Debate

deputetja-kosove.jpg
nev ila16:15 | 16/05/2019

Deputetja Flora Brovina, posedon një dëshmi që do ta paraqesë për krimet serbe në Kosovë, e ku shihet një grua duke u dhunuar nga serbët, ndërsa prapa janë familjarët e saj. Brovina ka thënë se kjo grua është ende gjallë dhe është e gatshme të dëshmojë për këtë rast , ndërsa i njeh ata që e kanë dhunuar.

Kjo dhunë seksuale është bërë në mënyrë masive. ju e dini shkollën e qerezit ku janë mbledhur gratë e janë dhunuar sistematikisht, mes tyre kemi dhe femra të mbytura në puse”, tha Flora Brovina deputete e Kosovës.

Kuvendi pritet të ka votojë formimin e një komisioni shtetëror që do të merret me mbledhjen e të dhënave dhe dokumentimin e krimeve që ka bërë Serbia gjatë luftës në Kosovë e të cilat pritet të adresohen në drejtësinë vendore e ndërkombëtare. Pritet edhe votimi për ndërtimi e Muzeut të Gjenocidit. Eksponatet e rrobave të të vrarëve dhe artefaktet e personave të zhdukur gjatë luftës në Kosovë që do të barten në Muzeun e Gjenocidit ruhen këtu.

Aktualisht janë 948 pako me sende dhe rroba të personave të vrarë. Këtë vend gjatë ditës e ka vizituar kryeparlamentari Kadri Veseli, i shoqëruar nga drejtori i Institutit të mjekësisë ligjore, Arsim Gërxhaliu .

Do të jetë e pafalshme nëse Bashkësia Ndërkombëtare nuk e përkrahë iniciativën për Tribunalin Ndërkombëtar. Serbia duhet të distancohet nga krimet që kanë ndodhur dhe të dënohen kriminelët. E kemi për obligim që këto rroba të fëmijëve të vrarë të mos i varrosim, deklaroi Veseli.

Këtu është rasti tjetër i një femre, ku janë gjurmët e prerjes me thikë të rrobave, tha Arsim Gerxhaliu nga Instituti i Mjekësisë Ligjore.

Gjithashtu te stacioni hekurudhor në Fushë Kosovë pritet të ndërtohet Memoriali i Dëbimit./ABC News Albania 24/7

PARLAMENTI-EUROPIAN-PER-SHQIPERINE-1280x720.jpg
G. P.22:00 | 29/04/2019

Parlamenti Europian publikon një video të shkurtër për të inkurajuar qytetarët europianë që të dalin në votime për zgjedhjet e parlamentit europian në 26 Maj. Videoja u është shpërndarë të gjitha shteteve anëtare.

Duhet më pak se një muaj nga zgjedhjet për Parlamentin Europian, në 26 Maj. Për të inkurajuar qytetarët që të votojnë, Parlamenti Europian ka publikuar një video me titullin “Zgjidh të ardhmen”. Qëllimi i videos – së xhiruar nga Frédérik Plankon – është promovimi i pjesëmarrjes në zgjedhjet e ardhshme europiane, të cilat janë vendimtare për brezat e ardhshëm që duhet të bashkëjetojnë me pasojat e kësaj vote. Filmi ka filluar të shpërndahet online në të gjitha vendet e Bashkimit Europian, që nga data 25 Prill.

Filmi tregohet nga një vajzë e re e cila i bën apel ndjenjës së përgjegjësisë së zgjedhësve: “Çdo kush nga ne mund të lërë një shenjë, por së bashku mund të bëjmë ndryshimin. Zgjidh Europën në të cilën do doje që të rritesha”.

Sipas një sondazhi telefonik të kryer në muajin prill, 80% e qytetarëve bien dakord për faktin se ajo që i bashkon europianët është më e rëndësishme se ajo që i ndan. Negociatat në vijim për Brexit, kanë dëshmuar pasiguritë e krijuara nga një dalje e mundshme dhe rreziqet që mund të vijnë si pasojë e braktisjes së mbrojtjes nga ana e Bashkimit europian.

Pyetjes se cilat janë ndjesitë e para kur mendohet për bashkimin europian, pjesa më e madhe e europianëve janë përgjigjur: shpresë ose besim, 55% e tyre. Ndërsa pasiguria për të ardhmen e europës krijon dyshime si ndjesi të parë, për një të tretën e qytetarëve europianë të pyetur.

Debate për Brexit ka dëshmuar dhe se sa janë ndërlidhur vendet e bashkimit europian në vitet e fundit si dhe avantazhet e shumta që vijnë nga të qenurit anëtar i një klubi më të gjerë.

Këto përfitime ndonjëherë janë të dukshme vetëm përballë perspektivës se mund të humben. Të dhënat nga eurobarometri për pranverën 2019, 19 Shkurt – 4 Mars, reagojnë se më shumë se dy të tretat e europianëve mendojnë se BE i ka sjellë përfitime vendit të tij dhe 61 për qind mendojnë se BE është diçka pozitive.

Ndër të tjera presionet e jashtme që vijnë nga vendet e treta i imponojnë shteteve anëtare të BE që të qëndrojnë më të bashkuar, nëse dëshirojnë të kenë influencë për të pasur peshë politike në rendin e ri botëror.

Eurobarometri i pranverës tregon se qytetarët janë të interesuar mbi të gjitha për ekonominë, punësimin, migracionin, ndryshimet klimatike dhe luftën kundër terrorizmit; të gjitha këto elemente që tregojnë domosdoshmërinë e bashkëpunimit dhe aksionit të përbashkët.

E ardhmja e Europës është në duart e atyre që do të shkojnë të votojnë në zgjedhjet europiane. Edhe pse sipas të dhënave të fundit thuhet se më shumë se një e treta e qytetarëve europiane – 35% ishin  të sigurtë se do të shkonin të votonin, 32% e tyre nuk ishin ende të bindur për të votuar.

Mes të rinjve në moshë për të votuar, dhe pse normalisht kanë një qasje më pozitive ndaj bashkimit europiane, vetëm 21 për qind e tyre pranuan se do të votonin ndërsa 34 për qind nuk kishin vendosur akoma./abcnews.al

maqedoni-bashkesia-islame-1280x695.jpg
Sej rie16:20 | 24/04/2019

Bashkësia Fetare Islame në Maqedoninë e Veriut e cilësoi si skandal primitiv një vendim të debatueshëm të Gjykatës Themelore të Shkupit, e cila për kryetar të këtij institucioni në vend të reis Sulejman efendi Rexhepit, të zgjedhur nga Rijaseti, organ më i lartë i komunitetit mysliman në Maqedoninë e Veriut emëroi Skënder Buzakun, i cili prej kohësh përpiqej të merrte këtë post. Rexhepi u shpreh se kjo tregon se në vend nuk ka institucione, por shtet policor.

‘Kur ligjin e bën Maliqi’, thotë shprehja popullore, punët dalin nga shinat. Pa çka se është kohë fushate, kohë zgjedhjesh dhe një votë mund të jetë edhe përcaktuese. Kur instrumentalizohet sistemi i drejtësisë, atëherë bie në ujë gjithë angazhimi për shtet të së drejtës, për inaugurim të përgjegjësisë apo edhe llogaridhënies.

Larg asaj të mbrohet BFI-ja dhe kreu i saj, për të bëra a të pabëra, por të vijë në shprehje e drejta. E drejta kushtetuese, më saktësisht. Neni Nëntëmbëdhjetë i Kushtetutës, me ndryshim-plotësimet me Amendamentin e 7 dhe të 8, thotë se bashkësitë fetare janë të ndara nga shteti dhe të barabarta para ligjit. Implikimi i Gjykatës Themelore Shkupi II përmes aktvendimit të shumë-debatueshëm që në Fletoren Zyrtare të figurojë një emër i si i pari i Bashkësisë Fetare Islame, vetëm se e shpërfaq brishtësinë e gjyqësorit për t’u dhënë të drejtë atyre të cilët thonë se edhe pas ndryshimeve, i njëjti vazhdon të dirigjohet nga politika apo edhe nga grupe të interesit.

Nuk janë për t’u besuar pretendimet se përpjekja e së martës për një puç të ri në Bashkësinë Fetare Islame është rezultat i pakënaqësisë së shtabit të kandidatit presidencial të koalicionit qeverisës me votat e arkëtuara në mjediset ku pjesëtarët e fesë islame përbëjnë shumicë, ani që me to, thonë ekspertët e fushës, i njëjti siguroi epërsinë ndaj rivales nga tabori tjetër, sado e ngushtë qoftë ajo, por edhe çdo arsyetim a pretekst tjetër nuk e zhbën bindjen se: ndërhyrja ishte e qëllimshme! Kjo për shkak se logjika e bërjes së punëve me hyxhym, në stilin ‘vet shkruaj e vet vulos’, pa përfillur rregullat e lojës, fundin e ka të hidhur dhe punët mund t’i nxjerrë jashtë kontrollit.

Ata që dje u munduan të bëjnë diçka përtej normave kushtetuese të Republikës së Maqedonisë së Veriut, por edhe përtej normave të Kushtetutës së BFI-së, në pikun e fushatës, për interesa të politikës apo të grupeve të interesit, do të duhej ta dinë se – për një plesht nuk digjet jorgani!/abcnews.al

fermeret-e-dibres-1280x737.jpg
Sej rie14:45 | 22/04/2019

Agjencia e Zhvillimit Bujqësor dhe Rural organizoi një takim me fermerët e Dibrës për çeljen e thirrjes për aplikim për subvencionet e vitit 2019 ku nuk munguan edhe debatet. Sipas drejtuesve te AZHBR këtë vit subvencionet nuk do të përfshijnë të gjitha produktet bujqësore.

Për qarkun e Dibrës subvencione do të përfitojnë vetëm qumështi , gjedhët dhe frutikultura , por siç edhe ato vetë  e pranojnë fondet janë të limituara.

Nga ana tjetër fermerët ankohen pasi për çdo vit kanë aplikuar dhe janë s’kualifikuar sipas tyre pa asnjë argument bindës. Pjesa më e madhe e prodhuesve te qumështit si shkak për s’kualifikimin kanë analizën e këtij produkti, për të cilën akuzojnë AKU – në se analizat merren në Dibër dhe kryhen në Shkodër./abcnews.al

canaj.png
G. P.15:00 | 03/04/2019

Sërish presione dhe kërcënime për trajnerin tek Vllaznia. Situata është e tensionuar, ndërsa Agim Canaj nuk është tekniku i parë që provon një problem të tillë.

Duket e pamundur që këtu të ketë qetësi. Agim Canaj u bë trajneri i radhës tek Vllaznia, që ndjen presionin, edhe pse ka vetëm pak ditë në detyrë. Lajmet nga Shkodra janë që seanca stërvitore është braktisur pas debateve të Canajt me disa lojtarë, që kishin pretendime për të luajtur.

Gjithsesi, informacionet janë kontradiktore. Burime në klub pohuan për Abc News-in se ngjarja ndodhi që të martën, ndërsa shtuan se nuk pati kërcënime, dhe se nuk pati ndërprerje të seancës, që përfundoi normalisht.

Po ashtu, burimi i mësipërm deklaroi se për të mërkurën nuk ishte planifikuar seancë stërvitore. Klubi i Vllaznisë nuk ka bërë asnjë koment, por pritet që të ketë një mbledhje mes drejtuesve, stafit teknik dhe lojtarëve për të diskutuar problemet.

Nuk është hera e parë që skuadra shkodrane, më e vjetra në Shqipëri, bëhet lajm për ngjarje të tilla.

Ish-trajneri Ernest Gjoka u kërcënua sezonin e kaluar, po ashtu besohet se presione të forta pati ish-trajnerit tjetër, Cungu, ndërsa një nga drejtuesit e sotëm, Suad Lici, është shprehur se janë kërcënuar me armë.

Vetë kryetarja e Bashkisë, Ademi, i pohoi problemet, në emisionin “Presing” në Abc Neës”. Po ashtu, ish-lojtari dhe trajneri shkodran, Edi Martini./abcnews.al

gent-cakaj-1.jpg
G. P.18:14 | 27/03/2019

Ministri në detyrë në Ministrinë për Evropën dhe Punët e Jashtme, Gent Cakaj, ka paralajmëruar të tjera shkarkime në institucionin që është ngarkuar të drejtojë. I thirrur për të raportuar në komisionin e jashtëm ministrit në detyrë i ka kërkuar sqarime mbi këto largime deputetja e Partisë Demokratike, Rudina Hajdari.

Ka më pak se një vit në Ministrinë për Evropën dhe Punët e Jashtme, por i ka mjaftuar për të arritur në përfundimin se diplomacia shqiptare ka çaluar në 5 vitet e fundit.

“Nëse për 5 vite ka pasur punë të zellshme nuk ka nevojë për përmirësime? Jo. Kjo nuk qëndron. Me thoni ju nëse unë duhet të jem thjesht repredikuesi pasiv i një politike që ka ekzistuar deri tash? Jo unë jam pjesë e trashëgimisë së asaj ministrie sepse kam shërbyer edhe si zv/ministër, por po ashtu jam i gatshëm të thelloj reformat dhe të ndërmarr veprime të guximshme, të cilat nuk janë cenim i punës, por parashtrojnë kushtet objektive që të rinjtë dhe të reja e këtij vendi me rezultate të shkëlqyeshme të bëhen pjesë e diplomacisë”, tha Cakaj.

I thirrur në komisionin e jashtëm për të folur për integrimin e Shqipërisë në Bashkimin Evropian, ministri në detyrë Gent Cakaj i duhej të sqaronte opozitën e re në këtë komision se ndryshimet janë të domosdoshme në institucionin që i është ngarkuar nga kryeministri që ta drejtojë.

“Për një pjesë prej tyre është shkëputur për shkak se me sjelljen e tyre kanë tejkaluar sjelljen dinjitoze të diplomatit. Për një pjesë prej tyre ka probleme të evidentuara me sjelljen e tyre dhe për pasojë ka masa disiplinore dhe për një pjesë të tyre thjesht kanë qëndruar në sistem tepër gjatë dhe kanë pasur kontribut tepër pak për të merituar vazhdimin mëtejmë në shërbimin diplomatik të shtetit shqiptar”, tha ai.

Të tjera valë ndryshimesh paralajmëron ministri në detyrë Gent Cakaj. Por këto masa nuk e bindin deputeten Rudina Hajdari se drejtuesi i ministrisë po bën gjënë e duhur.

“Ish-ministri i Jashtëm Bushati në qeverinë tuaj tha që po lë një grup të shërbimit diplomatik që është më i afti. Ai ishte gati gjashtë vjet ministër. Çfarë bëri ky djalë kaq kohë në atë shërbim? A e rriti cilësinë e duhur? Pra kemi një proces shumë të gjatë”, tha Hajdari.

“Zoti Bushati për ju nuk është një djalë, por është ministri me mandatin më të gjatë në cilësinë e kryediplomatit në historinë e pluralizmit të shtetit shqiptar. Bushati ka thënë një të vërtetë të madhe që ka lënë një administratë ambicioze pas vetes, e ndërtuar ndër vite. Kjo nuk do të thotë që nuk ka nevojë për përmirësime”, tha Cakaj nga ana tjetër.

Rolin e rregullatorit midis përfaqësuesit të qeverisë dhe opozitës e mori përsipër kryetari i grupit parlamentar Taulant Balla.

“Shumë mirë e keni bërë sepse opozita atë punë ka. Sigurisht duhet të ankohet për çdo gjë. Siç referojnë dhe mediat sot ka lobuar edhe kundër ambasadorëve të huaj që duhet të vijnë në Shqipëri se mbaroi hallet e Shqipërisë dhe tani merret edhe me lobingun kundër ambasadorëve që duhet të vijnë në Shqipëri. Harxhon dhe para madje për këtë punë, por kur e humb toruan, s’ka burrë nëne që të kthen në dine thotë populli, kështu që vazhdoni punën që keni nisur. 20 janë pak”, tha Balla.

Për një pikë ranë të gjithë dakord, hapat e shpejtë që duhet të hidhen për të përmbushur kushtet për t’u bërë pjesë e Bashkimit Evropian./abcnews.al

debate.jpg
G. P.16:59 | 18/03/2019

Është shoqëruar me debate komisioni i Sigurisë për raportin vjetor të SHÇBA-së. Drejtuesi i saj, Muhamet Rrumbullaku, kërkoi fonde dhe shtim të personelit, pasi veprimet kryen akoma në mënyrë manuale. Ndërkaq, disa anëtarë të komisionit kërkuan informacion për lëvizjet e fundit në Policinë e Shtetit.

Shërbimi për Çështjet e Brendshme dhe Ankesave në varësi të Ministrisë së Brendshme është përdorur si kamxhik në dorën e ministrave për të lëvizur apo larguar nga detyra punonjës të Policisë së Shtetit ndër vite.

Kështu u shpreh në Komisionin e Sigurisë, kreu i SHÇBA-së, Muhamet Rrumbullaku, të mbajtur me dyer të mbyllura. Bashkë me dy vartësit e tij, Rrumbullaku kërkoi që Shërbimi për Çështjet e Brendshme dhe Ankesave të jetë i pavarur nga titullari i ministrisë, gjë që do të ndihmonte në rritjen e performancës së efektivëve si edhe objektivitetin e institucionit.

ABC News ka mësuar se ka pasur edhe debate ndërmjet anëtarëve të komisionit dhe drejtuesit të SHÇBA për lëvizjet që janë kryer në polici në nivel drejtuesi me urdhër të kreut të Policisë së Shtetit, Ardi Veliu.

Sipas Rrumbullakut, disa nga ndryshimet u bënë falë edhe hetimeve proaktive të shërbimit që ai drejton, ndërsa shtoi se ka filluar edhe ecuria disiplinore për shumë prej tyre.

Një tjetër kërkesë që u bë në raportin vjetor të SHÇBA-së, ishte edhe kërkesa për të shtuar personelin, ku jo vetëm që ka mungesë në baza materiale por nuk ka, as mjaftueshëm staf për të ndjekur dinamikën e punonjësve të policisë në rrethe.

“Shënimet oficerët e mi i mbajnë akoma manualisht me bllok dhe me laps, ndërsa në shumë zyra mungon edhe kompjuteri për të ruajtur të dhënat”, u shpreh Rrumbullaku.

Gjithashtu kreu i Shërbimit për Çështjet e Brendshme dhe Ankesave theksoi se, nëse nuk shtohet personali që ai ka në varësi, atëherë procesi i Vetting-ut në radhët e policisë mund të kryhet brenda pesë viteve të ardhshme./abcnews.al

citaku.jpg
G. P.10:53 | 08/02/2019

Dje në mbledhjen e Këshillit të Sigurimit të OKB-së, Kosova dhe Serbia përballen qëndrime të ashpra dhe krejt të kundërta lidhur me taksën e vendosur nga qeveria kosovare për mallrat serbe. SHBA, por edhe të gjithë anëtarët e tjerë të Këshillit të Sigurimit i kërkuan Kosovës heqjen e kësaj takse. Ata kërkuan që dy vendet të vazhdojnë negociatat për arritjen sa më parë të një marrëveshjeje.

Vendimi i qeverisë së Kosovës për vendosjen e taksës prej 100 për qind në mallrat e Serbisë dhe Bosnje Hercegovinës në Nëntor të vitit të kaluar dominoi diskutimet në takimin e Këshillit të Sigurisë së OKB-së. Qëndrimi amerikan në OKB ishte i qartë dhe i prerë për heqjen e kësaj takse nga qeveria e Prishtinës. Përfaqësuesi amerikan, Jonathan Cohen, ka thënë Shtetet e Bashkuara besojnë që marrëveshja mes të Kosovës dhe Serbisë mund të arrihet këtë vit. Megjithatë, ai tha se para se të ndodhë një gjë e tillë, autoritetet e Kosovës duhet të heqin taksën ndaj produkteve serbe.

Qëndrimi i Uashingtonit kundër taksës 100% u mbështet edhe nga Gjermania. Por përfaqësuesit e dy vendeve u shprehën të ndarë sa i takon rrugës së arritjes së marrëveshjes Kosovë-Serbi. Ndërsa SHBA e lë të hapur mundësine e ndryshimit të kufijve, Berlini e ka kundërshtuar me forcë këtë opsion. Ambasadori i Gjermanisë në Këshillin e Sigurimit, tha se e vetmja rrugë për integrimin e Serbisë në Bashkimin Evropian është njohja e Kosovës, ndërsa kritikoi fushatën e ministrit serb Daçiç për tërheqjen e njohjeve të pavarësisë së Kosovës.

Ministri i jashtëm serb, Ivica Daçiç, tha se vendimi për vendosje të taksës nga autoritetet e Kosovës është dënuar nga faktorët ndërkombëtarë, përfshirë aleatët e Prishtinës. Sipas tij, masa ndaj produkteve serbe, të cilën e ka quajtur drakonike, ka pasur për qëllim të vështirësojë jetën e komunitetit serb në Kosovë. Daçiç u shpreh se thirrjet për bashkim të Mitrovicës kanë për qëllim dëbimin e serbëve nga ky qytet. Ai  ka përmendur edhe fillimin e punës së Gjykatës Speciale për Krime të Luftës në Kosovë, duke thënë se Serbia pret që aktakuzat e para të bëhen publike shumë shpejt, për të gjykuar ato që ai i ka quajtur si “krime ndaj serbëve dhe personave tjerë që nuk kanë qenë shqiptarë”.

Por ambasadorja e Kosovës në Shtetet e Bashkuara, Vlora Çitaku tha se ky Këshill është kthyer në teatër nga Serbia dhe është bërë vend ku autoritetet serbe tregojnë përralla që nuk besojnë as ata vetë. Ajo theksoi se UNMIK-u nuk ka rol dhe as mandat për ta ushtruar në Kosovë, ndërsa i bëri thirrje Serbisë që të “çlirohet nga Kosova” dhe ta njohë realitetin.

Vendosjen e takses 100%,  Çitaku e quajti vendim jo të lehtë, por të detyruar, si përgjigje ndaj fushatës së ashpër të Serbisë kundër Kosovës. Sa i përket miratimit të ligjit për transformimin e Forcës së Sigurisë së Kosovës në ushtri, ambasadorja Çitaku e quajti vendimin ligjor dhe kushtetues, në mënyrë që të krijohen mekanizma të sigurisë dhe që Kosova të kontribuojë në organizata ndërkombëtare. Sipas saj, ky vendim ka treguar maturinë e Kosovës si shtet./abcnews.al

debat.jpg
G. P.14:59 | 05/02/2019

Dy orë debat zhvilloi Komisioni i Medias ditën e martë ku votoi edhe ndërtimin e një kalendari për dëgjesa me grupe interesi sa i përket Ligjit për Arsimin e Lartë.

Debat në komisionin e edukimit dhe medias, kërkoi mbledhja e Asamblesë së Pedagogëve të Unviersitetit të Tiranës një ditë më parë…dhe debat mori. Duket e thjeshtë, por jo. Dy orë debat ju deshën deputetëve për të vendosur atë për ç’ka vetë deklaronin se ishin të gjithë dakord.

Komisioni i Edukimit dhe Medias vendosi të krijojë një kalendar për dëgjesa me grupe të interesit lidhur me Ligjin për Arsimin e Lartë, duke nisur ditën e mërkurë me rektorët dhe të premten me përfaqësinë e asamblesë që formuloi kërkesën për takim më ligjvënësin./abcnews.al

komisioni-1280x703.jpg
G. P.16:35 | 04/02/2019

Në Komisionin Parlamentar të Shëndetësisë sot pati debate mes deputetëve opozitarë dhe ministres Ogerta Manastirliu. Në fokus të sulmeve të deputetëve opozitarë ishte koncesioni i check-up, ndërsa ministrja foli për investimet në shëndëtësi.

Komisioni i Shëndetësisë zhvilloi seancë dëgjimore me ministren e Shëndetësisë, Ogerta Manastirliu me rastin e ditës botërore të luftës kundër kancerit. Teksa ministrja Manastirliu po bënte bilancin dhe arritjet e qeverisë në shëndetësi, nuk munguan debatet e ashpra mes saj dhe nëkryetarit të Komisionit, Bardh Spahia për koncesionet e Check Up-it

Deputeti Spahia e akuzoi ministren për mungesë serioziteti për një çështje aq serioze siç është lufta kundër kancerit.

Ministrja e Shëndetësisë, Manastirliu shmangu akuzat e PD-së, duke theksuar se qeveria ka investuar në shëndetësi dhe është shtuar buxheti për të.

Ministrja e shëndetesisë theksoi se prej muajsh nuk ka më mungesë medikamentesh për sëmundjet tumorale, pasi shteti ka garantuar furnizimin e tyre për çdo pacient./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono