bujqësia

kukesi-sherebela.jpg
G. P.15:23 | 08/09/2019

Në Shtiqën të Kukësit fermerët ndihen të falimentuar. Shumë prej tyre kanë hequr dorë nga sherbela, por edhe bizneset e tjera nuk u kanë funksionuar.

Sapo e pyet Nebiun, për programin e 100 fshatrave, pjesë e të cilit është edhe Shtiqni, ngre super dhe thotë vetëm atë se çfarë është përfolur në media.

“Kemi dëgjuar, por jemi të pamundur. Nuk ka gjë që nuk bëhet, problemi është se nuk janë mundësitë”, tha ai.

Nebiu ishte kultivuesi dhe prodhuesi më i madh fidanëve të sherebelës në Kukës e më gjerë, por hoqi dorë nga mungesa e tregut, mungesa e mbështetjes dhe subvencioneve dhe pamundësisë për shlyerje të kredisë ndaj ka vendosur të merret me bimë të tjera me më pak kosto.

“Sherebelja u eliminua për arsye të tregut se nuk ka. I kam heq sherbelën, kam fut haronjat. E kam ngritur zërin te Ministria e Bujqësisë, por nuk kam pasur përkrahje dhe nuk është në skemën e subvencioneve”, u shpreh ai.

E në fakt Nehbiu nuk është i vetmi fermer në këtë gjendje. Prag falimentimi është dhe Muhamet Muja që mbarshtron blegtori. I zhytur në kredi dhe pa mbështetje ka arritur deri këtu duke ndërtuar stallën, mjetet e mekanikës bujqësore, por pa mundur ta zhvillojë më tej.

“Në teori e dimë që është tek 100 fshatrat. Kemi një eksperiencë jo të mirë këto vite. Gjithçka kemi bërë e kemi bërë nëpërmjet kredive, të cilat i kemi marrë nëpërmjet interesave shumë të larta”, tha ai.

Për Muhametin, programi i 100 fshatrave mbetet një utopi e pa implementuar.

“Asnjë gjë vetëm llafe. Nuk ka asnjë zhvillim nga bujqësia, shumë pak. Nuk ka shteti dorë të na ndihmojë”, tha ai.

Sa më shumë banorë në Shtiqen pyet aq më pak dinë për këtë program. Shtiqni, një fshat ngjitur me qytetin e Kukësit, nuk u përzgjodh rastësisht në këtë program. I ka të gjitha resurset, fushën më të madhe në rajon, ujë të bollshëm, pemëtari e blegtori.

Autostrada e përshkon mes për mes. Ka aeroportin e plot mundësi të tjera. Ndaj u pa si mundësi për zhvillimin e agroturizmit përmes programit të qeverisë për 100 fshatrat.

Mirëpo që nga 2017 kur nisi ky program, asgjë konkrete nuk është ndërmarrë. Bashkia e Kukësit u tregua korrekte në studimin dhe hartimin e projekteve zhvillimore të Shtiqnit, që nuk janë pak, por plot 72 të tilla.

Por nga ana e qeverisë edhe pse u krijua bërthama brenda Këshillit të Ministrave me një koordinator kombëtar, duket se nuk është zbritur akoma në terren, të paktën në Kukës. Banorët e Shtiqnit janë skeptik. Pak nga pak po largohen edhe të rinjtë nga fshati, e duke lënë të moshuarit pa fuqi punëtore.

Gjithsesi Shtiqnin mbase do e zhvillojë vetë koha për shkak të pozitës gjeografike që ka. Emigrantët sjellin remitancat dhe pamja e tij ka ndryshuar me shtëpi e vila bashkëkohore, rrugë e ndriçim, ujë e sistem ujitje, kopshte e shkolla, por ende pa mundur të krijojnë atë për të cilin duhet të vijnë turistët.

Bujtinat, minirestorantet e vogla të traditës apo dhe mini-bizneset e agrokulturës dhe përpunimit. Kjo i takon politikave qeverisëse të përfshira në program e që deri më sot mbeti vetëm në letër.

Gazetar: Bujar Muçmata

ABC News Abania 

rruga-e-lumit.jpg
G. P.21:56 | 06/09/2019

Rruga e lumit të Vlorës pritet të hapë mundësi të reja për bujqësinë dhe blegtorinë në zonë. Kryeministri Edi Rama ishte i pranishëm në inspektimin e punimeve për këtë rrugë, e cila lidh qarkun e Vlorës me bregdetin Jonian.

Kryeministri Edi Rama inspektoi ecurinë e punimeve të rrugës së lumit të Vlorës, si dhe u takua me banorë të zonave përreth. Rruga me gjatësi thuajse 100 kilometra do të lidhë Qarkun e Vlorës me bregdetin Jonian. Ky korridor i ri  jo vetëm shkurton rrugën ekzistuese, por hap shumë mundësi për turizmin, bujqësinë dhe blegtorinë, theksoi Rama.

“Kjo hap një pamje tjetër, një Shqipëri tjetër për të gjithë ata që s’kanë kaluar këtej ndonjëherë, është një spektakël i madh nga ana e natyrës, gjithashtu do hapi shumë mundësi për bujqësinë, për blegtorinë, për turizmin. Dalja poshtë në breg është shumë fantastike dhe lidhja me Gusmarin dhe Kuçin poshtë.”

Në rrugën e lumit të Vlorës, ka mbaruar segmenti i parë dhe ka nisur i dyti. Ky korridor është një prej investimeve strategjike me impakt të rëndësishëm për zhvillimin ekonomik e social për të gjithë zonën./ABC News Albania 24/7

shkumbini.jpg
ent ela17:40 | 23/08/2019

Një nga lumenjtë që në të kaluarën ka qenë lumi më i pastër sot është kthyer lumi më i ndotur. Ai është lumi Shkumbin përshkon përmes disa bashki dhe derdhet në detin Adriatik.

Dikur ishte një lumë me ujë të kulluar dhe të pastër që buronte nga malet. Shkumbini. Nis në malin e Valamares në afërsi të Pogradecit dhe pasi përshkon një luginë 181 km të gjatë, përfundon në detin Adriatik me grykëderdhje në një nga plazhet më të bukur të vendit, Plazhin e Vilë-Bashtovës.

Kalon përmes territorin shqiptar duke e ndarë vendin në dy pjesë të mëdha në Veri dhe Jug. Ai përshkon bashkitë e Librazhdit, Elbasanit, Peqinit dhe Rrogozhinës. Pas  viteve ’70 Shkumbini rezulton një nga lumenjtë më të ndotur në shkallë vendi.

Dekada më parë ndodhi kryesisht nga Kombinati Metalurgjik, Rafineria e naftës në Cërrik si dhe nga aktiviteti industrial i zonës. Kurse pas viteve 90 të shekullit të kaluar ndotësi më i madh u kthye faktori njeri.

Studimet e viteve të fundit kanë dëshmuar për shkallë të lartë të ujrave e zeza të pa përpunuara që derdhen në këtë lumë. Nis në Librazhd dhe arrin shifra alarmante në Elbasan.

Dy pikat më kritike janë ato ku derdhen Përroi i Manazeres dhe Përroi i Zaranikës.  Vazhdon më tej në Peqin, Rrogozhinë e deri në Adriatik. Matjet kanë vërtetuar se në perëndim të Elbasanit niveli i bakterieve për 100 ml ujë arrin në mbi 100 mijë.

Treguesi specifik i ujërave të zeza, koliformët fekalë (E. Coli)  arrin në shifra alarmante duke e bërë këtë ujë praktikisht të papërdorshëm. Në muajt e verës kur niveli i ujit bie dhe temperaturat favorizojnë zhvillimin e mikrobeve është dhe periudha më e keqe.

Specialistët e sëmundjeve të lëkurës në Elbasan prej kohësh kanë dhënë alarmin duke njoftuar popullsinë  të mos frekuentojë për plazh ujërat e lumit Shkumbin pasi shkakton sëmundje të rënda e të pa shërueshme në lëkurë.

Përdorimi si ujë i pijshëm është rreptësisht i ndaluar pasi shkakton intoksikacione, diare dhe sëmundje të rënda të traktit tretës. Gjithashtu peshku dhe çdo gjallesë tjetër e lumit Shkumbin pas rrjedhës së tij në Elbasan është i ndaluar.

Një ujë i tillë i molepsur në mënyrë dramatike ka ndikuar në jetën e faunës së lumit Shkumbin e cila është drejt zhdukjes. Ndërsa banorët e kanë përdorur gjërësisht për ujitje, mësohet se ka kontaminuar mijëra hektarë tokë bujqësore.

Kjo po manifestohet me shfaqjen e sëmundjeve në fruta perime, dhe kultura bujqësore. Specialistët e bujqësisë shprehen se pasojat e ndotjes së tokës do të ndjehen gjatë.

Gazetar i ABC News, Elbasan: Fatos Salliu

 

 

sherbimet-dhe-bujqesia.jpg
G. P.16:05 | 06/07/2019

Shifrat e punësimit janë një ndër temat kryesore të diskutimeve publike. Po cilët janë sektorët që mbajnë peshën kryesore të punësimit në vend dhe japin kontribut kryesor në ekonomi. Instituti i Statistikave ka analizuar të dhënat e vitit të shkuar.

Shërbimet dhe bujqësia vijojnë të mbajnë peshën kryesore të punësimit në vend. Rreth 80% e shqiptarëve punojnë në këto dy sektorë. 42,9 % në të parin dhe  37,4 % në të dytin, sipas Institutit të Statistikave që ka analizuar të dhënat e vitit të shkuar.

Ndërkohë që jo të gjithë ata që kanë një punë marrin dhe një pagë. 21.6% e të punësuarve janë punëtorë pa pagesë. Më shumë gra, gati 28.7% se burra 15.9% thotë Instituti i Statistikave që ndërkaq sqaron se punojnë në biznesin e familjes.

44,5 % e punonjësve paguhen për punën që bëjnë ndërsa  34 % janë të vetëpunësuar. Ndërkohë që po sipas INSTAT, burrat e kanë pasur më të lehtë se gratë të gjejnë një punë.

Hendeku gjinor në punësim për grupmoshën nga 15 deri në 64 vjeç ishte 14.3%. Vitin që lamë pas 52,4 % e grave dhe 66,7 % e burrave të kësaj moshe arritën të siguronin një punë./ABC News Albania 24/7

 

rama-8-1280x718.jpg
G. P.16:10 | 18/03/2019

Kryeministri Edi Rama ka inspektuar një nga pikat e mbështetjes së fermerëve dhe një fidanishte që ka përfituar nga Fondi i Programit për Bujqësinë dhe Zhvillimin Rural. Në të dy takimet, Rama nënvizoi se fermerët duhet të orientohen sipas kërkesave të tregut, pasi paratë për t’i ndihmuar nga buxheti i shtetit dhe nga Bashkimi Evropian nuk mungojnë.

Dritare e dedikuar për fermerët është agropika më e re që u çel në Tiranë, njëra prej 20 pikave të tillave, të hapura në disa qytete të vendit. Këtu marrin informacion të gjithë ata që duan të investojnë në bujqësi dhe zhvillimin rural apo të informohen për zhvillimet më të reja në sektorin e bujqësisë.

“Bëhet fjalë për 36 mijë familje bujqësore të cilat mund të vijnë dhe të marrin shërbimin në këtë pikë. Jemi në hapësirën e infoaplikimit. Pra, këtu vijë dhe përballen me zonjën, e cila i dëgjon dhe i kupton nevojat e tyre dhe i drejton në zyrat e tjera në qoftë se ka nevojë të marrin informacion për skemën mbështetëse që ofrohet apo për programin e IPARD apo për programin  e donatorëve të ndryshëm që ne ofrojmë si AZHBR”.

Në këtë agropikë bëhet aplikimi online me zero dokumente,mjafton një kartë identiteti dhe një numër NIPT-i. Në kuadër të Paktit për Universitetin, Agjencia për Zhvillim Bujqësor dhe Rural ka punësuar pranë kësaj pike 4 studentë të ekselencës.

 “Dola është studente ekselente. Është në ditën e saj të parë të punës pranë AZHBR-së. Është specialiste në departamentin tonë juridik”.

“Jam rekrutuar nga portali “Punë të mbarë”, ku jam përzgjedhur si një nga studentët e ekselencës, të cilëve ju dha një mundësi për të bërë një eksperiencë të tyre në administratën shtetërore”.

Kryeministri Edi Rama ka parë nga afër edhe frytet e punës 10-vjeçare të dy fermerëve në biznesin e tregtimit luleve. Në përgjigje të kërkesës së vazhdueshme nga fermerët e vegjël të zonës së Bërxullës, ata vendosën të investojnë në sera për mbjelljen e fidanëve. Ata kanë aplikuar dhe janë përfitues të skemës së investimeve, nga Fondi i Programit për Bujqësisë dhe Zhvillimin Rural, i vitit 2018 për “Ndërtimin e serës diellore” në shumën 10 milionë lekë.

“Ajo që mund të thuhet me gjithë gojën është që me fondet që kemi në dispozicion dhe me fondet që kemi marrë nga BE, kushdo që do realisht të punojë dhe investojë në bujqësi dhe i ve mendjen projektit dhe mëson si të aplikojë, merr para”, tha Kryeministri.

Kjo është një rrugë e shkelur nga vendet e bashkimit evropian u tha kryeministri Edi Rama i cili i këshilloi që të vazhdojnë të besojnë se bashkimi bën fuqinë.

“Aq më tepër që me fondet e Komisionit Europian nuk të jep asnjëri një kokërr leku nëse nuk je regjistruar nëse s’ke NIPT-in , nëse s’ke më shumë se 5 dynym, nëse nuk ke një biznes plan. Kjo është rruga, ne nuk mund të shpikim një rrugë tjetër që të mbajmë me lëmoshë situata që nuk kanë asnjë shans të ndryshojnë”, tha ai./abcnews.al

PELESHI-NE-PERMET_ABC-M2-T1.mpg_snapshot_00.47-1280x720.jpg
G. P.15:51 | 21/11/2018

Hapet në Përmet inkubatori i parë i produkteve tipike shqiptare, një hapësirë e përbashkët që do t’u shërbejë të gjithë fermerëve të zonës të cilët prodhojnë produktet tipike duke i garantuar aksesin në treg edhe fermerëve të vegjël. Sipas ministrit të Bujqësisë, Niko Peleshi së shpejti këto inkubatorë do shtrihen edhe në zona të tjera të Shqipërisë.

Fermerët e zonës së Përmetit tashmë me hapjen e inkubatorit të pare të produkteve tipike shqiptare do të kenë një hapësirë të përbashkët për të prodhuar produktet me metoda tradicionale, të certifikuara dhe mbi të gjitha garanci për aksesin në treg. Ky inkubator me dy linja prodhimi është një investim i mbështetur në 70% të vlerës nga skemat kombëtare të mbështetjes në bujqësi për vitin 2018, ndërsa pjesa tjetër nga Agjencia Italiane e Bashkëpunimit për Zhvillim. I pranishëm në hapjen e inkubatorit në Përmet ministri Niko Peleshi tha se ky investim do t’i shërbejë më tej njohjes së produkteve karakteristike të zonës duke ofruar cilësi dhe garanci për konsumatorin.

Niko Peleshi, ministër i Bujqësisë: “Kthimi i të ardhurave për banorët e zonave rurale, për fermerët tanë, për amvisat në zonat e mrekullueshme të Shqipërisë, është e vetmja mënyrë për të ruajtur këto hapësira natyrore. Për ti ruajtur dhe shfrytëzuar si potenciale ë jashtëzakonshme edhe ekonomike jo vetëm natyrore. Ky inkubator i jep mundësinë jo vetëm prodhuesve të konsoliduar, që sot kanë një etiketë, janë të regjistruar, por edhe atyre artizanalë.”

Ministri Niko Peleshi u shpreh se ky model investimi do të përhapet në të gjithë Shqipërinë në mënyrë që prodhimet tipike shqiptare të kenë cilësi dhe treg të sigurtë./abcnews.al

edi-raamw.jpg
G. P.18:24 | 13/11/2018

Sektori i bujqësisë do të marrë gjatë vitit 2019, mbështetjen financiare më të madhe në historinë e 8 qeverive të fundit. Kështu u shpreh kryeministri Edi Rama gjatë një takimi me fermerë dhe përfaqësues të këtij sektori në Ibë të Tiranës, ku u prezantua buxheti i vitit 2019.

Në Buxhetin për Bujqësinë u fol për shumë herë të para.

“Vitin që vjen ne do të kemi një buxhet në mbështetje të bujqësisë, që është më shumë sesa të gjitha vitet e qeverisë së mëparshme të marra së bashku, të teta dhe çelim një program të ri mbështetje financiare të BE për fshatin, që i bashkohet programit të mbështetjes së qeverisë shqiptare, që në vetvete është për të dytin vit radhazi, një program që i kalon 20 milionë euro, diçka që as mund të mendohej dot më parë”.

Me krenari tregon kryeministri se eksportet i kanë dyfishuar që nga dita që janë ulur në karriget e qeverisë.

Kur ne e filluam punën, pasi morëm detyrën për të qeverisur Shqipërinë, kjo shifër ishte 150 milionë dollarë.

Burokracitë janë zeruar, e po zero dokumenta kërkohen për të aplikuar në skemat  mbështetëse te bujqësisë. Ky sektor ka marrë të gjithë vëmendjen e qeverisë në të gjitha drejtimet tha kryeministri Edi Rama duke i kujtuar se nuk e ka harruar premtimin për zerimin e TVSH-së mbi imputet bujqësore.

“Për momentin jemi në pikën, ku kemi një nivel të arsyeshëm dakordësie për të shkuar në 6 me 6. Pra, për ta ulur nga 20% në 6% TVSH-në e imputeve bujqësore dhe për të ulur po ashtu rimbursimin për grumbulluesit, pasi kanë demonstruar një shkallë jo të vogël mungese, si të thuash, respekti për skemën, duke mos e ndarë suksesin e skemës me fermerët”.

E sa për sigurinë ushqimore kryeministri shprehet mëse i bindur se konsumojmë e tregëtojmë ushqime shumë më të garantuara se para kohës që qeverisnin Shqipërinë./abcnews.al

PELESHI-PER-BUJQESINE-DHE-ARSIMIT.mpg_snapshot_00.15-1280x720.jpg
G. P.13:16 | 24/09/2018

Për të rinjtë më e rëndësishme është një teserë partie se të përzgjedhin një degë bujqësore në arsimin profesional. Është ky shqetësimi i Ministrit të Bujqësisë Niko Peleshi që ngriti në seancën plenare të së enjtes.

Bujqësia është në rrezik nga indiferenca e të rinjve. Alarmin e ka dhënë vetë ministri i Bujqësisë dhe zhvillimit rural Niko Peleshi.

Niko Peleshi, ministër i Bujqësisë dhe Zhvillimit Rural: “Ngre alarmin që të rinjtë nuk shkojnë këto degët bujqsore. Edhe nëse shkojnë marrin thjeshtë një diplomë fiktive. Të rinjtë kanë idenë që rëndësi ka që të keshë një teserë partie”.

Ministri Peleshi kërkon ndihmën e deputetëve për të shtuar në fshat të ardhurat për agroturizmin.

“T’i japim mundësi fermerëvë që të shesin produktet e tyre me çmime më të mira. Kërkoj mbështetjen e këtij ligji. Kërkoj aleatë dhe ambasadorë për të shtuar të ardhurat në fshat me anë të agroturizimit. Drejtoritë e Bujqësisë janë duke u shpërbërë. Po krijojmë agjensitë veterinare dhe ato acesionit të fermerëve. Kjo sepse këto institucione i kemi futur në një çorodi insitucionale. Kemi nevojë për kapacitete”.

Nga foltorja e parlamentit Ministri i Bujqësisë dhe Zhvillimit Rural, Niko Peleshi, tha se për t’i dhënë këshillimin e nevojshëm fermerevë, TVSH do të ketë një kanal të posatshëm për fermerët./abcnews.al

prodhimeee.jpg
G. P.17:02 | 24/07/2018

Një ditë pas stuhisë që përfshiu të gjithë vendin, fermerët në Elbasan dhe Korçë janë ndër më të dëmtuarit. Ata thonë se kanë humbur të gjithë kulturat bujqësore me të cilat sigurojnë mbijetesën.

Prodhimet ishin në kohën e tyre më të mirë. Por breshëri i pazakontë i së hënës u dëmtoi të mbjellat fermerëve në fshatin Gur i Zi dhe Labinot Mal të Elbasanit. Më të prekurat janë perimet, mollët dhe rrushi.

“Siç e shihni dhe vetë ju, këto janë dëmtuar komplet”.

Ndërsa kreu i njësisë administrative Labinot Mal, Ruzhdi Pisha, tha se pushteti lokal do të ndjekë të gjithë procedurat që të dëmshpërblehen fermerët.

Një zonë tjetër e dëmtuar nga reshjet intensive të shiut dhe breshërit që ra këto ditë është dhe Korça përkatësisht fshatrat Porodinë dhe Goskovë. Kulturat bujqësore si domatja patatja, qepa dhe misri i humbën.

“Na janë përmbytur të gjithë tokat bujqësore”.

Fermerët ja hedhin fajin kanaleve të papastruara prej vitesh.

“Ajo bëhet sebep që bllokohet lumi dhe fryhet tërë kanali dhe del uji gjithandej”.

Në Goskovë, aty ku përroi i fshatit doli nga shtrati duke marrë përpara makina  e bizneseve, banorët po nxjerrin jashtë baltën.

Për pastrimin e rrugëve janë venë në dispozicion edhe disa mjete. Sipas përfaqësuesve të drejtorisë së Bujqësisë Korçë zgjidhje për situatën e krijuar është sigurimi i të mbjellave pasi nuk ka mekanizma të tjerë për t’u ardhur në ndihmë fermerëve./abcnews.al

AHMETAJ-NE-DIVJAKE-1280x720.jpg
ent ela16:37 | 20/05/2018

Ministri i Financave dhe Ekonomisë Arben Ahmetaj në vijim të turit të llogaridhënies publike u ndal në Grabian dhe Gradishtë të Bashkisë Divjakë. Ahmetaj veçoi fondin prej 93 milionë eurosh në mbështetje të bujqësisë, e cila, sipas tij, është më e larta në 27 vite.

Politikat në mbështetje të fermerëve dhe qasja që ka qeveria “Rama” për sektorin bujqësor ishin çështjet që trajtoi Ministri i Financave dhe Ekonomisë Arben Ahmetaj gjatë takimeve në kuadër të Turit të llogaridhënies publike në njësitë Grabian dhe Gradishtë të Bashkisë Divjakë.

Në mënyrë të veçantë Ahmetaj u ndal tek mbështetja për bujqësinë, sektori kryesor për zhvillimin e kësaj zone.

“Mbani mënd kur Sali Berisha ju thoshte “Kemi TVSH 6% dhe do t’ju rimbursohet vetëm 6%?”

Por cila ishte e vërteta? E vërteta ishte që ju nuk morët asnjë lek. Zero. Jo një lek, apo dy lekë, zero! Ka qënë iniciativa e Kryeministrit për ta bërë TVSH 20%. Është e vështirë për buxhetin e shtetit, por është shumë e rëndësishme për ju. Sepse ju sot si fermerë, kur keni NIPT-in, keni mundësinë që të rimbursoheni me 20%; 20% të të gjithë autofaturës që bëhët nëpërmjet grumbulluesve. E dini se sa kemi rimbursuar vitin e kaluar? 22 milionë dollarë. Janë 22 milionë dollarë që nuk i kishin dikur fermerët por sot i kanë, për shkak të politikës së qeverisë”.

Një tjetër moment i bisedës së Ahmetaj ishte dhe mbështetja për bujqësinë, që sipas tij, për vitin  2018 është realisht më e larta në 27 vite.

“Janë 26 milionë dollarë, pra afërsisht 22 milionë euro vetëm nga buxheti i shtetit për mbështetjen tuaj. Ndërkohë, fillon shumë shpejt projekti i Komisionit Europian IPARD dhe kjo është zona që është më shumë e prirur për të përfituar, qoftë si fermerë por qoftë dhe si bashkime bujqësore. E gjithë shuma, së bashku me kontributin e buxhetit të shtetit, shkon në 93 milionë euro”.

Në takim morën pjesë edhe deputeti i zonës, Erjon Brace, i cili adresoi disa shqetësime të komunitetit që lidhen me rritjen e eficencës së skemës së rimbursimit në favor të fermerëve, ndarjen e zyrës së Hipotekës për bashkinë Divjakë nga ajo e Bashkisë Lushnje, apo edhe për pronësinë e tokave bujqësore. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono