Damian Gjiknuri

vlcsnap-error873-2-1280x720.jpg
gra moz22:15 | 23/02/2018

Qeveria ka prezantuar planet për zhvillimin e Beratit. Projektet janë përqendruar në të gjithë sektorët. Qëllimi kryesor pas zbatimit të tyre është që i gjithë qarku të ketë mundësi të zhvillojë turizëm 12 muajt e vitit.

Këto përshkrime dy ministrat e qeverisë nuk ia dedikojnë Beratit sepse është vërtet i tillë por duan të thonë se qyteti i një mbi një dritareve do të marrë përkujdesjen e tyre.

13 .2 miliardë lekët që janë investuar nga viti 2013-2017 janë vetëm një tregues i ndryshimeve që ka pësuar qarku Berat. Duke risjellë në vëmendje aksionin e pastrimit kreu i qeverisë tha se një prej përfituesëve më të mëdhenj është Mali i Tomorrit, jo nga mbeturinat, por nga guroret.

Edi Rama: “Patjetër që në Shqipëri mund të ketë e duhet të ketë dhe gurore, por nuk mund të ketë dhe nuk do ketë gurore si ato që e kthyen malin e Tomorit në një skenë barbarie primitive apo si ato që qëndrojnë mbi kokat e fëmijëve të Urës Vajgurore, sot e gjithë ditën.”

Kryeministri Edi Rama kërkoi që ti drejtojnë sytë edhe nga agroturizmi pasi qeveria ka krijuar lehtësira për të përfituar nga skemat mbështetëse.
Nga ana tjetër ai shprehet besimplotë se një lumë parash do të rrjedhë nga shpimet që ka nisur kompania Shell në Shpirag.

Edi Rama: “Kërkuan dhe firmosën kontratë në Bllokun 4, në ndërkohë që kanë ndërprerë pjesën dërrmuese të programit të tyre të eksplorimit nëpër botë, – të mos harrojmë që është një kompani, e cila ka një buxhet vjetor 35 herë më të madh sesa Prodhimi i Brendshëm Kombëtar i Shqipërisë, pra nga pikëpamja e vlerës financiare është si të thuash midis Christiano Ronaldos dhe lojtarëve të Tomorit të Beratit.”/abcnews.al

vlcsnap-error338-1280x720.jpg
gra moz15:29 | 12/02/2018

Ish-ministri i Infrastrukturës dhe Energjisë, Florion Mima, akuzon qeverinë aktuale për ndryshimin e koordinatave të ndërtimit të hidrocentraleve në Lumin Osum. Këtë e kundërshton ministri aktual, Damian Gjiknuri, sipas të cilit është i njëjti projekt që ka firmosur ish-kolegu i tij, Mima.

Koordinatat e ndryshuara të hidrocentraleve që u projektuan të ndërtohen në lumin Osum kanë shkaktuar debat në komisionin e veprimtarisë prodhuese.

Ministri i Infrastrukturës dhe Energjisë, Damian Gjiknuri është ftuar të flasë mbi bursën e energjisë. Por kontrata koncensionare për ndërtimin e hidrocentraleve Bigas dhe Veleshje e firmosur në 6 Shtator të vitit 2013 nga ish-ministri i asaj kohe, Florion Mima, e përballi këtë të fundit me kolegun e tij.

Ministri i Infrastrukturës dhe Energjisë, Damian Gjiknuri, sqaroi se për çdo projekt që ka ndikim negativ në mjedis automatikisht bie edhe kontrata koncensionare.

Damian Gjiknuri: “Të gjitha agjencitë që kanë qenë përkatëse të asaj kohe e kanë dhënë mendimin e tyre pozitiv. Nëse ka të dhëna të falsifikaura është autoriteti përgjegjës që duhet t’i shkojë deri në fund. Ministria e Energjitikës dhe Infrastrukturës është e gatshme që nëse ai akt administrativ anulohet ne autmatikisht do të fillojmë procedurat tona”./abcnews.al

partia-demokratike.jpg
gra moz12:29 | 11/02/2018

Pas deklaratave publike, demokratët kërkojnë zhvendosjen e çështjes së inceneratorëve në Kuvend.

Përmes një kërkese drejtuar kryetarit të Kuvendit, deputetët e PD kërkojnë zhvillimin e një interpelance urgjente me Ministrin e Infrastrukturës dhe Energjisë, Damian Gjiknuri, për të raportuar në lidhje me informacionet zyrtare të koncesioneve të inceneratorëve Elbasan, Fier dhe Tiranë.

Sipas ligjvënësve demokratë, mënyra se si janë zhvilluar proceset e tenderimit dhe dhënies së koncesioneve si dhe lidhjet e kompanive fituese, ngrenë hije dyshimi për ligjshmërinë dhe menaxhimin e tyre dhe lidhjen me politikën e qeverinë.

PD ngre shqetësim dhe për një tjetër moment që saktëson kontrata e bërë publike mbi këtë koncension.

“Nga të dhënat e kontratës të bëra publike rezulton se qeveria do të detyrojë OSHEE që të blejë me një çmim të përcaktuar energjinë nga ky ent. Rrjedhimisht, shoqëria koncesionare do të përfitojë edhe nga shitja e energjisë elektrike, përpos përfitimeve të tjera, duke rënduar edhe me rritjen e cmimit të energjisë për publikun”.

Në argumentet që demokratët listojnë për thirrjen e kësaj interpelance nënvizohen dhe të dhenat mbi njërën nga kompanitë fituese të koncensionit, e cila rezulton të jetë e regjistruar në Parajsat Fiskale të Vendeve të Ulëta.

Ndaj PD kërkon nga Kuvendi që të përfshijë në rend ditë këtë interpelancë, me qëllim marrjen e një informacioni të plotë mbi procedurat e koncesionit të inceneratorëve./abcnews.al

vlcsnap-error390-2-1280x720.jpg
gra moz13:34 | 31/01/2018

Vitin e ardhshëm, Durrësi nuk do të ketë më problemet e hershme për derdhjen e ujrave të zeza në det dhe kufizimet me orare të zgjatura të furnizimit me ujë të pijshëm. Investimi më i fundit i qeverisë shqiptare, parashikon t’i japë zgjidhje kësaj situate, sipas ministrit të Infrastrukturës dhe Energjitikës, Damian Gjiknuri.

Përfundimi i rrjetit të kanalizimeve dhe ujësjellësit në Durrës do t’i japë fund mungesës së ujit të pijshëm dhe derdhjes së ujrave të zeza në det. Garancinë ia dha durrsakëve ministri i Infrastrukturës dhe Energjisë, Damian Gjiknuri, por edhe kryebashkiaku Vangjush Dako.

Ministri Gjiknuri u ndal më pas tek reforma në sektorin e ujit të pijshëm duke u bërë thirrje edhe njëherë familjarëve të shfrytëzojnë afatin e zgjatur me 1 muaj për vetdisiplinim pa penalitete.

Damian Gjiknuri: “Të gjithë këto investime që të jenë të qëndrueshme duhet të kemi një shëndoshje financiare të sektorit. Shëndoshja financiare vjen nga pagesa e rregullt e ujit ashtu sikurse ndodhi me energjinë. Qytetarët që paguajnë nuk mund të mbajnë përsipër edhe ata që nuk paguajnë. Nëse të gjithë paguajmë, kemi mundësinë të bëjmë edhe më shumë investime”, u shpreh Gjiknuri.

Kryebashkiaku Dako tha se tanimë ka nisur aksioni për prerjet e lidhjeve të paligjshme dhe se, kanë filluar jo vetëm lidhjet e reja por edhe pagesat. Për një muaj janë bërë aq lidhje të reja sa ishin bërë për një vit e informoi Dako ministrin.

Linja e re e furnizimit me ujë për qytetin e Durrësit është një investim që arrin në vlerën e 31.6 milionë euro. Ndërkaq, ka përfunduar faza e parë e investimit për ndërtimin e rrjetit sekondar të kanalizimeve në zonën e Plazhit në vlerën 7.7 milion Euro. Faza e dytë e punës për këtë rrjet është duke u kryer aktualisht dhe financimi shkon në 5 milion Euro. Në total, investimet për ujësjellës dhe kanalizimeve në Durrës shkojnë mbi 50 milionë Euro.

vlcsnap-error689-1-1280x720.jpg
gra moz16:38 | 24/01/2018

Brenda 90 ditësh një grup pune do të negociojë kontratën për ngritjen e Aeroportit të Vlorës. Qeveria kaloi me procedurë të përshpejtuar projektligjin ndërsa ministri i Infrastrukturës, Damian Gjinkuri, deklaroi se puna do të nisë brenda vitit.

Qeveria miratoi projektligjin për nisjen e negociatave për kontratën e ndërtimit të aeroportit të Vlorës.
Pasi kryeministri Edi Rama dha lajmin në faqen e tij në rrjetin social Facebook, ministri i Infrastrukturës dhe Energjisë shpjegoi vendimin në një deklaratë për mediat nga godina e kryeministrisë.

Damian Gjiknuri: “Këshilli i Ministrave kaloi me procedurë të përshpejtuar, e cila do të shkojë edhe në Kuvendin e Shqipërisë projektligj për fillimin e negociatave për një nga konsorciumet me ofertë më serioze për aeroportin e Vlorës. Bëhet fjalë për një propozim shumë serioz nga tre kompanitë më të mëdha turke. Kompani, të cilat në bashkimet e tyre janë të njëjtat kompani që po ndertojnë aeroportin e Stambollit, aeroportim më të madh që synohet të jetë ne botë.”

Bëhet fjalë për “Cengiz Construction”, “Kalyon Construction” dhe “Kolin Construction”, të cilat kanë paraqitur pranë Ministrisë së Infrastrukturës ofertën për ndërtimin e aeroportit të dytë për fluturime ndërkombëtare në vend, në zonën e Akërnisë, aty ku gjendet aeroporti ushtarak.

Damian Gjiknuri: “Kjo ofertë parashikon një investim afër 100 milionë euro. Do të jetë një projekt tërësisht me financim privat. Në vendimin e qeverisë parashikohet që është ngritur një grup negociatorë me përfaqësues të Ministrisë së Infrastrukturës dhe Energjisë, të Ministrisë së Financave dhe institucione të tjera, të cilët në një periudhë gati 90-ditore do të negociojnë detajet e kësaj oferte. Ky aeroport do të fillojë të ndërtohet brenda këtij viti në një kohë rekord”.

Por ky sipas ministrit të Infrastrukturës nuk do të jetë aeroporti i vetëm që do t’i shtohet Shqipërisë.

Damian Gjiknuri: “Qeveria shqiptare është duke punuar intensivisht edhe për krijimin e akseseve të tjera dhe vënien në funksionim sit ë aeroportit të Kukësit, që ne shpresojmë që shumë shpejt të kemi një zgjidhje optimal dhe për të. Përnjëkohësisht po përfundojmë edhe studimin e fizibilitetit për aeroportin e Sarandës që do të jetë dhe ky një nyje tjetër e rëndësishme turistike”.

Së shpejti shpresoj dhe Kukësin, komentonte më herët edhe kryeministri Rama në Facebook./abcnews.al

vlcsnap-error170-1280x720.jpg
us er13:09 | 14/01/2018

Ministri i Infrastrukturës dhe Energjisë, Damian Gjiknuri, ishte në nënstacionin elektrik të Lezhës ku u njoh nga afër me investimet e kryera nga Operatori i Shpërndarjes në këtë zonë. Ai garantoi se investimet do të vazhdojnë edhe gjatë këtij viti, me fokus e përparësi zonën turistike.

Operatori i Shpërndarjes së Energjisë Elektrike do ti nënshtrohet risturkturimit.
Ministri i Infrastruktures dhe Energjisë, Damian Gjiknuri, e paralajmëroi nga Lezha ku u njoh me investimet e kryera në nënstacionin elektrik.

“Vetë kompania do ti nënshtrohet një ristrukturimi me ndarje të mëtejshme brenda saj. Kemi një vit ku fillon të japë frytet plani i rimëkëmbjes përfshirë dhe shlyerja e shumë borxheve dhe gropave të vjetra financiare të krijuara në sektor gjatë viteve të krizës. Mjafton fakti që energjia elektrike nuk është më në vëmendje të krizave siç ka qenë deri në vitin 2013. Ky është tregues se çfarë hapash gjigand janë bërë në këtë sektor krahasuar me ku e nisëm dhe atë ku jemi tani. Kuptohet ka ende shumë punë për të bërë. Investimet nuk do të mungojnë por duhet një menaxhim edhe më i mirë nga personeli këtu sidomos për të luftuar ilegalitetin”.

Investimet këtë vit, sipas ministrit Gjiknuri, do të përqëndrohen kryesisht në zonat turistike.

“Testet që kaluam me përmbytjet dhe me reshjet e muajve të fundit, treguan se gjithçka performoi shumë mirë edhe për shkak të investimeve që ne bëmë në hidrovore gjatë vitit 2016”.

Në Bashkinë e Lezhës në rrjetin elektroenergjetik vitin e shkuar u investuan rreth 5 milionë dollar, deklaroi ministri i Energjisë./abcnews.al

vlcsnap-error360-1-1280x720.jpg
us er12:36 | 10/12/2017

Ministri i Infrastrukturës dhe Energjisë, Damian Gjiknuri dhe zv/kryeministrja Senida Mesi, inspektuan hidrocentralin e Vaut të Dejës, nga ku pohuan se rezerva energjitike në vend ishte përmirësuar dhe se situate po shkonte drejt normaliziimit. Ata floën edhe për një plan të qeverisë për menaxhimin automatik të hapjes së portave, që do të shmangte gabimet njerëzore me pasojë përmbytjen e nën-Shkodrës.

Nga Hidrocentrali i Vaut të Dejës, ku shkoi për të inspektuar së bashku me zv/kryeministren Senida Mesi, ministri I Infrastrukturës dhe Energjisë, Damian Gjiknuri, dha lajmin e përmirësimit të rezervës energjitike në vend.

Damian Gjiknuri: “Rezerva energjitike po përmirësohet. Ne pak nga pak po hyjmë në normalitet për të filluar planifikimin e energjisë për vitin që vjen pas një viti jashtëzakonisht të thatë dhe më i vështirë nga ana financiare, po fillojmë të hyjmë në një klime normaliteti persa i përket parashikimeve në energji. Ky është një lajm i mirë për ekonominë shqiptare, për buxhetin e shtetit, se në fund të fundit financat publike kërcënoheshin nga thatësirat e mundshme që mund të kishte Shqipëria”.

Referuar edhe reshjeve të fillim dhjetor, që shkaktuan përmbytje në zona të ndryshme të vendit, Gjiknuri lavdëroi stafin e Hidrocentralit për menaxhimin e mirë kaskadës, gjë që sipas tij, shmangu përmbytjen e nën-Shkodrës.

Damian Gjiknuri: “Para një jave, Shqipëria pati përmbytje, shumë njerëz spekuluan edhe nga kaskada, por pikërisht mirëmenaxhimi i kësaj kaskade, eksportet dhe shitja e energjisë në kohe për ti lënë hapësirë volumeve të pritshme të ujit të cilat vijnë nga reshjet e befta, kryesisht nga reshjet që ishin para një jave që ishin kryesisht të shpeshta, bëri të mundur që edhe energjia të prodhohet më shumë edhe rezerva në Fierzë të rritej, por njëkohësisht të mos kishim asnjë problem me përmbytjet e popullatës, gjë që ka qenë një fenomen deri diku i përhapur para 4 vjetësh. Gjatë këtyre 4 viteve nuk është vetëm çështje fati por është dhe çështje mirëmenaxhimi të kësaj kaskade që qytetarët e Shkodrës kanë shpëtuar nga përmbytjet masive që kane qenë dëshmitarë të viteve të mëparshme”.

Numri dy i Qeverisë insistoi se zbatimi rigoroz i një rregulloreje që daton prej dekadash, ka evituar përmbytjet gjatë pesë viteve të fundit. Për të shmaungur çdo gabim njerëzor, Senida Mesi tregoi planet për krijimin e një sistemi për menaxhimin automatik të portave në Vaun e Dejës.

Senida Mesi: “Është një rregullore që daton këtu dhe që në konstruksionin e këtij hidrcntrali. Gjë që tregon se nëse rregullorja ndiqet me përpikmëri nuk ka asnjë problem për zonat rreth e rrotull. Siguruam edhe kryetarin e Bashkisë së Vaut të Dejës, që ne do të vazhdojmë pikërisht me të njëjtin ritëm. E rëndësishme është një investim që po mendohet edhe është gjatë procesit të dizenjimit dhe projektimit në lidhje me menaxhimin automatik të portave të shkarkimit. Aktualisht ndodh që mbas indikatorëve janë njerëzit ata që, në momentin që përcaktohen disa indikatorë vendosin për të hapur portat e shkarkimit. Në momentin e dytë që do të bëhet ky investim, do të ketë mekanizma dhe sensorë që në mënyrë automatike do të bëjnë hapjen e këtyre portave të shkarkimit duke minimizuar një herë e përgjithmonë dhe riskun njerëzor”.

Zv/kryeministrja Mesi pohoi se përmes kontratave ndërkombëtare të bashkëpunimit dhe disa nismave ligjore, Shqipëria synon t’I kthejë 3 hidrocentralet e kaskadës së Drinit në një nyjë interkonjeksioni.

 

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono