Damian Gjiknuri

damian-gjiknuri.jpg
ad min11:01 | 04/07/2019

Deputeti i mazhorancës Damian Gjiknuri deklaroi këtë të enjte se në pushtet të sjell vetëm vota e qytetarëve.

Gjatë replikës së tij ndaj deputetit të opozitës Ralf Gjoni, i cili kërkoi shkarkimin e Gjiknurit si bashkëkryetar i Reformës Zgjedhore për shkak të përgjimeve, ish-ministri tha se çdo opozitë do armik ose qëllim për t’u bërë e rëndësishme.

Gjiknuri tha se është i gatshëm të propozohet si Presidenti për vetëzgjidhje, kur PD të shkojë në Komisionin për Reformën Zgjedhore.

“Meqë mu përmend emri dua të përmend dy gjëra. Siç duket, çdo opozitë për t’u bërë e rëndësishme do ndonjë armik ose ndonjë qëllim. Ata jashtë parlamentit kishin “Rama ik”, këta këtu na paskan dalë me “Damiani ik”. Harrojnë që në pushtet nuk të sjell as sistemi, as ligjërimi që thua këtu në mikrofon e të duket sikur thua gjëra të mençura, por të sjell vota. Megjithatë nëse vjen PD në Komision të Reformës Zgjedhore ne kemi thënë që dialogu nuk bëhet fjalë vetëm për ju, dialogu është edhe për opozitën jashtë parlamentare. Edhe ajo “të rrini si çeçot” do jetë ajo. Kur të vijnë ata patjetër nga “Rama ik”, “Damiani ik”, unë propozohem si Presidenti për vetëzgjidhje, nuk ka problem fare, kështu që mos kini merak”, tha Gjiknuri./abcnews.al

damian-gjiknuri-1.jpg
ad min12:15 | 19/06/2019

Ish-ministri i Infrastrukturës dhe Energjisë Damian Gjiknuri ka folur për herë të parë në publik, pas audio përgjimeve të publikuara nga gazeta gjermane Bild. Ai këmbënguli në një takim në Vlorë se Partia Socialiste as nuk blen e as nuk shet vota, por figurat kryesore politike të saj, po goditen për qëllime të pastra politike.

“Ne as blejmë vota e as gënjejmë njerëz”.

Është ky reagimi i ish-ministrit Damian Gjiknuri pas publikimit të audio përgjimit ku ai komunikon me një aktivist të Partisë Socialiste, Arben KEshi gjatë zgjedhjeve vendore në Dibër në vitin 2016.

Goditje me qëllime politike i konsideron ish ministri Gjiknuri këto publikime.

“Ata s’kanë përfaqësi fare në Vlorë, ata e mendojnë Vlorën në xhep pa qenë këtu. Pra, praktikisht këtë bëjnë në gjithë Shqipërinë dhe kjo është arsyeja pse goditem unë, pse goditet Edi Rama, pse goditen figurat kryesore të Partisë Socialiste”, tha Gjiknuri.

Për socialistin Gjiknuri opozita nuk kërkon zgjedhje por mjaftohet me hedhje shashkash të gatuara në kuzhinën e Partisë Demokratike dhe njëkohësisht duan të nxisin njerëz për dhunë.

“Ne nuk do t’i lejojmë”, tha ai.

Këto deklarata drejtuesi politik i socialistëve në Qarkun e Vlorës Damian Gjiknuri i bëri gjatë një takimi me banorët e Rajonit Nr.1 dhe të njësisë Novoselë ku prezantoi kandidatin për kryebashkiak Dritan Leli./ABC News Albania 24/7

damian-gjiknuri.jpg
nev ila16:41 | 17/06/2019

Në përgjimet e publikuara sot nga gazeta ‘Bild’,  është përfshirë edhe ish-ministri i Energjisë Damian Gjiknuri, njëkohësisht deputet i qarkut të Vlorës.

Gjatë komunikimit me Arben Keshin, drejtor në Ministrinë e Brendshme, Gjiknuri e njofton se do i dërgojë një furgon me ‘çuna problematikë’, për t’i patur aty për çdo nevojë.

Biseda e plotë:

Damian Gjiknuri: Ç’a bohet?

Arben Keshi: Asgjë

Damian Gjiknuri: Ndonjë merak, ndonjë gjë?

Arben Keshi: Po duhet të vijnë tani deputetët, se kanë ardhur ata të PD-së

Damian Gjiknuri: Tani do të vijnë ata, se si duket kanë fjetur pak se kanë qenë gjithë natën aty. Tani do të vijnë.

Arben Keshi: Unë nuk kam fjetur fare

Damian Gjiknuri: E di, e di, tani janë duke ardhur.

Arben Keshi: Të dalin nëpër qendra, te njerëzit tanë.

Damian Gjiknuri: Patjetër

Arben Keshi: Vëzhguesit e tyre janë nga rrethet, nuk i njeh njeri.

Damian Gjiknuri: E di, ashtu i kanë sjellë ata sepse nuk kanë besim te të vetët. Nejse, unë do të çoj edhe disa çuna t’i kesh aty ti, një furgon, të jetë aty.

Arben Keshi: Mirë

Damian Gjiknuri: Do t’i nis disa që të rrijnë aty, do vijnë te shtabi jot për çdo rast. Por mos të dalin shumë ata sepse janë nga ata tipat problematik, po gjithsesi të jenë aty për çdo rast.

Arben Keshi: Në rregull./abcnews.al

MBULIM-KOMISIONI-REFORMES_ABC-M2-T1.mpg_snapshot_00.03-1280x720.jpg
ad min15:15 | 24/05/2019

Komisioni i Posaçëm Parlament për Reformën Zgjedhore është mbledhur ditën e sotme nën drejtimin e Damian Gjiknurit nga Partia Socialiste dhe Rudina Hajdarit nga grupimi opozitar në Kuvend.

Ky komision vendosi që brenda muajit Korrik të hapen konsultimet publike për çështjen e sistemit zgjedhor, nëpërmjet një tryeze gjithëpërfshirëse. Gjithashtu deputetët u dakordësuan që brenda 31 Korrikut të kenë përfunduar dhe miratuar ndryshimet në kuadër të rekomandimeve bazë të OSBE/ODIHR-it.

Sipas kalendarit, deri në 31 Tetor, komisioni parashikohet që të ketë një produkt për çështjen e financimit të partive politike. Brenda 28 Nëntorit, komisioni do duhet të ketë përmbyllur edhe diskutimet mbi çështjen e sistemit zgjedhor./ABC News Albania 24/7

pd-1.jpg
ad min22:47 | 07/05/2019

Shkodra nga sot ka 200 anëtarë të rinj të Partisë Demokratike. Urimin e mirëseardhjes ja bëri vetë kreu i demokratëve Basha, i cili një mesazh ia dërgoi edhe opozitës së re parlamentare, e cila zhvillonte punime në komisionin e reformës zgjedhore.

Nga Shkodra, ku po mirëpriti në familjen e tij politike 200 anëtarë të rinj, kreu i demokratëve Lulzim Basha një mesazh ja dha kujt në Tiranë po zhvillonte paralelisht mbledhjen e parë të Komisionit të Reformës Zgjedhore.

“Kam një mesazh për ata që janë ulur bashkë me Damian Gjinkurin, të pandehurit kryesor të dosjes 284 që duhet të ishte në burg për vjedhje votash, të ulur bashkë me ata që janë kapur në përgjime duke blerë e shitur vota, duke kërcënuar demokratët. Zonja dhe zotërinj, ai nuk është Komisioni i Reformës Zgjedhore. Ai është, në pjesën më të madhe, komisioni i paraburgimit të Damian Gjiknurit me shokë”.

Atje do të përfundojë edhe ai që quan dirigjent të krimit elektoral.

“Disa prej këtyre kriminelëve janë prapa hekurave dhe vazhdojnë të bëjnë përpjekje për të drejtuar punët e tyre të pista nga burgu, për të komunikuar me Ramën. Por atyre u themi: mos u mundoni shumë për t’u lidhur në telefon me Edi Ramën. Së shpejti do t’ua sjellim Edi Ramën aty ku jeni ju, bashkë më kriminelët  e tjerë në pushtet”.

Ftesën për bashkim, e bëri me datë 11 Majin dhe vendndodhje bulevardin përpara kryeministrisë./ABC News Albania 24/7

komisioni-1280x818.jpeg
ad min18:04 | 07/05/2019

Në mbledhjen e parë të komisionit të reformës zgjedhore, të rindërtuar me anëtarët e opozitës së re parlamentare, anëtarët votuan miratimin e kalendarit të punës dhe ekspertët që do t’i ndihmojnë. Deputetët e rinj kërkuan ndryshimin e sistemit zgjedhor.

“Rekomandimet e OSBE-së dhe propozimet për ndryshimin e sistemit zgjedhor do të adresohen njëkohësisht nga komisioni i reformës elektorale. Arritja në një draft të gjithë pranuar duket se do të kalojë përmes atij të punuar nga mandate paraardhës i këtij komisioni i drejtuar nga z. Blendi Çuçi dhe Oerd Bylykbashi por u depozitua në mënyrë të njëanshme nga mazhoranca. Për t’u njohur me këtë draft, anëtarët që nuk ishin pjesë e komisionit në mandatin e mëparshëm, do të kenë një muaj kohë që të njihen me këtë draft”.

Vullnetin politik të qeverisë, bashkëkryetari socialist Damian Gjiknuri e njoftoi përmes vendimeve të Këshillit të Ministrave që do të miratojë.

Si përfaqësuese e opozitës parlamentare, Rudina Hajdari theksin e vuri tek kushti që kjo opozitë i vuri mazhorancës për pjesmarrjen e saj, diskutimin për sistemin zgjedhor.

Për këtë të fundit, kreu i misionit të OSBE-së në Tiranë Berndt Borchardt deklaroi se misioni që drejton nuk mund të sjellë propozime, por një këshillë e ka.

Në përfundim komisioni miratoi kalendarin, pa afate kohore për përfundimin e çështjeve që janë për t’u adresuar, afate të cilat do të përcaktohen në mbledhjen e radhës, si dhe ekspertët përkatës. Dritan Cakaj për socialistët dhe një ekspert britanik për demokratët./ABC News Albania 24/7

gjiknuri.jpg
ad min16:29 | 04/05/2019

Partia Demokratike merr zyrtarisht ftesën nga Kuvendi i Shqipërisë për të marrë pjesë në mbledhjen e komisionit të reformës Zgjedhore. Dy bashkëkryetarët e këtij komisioni kanë përcaktuar datën 7 Maj për të zhvilluar mbledhjen e pare me përbërjen e re të anëtarëve.

Damian Gjiknuri dhe Rudina Hajdari kanë vendosur të mbledhin komisionin që drejtojnë së bashku, atë të reformës Zgjedhore. Ftesën për të marrë pjesë ia adresojnë edhe Partisë Demokratike nëpërmjet Sekretarit të Përgjithshëm të Kuvendit duke e siguruar se nuk do të jetë një vëzhgues i thjeshtë.

“Vëzhguesi i Partisë Demokratike, partisë më të madhe të opozitës sipas rezultatit të zgjedhjeve të vitit 2017, do të ketë të drejta të plota që u përkasin bashkëkryetarëve të komisionit”.

Mbledhja e parë me përbërjen e re që mori kartonët jeshilë në parlament do të zhvillohet në 7 Maj në orën 17 ku do të miratohet axhenda e punës së komisionit, ekspertët dhe kërkesa për mbështetje me ekspertizë nga OSBE për sistemin zgjedhor./ABC News Albania 24/7

rudina-hajdari.jpg
ad min11:06 | 03/04/2019

Ndryshimet në kodin zgjedhor dhe miratimi i tyre kanë shkaktuar debat në seancën e sotme parlamentare. Deputetja Rudina Hajdari e ka cilësuar të pasinqertë ftesën për bashkëpunim që socialistët i kanë drejtuar deputetëve të dorëhequr.

“Zoti Gjiknuri pa pikë turpi i shtriu dorën opozitës jashtë që të marrin pjesë në komisionet e ngritura të reformës zgjedhore. Ku është dëgjuar që një ish-deputet që është një qytetar të ketë votë dhe të drejtën e tij të vetos. Kjo ofertë është një mënyrë për të pasur një marrëveshje nën tavolinë me PD-në dapo LSI-në. Kjo zotëri nuk ka për të ndodhur”, tha Hajdari në fjalën e saj.

Kryetari i grupit parlamentar të Partisë Socialiste Taulant Balla është përpjekur ta sqarojë se ky bashkëpunim është i detyrueshëm sipas rekomandimeve të OSBE/ODIHR.

“Pa dashur të bëj replikë me znj.Hajdari dua të them se të gjitha këto janë çështje që duhen ndarë. Çështja e Kodit Zgjedhor ka të bëjë me infrastrukturën e administrimit të procesit zgjedhor. Nevoja për të punuar së bashku për Kodin Zgjedhor ka buruar nga rekomandimet e OSBE/ODIHR. Kemi tre raporte, raportin e zgjedhjeve të 2013-ës, 2015-ës, 2017-ës që ende nuk kemi mundur të transpozojmë në amendamentet e Kodit Zgjedhor të gjitha rekomandimet e ODIHR-it. Komisioni i Posaçëm për reformën zgjedhore ka një mandat: transpozimin e të gjitha rekomandimeve të OSBE/ODIHR në amendamente. Për sa i përket partive të vogla politike, çdo parti e cila financohet nga KQZ përpara zgjedhjeve dhe nuk përmbush detyrimin duhet ti kthejë paratë mbrapsht. Ja kujtoj Partisë Demokratike se duhet ti paguajë KQZ-së 120 milionë lekë, sepse nuk e ka respektuar kuotën gjinore në asnjë prej qarqeve të vendit. 50 veta ka vënë kandidatë në listën e Tiranës dhe nuk i doli koha për të plotësuar kuotën gjinore”, tha Balla./abcnews.al

policia-1.jpg
ad min09:15 | 03/04/2019

Këtë të mërkurë në orën 10:00 do të zhvillohet seanca parlamentare e radhës. Ndërkohë që Kuvendi vazhdon punimet, selia blu ka njoftuar se do të protestojë përpara godinës. Skenari i shoqërimit të çdo seancë parlamentare me protesta para Kuvendit, po përsëritet nga opozita prej rreth 1 muaji e gjysmë, që kur ka nisur aksioni opozitar.

Ndërkohë në seancën e sotme plenare, grupi parlamentar i deputetëve të mazhorancës do të kërkojë shtyrjen me tre muaj të afatit të komisionit të posaçëm parlamentar të reformës zgjedhore.

Gjithashtu ata do të propozojnë Damian Gjiknurin si bashkëkryetar të komisionit të reformës zgjedhore, duke zëvendësuar në këtë post Blerina Gjylametin. Deputetëve të opozitës në parlament do t’u drejtohet një ftesë që të bëhen pjesë e komisionit të posaçëm të reformës zgjedhore./abcnews.al

PARLAMENTI-TE-MARTEN-PA-ORAR.mpg_snapshot_00.12-1280x707.jpg
ad min11:41 | 01/04/2019

Seanca e ardhshme parlamentare do të mbahet të mërkurën në orën 10:00. Lajmi është konfirmuar nga burime zyrtare nga Kuvendi i Shqipërisë. Pas këtij njoftimi edhe opozita po organizohet për protestën e radhës.

Burime nga selia blu thanë për ABC News se edhe të mërkurën do të ketë proteste para Kuvendit, ndërkohë që në sallë mbahet seanca plenare. Skenari i shoqërimit të çdo seancë parlamentare me protesta para Kuvendit, po përsëritet nga opozita prej rreth 1 muaji e gjysmë, që kur ka nisur aksioni opozitar.

Grupi i deputetëve të mazhorancës socialiste vendosi gjithashtu se do të kërkojë në seancën parlamentare të radhës, shtyrjen me tre muaj të afatit të komisionit të posaçëm parlamentar të reformës zgjedhore.

Socialistët do të propozojnë Damian Gjiknurin si bashkëkryetar të komisionit të reformës zgjedhore, duke zëvendësuar në këtë post Blerina Gjylametin. Deputetëve të opozitës në parlament do tu drejtohet një ftesë që të bëhen pjesë e komisionit të posaçëm të reformës zgjedhore./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono