dekreti

agim-kajmakuu.jpg
nev ila13:42 | 01/11/2019

Por kush do ta drejtojë tani bashkinë e Vorës? Kryeministri do të kërkojë nga presidenti një datë të re zgjedhjesh, po gjasat janë që Meta të mos pranojë, siç bëri me Shkodrën. Në këto kushte, Këshilli Bashkiak pritet të mandatojë një prej nënkryetarëve që të drejtojë institucionin.

Ky vendim hyn në fuqi menjëherë.

Nga momenti i vendimmarrjes së KQZ-së, Agim Kajmaku ka humbur të drejtën të jetë kryebashkiak i Vorës. KQZ njoftoi kryeministrin për ndërprerjen e mandatit, dhe është Edi Rama ai që duhet ta përcjellë këtë informacion tek Ilir Meta, dhe t’i kërkojë një datë për zgjedhje të pjesshme në Vorë.

Por, pritet që Presidenti i Republikës të mos caktojë një datë, njëlloj siç bëri në Shkodër, pasi ai nuk i njeh zgjedhjet e 30 qershorit. Në këto kushte, duhet të vihet në lojë këshilli bashkiak Vorë, përpara të cilit Kajmaku bëri betimin në 5 gusht.

Ata kanë kompetencë të komandojnë si kryetar të përkohshëm një prej nënkryetarëve aktualë të bashkisë. Ata janë Laureta Omeri dhe Aqif Muca.

Kjo siguatë mund të vazhdojë për një kohë të pacaktuar, por ndryshe nga Shkodra, në Vorë, Edi Rama do të vijojë të kontrollojë bashkinë, pasi nënkryetarët janë të partisë së tij./abcnews.al

celibashi-1280x609.jpg
nev ila21:44 | 10/07/2019

I ftuar në Mbrëmje ABC me Mirela Milorin ish-kreu i KQZ Ilirjan Celibashi ndau opinionin e tij në lidhje me situatën aktuale politike në vend. I pyetur nga gazetarja MIrela Milori nëse ekzistonte mundësia që KQZ të kishte një vendim tjetër në lidhje me dekretin e presidentit për anulimin e zgjedhjeve në 30 qershor, Celibashi tha se vendimi i KQZ ishte konform ligjit. Sipas Celibashit, Presidenti mund të kishte përdorur një taktikë tjetër politike, për të justifikuar shtyrjen e zgjedhjeve, me anë të dekretit presidencial.

Mirela Milori: A mund të kishte KQZ një vendim tjetër për dekretin e presidentit?

Ilirjan Celibashi: Pavarësisht se kjo çështje e ka ndarë Shqipërinë dhe juristët, por për opinionin tim, bindjen time, vendimi i KQZ  për të vazhduar me procesin përgatitor zgjedhor, ishte një akt apo veprim, në përputhje me ato detyrime që kodi zgjedhor i ngarkon KQZ. Është një veprimtari e ligjshme dhe vjen në respekt të Kodit Zgjedhor. Dua të theksoj diçka: KQZ ka vetëm një moment kur rri pas derës së presidentit të republikës, dhe ky moment është pritja e dekretimit të datës së zgjedhjeve . Momenti kur presidenti i republikës e dekreton datën e zgjedhjeve, pra ja jep komisionit qendror të zgjedhjeve, KQZ nuk ka më asnjë arsye ligjore për të ndenjur pas derës së presidentit, duke menduar që, prit se mos presidenti mund të anulojë datën e zgjedhjeve, sepse nuk ekziston kjo mundësi. KQZ nuk ka asnjë obligim, të rri më sy e veshë nga dera e presidentit, për të pritur se çfarë do bëj më tej presidenti, lidhur me procesin zgjedhor. Ka mbaruar punë Presidenti i Republikës me procesin zgjedhor në momentin që ka dekretuar datën e zgjedhjeve.

Mirela Milori: A do të kishte vend për një interpretim tjetër nëse në dekretin e anulimit të datës së zgjedhjeve në 30 qershor do të kishte një datë e re e zgjedhjeve lokale, a do e fuste në një spirale tjetër juridike situatën?

Ilirjan Celibashi: Në thelb do të ishte njësoj, kushtetutshmëria e këtij akti do të ishte njësoj sikurse është edhe sot. Jo-kushtetutshmëria e aktit të anulimit të datës së zgjedhjeve, apo edhe ajo e caktimit të një date tjetër zgjedhjesh me një dekret të veçantë. Por ndoshta nga pikëpamja pragmatike dhe politike, mund të ishte një zgjidhje që mund ta justifikonte deri diku aktin e presidentit, sepse do të thoshte që: unë e kam të drejtën të caktoj datën e zgjedhjeve sepse gabova me atë datë, kushtetuese është kjo tjetra. Mund edhe të luante me këtë zgjidhje por kjo ishte zgjedhja e tij./abcnews.al

 

ilir-metaa-1.jpg
ad min17:00 | 06/07/2019

Të hënën Kuvendi do të mblidhet posaçërisht për ngritjen e një komisioni hetimor për shkarkimin e presidentit Meta, bazuar në një raport të komisionit parlamentar të ligjeve. Mazhoranca ka renditur në këtë raport 9 shkelje që sipas saj, kreu i shtetit i ka bërë Kushtetutës së vendit.

Nëntë janë akuzat që ka ngritur Kuvendi i Shqipërisë për shkarkimin e presidentit Ilir Meta.

1-Ka cënuar rëndë parimin e ushtrimit të sovranitetit nga ana e popullit në kundërshtim me nenin 2, pika 1 të Kushtetutës  sipas të cilës: Populli e ushtron sovranitetin nëpërmjet përfaqësuesve të tij ose drejtpërsëdrejti.

2-Ka shkelur Kushtetutën dhe ka marrë njëkohësisht tagra të sovranit dhe Kuvendit;

3-Është sjellë arbitrarisht me pushtetin, përkundër natyrës së Republikës Parlamentare (në kundërshtim me nenin 1, pika 1, të Kushtetutës) ku thuhet  se  Shqipëria është republikë parlamentare.

4-Ka anuluar arbitrarisht datën e zgjedhjeve në kundërshtim me nenin 92, germa “gj”, të Kushtetutës sipas të cilës Presidenti cakton datën e zgjedhjeve për Kuvendin, për organet e pushtetit vendor dhe për zhvillimin e referendumeve por edhe nenin 8, 9 dhe 10 të Kodit Zgjedhor që saktëson periudhën zgjedhore, caktimin e datës së zgjedhjeve për kuvendin dhe Caktimin e datës së zgjedhjeve për organet e qeverisjes vendore.

5-Ka cenuar parimin e periodicitetit të zgjedhjeve (në kundërshtim me nenin 1, pika 3 dhe nenin 109 të Kushtetutës që saktëson se Qeverisja bazohet në një sistem zgjedhjesh të lira, të barabarta, të përgjithshme e periodike)

6-Ka cenuar parimin e ushtrimit të pushtetit në shtet nga një qeverisje e dalë nga zgjedhje të lira (në kundërshtim me nenin 1, pika 3, të Kushtetutës);

7-Ka cenuar parimin e kushtetutshmërisë dhe ligjshmërisë (në kundërshtim me nenin 4 paragrafi i dytë i Kushtetutës dhe nenin 4 të K. Pr. Administrative);

8-Ka nxjerrë një akt në kundërshtim të hapur dhe flagrant me ligjet;

9- Ka cenuar parimin e të drejtës së qytetarëve si sovranë për të zgjedhur dhe për t’u zgjedhur (në kundërshtim me nenin 45, pika 1, të Kushtetutës) që përcakton se Çdo shtetas që ka mbushur tetëmbëdhjetë vjeç, qoftë edhe ditën e zgjedhjeve, ka të drejtën të zgjedhë dhe të zgjidhet.

Kërkesa e 55 deputetëve për shkarkimin e presidentit do të shqyrtohet ditën e hënë në orën 17.00. Në këtë seancë do të miratohet ngritja e një komisioni hetimor bazuar në raportin e Komisionit të Ligjeve./ABC News Albania 24/7

RAMA-PER-PRESIDENTIN.mpg_snapshot_01.02-1280x720.jpg
ent ela14:10 | 27/06/2019

Kryeministri Rama nuk ka preferuar t’i përgjigjet ftesës së Presidentit, por ka vijuar takimet elektorale. Sipas tij, një datë tjetër për të zhvilluar zgjedhjet vendore, është e pavlefshme. Në kafen e mëngjesit me banorët e njësisë nr. katër në Tiranë shefi i qeverisë tha se Presidenti i Republikës ka marrë drejtimin e opozitës. 

Çdo bisedë e Presidentit të Republikës Ilir Meta me kryetarin e Partisë Demokratike Lulzim Basha për kryeministrin Edi Rama është baraz me zero. Madje dhe një datë e re për zgjedhjet vendore.

“Mund të bëjnë çfarë të duan, por kjo s’ka asnjë rëndësi, është nul dhe s’ka asnjë vlerë, sepse këtu ka institucione. Secili ka atë pjesën e vet. Presidenti nuk ka asnjë të drejtë në asnjë rresht të Kushtetutës, mirëpo kur e lexon Kushtetutën në filxhan, pastaj mund të fantazosh çfarë të duash.”

Kreu i Shtetit i tha kryeministri banorëve të njësisë numër katër në Tiranë, me të cilët piu kafen e mëngjesit për anulimin e 30 qershorit e ka marrë përgjigjen dhe nga Kolegji Zgjedhor.

“Askush nuk mund të vendosë në diskutim vendimin e Kolegjit Zgjedhor, që ka praktikisht ka vulosur zgjedhjet, mirëpo çfarë po bën Ilir Meta? Kioskën e vet në hapësirën politike, pushtim i hapësirës së përbashkët, komplet pa leje. Dekreti idiotik është ndërtim pa leje në mes bashkëjetesës së përbashkët politike”.

Kryeministri ka dhe një përgjigje se pse Kreu i Shtetit vendosi të zhdekretojë datën e zgjdhjeve.

“Presidenti ka marrë drejtimin e opozitës. Dështon Luli, ndërhyn Iliri. Është fatkeqësi e madhe për institucionin por s’kemi çfarë bëjmë. E thashë unë, erdhi dita që edhe Bujar Nishani të duket si Jefersoni. Edhe i hodhi benzinë zjarrit me atë marrëzinë e shfirmosjes së firmës së vet. Iu dha një motiv sado absurd, por përsëri për t’u kapur, këtyre, që ne do mbrojmë dekretin, ne do respektojmë dekretin, ne do bëjmë këtë.”

Po nëse Meta vendos të shpërndaje Parlamentin?  Një banor i njësisë katër është kurioz të dijë ç’mendon Rama.

“Ai mund të marrë vendim t’i shpallë luftë Amerikës dhe BE, mund ta marrë dhe me dekret, por çfarë do të thotë kjo? Të gjithë njerëzit e kuptojnë. Pjesa dërrmuese e neverit këtë gjë. Faktikisht është një marrëzi”.

Sa i përket kërkesës së opozitës për dorëheqjen e tij, Rama përsëriti se kjo nuk ka për të ndodhur. /ABC News Albania 24/7

 

KRONIKE-KOMISION-HETIMOR-PER-METEN.mpg_snapshot_00.52-1280x720.jpg
ent ela13:09 | 26/06/2019

Të enjten e 4 korrikut, për herë të parë në historinë e parlamentarizmit shqiptar, do të ngrihet një komision hetimor me qëllim shkarkimin e Presidentit të Republikës. Komisioni i Ligjeve miratoi sot raportin me këtë kërkesë, duke marë vetëm një votë kundër, atë të Adriatik Alimadhit.

Ilir Meta u zotua se do të qëndrojë në karrigen presidenciale deri në 24 korrik 2022, por socialistët po punojnë fort për të kundërtën.

Komisioni i Ligjeve, mbylli procedurat për shkarkimin e Presidentit, duke i kërkuar Kuvendit të ngrejë një komision hetimor parlamentar.

I vetmi që votoi kundër këtij raporti, ishte deputeti Adriatik Alimadhi, kryetar i partisë Balli Kombëtar. 13 deputetë të tjerë votuan pro ngritjes së komisionit hetimor.

Në të njëjtën mbledhje, Komisioni i Ligjeve rrëzoi një dekret të presidentit Meta, që kthente për rishqyrtim ligjin për përmbarimin privat. /ABC News Albania 24/7

META-SHPERFILL-KOLEGJIN-ZGJEDHOR.mpg_snapshot_01.06-1280x720.jpg
ent ela12:15 | 25/06/2019

Nuk rrëzohet dekreti i një Presidenti se Kolegji Zgjedhor vendos të ç’regjistrojë një parti politike nga zgjedhjet imagjinare. Sqarimet i dha Kryetari i Shtetit për të gjithë ata që pretenduan se triumfuan me një vendim të tillë.

 “Vendimi ka të bëjë vetëm me vendimin e kësaj partie dhe organizatës socialiste në KQZ”.

Nisur nga dezinformacionet e shpërndara në media e gjen me vend të sqarojë se Kolegji nuk mund të shqyrtonte vlefshmërinë e dekretit të presidentit, sepse një tagër të tillë nuk ia lejon kushtetuta. Vendimi i marrë nuk mund të prodhojë një efekt juridik qoftë për dekretin qoftë për zgjedhjet.

I pritshëm deri diku për kryetarin e shtetit.

“Një truk procedural, përpjekje e dëshpëruar për të ndërtuar një operacion propagandistik. Vendimi u mor në kushtet e presionit dhe shantazhit. Mjafton të shikojmë fotot që keni botuar ju dhe duket. Shumë të trembur dukeshin”.

Duke ripërsëritur se një dekret presidencial shqyrtohet vetëm nga Gjykata Kushtetuese informon qyetarët dhe ndërkombëtarët se ligjërisht zgjedhjet kanë rënë.

“Jam durimplotë pavarësisht që kanë kaluar gati dy javë që nga hapja e dritares për dialog dhe reflektim. Do të vazhdoj të jem i qetë dhe i duruar. Por të jetë e qartë se Presidenti nuk ndërhyn për të penguar zgjedhje partiake . Por kjo datë ka rënë nuk ekziston më ligjërisht.

Kush dëshiron zgjedhje partiake Presidenti nuk ndërhyn. Kjo të jetë e qartë. Në Shqipëri ka vetëm një institucion që vendos datë zgjedhje ai është Presidenti. Kush vepron me paligjshmëri do të marri atë që i takon”.

Në veçanti një mesazh ia dërgon posaçërisht ndërkombëtarëve.

“Unë nuk kam anuluar zgjedhjet në Itali, apo në një vend tjetër, por në Shqipëri, për shkak të një krize të thellë, që vijon prej disa muajsh. Mos prisni nga asnjë ambasador të iu thotë këtë që po iu them unë.

Nuk  kam anuluar zgjedhjet në asnjë ambasadë, por në Shqipëri. Pa zgjedhje me standarde nuk ka çelje negociatash, kjo është e sigurt. Më besoni se jam esëll gjatë gjithë ditës, jo më në mëngjes”.

Në konferencën për shtyp nuk i dha një përgjigje të drejtëpërdrejtë pyetjes se a do ta shpërndajë apo jo parlamentin.

“Kam bërë çdo veprim me përgjegjshmëri. Do t’i shërbej gjithmonë mbrojtjes së Republikës dhe interesave kombëtare. Shpresojmë që ta bëjmë këtë gjithmonë”.

Presidenti Ilir Meta ka hedhur pas krahëve idenë e dorëheqjes. Ai vazhdon të jetë shpresë plotë se palët do të gjejnë rrugën e dialogut duke i kujtuar se ky ishte edhe qëllimi i anullimit të datës së zgjedhjeve. /ABC news Albania 24/7

 

MBULIM-META-TAKON-AMBASADORET.mpg_snapshot_00.28-1280x720.jpg
ent ela09:14 | 24/06/2019

Presidenti Meta i ka dërguar kreut të OSBE Miroslav Lajcak një letër që mban datën 20 qershor, pikërisht një ditë para protestës së opozitës në Tiranë. Në letër Meta shpjegon ndër të tjera se si kryetar shteti dhe përfaqësues i Unitetit të Kombit ka vendosur me dekret anulimin e datës së zgjedhjeve vendore.

Por ai sqaron më tej se Kryeministri Rama refuzon të pranojë Dekretin e Presidentit dhe ka urdhëruar përfaqësuesit e tij socialistë në Komisionin Qendror të Zgjedhjeve të vazhdojnë përpara me zgjedhjet e 30 qershorit, komplet në shkelje të hapur të Kushtetutës dhe legjislacionit të vendit.

Sipas presidentit Meta, zhvillimi i zgjedhjeve të qeverisjes vendore më 30 qershor, pa pjesëmarrjen e opozitës, që përfaqëson të paktën gjysmën e elektoratit shqiptar, shkel parimet kushtetuese.

“Klima shumë e tensionuar politike dhe sociale po shkon drejt sistemit monopartiak dhe potencialit për të përshkallëzuar konfliktin civil në të gjithë vendin”- shkruan Meta.

“Veprimet institucionale që kërcënojnë pluralizmin politik, janë një sulm ndaj vetë ekzistencës së Republikës”- vijon me tej letra e presidentit per kreun e OSBE. Kreu i shtetit shkruan më tej në letrën e tij se tensionet janë rritur dhe autonomia e organeve të qeverisjes vendore është shkelur, duke përshkallëzuar gjendjen e paligjshmërisë dhe anarkinë. /ABC News Albania 24/7

 

majko-1280x633.jpg
ad min19:20 | 21/06/2019

Pandeli Majko dekretin e Presidentit Meta e shikon jo si shtyrje të zgjedhjeve por si pengim të tyre. Ai ka përdorur shprehjen e një miku të tij ku është shprehur se “Dekreti i Presidentit i mori krizës çelësat dhe i hodhi në det’’.

“Dekretin e Presidenti nuk e shikoj si një shtyrje zgjedhjesh, por si një anulim një ndërprerje e procesit zgjedhor. Kështu që për këtë arsye u shpreh institucioni më i lartë i republikës së Shqipërisë që është Parlamenti, u shpreh edhe KQZ , por në momenti që doli dekreti ishte autoriteti i vetëm i menaxhimit të procesit zgjedhor.

Ka shumë arsye që e ka bërë Meta këtë. Mendoj se Presidenti ka bërë një gabim të madh duke bërë këtë dekret dhe duke mos dhënë zgjidhje pas këtij dekreti. Por do përdor shprehjen e  një kolegu timin të cilin dua ta citoj por pa i thënë emirin, i cili në një ambient mes miqsh ku ishin jo vetëm të majtë por edhe të djathtë ku po pinim ka kafe dhe tha: “Dekreti i Presidentit i mori krizës çelësat dhe i hodhi në det’’, tha Majko në “Mbrëmje Ide”./abcnews.al

kzaz-ne-kavaje.jpg
ad min10:52 | 19/06/2019

Edhe në njësine vendore të Kavajës, zyrtarë të bashkisë dhe simpatizantë të kryebashkiakut demokrat, Isa Sakja, kanë kërkuar lirimin e ambienteve që po përdoren nga Komisionet Zonale të Administrimit Zgjedhor.

Ata kërkuan lirimin e mjediseve të palestrës së Shkollës 9-Vjeçare “3 Dëshmoret”, deri në orën 16:00 të mesditës se sotme. Kjo në zbatim të vendimit të presidentit të Republikës, Ilir Meta, për çdekretimin e 30 Qershorit si datë të paracaktuar për mbajtjen e zgjedhjeve lokale. /ABC News Albania 24/7

MBULIM-META-TAKON-AMBASADORET.mpg_snapshot_00.28-1280x720.jpg
ent ela14:30 | 17/06/2019

Presidenti i Republikës Ilir Meta është takuar gjatë ditës së sotme me ambasadorët e vendeve të Bashkimit Europian dhe një përfaqësues nga Ambasada e Shteteve të Bashkuara në Tiranë. Takimi është zhvilluar në Pallatin e Brigadave dhe ka zgjatur mbi një orë.

Burime nga institucioni i Presidencës bëjnë me dijë se është diskutuar mbi krizën politike në vend dhe rrezikun e konfliktit civil për të cilën ka shprehur shqetësim Presidenti Meta.

Kryetari i Shtetit i ka njohur ambasadorët e Bashkimit Evropian edhe mbi arsyet që e cuan të çdekretonte datën e zgjedhjeve në 30 qershor dhe se vendimi i tij ishte i ligjshëm dhe i bazuar në kushtetutë. /ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono