dialogu

THACI-MOGHRIMNI-900x445.jpg
ent ela10:01 | 22/01/2019

Takimi i presidentit të Kosovës, Hashim Thaçi dhe bashkëdrejtuesve të Ekipit negociator të Kosovës në dialogun me Serbinë, Fatmir Limaj dhe Shpend Ahmeti, ditën e hënë, ka qartësuar situatën që ndërlidhet me dialogun në Bruksel, vlerësojnë njohësit e zhvillimeve politike në vend. Por, ata kanë pikëpamje të ndryshme lidhur me këtë situatë dhe pozicionet karshi dialogut.

Presidenti Thaçi ka deklaruar se Ekipit negociator i është dorëzuar një “dokument informues”, i cili përfshinë çështje specifike të diskutuara në kuadër të fazë përfundimtare të dialogut. Në anën tjetër, zyrtarët e Ekipit negociator kanë theksuar se kanë marrë një “raport të presidencës për Delegacionin shtetëror”, që “nuk është dokumentacion, i cili është dakorduar apo është diskutuar me Brukselin”.

Ata gjithashtu kanë theksuar se “presidenti i Kosovës i ka siguruar ata se nuk ka asnjë draft zyrtar të dakorduar qoftë me Brukselin, qoftë me Serbinë, në lidhje me procesin e ardhshëm të dialogut në Bruksel” dhe se “duhet të fillohet nga zero, për të filluar ndërtimin e bashkëbisedimit të temave”.

Politologu Ramush Tahiri, thotë për Radion Evropa e Lirë se rezultati i mirë në këtë situatë është që tashmë ekziston një bashkëpunim institucional ndërmjet presidentit të Kosovës, zyrës së tij dhe Ekipit negociator, i cili ka marrë të gjitha kompetencat për dialogun dhe se e ka përkrahjen dhe ndihmën e presidentit.

“Tash, sintagma që ‘Kosova do të nis nga pika zero’ e ka kuptimin që presidenti amnistohet nga të gjitha akuzat që u janë bërë deri më tash, sepse nuk paska biseduar asgjë dhe nuk paska arritur asnjë marrëveshje me Serbinë, e aq më parë nuk ka arritur asnjë marrëveshje për ndryshim të kufirit ose këmbim territoresh, për të cilat është akuzuar në opinion, por edhe nga partitë politike. Kjo ka shërbyer si nismë për të krijuar një ekip, i cili presidentit ia merr kompetencat dhe tash ky ekip i udhëheqë bisedimet”, theksoi Tahiri.

Ai ka shtuar se kjo situatë mund ta qetësojë atmosferën dhe opinionin në Kosovë dhe krijon parakushtet që me një lloj uniteti dhe besimi të vazhdohet dialogu për arritjen e një marrëveshje me Serbinë.

Por, analisti i çështjeve politike, Artan Muhaxhiri, duke folur për Radion Evropa e Lirë, shpreh mendimin që është pak e besueshme që bisedat në Bruksel të jenë zhvilluar pa një bazë orientuese për Kosovën, Serbinë dhe Bashkimin Evropian. Sipas tij, në rast se bisedimet i janë lënë spontanitetit dhe që të mos përcaktohet se për çka do të bisedohet në të ardhmen, kjo do të ishte situatë absurde. Rrjedhimisht, siç thotë ai, nuk është opsion realist që qasja ndaj fazës së ardhshme të dialogut të fillohet nga zeroja.

Marrëveshje, jo kompromis me Serbinë

“Duket se nuk ekziston një vullnet prej asnjërës palë të përfshirë, as prej palës kosovare, as prej palës serbe e as prej asaj të BE-së, që të publikohen të gjitha pozicionet për të cilat është diskutuar në ato takime. Pra, është një marrëveshje e heshtur në mes tre palëve kryesore që të mos bëhen transparente ato për të cilat është biseduar në Bruksel. Mirëpo, është e pabesueshme që të mos ketë ndonjë marrëveshje tashmë në mes të tre palëve për pikat e rëndësishme, sepse kjo do të nënkuptonte që të gjitha ato biseda janë bërë kot”, tha Muhaxhiri.

Bashkëdrejtuesi i Ekipit negociator, Fatmir Limaj, ka theksuar të hënën se me dokumentacionin që kanë marrë nga presidenti Thaçi dhe me draft ligjin për dialogun të propozuar nga kryeministri Ramush Haradinaj, “po ndërtohet një dosje për të ecur përpara në procesin e dialogut me Serbinë”.

Por, politologu Tahiri, vlerëson që mbetet të shihet nëse ndërtimi i qëndrimit të palës së Kosovës nga Ekipi negociator do të ketë sukses në dialogun me Serbinë.

“A do të ketë sukses Ekipi negociator dhe a do të jetë platforma shumë megalomane apo shumë ekskluzive, që miratohet në Kuvend? Kjo platformë duhet të shihet se a e lë mundësinë për dialog apo ka pozicione shumë të ngurta, që ia pamundëson ndërmjetësuesit, Bashkimit Evropian, por ia pamundëson edhe pjesëmarrjen ekipit të Serbisë, nëse konstatimet nuk mbesin të hapura, por janë të përfunduara”, tha Tahiri.

Ndërkaq, analisti Muhaxhiri thekson që pala e Kosovës duhet të jetë realiste dhe pragmatiste, si dhe të mos kërkoj gjëra për të cilat nuk do ta ketë përkrahjen nga bashkësia ndërkombëtare dhe aleatët e vendit.

‘Mendoj që opsioni më realist është që të punohet që të përfitohet sa më shumë në këtë etapë finale, sepse vetëm kështu mund të përfitohet konkretisht. Ndërsa, nëse Ekipi negociator synon që ta imponojë agjendën e gjithë dialogut, përfshirë edhe ndaj bashkësisë ndërkombëtare, atëherë nuk mendoj se do të ketë sukses”, vlerësoi Muhaxhiri.

Sidoqoftë, udhëheqësit e institucioneve më të larta të Kosovës dhe Ekipi negociator për dialog me Serbinë, kanë theksuar që rezultat i dialogut duhet të jetë njohja e Kosovës nga Serbia. Ata janë zotuar për një proces transparent në dialogun me Serbinë./REL

THACI-DEKLARATAT-1280x671.jpg
ent ela19:00 | 20/01/2019

Në një intervistë për mediat austriake, presidenti i Kosovës, Hashim Thaci ka deklaruar se Prishtina dhe Beogradi kanë shansin më të mirë për të arritur një marrëveshje. Sipas Thaçit, palët duhet të shfrytëzojnë momentin kur edhe Rusia po shprehet e gatshme të njohë një akord të negociuar.

Presidenti i Kosovës, Hashim Thaçi ka përsëritur se një marrëveshje me Serbinë do të sillte më shumë paqe dhe stabilitet në rajon. Në një intervistë për agjencinë austriake të lajmeve “APA”, Thaçi ka nënvizuar se, një marrëveshje do të mundësonte anëtarësimin e Serbisë dhe Kosovës në BE, si dhe aderimin e vetë Kosovës në NATO. Kreu i shtetit kosovar ka nënvizuar se nuk do të ketë kufij monoetnikë, por të dyja shtetet do të jenë multietnike.

Sinkron Thaçi:

Arritja e një marrëveshjeje ligjërisht të detyrueshme nënkupton që nuk do të ketë më kurrë luftë ndërmjet dy shteteve. Qytetarët tanë do të kenë një jetë më të mirë, sepse nga jetësimi i marrëveshjes do të përmirësohet edhe gjendja ekonomike dhe do të krijohen kushte për më shumë vende pune. Ndërsa kufijtë do të hiqen, duke u bazuar në modelin evropian”.

Sipas Thaçit, shansi për të arritur një marrëveshje të tillë kurrë nuk ka qenë më i mirë, sepse të dyja vendet kanë mbështetjen e BE-së dhe Shteteve të Bashkuara.

Sinkron Thaci:

Risia është që edhe Rusia do të jetë në gjendje të pranojë marrëveshjen nëse të dyja palët pajtohen. Prandaj është me rëndësi që të shfrytëzohet ky momentum për të arritur një marrëveshje të balancuar, e cila merr parasysh interesat e dy vendeve”.

Thaçi ka saktësuar se kjo marrëveshje nuk ka të bëjë vetëm me korrigjimin e kufijve, por edhe me aspekte të tjera siç është çështja e të zhdukurve nga lufta.

Sinkron Thaçi:

Nuk do të ketë as “Shqipëri të madhe”, as “Kosovë të madhe”. Në vend të kësaj, ne synojmë integrimin e rajonit në Evropën e bashkuar”.

Gjatë intervistës Thaçi ka folur edhe për ushtrinë e Kosovës, duke e cilësuar krijimin e saj një vendim të drejtë të një shteti sovran, i bazuar në vullnetin e popullit të Kosovës./abcnews.al

KOCIJANCIC-PER-DIALOGUN.mpg_snapshot_00.03-1280x720.jpg
ent ela13:36 | 10/01/2019

Kosova duhet të tërheqë taksën e vendosur ndaj Serbisë dhe palët duhet të vendosin datën për takimin e rradhës mes presidentëve Thaçi dhe Vuçiç. Është ky apeli i radhës i zëdhënëses së Komisionit Europian Maja Kocijançiç.

Maja Kocijançiç zëdhënësja e Komisionit Europian u shpreh se dialogu ndërmjet presidentëve Hashim Thaçi e Aleksandër Vuçiç, nuk mund të rinisë dhe për shumë kohë, dhe takimi i radhës mes tyre duhet të vendoset nga të dyja palët.

Ajo shtoi se dy shtetet duhet të angazhohen që dialogu në nivel të lartë, të vazhdojë në një afat sa më të shpejt kohor. Sipas saj, vazhdimi i bisedimeve mes Prishtinës dhe Beogradit, lidhet në mënyrë të drejtpërdrejtë me perspektivat evropiane të dy shteteve.

Kocijançiç foli dhe për taskën prej 100 për qind të venmdosur nga Prishtina për produktet serbe që hyjnë në vend duke thënë se qëndrimi I Bashkimit Europian nuk ndryshon dhe se taksa e vendosur ndaj Serbisë dhe Bosnjës është në kundërshtim me CEFTA-n dhe MSA-në.

Pavarësisht apeleve të njëpasnjëshme të Bashkimit Europian dhe takimit të fundit të delegacionit kosovar me Mogherinin, kryeministri Haradinaj nuk pranon të tërheqë vendimin për taksën. Ai thekson se taksa do të hiqet kur Serbia të njohë Kosovën si shtet. /abcnews.al

A38B4F90-68F6-49EA-9496-533508CA68F7_w1023_r1_s.jpg
ent ela08:29 | 28/12/2018

Në fazën finale të bisedimeve me Serbinë, Kosova po hyn “më e përforcuar”, marrë parasysh se krahas presidentit Hashim Thaçi, i cili pritet të vazhdojë dialogun me homologun e tij nga Serbia, Aleksandar Vuçiq, tashmë është formuar edhe një Ekip negociues, i përbërë nga Qeveria e Kosovës dhe njëra prej partive opozitare, Partia Social Demokrate.

Diku në mes, po qëndron edhe kryetari i Kuvendit, Kadri Veseli, i cili për dy ditë rresht po i mbledh në një takim të përbashkët të gjithë pjesëmarrësit në këtë proces të negociatave. Aktualisht, jashtë dialogut kanë mbetur dy partitë më të mëdha opozitare, Lidhja Demokratike e Kosovës dhe Lëvizja Vetëvendosje.

Përfaqësuesit e institucioneve të Kosovës, bashkë me kryesuesit e ekipit negociator të dialogut me Serbinë, kanë zhvilluar të enjten një takim edhe me ambasadorët e akredituar në Prishtinë, përkatësisht, Shteteve të Bashkuara të Amerikës, Francës, Gjermanisë, Italisë dhe Mbretërisë së Bashkuar, si dhe përfaqësuesit e BE-së.

Nikoqiri i takimit, Kadri Veseli, u ka kërkuar përfaqësuesve ndërkombëtarë mbështetje në këtë proces.

“Kosova deri tani që nga koha e luftës ka bashkë-udhëtuar me aleatët e saj perëndimor nëpër çdo proces të rëndësishëm. E kaluara na ka treguar që ky bashkë-udhëtim, dhe uniteti i spektrit politik në çështje të mëdha, ka rezultuar gjithnjë me fitore për Kosovën. Andaj, unë sot kam vetëm një mesazh të qartë, ne jemi gati dhe ne jemi bashkë”, ka thënë Veseli.

Ndërkohë, presidenti i Kosovës, Hashim Thaçi, në një konferencë për media ka thënë se Kosova është e gatshme për dialog me Serbinë dhe për arritjen e një marrëveshjeje, gjithëpërfshirëse dhe balancuese.

Sipas presidentit Thaçi, marrëveshja eventuale me Serbinë, do të ishte në interes të paqes. Ai ka shtuar se Ekipi negociator i Kosovës do ta bëjë punën e vet dhe, sipas tij, ky grup do ta këtë përkrahjen e Presidencës.

“Unë do ta përkrah plotësisht punën e ekipit negociator të Kosovës, kur ata kërkojnë ndonjë këshillë/rekomandim ndonjë takim për të biseduar bashkërisht. Unë do të jem gjithmonë në dispozicionin e tyre, qoftë në rrafshin teknik apo politik gjithmonë duke respektuar përgjegjësitë institucionale, kushtetuese dhe ligjore”, ka theksuar Thaçi.

Thaçi ka thënë se delegacioni i Kosovës që do të shkojë në Bruksel për bisedime me Serbinë, e ka legjitimitetin qytetar dhe përgjegjësinë e marrë nga të zgjedhurit e popullit të Kosovës.

“Do të ishte me interes që të ketë përfshirje edhe më të gjerë, gjë që shpresoj që në javët e ardhshme do të ndodhë, në veçanti nga njerëzit që kanë një logjikë dhe filozofi shtet-formuese për Kosovën”, është shprehur Thaçi.

Ndërkohë, kryeministri i Kosovës, Ramush Haradinaj, ka thënë se Kosova ka nevojë për unitet dhe për arritjen e një marrëveshjeje me Serbinë.

Kryeministri Haradinaj ka thënë se është angazhuar që nga fillimi që të ketë dialog përmbajtjesor, transparent dhe në interes të të gjithë qytetarëve të Republikës së Kosovës, duke angazhuar ekipin më të mirë dhe ekspertë të jashtëm që Kosovës t’i prezantojnë ekipin negociator dhe dokumentin bazë, librin me shumë kapituj për një marrëveshje gjithëpërfshirëse, ligjërisht të obligueshme mes Kosovës dhe Serbisë.

“Kosova ka nevojë për unitet dhe unifikim të qëndrimeve të krejt spektrit politik në vend, me qëllim të arritjes së një marrëveshjeje që është në përputhje të plotë me vullnetin politik të popullit të Kosovës, të shprehur më 17 Shkurt 2008, nga Parlamenti i Republikës së Kosovë”, ka thënë kryeministri Haradinaj.

Ambasadorët e Quintit, sipas tij, i kanë dhënë mbështetje këtij delegacioni dhe po ashtu kanë kërkuar unitet dhe përfshirje të të gjithë spektrit politik në fazën finale të bisedimeve ndërmjet Kosovës dhe Serbisë.

Ekipi negociator i Kosovës bashkëkryesohet nga zëvendëskryeministri Fatmir Limaj, dhe kryetari i Partisë Socialdemokrate, Shpend Ahmeti, njëherësh kryetar i Prishtinës.

Limaj ka thënë pas takimit me ambasadorët, se aty është shprehur gatishmëria e Kosovës për dialogun me Serbinë.

“Ambasadorët shprehën përkrahje të plotë dhe natyrisht ata janë miqtë tanë, duan ta shohin Kosovën unike dhe mbështesin idetë tona dhe angazhimin tonë. Inkurajuan që të vazhdojnë përpjekjet tona për t’i angazhuar edhe të tjerët në proces. I dhanë mbështetje të fortë idesë sonë, angazhimeve tona, vetë delegacionit dhe institucioneve të Kosovës. Dhe, si çdo herë edhe tani shprehën gatishmërinë e tyre për të ndihmuar Kosovën”, është shprehur Limaj.

Ekipi negociator për dialogun me Serbinë, rezoluta, projektligji për dialogun po kundërshtohen nga dy partitë më të mëdha opozitare, Lidhja Demokratike e Kosovës dhe Lëvizja Vetëvendosje.

Lëvizja Vetëvendosje thotë se janë kundër procesi të dialogut për faktin se, siç deklaron, janë dëshmitarë të asaj se procesi i dialogut prej vitit 2011 deri në vitin 2017 ka qenë në dëm të Republikës së Kosovës.

Dy partitë opozitare, Lidhja Demokratike dhe Vetëvendosje i kanë shkruar një letër përfaqësueses së Lartë të Bashkimit Evropian për Politikë të Jashtme dhe Siguri, Federica Mogherini, dhe komisionarit për Zgjerim, Johannes Hahn, përmes së cilës theksojnë se Ekipi negociator i Kosovës për bisedimet me Serbinë nuk e ka mbështetjen e shumicës së opozitës në Kosovë. /REL

RAMA-ME-STUDENTET-E-BUJQESORIT-1280x687.jpg
ent ela16:49 | 18/12/2018

Që prej janarit të vitit të ardhshëm qeveria do të paguajë 50% të tarifës së studimit për studentët e bachelorit. Kjo u bë e ditur sot nga kryeministri Edi Rama, gjatë një takimi që ka zgjatur rreth 3 orë me studentë dhe pedagogë të universitetit bujqësor të Tiranës. Në këtë takim nuk munguan as debatet.

Takimi në Universitetin Bujqësor të Tiranës me studentë dhe pedagogë nuk nisi ashtu si e kishte parashikuar kreu i qeverisë, por ilustroi atë që vetë Rama deklaron: “gratë janë më të forta se ne”.

Studentja: Rektori na njoftoi ne që do ketë mbledhje me studentët dhe nuk na tha që ju do vinit në mbledhje zoti kryeministër. Ndaj unë po largohem.

Shpejtë rektori Bahri Musabelliu mori fjalën të nënvizonte se ftesa ishte e tij.

Rektori: Nuk është në këllqet e mia që të mund t’ju jap përgjigje për të gjitha pyetjet se disa prej tyre dalin jashtë juridiksionit që ka univeristeti. Ju thashë që do takohemi sot, por meqë Kryeministri shfaqi dëshirën të vinte me ftesën time.

Në takimin, transmetimi i të cilit ishte monopol i kanalit të tij personal ERTV, Kryeministri fillimisht u mundua të bënte dallimin mes atyre në sallë, me ata në rrugë.

“Sepse keni 14 ditë që bërtisni, por nuk flisni, tani flisni po ju dëgjoj”.

Pastaj u mundua t’i bindë të pranishmit se pranimi në parim i kërkesave nga qeveria është gjysma e mirë e punës së nisur.

“Mund edhe të thoshte që qeveria mos t’i pranonte. Ka qeveri që thonë”.

Dhe në fund, një konsideratë për kërkesat në vetëvete.

“Për mua ato 8 pika janë të rëndësishme vetëm që na sollën këtu, angazhimi i qeverisë është që do plotësohen ato, do adresohen më saktë”.

Ofertën e tij jua përsëriti studentëve, duke nënkuptuar se puna ka nisur.

“Po përgatisim vende pune në administratë për më të mirët. Bordi i administrimit me një student të vendosur nga qeveria. Përqindja e tarifave sipas notave, ekselentët (9-10) bursa; Karta e studentit të jetë e markuar si EU card.Brenda janarit besoj ju do keni bibliotekë online”.

Të gjitha këto kreu i qeverisë kërkon t’i hedhë e zeza mbi të bardhë mbi një copë letër, që kërkon ta quajë “pakti për Universitetin”.

“Ne duhet të dalim dhe do dalim me një dokument që do jetë një pakt për universitetin”.

Por kujt llogarinë ja kërkoi aty për aty, me një fije autoritet.

Erjon Murati: E para që doja të thoja nuk më pëlqeu mënyra si ju adresove vajzës dhe djalit se ne të kemi zgjedhur. Nga këto 5 minuta pyetje dhe 40 e kusur minuta përgjigje ju shkarkuat përgjegjësinë nga institucioni që ju drejtoni drejt univeristetit.

Kryeministri iu kthye me tone më të ashpra.

Rama: E para, eprori nuk je as ti as ajo vajza. Unë kam ardh të flas për përgjegjësi, jo për faje. Nuk e di ku e dëgjove e ke përgatitur fjalimin më parë dhe nuk ke dëgjuar fare, ke prit radhën ta thuash”.

Një premtim, afati i skandencës së të cilit dihet, kryeministri ja dha studentëve.

“Në janar ju do të paguani 50% më pak të tarifës. Kaq di tju them”.

Si garanci, sallës që ia përsëriti mungesën e besimit, i dha vetëm fjalën e tij.

“Deklaratë zyrtare nuk të bëj as ty, as askujt se ne jemi këtu partnerë. Nëse u thotë universiteti nuk e ka bërë qeveria këtë ju do paguani tarifat atëherë bujrum atje”.

Ky u duk si i vetmi rezultat konkret i takimit 3 orë e gjysmë mes kreut të qeverisë dhe studentëve të universitetit të bujqësorit. Në fund kryeministri i referoi studentëve portalin shqipëriaqëduam ku deklaroi se do të hapë një faqe dedikuar dialogut për Universitetin. /abcnews.al

MBULIM-RAMA-ME-STUDENTET-E-GJEOLOGJIKUT.mpg_snapshot_00.04-1280x720.jpg
G. P.10:27 | 18/12/2018

Në ditën e 14 të protestës së studentëve që refuzojnë dialogun me të, kryeministri Edi Rama ka gjetur një tjetër zgjidhje. Ka nisur takimet me disa studentë e pedagogë. I pari i publikuar në ERTV, ishte një bashkëbisedim me studentë e pedagogë në Fakultetit të Gjeologjisë në mjediset e tyre universitare.

Kryeministri u ka përsëritur nevojën që problemet e secilit fakultet të zgjidhen me dialog. Studentë e pedagogë i paraqitën problematikat e fakultetit të tyre. Nga pedagogë në anën e studentëve iu sugjerua Kryeministrit që me një grup ekspertësh t’u paraqiste studentët zgjidhjen e 8 kërkesave të tyre. Por kryeministri përsëriti qëndrimin e njohur, se kjo nuk do ndodhte pasi do shfaqeshin rezerva të tjera.

Një mënyrë zgjidhje sipas shefit të qeverisë është ky komunikim nëpër auditorët universitarë për të diskutuar problematikat e gjetur zgjidhjet. Kryeministri bëri të ditur se vijojë takime të tilla me studentë e pedagogë nëpër Fakultete të ndryshme./abcnews.al

48398744_726195467766692_6977121265081384960_n.jpg
ent ela12:52 | 14/12/2018

Përfaqësuesit e besimeve më të mëdha fetare që ekzistojnë në Shqipëri kanë bërë apel sot për vendosjen sa më parë të dialogut mes studentëve dhe qeverisë, në mënyrë që të gjendet shpejt një zgjidhje për plotësimin e të gjitha kërkesave të paraqitura prej tyre. Në një dalje të posaçme për mediat, ata e kanë vlerësuar të drejtë kauzën e studentëve, ndërsa kanë theksuar se tashmë është koha për dialog.

“Sot është momenti dhe ora që të komunikohet dhe të dialogohet për të folur hapur sy më sy dhe shqip, qeveri dhe studentë për ta përmbyllur vetëm me zgjidhje konkrete. Të gjithë arsenalin apo kërkesat në fjalë të studentëve të zgjidhen, dhe jo vetëm kaq. Ndaj reagimi dialogues i studentëve, i pasuar me zgjidhje konkrete, duke filluar nga këto momente, do të jetë tregues i një komunikimi dhe konsolidimi të një shoqërie, për rastin tonë të kolonës vertebrale të një kombi, që është rinia studentore, të konsolidimit të një komunikimi dhe të një shoqërie të emancipuar, me principe, dhe natyra e asaj ku dëshirojnë të përfshihemi, në familjen evropiane”, tha Myftiu i Tiranës, Ylli Gurra në emër të Komunitetit Mysliman Shqiptar.

Edhe kreu i Vëllazëria Ungjillore të Shqipërisë, Pastor Ylli Doçi, bëri sërish thirrje për maturi, ndërsa vuri theksin se tani është koha të dialogohet, pasi çështja ka marrë përmasa kombëtare pasi ka të bëj me të ardhmen e një brezi të ri dhe arsimit në Shqipëri. Ai theksoi se qeveria mund të organizojë tryeza bashkëdiskutimi me aktorët e rëndësishëm të jetës arsimore dhe shoqërore në vend, për t’i trajtuar problemet e ngritura në mënyrën e duhur dhe për ti dhënë një zgjidhje afatgjate.

“Ne si përfaqësues të klerit shqiptar, përfaqësues të besimeve të ndryshme jemi plotësisht dakord për këtë nevojë të një dialogu të shëndetshëm për një zhvillim të mirëfilltë që mos jemi gjithmonë ne kriza të tilla. Herë pas here del një protestë sepse kemi probleme të thella. Duhen zgjidhje afatgjata bazuar mbi këto kërkesa legjitime të studentëve”, tha Pastor Ylli Doçi. /abcnews.al

akkkkk.jpg
ent ela08:52 | 05/12/2018

Angelina Eichhorst, Drejtoreshë për Evropën Perëndimore dhe Ballkanin Perëndimor në Shërbimin Evropian për Veprim të Jashtëm ka deklaruar se dialogu midis Beogradit dhe Prishtinës “nuk është ndalur kurrë”, njofton Klan Kosova.

Ajo ka theksuar se nuk është pesimiste për situatën aktuale në negociatat mbi një marrëveshje ligjërisht detyruese.

Zyrtarja e BE-së gjatë një debati mbi zgjerimin e BE-së në Ballkanin Perëndimor, organizuar nga Qendra për Politikë Evropiane në Bruksel, tha se roli kryesor i BE-së ishte t`i “sjellë Prishtinën dhe Beogradin në tavolinë”./klankosova.tv/.

IDRO-ANALISTET-SERBI-1280x720.jpg
ent ela21:17 | 27/11/2018

Teksa situata mes Kosovës dhe Serbisë vijon të tensionohet për shkak të taksës së vendosur nga qeveria e Prishtinës, analistët në Beograd u bëjnë thirrje palëve që t’i rikthehen dialogut, ndryshe rrezikojnë të shkojnë drejt konfliktit.

Serbia e ka pritur në heshtje dorëheqjen e krerëve të komunave serbe në veri. Beteja e saj kundër taksës së Kosovës shihet ende në fushën diplomatike, por një pjesë thonë se megjithatë në veri të Kosovës pushtetin e përbën vetëm shtabi i krizave. Analistët thonë se është gabim të mendohet se serbët mund të rrinë duarlidhur e pa reaguar kundër veprimeve të Kosovës. Dejan Miletiç, drejtor i Qendrës për Globalizim, thotë se pa dialog do të zgjerohet vetëm keqkuptimi dhe kjo mund të ketë efekte negative.

Dejan Miletic, Qendra për Globalizim, Beograd: “Është momenti i fundit kur mund të reagojmë dhe ta ndalojmë përshkallëzimin e mëtejshëm. Palët duhet t’i kthehen dialogut dhe mundësive për kompromis dhe jo të bëjnë garë kush i jep goditjen më të fortë njëra-tjetrës, pasi kjo është rruga drejt një konflikti të armatosur”.

Protestat, dorëheqja dhe vazhdimi i tyre në veri mund të sjellin deri tek barrikadat dhe problemet tjera. Dialogu i Brukselit ka pësuar vdekje klinike. Nëse si deri më tani, konsiderojnë analistët, duhet folur për statusin.

Marko Savkoviç, Qendra për Politika të Veçanta, Beograd: “Gjëja më e rëndë do të ishte të hiqej dorë nga dialogu. Por ndërsa nga njëra anë flitet për normalizim, në anën tjetër njëra palë lufton për njohje dhe pala tjetër për të kundërtën. Jemi në një situatë skizofrenie. Vështirë të ketë normalizim kur njëra palë lufton për pavarësi tjetra me legjitimitet kundër”.

Serbia është gëzuar nga fakti që Egjipti mund të jetë vendi i radhës që do të tërheqë njohjen e pavarësisë së Kosovës. Lobimi i saj duket se nuk do të ndalet bashkë me premtimet për ndihma për serbët e Kosovës. /abcnews.al

REAGIME-BEOGRAD-PER-TAKSEN-1280x720.jpg
ent ela19:45 | 21/11/2018

Beogradi zyrtar e quan të pakonceptueshem nivelin e taksës së vendosur nga Kosova për mallrat serbe. Presidenti Vuçiç e cilësoi një vendim të shekullit të 17 dhe tha se në këto kushte dialogu në Bruksel nuk mund të vazhdojë.

Serbia e quan hakmarrje dhe jo arsye ekonomike vendimin e qeverisë së Kosovës, një vendim që nuk do të merrej as në rrethana lufte. Kështu kanë vlerësuar disa prej mediave serbe.

Prersidenti serb, Aleksandër Vuçiç, ka qenë duke promovuar fillimin e punës në një fabrikë kur ka dëgjuar mundësinë e rritjes së taksës fillestare prej 10 për qind. Dialogu nuk mund të vazhdojë as në Bruksel në këto rrethana.

Aleksandër Vuçiç, president i Serbisë: “Po të më thoshte dikush se kjo do të ndodh unë do ti thosha nuk ka mundësi pasi kjo nuk ka të bëj as me shekullin e shkuar, por është vendim i shekullit të 17-të dhe nuk është e mundur. Ne duhet të jemi të gatshëm për këtë”.

Si për ironi shkëmbimi tregtar mes Kosovës dhe Serbisë po shënonte rritje prej 9 për qind këtë vit. Serbia në Kosovë ka eksportuar 440 milionë euro mallra deri në fund të shtatorit. Kosova vetëm 21 milionë.

Ministri i dikasterit e quan vendimin si hakmarrje për politikën dhe rastin e Interpolit.

Rasim Lajiç, ministër i tregtisë, turizmit dhe telekomunikacionit, Serbi: “Kjo nënkupton ndalim të plotë të mallrave serbe pasi askush nuk mund ta ndaloj dhe kështu duhet ta quajm. Është kundër tregtisë së lirë dhe kërkojmë reagim ndërkombëtar”.

Serbia ende nuk ka paralajmëruar masa kundër prodhimeve të Kosovës. Por, presidenti serb ka ftuar disa ambasador të BE-së, Kinës e Rusisë në takime dhe do të ketë takim të Këshillit për Siguri. Shtypi serb e vlerëson këtë si aktin më të rëndë që prej shpalljes së pavarësisë së Kosovës. /abcnews.al

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono