buxheti

inspektoret-tatimet.jpg
nev ila17:36 | 21/01/2020

Ngadalësimi i rritjes ekonomike duket se ka qenë një faktor me peshë në mosrealizimin e të ardhurave në buxhet për vitin 2019.

Për drejtoren e Tatimeve kjo situatë  shpjegohet me faktin se   sektorët që kanë lidhje me investimet kanë pasur ngadalësim  duke reflektuar direkt uljen e të ardhurave në TVSH.

Sipas Delina Ibrahimaj performanca e dobët e të  ardhurave është e ndikuar kryesisht nga ndërtimi dhe shërbimet.

Për të shmangur abuzimet administrata tatimore parashikon që në mars të këtij viti të nis një projekt në bazë të cilit parashikohet pajisja e të gjithë inspektorëve tatimorë me GPS.

Nga të dhënat e treguesve fiskal rezulton se në 11 muaj  të vitit të kaluar janë arkëtuar 14.3 mld lekë më pak  se plani .

Në këtë mosrealizim TVSH mban peshën më të madhe me rreth 11.2 mld lekë që lidhet direkt më rënien e konsumit por edhe përfundimin e projektit TAP./abcnews.al

partia-demokratike.jpg
nev ila18:08 | 27/12/2019

Jetesa e qytetarëve të Tiranës nuk do të përmirësohet vitin që vjen. Partia Demokratike ka akuzuar Bashkinë e Tiranës se taksat e qytetarëve do ti shpenzojë vetëm për luks e për paga. Zëdhënësja e PD-së Ina Zhupa deklaroi se 130 milionë euro të shkojnë  vetëm për rrogat e bashkisë së Tiranës.

Viti i ardhshëm nuk pritet të sjellë më shumë shërbime për qytetarët e Tiranës. Sipas selisë blu, Erion Veliaj do të shpenzojë vetëm për paga dhe luks, pjesën më të madhe të taksave të rritura për banorët e kryeqytetit.

Sipas zëdhënëses së Partisë Demokratike kreu i bashkisë së Tiranës do të mbahet mend vetëm për betonizim  dhe mbështetjen për një grup klientësh të afërt.

Sipas Partisë Demokratike Buxheti 2020 i Bashkisë së Tiranës është në të njëjtën frymë me atë të buxhetit të qeverisë së Edi Ramës dhe nuk ka lidhje me interesat e qytetarëve./abcnews.al

bushati.jpg
nev ila19:27 | 19/12/2019

I ftuar në “Abc News” deputeti socialist, Ervin Bushati deklaroi se qeveria ka bërë një reagim të shpejtë për të menaxhuar situatën pas tërmetit. Bushati theksoi se në kohë rekord janë sjellë ndryshime për të gjithë strukturën e buxhetit, ku 20 miliardë lekë do shkojnë për rindërtimin. I pyetur disa herë nga gazetari Endri Xhafo se sa është fatura financiare për dëmet, Bushati tha se ajo nuk ështe përpiluar ende.

“Qeveria pati një reagim të shpejtë për të qenë pranë njerëzve, në fazën 80 % është mbyllur kontrolli i parë i banesave që janë më të dëmtuara. Reagimi ka qenë i shpejtë, të gjithë qytetarët janë vendosur në banesa të përkohshme. Po procedohet për mënyrën se si ti ndihmojmë familjet të kthehen sa më shpejt në jetën e përditshme. Në kohë rekord janë sjellë ndryshime për të gjithë strukturën e buxhetit. Janë falur 20 apartamente dhe 2 mijë banorë kanë fituar bonuse qiraje. Është parashikuar një shumë e buxhetit të shtetit prej 20 miliard lekësh që do të shkojnë për rindërtim. Jemi në fazën e parë, kostot janë akoma duke u matur”, deklaroi Bushati.

I pyetur për kërkesën e PD-së e cila ka theksuar se duhet bërë një rialokim i fondeve, Bushati tha se opozita ka vendosur të bëjë politikë.

“Është e drejta e saj të zhbëjë punët tona. Sot nuk është koha për të parashikuar se si do të jetë gjithçka që do të ndodhi. Opozita ka një ide, është argument i tyre politik për të ngritur strukturat. Në këtë situatë kryeministri dhe mazhoranca e vlerëson se kërkohet një ndihmë e shtuar”, tha ndër të tjera Bushati./abcnews.al

auto_bardh_spahia1574344911.jpeg
nev ila15:18 | 21/11/2019

“Nuk ka rritje reale për buxhetin e shëndetësisë. Pjesa dërrmuese e tij do të shkojnë për të paguar 4 koncesione dhe 37 milionë euro në vit për 2-3 njerëz që i shërbejnë pushtetit të korruptuar e të kriminalizuar të Edi Ramës”. Ky është konkluzioni i opozitës bërë publik nga ish deputeti Bardh Spahia, gjatë një konference shtypi në selinë e kësaj partie.

“Edi Rama dhe oligarkët e tij mendojnë vetëm për të grabitur me koncesione dhe PPP korruptive, ndonëse Banka Europiane për Rindërtim dhe Zhvillim, në raportin e  saj te fundit, vlerëson se këto janë kontrata të pabazuara në studime fizibiliteti, janë me kosto te larta sociale dhe u janë dhënë pa konkurrencë firmave pa kapacitete të mjaftueshme financiare”, tha ish deputeti.

Ja deklarata e plotë Bardh Spahia:

“Buxheti për shëndetësinë, njësoj si pjesa tjetër e buxhetit 2020, nuk ka prioritet një shërbim më të mirë për qytetarët, por pasurim të padrejtë me koncesione për klientët dhe miqtë e Edi Ramës.

Buxheti 2020 nuk ka rritje reale për sistemin shëndetësor, nuk rrit pagesën për ndihmën sociale, nuk rrit pagat e mjekëve dhe infermierëve. Pjesa dërrmuese e rritjes së buxhetit për Ministrinë e shëndetësisë për vitin e ardhshëm do të shkojë për të paguar 4 koncesione.

Vitin e ardhshëm, me taksat e shqiptarëve do të paguhen rreth 37 milionë euro për te mbajtur në këmbë korrupsionin e qeverisë se Edi Ramës me koncesionet, që gllabërojnë djersën e shqiptarëve.

Me 37 milionë euro në vit për 2-3 njerëz që i shërbejnë pushtetit të korruptuar e të kriminalizuar të Edi Ramës, mund të ishin bërë disa punë të mira në sistemin shëndetësor.

Mund te ishte siguruar blerja e medikamenteve elementare, mund të ishin rritur pagat e mjekëve apo infermierëve, mund te ishte bërë një investim i vlefshëm për shqiptarët dhe jo të mbusheshin xhepat e miqve të kryeministrit.

Edi Rama dhe oligarkët e tij mendojnë vetëm për të grabitur me koncesione dhe PPP korruptive, ndonëse Banka Europiane për Rindërtim dhe Zhvillim, në raportin e  saj te fundit, vlerëson se këto janë kontrata të pabazuara në studime fizibiliteti, janë me kosto te larta sociale dhe u janë dhënë pa konkurrencë firmave pa kapacitete të mjaftueshme financiare.

Vjedhja e taksave të shqiptarëve me koncesione duhet të marrë fund!

Qeveria e Partisë Demokratike, e dalë nga zgjedhjet e lira dhe të ndershme, ka një plan për të nxjerrë nga kolapsi shëndetësinë.

Ne do të anulojmë koncesionet korruptive në shëndetësi dhe kudo! Paratë e dhëna për koncesione të paligjshme do të kthehen në investime në shërbim dhe rritje pagash për mjekët e infermierët.

Në planin e Partisë Demokratike  rroga minimale për mjekët do të jetë 1200 euro dhe 700 euro në muaj për infermierët, duke i bërë kështu një shërbim të madh vendit me dhënien fund të eksodit të tyre.

Paratë që u janë vjedhur shqiptarëve do të shkojnë për rimëkëmbjen e ekonomisë së shqiptareve te ndershëm që e duan Shqipërinë dhe duan ta ndërtojnë të ardhmen e tyre këtu, ne vendin e tyre.”/abcnews.al

administrata.jpg
ger ta09:10 | 21/11/2019

Të ardhurat e buxhetit të shtetit nuk janë në ditë të mira. Një gjë e tillë është artikuluar së fundmi në media.

Ndërkohë, kjo ka vënë në lëvizje edhe strukturat e shtetit, ku duket se mbledhja e të ardhurave është kthyer në një mision për qeverinë dhe të gjitha strukturat tatimore.

Ministria e Ekonomisë dhe Financave ka dërguar një letër për të gjithë punonjësit e administratës, që deri në datën 16 të muajit nëntor patën afat për të deklaruar se nuk kanë asnjë detyrim të papaguar ndaj arkës së shtetit.

Në letrën që punonjësit kanë marrë kërkohej që të këta të fundit duhet ta deklaronin faktin se nuk rezultojnë debitorë ndaj shtetit në asnjë lloj niveli.

Brenda datës 16.11.2019, të gjithë punonjësit në varësi të strukturave tuaja respektive, të paraqesin një konfirmim të faktit se nuk kanë në ngarkim asnjë detyrim tatimor të papaguar, duke filluar nga detyrimet individuale e deri nga pjesëmarrja si aksione në shoqëri tregtare”, thuhet ndër të tjera në kërkesën e Ministrisë së Financave dhe Ekonomisë.

Të ardhurat në buxhetin e shtetit për periudhën janar-shtator 2019 ishin në shifrën e 343 miliardë lekëve, duke shënuar një rritje prej 4.2 për qind. Mirëpo, kjo rritje nuk ishte e mjaftueshme, pasi në krahasim me planin, në buxhetin e shtetit u mblodhën 8 miliardë lekë më pak.  TVSH-ja për vitin 2019 pati një rënie me 4.4 për qind në krahasim me vitin e shkuar./abcnews.al

 

BUXHETI-PER-KONCESIONET-1-1280x720.jpg
ent ela17:31 | 20/11/2019

14.6 miliardë lekë nga buxheti i shtetit vitin që vjen do të shkojnë për të mbështetur kontratat e Partneritetit Publik Privat. Pagesat për to do të vijojnë për 13 vjet. Ministrja e Financave dhe Ekonomisë Anila Denaj raportoi në komisionin parlamentar për Financat dhe Ekonominë.

Buxheti i shtetit efektin e koncesioneve do ta ndiejë deri në vitin 2032.

Ministrja e Ekonomisë dhe Financave Anila Denaj shpjegoi përpara deputeteve të Komisionit Parlamentar të Ekonomisë dhe Financave se si pagesat  për kontratat e Partneritetit Publik Privat do të shtrihen ndër vite.

Ligji detyron të mos kalojnë 5% të totalit të të ardhurave tatimore parashikuar në vitin paraardhës.

Opozita mendon se mazhoranca po ngarkon me borxh brezat e ardhshëm, ndërsa kjo e fundit thotë se po zhvillon vendin e po rrit shërbimet.

Socialistja Blerina Gjylameti përfitoi nga prania e ministres Denaj për të marrë një përgjigje për shqetësimin e koleges Balluku rreth mungesës së financimit të projekteve në infrastrukturë.

Por çfarë do të ndodhë me kontratën koncesionare të rrugës Milot -Balldren?

Fondet për këtë rrugë sipas ministres Denaj do të lëvrohen edhe nëse do të duhet të ndërpriten të tjera investime.

Vitin e ardhshëm buxheti i shtetit do të mbështesë financiarisht 14 kontrata koncesionare në investime dhe shërbime. Fondi që do të shkojë për to kap vlerën e 14.6 miliardë lekëve. /abcnews.al

DORIAN-TELITI-1-1280x853.jpeg
ent ela16:41 | 20/11/2019

Pas diskutimeve për koncesionet në komisionin e ekonomisë, Partia Demokratike akuzon qeverinë se qeveria interesohet vetëm për koncesionet.

Dorian Teliti tha se buxheti do japë 120 milionë euro në vit për 13 koncesione, por nuk ka asnjë parashikim për rritje pagash. Teliti përsëriti qëndrimin se kur të vijë në pushtet, PD do anullojë çdo tender e koncesion korruptiv.

DEKLARATË DORIAN TELITI, DREJTOR I KABINETIT TË PARTISË DEMOKRATIKE

Parlamenti u tall sot me djersën e shqiptarëve, duke mbrojtur dhe duke votuar në komisionin e ekonomisë buxhetin e vënë në shërbim të koncesioneve korruptive  të disa oligarkëve.

Edhe ky buxhet konfirmon se qeveria nuk ka prioritet qytetarët, por një grusht miqsh e klientësh të Edi Ramës, që po pasurohen duke grabitur paratë e shqiptarëve.

Janë 120 milionë euro që do t’u paguhen financuesve të Edi Ramës përmes koncesioneve që i kanë marrë pa garë, pa transparencë dhe në kundërshtim me interesin publik.

Kjo është qeveria që shikon vetëm interesin e xhepit të vet dhe është qeveria e vetme, të paktën në rajon, që nuk ka asnjë politikë zhvillimore, asnjë politikë lehtësuese për qytetarët dhe ekonominë e vendit.

Qëndrimi i ministres së Financave në komisionin e ekonomisë dhe paraardhësit të saj vetëm sa rikonfirmuan faktin se ata, njësoj si Edi Rama, i shërbejnë disa oligarkëve që pasurohen me paratë e shqiptarëve dhe nuk duan t’ia dinë për shqiptarët e zakonshëm që jetojnë me djersë.

Buxheti i thellimit të varfërimit të shqiptarëve, i falimentimit të bizneseve, i mbijetesës së familjeve, nuk parashikon rritje rrogash për mjeket, infermieret, arsimtaret dhe punonjësit e administratës publike.

Ky buxhet nuk siguroj rritje reale për 650 mijë pensionistë.

Në vend të mbështetjes së qytetarëve, Edi Rama do t’u japë klientëve të vet vetëm në një vit me koncesione 120 milionë euro.

Këto janë një grusht kontratash PPP, te cilat, siç shprehet Banka Europiane për Rindërtim dhe Zhvillim, në raportin e  saj te fundit, janë kontrata të pabazuara në studime fizibiliteti, janë me kosto te larta sociale dhe u janë dhënë pa konkurrencë firmave pa kapacitete të mjaftueshme financiare.

Ndërkohë që qeveria do të paguajë 30 milionë euro me shume sesa viti aktual për këto kontrata PPP, pa e vrarë dhe pa u shqetësuar, qeveria nuk nguron te uli fondet për investimet e nevojshme publike në rruge, ujësjellës kanalizime, arsimin e mesëm profesional dhe të tjera programe te rëndësishme buxhetore.

Kur Partia Demokratike të marrë besimin e shqiptarëve me zgjedhje të lira e të ndershme, çdo koncesion dhe PPP korruptive do të anullohet!

Paratë që u janë vjedhur shqiptarëve do të shkojnë për rimëkëmbjen e ekonomisë së shqiptareve të ndershëm qe e duan Shqipërinë dhe duan ta ndërtojnë të ardhmen e tyre këtu, ne vendin e tyre. /abcnews.al

ogerta-manastirliu.jpeg
nev ila15:33 | 18/11/2019

Rreth 77 miliardë e 735 milionë  nga buxheti i shtetit do të shkojnë për Shëndetësinë dhe Mbrojtjen Sociale vitin që vjen.

Ministrja Ogerta Manastirliu tregoi para deputetëve të komisionit Parlamentar për Punën, Çështjet Sociale dhe Shëndetësinë ndryshimin me buxhetin e vitit 2019.

“Buxheti për sektorët e shëndetësisë dhe mbrojtjes sociale për vitin 2020 ka një rritje me 4% krahasuar me 2019. Vetëm për sektorin e shëndetësisë rritja e buxhetit krahasuar me buxhetin e vitit 2013 është 48% më shumë. Gjatë vitit 2020 financojmë 26 milion dollarë vetëm për investimet në shëndetësi”

Ky buxhet do të ketë në fokus.

“Për herë të parë financojmë me buxhetin e ri transplantin e palcës ë kockës, hapim shërbimin e ri të kardiokirurgjisë në Spitalin Universitar “Shefqet Ndroqi” dhe nisim për herë të parë programin kombëtar të kancerit të gjirit me vendosjen e mamografisë së deryrueshme”

Ndërkohë parashikohet rehabilitimi i 120 qendra shëndetësore. Zgjerimi i maternitetit “Mbretëresha Geraldinë”,  ndërtimi i spitalit të sëmundjeve të brendshme dhe pediatrisë së re brenda Qendrës Spitalore “Nënë Tereza” në Tiranë.

Rreth 2 miliardë lekë do të lëvrohen  për bonusin e bebes, në fokus do të jetë dhe financimi i pagesave për aftësinë e kufizuar bazuar në reformën e ndërmarrë së fundi. /abcnews.al

 

 

KRONIKE-KRITIKAT-E-AHMETAJ-PER-BUXHETIN.mpg_snapshot_00.03-1280x720.jpg
ent ela14:47 | 13/11/2019

Ish-Ministri i Financave Arben Ahmetaj kritikoi sot buxhetin e vitit të ardhshëm të paraqitur nga qeveria, duke thënë se ai nuk mund të veçohet për asgjë, pasi nuk ka rritje pagash e pensionesh, e as ndërtim rrugësh të reja. Kryetari i Komisionit të Ekonomisë tha se investimet publike janë ulur ndjeshëm dhe se ministria e infrastrukturës duhet të paguajë borxhet që ka.

Tashmë një vit jashtë qeverisë, Arben Ahmetaj, nuk i kursen asnjë kritikë pasardhëses së tij, Anila Denaj. Projektbuxheti 2020 për kryetarin e komisionit të ekonomisë, nuk mund të veçohet për asgjë.

Ahmetaj ngre shqetësimin se qeveria nuk do ta ndihmojë ekonominë përmes punëve publike. Sipas ish ministrit, edhe rrugët në ndërtim, po shtyhen.

Porosi urgjente për qeverinë është shlyerja e borxheve. Ahmetaj tha se për herë të parë, vendet e reja të punës në sektorin jo bujqësor, nuk e kanë kaluar më shumë se 5000 të tilla, duke mos arritur objektivat. /abcnews.al

576696c4-7e94-46da-a372-d392389723d2.jpg
ent ela17:27 | 08/11/2019

Partia Demokratike dhe Lëvizja Socialiste për Integrim i kanë cilësuar shifrat për projektbuxhetin 2020, mashtrim të qeverisë. Sipas përfaqësuesve të këtyre dy forcave politike, buxheti i vitit të ardhshëm varfëron qytetarët dhe pasuron oligarkët dhe klientët e kryeministrit Rama.

Gënjeshtare dhe mashtruese është qeveria Rama për opozitën.

Këtë e faktuan edhe në deklaratën e fundit të ministrisë së financave se rritja ekonomike për vitin 2020 do të jetë jetë 4,1 përqind vunë në dukje përfaqësues nga dy selitë opozitare.

Hap pas hapi Partia Demokratike dhe Lëvizja Socialiste për integrim sqarojnë se rritja ekonomike do të përgjysmohet krahasuar me cfarë deklaron qeveria.

“Pa asnjë dyshim, ky buxhet mund të quhet buxheti i varfërimit, pasi asnjë qindarkë nuk parashikohet për rritje rrogash për mjekët, infermierët, arsimtarët dhe punonjësit e administratës publike.

Asnjë qindarkë për shpërblimin e pensionistëve dhe familjeve në nevojë. Ulen me 10% fondet për dëmshperblimin e ish pronarëve.

Ulen fondet për dëmshpërblimin e ish të përndjekurve politikë, duke e çuar në 3 dekada afatin kohor të shlyerjes së plotë të faturës financiare për këtë shtresë të përvuajtur të shoqërisë”.

Në të dhënat e fundit që ka publikuar Banka Botërore, numri dy I Lsi ka lexuar se bizneset shqiptare në masën 30 përqind ankohen se administrata tatimore publike u kërkon rryshfet. Këto shifra korrupsioni janë tre herë më të larta se mesatarja e vendeve të rajonit dhe dy herë më të larta se mesatarja në nivel botëror- shprehet nënkryetari i LSI.

Ndërsa demokratët publikojnë të tjera shifra që sipas tyre janë fonde buxhetore për të paguar PPP e klientëve të qeverisë.

 “120 milionë euro apo 30 milionë euro më shumë sesa viti aktual, do të shkojnë për të paguar 12 kontrata PPP – të gjithë këta miq dhe klientë të Kryeministrit.

Është hera e parë në 30 vjet, madje rast unik në histori, që një projekt-buxhet ndërtohet duke patur prioritet absolut vetëm një grusht oligarkësh”.

Për opozitën edhe  Politika fiskale është në shërbim të një koncesioni të vetëm, atë të fiskalizimit, i cili ka kosto të fshehura prej të paktën 500 euro në vit për 120 000 bizneset e vogla e të mesme. /abcnews.al

 

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono