dekreti

KRONIKE-KOMISION-HETIMOR-PER-METEN.mpg_snapshot_00.52-1280x720.jpg
ent ela13:09 | 26/06/2019

Të enjten e 4 korrikut, për herë të parë në historinë e parlamentarizmit shqiptar, do të ngrihet një komision hetimor me qëllim shkarkimin e Presidentit të Republikës. Komisioni i Ligjeve miratoi sot raportin me këtë kërkesë, duke marë vetëm një votë kundër, atë të Adriatik Alimadhit.

Ilir Meta u zotua se do të qëndrojë në karrigen presidenciale deri në 24 korrik 2022, por socialistët po punojnë fort për të kundërtën.

Komisioni i Ligjeve, mbylli procedurat për shkarkimin e Presidentit, duke i kërkuar Kuvendit të ngrejë një komision hetimor parlamentar.

I vetmi që votoi kundër këtij raporti, ishte deputeti Adriatik Alimadhi, kryetar i partisë Balli Kombëtar. 13 deputetë të tjerë votuan pro ngritjes së komisionit hetimor.

Në të njëjtën mbledhje, Komisioni i Ligjeve rrëzoi një dekret të presidentit Meta, që kthente për rishqyrtim ligjin për përmbarimin privat. /ABC News Albania 24/7

META-SHPERFILL-KOLEGJIN-ZGJEDHOR.mpg_snapshot_01.06-1280x720.jpg
ent ela12:15 | 25/06/2019

Nuk rrëzohet dekreti i një Presidenti se Kolegji Zgjedhor vendos të ç’regjistrojë një parti politike nga zgjedhjet imagjinare. Sqarimet i dha Kryetari i Shtetit për të gjithë ata që pretenduan se triumfuan me një vendim të tillë.

 “Vendimi ka të bëjë vetëm me vendimin e kësaj partie dhe organizatës socialiste në KQZ”.

Nisur nga dezinformacionet e shpërndara në media e gjen me vend të sqarojë se Kolegji nuk mund të shqyrtonte vlefshmërinë e dekretit të presidentit, sepse një tagër të tillë nuk ia lejon kushtetuta. Vendimi i marrë nuk mund të prodhojë një efekt juridik qoftë për dekretin qoftë për zgjedhjet.

I pritshëm deri diku për kryetarin e shtetit.

“Një truk procedural, përpjekje e dëshpëruar për të ndërtuar një operacion propagandistik. Vendimi u mor në kushtet e presionit dhe shantazhit. Mjafton të shikojmë fotot që keni botuar ju dhe duket. Shumë të trembur dukeshin”.

Duke ripërsëritur se një dekret presidencial shqyrtohet vetëm nga Gjykata Kushtetuese informon qyetarët dhe ndërkombëtarët se ligjërisht zgjedhjet kanë rënë.

“Jam durimplotë pavarësisht që kanë kaluar gati dy javë që nga hapja e dritares për dialog dhe reflektim. Do të vazhdoj të jem i qetë dhe i duruar. Por të jetë e qartë se Presidenti nuk ndërhyn për të penguar zgjedhje partiake . Por kjo datë ka rënë nuk ekziston më ligjërisht.

Kush dëshiron zgjedhje partiake Presidenti nuk ndërhyn. Kjo të jetë e qartë. Në Shqipëri ka vetëm një institucion që vendos datë zgjedhje ai është Presidenti. Kush vepron me paligjshmëri do të marri atë që i takon”.

Në veçanti një mesazh ia dërgon posaçërisht ndërkombëtarëve.

“Unë nuk kam anuluar zgjedhjet në Itali, apo në një vend tjetër, por në Shqipëri, për shkak të një krize të thellë, që vijon prej disa muajsh. Mos prisni nga asnjë ambasador të iu thotë këtë që po iu them unë.

Nuk  kam anuluar zgjedhjet në asnjë ambasadë, por në Shqipëri. Pa zgjedhje me standarde nuk ka çelje negociatash, kjo është e sigurt. Më besoni se jam esëll gjatë gjithë ditës, jo më në mëngjes”.

Në konferencën për shtyp nuk i dha një përgjigje të drejtëpërdrejtë pyetjes se a do ta shpërndajë apo jo parlamentin.

“Kam bërë çdo veprim me përgjegjshmëri. Do t’i shërbej gjithmonë mbrojtjes së Republikës dhe interesave kombëtare. Shpresojmë që ta bëjmë këtë gjithmonë”.

Presidenti Ilir Meta ka hedhur pas krahëve idenë e dorëheqjes. Ai vazhdon të jetë shpresë plotë se palët do të gjejnë rrugën e dialogut duke i kujtuar se ky ishte edhe qëllimi i anullimit të datës së zgjedhjeve. /ABC news Albania 24/7

 

MBULIM-META-TAKON-AMBASADORET.mpg_snapshot_00.28-1280x720.jpg
ent ela09:14 | 24/06/2019

Presidenti Meta i ka dërguar kreut të OSBE Miroslav Lajcak një letër që mban datën 20 qershor, pikërisht një ditë para protestës së opozitës në Tiranë. Në letër Meta shpjegon ndër të tjera se si kryetar shteti dhe përfaqësues i Unitetit të Kombit ka vendosur me dekret anulimin e datës së zgjedhjeve vendore.

Por ai sqaron më tej se Kryeministri Rama refuzon të pranojë Dekretin e Presidentit dhe ka urdhëruar përfaqësuesit e tij socialistë në Komisionin Qendror të Zgjedhjeve të vazhdojnë përpara me zgjedhjet e 30 qershorit, komplet në shkelje të hapur të Kushtetutës dhe legjislacionit të vendit.

Sipas presidentit Meta, zhvillimi i zgjedhjeve të qeverisjes vendore më 30 qershor, pa pjesëmarrjen e opozitës, që përfaqëson të paktën gjysmën e elektoratit shqiptar, shkel parimet kushtetuese.

“Klima shumë e tensionuar politike dhe sociale po shkon drejt sistemit monopartiak dhe potencialit për të përshkallëzuar konfliktin civil në të gjithë vendin”- shkruan Meta.

“Veprimet institucionale që kërcënojnë pluralizmin politik, janë një sulm ndaj vetë ekzistencës së Republikës”- vijon me tej letra e presidentit per kreun e OSBE. Kreu i shtetit shkruan më tej në letrën e tij se tensionet janë rritur dhe autonomia e organeve të qeverisjes vendore është shkelur, duke përshkallëzuar gjendjen e paligjshmërisë dhe anarkinë. /ABC News Albania 24/7

 

majko-1280x633.jpg
Sej rie19:20 | 21/06/2019

Pandeli Majko dekretin e Presidentit Meta e shikon jo si shtyrje të zgjedhjeve por si pengim të tyre. Ai ka përdorur shprehjen e një miku të tij ku është shprehur se “Dekreti i Presidentit i mori krizës çelësat dhe i hodhi në det’’.

“Dekretin e Presidenti nuk e shikoj si një shtyrje zgjedhjesh, por si një anulim një ndërprerje e procesit zgjedhor. Kështu që për këtë arsye u shpreh institucioni më i lartë i republikës së Shqipërisë që është Parlamenti, u shpreh edhe KQZ , por në momenti që doli dekreti ishte autoriteti i vetëm i menaxhimit të procesit zgjedhor.

Ka shumë arsye që e ka bërë Meta këtë. Mendoj se Presidenti ka bërë një gabim të madh duke bërë këtë dekret dhe duke mos dhënë zgjidhje pas këtij dekreti. Por do përdor shprehjen e  një kolegu timin të cilin dua ta citoj por pa i thënë emirin, i cili në një ambient mes miqsh ku ishin jo vetëm të majtë por edhe të djathtë ku po pinim ka kafe dhe tha: “Dekreti i Presidentit i mori krizës çelësat dhe i hodhi në det’’, tha Majko në “Mbrëmje Ide”./abcnews.al

kzaz-ne-kavaje.jpg
G. P.10:52 | 19/06/2019

Edhe në njësine vendore të Kavajës, zyrtarë të bashkisë dhe simpatizantë të kryebashkiakut demokrat, Isa Sakja, kanë kërkuar lirimin e ambienteve që po përdoren nga Komisionet Zonale të Administrimit Zgjedhor.

Ata kërkuan lirimin e mjediseve të palestrës së Shkollës 9-Vjeçare “3 Dëshmoret”, deri në orën 16:00 të mesditës se sotme. Kjo në zbatim të vendimit të presidentit të Republikës, Ilir Meta, për çdekretimin e 30 Qershorit si datë të paracaktuar për mbajtjen e zgjedhjeve lokale. /ABC News Albania 24/7

MBULIM-META-TAKON-AMBASADORET.mpg_snapshot_00.28-1280x720.jpg
ent ela14:30 | 17/06/2019

Presidenti i Republikës Ilir Meta është takuar gjatë ditës së sotme me ambasadorët e vendeve të Bashkimit Europian dhe një përfaqësues nga Ambasada e Shteteve të Bashkuara në Tiranë. Takimi është zhvilluar në Pallatin e Brigadave dhe ka zgjatur mbi një orë.

Burime nga institucioni i Presidencës bëjnë me dijë se është diskutuar mbi krizën politike në vend dhe rrezikun e konfliktit civil për të cilën ka shprehur shqetësim Presidenti Meta.

Kryetari i Shtetit i ka njohur ambasadorët e Bashkimit Evropian edhe mbi arsyet që e cuan të çdekretonte datën e zgjedhjeve në 30 qershor dhe se vendimi i tij ishte i ligjshëm dhe i bazuar në kushtetutë. /ABC News Albania 24/7

ilir-meta-1-1280x853.jpg
G. P.20:55 | 16/06/2019

Në një intervistë dhënë për televizionin Al Jazeera, Presidenti i Republikës Ilir Meta ka sqaruar vendimin për anulimin e datës së zgjedhjeve, si dhe ka sqaruar këndvështrimin e tij për situatën politike në vend. Meta ka siguruar se dekreti tij për shfuqizimin e 30 qershorit si datë për zhvillimin e zgjedhjeve vendore është një vendim kushtetues shumë solid, i bazuar mbi përgjegjësitë e tij kushtetuese si President i Republikës.

Ky vendim, sipas Metës i shërben paqes sociale, stabilitetit, duke shmangur përshkallëzimin e mëtejshëm e të pakontrolluar të situatës, që mund të çojë në një përplasje civile në vend, sepse zgjedhje pa opozitën, thotë Meta, jo vetëm minojnë stabilitetin e vendit, por gjithashtu çdo shans pozitiv që Shqipëria të bëjë hapa përpara në procesin e çeljes së negociatave me BE-në sa më shpejt të jetë e mundur.

Lidhur me mundësinë e shkarkimit nga Kuvendit, Meta ka deklaruar se nga ana e Presidentit nuk është kryer asnjë shkelje e Kushtetutës.  Sipas Metës I vetmi autoritet suprem që mund të shqyrtojë këtë dekret është Gjykata Kushtetuese, por sipas tij ky diskutim dhe ky debat është humbje kohe, pasi dekreti per anullimin e dates se zgjedhjeve është publikuar tashmë në Fletoren Zyrtare.

Meta siguron se nuk do të ketë zgjedhje më 30 qershor. Sipas tij zhvillimi i zgjedhjeve pa opozitën do të ishte një investim krejtësisht në dëm të së ardhmes europiane të vendi.

Presidenti ne interviste deklaron se shpreson që  Rama të shkojë së bashku me udhëheqësit e tjerë për të bërë një marrëveshje që do ta ndihmonte vendin jo vetëm për të shmangur këtë klimë përçarëse, por edhe do të ndihmonte vendin t’i demonstronte Bashkimit Europian dhe të gjithë partnerëve të tjerë maturinë e duhur dhe se ne jemi një vend që i kemi përmirësuar standardet demokratike dhe jo që i kemi përkeqësuar ato. Meta ne intervistë deklaron se pret nga Rama që ai ta lërë pas retorikën përçarëse.

Intervista e Presidentit Meta për televizionin “Al Jazeera”:

Gazetari (John T. Psaropoulos): Situata aktuale në Shqipëri përcaktohet si një “krizë kushtetuese”. Kushtetuta e përcakton Shqipërinë një “republikë parlamentare”, që do të thotë se ju jeni zgjedhur nga Parlamenti dhe jeni në këtë detyrë për sa kohë gëzoni besimin e Parlamentit.

Parlamenti ka fuqinë t’ju largojë nga kjo detyrë dhe t’ju zëvendësojë nëse ka numrin e mjaftueshëm të votave në rast se Gjykata Kushtetuese e cilëson të drejtë vendimin e Parlamentit. Por mund ta bëjë këtë vetëm në rast se keni ndërmarrë një akt të rëndë në shkelje të Kushtetutës sipas Parlamentit. A mendoni se e keni shkelur Kushtetutën dhe a mendoni se Parlamenti e ka ndërmarrë një proces për t’ju zëvendësuar? A është kjo ajo që pamë me rezolutën e miratuar nga Parlamenti?

Presidenti Meta: Unë kam qenë deputet i Parlamentit për 25 vite me radhë dhe e di shumë mirë se si funksionon ky institucion. Unë jam zgjedhur në postin e Presidentit të Republikës nga një parlament plotësisht legjitim dhe jo nga ky që kemi aktualisht.

Por që nga momenti që u zgjodha dhe u betova mbi Kushtetutën e Shqipërisë si President i Republikës unë i përkas Republikës dhe Republika u përket qytetarëve. Në këtë aspekt, dua t’i siguroj të gjithë se dekreti im për shfuqizimin e 30 qershorit si datë për zhvillimin e zgjedhjeve vendore është një vendim kushtetues shumë solid, i bazuar mbi përgjegjësitë e mia kushtetuese si President i Republikës.

Ky vendim i shërben paqes sociale, stabilitetit, duke shmangur përshkallëzimin e mëtejshëm e të pakontrolluar të situatës, që mund të çojë në një përplasje civile në vend ashtu siç edhe ju e keni parë gjatë zhvillimeve të muajit të fundit, sepse zgjedhjet pa opozitën, jo vetëm minojnë stabilitetin e vendit, por gjithashtu çdo shans pozitiv që Shqipëria të bëjë hapa përpara në procesin e çeljes së negociatave me BE-në sa më shpejt të jetë e mundur.

Gazetari: Por a mendoni se Parlamenti po përpiqet t’ju zëvendësojë apo është thjesht një akt politik teatral dhe Kryeministri Edi Rama ju ka sanksionuar publikisht përmes ligjvënësve për të treguar se është sfidues dhe se ai mbetet i vendosur për të mbajtur zgjedhje. Aka nisur tashmënjë proces kushtetues?

Presidenti Meta: Dua t’ju siguroj se nuk dua ta përdor këtë intervistë për të folur rreth Parlamentit dhe përgjegjësive të këtij institucioni, por është shumë e qartë sa i përket Kushtetutës së Shqipërisë se në cilat raste Parlamenti mund të shkarkojë Presidentin. Është shumë e qartë për rastet kur Presidenti bën një shkelje shumë të rëndë të Kushtetutës, që gjithashtu duhet të përcaktohet qartë më pas nga Gjykata Kushtetuese.

Pra, duhet t’jua bëj me dije se nuk është kryer asnjë shkelje e Kushtetutës nga Presidenti i Republikës dhe dua gjithashtu t’ju siguroj gjithashtu se rendi kushtetues i Shqipërisë është i bazuar mbi pluralizmin politik dhe zgjedhje të lira e të ndershme.

Dhe ajo që ka bërë Presidenti ekzaktësisht është që të tregojë përkushtimn e tij për të mbrojtur pluralizmin politik në vend, si edhe të garantojë zgjedhje të lira e të ndershme për të gjithë qytetarët e Shqipërisë, sepse Shqipëria ka pasur për 45 vjet votime gjatë regjimit komunist, por të gjithë e dinë se ka një ndryshim të madh mes zgjedhjeve dhe votimeve.

Gazetari: Siç e dini, muajin e kaluar miliona qytetarë të Europës iu drejtuan kutive të votimit për të zgjedhur anëtarët e rinj të Parlamentit Europian. Shqipëria po shfaq probleme sa i përket vendimit se kur të zgjedhë 61 kryebashkiakë. A është Shqipëria gati për t’u bërë anëtare e Bashkimit Europian?

Presidenti Meta: Shqiptarët, qytetarët e këtij vendi, kanë qenë gati, edhe më parë, për të qenë pjesë e BE-së, por në orët dhe ditët në vazhdim udhëheqja politike e vendit do të testohet nëse ka maturinë e duhur, për të mos qenë pengesë e kësaj aspirate të qytetarëve shqiptarë.

Më shumë se 95% e shqiptarëve mezi presin që vendi të bëhet pjesë e Bashkimit Europian, dhe me vendimin tim kam dashur t’u jap kohë këtyre udhëheqësve që të reflektojnë, të qetësohen dhe të krijojnë kushtet për një dialog të arsyeshëm, që të tregojnë pjekuri, para së gjithash kundrejt qytetarëve tanë, por edhe ndaj BE-së, të provojnë se ky vend është gati të bëjë një hap tjetër përpara.

Gazetari: Duke u kthyer te çështja kushtetuese, argumentet kundër jush të shprehura nga qeveria theksojnë se ju nuk keni të drejtë të anuloni datën e zgjedhjeve.. 

Presidenti Meta: Nuk jam duke folur për spekulime politike. Unë ju sigurova se ky është një vendim kushtetues solid. I vetmi autoritet suprem që mund të shqyrtojë këtë dekret është Gjykata Kushtetuese, por ajo për të cilën dëshiroj t’ju siguroj është se ky diskutim dhe ky debat është humbje kohe, pasi ky dekret është publikuar tashmë në Fletoren Zyrtare dhe duke iu referuar kuadrit kushtetues dhe ligjor, nga çasti i publikimit është detyrim i çdo institucioni, qoftë në pushtetin qendror apo vendor, ta zbatojnë këtë dekret.

Gazetari: Nw rregull, por duke folur politikisht, Kryeministri Edi Rama thotë se nuk ka ndërmend të ulet në dialog me opozitën për të gjetur një datë konsensuale për zgjedhjet dhe se opozita kishte mundësi të regjistrohej në proces zgjedhor, por vendosi të mos merrte pjesë në zgjedhje. Gjithashtu, ai thotë se i qëndron vendimit të mëparshëm për datën e zgjedhjeve. Si mund të gjendet në zgjidhje në këtë situatë? A do ta njihni rezultatin e zgjedhjeve vendore nëse do të mbahen?

Presidenti Meta: Pasi dekreti u firmos dhe hyri në fuqi, nuk ka më datë formale dhe ligjore për zgjedhjet më 30 Qershor. Sa u përket pretendimeve të Kryeministrit Rama dua t’ju bëj me dije se precedenti i shtyrjes së zgjedhjeve vendore është krijuar për herë të parë në vitin 2006 dhe 2007, kur zoti Rama ishte udhëheqës i opozitës dhe kryebashkiaku i Tiranës. Ai kërkonte që një dokument shtesë të përfshihej në këtë proces teknik me kushtin që të merrte pjesë në zgjedhje. Pikërisht atëherë patëm precedentin e parë, që më pas do të përsëritej në disa raste të tjera.

Dua të them se kjo nuk është diçka e re. Sigurisht, nuk është diçka normale, sepse kur gjithçka shkon mirë nuk ka asnjë arsye për të marrë një vendim të tillë dhe unë shpresoj se Kryeministri ynë duhet të jetë më shumë i vetëdijshëm për këtë parim qeverisës, që qeveritë kanë më tepër përgjegjësi për të gjithë vendin, jo vetëm për mbështetësit e vet apo militantët. Unë shpresoj që ato t’i marrin përsipër e t’i përmbushin këto përgjegjësi dhe të reflektojnë sa më shpejt në interesin më të mirë të vendit.

Gazetari: Por a do ta njihni rezultatin e zgjedhjeve nëse qeveria do t’i zhvillojë ato?

Presidenti Meta: Nuk do të ketë zgjedhje më 30 Qershor. Ky dekret është publikuar tashmë në Fletoren Zyrtare dhe të gjithë kanë detyrimin ta zbatojnë atë.

Gazetari: Ka dy interpretime krejtësisht të ndryshme të Kushtetutës, për të cilat Gjykata Kushtetuese do të duhet të vendoste. Por meqë nuk ka Gjykatë Kushtetuese, sepse gjyqtarët po i nënshtrohen procesit të Vettingut etik… 

Presidenti Meta: Është vetëm një autoritet suprem që mund të gjykojë këtë dekret, që është Gjykata Kushtetuese, e që nuk është funksionale për momentin, siç e përmendet ju me të drejtë. Të gjithë e dinë se Presidenti i Republikës ka bërë çdo përpjekje prej kohësh për të shmangur një situatë të tillë, por kjo tani nuk ka më rëndësi. Tani në këto kushte ky dekret nuk mund të kontestohet nga asnjë gjykatë tjetër në vend. Dhe sigurisht, është një dekret që unë e kam firmosur para qytetarëve shqiptarë, duke marrë të gjitha përgjegjësitë për atë veprim dhe jam i sigurt se kam bërë më të mirën për të shmangur përshkallëzimin e mëtejshëm të konfliktit midis qeverisë dhe opozitës, si edhe duke iu dhënë të dyja palëve mundësinë për t’u qetësuar, për të reflektuar dhe për t’u ulur sa më parë në dialog për interesin më të mirë të gjithë shqiptarëve. Veçanërisht, në këto ditë para vendimit shumë të rëndësishëm që do të merret nga qeveritë e vendeve anëtare të Bashkimit Europian për të ardhmen europiane të Shqipërisë.

Gazetari: Le të flasim pak për aspektin politik të brendshëm të dekretit tuaj. Siç thatë, ju keni shprehur nëpërmjet atij dekreti dëshirën për të shmangur kërcënime të sigurisë publike dhe për të shmangur kërcënime ndaj stabilitetit demokratik. U keni kërkuar të dyja palëve të ulen në tryezën e dialogut, por deri më tani Partia Socialiste nuk ka pranuar. Disa përfaqësues të partive të vogla opozitare janë takuar me ju dhe kjo duket si një shenjë e nisjes së dialogut, por nuk kemi asnjë tregues se do të përfshihet aktorët kryesorë. Qeveria e udhëhequr nga Partia Socialiste thotë se do të shkohet në zgjedhje, ndërsa opozita e udhëhequr nga Partia Demokratike, e cila thotë diçka pak a shumë kriptike dhe nuk jep asnjë sinjal pajtimi, teksa lideri i opozitës zoti Basha u bëri thirrje qytetarëve të bëjnë atë që çdo qytetar europian do të ishte i detyruar të bënte kur përballet me një “grusht shteti”. Kështu e ka përkufizuar ai qeverinë e Edi Ramës. A jeni i shqetësuar për faktin se dekreti juaj duket se nuk ka efektin e dëshiruar?

Presidenti Meta: Jam shumë i vendosur për të bërë më të mirën për të krijuar kushtet e nevojshme për dialog dhe për një zgjidhje të besueshme, sepse kjo është shumë e rëndësishme, jo vetëm për stabilitetin e vendit dhe për bashkëjetesën demokratike të qytetarëve tanë, por kjo është shumë e rëndësishme për të ardhmen europiane të Shqipërisë.

Zhvillimi i zgjedhjeve pa opozitën do të ishte një investim krejtësisht në dëm të së ardhmes europiane të vendit, që është objektivi kombëtar i të gjithë shqiptarëve, pavarësisht nga përkatësitë e tyre politike. Gjithashtu, pas 4-5 muajve të mbushur me konfrontime dhe tensione, që ju i keni raportuar si e gjithë media botërore, zgjidhja nuk mund të gjendet brenda 2-3 ditëve.

Por unë shpresoj që zoti Rama të vijë këtu së bashku me udhëheqësit e tjerë për të bërë një marrëveshje që do ta ndihmonte vendin jo vetëm për të shmangur këtë klimë përçarëse, por edhe do të ndihmonte vendin t’i demonstronte Bashkimit Europian dhe të gjithë partnerëve të tjerë maturinë e duhur dhe se ne jemi një vend që i kemi përmirësuar standardet demokratike dhe jo që i kemi përkeqësuar ato.

Gazetari: Të flasim pak për aspektin evropian të dekretit tuaj për shtyrjen e zgjedhjeve. Ju keni deklaruar se do të mbronit kriterin kryesor të Kopenhagës për zgjedhje të lira dhe të ndershme, garantimin e funksionimit të duhur të institucioneve demokratike si edhe pjesëmarrjen më të madhe të mundshme të partive. Dhe më 9 qershor ju nxorët dekretin teksa i bëtë të qarta këto qëndrime. Më 10 qershor Kryeministri Rama shkoi në Bruksel dhe u takua me Presidentin e Komisionit Europian. Ky i fundit tha se ishte pro zhvillimit të zgjedhjeve më 30 Qershor, pasi nëse nuk do të zhvilloheshin, kjo gjë mund të dëmtonte perspektivën europiane të Shqipërisë. Zoti Juncker ka një interpretim krejtësisht të ndryshëm të asaj se çfarë është në interesin më të mirë të perspektivës suaj europiane krahasuar me Ju. Si e shpjegoni këtë?

Presidenti Meta: President Juncker është gjithashtu një mik i mirë i imi dhe është demokrat i madh. Jam i sigurt se ai nuk është informuar siç duhet për faktin se zgjedhjet e 30 qershorit praktikisht, ose në thelb janë thjesht votime dhe jo zgjedhje, sepse janë zgjedhje pa opozitën. Jam i sigurt se ai nuk është plotësisht në dijeni të gjithë situatës.

Në këtë drejtim, ajo që ju thoni është korrekte, por tani nuk është më përgjegjësi e Komisionit Europian, sepse ky Komision e ka bërë tashmë një rekomandim pozitiv për Shqipërinë. Tani ky vendim do të merret në nivelin më të lartë të politikës europiane dhe mesazhet janë të qarta se zgjedhjet pa opozitën nuk ndihmojnë progresin europian të Shqipërisë.

Gazetari: Gjithsesi, duket se Shqipëria nuk do të marrë dritën jeshile për çeljen e negociatave për t’u anëtarësuar në Bashkimin Europian këtë muaj. Si mendoni se do të pritet ky vendim nga shoqëria shqiptare dhe si e parashikoni impaktin politik të këtij vendimi?

Presidenti Meta: Unë ende shpresoj që Shqipëria të marrë ftesën për çeljen e negociatave me Bashkimin Europian sa më parë të jetë e mundur, madje brenda këtij muaji, së bashku edhe me Maqedoninë e Veriut. Por është shumë e rëndësishme që në orët e ardhshme dhe në ditët e ardhshme të demonstrojmë pjekuri për të kapërcyer këtë krizë dhe kjo është mënyra e vetme që Shqipëria të ketë shanse më të mira për një vendim pozitiv në qershor apo shtator – kjo nuk është më e rëndësishmja, – por sa më shpejt të jetë e mundur. Megjithatë, nëse kriza do të vazhdojë, shanset mund të minohen për vite me radhë, e jo për disa muaj. Kjo është e qartë.

Gazetari: Pse e keni këtë opinion? A mendoni se përplasja aktuale politike është kriter kyç për çeljen e negociatave të anëtarësimit në Bashkimin Europian?

Presidenti Meta:Funksionimi i institucioneve demokratike është thelbësor për çdo vendim të niveleve më të larta politike. Siç e kam nënvizuar, standardet e zgjedhjeve të lira dhe të ndershme kanë qenë gjithmonë vendimtare për vendime të tilla. Shqipëria ka pasur disa probleme edhe në të kaluarën me zgjedhjet dhe nëse nuk tregojmë normalitet dhe përparim në lidhje me zgjedhjet e ardhshme vendore do të ishte një katastrofë.

Gazetari: Ka gjithashtu shqetësime të tjera të shprehur nga vendet anëtare të BE-së dhe që janë përfshirë në raportin e Komisionit Europian. Do të veçoja zhgënjimin sa i përket mungesës së dënimeve ndaj personazheve të rëndësishme të botës së krimit, të përfshirë në trafik droge si edhe luftës ndaj krimit të organizuar. A vazhdon Shqipëria të ketë probleme serioze me krimin e organizuar sipas këndvështrimit tuaj?

Presidenti Meta:Sundimi i ligjit dhe përparimi i prekshëm në luftën kundër krimit të organizuar, por edhe ndaj korrupsionit është thelbësor për të ecur përpara. Shqipëria ka nisur një reformë mjaft të rëndësishme në sistemin e drejtësisë, por duhet bërë akoma më shumë për të treguar vullnet politik për ta zbatuar me përpikmëri. Gjithashtu, për të qenë partnerë edhe më të besueshëm për të gjithë partnerët ndërkombëtarë në luftën kundër krimit të organizuar.

Gazetari: Pra, ju mendoni se duhet bërë akoma më shumë përparim. Pse është dashur kaq shumë kohë për procesin e Vettingut? Përse Shqipëri është pa Gjykatë Kushtetuese për tetëmbëdhjetë muaj?

Presidenti Meta:Mungesa e Gjykatës Kushtetuese është një problem i madh për vendin dhe kjo e ka ndihmuar qeverinë për të marrë autoritet shtesë që nuk është i përcaktuar në Kushtetutën e Shqipërisë. Gjithsesi, unë shpresoj që gjërat të përmirësohen në muajt e ardhshëm, por tani është e rëndësishme të adresojmë krizën dhe të kemi më shumë kohë për të gjitha reformat që duhen zbatuar.

 Gazetari: Nëse Shqipëria nuk merr ditën jeshile për çeljen e negociatave të anëtarësimit në BE këtë muaj, a mendoni se do të ketë rrezik për rritjen e emigracionit në masë, të ligjshëm apo të paligjshëm, pra shkaktimin e një vale të re emigrimi nga ky vend? Ne shohim që tani se një numër shumë i madh shqiptarësh largohen nga vendi i tyre për të nisur punë në një vend të huaj, sepse këtu pagat janë të ulëta. Papunësia e të rriturve është në nivelin 12%, e të rinjve është 22%. Numra shumë të vështirë për t’u menaxhuar nga çdo qeveri… 

Presidenti Meta: Nuk do kisha dëshirë të përshkruaja skenarin më të keq, atë që ju përmendni. Jam i vendosur të luftoj për skenarin më të mirë, që do të thotë gjetja e një zgjidhje sa më parë, të tregojmë pjekurinë e duhur që qytetarët tanë të kenë më shumë besim për të ardhmen europiane të Shqipërisë dhe që gjithashtu partnerët tanë të jenë më të bindur se ne e meritojmë çeljen e negociatave me Bashkimin Europian sa më parë të jetë e mundur.

Gazetari: A mendoni se Shqipëria është gati për të nisur bisedimet për çeljen e negociatave të anëtarësimit me BE-në?

Presidenti Meta:Unë mendoj se shqiptarët janë gati, por udhëheqja politike dhe përfaqësuesit e institucioneve duhet të tregojnë më shumë pjekuri në mënyrë që të rrisim besimin te vendimmarrësit në Bashkimin Europian për ta hedhur këtë hap. 

Gazetari: Të kthehem pak të situata politike, që ju e cilësuat si pengesa kryesore. Polarizimi është ekstrem, situata shumë konfrontuese dhe duket se edhe ju jeni përfshirë tashmë në këtë vorbull. Ndërsa ju prisni që këto zhvillime të fuqishme politike të shpëtonin sistemin, sistemi duket se ju ka thithur.

Kryeministri Rama vuri në dyshim neutralitetin tuaj gjatë fjalës së tij në Parlament të enjten dhe tha se ju i keni dhënë fund të drejtës për të qëndruar në zyrën e Presidentit të Republikës, sepse ju jeni bërë të njëanshëm në postin tuaj, duke mbështetur qëndrimin e opozitës dhe keni kërkuar anulimin e zgjedhjeve. Qëndrimi i qeverisë është në krahun e kundërt. A druheni se do të humbisni të paktën imazhin e neutralitetit tuaj në shoqëri dhe në opinionin publik?

Presidenti Meta:Jo, unë jam i sigurt se vendimi im gëzon një mbështetje mjaft të madhe në shoqërinë shqiptare dhe opinionin publik, sepse çdo familje shqiptare ishte nën trysni nga kjo situatë konfrontuese dhe njerëzit në përgjithësi nuk dëshironin të shikonin e të ishin dëshmitarë të këtyre lloj zgjedhjeve.

Por dua t’ju bëj me dije se zoti Rama nuk ka arsye për të qenë i zhgënjyer me mua, sepse një nga argumentet e tij më të forta kur më propozoi për President i Republikës, – asokohe ishim edhe partnerë në koalicionin qeverisës, – ishte se ai nuk mund të gjente dikë tjetër më të mirë që do të garantonte të drejtat e opozitës se sa zoti Meta. Dhe duke marrë një vendim të tillë, unë nuk po përpiqem të mbaj anën e partive opozitare, por jam gjithashtu i detyruar të garantoj të drejtat e opozitës në Shqipëri, sepse ky është një parakusht për të garantuar pluralizmin politik, mbi të cilin është ndërtuar i gjithë sistemi kushtetues i vendit. Gjithashtu, pluralizmi politik është i garantuar vetëm nga zgjedhje të lira e të ndershme sipas Kushtetutës së Shqipërisë. Dhe është shumë e rëndësishme gjithmonë t’i kujtojmë edhe Kryeministrit se qeveria ka përgjegjësi më të mëdha, sepse ka përgjegjësi për të gjithë vendin dhe gjithashtu për të gjithë qytetarët e këtij vendi, të cilët janë taksapagues dhe kontribuojnë në buxhetin që menaxhohet nga kjo qeveri.

Thënë kjo, shpresoj se qeveria dhe Kryeministri do të reflektojnë në mënyrë konstruktive në ditët në vazhdim dhe do t’i shërbejnë interesit më të mirë të vendit.

Gazetari: Pyetja e fundit. A gëzon Kryeministri Rama besimin dhe mbështetjen tuaj si kreu i qeverisë së këtij vendi?

Presidenti Meta:Kjo është një pyetje të cilës i jam përgjigjur më parë, kur e kam dekretuar si Kryeministër i Shqipërisë. Prisja që ai me kalimin e kohës në atë detyrë të ishte me fleksibël dhe bashkëpunues me opozitën, sepse para së gjithash, sfidat me të cilat përballet vendi mund të adresohen me sukses vetëm duke u bazuar në bashkëpunim më të gjerë. Dhe pres që ai ta lërë pas këtë retorikë përçarëse që e përdor aq shumë dhe që nuk po ndihmon mundësinë e një konsensus më të gjerë, por edhe politikat më gjithëpërfshirëse që vendi të jetë më i bashkuar. 

Gazetari: Zoti President, faleminderit që dhatë këtë intervistë për Al Jazeera-n!

Presidenti Meta:Faleminderit edhe ju!

rama-kuvend-1280x665.jpg
ent ela12:15 | 13/06/2019

Një akt brutal, transgresiv, të papërgjegjeshëm dhe të patolerueshëm të Ilir Metës, e ka konsideruar kryeministri Edi Rama, dekretin e Presidentit Ilir Meta për shfuqizimin e datës së zgjedhjeve.

Në kohën kur Kuvendi sot duhet të kalonte një rezolutë konsensuale për çeljen e negociatavepër anëtarësim, Rama thotë se sot duhet të shpjegojmë shqiptarëve se çfarë kërkon më shumë Ilir Meta nga Shqipëria që pa mbushur ende 50 vjeç e ka bërë edhe Kryeministër, edhe kryetar Kuvendi edhe President Republike, janë falur shumë skandale dhe i është dhënë mundësia për të rilindur.

“Duhet të ishte Kuvendi i njëzëshëm i të gjitha forcave politke për të tërhequr vëmendjen e të gjitha shteteve anëtarë të BE. Duhej t’u drejtuar atyre shteteve për tu këkriaur njohjen e  meritës së Shqipërisë për çeljen e negociatave.

Fatkeqësisht ky kuvend sot është i detyruar të merret me një akt brutal transgresiv, të papërgjegjshëm, të patolerueshëm të Ilir Metës. E pyes veten çfarë kërkon më shumë Ilir Meta nga Shqipëria? Kujt i ka bërë Shqipëria më shumë ndere sesa këtij njeriu të cilit, pa mbushur ende 50 vjeç e ka bërë edhe Kryeministër, edhe kryetar Kuvendi edhe President Republike. Kujt më shumë se Metës i janë falur përçarjet, skandalet, hiletë dhe i është dhënë mundëisa të rilindë i burrëuar, i kthjelluar. Kujt përpara Ilir Metës mund t’ua lajë Shqipërëia detin me borxhe? Shqiptarëve lumin me borxhe që u kam?  Socialsitëve e zgjedhësve të mi t’u laj borxhin qe më kanë mbështetur e toleruar?.

Psenë për aktin e fundit të Metës, Rama e shpjegon me pakënqësinë dhe pangopësine e tij të pashërueshme.

“Psenë e rrëshqitjes së fundit të Metës? Se Iliri është mësuar keq, ta shqelmojë të mirën e tij të përqeshë Zotin e tij duke u bërë vend e pavend protagonist. Metës nuk i mjafton vendi që ka e maja ku ngjitet. Jo President të Republikës, po Mbret të gjithë shqiptarëve po ta shpallin shqiptarët, prapë ilir Meta nuk do ndjehej mirë. Nuk do të qëndronte drejt, nuk do ndalej së tunduari fatin e vet me pakënaqësinë e pashërueshme, me pangopësinë e pashpjegueshme”.

Sot jemi dëshmitarë të Presidentit të Republikës që do bashkohej me zjarrvënësin historik Sali Berishën  për të djegur e bërë lëmsh Shqipërinë. Për cilën arsye do merrte përsipër shkeljen më skandaloze të Kushtetutës përmes firmës së tij me firmën e tij për arsye që bëjnë trillues e qesharak.

Ka vetëm një arsye që i shpjegon të gjitha me dy fjalë; Ilir Meta. E gjitha përfshihet në këto dy fjalë por kjo punë që po bëjmë sot e kërkon që t’u shpjegohemi shqiptarëve se si e qysh erdhi puna deri në këtë pikë vlimi në kazanin e jetës në politike. Presidenti duke kapërcyer mbi kushtetutën dhe duke fluturar përtej kufirit të imagjinatës për të vrarë zgjedhjet përmes zgjedhjeve”.

/abcnews.al

spiropali-1280x712.jpg
ent ela11:45 | 13/06/2019

“Akti i Ilir Metës, atentat i pastër kushtetues, shkel parimet e demokracisë dhe cënon rëndë të drejtën e zgjedhjes së shtetasve”. Kështu u shpreh nga foltorja Ministrja e Shtetit për Marrëdhëniet me Parlamentin Elisa Spiropali lidhur me mocion debatin për dekretin e Presidentit Meta që shfuqizoi datën e zgjedhjeve.

“Janë mësuar të bëjnë me Kushtetutën, ligjin dhe me shqiptarët çfarë kanë dashur dhe si kanë dashur por jo më.

Në 30 qershor do përballen me murin e ligjit ku do thyejnë hundët. Ilir Meta shkeli parimin e unitetit kombëtar, shkeli parimin e sovranitetit të popullit. Me veprimin e tij Meta dëshmoi se mund të nxjerrë Presidentin nga kulla e LSI po jo ta shkulësh LSI-në nga zyrat më të larta të shtetit, shkeli parimin e sovranitetit.

U zgjati organeve tej organeve mandatin tej afatin kushteues dhe këto nuk mund ta ushtrojnë funksionin e tyre.

Presidneti synonn tëzgjidhë një pseudokrizë institucionale duke e ditur shumë dhe duke qenë ideator i kësaj përpjekje për mbijetesë të opozitës ekstra parlamentare. Si e shkel Presidenti të drejtën e 42 partive të regjistruara në zgjedhjeve.” /abcnews.al

 

balla-arsyet-1280x633.jpg
ent ela10:41 | 13/06/2019

Kreu i Grupit Parlamentar Socialist Taulant Balla argumentoi nga foltorja e Kuvendit pasojat e dekretit të Presidnetit Ilir Meta për shfuqizimin e datës së zgjedhjeve. Sipas tij kriteret që përcaktojnë datën e zgjedhjeve, nuk mund të bazohen në interesa politike. Dekreti bie në kundërshtim të hapur dhe flagrant me procedurën dhe Kodin Zgjedhor.

“PD dhe LSI kanë bërë presion për të mos u regjistruar në zgjedhje dhe Presidenti e di që pengimi i të drejtës së një subjekti zgjedhor është akt i dënueshëm me ligj që shkon në 5 vite burg.

Dekreti ka pasojë të drejpërdrejtë të tij pika3 neni 1 i Kushtetutës se qeverisje pa zgjedhje nuk mund të ketë. Dekreti bie në kundërshtim me Kodin Zgjedhor se synon zhbërjen pa shkak ligjor të procesit zgjedhor i cili është konsumuar në 90% të ecurisë së tij.

Dekreti i 10 qershorit nuk mund të nxirret dhe nuk mund të zbatohet se është i pavlefshëm.

Dekreti bie në kundërshtim të hapur dhe flagrant me procedurën dhe Kodin Zgjedhor.

Me mbarimin e mandateve vendi nuk ka më as këshilltarë dhe as kryetar bashkie. Akti i Presidentit është i pavlefshëm.

Ai ngarkon me ekzekutimin e tij KQZ, e cila nëse e zbaton atë shkel rëndë kodin zgjedhor. Ky është një diskutim që duhet të jetë pjesë e debatit në këtë seancë”. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono