deklarata

ilir-meta-delegacioni-Kie.jpg
nev ila18:00 | 06/02/2020

Një delegacion i nivelit të lartë nga Kongresi, i përbërë nga Presidenti i Kongresit Anders KNAPE (Suedi), Presidenti i Dhomës së Rajoneve, Gunn-Marit HELGESEN (Norvegji) dhe Presidenti i Dhomës së Autoriteteve Lokale, Xavier CADORET (Francë) , ka realizuar një mision në Tiranë nga 4 deri në 6 shkurt 2020 për të parë situatën aktuale të demokracisë vendore në Shqipëri, veçanërisht në sfondin e zgjedhjeve lokale të mbajtura në 30 qershor 2019.

Misioni iu kushtua takimeve me aktor të ndryshëm, përfshirë Presidentin e Republikës, Zëvendës Ministrin e Brendshëm, Presidentin e Komisionit Qendror të Zgjedhjeve, Kryetarin e Grupit Parlamentar të Partisë Socialiste, Kryetarin e Partisë Demokratike të opozitës, etj. kryetari i Bashkisë së Tiranës, përfaqësues të trupit diplomatik ndërkombëtar, OJQ-të dhe shoqatat e vetëqeverisjes territoriale si dhe Avokati i Popullit.

Referuar situatës së pakënaqshme që pasoi zgjedhjet lokale të vitit të kaluar, Presidenti i Kongresit Knape shprehu nevojën që Shqipëria të ndjekë kursin e reformave.

“Nuk ka demokraci funksionuese në nivelin e Shtetit pa një demokraci pluraliste dhe të gjallë në nivelin lokal. Kongresi do të vazhdojë të mbështesë Shqipërinë në përpjekjet e saj për konsolidimin e vetëqeverisjes territoriale me anë të krahasimit dhe bashkëpunimit të synuar. Forcimi i konsultimeve midis qeverisë qendrore dhe nivelit lokal dhe luftës kundër korrupsionit janë të një rëndësie të veçantë për Kongresin në këtë drejtim “, tha Knape.

“Për fat të keq, zgjedhjet lokale të vitit 2019 nuk ishin të favorshme për forcimin e demokracisë lokale në Shqipëri, por kanë çuar në më pak pluralizëm në bashki dhe në një erozion të mëtejshëm të besimit të qytetarëve në institucionet e këtij vendi”, deklaroi Gunn-Marit Helgesen , Presidenti i Dhomës së Rajoneve të Kongresit.

“Si qeveria ashtu edhe opozita nuk duhet të qëndrojnë indiferentë përballë një situate të tillë dhe ata duhet të veprojnë në mënyrë të përgjegjshme, sipas roleve të tyre specifike në procesin demokratik, në mënyrë që të sigurojnë zgjedhjet që ofrojnë një zgjedhje pluraliste për votuesit. , si në nivel kombëtar ashtu edhe në atë lokal ”, theksoi Helgesen.

Misioni i ardhshëm monitorues i Kongresit në lidhje me Kartën Evropiane të Vetëqeverisjes Lokale u njoftua nga Kryetari i Dhomës së Autoriteteve Lokale, Xavier Cadoret.

“Kongresi do të kthehet në Shqipëri në pranverë me një delegacion për të vlerësuar situatën më tej në reformën administrative-territoriale të zbatuar që nga viti 2015. Raporti që rezulton do të paraqitet në seancën plenare të Tetorit në Strasburg dhe do të hedhë dritë mbi zbatimin e dispozitat e Kartës nga Shqipëria që janë një pikë referimi e rëndësishme e zhvillimit demokratik të një vendi ”, përfundoi Cadoret./abcnews.al

Isa-Mustafa-Albin-Kurti-600x360-1.jpg
nev ila16:14 | 19/01/2020

Kryetari i LDK-së, Isa Mustafa ka deklaruar për mediat në Kosovë se nuk do të ketë takime të tjera me Albin Kurtin nëse nuk ka dakordësi për arritjen e një marrëveshjeje.

Mustafa theksoi se LDK ka pasur opsion marrëveshjen me “Vetëvendosjen” dhe nëse kjo nuk arrihet, atëherë Kurti duhet te gjejë një zgjidhje tjetër për formimin e qeverisë.

Kreu i LDK-së thotë se koalicioni mund të arrihet me vullnetin e “Vetëvendosjes”,  e cila sipas tij duhet ta vlerësojë mirë ofertën e fundit.

Mustafa tha gjithashtu se faktorët ndërkombëtarë janë të interesuar që qeveria në Kosovë të krijohet sa më shpejt./abcnews.al

ilir-meta.jpeg
nev ila11:23 | 16/01/2020

Presidenti Ilir Meta ndodhet në Kosovë që prej ditës së djeshme ku ka marrë pjesë në përkujtimoren e viktimave të Masakrës së Reçakut.

Gjatë kësaj vizite ai ka dhënë një intervistë për gazetarin Adriatik Kelmendi. Në këtë intervistë, Meta është shprehur për marrëveshjen e arritur për Reformën Zgjedhore mes opozitës dhe mazhorancës.

Marrëveshja e arritur për reformën zgjedhore, uroj të jetë fillimi vendosjes së një dialogu strukturor e të qëndrueshëm për çështje të interesit të përbashkët, që ndihmojnë integrimin europian të Shqipërisë” ka theksuar ndër të tjera presidenti Meta.

Më tej Meta, ka thënë se mazhoranca është në dijeni, se nuk e shkarkon dot nga detyra. Ndërsa për hapjen e negociatave, Presidenti tha se është skeptik, pasi nuk sheh ndonjë angazhim, për adresimin e shpejtë të kushteve të Bundestagut nga mazhoranca.

Intervista e plotë e Presidentit Meta:

Në fillim fare viti ishte i vështirë për Shqipërinë. Po hymë në një vit ku ka më tepër hapësirë për optimizëm. Një ndër brengat kryesore është hapja e negociatave?

Presidenti Meta: Pa asnjë diskutim që viti që kaloi ishte me shumë zhgënjime, të paktën për Shqipërinë, por sidoqoftë nuk mund të themi se ishte një vit i humbur. Në rast se dëshirojmë të mësojmë nga gabimet dhe unë shpresoj se të gjithë ta kenë kuptuar se Shqipëria nuk ka më nevojë për vite të humbura.

Në këtë drejtim shpresoj se edhe një marrëveshje e arritur për çështjen e reformës zgjedhore të jetë thjesht fillimi i një reflektimi të thellë dhe i vendosjes së një dialogu strukturor e të qëndrueshëm për çështje të interesit të përbashkët, që ndihmojnë integrimin europian të Shqipërisë, por edhe që ndihmojnë për një performancë tjetër të shqiptarëve në tërësi, në planin e qeverisjes dhe në planin e afirmimit ndërkombëtar.

Reforma zgjedhore që ju e përmendët dhe që u dakortësua  është paraparë që të arrijë një pajtueshmëri deri më 15 mars, kësaj radhe do të jetë e suksesshme?

Ka një dakordim për ta përmbyllur këtë proces deri më 15 mars me konsensus. Unë besoj se po.

Ka qenë një presion për të gjitha subjektet politike që kanë marrë pjesë në zgjedhje.

Padyshim që ka qenë e njëjta për të gjitha subjektet politike, prandaj jemi këtu, sepse përgjegjësia është e përbashkët. Përgjegjësia është e mazhorancës, e cila kërkon të ushtrojë pushtete që dalin jashtë kufijve që ia përcakton Kushtetuta qeverisë dhe që dëmtojnë rëndë parimin e balancës dhe kontrollit të pushteteve që është i domosdoshëm për një funksionim demokratik të shtetit.

Padyshim që përgjegjësia është edhe e opozitës, e cila zgjodhi rrugën e deligjitimimit të institucioneve përmes largimit nga parlamenti, përmes mospjesëmarrjes në zgjedhjet vendore. Këtu nuk po nuk flasim për një përgjegjësi thjesht të një force apo të një individi të caktuar.

Është një përgjegjësi e përbashkët, por mendoj se përgjegjësia më e madhe është e atij që ka përgjegjësinë për të ushtruar mandatin e qeverisjes së vendit.

E përmendëm edhe ndarjen në qëndrimet lidhur me zgjedhjet që janë mbajtur në Shqipëri. Tani mazhoranca është duke shtyrë idenë që të ketë edhe një shkarkim për ju. Pra kanë ndërmarrë edhe komisionin hetimor. A prisni se do të kenë sukses? Si i përgjigjeni?

Mazhoranca ka vetëm një alternativë, mendoj unë, e cila në fakt është burimi real i krizës që kemi në Shqipëri: alternativën e frikësimit të të gjithëve dhe jo të ushtrimit të përgjegjësive të saj në mënyrë të përgjegjshme, kushtetuese, demokratike dhe luajale.

Po thoni se duke ju goditur juve, u çohet sinjale edhe të tjerëve që të jenë të dëgjueshëm, të nënshtruar?

Mazhoranca e di shumë mirë se mua nuk më shkarkon dot.

Për arsye se unë, jo vetëm nuk kam shkelur Kushtetutën, por edhe nëse një president mund të nxirrte një akt, pra nxjerr një dekret sikurse nxjerr parlamenti një ligj apo qeveria nxjerr një vendim, dhe vlerësohet se nuk është në përputhje me Kushtetutën, kjo nuk është kurrë një shkak për shkarkim, përkundrazi.

Për më tepër që Kushtetuta e Shqipërisë e mbron në mënyrë të jashtëzakonshme Presidentin për shkak se Presidenti është përfaqësues i interesave të shtetit.

Dhe padyshim që kushtetutëbërësi e ka parashikuar që Presidenti për arsye nga më të ndryshmet mund të jetë nën presione nga të forta, që duhet të mbrojë një interes shtetëror apo kombëtar.

Ju kanë bërë me gisht se ju po mbroni interesat e opozitës?

Tani kuptohet se ata nuk mund ta pranojnë që janë përgjegjës për këtë situatë që nuk duhet të ishte kurrë: Që në Shqipëri të bëhen zgjedhje vendore të paligjshme, të parregullta dhe vetëm me një kandidat.

Në cilin vend të Këshillit të Europës ekziston një precedent i tillë?!

Po thoni se kanë ndodhur zgjedhje të paligjshme, të parregullta?

Po si mund të them ndryshe?! Zgjedhjet i përcakton me dekret vetëm Presidenti.

Nuk ka në Shqipëri një institucion tjetër që mund të përcaktojë, ose mund të vendosë për çështjen e zgjedhjeve.

Dekretin e Presidentit mund ta vërë në diskutim vetëm Gjykata Kushtetuese. Gjykata Kushtetuese nuk ka pasur. Data e zgjedhjeve ka kaluar. Atëherë në çdo rast zgjedhjet kanë qenë të paligjshme dhe antikushtetuese. Kështu që kjo është tepër e qartë për cilindo që ka një arsim elementar juridik.

Ajo që dua t’ju them është se kjo është një iniciativë që nuk më shqetëson mua fare personalisht.

Nuk shqetësoheni fare?

Nuk më shqetëson.

Ajo që më preokupon është rruga mjaft e gabuar e mazhorancës, e kryetarit të saj, që praktikisht ka vënë në diskutim legjitimitetin e të gjitha institucioneve në vend.

Të mos harrojmë se kemi një Kuvend me 122 deputetë nga 140 që është numri kushtetues i Kuvendit të Shqipërisë! Le të mos harrojmë se nga parlamenti nuk kanë ikur thjesht 60-të deputetë të opozitës, por kanë ikur 183 deputetë dhe kandidatë për deputetë. Pra në listat e të gjitha partive të opozitës…

Por si kanë hyrë ata kandidatë…?

Ata që kanë hyrë kuptohet se shumica e tyre kanë qenë në fund të listave të gjitha partive. Dhe niveli i përfaqësimit është padyshim mjaft i diskutueshëm. Për më tepër mënyra e zëvendësimit ka qenë në kundërshtim me Kushtetutën dhe me ligjet tona. Këto janë arsyet përse në tetor Bundestagu gjerman i shtoi kushtet për Shqipërinë.

Dhe përpjekja ime edhe për çështjen e zgjedhjeve vendore ishte për të evituar përkeqësimin e vlerësimit për Shqipërinë, pasi ne e dinim shumë mirë se me zgjedhje vendore njëpartiake, Shqipëria as nuk mund t’i hapte negociatat dhe as ka për t’i hapur ndonjëherë, sepse zgjedhjet e lira dhe të ndershme janë një kriter bazë i Kopenhagës. Si dhe janë një detyrim që Shqipëria ka edhe nga Marrëveshja e Stabilizim-Asociimit.

Ju jeni Presidenti i Republikës dhe jeni skeptik se në maj do të hapen negociatat?

Negociata mund të hapen në qoftë se do të ketë një angazhim se ato kushtet e Bundestagut të adresohen në një mënyrë shumë të shpejtë dhe jo duke i zvarritur. Me këtë ritëm unë nuk shikoj ndonjë perspektivë serioze për në maj./abcnews.al

dd3b4674-7651-475d-8e05-ebb5d4fa5d83.jpg
R D15:07 | 10/12/2019

Prokurori Anton Martini ka të gjitha shanset të konfirmohet në detyrë më datë 12 Dhjetor 2019. Ai është kandidat për Prokurorinë e Posaçme Antikorrupsion (SPAK). Gjatë seancës së sotme dëgjimore në Komisionin e Pavarur të Kualifikimit, atij nuk i dolën probleme me pasurinë dhe as me pastërtinë e figurës. Relatorja e çështjes, tha se prokurori nuk ka fshehur pasurinë, megjithëatë ai sqaroi një pasaktësi sa i përket deklaratave të pasurisë. Në vitin 2007, Martini ka përfituar një kredi të butë prej 5 milionë lekësh për strehim, por e ka investuar atë në blerjen e bonove të thesarit në Bankën e Shqipërisë.

Në vitin 2015, Martini ka blerë shtëpi 97 m2 me vlerë 90 mijë euro. Për këtë deklaron se ka marrë kredi të dytë me vlerë 5 milionë lekë në 2016. Aktualisht Prokurori deklaron se ka shlyer 85 mijë euro, ndërsa ka edhe 5 mijë euro të tjera për të paguar për apartamentin. Para trupës së KPK-së, Martini sqaroi se pse ka marrë dy kredi për 1 shtëpi. “Banesën e kam blerë me dy kredi të ndryshme pasi nuk kisha mundësi financiare për ta paguar dhe në kohën kur kam marrë kredinë e parë unë kam qene prokuror nën mbrojtje dhe s’mund të vija në rrezik jetën e fëmijeve që të bleja një shtëpi në periferi”, tha ai.

Gazetarja Glidona Daci raportoi për abcnews.al se prokurori gjithashtu është shprehur se për të shkolluar djalin ka përdorur paratë e dhuruara nga vëllezërit.

Më tej teksa bëri prezantimin e karrieres së tij, Martini theksoi faktin se ish-Kryeprokurori Adriatik Llalla e ka transferuar në kundërshtim me ligjin nga Krimet e Rënda në Prokurorinë e Shkodrës.

“Kam nisur punë që në vitin 1998 si OPGJ në Krujë dhe në 1999 jam bërë prokuror në Lushnje, nga 2004 kam qene tek Krimet e Rënda. Ne 2015 me nje vendim te jashteligjshem jam trasferuar ne Shkodër. Ne 2016 jam kthyer tek Krimet e Renda. Në 2017 u trasferova si titullar ne Shkoder, ndersa nga mesi i 2018 jam tek Krimet e Rënda”, tha ai.

Relatorja e çështjes tha se DSIK ka sjellë një raport ku thuhet se ka konstatuar përshtatshmeri per vijimin e detyres së prokurorit Anton Martini. Po kështu ajo tha se “ai është i aftë profesionalish, respekton afatet ligjore, etj”. /abcnews.al

teatri-okkk.jpg
R D12:56 | 10/12/2019

Europa Nostra ka futur Teatri Kombëtar të Shqipërisë në listën e 14 vendeve që janë më të rrezikuara gjatë vitit 2020. Bëhet fjalë për vepra të trashëgimisë kulturore që mbartin histori dhe vlera artitekturore.

Pas këtij vendimi përfaqësuesit e Aleancës për Mbrojtjen e Teatrit Kombëtar, ndër të tjera thanë se Teatri Kombëtar është vepër që nuk duhet shembur!  Përfshirja në këtë listë, do të thotë angazhim dhe sensiblizim për shpëtimin dhe restaurimin e godinës.

DEKLARATA- ALEANCA PËR MBROJTJEN E TEATRIT

Teatri Kombëtar i Shqipërisë përfshihet në listën e 14 vendndodhjeve më të rrezikuara në Europë, të shpallur nga Europa Nostra në mbledhjen e saj të zhvilluar së fundmi në Hagë.

Kështu vendosi një panel këshillimi ndërkombëtar i Europa Nostra, ku u përfshinë specialistë ndërkombëtarë të historisë, arkeologjisë, arkitekturës, konservimit e restaurimit dhe financës, të cilët u takuan në Hagë për të diskutuar aplikimet dhe për të caktuar listën e shkurtër të 14 vendndodhjeve më të rrezikuara në Europë.

Fondacioni Gjirokastra, me nxitjen e Aleancës për Mbrojtjen e Teatrit këtë vit aplikoi për shpalljen e Teatrit Kombëtar, një nga 7 vendndodhjet më të rrezikuara në Europë. Ky aplikim u mundësua me ndihmën e shumë specialistëve shqiptarë dhe të huaj, të cilët përgatitën dosjen teknike të Teatrit Kombëtar të Shqipërisë.

Të gjitha monumentet dhe vendet e shpallura në rrezik në listën paraprake, u përzgjodhën duke marrë parasysh vlerën e tyre të jashtëzakonshme të trashëgimisë, vlerat kulturore si dhe rrezikun e afërt me të cilin po përballen.

Natyrisht, që një nga kriteret kyçe dhe themelore për përzgjedhjen e tyre ishte edhe angazhimi i komuniteteve lokale dhe i grupimeve të interesit publik dhe privat për të shpëtuar këto objekte. Aksione të qarta që e dëshmonin këtë angazhim u vlerësua të ishin: (1) protesta për Mbrojtjen e Teatrit Kombëtar që ka mëse një vit e nëntë muaj që zgjat, nga këto një vit e gjysëm çdo ditë dhe që prej 17 Korrikut të këtij viti 24 orë në 24, (2) marrja e ndërtesës në administrim që prej 24 Korrikut pas përplasjes me Policinë, nga një grup artistësh, aktivistësh dhe qytetarësh të cilët organizuan Festivalin për Mbrojtjen e Teatrit në kuadrin e të cilit janë organizuar mbi 40 ngjarje artistike që përfshijnë shfaqje teatri me trupa nga Shqipëria, Kosova, Austria, Gjermania, Italia, Franca, Amerika, koncerte të ndryshme muzikore, takime profesionistësh për tema të ndryshme që kishin lidhje me shembjen e Teatrit Kombëtar, ngjarje të cilat i dhanë kështu hapësirës së Teatrit Kombëtar një përmasë me vlera jo vetëm kombëtare por edhe europiane.

Një kriter tjetër i madh ishte potenciali i hapësirës së Teatrit Kombëtar për të vepruar si katalizator për zhvillimin e qëndrueshëm socio-ekonomik dhe nxitjen e vlerave më të mira të shoqërisë shqiptare, detyrë të cilën e ka kryer me sukses të plotë protesta e përditshme që zhvillohet në sheshin e tij, i cili është kthyer tashmë në një kuvend i munguar i shqiptarëve në këto vite të vështirë tranzicioni për të gjithë temat e rëndësishme me të cilat ballafaqohet shoqëria shqiptare.

Kjo përzgjedhje e Teatrit Kombëtar në listën e shkurtër të 14 vendndodhjeve më të rrezikuara në Europë, do të thotë që tashmë të interesuar për restaurimin e tij nuk janë vetëm faktori i brendshëm i përbërë nga artistët, aktivistët dhe qytetarët protestues por edhe faktori ndërkombëtar si Këshilli i Europës dhe Parlamenti Europian.

Me angazhimin e saj duke nisur që prej këtij vendimi, Europa Nostra do të ndihmojë, nxisë dhe koordinojë faktorë të brendshëm dhe të jashtëm që të investohen në restaurimin profesional përfundimtar të godinës së Teatrit Kombëtar.

Ky sukses i padiskutueshëm i kauzës së Mbrojtjes së Teatrit Kombëtar dhe shpallja e tij një monument i rëndësishëm europian i dedikohet të gjithë atyre artistëve, aktivistëve dhe qytetarëve protestues, të cilët përgjatë këtyre mëse dy viteve, kundërshtuan qeverinë, përgatitën kritikat ndaj ligjit special, që i hapte rrugën shembjes së Teatrit Kombëtar, sensibilizuan faktorin politik, kulturor, mediatik, atë të trashëgimisë kombëtare dhe ndërkombëtare. Këta artistë e aktivistë kontaktuan për këtë qëllim Delegacionin Europian në Shqipëri, Komisionin Europian, Këshillin e Europës dhe Parlamentin Europian, të gjithë profesionistët vendas dhe të huaj, të cilët u përfshinë në përgatitjen e dosjes teknike për aplikimin në Europa Nostra, dhe siguruan mbështetjen e institucionit të Presidencës së Republikës së Shqipërisë.

Mbështetja direkte e institucionit të Europa Nostra i vendos përfundimisht një frenim të plotë, përpjekjes së mbrapshtë të qeverisë për të shembur Teatrin Kombëtar. Teatri Kombëtar është cilësuar nga Europa Nostra si: ”një nga qendrat më të spikatura kulturore në Shqipëri dhe një hapësirë e rëndësishme sociale dhe publike”.

Me krenari mund të themi, që kjo arritje e Aleancës për Mbrojtjen e Teatrit dhe të gjithë mbështetësve kombëtarë e ndërkombëtarë, është një nga fitoret më të mëdha të qytetarisë në të gjithë historinë moderne të demokracisë shqiptare në 30 vitet e fundit.

Deklarata e plotë e Europa Nostra

Një ndërtesë ikonike e qeverisë në Oslo, e dëmtuar nga sulmi i terroristit 2011, është vendosur të shkatërrohet …Një kështjellë mbresëlënëse në Beograd, e rrënjosur thellë në historinë evropiane, kërcënohet nga një projekt i dëmshëm teleferik…

Një nga qendrat më të spikatura kulturore në Shqipëri dhe një hapësirë e rëndësishme sociale dhe publike në kryeqytet tani përballet me kërcënimin e menjëhershëm të prishjes…

Një kështjellë e zbukuruar e shekullit të 19-të në Toscana ka rënë viktimë e përkeqësimit, neglizhencës dhe vandalizmit…

Programi është organizuar nga Europa Nostra, Zëri i trashëgimisë kulturore në Evropë dhe Instituti Evropian i Bankës së Investimeve. Mbështetet nga programi i Evropës Krijuese të Bashkimit Evropian.

Lista, 14 vendet e trashëgimisë, të rrezikuara:

Teatri Kombëtar i Shqipërisë, Tiranë, SHQIPRI
Karas – Anije tradicionale e Verës, Armeni
Manastiri i Khoranashat, Rajoni i Tavushit, Armeni
Kalaja Jezeří, Horní Jiřetín, Republika Ceke
Salla e notit Tapiola, Espoo, Finlanda
Kalaja e Sammezzano, Toscana, Itali
Parku Arkeologjik i Sybaris, Itali
Shtëpia Ivicke, Ëassenaar, HELANDET
Y-bllok, Tremujori i Qeverisë, Oslo, Norvegji
Centrali Szombierki, Bytom, POLAND
Kalaja e Beogradit dhe rrethina e saj, SERBIA
Stadiumi Plečnik, Ljubljana, SLOVENIA
Cuatro Caminos Metro Depot, Madrid, Spanjë

 

pompeo-1.jpg
nev ila17:16 | 09/12/2019

Sot, në Ditën Ndërkombëtare Kundër Korrupsionit, Sekretari amerikan i Shtetit Mike Pompeo theksoi se Shtetet e Bashkuara do t’i shtojnë përpjekjet për të luftuar korrupsionin në mbarë botën.

Korrupsioni, thotë kryediplomati amerikan, fuqizon dhe mbështet udhëheqësit autokratë, dobëson besimin tek sistemet demokratike dhe krijon mundësi për aktorë të tretë që të shfrytëzojnë vendet partnere të Shteteve të Bashkuara.

Sekretari Pompeo njoftoi se gjatë vitit 2019, për shkak të përfshirjes në korrupsion madhor, rreth 40 zyrtarë të huaj dhe anëtarët e familjeve të tyre janë përfshirë nga Departamenti i Shtetit në listën e atyre që u ndalohet hyrja së bashku me familjet në ShBA.

Uashingtoni, tha ai, do ta vazhdojë më tej këtë praktikë.

Nga Shqipëria në këtë listë, janë 3 ish zyrtarë dhe familjet e tyre, që e çojnë në 14 numrin e përgjithshëm të individëve që u ndalohet hyrja në Amerikë.

Zyrtari i fundit nga Shqipëria i përfshirë në këtë listë ishte ish kryetari i Bashkisë së Durrësit, Vangjush Dako. E njëjta masë është marrë më parë për ish-Prokurorin e Përgjithshëm Adriatik Llalla dhe ish-deputetin socialist Tom Doshi./abcnews.al

luan-rama-deklarata-1280x602.jpg
nev ila14:15 | 05/12/2019

Zëvendës kryetari i LSI-së Luan Rama i ka drejtuar disa pyetje sërish sot Prokurorisë duke i kërkuar informacione mbi hetimet pas tërmetit të 21 shtatorit, që e cilëson paralajmërimi i natyrës për tërmetin e 26 nëntorit.

Në një deklaratë për media nga selia e LSI-së, Luan Rama tha se Shqipëria prej shtatorit deri tani është goditur nga tërmete të cilat kanë nxjerrë zbuluar mungesën e eficencës, mungesën e përgjegjësisë dhe mungesën e veprimeve korrekte për të mbrojtur e garantuar jetën e qytetarëve.

Duke iu drejtuar prokurores së Përgjithshme të Përkohshme, ai i kërkon të informojë publikun për gjithçka të bërë në përmbushje të detyrës kushtetuese.

Deklarata e Plotë e Luan Ramës: 

“Situata tragjike dhe pasojat e rënda që krijoi tërmeti i 26 nëntorit na bënë të gjithëve jo vetëm të reflektojmë por të demonstrojmë edhe përgjegjshmërinë që gjithçka ka ndodhur të evidentohet, të hetohet, të zbardhet në sytë e opinionit publik sepse vetëm kështu do krijohet besimi se institucionet e shtetit po e bëjnë detyrën. Prokuroria jo vetëm që nuk është prezentë në detyrimin kushtetues për të informuar publikun në lidhje me pasojat dhe shkaqet që çuan në këtë situatë të rëndë por të gjithë mbajnë mend nxitimin e prokurorisë për të informuar publikun pas çdo proteste që bënte opozita a thua se nuk kishte punë tjetër prokuroria.

Shqipëria prej shtatorit deri tani është goditur nga tërmete të cilat në fakt kanë nxjerrë zbuluar mungesën e eficencës, mungesën e përgjegjësisë dhe mungesën e veprimeve korrekte për të mbrojtur e garantuar jetën e qytetarëve.

Meqenëse prokuroria vazhdon të heshtë jam i detyruar ta pyesë publikisht zonjë prokurori të Republikës së Shqipërisë. Jo me qesëndi e konsideroj zonja dhe jo prej faktit që e drejton një zonjë. Zonja prokurori çfarë keni bërë për të hetuar pasojat dhe shkaqet që çuan në pasojat e rënda të tërmetit të 21 shtatorit, të tërmetit që ishte parathënia apo paralajmërimi i natyrës për tërmetin e 26 nëntorit? Cili ka qenë grupi hetimor që është marrë, ka hetuar? A keni evidentuar gjatë hetimit tuaj pas tërmetit të 21 shtatorit objekte, ndërtesa, godina banimi në risk, të dëmtuara ë të cilat nuk duhet të kishte qytetarë? Në sa prej godinave të dëmtuara kanë qenë të evidentuara si të papërshtatshme?

Jeni e lutur të informoni publikun për gjithçka keni bërë në përmbushje të detyrës suaj kushtetuese. Për të evidentuar përgjegjësinë dhe për të vënë para përgjegjësisë të gjithë ata që me mosveprimin e tyre skandaloz dhe kriminal pas tërmetit të 21 shtatorit, janë bashkëfajtorë në krimin e shëmtuar të tërmetit të 26 nëntorit. Jepni përgjigje. Demonstroni që jeni institucion i pavarur, në zbatim të ligjit dhe Kushtetutës. Jemi në pritje të përgjigjes suaj në mënyrë që qytetarët të kuptojnë se ju nuk vepronin nën urdhër apo nën presion politik”, tha Rama./abcnews.al.

Pallate-ne-ndertim_1-1024x662.jpg
nev ila15:55 | 03/12/2019

Shoqata e ndërtuesve shqiptarë ka deklaruar se tërmeti i 26 nëntorit ishte test për ndërtesat e ndërtuara pas viteve 90’.

Në deklaratën e shoqatës thuhet se dëmet në ndërtime janë kryesisht  në muret e brendshme dhe në rifiniturat plotësuese.

Shoqata e ndërtuesve në deklaratën e sa shkruan se në asnjë rast dëmtimet nuk kanë qenë në strukturën qendrore të objekteve dhe si e tillë është domosdoshmëri hartimi i normave teknike që aktualisht mungojnë.

Gjithashtu sipas shoqatës është domosdoshmëri të plotësohet legjislacioni dhe të organizohen struktura të posaçme shtetërore për kontrollin e punimeve që nga faza e marrjes së lejes deri në shfrytëzim të objektit.

“Deklaratë

Shoqata e Ndërtuesve të Shqipërisë shpreh edhe njëherë dhimbjen  për viktimat e shkaktuara nga tërmeti i fundit si dhe solidaritetin për gjithë të prekurit dhe familjet e tyre. Në këto ditë të vështira, ne konfirmojnë se jemi në çdo moment me popullin e prekur nga pasojat dhe dëmet katastrofike të kësaj fatkeqësie natyrore. Shoqata e Ndërtuesve të Shqipërisë konstaton se pavarësisht forcës së tërmetit me magnitudë prej 6.3 të shkallës Rihter dhe forcë afro 8 ballë në qytetin e Durrësit, siguria e ndërtimeve të pas viteve ‘90 u vu në një provë të rëndësishme.

Ne vërejmë se, thuajse plotësisht, qëndrueshmëria e strukturave të këtyre ndërtimeve ka mundur të mbajë këtë forcë shkatërrimtare të natyrës. Në asnjë rast, strukturat bazike të ndërtimeve nuk janë kolapsuar nga forca e madhe e tërmetit të mëngjesit të 26 nëntorit. Nga ana tjetër, Shoqata e Ndërtuesve të Shqipërisë konstaton se dëmet në ndërtimet e reja janë shkaktuar kryesisht në muret e brendshme dhe në rifiniturat plotësuese, por në asnjë rast në strukturën qëndrore të objekteve.

Nisur nga ky konstatim, Shoqata e Ndërtuesve të Shqipërisë mendon se është domosdoshmëri hartimi I normave teknike, që aktualisht mungojnë për këto procese në kushtet e veprimeve sizmike mbi strukturat skelet. Normativat ne fuqi nuk trajtojnë ne forme koherente mbrojtjen e rifiniturave nga veprimi sizmik. Eksperienca europiane nëpërmjet Eurokodeve duhet te përqafohet sa me shpejte nga legjislacioni shqiptar. Gjithashtu është nevojë imediate, të plotësohet legjislacioni si dhe të organizohen struktura të posaçme shtetërore për kontrollin e punimeve që nga faza e marrjes së lejes e deri në vënien në shfrytëzim të objektit, gjë që për investimet private praktikisht mungon.

Shoqata e Ndërtuesve të Shqipërisë është e gatshme që, së bashku me qeverinë dhe parlamentin, të ofrojë asistencën e saj për ndryshimet e mundshme ligjore për të patur akoma dhe më shumë ndërtime cilësore dhe sa më të sigurta.

Tiranë, 3 dhjetor 2019″, thuhet në deklaratën e shoqatës së ndërtuesve./abcnews.al

oltra-xhacka-deklarate.jpg
nev ila18:03 | 27/11/2019

Ministrja e Mbrojtjes Olta Xhaçka, gjatë një komunikimi me median, pasditen e sotme, deklaroi se rreziku nuk ka kaluar ende, dhe se qytetarët, nuk duhet të kthehen në banesat e dëmtuara.

“Qytetarët të mos kthehen në banesat e dëmtuara, rreziku nuk ka kaluar ende. Frikë dhe ankth për lëkundjet e tërmetit. Janë momente tepër të vështira për të gjithë, sidomos për familjarët e atyre, që nuk i mbijetuan dot tërmetit. Fryma e solidaritetit, jashtë dhe brenda vendit, ka qenë e jashtëzakonshme dhe mbresëlënëse. Krenare dhe e prekur, nga skenat e qytetarëve, që mundohen të ndihmojnë sadopak familjet e prekura”, tha Xhaçka.

Më tej Xhaçka bëri publike edhe identitetin e viktimave që shkaktoi tërmeti deri tani.

Deklarata e plotë e Ministres së Mbrojtjes Xhaçka:

“Të dashur qytetarë,

Ky është komunikimi më i vështirë që mund t’i takojë një zyrtari të shtetit shqiptar, e që do doja mos të ndodhte kurrë. Tërmeti i datës 26 ishte vërtet një ngjarje e rëndë. Ka shkaktuar frikë dhe ankth, ndjesi të cilat përsëriten sa herë toka lëkundet, ashtu sic ndodhi disa minuta me parë, ka shkaktuar dëme masive që do të duhet kohë për t’i rekuperuar. 

Por do t’i rekuperojmë. Shtëpitë do të rindërtohen, bizneset do të ringrihen, jeta do të rifillojë për të gjithë qytetarët dhe do të keni të gjithë mbështetjen tonë, gjithë mbështetjen e shtetit shqiptar, partnereve nderkombetare, qytetareve shqiptare, për të kaluar këtë situatë të vështirë e për të rifilluar nga e para. Por ka diçka që nuk mund ta kthejmë më mbrapsht. Askush nga ne nuk mundet. Janë 28 jetë të humbura, qe lene pas një boshllëk që askush nuk e mbush dot.

E di që fjalët janë të tepërta e asgjë s’mund t’i ngushëllojë familjet e tyre për humbjen. Por në një shenjë respekti per jetët e humbura, dua të ndaj sot me të gjithë qytetarët emrat e të 28 fëmijëve, vajzave, djemve burrave e grave që nuk arritën ti mbijetonin kësaj tragjedie, për t’i kujtuar së bashku në këto orë dhimbjeje e ngushëllimi për të gjithë.

Në Durrës kahë humbur jetën:

1- Amelia Lala, 8 vjeç
2- Esiela Karanxha, 8 vjeç
3- Bajram Hajdarmataj, 54 vjeç
4- Sadik Qato, 85 vjeç
5- Isah Abazi, 29 vjeç
6- Flatar Zenelaj, 64 vjeç
7- Eviola Broshka, 28 vjeç
8- Kristi Reçi, 24 vjeç
9- Sehadete Lala, 79 vjeç
10- Djena Karanxha
11- Eduart Reçi
12- Shemsedin Abazi

Në Krujë:

1. Ariela Lala 4 vjeç
2. Bukurije Leka
3. Erisa Cara
4. Fatmira Cuka 44 vjeç
5. Selvie Lala 77 vjeç
6. Saimir Greku
7. Kristjan Preçi 26 vjeç
8. Sardi Cuka 18 vjeç
9. Hajrie Vata 65 vjeç
10. Klevis Çupi (Aliu) 34 vjeç
11. Drita Cakoni 58 Vjeç
12. Pëllumb Greku 57 Vjeç
13. Çelike Grupieku 57 Vjeç
14. Hajredin Çupi, 66 Vjeç
15. Kastriot Cakoni

Ndërsa në Lezhë:

Marjan Preçi 25 vjec – u dëmtua nga tërmeti dhe automjeti që po e dërgonte në spital ka dalë nga rruga. Për pasojë Marjan Preci ka humbur jetën.

Janë momente shumë të vështira për të gjithë ne. Me shumë ankth. Me shumë dhimbje për jetët e humbura por dhe shumë shpresë për të lënduarit.
Kjo ka qenë një ngjarje vërtet e rëndë. Por nëse ka në këtë situatë një fenomen mbresëlënës, eshte pa dyshim fryma e jashtëzakonshme e solidaritetit që kemi parë brenda dhe jashtë vendit.

Jam ndjerë vërtet edhe e prekur, por edhe shumë krenare, sic jam e bindur edhe te gjithë ju, kur kam parë skenat e qytetarëve që përpiqeshin e përpiqen te ndihmojnë brenda dhe përtej mundësive te tyre.

Dhe jam vërtet mirënjohëse dhe pa fjalë në fakt, nga ata qindra e mijëra shqiptarë të thjeshtë, që kanë vërshuar të ndihmojnë, duke asistuar në operacionet e kërkim shpëtimit, duke dhuruar ushqime e veshmbathje, duke hapur dyert e shtëpive apo hoteleve për të strehuar ata që janë prekur nga kjo tragjedi.

Dua t’i falenderoj edhe njëherë të gjithë qytetarët që ende sot po vazhdojnë të punojnë vullnetarisht, të palodhur e shpesh duke rrezikuar shumë. Ashtu siç dua të falenderoj edhe të gjithë miqtë e partnerët e Shqipërisë, e mbi të gjitha vëllezërit e motrat tona kosovare që na janë gjendur ashtu siç dinë shqiptarët t’i gjenden njëri tjetrit në orët e tyre të vështira. Jam pa fjalë. Faleminderit nga zemra.

Por dua ta shfrytëzoj këtë rast per te përsëritur te njëjtin mesazh. Ende nuk ka kaluar faza e rrezikut. Ky rrezik sot vjen mbi të gjitha nga godinat e dëmtuara, që mund të jenë në rrezik shembje, që mund të kenë pësuar dëme strukturore.

Prandaj dua te përsëris thirrjen per qytetaret; Ju lutem mos u riktheni në shtëpitë tuaja nëqoftëse ato kanë dëmtime të tilla. Edhe nëse nuk jeni të sigurtë, është më mirë për ju, për familjet tuaja që të prisni derisa të bëhen verifikimet nga ekipet e ekspertëve te cilat jane organizuar tanimë dhe do te jene ne terren 24 ore ne ditet ne vijim.

Po ashtu dua tu bej thirrje të gjithë autoriteteve vendore që ta përshpejtojnë sa më shumë këtë proces sepse ky nuk është thjesht një proces inventarizimi i dëmeve e vlerësimesh, por një proces që shpëton jetë njerëzish.

Është një përgjegjësi shumë e madhe të cilës i duhet shkuar deri në fund me përgjegjësinë e rigorozitetin më të madh. Duke marrë seriozisht e inspektuar çdo raportim e denoncim e duke mos e çuar situatën në një pikë ku njerëzit humbasin durimin, lodhen duke pritur dhe marrin parasysh rrezikun e rikthimit në banesat e dëmtuara.

E di që ky proces ka nisur vetëm sot. Prandaj kjo e imja nuk është një kritikë, por një paralajmërim që të investohen tek ky proces me gjithë seriozitetin që meriton kjo situatë dhe meritojnë qytetarët shqiptarë.

Sigurisht per te gjitha ato mungesa ne kapacitete profesionale qe bashkitë mund te kenë, do te asistohen nga profesioniste te institutit te ndërtimit apo shoqatës se ndërtuesve per ta kryer procesin e verifikimit ne kohe sa me te shpejte.

Do te jemi ne kontakt ne orët ne vijim per me shume informacion”, tha Xhaçka./abcnews.al

pendarovski-1.jpg
ger ta13:17 | 24/11/2019

Presidenti maqedonas Stevo Pendarovski tha në forumin rajonal të të rinjve në Novi Sad se edhe ai vetë do të ikte nga Maqedonia e Veriut po të mos ishte president.

“Ata kanë vetëm një jetë, të gjithë ne kemi vetëm një jetë dhe askush nuk është i çmendur që ta harxhojë në negociatat me BE-në që zgjasin me vite të tëra, ndërsa paga mesatare në vendin tim është 400 euro. Të mos isha president edhe vetë do të largohesha nga vendi im”, ka thënë presidenti maqedonas.

Pendarovski, i cili i bëri komentet duke folur para të rinjve që marrin pjesë në Forumin e liderëve të rinj, theksoi se të gjithë udhëheqësit politikë kanë përgjegjësi, nga pavarësia e deri më sot./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono