Champions League

Lippi.jpg
Igli Nikolli12:50 | 21/09/2019

Marcello Lippi është rikthyer të flasë në lidhje me kombëtaren italiane të futbollit. Trajneri i njohur, i cili dërgoi Italinë në majën e botës në vitin 2006, ndihet entuziast për ekipin e krijuar nga Roberto Mancini dhe nuk i kursen elozhet për të.

71-vjeçari komenton edhe ecurinë e klubeve italiane në Champions, duke vlerësuar Juventusin dhe Napolin. Bardhezinjtë i sheh si kandidatë, ndërsa vlerëson shumë edhe rritjen e Napolit të Ançelotit.

ITALIA – “Kombëtarja është në rrugë të drejtë. Mancini është i aftë dhe inteligjent. Po arrin të përfshijë në ekip shumë lojtarë të rinj. Roberto po grumbullon lojtarë edhe pa pritur debutimin e tyre në kampionat dhe mendoj që ky është një sinjal i rëndësishëm dhe mesazh i bukur për klubet.”

CHAMPIONS LEAGUE – “Mendoj se Juventusi bën pjesë në grupin e vogël prej 3-4 skuadrave që mund të triumfojnë në fund. Kjo është shumë e rëndësishme, por mos të harrojmë Napolin. Nëse vazhdon në këtë mënyrë mendoj se do të respektohet shumë nga klubet e tjera.” /abcnews.al

MAncini.jpg
Veronik Istrefaj23:14 | 20/09/2019

Trajneri i Italisë, Roberto Mancini, ka folur sot për mediat sa i takon ekipeve italiane në Champions League. Strategu i “Axurrëve” tha se Interi do të kualifikohet nga faza e grupeve, ndërsa Atalanta do të ketë shumë probleme.

“Champions League është një kompeticion me shumë komplekse. Atalanta do ta ketë të vështirë të përshtatet. Është hera e parë që skuadra e Gasperinit merr pjesë në këtë kompeticion dhe kjo gjë është një minus i madh për ta.

Interi, Juventusi dhe Napoli nuk do të kenë asnjë problem. Mendoj që këto tri skuadra do të kualifikohen për në fazën me eliminim direkt. Gjithsesi, Champions mbetet Champions dhe surprizat në këtë kompeticion, dihen nga të gjithë”, përfundoi Mancini./abcnews.al

Cuadrado.png
Veronik Istrefaj16:01 | 20/09/2019

Juan Cuadrado bëri një ndeshje shumë të mirë përballë Atletico Madrid, në raundin e parë të Champions League. Sulmuesi anësor i Juventusit ishte autori i golit të parë për “Zonjën e Vjetër” dhe çfarë goli ishte.

Kolumbiani merr një top në hyrje të zonës, spostohet drejt qendrës dhe godet me të majtën, duke lënë të shtangur një nga portierët më të mirë në botë, Jan Oblak. Goditja e Cuadrados shkoi në trekendëshin e largët të portës dhe tifozët e kanë votuar si golin më të bukur të raundit të parë në Champions League./abcnews.al

Kasanoo.jpg
Igli Nikolli15:03 | 20/09/2019

Antonio Cassano ka gjithmonë diçka interesante për të thënë. Barezi i famshëm është një nga pengjet më të mëdhenj të futbollit italian të 20 viteve të fundit. Një talent unik dhe një kokë e krisur.

Potenciali i tij ishte i jashtëzakonshëm dhe me pak punë e profesionalizëm më shumë, sot do të ishim duke folur për një kampion të madh. Diçka të tillë e ka pranuar edhe vetë, por fjala peng nuk ekziston në fjalorin e tij.

Batuta nuk i mungon kurrë dhe prononcimin për “Corriere dello Sport” e nis me golin që e bëri të famshëm në Itali dhe jo vetëm. Ishte 18 dhjetori i vitit 1999, luhej Bari-Inter dhe në stadiumin San Nicola 40 mijë zemra dashuroheshin me dyshen e sulmit barez, që formohej nga Antonio Cassano dhe Hugo Enyinnaya.

I pari barez puro dhe vetëm 17 vjeç, i dyti nigerian dhe një vit më i madh. Afrikani zhbllokonte shifrat me një “predhë” nga larg dhe shpërthente në lot nga gëzimi. Christian Vieri barazonte shifrat për zikaltrit, ndërsa Marcello Lippi hidhte në fushë edhe Roberto Baggion e Alvaro Recoban për të siguruar tre pikëshin.

Emocionet nuk kishin mbaruar dhe dy minuta përpara fundit, Cassano shënonte një gol të mrekullueshëm. Marrje fantastike e topit, driblim i Blanc dhe Panuccit dhe rrjetë. San Nicola në ekstazë dhe një yll i ri po lindte.

Jeta ime ndryshoi krejtësisht. Kanë kaluar 20 vite që nga ai gol. Gjëja më e bukur është se çdokush që më takon më pyet dhe ma përmend atë gol të shënuar kundër Interit”, thekson Cassano.

Enyinnaya u “zhduk” dhe e mbylli karrierën në Serie D, ndërsa Cassano luajti më vonë me Romën, Real Madrid, Sampdorian, Milanin, Interin dhe Parmën. Ishte një futboll ndryshe dhe 37-vjeçari e analizon në këtë mënyrë.

Futbolli im ishte plot cilësi dhe kualitet. Në kohën time dinin ta luanin shumë mirë këtë lojë. Vetëm 5 futbollistë në Serinë A të sotme mund ta nisnin si titullar në kohën tonë… Unë kam luajtur me Ronaldon, Totin, Zidane, Del Pieron, Pirlon, Iniestën dhe Xavin. Sot është shumë e vështirë të gjesh lojtarë të tillë.”

Më pas një koment për Interin e tij të dashur, Mario Balotelin, ecurinë e skuadrave italiane në Champions League dhe kandidatët për fitimin e kupës me veshë të mëdhenj.

Kampionatin e fiton Interi. Mario ka nevojë për një sezon të mirë dhe disa gola për t’u rikthyer në kombëtare. Ai është një lojtar i mirë, por më të fortët nga mesfusha e lart janë Chiesa dhe Insigne. Champions? Interi do të kualifikohet sepse është më i fortë se Dortmundi. Juventusi dhe Napoli nuk do të hasin probleme. Mendoj se do të kualifikohet edhe Atalanta.

Fituesi? Shpresoj shumë që të triumfojë Barcelona. Kam një pasion të madh për Mesin. Jo më kot djali im i dytë quhet Lionel. Mesi është futbollisti më i madh i historisë së futbollit. Është si Roger Federer në tenis. Në fillim është Roger dhe pas tij renditen të gjithë të tjerët”, përfundon Antonio Cassano. /abcnews.al

champions-1280x854.jpg
Vladimir Prenga13:07 | 20/09/2019

Champions League u rikthye dhe në mesjavë u luajtën ndeshjet e para të fazës së grupeve. Një ditë më parë UEFA publikoi formacionin me lojtarët më të spikatur, si dhe atë me ata që “stonuan”. Së fundmi është përzgjedhur edhe lojtari i javës.

Nuk kishte dyshime në fakt. Erling Braut Haaland ishte ai që spikati me tre golat e shënuar në debutimin e tij në Champions League. Sulmuesi 19-vjeçar i Salzburg shkëlqeu ndaj Genk, duke i realizuar tre golat për 72 minuta.

Haaland, i cili më parë ka qenë pjesë e Molde në Norvegji dhe është stërvitur nga Ole Gunnar Solskjaer, është vënë në shënjestër nga Barcelona dhe Manchester United. Ky sezon ka nisur në mënyrën më të mirë për të, teksa ka shënuar 17 gola në 9 ndeshje në të gjitha kompeticionet. / abcnews.al

Tripier-Kieran.jpg
Igli Nikolli19:00 | 19/09/2019

Atletico Madrid është një ekip që nuk dorëzohet kurrë dhe diçka të tillë e konfirmoi mbrëmjen e kaluar kundër Juventusit. Ekipi i Sarrit po udhëhiqte 0-2, por klubi kryeqytetas barazoi gjithçka në 20 minutat e fundit.

Atmosfera në “Wanda Metropolitana” ishte e pabesueshme dhe tifozët ndihmuan shumë Atleticon të “ringjallej” pas dy golave të Cuadrados dhe Matuidi. Kieran Trippier u largua nga Totenhemi në merkaton e verës dhe zgjodhi të vazhdonte karrierën në Madridin bardhekuq.

Mbrojtësi i djathtë i kombëtares angleze po përshtatet me ekipin e ri dhe skemat e Diego Simeones. Kundër Juves ishte tepër aktiv në fazën sulmuese dhe goli i Herrerës në minutën e fundit i lumturoi të gjithë.

Atmosfera në Angli është fantastike, por 29-vjeçari ka mbetur i mrekulluar nga tifozët iberikë dhe karakteri i shokëve të tij, të cilët nuk u dorëzuan në asnjë moment.

Ne nuk u ndalëm, nuk pushuam asnjë sekondë dhe vazhduam të sulmonim me besim. Ky është mentaliteti i duhur. Nuk e kishim aspak të thjeshtë kundër Juventusit, por jam befasuar që nga dita e parë nga mentaliteti i shokëve dhe trajneri Simeone.

Ne nuk e ulim kurrë ritmin në stërvitje dhe diçka e tillë pasqyrohet në ndeshje. E dinim se do kishim shanset tona pas rezultatit 0-2. Tifozët ishin të mrekullueshëm dhe na dhanë një dorë të madhe. Nuk e kisha përjetuar kurrë një atmosferë të tillë”, thekson mbrojtësi anglez për “The Guardian”. /abcnews.al

Navas.jpg
Igli Nikolli17:11 | 19/09/2019

Keylor Navas u largua nga Real Madrid pas 5 vitesh dhe zgjodhi të vijonte karrierën te PSG. Ardhja e Thibaut Curtois zvogëloi hapësirat e 32-vjeçarit dhe ky i fundit vendosi të provonte një aventurë të re.

Portieri nga Kosta Rika priti datën 2 shtator për të firmosur një kontratë 4-vjeçare me kampionët e Francës, të cilët paguan 13 milionë euro në arkat e “Los Blancos”. Shorti në Champions League i vuri Realin dhe PSG në një grup dhe mbrëmë u zhvillua dueli i parë mes tyre.

Francezët shënuan tri herë, mbajtën portën të paprekur dhe siguruan një trepikësh fantastik. Navas u aktivizua si titullar dhe nuk i lejoi ish-shokët ta mposhtin. “Gardiani” ka folur “Movistar TV”, duke mos fshehur lumturinë e tij për fitoren 3-0.

“Jemi të lumtur dhe zhvilluam një ndeshje të madhe. Të gjithë djemtë sakrifikuan dhe realizuam atë që kishim përgatitur gjatë javës. Ishte e çuditshme të takohesha me ish-shokët e mi në dhomat e zhveshjes. Gjithsesi, jashtë fushës mbetemi akoma miq të mirë. Reali tentoi, por ia dolëm t’i neutralizonim”, thekson portieri i ri i ekipit të Thomas Tuchel. /abcnews.al

Halilovic-1280x852.jpg
Veronik Istrefaj16:55 | 19/09/2019

Për çdo futbollist, të luash në Champions League është një nga arritjet më të mëdha. Shumë prej tyre presin vite që të luajnë në kompeticionin më të madh për klube, ndërsa disa të tjerë, janë me shumë fat, duke qenë pjesë e elitës që në një moshë shumë të re.

Futbollisti më i ri që është aktivizuar në historinë e Champions League është mbrojtësi nigerian, Celestine Babayaro, i cili në moshën 16 vjeç dhe 87 ditë, debutoi në Champions, në barazimin 1-1 mes Anderlecht dhe Steaua. 16 vjec dhe 128 ditë ishte Alen Halilovic kur debutoi në Champions, duke u aktivizuar për Dinamo Zagreb përballë PSG.

Një tjetër talent që ka debutuar shumë herët në Champions League është mesfushori belg Yuri Tielemans. Futbollisti i Leicester City në Premier League mbrojti ngjyrat e Anderlecht në vitin 2017, ku u aktivizua 90 minuta përballë Olympiacos.

Ndërsa futbollisti më i ri që ka shënuar në një ndeshje të Champions League, është Peter Quyae. 17 vjec dhe 195 ditë ishte sulmuesi kur shënoi golin e parë në Champions, në fitoren 5-1 të Rosenborg përballë Olympiacos./abcnews.al

Gjimshiti-Berat.jpg
Igli Nikolli16:21 | 19/09/2019

Ndeshjet e Champions League dhuruan gola, emocione dhe surpriza si gjithmonë. Interi dhe Chelsea u ndalën në shtëpi në duelet e së martës. Ekipi i Antonio Contes ia doli të merrte një pikë në fund përballë çekëve të Slavia Prague, ndërsa djemtë e Lampard u befasuan në “Stamford Bridge” nga Valencia.

Mbrëmja e së mërkurës pa Real Madrid të shkatërrohej nga PSG me rezultatin 3-0, ndërsa Atalanta u turpërua në Zagreb nga Dinamo vendase me “poker” golash. Lokomotiva Moscow befasoi Bayer Leverkusen në shtëpi, ndërsa Totenham la dy pikë në transfertën e Pireut përballë Olympiacos.

Formacioni më i mirë i javës së parë ka plot surpriza. Në portë është Ter Stegen i Barcelonës, i cili priti një penallti dhe ishte i pakalueshëm përballë Borussia Dortmund. Alvarez i Ajaxit dhe Koulibaly i Napolit formojnë qendrën e mbrojtjes, ndërsa krahët kompletohen nga Hakimi i Dortmund dhe Mario Rui i Napolit.

Gueye i PSG, Krychowiak i Lokomotiv Moscow dhe Bernede i Salzburg formojnë treshen e mesit të fushës, ndërsa në ofensivë rreshtohen Orsic i Dinamo Zagreb (shënoi trigolësh përballë Atalantës), Haland i Salzburg dhe spanjolli Olmo i Dinamo Zagreb.

Emra të mëdhenj në formacionin më të dobët. Mes tyre vlen të përmenden Eden Hazard, Griezmann, Kross, ndërsa nuk mungon as Berat Gjimshiti.

Formacioni më i mirë: Portë; Ter Stegen (Barcellona) 8, Mbrojtje; Hakimi (Borussia Dortmund) 7, Alvarez (Ajax) 8, Koulibaly (Napoli) 7.5, Mario Rui (Napoli) 8, Mesfushë; Gueye (PSG) 7.5, Krychowiak (Locomotiv Moscow) 7.5, Bernede (Salzburg) 8, Sulm; Olmo (Dinamo Zagreb) 8.5, Haland (Salzburg) 9, Orsic (Dinamo Zagreb) 9. /abcnews.al

Formacioni më i dobët:

Olayinka-Peter-1280x700.jpg
Igli Nikolli15:33 | 19/09/2019

Peter Olayinka është një emër i njohur për tifozët shqiptarë. Sulmuesi nigerian zbarkoi në Ballsh në moshën 16-vjeçare dhe u aktivizua për dy sezone me ekipin e Bylisit. Më pas dy vite fantastike në Korçë me Skënderbeun, për t’u shitur te belgët e Gentit për shumën e 1.1 milionë eurove.

Nigeriani u huazua te çekët e Duklës, më pas te Zulte Waregem, ndërsa verën e kaluar Slavia Prague pagoi 3.2 milionë euro te Genti dhe siguroi shërbimet e Olayinka. Ky i fundit shkëlqeu në duelin e së martës në Champions kundër Interit në “San Siro”.

23-vjeçari shënoi golin e avantazhit në minutën e 63-të, duke i shtangur të gjithë. Zikaltrit e Contes arritën të barazonin në minutat shtesë dhe të dy ekipet morën nga një pikë. Një ndeshje shumë pozitive e sulmuesit afrikan, i cili i është vetëofruar më parë edhe kombëtares shqiptare.

Në një prononcim për kanalin zyrtar të klubit çek, Olayinka zbulon emocionet e përjetuara, frikën e anulimit të golit dhe mërzinë e përjetuar në fund nga rrjeta e Nicolo Barella.

“Ndihemi keq që nuk e fituam ndeshjen. Ishte mëkat të pësonim në minutat shtesë, por edhe pika është për t’u vlerësuar. Goli? Mendova mos isha në pozicion të parregullt dhe hodha sytë 2-3 herë drejt arbitrit anësor. Për fat gjithçka shkoi mirë dhe ndihem shumë i lumtur. Stadiumi “San Siro” ishte fantastik. Kur isha i vogël, e shihja në TV dhe ëndërroja të shënoja një ditë aty. Diçka e tillë ndodhi dhe është pothuajse e pabesueshme”, përfundon Peter Olayinka. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono