Debate
Lojtarët e River Plate festojnë kualifikimin në finale | Foto: AP / NATACHA PISARENKO

parlamenti-europian-1.jpg
nev ila11:11 | 22/10/2019

Parlamenti Europian ka nisur një seancë me debate mbi konkluzionet e samitit te Keshillit Europian 17-18 tetor. Bilanci i vendimmarrjeve të liderëve të BE është bërë nga Presidenti në largim i Këshillit Europian dhe presidenti në largim i Komisionit Europian.

Donald Tusk dhe Zhan Klod Junker janë ndalur tek vendimi i Këshillit Europian për mos hapjen e negociatave me Shqipërinë dhe Maqedoninë e Veriut. Të dy e kanë konsideruar vendim të gabuar.

Presidenti në largim i Këshillit Europian e ka quajtur një gabim nga ana e udhëheqësve të BE dhe ka thënë se shpreson që liderët të marrin vendimin e duhur para samitit të Zagrebit në maj 2020.

Zhan Klod Junker e ka quajtur gabim historik shumë të madh, duke deklaruar se nuk është normale t’u bëhen premtime vendeve të rajonit e të mos mbahen.

I ashpër në reagimin e tij ka qenë edhe kreu i grupit parlamentar të partive të djathta Manfred Veber. Në fjalën e tij ai tha se BE ka përgjegjësi për rajonin e Ballkanit.

Shqipëria e Maqedonia e Veriut kanë bërë përpjekjet e tyre, tha ai. Maqedonia e Veriut madje ndërroi edhe emrin, por Këshilli Europian nuk mori vendimin e duhur tha Veber duke përmendur presidentin Macron si frenues të hapjes së negociatave.

Ne po humbasim besueshmërinë tonë” tha Veber dhe duhet ta korrigjojmë këtë.

“Shumë gabim mos hapja e negociatave me Shqipërinë e Maqedoninë e Veriut. Natyrisht është një rrugë e gjatë me reforma, por vendimi do u jepte një dritë shprese të dy vendeve dhe do thotë stabilitet për rajonin edhe vetë BE-në“, tha Iratxe Garcia Perez, kryetare e grupit socialdemokrat. /abcnews.al

 

 

SHULLAZI-1280x720.jpg
G. P.12:00 | 18/10/2019

Dështoi nisja e procesit gjyqësorë në Gjykatën e Apelit për Krime të Rënda, për “Grupin Shullazi”. Në seancë pati debate të ashpra midis avokatit të Endrit Zelës Bledar Shanja dhe gjyqtares Albana Boksi, ndërsa avokati braktisi seancën. Nja nga anëtarët e trupës gjykuese, gjyqtari Arben Vrioni ka dhënë dy herë dorëheqjen, kërkesë që është refuzuar.

Kur pritej të niste procesi gjyqësor në Gjykatën e Apelit për Krime të Rënda, për Emiljano Sullazin, Gilmando Danin, Endrit Qyqen, Endrit Zelen dhe Blerim Shullasin, avokatët e të pandehurve janë shprehur se nuk janë dakord me trupën gjykuese.

Seanca u zhvillua mes debatesh të ashpra, pasi, avokati i Endrit Zelës, Bledar Shanja i kërkoi dorëheqjen kryesueses së trupës, Albana Boksi, me argumentin se është në një tjetër proces administrativ në gjykatën e Shkodrës me xhaxhain dhe babain e gjyqtares Boksi. Avokati sqaroi se ai po mbron palën e paditur nga të afërmit e gjyqtares, madje këta të fundit e kanë fyer gjatë procesit duke e quajtur  kriminel.

Avokati Bledar Shanja u shpreh se kjo situatë mund të ndikojë në gjykimin e Endrit Zelës. Kjo kërkesë u refuzua nga trupa gjykuese, çka solli braktisjen e sallës nga avokati me pretendimin se nuk mund të vijojë procesin me një trupë gjykuese që ka konflikt interesi.

Të njëjtin qëndrim mbajti edhe i pandehuri Endrit Zela, duke u shprehur se nuk është dakord që të gjykohet nga Boksi. Ndërsa i pandehuri Gilmando Dani kërkoi për të disatën herë përjashtimin e gjyqtarit Arben Vrioni, me pretendimin se gjyqtari e ka kallëzuar penalisht Gilmando Danin e të vëllain e tij, për një aksident të ndodhur më 09.09.2019, menjëherë pas përfundimit të seancës gjyqësorë për Grupin Shullazi.

Gjyqtari në dorëheqjen e tij është shprehur se do të jetë i njëanshëm në këtë proces për shkak të kallëzimit kundrejt vëllai të pandehurit Dani. Avokatët e 5 të pandehurve kanë zhvilluar debate, pasi për të dytën herë gjyqtari Arben Vrioni ka depozituar dorëheqjen dhe kjo kërkesë është refuzuar nga zëvendës drejtuesja e Gjykatës së Apelit për Krime të Rënda Saida Dollani.

Sipas avokatëve gjyqtarja po mban peng procesin, pasi ajo është përjashtua nga gjykimi i kësaj çështje dhe ka bërë gjithashtu edhe kallëzim penal për kanosje, për grupin “Shullazi”. Në përfundim trupa gjykuese e përbërë nga Albana Boksi, Arben Vrioni dhe Etleva Temo vendosën t’i caktojë të pandehurit Endrit Zela një avokat kryesisht, ndërsa seanca e radhës do të mbahet më datë 28 Tetor./ABC News Albania

BRITANI-PARLAMENTI.mpg_snapshot_00.00-1280x720.jpg
ent ela20:32 | 25/09/2019

Parlamenti britanik është rimbledhur të mërkurën pas vendimit të Gjykatës së Lartë që e cilësonte të paligjshëm pezullimin e tij. Megjithatë, mes debateve të ashpra, përfaqësuesi ligjor i qeverisë konservatore ka deklaruar se Dhoma e Përfaqësuesve është një institucion i vdekur.

Ligjvënësit britanikë janë përplasur ashpër në lidhje me vendimin tashmë të paligjshëm të qeverisë për të pezulluar Parlamentin. Ata u mblodhën në seancë pasditen e së mërkurës pas vendimit historik të Gjykatës së Lartë të Mbretërisë së Bashkuar. I pranishëm, prokurori i përgjithshëm Xhefri Koks, njëkohësisht përfaqësues ligjor i qeverisë, deklaroi se respekton vendimin por sulmoi ligjvënësit duke i cilësuar ata si “frikacakë” për të mbajtur një palë zgjedhje.

“Ky Parlament ka vdekur”, theksoi Koks. Nga ana tjetër, ai u etiketua si një “turp” për Parlamentin nga një prej deputetëve të pranishëm, ndërsa një tjetër u shpreh “i tmerruar” nga fjalori i tij. Joana Çerri, nga Partia Kombëtare Skoceze, i kërkoi zotit Koks që të publikojë këshillën ligjore që i dha qeverisë përpara pezullimit të Parlamentit.

Ajo tha se Koks po paraqitet si një element i sakrifikueshëm për planet e qeverisë. Nga ana e tij, kryeprokurori u përgjigj duke thënë se qeveria besonte se qasja e saj kishte qenë e ligjshme dhe kushtetuese dhe se ajo kishte vepruar në mirëbesim kur kishte pezulluar Dhomën e Përfaqësuesve. Ai shtoi se do ta shqyrtojë në ditët në vazhdim nëse për hir të interesit publik do ta publikojë ose jo këshillën që i dha ekzekutivit. Ndërkohë, kryeministri Boris Xhonson, që është kthyer në Londër nga samiti i OKB-së në Nju Jork, ka deklaruar se nuk bie dakord me vendimin e Gjykatës së Lartë, por ka shtuar se do ta respektojë atë. /abcnews.al

 

 

henri-cili.jpg
G. P.20:41 | 20/09/2019

“Blloku” i Isuf Kalos është një nga librat më të suksesshëm të këtij viti. Henri Çili, si botues i librit, tha këtë të premte gjatë emisionit “Provokacija” se për “Bllokun” do të hidhen edhe 5 mijë kopje të tjera në treg.

Sipas Çilit, suksesi i librit lidhet me Isuf Kalon, i cili ka qenë mjeku personal i Hoxhës, me Bllokun, kuriozitetin për komunizmin dhe të shkruarit shumë bukur të autorit.  Megjithatë, “Blloku” i Kalos ka pasur shumë polemika dhe kritika. Disa intelektualë dhe personazhe të njohur në vend kanë thënë se ai nuk duhej botuar.

Mirëpo për Henri Çilin, këto polemika dhe sulmet që janë bërë herë pas here mbi autorin dhe botuesin kanë qenë të padrejta.

“Edhe mua më ka befasuar zemërimi i njerëzve dhe shumë miqve dhe kolegëve të afërt dhe e shoh si një indikator të rëndë të intolerancës në të cilën gjendemi akoma pas 30 vjetësh në një shoqëri të lirë. Që ditën e parë qoftë Isufi, qoftë unë si botues kemi pasur sulme edhe në nivele nga njerëz jo pa vlera. Përgjigja e parë dhe jo e vetme ndaj një statusi të Sadik Bejtos në ditët e para, të nesërmen ishte, unë i them “jo botuesit totalitar”. Pak a shumë shoqëria shqiptare duke sharë diktaturën propozon modele të tjera totalitare. Ka deri tek ata që mendojnë se nuk duhej botuar libri. Edhe miq e kolegë tanë si Alfred Lela, apo Fitim Zekthi. Unë jam befasuar nga indeksi i instolerancës që ka shpërthyer në shoqërinë shqiptare. Ky ishte një shkas ose pretekst”, tha Çili.

Sipas Çilit, tashmë vendi e ka mbyllur kapitullin e tranzicionit dhe njerëzit duhet t’i shohin gjërat më gjerë dhe në kuadrin pluralist e të tolerancës.

“Ne duhet t’i shohim gjërat më gjerë, në kuadrin pluralist, në një kuadër tolerance dhe mbi të gjitha në një kuadër që na lejon të bashkëjetojmë në një shoqëri. Libri i Isufit nuk ishte një kat i pamenduar. Të gjitha palët jemi menduar shumë. Unë si botues për ta botuar këtë libër dhe ai për të zgjedhur botuesin se kishte shumë oferta. Kalo ka pozitë dhe të dhëna unike në raport me të kaluarën e tij, ka qenë mjeku i diktatorit shqiptar. Njihet koncepti i librave të mjekëve të diktatorëve gjithandej. Është vepra e famshme, “Këta të sëmurë që na qeverisin”. Unë e zgjodha jo rastësisht këtë libër me shumë entuziazëm për të përmbyllur një kolanë dhe një projekt që ne e kemi nisur në Shtator të vitit 2009 me një libër të Blendi Fevziut “Jeta ime” me intervistat më të veçanta të 15 vjetëve atëherë të “Opinionit””, tha Çilit.

Sipas tij, “Blloku” është një akt emancipimi dhe Kalo do të kishte bërë gabim po mos ta shkruante.

“Libri ka një rëndësi në përmasa historike për kujtesën dhe kulturën tonë historike”, tha Çili./abcnews.al

pergjime.jpg
G. P.20:31 | 04/09/2019

Në Gjykatën Penale u bë me debate të forta, përballja e dëshmitarëve të akuzës me Fredi Alizotin, për Çështjen “Babalja”. Dëshmi kanë dhënë sekretari i përgjithshëm i PD-së Gazment Bardhi, prokurori Besim Hajdarmataj dhe gazetari Ylli Rakipi.

Gjykata penale zhvilloi seance për atë që njihet si çështja “Babale”, me të pandehur për moskallëzim krimi ish-deputetin e Partisë Demokratike Ervin Salianji dhe gazetarin investigativ Jetmir Olldashi.

I pandehur është edhe Albert Veliu, person në arrati, i njohur si “Babalja”, si dhe miku i tij Fredi Alizoti, personi që dyshohet se ka imituar zërin e Agron Xhafajt në audiopërgjimin e publikuar në PD-ja.

Gjatë seancës në gjykatë pati debate të ashpra midis 3 dëshmitarëve të organit të akuzës, Sekretarit të Përgjithshëm të Partisë Demokratike Gazmend Bardhi, Prokurorit të Krimeve të Rënda Besim Hajdarmataj, gazetarit Ylli Rakipi me avokatët e të pandehurve dhe prokurorët Genc Qano dhe Kol Hysenaj.

Gjatë dhënies së deklarimeve Gazment Bardhi është përplasur më të pandehurin Alizoti, pasi teksa Sekretari i Përgjithshëm i PD-së deklaronte se nuk e njihte, Alizoti pretendonte se kishin konsumuar edhe kafe bashkë.

Në seancë Gazment Bardhi ka debatuar me avokatin Agron Geron Xhafajt, Ardian Vishën.

Ardian Visha, avokati i Geron Xhafaj: Për herë të parë më materialin u njohët kur e publikuat, apo më parë?

Bardhi: Me materialin audio jam njohur para se të bënim denoncimit.

Ardian Visha: Mjetet teknike janë ato të shfaqura në ekran, apo  të tjera?

Bardhi: E kemi marrë në një USB dhe e kemi shfaqur në një ekran. Të njëjtën ia kemi dhënë prokurorisë.

Avokati: Thatë që keni investiguar për të shkuarën e Xhafajt?

Bardhi: Vendimi ka marrë formë të prerë në 2012-n. Geron Xhafaj ishte dënuar për trafik narkotikësh bashkë me një grup kriminal. Kjo tregon për rrezikshmërinë e lartë të tij. Në 2013-n si kreu i komisionit të ligjeve erdhi vëlla i tij erdhi vëllai i tij.

Gjatë dhënies së deklarimeve, gazetari Ylli Rakipi ka deklaruar se gazetari investigativ Jetmir Olladashi e kishte vënë në dijeni dhe i kishte kërkuar mbështetje për të investiguar një rast trafikimi të lëndëve narkotike.

“Gazetarët investigativë kanë mjetet e veta, stilolapsa, ore. Jetmiri i kishte. Unë i kam dhënë 5 mijë lekë të reja vetëm për karburant. Olldashi shkoi. Kur u kthye më tha që kam një material audio. Më erdhi keq që nuk kishte video, sepse pretendohej një përfshirje e vëllait të Ministrit të Drejtësisë”.

Dëshmitari i tretë në këtë seancë ishte prokurori i Krimeve të Rënda Besim Hajdarmataj, të cilit iu rrëzua kërkesa që dëshminë ta bënte pa praninë e medias. Hajdarmataj ka shpjeguar pozicionin e tij si prokuror në këtë çështje dhe veprimet që ka kryer.

“Albert Veliun e kam takuar në Nëntor 17. Recepsioni më komunikoi se ishte dikush që kërkonte takim me mua, pasi do më tregonte diçka të rëndësishme. E prita në zyrë. Më ka prezantuar një fakt. Kishte dijeni se disa persona po përgatiteshin të bënin një trafik droge. Sipas tij, mes tyre kishte policë dhe vëllai i Ministrit të Brendshëm të asaj kohe. E pyeta për personalitetin e tij. Më tha që ishte i dënuar për trafik droge jashtë Shqipërisë. Ai më tha që personat që do bënin trafikimin ishin njohje të vjetra të tij. Meqë bëhej fjalë për policë të përfshirë në trafik dhe vëllain e ministrit lashë takim me një prej drejtuesve të SHISH dhe u kërkova që ta merrnin si rast, për ta përdorur dhe si informator, sipas procedurës së tyre, për ta hetuar nëse ka të dhëna reale për rast trafikimi. Në vijimësi kam kontaktuar me një prej drejtuesve të SHISH. Më ka thënë që nuk kishte diçka konkrete, por se po mblidhnin të dhëna dhe prova. Dua të sqaroj që përfshiva SHISH-in për shkak se personi më tha që në rrjet kishte punonjës policie, si edhe vëllai i Ministrit të Brendshëm të asaj kohe. SHISH ishte institucioni i vetëm që gjatë 2016-2017 na kishte informuar për rastet e trafikut të kanabisit ku ishin të përfshirë dhe punonjës policie”, tha ai.

Gjykata e Tiranës vendosi që të pezullonte për momentin marrjen e dëshmisë së Agron Geron Xhafajt, që po vuan një dënim për trafik ndërkombëtar droge në Itali. Prokurori lexoi deklarimet që Agron Xhafaj i kishte dhënë grupit hetimor, para se të nisej drejt Italisë.

“Paraditen 4.5.18 tre deputetët e PD kanë bërë një denoncim me të dhëna të rreme për të goditur vëllain tim. Dua të sqaroj që është e vërtetë që unë përdor numri me …472. Aty më telefonojnë të gjithë, ata që më duan dhe të kundërtën. Në bisedën e publikuar dyshoj se është Robert Veliu. Ai disa herë më kërkonte para se luante bixhoz. Unë nuk e kam takuar atë njeri. Sa herë më merrte për lekë e kam refuzuar dhe në fund i kam bërë bllok. Nuk është i vërtetë fakti që unë të kem lënë takim me të. Në lidhje me bisedën e pretenduar në lokalin tim, aty nuk jam unë. Ajo nuk është e folura ime, për më tepër që unë kam probleme në shqiptimin e disa shkronjave. Është tërësisht e manipuluar. Nuk njoh askënd me emrin Ermal, veç një kushëririt tim. Po ashtu, nuk njoh asnjë person me nofkën Toto Qorri”.

Në seancën e radhës, në 11 Shtator në orën 12:30, do dëgjohen audiopërgjimet e publikuara nga Partia Demokratike, për këtë çështje./ABC News Albania 24/7

rumenige-bayern.jpg
nev ila13:45 | 31/07/2019

Bajerni fitoi thellë ndaj Fenerbahçes në Kupën AUDI, por atmosfera në klubin gjerman u dëmtua jo pak nga kritikat e shefit Rumenige ndaj trajnerit Niko Kovaç.

U duk se ishte mbrëmja për të festuar, veçse qetësi nuk pati.

Tifozët në “Alianc Arena” më në fund u kënaqën me një fitore të madhe, 6-1 ndaj Fenerbahçes, në gjysmëfinalen e Kupës Audi në Mynih, veçse problemet filluan më pas.

Shefi ekzekutiv i klubit, Karl-Hajnc Rumenige, kritikoi botërisht trajnerin Niko Kovaç, për fjalët që kishte thënë për transferimin e mundshëm të Leroi Sanesë nga Mançester Siti.

“Nuk më pëlqeu aspak intervista e tij,  tha Rumenige, një trajner nuk mund të deklarojë ashtu në publik, për një lojtar që i përket një klubi tjetër. Duhet të kemi respekt. Mendimi im nuk është sekret, ia kam thënë trajnerit”.

Kovaç ishte shprehur përpara ndeshjeve të Kupës AUDI se Sane ishte lojtari i ëndërruar prej tij, dhe se ishte optimist se Bajerni do të arrinte ta merrte nga Siti.

Një kritikë është gjithnjë normale, nëse nuk bëhet me tendencë, kjo dihet.

Nuk është aspak normale, veçse, kur kritika e një shefi klubi ndaj trajnerit të tij bëhet në publik.

Nëse Kovaç gaboi për Sanenë, legjenda Rumenige u shfaq edhe më keq.

E gjithë kjo histori e familjes që doli në “pazar” rikujtoi fundin e sezonit të kaluar, kur mediat gjermane komentuan për “luftë civile” tek Bajerni, me shefin ekzekutiv Rumenige që nuk donte ta mbante Kovaçin si trajner, dhe me presidentin Uli Hënes që “votoi” për kroatin.

Për momentin, duket se gjendja do të mbetet e qetë.

Pas kritikave të Rumeniges, Kovaç u shpreh se kishte gabuar, se i kishte kërkuar falje Pep Guardiolës duke e marrë në telefon, dhe po ashtu i kërkoi falje hapur Mançester Sitit.

Gjithsesi, debatet në publik thjesht krijuan një përshtypje të keqe për atë që po ndodh tek Bajerni.

Fitorja 6-1 ndaj Fenerbahçes në Kupën AUDI ishte shumë e mirë, por vështirë se mjafton për të dhënë siguri.

Bavarezët nuk po munden të përforcohen, dhe Rumenige pohoi i dëshpëruar se “transferimet janë bërë shumë të shtrenjta dhe të vështira”.

Një tjetër minus, që mund të ndikojë në sezonin e kampionëve të Gjermanisë./ABC News Albania 24/7

kqz-2-1280x710.jpg
Sej rie19:45 | 04/07/2019

Kryetari dhe nënkryetari i Komisionit Qendror te Zgjedhjeve u përfshinë në debate të forta ne mbledhjen e pasdites së sotme, të thirrur për të certifikuar rezultatet e zgjedhjeve vendore në disa bashki. Komisioni rrezoi kërkesën e kryetarit Zguri për hapjen e kutive për verifikimin e pjesëmarrjes në votime.

Kreu i KQZ-së, Klement Zguri kërkoi hetim administrativ për të nxjerrë shifrat e sakta të pjesëmarrjes në zgjedhjet e 30 Qershorit përmes verifikimit të procesverbaleve të mbylljes së votimit dhe listave të zgjedhësve.

Por  nënkryetari i Komisionit Denar Biba e cilësoi këtë kërkesë si hedhje në erë të procesit zgjedhor të 30 Qershorit.

Biba i përmendi Zgurit se nuk e ka pranuar asnjëherë procesin zgjedhor të 30 Qershorit prandaj kërkon ta sabotojë.

Edhe anëtarët e tjerë te KQZ rrezuan kërkesën e kreut Klement Zguri, pasi sipas tyre në këtë moment ku ndodhet procesi nuk mund të kryhet asnjë hetim, pa u miratuar tabelat e rezultateve për çdo bashki.

Gjate kësaj mbledhjeje, KQZ miratoi tabelat e rezultateve të zgjedhjeve të së djeles për Bashkinë e Elbasanit dhe atë të Lushnjes./ABC News Albania 24/7

zoran-zaev-e1546608513506.jpg
G. P.19:40 | 26/06/2019

I ndodhur përpara presionit të institucioneve, kryeministri i Maqedonisë së Veriut, Zoran Zaev ka njoftuar se do të heqë dorë nga posti i ministrit të Financave, që kishte marrë përsipër të mbante në kuadër të riformatimit të qeverisë. Duke shpallur vendimin e tij, Zaev tha se ka vendosur të dëgjojë zërin e opozitës.

Komisioni Shtetëror për Parandalimin e Korrupsionit ka njoftuar Kuvendin e Maqedonisë së Veriut se është i jashtëligjshëm propozimi që Kryeministri Zoran Zaev krahas funksionit Kryeministër ta ushtrojë edhe atë të Ministrit të Financave.

Nga ky Komision kanë thënë se Ligji për parandalimin e korrupsionit dhe konflikte interesash nuk lejon një gjë të tillë. Në një paraqitje para deputetëve Kryeministri Zoran Zaev, tërhoqi propozimin për vetemërim në Financa, siç tha, duke dëgjuar zërin e opinionit e të opozitës.

“Ju njoftoj se e tërheq kandidimin për ministër edhe pse ligji dhe Kushtetuta ma lejon. Tërhiqem pasi pati reagime nga opozita dhe Antikorrupsioni. Paralajmëroj se do të udhëheq me ministrinë derisa të emërohet ministri i ri”, tha Zaev.

Ai që pësoi më keq është Vesel Memedi dhe partia e tij.

“Sot do të dorëzojmë dorëheqjen e parevokueshme nga të gjitha drejtoritë dhe këshillat drejtues dhe kulminacioni i kësaj vlere sublime është tërheqja nga pozita e nënkryetarit të Kuvendit dhe dorëzimi i mandatit të deputetit”, tha ai.

Debati për emërimin e ministrave të ri është i kufizuar në dy ditë dhe pritet që këtë kohë opozita ta shfrytëzoj maksimalisht, e votimi të bëhet nesër, 5 minuta para mesnatës./ABC News Albania 24/7

deputetja-kosove.jpg
nev ila16:15 | 16/05/2019

Deputetja Flora Brovina, posedon një dëshmi që do ta paraqesë për krimet serbe në Kosovë, e ku shihet një grua duke u dhunuar nga serbët, ndërsa prapa janë familjarët e saj. Brovina ka thënë se kjo grua është ende gjallë dhe është e gatshme të dëshmojë për këtë rast , ndërsa i njeh ata që e kanë dhunuar.

Kjo dhunë seksuale është bërë në mënyrë masive. ju e dini shkollën e qerezit ku janë mbledhur gratë e janë dhunuar sistematikisht, mes tyre kemi dhe femra të mbytura në puse”, tha Flora Brovina deputete e Kosovës.

Kuvendi pritet të ka votojë formimin e një komisioni shtetëror që do të merret me mbledhjen e të dhënave dhe dokumentimin e krimeve që ka bërë Serbia gjatë luftës në Kosovë e të cilat pritet të adresohen në drejtësinë vendore e ndërkombëtare. Pritet edhe votimi për ndërtimi e Muzeut të Gjenocidit. Eksponatet e rrobave të të vrarëve dhe artefaktet e personave të zhdukur gjatë luftës në Kosovë që do të barten në Muzeun e Gjenocidit ruhen këtu.

Aktualisht janë 948 pako me sende dhe rroba të personave të vrarë. Këtë vend gjatë ditës e ka vizituar kryeparlamentari Kadri Veseli, i shoqëruar nga drejtori i Institutit të mjekësisë ligjore, Arsim Gërxhaliu .

Do të jetë e pafalshme nëse Bashkësia Ndërkombëtare nuk e përkrahë iniciativën për Tribunalin Ndërkombëtar. Serbia duhet të distancohet nga krimet që kanë ndodhur dhe të dënohen kriminelët. E kemi për obligim që këto rroba të fëmijëve të vrarë të mos i varrosim, deklaroi Veseli.

Këtu është rasti tjetër i një femre, ku janë gjurmët e prerjes me thikë të rrobave, tha Arsim Gerxhaliu nga Instituti i Mjekësisë Ligjore.

Gjithashtu te stacioni hekurudhor në Fushë Kosovë pritet të ndërtohet Memoriali i Dëbimit./ABC News Albania 24/7

PARLAMENTI-EUROPIAN-PER-SHQIPERINE-1280x720.jpg
G. P.22:00 | 29/04/2019

Parlamenti Europian publikon një video të shkurtër për të inkurajuar qytetarët europianë që të dalin në votime për zgjedhjet e parlamentit europian në 26 Maj. Videoja u është shpërndarë të gjitha shteteve anëtare.

Duhet më pak se një muaj nga zgjedhjet për Parlamentin Europian, në 26 Maj. Për të inkurajuar qytetarët që të votojnë, Parlamenti Europian ka publikuar një video me titullin “Zgjidh të ardhmen”. Qëllimi i videos – së xhiruar nga Frédérik Plankon – është promovimi i pjesëmarrjes në zgjedhjet e ardhshme europiane, të cilat janë vendimtare për brezat e ardhshëm që duhet të bashkëjetojnë me pasojat e kësaj vote. Filmi ka filluar të shpërndahet online në të gjitha vendet e Bashkimit Europian, që nga data 25 Prill.

Filmi tregohet nga një vajzë e re e cila i bën apel ndjenjës së përgjegjësisë së zgjedhësve: “Çdo kush nga ne mund të lërë një shenjë, por së bashku mund të bëjmë ndryshimin. Zgjidh Europën në të cilën do doje që të rritesha”.

Sipas një sondazhi telefonik të kryer në muajin prill, 80% e qytetarëve bien dakord për faktin se ajo që i bashkon europianët është më e rëndësishme se ajo që i ndan. Negociatat në vijim për Brexit, kanë dëshmuar pasiguritë e krijuara nga një dalje e mundshme dhe rreziqet që mund të vijnë si pasojë e braktisjes së mbrojtjes nga ana e Bashkimit europian.

Pyetjes se cilat janë ndjesitë e para kur mendohet për bashkimin europian, pjesa më e madhe e europianëve janë përgjigjur: shpresë ose besim, 55% e tyre. Ndërsa pasiguria për të ardhmen e europës krijon dyshime si ndjesi të parë, për një të tretën e qytetarëve europianë të pyetur.

Debate për Brexit ka dëshmuar dhe se sa janë ndërlidhur vendet e bashkimit europian në vitet e fundit si dhe avantazhet e shumta që vijnë nga të qenurit anëtar i një klubi më të gjerë.

Këto përfitime ndonjëherë janë të dukshme vetëm përballë perspektivës se mund të humben. Të dhënat nga eurobarometri për pranverën 2019, 19 Shkurt – 4 Mars, reagojnë se më shumë se dy të tretat e europianëve mendojnë se BE i ka sjellë përfitime vendit të tij dhe 61 për qind mendojnë se BE është diçka pozitive.

Ndër të tjera presionet e jashtme që vijnë nga vendet e treta i imponojnë shteteve anëtare të BE që të qëndrojnë më të bashkuar, nëse dëshirojnë të kenë influencë për të pasur peshë politike në rendin e ri botëror.

Eurobarometri i pranverës tregon se qytetarët janë të interesuar mbi të gjitha për ekonominë, punësimin, migracionin, ndryshimet klimatike dhe luftën kundër terrorizmit; të gjitha këto elemente që tregojnë domosdoshmërinë e bashkëpunimit dhe aksionit të përbashkët.

E ardhmja e Europës është në duart e atyre që do të shkojnë të votojnë në zgjedhjet europiane. Edhe pse sipas të dhënave të fundit thuhet se më shumë se një e treta e qytetarëve europiane – 35% ishin  të sigurtë se do të shkonin të votonin, 32% e tyre nuk ishin ende të bindur për të votuar.

Mes të rinjve në moshë për të votuar, dhe pse normalisht kanë një qasje më pozitive ndaj bashkimit europiane, vetëm 21 për qind e tyre pranuan se do të votonin ndërsa 34 për qind nuk kishin vendosur akoma./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono