detyre

ct-trump-attorney-general-william-barr-2019022-001.jpg
ent ela22:50 | 20/02/2019

Hetuesi special Robert Myller pritet të dorëzojë javën e ardhshme raportin mbi hetimin dy vjecar për ndërhyrjen ruse në zgjedhjet amerikane. Pikëpyetja mbetet nëse raporti konfidencial do ndahet me Kongresin apo do qëndrojë në Departamentin e Drejtësisë për veprimet e tjera.

Prokurori i përgjithshëm Bill Barr do njoftojë javën e ardhshme përmbylljen e raportit hetimor të hetuesit special Robert Myller, mbi ndërhyrjen ruse në zgjedhjet amerikane. Prokurori më pas duhet të vendosë, nëse do ia kalojë kongresit, shkruajnë mediat amerikane. E paqartë se sa kohë do t’i duhet zyrtarëve të departamentit të drejtësisë për të përgatitur atë, që do i dorëzohet ligjvënësve amerikanë.

Por meqenëse presidenti Donald Trump do udhëtojë së shpejti jashtë vendit për një takim me liderin e Koresë së veriut, Kim Jong Un, zyrtarët e departamentit të drejtësisë mund të tregohen të kujdesshëm, në mënyrë që koha e daljes së raportit të mos ndërhyjë në këtë sipërmarrje diplomatike të Shtëpisë së Bardhë. Nga ana e tij prokurori Barr ka thënë, se ai dëshiron të jetë sa më transparent me Kongresin e Publikun dhe konseguent me ligjin.

Prokurori Special Myler duhet t’ia dorëzojë raportin konfidencaial prokurorit të përgjithshëm në përfundim të punës së tij, por në rregullat e punës, nuk parashikohet që dokumenti të ndahet me Kongresin apo me publikun. Dhe siç vetë Barr e ka bërë të qartë, Departamenti i Drejtësisë është i kujdesshëm në nxjerrjen në publik të informacioneve implikuese për individë ndaj të cilëve, nuk janë ngritur akuza ligjore. Për pasojë, një nga dilemat me të cilën prokurori Barr do ndeshet do jetë se në c’masë do i ndajë me kongresin gjetjet e raportit të Myller. Ky i fundit duket të shpjegojë në raportin e tij të gjitha vendimet që duhen ndjekur ose jo penalisht. Gjithsesi prokurori Barr duhet të informojë Kongresin nëse Departamenti i Drejtësisë e pengoi ekipin e posaçëm që të kryente hetime.

Presidenti Trump deklaroi të mërkurën se I takon vetëm prokurosit Barr nëse raporti i Myller do dalë jashtë departamentit të drejtësisë, ndërsa vetë Trump javën e ardhshme do jetë në Vietnam. “Kjo do varet krejtësisht nga prokurori I ri. Ai është një njeri i jashtëzakonshëm, një person i jazhtëzakonshëm që e respektoj këtë vend dhe respekton Departamentin e Drejtësisë. Pra vendimi I takon vetëm atij, u tha Trump gazetarëve në Shtëpinë e Bardhë./abcnews.al

cakaj-1280x670.jpg
ent ela16:03 | 20/02/2019

Ministri në Detyrë për Evropën dhe Punët e Jashtme Gent Cakaj ka nisur vizitën e tij zyrtare në Bruksel, gjatë të cilës do të zhvillohen disa takime me përfaqësues të lartë të institucioneve evropiane. Takimet e para Ministri në Detyrë i zhvilloi në Parlamentin Evropian, duke nisur me Raporterin për Shqipërinë pranë Parlamentit Evropian, Knut Fleckenstein. Gjatë këtij takimi një vëmendje e veçantë iu kushtua edhe situatës së fundit të krijuar në Shqipëri. Në takim u nënvizua rëndësia e ruajtjes së maturisë politike, sjelljes paqësore dhe demokratike si parakusht për arritjen e objektivit kombëtar të hapjes së negociatave për anëtarësim gjatë këtij viti./abcnews.al

etilda-gjonaj-1280x714.jpg
G. P.13:37 | 20/02/2019

Ministrja e Drejtësisë Etilda Gjonaj ka vendosur të pezullojë nga detyra drejtorin e burgut të Drenovës e të kërkojë nisjen e procedimit disiplinor për gjyqtarin që ka liruar të dënuarin me burg përjetë, Gert Gjinarari. Sipas Gjonajt, lirimi me kusht është kryer në kundërshtim me Kodin Penal.

Pezullohet nga detyra drejtori i Burgut të Drenovës dhe dy punonjës të tjerë për lirimin e të dënuarit me burgim të përjetshëm Gert Gjinarari. Pas një hetimi paraprak Ministria e Drejtësisë ka konstatuar se lirimi me kusht i Gjinararit, njohur si “Gjenerali” është në shkelje me ligjin.

Ministria e drejtësië i është drejtuar Këshillit të Lartë Gjyqësor dhe inspektoratit për të kërkuar nisjen e procedimit disiplinor për gjyqtarin dhe pret një përgjigje të shpejtë.

Në fokusin e task forcës antikorrupsion këtë javë ishte edhe porti më i madh i vendit ai i Durrësit, me objekt respektimin e kërkesave ligjore. Gjatë kontrollit u evidentuan shkelje për mosbatim urdhërash të brendshëm. Shkelje janë evidentuar edhe në rekrutimin e personelit në këtë institucion. Task Forcë evidentoi 25 masa disiplinore. Masë disiplinore, edhe për drejtorin e Portit Durrës./abcnews.al

ardi-veliu.jpg
G. P.17:13 | 16/02/2019

Pas përfundimit të protestës së opozitës, drejtori i Policisë së Shtetit, Ardi Veliu, ka mbërritur në sheshin para kryeministrisë, për të përshëndetur efektivët e policisë të angazhuar për mbarëvajtjen e saj.

Ai i ka përgëzuar, ndërsa interesimit të gazetarëve iu përgjigj vetëm me fjalinë “Policia e shtetit ka bërë vetëm detyrën”. Pesë efektivë mbetën të lënduar nga protesta e së shtunës. Gjithashtu lëndime kanë pësuar edhe dy përfaqësues të mediave si dhe disa protestues./abcnews.al

mjeket-1.jpg
G. P.12:39 | 07/02/2019

Gjykata e Fierit ka pezulluar nga detyra dy mjekë të spitalit te Fierit dhe për një tjetër vendosi masën e sigurisë “detyrim paraqitje”. Këta 3 mjekë janë nën hetim pasi dyshohen për mjekim të pakujdesshëm ndaj një pacienti që ndërroi jetë në spital.

U vdiq pacienti në duar dhe tani po përballen me pasojat. Tre mjekë të spitalit e Fierit po hetohen për mjekim të pakujdesshëm dhe fallsifikim dokumentesh. Gjykata e Fierit vendosi pezullimin nga puna për Blendi Dhespollarin dhe Emiljano Myrtaj, ndërsa për kolegun e tyre Viktor Gjini është caktuar masa e detyrimit të paraqitjes pranë organeve të hetimit.

Ngjarja ndodhi dhjetorin e kaluar në reanimacionjn e spitalit të Fierit ku një 43 vjecar kishte mbërritur  në gjëndje të rëndë shëndetësore.

Pacientit i është dashur të presë deri në mëngjes për diagnostikim nga kardiologu, por kur ky i fundit mbërriti në spital ishte tepër vonë për 43-vjeçarin. Familjarët e Besnik Ramës akuzojnë mjekët se e lanë 43-vjeçarin të vdiste pa i dhënë ndihmën mjekësore.

Sipas avokatit të familjes Rama, mjekët jo vetëm që nuk i dhanë ndihmën në kohën e duhur pacientit, por shkuan deri aty sa të korrigjojnë dokumentacionin duke shkruar se kardiologu kishte mbërritur në punë në orën 5 të mëngjesit, ndërkohë që në të vertetë ishte ora 6:00. 43-vjeçari u dërgua në spital me probleme të frymëmarrjes. Ai vdiq disa orë pas mbërritjes në spital./abcnews.al

bbbb-1280x722.jpg
ent ela22:54 | 19/01/2019

“Partia Demokratike sot përballet me një detyrë kritike, ngarkuar nga situata e krijuar në vend që po shkatërron jo vetëm të tashmen por edhe të ardhmen e këtij vendi”.

Deklarata erdhi nga kreu i kësaj force politike Lulzim Basha, gjatë mbledhjes së Këshillit Kombëtar të kësaj force politike.

“Si rrallë ndonjëherë në këto tre dekada, një partie politike nuk i kërkohet thjesht të jetë një zgjidhje, një alternativë elektorale, nuk i kërkohet thjesht që të ndalë një të keqe… Nga ne sot kërkohet një ndryshim transformues, edhe më i vështirë se ai në fillim të viteve 1990-të. Atëhere kishte energji, kishte shpresë, politika shihej si një e mirë që do e çonte vendin përpara. Sot Shqiptarët e shohin politikën si të keqen më të madhe dhe shkataren kryesore të problemeve tyre. Sot shqiptarët kanë humbur besimin tek vetja dhe tek e adhmja…Në këtë sfond, në këtë realitet ne duhet jo vetëm të luftojmë luftën për ndryshim, por mbi të gjitha betejën për besim, sepse pa besim nuk mund të arrijmë asgjë!”

Jo mrekulli, por normalitet ofron Partia Demokratike përkundër politikës hajdute, gjënjështare dhe arrogante, thekson Basha, normalitet i cili në Shqipëri apriori ngrë katër nevoja urgjente sipas tij.

“Për ndarjen e politikës nga krimi përmes vettingut të politikanëve. Për t’ua marrë Shqipërinë oligarkëve dhe për t’ia kthyer atë qytetarëve përmes platformës sonë antimafia, për dekriminalizimin e zgjedhjeve. Për një Shqipëri të taksave të ulëta, që financon, subvencionon dhe ndihmon gjithçka që rrit prodhimin, rrit punësimin dhe u jep shanse për punësim të gjithë shqiptarëve e në veçanti rinisë shqiptare. Integrimin e shqiperisë në BE”.

Pyetjes se si dhe kur do e rrëzojë qeverinë e Edi Ramës, Lulzim Basha i jep një përgjigje.

“Sa më shumë shqiptarët të bashkohen rreth nesh, aq më shpejtë do bjerë Edi Rama. Ndaj zgjidhjen kryesore të problemit Rama nuk e gjejmë dot as në rrugë, dhe as në institucione, por tek mendjet dhe zemrat e njerëzve…”.

Janë ata të cilët kreu i demokratëve Lulzim Basha kërkon t’i prijë në revoltë popullore, vendimmarrja nga Këshilli për të cilën ishte ngarkimi i strukturave drejtuese me organizimin e protestave me qëllim krijimin e një qeverie kalimtare dhe përgatitjen e zgjedhjeve të lira e të ndershme si zgjidhje politike e krizës ne vend.

Do të jetë kryesia  e re dhe grupi parlamentar ata të cilët do të marrin vendimet specifike sa i përket datës së nisjes së protestave apo pjesmarrjes së demokratëve në punimet e Kuvendit./abcnews.al

osmanii.jpg
G. P.12:38 | 02/08/2018

Komisioni i Pavarur i Kualifikimit ka konfirmuar në detyrë Gentian Osmanin, prokuror në Prokurorinë e Krimeve të Rënda. Në seancën dëgjimore në KPK, edhe ILDKPKI-ja kishte raportuar se Osmani kishte kryer deklarim të rregullt periodik dhe se nuk kishte fshehje të pasurisë.

“Trupa gjykuese vendosi konfrimimin në detyrë të subjektit të rivlerësimit Gentian Osmani”.

Ky ishte vendimi i Komisionit të Pavarur të Kualifikimit për prokurorin e Krimeve të Rënda, Gentian Osmani. Sipas raporteve të KPK-së, Osmani nuk kishte probleme me pasurinë, duke u konfirmuar edhe nga DSIK për pastërtinë e figurës dhe përshtatshmërinë për të qënë prokuror. Osmani është kandidat në Këshillin e Lartë të Prokurorisë, ndërsa pas vendimit, prokurori deklaroi se do të vijojë të hetojë çështje sensitive.

“Do vazhdoj që të hetoj çështje sensitive deri në momentin që do shpallet gara për Këshillin e Lartë të Prokurorisë dhe do jepen rezultatet. Mësimi që morëm nga ky proces është të jemi tmerrësisht të kujdesshëm dhe mo të tolerojmë asgjë në profesionin tonë”, tha Gentian Osmani.

E vetmja pikëpyetje që u ngrit nga Komisioni i Pavarur i Kualifikimit lidhur me pasurinë e tij, ishte shlyerja e një huaje marrë kunatit të tij, për të cilën komisioni ngriti dyshime. Por magjistrati dha shpjegime të vlefshme, duke kaluar fazën e Vettingut.

Ndërkohë për dy shtyllat e tjera, si figura morale e aftësitë profesionale komisioni nuk gjeti shkelje. Osmani ka qenë një prej tre emrave kryesorë bashkë me Besim Hardarmatajn dhe Elisabeta Imerajn, të cilët kërkuan arrestimin e ish-ministrit Saimir Tahiri në Tetor të 2017. /abcnews.al

kpk123.jpg
G. P.09:27 | 01/08/2018

4 anëtarë të sistemit të drejtësisë, përkatësisht 3 gjyqtarë dhe një prokuror kaluan me sukses sitën e Vettingut, duke marrë konfirmimin për qëndrimin në detyrë.

Tre gjyqtarë dhe një prokuror u konfirmuan në detyrë të mërkurën nga Komisioni i Pavarur i Kualifikimit.

E vetmja grua që kaloi para trupës gjykuese ishte gjyqtarja Brunilda Kadi, e cila mori konfirmimin për të vijuar detyrën. Gjatë seancës së vlerësimit në KPK kishte rezultuar se gjyqtarja kishte bërë deklarim të saktë e kishte burime financiare të ligjshme.

Gjyqtarja ka deklaruar një apartament 124 m2 të marrë me kredi, në Lanabregas me bashkëshortin; dhe dy automjete. Në relatimin gjatë seancës dëgjimore, u deklarua se gjyqtarja Kadi, njëkohësisht anëtare e KLD është e përshtatshme për të vijuar detyrën.

Më herët, trupa e KPK konfirmoi në detyrë Dritan Hallunajn, gjyqtar në Gjykatën e Shkallës së Parë për Krimet e Rënda. Gjyqtari Hallunaj rezultoi se kishte bërë deklarim të saktë e nuk kishte fshehje pasurie e se ka në pronësi një apartament 165 m2 të blerë me kredi për vlerën e 49 mije eurove në 2005.

Sipas DSIK, gjyqtari nuk ka pasur kontakte të papërshtatshme e KPK i vlerësoi të mjaftueshme aftësitë e tij profesionale. Vendimin e komentoi për median dhe vetë gjyqtari i Krimeve të Rënda…

Komisioni i Pavarur i Kualifikimit zhvilloi dhe dy seanca të tjera, ku dha verdiktin për të rikonfirmuar në detyrë të prokurorit të Krimeve të Rënda, Besnik Muçi, si edhe gjyqtari në Gjykatën Administrative të Tiranës, Gentian Medja./abcnews.al

enkelejd-alibeaj-1.jpg
G. P.12:19 | 25/07/2018

Partia Demokratike ka vijuar denoncimin e rasteve të filtruar nga komisioni i Vettingut, që sipas tyre bëhen me dy standarde. Rasti i radhës ishte ai i gjyqtarit të Lartë, Ardian Dvorani, i cili për demokratët, sipas vetë vendimeve të mëparshme të KPK duhet të ishte shkarkuar.

Vendimi i Komisionit të Pavarur të Kualifikimit për konfirmimin e gjyqtarit të gjykatës së Lartë Ardian Dvorani nxorri në deklaratë zv/kryetarin e grupit parlamentar demokrat Enkelejd Alibeaj. Vendimin e paralajmëruar nga forca politike ku bën pjesë e konsideron produkt të standartit të dyfishtë të këtij procesi, që sipas tij ka lënë shumë pikpyetje.

“Ajo çfarë mbetet e pasqaruar nga procedura e verifikimit të vettingut të Ardian Dvoranit është, nëse miku i familjes së Fatmir Xhafajt, ka patur ndonjë kontakt me Agron Xhafajn dhe a i ka shërbyer ndonjëherë vëllait të Ministrit të Brendshëm dhe bandës së tij të trafikut ndërkombëtar të drogës”, deklaroi Alibeaj.

Njëkohësisht Dvorani është i vetmi gjyqtar në Republikën e Shqipërisë, theksoi ish-ministri i Drejtësisë Alibeaj, i cili nuk ka zbatuar vendimin e Gjykatës Kushtetuese të 2016-ës, që vendosi se mandati i tij si gjyqtar i Gjykatës së Lartë kishte përfunduar prej 2 vitesh dhe se qëndrimi i Dvoranit në detyrë, deri më sot, është antikushtetues./abcnews.al

kpk-5.jpg
G. P.09:36 | 25/07/2018

Komisioni i Pavarur i Kualifikimit shkarkoi nga detyra prokuroren e pezulluar të Prokurorisë së Përgjithshme, Rovena Gashi. Prokurorja që refuzoi seancën dëgjimore, nuk u paraqit as në shpalljen e vendimit. Ndërkohë KPK konfirmoi në detyrë gjyqtarin e Gjykatës së Lartë, Ardian Dvorani dhe gjyqtarin e Tiranës, Astrit Faqolli.

Në një hark kohor prej 90 minutash Komisioni i Pavarur i Kualifikimit shpalli tre vendime përfundimtare për anëtarë të sistemit që kaluan në filtrat e Vettingut.

Prokurorja e Prokurorisë së Përgjithshme, Rovena Gashi, mori një karton të kuq nga KPK. Anëtarja e Prokurorisë së Përgjithshme, aktualisht e pezulluar nga detyra me urdhër të kryeprokurores së Arta Marku, nuk ishte prezente në sallën e gjyqit.

Ajo refuzoi të paraqitej edhe në seancën dëgjimore të zhvilluar javën e kaluar, ku përmes një deklarate publika pretendoi se vendimi i KPK-ndaj saj ishte i paracaktuar. Në gjetjet e relatuara në atë seancë Komisioni, Gashi rezultonte problematike me justifikimin e pasurisë së saj.

Në një seancë të mëvonshme, një tjetër treshe gjykuese konfirmoi në sistem gjyqtarin e Gjykatës së Lartë, Ardian Dvorani.

“Mëkati” i vetëm i Dvoranit, i relatuar në sencën dëgjimore, ishte mosdeklarimi i llogarive bankare personale dhe të familjarëve në deklaratën e vitit 2017 për llogari të KPK, të cilat ishin deklaruar në vitet e kaluara. Vetë gjyqtari sqaroi se bëhej fjalë vetëm për një gabim gjatë depozitimit fizik të saj, ku mungonin 4 faqe.

Gjyqtari i cili qëndron në detyrë pavarësisht përfundimit të mandatit 9-vjeçar prej vitit 2014, në dalje përshëndeti vendimin e Shkallës së Parë të Vettingut dhe dha nje mesazh per koleget.

Të mërkurën, KPK konfirmoi në detyrë edhe kolegun e tij në Gjykatën e Tiranës, Astrit Faqolli. Ai u konsiderua i përshtatshëm për vijimin e detyrës. /abcnews.al

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono