daniela zisi

banesa-shtepi.jpg
ad min14:14 | 28/08/2019

Nisja e ndërtimit të shtëpive të para, që u shkatërruan nga tërmeti i Qershorit në Korçë solli shpresë tek banorët se vjeshta nuk do t’i gjente në qiell të hapur. Por procesi po zvarritet dhe kjo e ka bërë të largët ditën, kur çdo familje e prekur nga tërmeti të kthehet në banesat e rindërtuara. Le të ndjekim reportazhin e përgatitur nga gazetarja e Abc News në Korçë Daniela Zisi dhe operatori Roland Beqiraj.

Në shkollën e Floqit, prej tre muajsh vazhdojnë të jetojnë mbi 20 familje, shtëpitë e të cilëve janë të pabanueshme. Deri tani ka filluar ndërtimi vetëm në pesë prej banesave të rrënuara, çfarë ka detyruar banorët të përgatiten që dimrin ta kalojnë në ambientet e shkollës.

Edhe pse procesi mësimor do edhe pak ditë të fillojë,duket se nxënësit dhe familjet e dëmtuara nga tërmeti do të ndajnë të njëjtën ndërtesë,në pamundësi për të gjetur alternativa të tjera strehimi.

“Këtu do qëndroj. Ku të vete? Të shkoj në shtëpi të bjerë guri të mi pëlcasin trutë fëmijëve”.

“S’kam ku të vete, me 6 fëmijë”.

“Të pengoj fëmijët e tjerë keq më vjen. Shteti të mendojë se brenda muajit e bën Floqi të ri, Paris”.

Të tjerët janë kthyer në fshat, duke përshtatur kasollet e bagëtive apo oborret ku kalojnë netët. Edhe për ato pak familje shtëpitë e të cilëve kanë filluar të ndërtohen, shqetësim mbetet përfundimi i tyre para ardhjes  së dimrit.

Përpos zvarritjes dhe vonesave, banorët e Floqit pretendojnë se procesi i vlerësimit të dëmeve ka qenë selektiv dhe jo transparent, duke trajtuar me përparësi ato familje që kanë një banesë të dytë dhe nuk janë në kushte emergjence.

Në lagjen që u godit nga tërmeti shumica e banorëve janë kthyer. Dita kalon duke pastruar gërmadhat. Në njërën prej shtëpive më të dëmtuara nga tërmeti, në fakt nuk ka mbaruar as vlerësimi i dëmit. Familja prej tre muajsh fle në haurin e lopës.

Më me fat ishte Artan Ramolli shtëpia e të cilit ka nisur të ndërtohet në Korrik dhe është drejt përfundimit. Brenda pak ditësh familja me tre anëtare do të futet në shtëpinë e re, të cilës po i jepet dora e fundit.

Pak metra më tej ndodhet banesa e Rajmonda Mullajt, e cila ka 90 ditë që pret vlerësimin e dëmeve të tërmetit. Shtëpisë i kanë lëvizur themelet dhe çarë muret, por komisioni nuk ka mbërritur ende.

“Nuk di ngjë, kam bërë 90 ditë që fle në shkollë, bashkë me burrin”, tha Rajmonda Mullaj.

Procesi i vlerësimit të shtëpive të rrënuara dhe dëmtuara nga tërmeti ka ndeshur edhe me problematikën e pronësisë së paligjëruar ose me mangësi në dokumentacion, duke u pasuar me rishikim disa herë të dosjeve dhe rikthim nga e para të vlerësimit./ABC News Albania 24/7

verdove.jpg
ad min22:29 | 10/07/2019

Nëntë persona të plagosur, dy prej të cilëve në gjendje të rëndë është bilanci i aksidentit të rëndë që ndodhi në fshatin Vërdovë të Pogradecit.  Mësohet se të rinjtë i përkasin moshave 30-35 vjeç udhëtonin të gjithë në një mjet fuoristradë.

Gazetarja Daniela Zisi raportoi për Abc News se disa prej të rinjve udhëtonin brenda kabinës së mjetit, ndërsa një pjesë tjetër në pjesën e hapur mbrapa.

“Të rinjtë udhëtonin në të njëjtin mjet. Bëhet fjalë për një mjet tip “Land Rover”. Disa ishin në kabinë, të tjerët kanë qenë në pjesën tjetër të mjetit. Mjeti ka qenë i hapur sepse në fshatrat malore kështu bëhet transporti me mjete fuoristrada që janë të hapura. Disa prej të rinjve kanë qenë brenda kabinës aq sa ka marrë kabina, të tjerët kanë qenë sipër. Duket që më të dëmtuarit kanë qenë ata që kanë qenë në pjesën e hapur të makinës. Paraprakisht këtë shpjegim jep policia për rrethanat në të cilat mund të ketë ndodhur aksidenti gjithsesi pritet që nesër në mëngjes kur të këqyret vendi i ngjarjes më me detaje do të marrim vesh se cili ishte shkaku dhe çfarë ka ndodhur realisht”, tha gazetarja në një lidhje direkte.

Dy personat që ndodhen në gjendje kritike për jetën janë dy vëllezër. Ata janë transportuar për të marrë ndihmën e parë në Tiranë. Shtatë të rinjtë e tjerë ndodhen në spitalin e Pogradecit dhe mjekët thonë që gjendja e tyre është e stabilizuar.

Të rinjtë po udhëtonin nga Kalivaçi në drejtim të Pogradecit. Paraprakisht dyshohet se shkak për aksidentin e rëndë të jetë bërë lagështia, por nuk përjashtohet as mundësia e shpejtësisë tej normave të lejuara./abcnews.al

policia pogradec
spitali pogradecit
spitali pogradecit1
shkodraaa.jpg
ad min15:12 | 12/12/2018

Studentët në Korçë, Shkodër, Elbasan përshkallzuan protestën e tyre këtë të mërkurë. Ata bllokuan rrugët nacionale si dhe denoncuan stafet pedagogjike që pengonin gjimnazistët t’i bashkoheshin protestës.

Shkodër – Për më shumë se tre orë tubim studentët e Shkodrës marshuan përmes qytetit duke u bërë thirrje banorëve dhe gjimnazistëve. Ata  u ndalën edhe para ndërtesës së njërit nga gjimnazet. Aty stafi pedagogjik kishte penguar nxënësit t’i bashkoheshin protestës.

“Studentët nuk duan negociata sepse nuk mund t’i besojnë një manipulatori, një njeriu që shfrytëzon rininë për qëllime të veta”, u shpreh një student.

“Do bashkangjitemi me Tiranës sepse atje është lufta”, u shpreh një tjetër.

Korçë – Gjatë pesë orëve protestë në qytetin e Korçës studentët arritën të bllokonin dy rrugët nacionale, atë të Korçë-Pogradec dhe Korçë–Kapshticë.

Më pas ata u informuan për presionet në gjimnaze dhe protestuan para godinave denoncuar hapur mësuesit që penguan nxënësit të protestonin bashkë me ta. Studentët e Korçës ishin të parët këtë të mërkure që nisën protestën para godinës së universistetit për të marshuar më pas drejt bulevardit “Republika”. Më herët drejt Tiranës ishin nisur dy autobusë me studentë që do të qëndrojnë në protestën e kryeqytetit.

Gjirokastër – Në Gjirokastër pati rritje të numrit të studentëve që protestuan. Këtë të mërkurë u boshatisën auditoret dhe protestuesve të ditëve më parë, iu janë bashkuan edhe studentë të tjerë. Ata u grumbulluan para godinës së universitetit dhe qëndruan në heshtje për tre-katër orë.

Vlorë – Studentë të Universitetit “Ismail Qemali” në Vlorë u kërkuan edhe studentëve të tjerë të bojkotojnë mësimin dhe t’i bashkohen atyre.

“Nuk ka dialog, dialogu ynë është në shesh. Jemi kërcënuar, por ne nuk kemi frikë.  Bashkohuni me ne, jo politikë”, janë parrullat e tyre.

Elbasan – Studentët e Elbasanit mbajtën për rreth 3 orë të bllokuar rrugën Elbasan-Tiranë. Fillimisht u grumbulluan para Korpusit të Universitetit dhe më pas marshuan në bulevardin e qytetit.

Autostrada Elbasan-Metalurgji u bllokua në vendin e njohur si “Rrethrrotullimi i luleve”. Por kur konstatuan se automjetet po qarkullonin nga rruga e vjetër, studentët ecën mbi 6 kilometra në këmbë dhe bllokuan rrugën Elbasan-Tiranë tek rrethrrotullimi i Bradasheshit./abcnews.al

Gazetar i ABC News në Shkodër: Simon Shkreli

Gazetar i ABC News në Korçë: Daniela Zisi

Gazetar i ABC News në Gjirokastër: Orges Sako

Gazetar i ABC News në Vlorë: Elton Nika

Gazetar i ABC News në Elbasan: Fatos Salliu


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono