Champions League

partizani-antalyaspor.jpg
G. P.15:41 | 18/06/2019

Partizani do të ndeshet me kampionen e Azerbajxhanit, Karabak, në turin e dytë të Championsit. Një përballje e vështirë për të kuqtë, ndaj një kundërshtari që ka qenë në fazën e grupeve, vitet e fundit

Nuk pati aspak fat, por gjithsesi shorti do nuk do të kishte qenë i lehtë. Partizanit i takoi kampionia e Azerbajxhanit, Karabaku, si kundërshtar në turin e parë eleminator të Championsit, pas shortit të hedhur në Nion të Zvicrës.

Kundërshtarët e tjerë të mundshëm ishin Sëlltiku i Skocisë, Sherifi i Tiraspolit i Moldavisë, Sllovani i Bratisllavës, dhe më i lehti Dudelanzhi i Luksemburgut. Karabaku është skuadra më e njohur e Azerbajxhanit, dhe një formacion me autoritet në kupat kontinentale vitet e fundit.

Azerët janë kualifikuar për në fazën e grupeve në 5 sezone radhazi, katër herë në Ligën e Europës, dhe një herë në Champions, duke u ndeshur me skuadra të forta si Atletikon e Madridit, Romën, Çelsin, Arsenalin, Totenhemin apo Sportingun e Lisbonës.

Sezonin e kaluar, Karabaku eleminoi në turin e dytë eleminator Kukësin, me fitore 3-0 dhe barazim 0-0 në Shqipëri. Për këtë skuadër luajti 7 vjet ish-kapiteni I kombëtares shqiptare dhe ish-mbrojtësi i Tiranës, Ansi Agolli, në sezonet 2012-2019, duke dalë 6 herë radhazi kampion.

Partizani ka luajtur rrallë në kupat e Europës sezonet e fundit, duke eliminuar Ferencvaroshin e Hungarisë në turin e parë dy sezone më parë, e duke u eliminuar nga Red Bulli i Salcburgut, Krasnodari dhe Maribori në Ligën e Europës.

Kryeqytetasit kanë qenë në Champions vetëm katër herë që nga 1987-ta, dhe është ndeshur me Benfikën, Akranesin e Islandës, si dhe me kundërshtarët e viteve të fundit.

Nëse Partizani eliminohet, do të kalojë në turin e dytë të Ligës së Europës, pra sërish me shpresë për të synuar sukses. Ndeshja e parë do të luhet në 9 ose 10 korrik në Shqipëri, ndërsa ndeshja e kthimit, në 16 ose 17 Korrik./ABC News Albania 24/7

liverpuli.jpg
nev ila12:30 | 02/06/2019

Festë e madhe në Madrid pas fitores së Championsit nga Liverpuli. Trajneri Jurgen Klop kërkon që ky të jetë vetëm fillimi, ndërsa mediat evropiane i bënë jehonë kampionëve të rinj të Evropës.

Kur hynë në fushë presioni mbi ta ishte i jashtëzakonshëm.

Futbollistët e Liverpulit e dinin se një tjetër dështim në Evropë, mund të ishte fatal, ndaj ishin të vendosur për ta shmangur.

Ata ia dolën të fitonin trofeun për vete dhe për trajnerin e tyre, dhe madhështia e këtij misioni ishte kaq e jashtëzakonshme saqë askush nuk dëshironte të kujtonte që finalja nuk doli vërtet një finale.

Liverpuli fitoi për atë që bëri sezonet e fundit, dhe që Jurgen Klopit t’i hiqej damka aspak e merituar e humbësit të përjetshëm.

Kjo ishte nata më e mirë e jetëve tona profesionale”, a keni parë ndonjëherë një skuadër të tillë që luftoi deri në fund, edhe pse nuk i kishte mbetur më karburant? Merita është e gjitha e futbollistëve. Na u desh pak kohë për të mbërritur deri këtu, por fitorja është e rëndësishme për zhvillimin tonë, për t’u përmirësuar edhe më shumë. Ne kemi një portier që i bën gjërat e vështira të duken shumë të lehta. Shpresoj që ky të jetë vetëm fillimi i sukseseve tona”, u shpreh Klop.

Klopi kishte humbur 6 finale radhazi, që nga viti 2012, ndër të cilat dy në Champions, dhe një në Ligën e Evropës, ndaj emocionet e tij ishin të thella.

Tashmë, ai ka 6 trofe në karrierë, të parin me Liverpulin, pasi fitoi jo pak në Gjermani me Dortmundin.

Kapiteni Henderson i dha merita të mëdha gjermanit.

Pa një trajner të tillë nuk do t’ia kishim dalë kurrë, kemi pasur edhe vështirësi, por ajo që ka bërë ai është e pabesueshme. Ka një unitet të madh në skuadër, një atmosferë vërtetë e veçantë. Jam krenar që jam pjesë e kësaj skuadre, ndërsa tani duhet të vazhdojmë kështu” , tha ai.

Krenaria ishte e plotë edhe në krahun tjetër.

Totenhemi dha një paraqitje vërtet të madhe, ndoshta më të mirë sesa kampionët e rinj.

Liverpuli ia njohu meritën dhe i dha përgëzimin duke bërë roje nderi për londinezët.

Trajneri Maurisio Poçetino, përtej mërzisë së madhe, u shpreh pozitiv.

Ne duam që ta provojmë sërish këtë gjë, ta përsërisim, është ndeshja më e madhe në rruzull pas finales së Kupës së Botës, ndaj shpresoj që të jemi këtu përsëri, sa më shpejt që të jetë e mundur. Jam shumë krenar për atë që bëri skuadra ime. Ne nuk patëm fat, por luftuam dhe ishim shumë mirë, sidomos në pjesën e dytë. Në ndeshje të tilla, përvoja luan rol të madh, dhe ne ishim në pozicionin që ishte vjet Liverpuli. Jam shumë i lumtur që jam trajneri i kësaj skuadre, por gjithsesi duhet të përgëzoj Liverpulin për fitoren”, tha Poçetino.

Gazetat angleze ishin në këmbë për kampionët.

“Star Sport” titullon “Të pabesueshmit”, duke luajtur me shkronjat e fjalës “të kuq”, si ngjyrat e Liverpulit. Në kopertinë, Salah pas golit, dhe Klop me trofeun!

“Sandi Telegraf” titullon “Liverpuli triumfon në Madrid” dhe vendos foton e kopertinës me festimin e Salahut pas golit të parë

“Sandi Ekspres”: Liverpuli kurorëzohet mbret i Evropës!

Gazeta “Herald” e së dielës shkruan për Liverpulin: Në Ligën e tyre të Kampionëve! Futbollistët e lumtur të Liverpulit festojnë fitoren në Champions!

Ja edhe disa nga gazetat kryesore sportive në Evropë:

“L’Ekip” në Francë: Zoti shpëtoftë të kuqtë! Falë një penalltie të dyshimtë, dhe një goli në fund, të kuqtë e Liverpulit fitojnë një finale zhgënjyese 100 për qind angleze!

“La Gazeta delo Sport” në Itali: LiverBUM! Champions, këtu është e gjashta! Klopi është në majë, fiton kupën në tentativën e tretë!

“AS” në Spanjë: Liverpuli i përjetshëm! Championsi i gjashtë për të kuqtë, dhe fundi i mallkimit për Klopin! Shënuan Salah dhe Origi!

Kështu u mbyll ky Champions, me një fitore që u duk logjike, dhe me një trajner që cilësohej si më i miri në botë, por që vetëm tani e fitoi trofeun e madh./ABC News Albania 24/7

PARTIZANI-TRANSFERIMET-_ABC-M1-T1.mpg_snapshot_00.27-1280x720.jpg
G. P.17:00 | 23/05/2019

Partizani ka realizuar një përfitim të madh financiar pas shpalljes kampion. Klubi kryeqytetas do të ketë në buxhet një fitim prej të paktën 1 milionë eurosh.

Kohët kanë ndryshuar, dhe një titull vlen më tepër se më parë. Drejtuesit e Partizanit mund të ndihen të lumtur që ia arritën qëllimit për të fituar kampionatin, pasi menjëherë buxheti i klubit do të ketë rritje tepër të madhe, edhe thjesht nga pjesëmarrja në Champions.

Pra, edhe nëse nuk do të arrijnë të kalojnë asnjë tur. Në bazë të shpërblimeve të vendosura nga UEFA, Partizani fiton një shumë të përgjithshme prej 800.000 eurosh, të ndara mes Ligës së Kampionëve dhe Ligës së Europës.

Vetëm për pjesëmarrjen, kryeqytetasit do të arkëtojnë 260.000 euro, pa nisur fare ndeshjet, ndërsa 280.000 euro do t’u jepen si pjesëtarë të turit të parë eliminator.

Në rastin më të keq, atij të eliminimit, Partizani kalon në Ligën e Europës, në raundin e saj të dytë, ku jepen 260.000 euro të tjera.

Totali është 800.000 euro.

Këtyre parave duhet t’u shtohen edhe 120 000 euro që të kuqtë i marrin nga e drejta televizive e Superligës, si dhe 10 milionë lekë të reja, që jepen nga Federata për titullin kampion.

Kjo do të thotë se, presidenti Demi dhe drejtori i përgjithshëm Olsi Rama do të kenë në buxhet rreth 1 milionë euro, qoftë edhe sikur skuadra në fushë të humbasë të gjitha ndeshjet.

Nëse do të ketë suksese, të ardhurat do të rriten. Kalimi në turin e dytë të Championsit të jep 380.000 euro, ndërsa turi i tretë arrin në 480.000 euro. Në rast eliminimi këtu, pra në turin e tretë, Partizani do të ketë kalim në plej ofin e Ligës së Europës, ku jepen 300.000 euro, pra me pak sukses mund të shkohet nga 1.3 deri në 1.5 milionë euro.

Kjo do të thotë se klubi i kuq mund të shpenzojë jo pak për të forcuar skuadrën, apo edhe për të realizuar projektet e tjera, ku mbi të gjithë vlerësohet përfundimi I kompleksit të ri sportiv./ABC News Albania 24/7

milan.png
G. P.13:30 | 20/05/2019

Një garë e fortë për Championsin vazhdon në Serinë A. Kur mbetet edhe një javë deri në përfundim, Atalanta, Interi dhe Milani luftojnë për dy vende që të kualifikojnë.

Titulli ishte i pronësuar prej kohësh dhe emocione këtë fundjavë pati vetëm festimi. Juventusi mund të ndihet i qetë si kampion i konfirmuar i Italisë, por pas tij vetëm Napoli gjithashtu nuk ka dhimbje koke, ndërsa skuadrat e tjera në garë të ethshme për kualifikimin në Champions.

Një Milan që fiton mbetet “në bisht”, një Inter që dërrmohet në Napoli ende është në pozicion të mirë, ndërsa një Atalantë që barazon në fushën e kampionëve është në “pole position”.

Kjo, gjendja për dy vendet e fundit në Champions në Serinë A, të tretin dhe të katërtin e renditjes.

“Kjo është një Atalantë rekordesh, – tha trajneri i saj, Gasperini, pas barazimit 1-1 në Torino, – edhe pse ishin të lodhur nga finalja e Kupës, sërish gjetëm forca për të marrë një rezultat. Na duhet të fitojmë ndeshjen e fundit, por gjithçka varet nga ne, kjo është më e rëndësishmja”.

Edhe trajneri Luçiano Spalleti këtë gjë theksoi pas “përmbytjes” së Interit të tij në “San Paolo”. Nuk ishte e lehtë të komentohej një ndeshje e humbur 1-4, qoftë edhe në fushën e një rivali të fortë.

Zikaltërit u shpërfytyruan në Napoli, përballë skuadrës vendase të Karlo Ançelotit që luajti një nga ndeshjet më të mira të sezonit. Zielinski, Mertens, Ruiz e sërish Ruiz dhanë shifrat deri në 4-0, para se Icardi të shkurtonte diferencën.

“E kemi fatin në duart tona, mund të shkojmë në Champions nëse fitojmë ndaj Empolit, një ndeshje që është një finale, – tha Spaleti, – kuptohet, do të duhet tjetër Inter, pasi ky që patëm nuk ishte ai i vërteti”.

Po Milani?

Suksesi ndaj Frozinones nuk ishte përfundimtar, përveçse u arrit me shumë vështirësi.

“Championsi nuk varet nga ne, por nuk do të dorëzohemi,-u shpreh trajneri kuqezi, Xhenaro Gatuzo,-ndaj Frozinones patëm pak frikë, dhe duhet të falenderojmë Xhixhon (portierin Donaruma). E ardhmja ime? Unë do ta konfirmoja veten time në stol, por ky nuk është problemi im”.

Donaruma shpëtoi Milanin duke pritur penallti në 0-0, pastaj Piontek e Suso shënuan golat. Kur duhet edhe një javë deri në fund, Atalanta ka 66 pikë, Interi 66 dhe Milani 65./ABC News Albania 24/7

milan-1280x800.jpg
G. P.20:17 | 19/05/2019

Milan arriti të fitonte sfidën ndaj Frosinone-s, duke mbajtur gjallë shpresat për një kualifikim në Champions League. Në një ndeshje të dominuar nga ata, kuqezinjtë arritën të fitonin 2-0. Golat u shënuan nga Piatek në minutën e 57 dhe Suso në minutën e 66.

Sfida në “San Siro” duhej fituar me patjetër nga djemtë e Gennaro Gattuso-s, të cilët shpresojnë të kualifikohen në Champions League. Ata ndodhen aktualisht në vendin e 4-rt me pikë të barabarta me Atalantën, të cilët kanë një ndeshje më pak.

Pikërisht sonte, “Djalli” pret një surprizë të bukur nga Juventus. “Zonja e vjetër” do të ketë përballë Atalantën, nga ku tifozët kuqezinj shpresojnë një humbje të bergamaskëve./abcnews.al

tott.jpg
G. P.23:18 | 08/05/2019

Gjysmëfinalet e këtij sezoni të Champions League kanë qenë padyshim shumë emocionuese. Pas përmbysjes që bëri Liverpool ndaj Barcelonës një natë më parë, tashmë ishte radha e Tottenham-it që ta përsëriste.

Spurs-at arritën të përmbysnin rezultatin ndaj Ajax-it dhe duke u kualifikuar në këtë mënyrë në finalen e madhe.

Anglezët arritën të rikuperonin dy golat e De Ligt dhe Ziyech vetëm me anë të Lucas Moura-s. Braziliani shënoi tripletë dhe njëkohësisht dërgoi tifozët në qiellin e shtatë.

Rezultati i përgjithshëm shkoi në barazim 3-3, por rregulli i golave në fushë kundërshtare kualifikoi direkt anglezët.

Një zhgënjim për “Hirushen” e këtij sezoni, Ajax-in. Holandezët rrëmbyen zemrat e tifozëve pasi mposhtën dy nga pretendentët kryesorë të Ligës së Kampioneve, Real Madridin dhe Juventusin.

Tashmë finalja do të jetë tërësisht britanike, me Liverpool dhe Tottenham që do të luajnë me 1 Qershor në “Wanda Metropolitano” të Madridit për të vendosur se kush do të marrë trofeun e Champions League./abcnews.al

klopp.jpg
G. P.19:27 | 08/05/2019

Jurgen Klopp padyshim që ishte çelësi i suksesit të kualifikimit të Liverpool në finalen e Championsit. Trajneri gjerman ka humbur dy finale të Ligës së Kampionëve dhe kjo do të jetë hera e tretë që do të tentojë të fitojë titullin prestigjioz.

Arkitekti i mbrëmjes në “Anfield” natyrisht mbetet koka teknike e Jurgen Klop, aty ku qetësia dhe fryma e tij dhanë më shumë se pjesa teknike në fushë. Gjermani në vend të ankohej për mungesat e titullarëve dhe lojtarit kryesor të ekipit, Mohamed Salah, nuk kërkoi justifikime, por hodhi në fushë skuadrën më të mirë të mundshme me lojtarët që kishte në organikë dhe në sajë të mënyrës së përgatitjes së ndeshjes ia doli të merrte një kualifikim historik për finalen e Champions League, e cila do të zhvillohet në stadiumin e Atletiko Madrid, ‘Wanda Metropolitano’.

Kjo e Madridit nuk do të jetë hera e parë e Klopp në finale të kompeticionit madhor, përkundrazi këtë herë finalja e Madridit do të jetë e treta për 51-vjeçarin. Nuk kanë shkuar siç duhet edhe takimet e mëparshme finale të Ligës së Kampioneve për gjermanin, megjithatë këtë radhë mund të jetë viti i tij në Madrid.

Finalja e parë ishte ajo e vitit 2013, përballë Bayern-it. Sfida përfundoi me triumfin e bavarezëve falë një goli në fund të Robben. Ndërsa finalja e dytë ishte ajo e vjetshmja ndaj Realit të Madridit. Të kuqtë u mposhtën me rezultatin 3-1,teksa në ndeshje ndikuan gabimet e portierit Karius dhe dëmtimi i Salah.

Por, këtë herë tekniku mbërrin në finale si favorit. Klopp dhe skuadra janë favoritë, megjithatë në finale asgjë nuk është e sigurt. Ndërkaq, sa i përket makthit të portierit nga finalja e vitit të kaluar, të kuqtë kanë tashmë një nga më të mirët në rolin e tij si Alison Becker./ABC News Albania 24/7

ndeshja.jpg
G. P.23:31 | 07/05/2019

Të pabesueshmen e arrin vetëm Liverpool. “Të kuqtë” arritën të përmbysnin rezultatin e ndeshjes së parë ndaj Barcelonës duke fituar 4-0 dhe duke u kualifikuar në këtë mënyrë në finalen e madhe të Champions League.

Autorët e golave në “Anfiel Road” ishin Divock Origi dhe Georginio Wijnaldum, të cilët shënuan nga dy gola. I pari që shënoi ishte Origi në minutën 7. Goli i tij u pasua me dy të tjerë nga Wijnaldum, i cili shënoi në minutat ‘54 dhe ‘56. Kaq mjaftoi dhe kishte shpresë për Liverpool-in dhe për ta siguruar fitoren mendoi sërish Origi në të ‘79-n.

Kështu, “të kuqtë” arritën të përmbysnin Barçën pas humbjes që pësuan në Camp Nou 3-0. Një ndeshje totalisht për t’u harruar për Messi-n. Ndërkohë nga ana tjetër djemtë e Jurgen Klopp janë në festë.

I menjëhershëm ishte dhe reagimi i mediave ndërkombëtare sportive, të cilët e kanë konsideruar fitoren e anglezëve si përmbysja e shekullit./abcnews.al

bayern.jpg
G. P.21:32 | 04/05/2019

Bayern fitoi 3-1 ndaj Hannoverit në një sfide jo pak të lehtë. Për bavarezët gjeti rrugën e rrjetës edhe veterani Franck Ribery qe po luan sezonin e fundit me gjermanët.

Vuan pak, por në fund merr atë që duhet, tre pikët me Hanoverin. Skuadra e Niko Kovaç hedh kështu një tjetër hap drejt titullit kampion të radhës në Bundesligë. Këtë javë ata kanë kaluar 3-1 Hannover-in e vendit të fundit në shtëpi dhe kryesojnë renditjen duke mos regjistruar në këtë mënyrë hapin fals.

Pas një pjese të parë të mbyllur në avantazh 2-0 falë golave të Leëandoëski-t dhe Goretzka-s, dukej se vendasit do të merrnin një fitore të lehtë, por nuk ka qenë kështu.  Sepse ka ardhur menjëherë edhe reagimi i miqve, të cilët kanë ngushtuar diferencat me penalltinë e transformuar në minutën e 51-të nga Jonathas. Ky ka qenë goli i 2000-të i pësuar nga Bayern në Bundesliga.

Gjithsesi, sulmuesi i Hannover, i aktivizuar në fillimin e pjesës së dytë, ka prishur gjithçka duke marrë dy kartonë të verdhë në harkun e tri minutave dhe duke lënë me 10 lojtarë ekipin e tij. Gjashtë minuta para fundit ka ardhur edhe goli i Franck Ribery, që ka fiksuar shifrat në 3-1.

Në të 86-n e ndeshje, Kovac hedh në fushë edhe Robben në vend të Coman. Holandezi i ka dhënë kusht fund një makthi që zgjaste nga dhjetori i kaluar pas dëmtimit të pësuar në ndeshjen e Champions League kundër Benfica-s. Kjo ka qenë ndeshja numër 700 në karrierën e tij si futbollist. Një fitore e rëndësishme, që mund të lërë diferencën në plus dy me Dortmundin ose mund ta thellojë edhe më shumë.  /ABC News Albania 24/7

tottenham.jpg
G. P.21:28 | 04/05/2019

Skuadra e Tottenham u mund minimalisht 1-0 në transfertën e Bournemouth. Londinezët luajtën rreth 45 minuta me 9 lojtarë ndërkohë që rrezikojnë vendin e tretë në renditje.

Me dy lojtarë më pak rezistojnë deri në kohën shtesë, dhe më pas e pësojnë. Tottenham sërish humbet këtë radhë në fushën e modestëve të Bournemouth, në një ndeshje ku “Spurs” luajtën për rreth 45 minuta me 9 lojtarë. Me këtë humbje siguria e tyre në vend të tretë është vënë në pikëpyetje, pasi do të varet nga rezultati i Chelsea dhe i ndeshjes së ardhshme.

Në pjesën e parë ishte Son Heung-Min, më saktë në minutën 43’, kur koreano-jugori u ndëshkua direkt me karton të kuq pasi goditi me grusht kundërshtarin. Juan Foyth zë vendin e tij në fillim të pjesës së dytë, por mbrojtësi 21-vjeçar pati fatin e zi të ndëshkohet edhe ai direkt me karton të kuq pas tre minutash lojë, për një ndërhyrje me takë në këmbën e kundërshtarit.

Në minutat në vijim skuadra e Pochettino u mundua të rezistojë me dy lojtarë më pak dhe ia doli deri në minutën 90+1’, kur Ake shënoi golin e fitores për skuadrën vendase, në një goditje këndi. Për Bournemouth kjo ndeshje nuk kishte ndonjë vlerë sepse nuk kanë asnjë objektiv në këtë fund sezoni.

Një moment jo fort pozitiv për Spursat të cilët kanë një pengesë shumë të vështirë në “Johan Cruyyf” arena javën e ardhëshme për sfidën e kthimit në gjysmëfinalen e Champions, por ndërkaq rrezikojnë ndjeshëm në kampionat, për sa i përket edhe sezonit të ardhshëm në Champions./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono