër breza.

“Çdo vitet e tjera, edhe këtë vit, shyqyr Zotit që na mbajti koha e mirë, ta festojmë.”

Edhe pse festë pagane, 1 Marsi në Korçë njihet si festa e besimtarëve ortodoksë. Në juglindje Dita e Verës festohet në dy data, 1 dhe 14 mars, që është edhe dita zyrtare e kësaj feste./abcnews.al

DITA-E-VERES-NE-TIRANE-1280x720.jpg
ent ela15:57 | 14/03/2018

Të shumtë ishin qytetarët që zgjodhën Tiranën për të festuar ditën e verës. Një larmi aktivitetesh ofroi kryqyteti për këtë festë. Pjesë e tyre u bë edhe kryetari i bashkisë Erion Veliaj, i cili bashkë me urimin e festës deklaroi se projektet në Tirane do të vazhdojnë pavarësisht debateve që shkakton çdo gjë e re.

Sheshet dhe rrugët kryesore të Tiranës u kthyen në skena festë këtë të mërkurë, ndërsa qytetarë që kishin zgjedhur kryqyteti për të festuar ditën e verës ishin nga rrethe të ndryshme.

Aktivitetet nisën me një paradë karnavalesh. Në bulevardin “Dëshmorët e Kombit” për gati tri orë, këngëtarë të njohur dhuruan spektakël. Ndërsa Parku i Liqenit Artificial u kthye në destinacion për të gjitha moshat.

Panairi me produktet artizanale, varakat apo piktorët shëtitës tërhoqen vëmendjen e shumë qytetarëve.

Festa kulmoi në sheshin “Skënderbej” ku një ndër pilotët më të njohur në botë, Martin Sonka dhuroi shfaqje për të gjithë të pranishmit. Por dita e verës për qytetarët nuk përfundon me kaq.

Festës i është bashkuar edhe Kryetari i Bashkisë Erion Veliaj i cili përveç urimit për Ditën e Verës përcolli edhe një mesazh për punët e kryeqytetit.

Muzikë, sport, produkte artizanale i ofroi kryeqyteti të gjithë atyre që e zgjodhën për të kaluar ditën e verës. Aktivitetet që nisën gjatë mëngjesit do të zgjasin deri në mesnatë. /abcnews.al

ATMOSFERE-ELBASANI-1280x720.jpg
ent ela15:16 | 14/03/2018

Këtë vit Elbasani ka pritur afro 200 mijë festues për Ditën e Verës. Aktivitetet për 14 marsin nisen tri netë para dhe bashkia kishte organizuar një sërë aktivitetesh.

200 mijë vetë besohet se kaluan Ditën e Verës në Elbasan. Për sigurinë e tyre u kujdesën afro 400 forca policie, mes tyre dhe forcat speciale.Me kalimin e viteve edhe organizimet bëhen më të bukura.

Elbasani nuk ishte pritësi i vetëm i atyre që shkuan për t’u argëtuar nga Shqipëria e nga Kosova, por edhe qyteti ku zbarkuan pushtetarët e u mblodh qeveria. Pas tyre edhe lideri opozitës Lulzim Basha.

Tradita dhe trendy,  bashkë për të festuar. Karnavale, demostrime sportive dhe njerëz që lëviznin nga njëri cep i qytetit në cepin tjetër. Ballokumet zunë vitrinat më të mëdha. Kurse lokalet pritën e përcollën mijëra vetë. Elbasani kishte netë që zhurmonte nga daullet e muzika.

Koncertet ishin të parët që mblodhën njerëzit.  Spektakël fishekzjarresh. Këngëtarë të shumtë për t’i mbajtur  zgjuar në pritje të ditës së 14 marsit. Të parët ishin ata popullorë. Një festival u organizua nga ata. Disa panaire, nga ai i librit deri tek zejet. Dhe një kryetar bashkie i kënaqur për këtë ditë.

Gazetar i ABC News, Elbasan: Fatos Salliu

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono