bushati

BUSHATI-ME-SEKRETAREN-NATO.mpg_snapshot_00.11-1280x720.jpg
ent ela11:01 | 14/12/2018

Zëvendëssekretarja e përgjithshme e NATO-s Rose Gottemoller, ndodhet në Tiranë për një vizitë zyrtare. Pas një takimi me ministrin e jashtëm, ajo theksoi rolin e Shqipërisë për ruajtjen e stabilitetit në rajon. Ndërsa ministri Bushati deklaroi se vendi ynë ka rritur buxhetin për mbrojtjen.

Bushati: “Sot kemi diskutuar në radhë të parë për angazhimet e Shqipërisë në këtë aleancë, kryesisht përsa i përket për projeksionin pozitiv që ka Shqipëria për shpenzimet në fushën e mbrojtjes, bazuar mbi angazhimet e Samitit të Uellsit dhe sidomos mbi hartën e rrugës në kuptimin politik që u ra dakord në samitin e Qershorit. Shqipëria ka rritur shpenzimet në buxhetin për mbrojtjen, sikundër do të vijojë të japë kontributin e saj në misionet dhe operacionet e NATO-s”.

Gottemoller: “Vitin tjetër do jetë jetë përvjetori i 70 i themelimit të NATO-s dhe do të jetë një ministerial i ministrave të jashtëm në Uashington në prill dhe presim me padurim t’ju urojmë mirëseardhjen në këtë eveniment historik dhe ne shënojmë 10 vjetorin e anëtarësimit të Shqipërisë në NATO. Në këtë dekadë kemi treguar se pasja e Shqipërisë brenda NATO-s na bën të gjithëve më të sigurt. Unë kam parë me sytë e mi punën që është bërë nga ekipet shqiptare në Letoni dhe fola me ushtarët tuaj atje dhe pres me padurim që të punojmë sëbashku”. /abcnews.al

BUSHATI-MCALLISTER-1280x720.jpg
ent ela14:41 | 04/12/2018

Reforma në drejtësi dhe zbatimi i vettingut është diskutuar në takimin që Ministri për Evropën dhe Punët e Jashtme Ditmir Bushati ka zhvilluar me Kryetarin e Komitetit për Politikën e Jashtme në Parlamentin Evropian, David McAllister.

Kreu i diplomacisë shqiptare  ndodhet në Bruksel, në kuadër të takimit të Ministrave të Jashtëm NATO-s. McAllister evidentoi se “hapja e negociatave me Shqipërinë dhe progresi i tërë rajonit drejt BE-së i shërben jo vetëm rajonit tonë por është në interes të vetë BE-së”. Bashkëbiseduesit shkëmbyen mendime  për zhvillimet në Ballkanin Perëndimor dhe ecurinë e përgatitjeve për zgjedhjet e ardhshme për Parlamentin Evropian. /abcnews.al

BUSHATI-KRITIK-PER-INTEGRIMIN-1280x720.jpg
ent ela13:19 | 03/12/2018

I zhgënjyer është shprehur ministri për Evropën dhe punët e jashtme Ditmir Bushati me shumicën e kryebashkiakëve, të cilët nuk kanë treguar angazhimin e duhur, në procesin e vlerësimit analitik që përcakton hapjen e negociatave me Bashkimin Evropian. Gjatë një takimi konsultues për ngritjen dhe funksionimin e strukturës përgjegjëse për zhvillimin e negociatave, ministri Bushati, kërkoi që askush të mos e neglizhojë këtë proces.

Rama në qershor 2018: “Nuk kemi humbur 12 muaj. Kemi 12 muaj punë, që është e njëjta punë që do të kryhej edhe nëse do të thuhej në tekst, negociatat hapen sot”

Gjashtë muajt e parë kaluan por procesi screening që kërkon bashkëpunimin e të gjitha palëve nuk është aty ku duhet. Madje ministri për Evropën dhe Punët e Jashtme shprehet i zhgënjyer kryesisht nga puna e bashkive.

Bushati: “Unë kam insistuar që ky takim të bëhej në 9:00, unë dëshiroja që të bëhej  8 të mëngjesit për të kuptuar gatishmërinë  e institucioneve. Reagimet që kam marrë kanë qenë zhgënjyes, aq më tepër që bashkitë duhet të luajnë një rol aktiv në këtë proces.

Në këtë takim konsultues për ngritjen e strukturës për zhvillimin e negociatave me Bashkimin Europian ministri Ditmir Bushati nënvizoi që të hidhen hapat e kërkuar ashtu siç duhet e jo në zbrazëtirë pasi ky mision duhet të marrë vlerën e duhur.

Bushati: “Për disa kapituj ka kritere hapëse, kritere ndërmjetëse dhe kritere mbyllëse. Për të gjitha këto vendi do të duhet të miratojë plane veprimi, por edhe t’i zbatojë dhe në këtë kontekst ushtrimi i orës 8 të ëmnghjes ska për t’iu ndarë në asnjë moment deri sa vendi ta ketë ndarë mendjen që do bëhet pjesë e BE”.

Thirrjen për të mos pushuar asnjë ditë e ka bërë edhe komisioneri Johanes Hahn në korrik gjatë vizitës që zhvilloi në Tiranë.Pasi rezultatet e procesit të vlerësimit analitik përcaktojnë mandatin e negociatave me Bashkimin Evropian.

“Mos humbi asnjë ditë. Nisni sa më shpejt të jetë e mundur. Më thuhet gjithmonë dhe them gjithmonë, njerëzit janë me pushim, por jo institucionet”.

Këshillën e komisionerit Hahn duhet ta dëgjojë edhe administrata shqiptare të cilën e presin pushime të tjera në muajin e festave të fundvitit. /abcnews.al

 

 

KRONIKE-AHMETAJ-BUSHATI-PER-JORIDEN-PPP-1280x720.jpg
ent ela13:53 | 15/11/2018

Edhe pse buxheti 2019 nuk ishte pjesë e parashikuar e diskutimeve në parlament, ministri Ahmetaj edhe deputeti Ervin Bushati, kohën e rezervuar për diskutim të rendit të ditës, e shfrytëzuan për t’i dhënë një përgjigje demokratëve që përmes Jorida Tabakut vetëm një ditë më parë denoncuan skemën e partenriteti publik privat në kuadër të diskutimit të buxhetit 2019.

Deklarata e një dite më parë e nënkryetares së Komisionit të Ekonomisë, Jorida Tabaku e cila denoncoi buxhetin 2019 dhe koncesionet e partneritetit publik privat si në favor të oligarkëve, solli jo një, por dy reagime nga foltorja e parlamentit.

Bushati: Është e papërgjegjshe mënyra se si opozita del e mban deklarata,

Ahmetaj: Është çështja e projekteve PPP

Bushati: Opozita nuk ka qënë e pranishme. Jep opinione për ligje që as nuk i ka lexuar.

Ahmetaj: Ju referua një shifre për koncesionet e PPP tha është mbi 2 miliardë euro dhe këto rëndojnë mbi qytetarët, tani unë po i marr një për një.

Përgjigjen Ministri i Ekonomisë dhe Financave e artikuloi në formë pyetjesh.

Ahmetaj: Çfarë keni me dibranët që nuk doni t’i bëhet Rruga? Çfarë keni me kuksianët, me shkodranët që nuk doni t’u bëhet Rruga? Kë urreni? Shkodrën që nuk ju dha 7 vota? Lezhën që nuk ju dha 5 vota. Nuk i meritonit. Çfarë keni me të sëmurët e dializës që doni t’i bëni të vuajnë përtej vuajtjes që kanë. Çfarë keni ju të opozitës?.

Kur populizmi u davarit, Ahmetaj iu referua problemit të denoncuar nga demokratët.

“Keni probleme të procedurës dhe kostos, aty i keni letrat, do shihen sot, nesër dhe ndër vite. Një procedurë totalisht transparente. Rruga e Arbrit është PPP, do bëhet, me paratë e buxhetit do bëhej pas 20 viteve”.

Konçesionet e Partneritetit Publik-Privat janë investime publike në favor të qytetarëve, pa shpenzuar asnjë lek nga buxheti i shtetit, thekson Ahmetaj.

“Po do ta paguajë buxheti për 13 vjet, patjetër”.

Për një gjë bien dakort mazhorancë – opozitë, dokumentat e procedurave transparente sipas rilindjes, korruptive sipas demokratëve, janë aty dhe mund të kontrollohen ndër vite. /abcnews.al

 

 

 

BUSHATI-DANIELSSON-ABC-1280x720.jpg
ent ela16:47 | 10/10/2018

Ministri i punëve të jashtme Ditmir Bushati ka deklaruar se ka nisur puna për një paketë strategjike për bashkëpunimin institucional si dhe evidentimin e nevojave që vendi ynë ka për të plotësuar gjatë procesit “screening” i cili i paraprin nisjes së negociatave të një shteti me Unionin Europian.

Ministri për Europën dhe Punët e Jashtme Ditmir Bushati sëbashku me drejtorin e përgjithshëm të politikave të fqinjësisë dhe zgjerimit në Komisionin Europian Christian Danielsson morën pjesë në seminarin me titull “impakti i negociatave të antarësimit në punën e autoriteteve dhe ministrive relevante – mësime të nxjerra nga Republika e Kroacisë.

Ditmir Bushati: Për ne 2019 është një horizont i hapur me kalendar të qartë dhe me detyra shtëpie të qarta, të cilat synojmë që t’i realizojmë së bashku me ndihmën e KE në mënyrë që qershori i 2019-ës të jetë një proces i finalizaur me fillimin e bisedimeve për anëtarësim në BE. Ne po punojmë për të thelluar procesin  e reformave, së bashku me delgeacionin evropian kemi bërë një analizë të nevojave që duhet të adresojmë në këtë proces. Kemi përgatitur një skemë të bashkëpunimit ndërinstitucional që kombinon vendimmarrjen politike përfshirjen e Këshillit të Ministrave, Kryeministrit dhe Ministrave për çështje kyçe, që kanë të bëjnë me sundimin e së drejtës. Gjatë këtij viti ne synojmë të fuqizojmë rolin tonë koordinues edhe në raport me institucionet që janë të pavarura. Ky është një proces ku ne synojmë të anëtarësohemi në BE dhe duhet të përshtasim legjislacionin, politikat, mënyrat e funksionimit të institucioneve me standardet që imponohen nga BE.

Aktiviteti u parapri nga një takim i ministrit të jashtëm shqiptar Bushati me zotin Danielsson, ndërsa seminari u organizua dhe financua nga isntrumenti për asistencë teknike dhe shkëmbim informacioni i Komisionit Europian. /abcnews.al

N34A9174-1280x853.jpg
ent ela13:55 | 07/10/2018

Ka përfunduar konkursi i përvitshëm “Colours of Albania 2018”.  Ndër 35 mijë fotot e publikuara, çmimi i parë i është dhënë fotos me fusha me livandë në Koplik.

Kalaja e Rozafës në Shkodër është veshur me ngjyrat e Shqipërisë këtë fundjavë. Në festën përmbyllëse të konkursin të përvitshëm “Colours of Albania 2018”, mes 35 mijë fotove të publikuara në 6 muaj, një rekord i të katërt edicioneve, u përzgjodhën pesë fotot fituese.

Vendin e parë e mori fusha me livandë në Koplik, me autore Erisa Shaba.

Mbrëmja është çelur nga Ministri për Evropën dhe Punët e Jashtme, Ditmir Bushati, i cili theksoi se komponenti kulturor ndihmon në rilidhjen e Shqipërisë me Evropën, me vlerat evropiane dhe civilizimin evropian.

Përmes këtij konkursi ku çdo shqiptar e i huaj kanë pasur mundësi të postojnë fotot e tyre me imazhet e Shqipërisë, ne kemi treguar atë çka është më e mira nga ne.

Ministri i Mjedisit dhe Turizmit, Blendi Klosi e quajti një gjetje të zgjuar zhvillimin e aktivitetit në kalanë e Shkodrës duke promovuar kulturën, trashëgiminë kulturore dhe duke promovuar vlera si kjo kala 2500 vjeçare.

“Ne jemi këtu për t’i bërë thirrje shumë e shumë turistëve që të vijnë të vizitojnë Shqipërinë dhe të shohin sa e bukur është ajo. Nëpërmjet fotove ajo duket e mrekullueshme”.

Gjithashtu aktiviteti mori dhe vlerësimin e Ambasadorit të Bashkimit Evropian në Tiranë, Luigi Soreca, i cili në fjalën e tij përshëndetëse u shpreh se delegacioni i BE-së ka qënë një mbështetës i fuqishëm i këtij eventi që i ka treguar të gjithëve më të mirën dhe më të bukurën e asaj që Shqipëria ofron duke e quajtur eventin një edicion përmbyllës  të suksesshëm.

Motoja e këtij viti e Colours of Albania ishte “Trashëgimia kulturore dhe përkatësia europiane”, e cila përkon me lajtmotivin e Bashkimit Europian për vitin 2018. Për 6 muaj qytetarët me fotografitë e tyre u bënë diplomatë duke promovuar bukuritë e vendit.

Në një atmosferë festive, ekpozitë të 40 prej fotove më të mira, produkteve tradicionale dhe muzikës së Shpat Dedës, të pranishmit shijuan një fundjavë ndryshe, larg rutinës.

Ngjyrat e Shqipërisë do të kthehet sërish vitin e ardhshëm. /abcnews.al

BUSHATI-PER-METEN-1280x720.jpg
ent ela15:58 | 04/10/2018

I habitur është shprehur ministri për Evropën dhe Punët e Jashtme, Ditmir Bushati, për deklaratën që bëri një ditë më parë presidenti i Republikës, Ilir Meta, për marrëveshjen me Greqinë.

Prandaj pikëpamje të ndryshme kanë lirinë e plotë institucionale për t’u trajtuar vetëm në rrugë institucionale dhe në ansjë moment  në kanale të tjera informative. Më habit që Presidenti Meta ka ndryshuar qëndrim, po kush jam unë që të gjykoj Presidentin e Shtetit, unë jam një ministër”, tha ministri për Evropën dhe Punët e Jashtme.

Kryetarin e shtetit e konsideron si pjesëtar të ekipit negociator, prandaj dhe ministri Bushati  sqaron se deri më tani janë hedhur një nga një hapat për një proces që është në vazhdim e që presidenti e ka dhënë autorizimin.

“Nëse do përdor një shprehje popullore: ”Ne nuk mund të bëjmë dasëm nëse nuk kemi çiftin”. Në rastin në fjalë negociatat nuk kanë përfunduar dhe deri në përfundim të tyre ne e konsiderojmë veten pjesë të një ekipi përfshirë Presidentin e Republikës, të cilin e ngarkon Kushtetuta”, u shpreh Bushati.

Qëndrimin e tij ndaj deklaratave të kreut të shtetit ministri Ditmir Bushati e shpreu gjatë konferencës së përbashkët për shtyp me homologen e tij austriake Karin Kneissl. Ministrja federale për Evropën dhe Punët  e Jashtme të Austrisë vlerësoi ecurinë e Shqipërisë në përmbushjen e kritereve për t’u bërë pjesë e Bashkimit Evropian. Por ajo i kërkoi të gjithë politikës shqiptare që të jenë të bashkuar në këtë proces.

“Ju përgëzoj për përpjekjet dhe punët që keni arritur në veçanti në fushën e sundimit të ligjit, të pavarësisë të gjyqësorit. Në mbyllje të fjalës sime dëshiroj të them për çështjet e interesit kombëtar që i gjithë vendi duhet të jetë i bashkuar”, tha ministrja austriake.

Jo një po dy herë i drejtohet ministri Bushati opozitës. Njërën dorë mazhoranca e shtrin për të bashkëpunuar për reformën zgjedhore.

“Jemi në limitet kohore dhe në këtë kontekst ne duam një orë e më parë të miratojmë këtë paketë aktesh që reflekton të gjitha rekomandimet e OSBE/ODHIR për t’i dhënë mundësi zbatimit të kësaj pakete për zgjedhjet e ardhshme vendore”, u shpreh ministri.

Dorën tjetër e zgjat për reformën në drejtësi.

“Na duhet të punojmë sëbashku për t’i dhënë mundësi magjistratëve të rinj të studiojnë në Shkollën e Magjistaturës dhe të kenë një strategji të përbashkët se si do të jetë sistemi drejtësisë nga pikëpamja burimeve njerëzore në 2, 5 dhe dhjetë vitet e ardhshme”, tha Bushati.

Ministri për Evropën dhe Punët e Jashtme, Ditmir Bushati, sëbashku me homologen austriake kanë kryesuar takimin e ministrave të integrimit që u përmbyll me nënshkrimin e një deklarate të përbashkët.

MARREDHENIET-SHQIPERIO-SERBI-1280x720.jpg
ent ela13:35 | 03/10/2018

Ministri për Evropën dhe punët e jashtme Ditmir Bushati i kërkoi politikanëve serbë që të lenë retorikën e shekullit 19, sepse nuk i bën nder diskutimeve të sotshme që janë të përqendruara në procesin e pajtimit dhe normalizimit të marrëdhënieve. Këtë deklaratë ministri Bushati e bëri në konferencën “Serbët dhe shqiptarët” të mbajtur në Tiranë.

Miqësitë  dhe armiqësitë kanë shoqëruar marrëdhënien Shqipëri-Serbi që prej vitit 1912. Përplasjet më të shumta kanë ndodhur për ndarjen e territoreve.

106 vjet më pas kanë pësuar shumë ndryshime, por Kosova nuk ka mundur t’i shpëtojë debateve edhe pse sot është një shtet i pavarur.

Ministri për Evropën dhe punët e jashtme Ditmir Bushati i kërkon homologut serb të mos i kthehet më të shkuarës por të shohë përpara.

“Ministri i Jashtëm serb, Ivica Daçiç, ka thënë se Kosova është zemra e Serbisë dhe kosovarët janë shqiptarë që jetojnë jashtë atdheut të tyre. Kjo është retorikë e shekullit XIX dhe nuk i bën nder diskutimeve të sotshme që janë të përqendruara në procesin e pajtimit dhe normalizimit”.

Shqipëria kërkon vendosjen e normalizimit të marrëdhënieve, u shpreh ministri Bushati duke i kujtuar fqinjëve se Kosova ka të gjithë vëmendjen e qeverisë shqiptare.

“Marrëdhënia shqiptaro-serbe ka një elefant në dhomë që është Kosova, që ka përfaqësuesit e saj që flasin në interesin e saj, por edhe qëndrimi jonë është i qartë: procesi i normalizimit të marrëdhënieve Kosovë-Serbi nuk zëvendësohet nga një raport i mirë Shqipëri-Serbi, por përplotësohet”.

Ministri Ditmir Bushati i dha këto deklarata në konferencën e organizuar në Tiranë nga Agjencia Telegrafike Shqiptare dhe agjencia e lajmeve serbe,  Tanjug, me temë “Serbët dhe Shqiptarët – Në cilin drejtim?”.

Për numrin një të diplomacisë shqiptare dy vendet kanë shumë pika të përbashkëta  dhe  një tendencë për të kaluar stereotipet.

“Marrëdhëniet me Serbinë janë në progres e sipër. Vendet tona duhet të kalojnë plagët e së kaluarës dhe ka shenja për këtë”.

Në të njëjtën linjë mendimi ishte edhe Eurodeputeti Hannes Swoboda duke i vënë në dukje shqiptarëve dhe serbëve që të marrin përgjegjësi për vete dhe për rajonin.

Svoboda: “Ajo që është e rendësishme është se të dyja palët do të marrin përgjegjësi jo vetëm për vete por dhe për rajonin, sesi njerëzit mendojnë për njëri-tjetrin dhe jetojnë pranë njëri-tjetrit, por jo me kokën mbrapa por duke parë të ardhmen”.

Ky aktivitet me temë “Serbët dhe Shqiptarët – Në cilin drejtim?” vjen pas konferencës me të njëjtën temë të zhvilluar më 10 korrik në Beograd. /abcnews.al

 

XHAFAJ-BUSHATI-PER-ARMET.mpg_snapshot_00.14-1280x720.jpg
ent ela14:08 | 20/09/2018

Brenda tremujorit të parë të vitit të ardhshëm në vendin tonë do të jetë ngritur një strukturë e posaçme për grumbullimin e armëve pa leje që ndodhen në duart e qytetarëve. BE organizoi një takim në Tiranë për këtë qëllim.

“Keqpërdorimi i armëve dhe trafikimi i tyre përbën problem serioz për të gjithë rajonin”.

Kështu u shpreh ministri i Brendshëm, Fatmir Xhafaj gjatë një takimi kundër trafikimit të armëve, e lançuar nga Gjermania dhe Franca.

“Vitet e fundit qeveria ka ndërmarrë një sërë masash për një kontroll më rigoroz të qarkullimit të armëve. Gjithashtu Shqipëria ka kërkuar një zgjidhje për mbajtjen pa leje apo trafikimin e armëve. Ministria e Brendshme mbetet tërësisht e angazhuar për ngritjen e Njësisë Qendrore te Armëve të Zjarrit, si strukturë organike, brenda tremujorit të parë të vitit 2019”.

Ndërkohë ministri i Jashtëm Ditmir Bushati, theksoi se armët e zjarrit dhe trafikimi i tyre kanë një përhapje të gjërë në Ballkan dhe në këtë pikë duhet të jetë një sfidë rajonale e jo vetëm të një shteti.

“Ne i mëshojmë domsdoshmërisë së bashkëpunimit rajonal në këtë fushë siç nënvizohet në strategjinë për Ballkanin Perëndimor që u publikua në shkurt të këtij viti ky rrezik nuk mund të adresohet individualisht se para se të jetë një sfidë kombëtare është një sfidë për rajonin tonë”.

Takimi i së enjtes u organizua nga BE dhe lançuar nga, ku kërkohet  ngritja e një strukturë të posaçme për pikëgrumbullimi e armëve pa leje të, cilat gjendet me shumicë në vendin tonë pas hapjeve të depove të armative në vitin 1997. /abcnews.al

Gazetar i ABC News: Andi Qosja

TAKIMET-E-MIONISTRIT-MAS-NE-TIRANE-1280x720.jpg
ent ela17:01 | 19/09/2018

Ministri i jashtëm gjerman Heiko Mas u shpreh sot në Tiranë se negociatat e anetaresimit te Shqiperise nuk do të hapen automatikisht qershorin e ardhshëm, por do të vlerësohet ecuria e reformave kryesore. Mass garantoi Tiranën zyrtare se vendi ynë do të ketë mbështetjen e Gjermanisë, në rrugën euro- integruese.

Mbështetjen e Gjermanisë ndaj vendit tonë e rikonfirmoi  edhe ministri i jashtëm Federal Heiko Maas. Në takimin që zhvilloi me kryeministrin Edi Rama nuk ngurrojë ta lëvdojë për guximin me reformat e ndërmarra.

“I dashur Edi Rama, mënyra kurajoze për të bërë politikë është demonstruar tashmë e suksesshme”.

Por edhe duke i kujtuar se duhet t’i realizojnë të gjitha kërkesat e vendeve skeptike.

“Perspektiva europiane e Shqipërisë nuk është vetëm fjalë nga ana jonë dhe nëse ju do të vijonit me rrugën tuaj, sikurse kemi parë vitet e fundit, do të përmbushnit kushtet e kërkuara tanimë, atëherë rruga drejt BE do të vijojë gjithashtu më tej e për këtë keni mbështetjen tonë të plotë”.​

Duke e krahasuar me spirancën rolin e Shqipërisë në rajon, ministri gjerman e siguroi se qeverinë që përfaqëson do ta kenë në krah. Nga ana e tij kryeministri Rama i përsëriti një kërkesë.

“Për të marrë mbështetjen e qeverisë federale për kandidaturën e Shqipërisë për të drejtuar OSBE-në. Jemi të bindur që kjo do të kontribuonte edhe në funksion të vetë dinamikave të rajonit tonë, të procesit integrues të rajonit dhe do të ishte një incentivë për Shqipërinë dhe për rajonin”.

Siç ndodh rëndom kryeministri Rama e ruan një për në fund një fjali përtej protokollit.

“Për faktin që midis Maqedonisë dhe Greqisë keni zgjedhur që drekën ta kaloni në Shqipëri. Është një zgjedhje shumë e mençur”.

Por para se të vinte koha e drekës ministri gjerman është takuar edhe me homologun Ditmir Bushati.

“I dashur Ditmir! Ju mund të vazhdoni të mbështeteni te Gjermania në pjesën tjetër të rrugës suaj. Ne e dimë të gjithë që procesi i reformave mund të jetë një rrugë e dhimbshme, ndoshta dhe me pengesa, por jam i bindur që për të gjithë ne do t’ja vlejë në fund të ditës që pikërisht të shfrytëzojmë shanset që na jepen për t’u afruar me njëri-tjetrin dhe perspektiva e anëtarësimit është më afër se kurrë. Shpresoj që së bashku t’ja dalim!”

I pyetur nga gazetarët mbi qëndrimin e shetit ggjerman për ndryshimin e kufijve midis Kosovës e Serbisë ministri Maas tha se ishte skeptic ndaj kësaj ideje.

“Ekziston gjithashtu edhe frika e një efekti domino. Është një frikë që ne e kemi perceptuar dhe kjo do të luajë sigurisht edhe një rol përsa i përket qëndrimit të Qeverisë Federale në këtë drejtim. Prandaj dhe ne, në një farë mënyrë jemi skeptikë dhe diskretë lidhur me këtë pikë. Kjo është një çështje e cila do të duhej të sqarohej dhe sigurisht, të merej një vendim lidhur me këtë. Por të sqarohet dhe të zgjidhet në mënyrë të tillë që të mos shkaktohen probleme të tjera shtesë, përveç atyre që janë”.

Ministri federal i Gjermanisë është takuar edhe me kryetarin e Partisë Demokratike Lulzim Basha për çështjet e aktualitetit politik në vend she reformat që duhet të zbatohen në bashkëpunim me mazhorancën në të mirë të integrimit evropian të vendit.

Një takim me dyer të mbyllura ministri gjerman ka zhvilluar edhe me drejtuesit e Vettingut ku zyrtarisht është njoftuar se për një diskutim të lirë. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono