denim

besnik-habibaj.jpg
Sej rie09:14 | 22/05/2019

Gjykata e Apelit të Ankonas ka vendosur 14 vjet burg për një 57-vjeçar shqiptar, i cili tentoi të vriste gruan e tij. Në këtë mënyrë, apeli la në fuqi vendimin e marrë nga gjykata e Macerata-s për Besnik Habibajn.

Shqiptari me anë të një avokati kishte animuar vendimin, ku akuzohej për tentativë vrasjeje ndaj ish-bashkëshortes, Trendelina Halimi, 43-vjeçe. Gjithashtu shkalla e dytë vendosi që të kompensojë gruan me 250 mijë euro dhe dy fëmijët e çiftit me nga 50 mijë euro secili.

Sipas akuzës, Habibaj kishte vepruar për shkak të xhelozisë, sepse nuk pranonte fundin e marrëdhënies me ish-gruan. Disa ditë para aktit të rëndë, ajo e kishte denoncuar 57-vjeçarin për dhunë në familje. Për këtë arsye, gjykata e Macerata-s kishte vendosur edhe një urdhër ndaj Habibajt për të mos iu afruar asaj.

Mirëpo ky urdhër u shkel natën e 27 Tetorit të 2017-s. Sipas hetimeve, Habibaj i kishte dalë 43-vjeçares në një diskotekë. Fillimisht, ai e përplasi me makinë. Ndërkohë më vonë doli dhe e masakroi me çekiç në fytyrë.

Falë ndërhyrjes së kalimtarëve dhe policisë, shqiptarja arriti të shpëtojë nga dhuna e tmerrshme e ushtruar ndaj saj. Më vonë u shtrua në spital për shkak të dëmtimeve të rënda që kishte marrë, sidomos në pjesën e fytyrës./abcnews.al

grabitja-e-tetorit-2018-1280x709.jpg
G. P.22:51 | 08/05/2019

Një shqiptar që jetonte në New York ka pranuar para gjykatës se ai dhe një bashkëpunëtor tjetër shqiptar janë fajtorë të një vjedhjeve të kryer në një dyqan në Breckock Township. Ngjarja ka ndodhur në Nëntor të vitit 2014.

Ndërkohë mediat amerikane shkruajnë se Epirot Krasniqi, u vu në shënjestër të policisë vetëm në verën e vitit 2018. Shkak u bënë gjurmët e gishtërinjve në një pale dorezash duarsh që grabitësit kishin harruar në momentin e vjedhjes.

28-vjeçari pranoi fajin të hënën përpara gjykatësit Thomas G. Parisi dhe u dënua me 23 muaj burg. Ai do ta vuajë dënimin në burgun Berks County. Sipas një marrëveshjeje të bërë për shkak se u pendua, pas dënimit shqiptari do të kalojë pesë vjet në shërbim prove.

Prokurori i çështjes së Krasniqit, tha se ai sëbashku me një shqiptar tjetër morën 5.000 dollarë nga dyqani. Bashkëpunëtori i Krasniqit është Liridon Gashi, 33 vjeç. Ai akuzohet nga autoritet amerikane për një serë krimesh që kanë të bëjnë me vjedhje. 33-vjeçari është vënë gjithashtu në pranga dhe pritet të dalë para të njëjtit gjykatës në Korrik.

Por si ndodhi grabitja në Nëntor të 2014-s?

Vjedhja u zbulua kur menaxheri hapi dyqanin rreth orës 4 të mëngjesit. Ai gjeti produkte të ndryshme të shpërndara nëpër dysheme dhe dy kasafortat poshtë banakut të hapura.

Gjithashtu dy të rinjtë kishin dëmtuar edhe bankomatin në dyqan. Ata ishin siguruar që të shkëpusnin panelin e kontrollit në mënyrë që të mos binte alarmi. Megjithatë shqiptarët nuk arritën të futeshin dhe të merrnin para nga bankomati pasi siguresa nuk ishte prekur.

Mirëpo, 28-vjeçari dhe 33-vjeçari bënë gabimin në ikje. Ata harruan një palë doreza dhe një levë hekuri, që dyshohet se është përdorur për të hapur dyert. Kaq mjaftoi dhe autoritetet i dërguan dorezat në një laborator. Në Janar të 2018-s autoritetet lokale morën një njoftim se gjurmët e gishtërinjve i përkisnin Krasniqit.

Mirëpo dy të rinjtë shqiptar nuk e kishin mbyllur këtu serinë e vjedhjeve. Krasniqi kishte qenë në arrest federal në Nëntor të 2017-s. Shkak ishte një grabitje që kishte bërë sëbashku me Gashin në Providence në Tetor të atij viti.

Ata akuzoheshin se kishin vjedhur një supermarket Target. Aty kishin marrë 14.000 dollarë nga një bankomat. Përveç kësaj ata kishin çarë një mur dhe morën disa substanca në një farmaci.

Për ngjarjen, autoritetet reaguan menjëherë dhe i gjetën shqiptarët të fshehur në tubat e ajrimit. Aty kishin futur edhe mjetet që kishin përdorur gjatë grabitjes, mes të cilave edhe dy radiomarrëse./abcnews.al

chelsea.jpg
Sej rie20:35 | 08/05/2019

Fifa hedh poshtë kërkesën e Chelsea-t për reduktimin e dënimit të transferimeve. Klubi londinez është dënuar me dy sesione merkatoje 2019-2020.

FIFA nuk toleron dhe rrëzon sërish skuadrën angleze të Chelsea-t në lidhje me merkaton dhe lojtarët që mund të afrojë. Vetëm pak muaj më parë klubi londinez ishte dënuar dy sesione merkatoje (verë 2019 dhe Janar 2020) që të mos bëjë asnjë blerje, ndërsa shitjet lejohen, për nënshkrimet e padeklaruara me lojtarë ndërkombëtarë tek ekipet e moshave.

Një vendim i tillë u apelua menjëherë në Komitetin e Ankesave në FIFA, por që apeli ka lënë në fuqi vendimin e kolegëve të një shkalle më poshtë. Masa disiplinore për Chelsea-n nuk do të ndryshojë: Asnjë nënshkrim me lojtarë meshkuj të ekipeve zinxhir deri tek U16, me përjashtim skuadrën e femrave dhe atë të futbollit të sallave.

Ajo që ka ndryshuar është vetëm, fakti që Chelsea mund të firmosë me lojtarë nën 16 vjeç nga Britania e Madhe. Që do të thotë talentet e rinj mund të afrohet tek skuadrat e akademisë, për të afruar një lojtar në skuadrën e parë duhet të dalë ndonjë super talent nën këtë moshë.

Chelsea nuk ka pritur ndonjë kthesë në këtë vendim të sotëm, duke qenë se shpresa e tyre e vetme është tek Gjykata e Arbitrazhit në Lozanë (CAS). Vetëm aty klubi londinez beson tek zvarritje e çështjes të paktën deri në shtator, në këtë mënyrë ata do të kenë mundësi të bëjnë blerjet e nevojshme në merkaton e verës dhe të jenë të përgatitur për të mos afruar lojtarë për dy sesionet e ardhshme të merkatos./ABC News Albania 24/7

assange-1-1280x853.jpg
G. P.14:08 | 01/05/2019

Është dënuar me 50 javë burg nga Gjykata e Londrës, bashkëthemeluesi i Uikiliks Julian Assange. Ai shpall fajtor për shkelje të lirisë me kusht pasi gjykata ekuadoriane në Britaninë e Madhe i hoqi të drejtën e azilit.

Julian Assange u ka treguar prangat në duar fotografëve të mbledhur para Gjykatës së Londrës. Bashkëthemeluesi I Uikiliks u dënua me 50 javë burg, pasi u shpall fajtor për shkelje të lirisë me kusht.

47-vjecari kreu këtë shkelje ligjore në momentin që ambasada e Ekuadorit në Britaninë e Madhe tërhoqi të drejtën e azilit, duke lejuar policinë britanike që ta arrestonte. Ai u strehua në ambasadën në Londër në vitin 2012 për të shmangur ekstradimin në Suedi ku akuzohet për ngacmim seksual, akuza që ai i mohon.

Në një letër drejtuar gjykatës Assange shprehej se po përballej me rrethana të vështira. Ai u kërkoi falje atyre që mund të mos i kishte treguar respekt, duke shtuar se në atë kohë, ai ka bërë atë që e ka menduar si më të mirë dhe të vetmen që mund të bënte.

Teksa po shoqërohej në qeli, ai përshëndeti njerëzit që ishin mbledhur për ta mbështetur.

Britania e Madhe do të vendosë nëse do të ekstradojë ose jo Assange në Shtetet e Bashkuara të Amerikës, ku ai do të përballet me akuzën e rrezikimit të sigurisë kombëtare amerikane. Kjo pas publikimit në Uikiliks të dokumenteve sekrete ushtarake që i ishin dhënë nga ish-anëtari shërbimit amerikan të inteligjencës Çelsi Mening.

Aktualisht më shumë se 70 deputetë britanikë i kanë dërguar një letër sekretarisë së shtetit, me anë të së cilës kërkohet ekstradimi i Assange nëse autoritetet suedeze do e kërkojnë një gjë të tillë./abcnews.al

drazhi-k..png
G. P.10:38 | 17/04/2019

Një gjykatë apeli në Britani i rriti dënimin një korrieri droge shqiptar, i cili u kap pasi kishte fshehur kokainën në vesh.

Klevis Drazhi, 20 vjeç, u ndalua në Moorgate më 19 Janar. Kur u pyet për lejen e drejtimit dhe sigurimet, mediat shkruajnë se Drazhi dorëzoi një leje drejtimi shqiptare false dhe një celular.

Në këtë moment, agjentët në shërbim vunë re një letër të bardhë të mbështjellë brenda veshit të tij. Pasi kontrolluan edhe makinën, policia zbuloi 11 doza me kokainë dhe 1.305 Paund cash.

Klevis Drazhi

Në dëshminë e tij, 20-vjeçari tha se ishte detyruar të shpërndante drogë nga një anëtar i mafias shqiptare. Ai pranoi gjithashtu se kishte hyrë në Mbretërinë e Bashkuar në mënyrë ilegale.

Drazhi, i cili banonte në Edmonton, u dënua fillimisht me 11 muaj burg nga Gjykata e Kurorës së Londrës. Por mediat britanike shkruajnë se pas ankimimit në Gjykatën e Apelit, dënimi i tij u rrit dhe shkoi në 30 muaj.

Ky dënim i Drazhit ka kënaqur të gjitha autoritetet, sipas të cilëve, Londra duhet të ketë zero tolerancë mbi personat që merren me lëndë narkotike./abcnews.al

krushe-e-madhe.jpg
G. P.16:14 | 24/03/2019

Sot u mbushën 20 vjet nga fushata ajrore e NATO-s ndaj pikave ushtarake serbe në Kosovë. Gjatë spastrimit etnik, forcat policore dhe ato ushtarake serbe vranë mijëra civilë, mes të cilëve 241 banorë të Krushës së Madhe. 20 vjet më pas për këtë masakër nuk është dënuar askush.

24 mars 1999 ora 20:00. NATO-ja nisi sulmet ajrore ndaj caqeve ushtarake serbe. Por këtë gëzim nuk e përjetuan gjatë banorët e Krushës së Madhe, fshat i komunës së Rahovecit. Më 25, 26 dhe 27 Mars në këtë fshat ndodhi një nga masakrat më të mëdha të luftës, ku u vranë e masakruan 243 banorë të këtij fshati, kryesisht burra.

Edhe pas 20 vjetësh për këtë masakër nuk është dënuar askush. Fahrie Hoti në këtë masakër ka humbur bashkëshortin bashkë me 11 anëtarë të tjerë të familjes. Këto janë varret e zbrazëta, pasi 64 persona të vrarë rezultojnë të pagjetur përfshirë edhe bashkëshortin e Fahrijes.

Në mesin e të zhdukurve është edhe veprimtari Ukshin Hoti, i cili lindur në këtë fshat, shtëpia e të cilit së fundmi është shndërruar në shtëpi muze. Ai ishte zhdukur në ditën kur ishte liruar nga burgu. Janë gjithsej 164 gra që kanë mbetur të veja në këtë fshat.

Ndonëse me dhimbje për humbjet e mëdha si nëna vetushqyese pas luftës gratë e veja të këtij fshati me iniciativë të Fahrijes kanë nisur të merren me konservimin e produkteve bio. Nga 5 gra sa nisën punën në vitin 2005 tani numri i tyre është rritur në 50.

Ndërsa nuk mungojnë vizita posaçërisht gjatë Marsit në këtë kompleks memorial dhe gratë e Krushës, të cilat dëshmojnë mbijetesën dhe sakrificën e popullit shqiptar./abcnews.al

gjykatesja.jpg
G. P.20:15 | 20/03/2019

Gjykatësja Dobrila Kacarska, e cila të premten e kaluar vendosi për 211 vite burg për të akuzuarit e ngjarjeve së dhunshme të 27 Prillit të vitit 2017 në Kuvendin e Maqedonisë, deklaroi se dënimet i ka dhënë në bazë të provave. Në një intervistë televizive, Kacarska komentoi edhe dënimin e shqiptarit Abdulfeta Halimit, personi që i shpëtoi jetën deputetit Zijadin Sela.

Kjo është gjykatësja që të premten e kaluar 15 të akuzuarve për rrezikim terrorist të rendit kushtetues dhe të sigurisë në vend, për ngjarjet e përgjakshme të 27 Prillit të vitit 2017, në Parlamentin e Maqedonisë shqiptoi 211 vjet dënime me burg. Katër ditë pas shqiptimit të dënimeve, Dobrila Kacarska tha për një televizion maqedonas, se dënimet i kishte shqiptuar konform ligjit dhe në mbështetje të provave të siguruara.

“Nuk pata asnjë fije dyshimi se të akuzuarit janë fajtorë për atë vepër penale për të cilën akuzohen”.

Kacarska në television “Prva TV” iu është përgjigjur edhe akuzave të kreut të aleancës opozitare për Shqiptarët, Ziadin Sela se dënimi me shtatë vjet burg i Abdulfeta Halimit, njëri ndër të akuzuarit, që shpëtoi Sela, është simbolikë e shqiptarit që i montohen akoma procese politike. Gjykatësja, pa e mohuar këtë, thotë se edhe ai është gjetur fajtor:

“Para së gjithash duhen sqaruar punët. Unë edhe gjatë shqiptimit të dënimit thashë: Është fakt i pamohueshëm se Abdulfeta Halimi kontribuoi që të shpëtohet jeta e deputetit Ziadin Sela, por të mos harrojmë, po ky i akuzuar është nëpunës policie të cilin e shohim qartë në kamera te dyert e hyrjes, me çelësa në dorë dhe jo vetëm këtu: Atë e shohim edhe para sallës së shtypit, sallës numër tre, aty ku u rrahën deputetë, gazetarë, nëpunës të policisë. I njëjti nuk po ndërmerrte asgjë që domethënë se ai e ka bërë veprën penale, kurse shpëtimi i zotit Ziadin Sela ndodh pasi ishte kryer vepra penale”, tha Kacarska duke saktësuar se në shqiptimin e dënimit është marrë parasysh edhe ky fakt, ndaj Alimi mori dënim thuajse gjysmë më të ulët se të tjerët.

Dobrila Kacarska është gjykatësja, të cilës i është besuar shumica e lëndëve të hapura nga Prokuroria e Posaçme Publike e që kanë lidhje me dyshimet për veprimtari kriminale e korruptive që mbështeten në të ashtuquajturat bomba politike – megaskandali i përgjimeve masive që çoi në ndërrimin e pushtetit në vend.

Ajo ka dënuar edhe ish-kryeministrin Nikola Gruevski dhe një varg bashkëpunëtorësh të tij. Të mërkurën në mbrëmje, kjo gjykatëse që karrierën e ka filluar në kohën e socializmit dhe që deri më sot nuk ka përjetuar kurrfarë rënie, tha se ndërgjegjen e ka të pastër për shkak se, sikurse u shpreh, pikënisje për çdo aktdënim ka provat dhe vetëm provat./abcnews.al

karaxhic.jpg
G. P.16:55 | 20/03/2019

Gjykata e Hagës vendosi burgim të përjetshëm për ish-gjeneralin serb Radovan Karaxhiç, i cili u shpall fajtor për krimet e kryera ndaj popullsisë jo serbe në Bosnje e Hercegovinë. Karaxhiç në sallën e gjyqit, i ka mohuar të gjitha akuzat.

Gjykata e Hagës konfirmoi dënimin me burgim të përjetshëm për ish-gjeneralin serb Radovan Karaxhiç, për krimet që ai ka kryer në Bosnje e Hercegovinë ndaj popullsisë jo serbe.

Vendimi i shkallës së parë ka rrëzuar vetëm një akuzë atë për genocid ndaj popullsisë jo serbe në shtatë komuna në Bosnjë dhe Hercegovinë, por ai u shpall fajtor për 10 akuzat e mbetura, përfshirë genocidin në Srebrenicë.

Karaxhiç hodhi poshtë këto akuza duke pretenduar se mund të konsiderohet përgjegjës vetëm për shkak të postit që mbante në radhët e ushtrisë. Por organet e drejtësisë në Hagë konfirmuan se ish-gjenerali serb ishte në dijeni për vrasjet e Korrikut të vitit 1995 pas rënies së Srebrenicës.

Karaxhiç jetoi për shumë vjet i fshehur në Serbi ku mori një identitet të ri me emrin Dragan Dabiç, ndryshoi edhe pamjen me mjekër dhe flokë të gjata. Pas presionit të vazhdueshëm nga Bashkimi Europian, pas 12 vjetësh Karaxhiç u arrestua në Beograd. Më 24 Mars 2016, Gjykata e Hagës e dënoi atë me 40 vjet burg; ndër të tjera për krime kundër njerëzimit, genocid dhe rrethim të Sarajevës./abcnews.al

elca-tereziu.jpeg
G. P.16:53 | 15/03/2019

30 vjet heqje lirie është dënimi për shqiptarin Xhevdet Mehmeti, 57-vjeçarin i cili një vit më parë vrau me thikë bashkëshorten e tij Elca Tereziu, 52-vjeçe.

Dënimi u dha nga Gjykata e Piacenza-s, në përfundim të një procesi me gjykim të shkurtuar, që parashikon uljen e dënimit me një të tretën. Prokuroria kishte kërkuar burgim të përjetshëm për shqiptarin, që u konvertua në 30 vjet burg.

Mehmeti, i cili mbrohej nga avokati Angelo Rovegno, u lirua nga akuza e keqtrajtimit në familje.

Ngjarja e rëndë ndodhi më 27 Maj të 2018-s, në shtëpinë e çiftit shqiptar në rrugën Dante të Piacenza-s, në kulmin e një zënke mes dy bashkëshortëve.

Ai që e gjeti të ëmën dhe që dha alarmin ishte një prej dy fëmijëve, ndërkohë që 57-vjeçari u arratis, përpara se të shkonte dhe të vetëdorëzohej tek karabinierët.

Sipas mediave italiane, dy djemve iu dha një kompensim prej 250 mijë eurosh./tvklan.al

kukesi-goditja.jpg
G. P.16:45 | 27/01/2019

Kukësi pritet të dënohet rëndë pasi tifozët e tij goditën arbitrin anësor në ndeshjen ndaj Laçit. Kodi i Displinës parashikon ndëshkim të ashpër.

Është skuadra më “emigrante” e kampionatit, por mund ta pësojë edhe më keq. Mjaftoi një send i fortë në kokën e një arbitri që Kukësi të rrezikojë seriozisht në vazhdimin e Superligës, për të mos pasur me vete edhe ata pak tifozë që e ndjekin. Përkrahës kuksianë goditën gjyqtarin anësor Denis Rexha, në sfidën ndaj Laçit në Kamzë, në stadiumin që quhej i Kukësit dhe rregullorja parashikon dënim të ashpër për një veprim të tillë.

Neni 66 i Kodit të Disiplinës Sportive, në pikën 3d, parashikon që një ekip dënohet me jo më pak se 8 ndeshje pa luajtur në stadiumin e tij. Rasti i kuksianëve është specifik, pasi takimet nuk luhen në Kukës, pra dënimi mbetet vetëm për t’i zhvilluar pa spektatorë.

Neni 66 ka edhe pikën 3b, që parashikon jo më pak se 4 ndeshje jashtë fushe, por kur nuk ka akte dhune ndaj zyrtarëve të ndeshjes, ndaj për bazë duhet të merret pika 3d. Në ndeshjen ndaj Laçit, gjyqtari Rexha u godit dhe u rrëzua në tokë, pati ndëpreje për disa minuta, por për fat arbitri u ngrit dhe vazhdoi detyrën deri në fund.

Gjithsesi, mjafton goditja, hedhja e sendeve të forta brenda rrethimit të fushës, dhe ndërprerja e takimit, që Komisioni i Disiplinës të marrë vendim. Ky pritet të jetë një minus tjetër i madh i Kukësit, që nuk luan në Kukës, ndërsa trajneri Cungu ka edhe problemin e Rezhinaldos, sulmuesit kryesor që nuk ishte as në stol ndaj Laçit, dhe që nuk dihet mirë nëse është i dëmtuar, i dënuar, apo vetë ai nuk dëshiron që të luajë./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono