bujar osmani

bujar-osmanii.jpg
G. P.16:12 | 01/09/2019

Zv/kryeministri i Maqedonisë së Veriut, Bujar Osmani ka deklaruar se nga menaxhimi i çështjes “Zhvatja” do të varet përgjigja e BE-së për hapjen e negociatave të anëtarësimit. Osmani ka bërë thirrje për konsensus politik për çështjet që kanë të bëjnë me të ardhmen e vendit.

Numri dy në qeverinë e Maqedonisë së Veriut, Bujar Osmani, ka pranuar se afera “Zhvatja” në të cilën rezulton të jetë e implikuar edhe Katica Janeva, ish-prokurorja speciale e zgjedhur për luftimin e korrupsionit dhe krimit të organizuar ka për të dëshmuar pjekurinë e institucioneve të sistemit për t’ju shkuar deri në fund reformave të filluara.

“Qëndrimi im është se këtë gjendje krize mund ta shndërrojmë në mundësi  në qoftë se institucionet përgjigjen me seriozitet dhe në mënyrë efikase, transparente dhe të paanshme e zbardhin këtë rast deri në fund, pavarësisht implikacioneve që mund të ketë. Kriminelë dhe krime ka gjithandej. Dallimi mes shteteve është nëse keni institucione të cilat ia dalin të ballafaqohen me problemin pa subjektivizëm”, tha zëvendëskryeministri për Çështje Evropiane duke pranuar se nga mënyra se si do të trajtohet rasti “Zhvatja” do të varet edhe reagimi i Bashkimit Evropian për marrjen apo jo të datës për fillimin e negociatave.

Në këtë rrafsh, Osmani ka shprehur shpresën se kanë për t’u tejkaluar dallimet mes mazhorancës dhe opozitës lidhur me propozim-ligjin për Prokurorinë Publike, me të cilin mëtohet edhe zgjidhja e statusit të Prokurorisë Speciale Publike që aktualisht është vënë në qendër të vëmendjes së publikut.

“Nevojitet vetëm vullnet serioz politik dhe ulje pranë tavolinës, me qëllim të tejkalimit të tyre. Gjithçka që është brenda vijave të kuqe të vendosura nga Bashkimi Evropian, por edhe ne si QEVERI, për shkak se duhet të ketë institucion që përballet me kriminalitetin në nivel të lartë dhe të gjitha rastet qofshin nga përgjimet, qofshin jashtë përgjimeve, për të cilat ka indikacione, duhet të zbardhen me një procedurë gjyqësore. Brenda këtyre kornizave, kujtoj se ka hapësirë për kompromis dhe unë jam optimist se do të arrihet kompromis për Ligjin për Prokurorinë Publike”, tha Osmani në një intervistë të gjatë për seksionin maqedonas të radios Evropa e Lirë.

Në të ai ka folur edhe për marrëdhëniet mes Bashkimit Demokratik për Integrim dhe partive maqedonase, në pushtet dhe opozitë, duke nënvizuar se qëllimi i integristëve është që të krijohet sa më shumë hapësirë për konsensus lidhur me çështje kryesore politike me të cilat po ballafaqohet Maqedonia e Veriut./ABC News Albania 24/7

bujar-osmani.jpg
G. P.16:43 | 22/08/2019

Zv/kryeministri i Maqedonisë së Veriut Bujar Osmani kërkoi hetim të shpejtë dhe efikas për rastin “Zhvatja”, por dhe që ky rast të mos keqpërdoret për qëllime ditore të politikës, pasi kjo mund të cënojë figurën e  vendit tek partnerët ndërkombëtarë. Ai u ka bërë apel partive politike në vend që të ulen në bisedime për të arritur një marrëveshje rreth zëvendësuesit të prokurores speciale Janeva, e cila aktualisht ndodhet në paraburgim.

Zëvendëskryeministri Bujar Osmani, u bëri thirrje të gjitha kampeve politike që të përpiqen të gjejnë kompromis rreth ligjit për Prokurorinë Publike, sepse sipas tij, në kushte krize vetëm kompromisi është terapia e duhur.

Ai nuk u përgjigj konkretisht se a do të përkrahte BDI-në ndonjë emër nga prokurorët aktual që janë në Speciale për ta zëvendësuar Janevën, por rikujtoi institucionet se reagimi ndaj situatës së krijuar do të jetë shumë i rëndësishëm për Bashkimin Evropian dhe do ta përcaktojë kahjen e mëtutjeshme të vendit.

Këshilli i Prokurorëve dhe Parlamenti, duhet të gjejnë mundësi për të gjetur një zgjidhje edhe për të mbushur zbrazëtirën institucionale që është krijuar me rastin e fundin, por ajo çka është edhe më e rëndësishme, për të miratuar ligjin për prokurori, i cili në një mënyrë të përhershme dhe të qëndrueshme do të zgjidh çështjen e Prokurorisë Publike, por edhe atë të Prokurorisë Speciale.

Edhe nga VMRO-DPMNE thonë që nuk është koha që të flitet për zëvendësen e Janevës. Ata duan të presin epilogun nga grupet e punës për Ligjin për Prokurori Publike, por nga përgjigja e Arsovskit, nënkuptohet se VMRO DPMNE nuk do të pranonte që specialen të vazhdojë ta udhëheqë ndonjëri nga Prokurorët aktual.

Të hetohet në mënyrë të saktë se kush ka qenë në skemën e zhvatjes. Kjo është prioriteti, që të hetohet përzierja e prokurorëve të speciales dhe të politikanëve, menjëherë pasi të përfundon hetimi mund të flasim për pasardhës. Por ligji është i qartë se kush mund të jetë pasardhës. Nuk duhet të harrohet se ekziston grup i punës ku diskutohet për ligj të ri për Prokurori Publike.

Sipas informatave të fundit nga burimet partiake, pas një pauze disa javore, grupet e punës sërish do të takohen nesër. Disa ditë më parë, Aleanca për Shqiptarët propozoi që prokurori që do ta udhëheq sektorin e ri për ndjekje të Korrupsionit të lartë dhe krimit të organizuar të jetë i huaj, e alternative e propozoi Fatime Fetain./ABC News Albania 24/7

bujar-osmani.jpg
G. P.16:40 | 30/07/2019

Autoritetet serbe kanë dërguar kërkesë në Ministrinë e Drejtësisë në Shkup, për ekstradimin e ish-pjesëtarit të UÇK-së Tomor Morinës, të arrestuar në Maqedoninë e Veriut sipas një urdhri të Interpolit. Ndërkohë ne vend vijojnë debatet për arrestimin e tij.

Ministria serbe e Drejtësisë i ka dorëzuar kërkesë Maqedonisë së Veriut për ekstradimin e ish-pjesëtarit të UÇK-së Tomor Morinës-kanë njoftuar mediat serbe. Morina ishte arrestuar javën e kaluar në një vendkalim kufitar të Maqedonisë, sipas një urdhri të Interpolit.

Ai nga Serbia kërkohet nën dyshimin  se ka kryer krime lufte kundër civilëve serbë. Kryeministri Zaev duke komentuar këtë rast ka lënë të kuptohet se duhet të respektohet e drejta ndërkombëtare dhe vendore dhe se Morina i ka të gjitha të drejtat.

Por, nga ana tjetër Zv/Kryeministri Bujar Osmani ka theksuar se personalisht është i angazhuar për lirimin e Morinës dhe se në cilësinë e mikut të Kosovës do ta vizitojë ish-ushtarin e UÇK-së që gjendet në arrest në Shkup.

Bujar Osmani: Për momentin unë pres një përgjigje, kam një kërkesë zyrtare deri tek gjykatësja që ka lëndën që më lejon të vizitoj zotin Morina dhe unë besoj se gjatë ditës do të shkoj deri te institucioni për të vizituar atë për shkak se kemi një mos koordinim të avokatit të tij, kërkesës për ekstradim e kështu me radhë.

Vendimin përfundimtar sipas kërkesës së Serbisë duhet ta merr Ministria e Drejtësisë. Ndryshe, arrestimi i Morinës ishte diskutuar edhe në Kuvendin e Maqedonisë së Veriut, ku koordinatori i grupit parlamentar të BDI-së Ejup Alimi e krahasoi Kryeministrin Zaev me Milosheviçin./ABC News Albania 24/7

MAQEDONI-PAJTIMI.mpg_snapshot_00.33-1280x720.jpg
G. P.22:00 | 24/10/2018

Në parlamentin e Maqedonisë vijojnë debatet për pajtim në lidhje me ngjarjet e 27 prillit. Ndërsa partia opozitare VMRO-DPMNE ka kërkuar një amnisti gjithëpërfshirëse, kryeministri Zaev ka deklaruar se marrëveshja nuk duhet të kalojë caqet politike dhe të ndërhyjë në punët e gjyqësorit. Për BDI, falja është e papranueshme.

Partia opozitare VMRO-DPMNE-ja ka riafirmuar kërkesën për amnisti të plotë për ngjarjet e dhunshme në Kuvend më 27 Prill të vitit të kaluar.

Hristjan Mickovski, kreu i VMRO-DPMNE: “Miratoni ligjin për amnisti që e propozojmë për të gjithë pjesëmarrësit e 27 prillit, që të ketë drejtësi joselektive dhe liri për të gjithë, e jo drejtësi selektive vetëm për ata që janë në shërbimin tuaj”.

Kryeministri Zaev, i cili i pari hodhi idenë e pajtimit ka theksuar se kjo nuk do të thotë ndërhyrje në punën e gjyqësorit.

Zoran Zaev, kryeministër i Maqedonisë: “Disa herë e kam përmendur kur kam bërë thirrje për pajtim dhe unitet politik në Kuvend, se nuk kemi për qëllim të përzihemi në organet e drejtësisë”.

Pajtim dhe falje për ngjarjet e 27 Prillit nuk pranon as kreu i ASH-së, Ziadin Sela. Sipas tij, pajtimi kombëtar është i pranueshëm nëse bëhet fjalë për një marrëveshje të re mes maqedonasve dhe shqiptarëve.

Ziadin Sela: “Një falje e tillë dhe një konsensus nacional në prag të anëtarësimit në NATO dhe BE ka kuptim vetëm në një formë, nëse hapet tema për një marrëveshje mes dy komuniteteve më të mëdha të Maqedonisë”.

Për BDI-në falje për të involvuarit e drejtpëdrejtë në dhunën e 27 Prillit nuk do të ketë.

Bujar Osmani: “Për ata që kanë dhunuar deputetët, që kanë qenë ideatorë dhe organizatorë të një dhune të tillë, nuk mendoj se BDI do të jetë për çfarëdolloj kompromisi”.

Kryetari i Kuvendit të Maqedonisë, Talat Xhaferi do të udhëheqë iniciativën për pajtim dhe unitet kombëtar në Parlament. Ende nuk janë saktësuar forma dhe detajet e këtij trupi kuvendor, por bazë do të jenë kërkesat e tetë deputetëve të opozitës që votuan pro ndryshimeve kushtetuese.

bujar-osmanii.png
G. P.18:57 | 23/10/2018

Zëvendës kryeministri, Bujar Osmani, ka deklaruar se votimi i ndryshimeve kushtetuese nuk ishte vetëm një çështje e brendshme e Maqedonisë, por një proces me rëndësi gjeopolitike ndërkombëtare. Në një intervistë për “Klan Maqedonia”, Osmani ka theksuar se shumica e formuar me 8 votat plus duhet të vijojë me votimin e reformave.

Fillimi i procedurës për ndryshimet kushtetuese në Kuvendin e Maqedonisë nuk ishte një moment vendor apo rajonal, por ka një peshë të gjerë gjeopolitike, thotë zv/kryeministri Bujar Osmani në një intervistë për Klan Maqedoni.

Bujar Osmani: “E premtja e përcaktoi kufijtë e NATO-s, kufijtë e familjes perëndimore euro-atlantike dhe dimensionet e së premtes ne nuk mund t’i vlerësojmë tani, se është shumë herët. Do t’i vlerësojmë pas 10 vjetësh, kur të jetë garantuar siguria dhe zhvillimi ekonomik i rajonit dhe Maqedonisë”.

Zv/kryeministri Osmani ka hedhur poshtë të gjitha zërat se deputetët e opozitës të cilët votuan pro ndryshimeve kushtetuese kanë qenë të shantazhuar e të kërcënuar. Ai thotë se ata kanë qenë viktimë e një politike të gabuar partiake.

Bujar Osmani: “Fakti që ata u bënë viktimë e një politike të gabuar të 27 prillit i ka bërë të mendojnë nëse duhet të jenë ende pjesë e viktimizimit për një kauzë të gabuar”.

Nuk është koha për zgjedhje, thotë Zv/Kryeministri Osmani duke theksuar se shumica e krijuar prej dy të tretave duhet të shfrytëzohet edhe për zbatimin e reformave mjaft të rëndësishme për vendin.

Bujar Osmani: “Kjo shumicë prej 80 deputetësh na hap dyert për dicka tjetër, për të kaluar reformat që kërkojnë dy të tretat në gjyqësor, shërbimet e inteligjencës dhe administratën publike. Nëse e shfrytëzojmë këtë shumicë besoj se kemi bërë punën më të mirë për këtë shtet dhe qytetarët e saj. Pasi të fillojnë bisedimet dhe të hyjmë në NATO do të shohim interesat partiake dhe kush duhet të udhëheqë vendin”.

Zv/Kryeministri Osmani në cilësinë e shefit të delegacionit qeveritar për bisedime me BE-në shprehet në fund se tani është koha të mbahet përgjegjësia dhe të mbyllen çështjet që do të garantojnë të ardhmen e brezave që vijnë./abcnews.al

bujar-osmani.png
G. P.18:40 | 21/10/2018

Në Shkup është zhvilluar Kongresi i Lidhjes Shqiptare në botë ku morën pjesë 300 përfaqësues nga gjithë hapësirat shqiptare. Zëvendëskryeministri i Maqedonisë, Bujar Osmani, tha se do të ndërtohet një memorial në përkujtim të holokaustit shqiptar në Stenkovec, ku më 1999 u gjetën dhjetëra mijëra shqiptarë të Kosovës si rezultat i dëbimit me force nga forcat ushtarako policore serbe.

Bujar Osmani, zëvendëskryeministër i Maqedonisë: “Shumë shpejt në mënyrë institucionale, në fushën e Stenkovecit do ndërtojmë qendrën më të madhe të Holokaustit shqiptar në përkujtim të gjithë atyre të dëbuarve në Luftën e Kosovës, të cilët u pritën në Maqedoni. Për të kujtuar të kaluarën, por edhe për të ndërtuar një platformë e cila do të jetë e mjaftueshme për pajtimin e popujve, e cila është garancë e vetme për një rajon stabël, të otrientuar drejt BE-së dhe NATO-s”.

/abcnews.al

OSMANI-HETIMI-MAQEDONI.mpg_snapshot_00.07-1280x652.jpg
G. P.21:16 | 13/10/2018

Zëvendës kryeministri i Maqedonisë, Bujar Osmani ka bërë me dije se ka dorëzuar në prokurori një sërë dokumentash, që sipas tij hedhin dritë mbi të vërtetën faktike të rastit “Pacienti”. Çështja në fjalë është hapur nga prokuroria speciale, që e akuzon Osmanin për abuzim me detyrën.

Zv/Kryeministri në Qeverinë e Maqedonisë Bujar Osmani ka njoftuar se ka dorëzuar të gjitha dokumentet e nevojshme lidhur me hetimin “Pacienti” që PSP-ja ka ngritur dhe ku ai paraqitet si i dyshuar.

Bujar Osmani: “Në ditët e fundit kam mbledhur dokumentacionet përmes të cilave vlerësoj se sqarohet situata faktike. Dokumentacion që tregon se nuk ka asnjë shenjë të punës së paligjshme dhe që tregojnë qartë se kam punuar sipas ligjit”.

Osmani ka theksuar se roli i PSP-së është i një rëndësie të madhe dhe se mbetet në parimin për përkrahje të këtij institucioni duke besuar në neutralitet.

“Nga prokuroria mora siguri se materialet e dorëzuara përbëjnë një kthesë në hetim dhe kontribut të rëndësishëm. Jam i bindur se në një afat të shkurtër kohor hetimi do të rrumbullakoset, pasi nuk ka asnjë punë të paligjshme”.

PSP-ja përmes një komunikate, duke prezantuar gjashtë hetimet e reja, dyshon ish-Ministrin e Shëndetësisë Bujar Osmani se së bashku me 18 persona tjerë kanë nënshkruar në mënyrë të jashtëligjshme furnizime për ndërtime në objekte shëndetësore./abcnews.al

MAQEDONI-VOTAT.mpg_snapshot_00.00-1280x720.jpg
G. P.20:10 | 13/10/2018

Koalicioni qeverisës në Maqedoni është në kërkim të votave për të siguruar kuorumin e duhur për miratimin e ndryshimeve kushtetuese. Në prag të votimit të së hënës, opozita ka deklaruar sërish se nuk ndryshon qëndrim sa i përket marrëveshjes së Prespës, duke bërë që vendi t’i afrohet opsionit të zgjedhjeve të parakohshme. Por për BDI, situata nuk është e pashpresë.

VMRO-DPMNE-ja vazhdon të mbetet kundër Marrëveshjes së Prespës – ka deklaruar përmes një video mesazhi lideri i opozitës Hristijan Mickovski, prej se dje kjo parti vendosi që të mos i votojë amendamentet kushtetuese dhe të shkojë drejt zgjedhjeve të parakohshme parlamentare. Burimi i krizës – siç thonë nga opozita-është tek qeveria dhe kryeministri Zaev.

Hristijan Mickovski – Kryetar i VMRO-DPMNE: “Edhe njëherë rikujtojmë se Qeveria, Kuvendi dhe deputetët kanë përgjegjësinë të punojnë e të veprojnë konform vullnetit të popullit. Dhe vullneti i popullit është shprehur qartë në referendum. VMRO-DPMNE-ja është kundër kësaj marrëveshjeje dhe kështu do të mbetet. Burimi i krizës që po ndodh tani nuk është marrëveshja që u hodh poshtë, as referendumi i dështuar, por vetë pushteti dhe Zaev që duhet të largohen në mënyrë që Maqedonia të fitojë”.

Nga LSDM-ja edhe njëherë kanë bërë thirrje që VMRO-ja ti përkrahin ndryshimet kushtetuese, duke theksuar deputetët kanë obligim të sigurojnë ardhmëri në BE dhe NATO.

Pavle Bogoevski – Deputet i LSDM-së: “U bëjmë thirrje të gjithë deputetëve, në veçanti atyre të VMRO-DPMNE-së që ti përkrahin këto amendamente, të cilat do të sigurojnë të ardhmen euro-atlantike të vendit. Ne në të kaluarën kemi pasur mendime dhe polemika nga më të ndryshmet, por gjithmonë kemi pasur qëndrim të përbashkët për këtë çështje të rëndësishme dhe historike. Tani është momenti që këtë ta dëshmojmë në vepër dhe të sigurojmë bashkë rrugën drejt BE-së dhe NATO-s”.

Derisa nga opozita duket se janë të prerë në qëndrimet e tyre për të mos i përkrahur ndryshimet në kushtetutë, nga BDI-ja besojnë se ende nuk janë shterrur të gjitha mundësitë për të gjetur shumicën e nevojshme në parlament.

Bujar Osmani – BDI: “Ne mendojmë se ende nuk janë shterrur të gjitha përpjekjet dhe opsionet për të gjetur dy të tretat. Kemi hapësirë të hënën t’u japim deputetëve idenë e rëndësisë së momentit dhe të pranojnë hapjen e kushtetutës në mënyrë që të rrumbullakosim këtë ndryshim. Plani B i zgjedhjeve të parakohshme do të jetë vetëm nëse do të konsiderojmë bashkarisht se janë shterrur të gjitha burimet në Parlament”.

Për miratimin e ndryshimeve kushtetuese nevojitet shumica prej dy të tretave në Parlament. Nëse ndryshimet nuk kalojnë të hënën, respektivisht nuk arrihet shumica e nevojshme, gjasat janë të mëdha që vendi do të shkojë drejt zgjedhjeve të shpejta të parakohshme parlamentare. Ndërkaq, një burim i besueshëm i afërt me Qeverinë ka theksuar se edhe gjatë fundjavës do të vazhdojnë negociatat mes shumicës dhe opozitës parlamentare me qëllim të arritjes së një kompromisi që nënkupton edhe ndonjë lëshim ndaj kërkesave të njohura të VMRO-DPMNE-së./abcnews.al

OSMANI-MBULIM.mpg_snapshot_00.00-1280x717.jpg
G. P.22:37 | 11/10/2018

Zëvendës kryeministri shqiptar i Maqedonisë, Bujar Osmani ka mohuar zërat për abuzim me detyrën, të ngritura në kuadër të hetimit të Prokurorisë Speciale, të koduar “Pacienti”. Në reagimin e tij, Osmani ka deklaruar se gjatë kohës që ka mbajtur postin e ministrit të Shëndetësisë ka punuar gjithmonë në përputhje me ligjin dhe me interesat e qytetarëve. Ai është shprehur se shpreson që dyshimet e ngritura ndaj tij të sqarohen sa më shpejt të jetë e mundur.

“Prej vitesh ka patur spekulime për abuzime në Ministrinë e Shëndetësisë gjatë kohës që unë isha ministër dhe kam qenë unë një nga ata që kanë këmbëngulur për nisjen e një hetimi”, ka thënë Osmani. Ai ka shtuar se, pret që prokurori të verifikojë sa më parë faktet. Ndërkohë, kryeministri Zoran Zaev ka deklaruar se askush nuk mund të shpallet fajtor pa u provuar dyshimet. Ai ka thënë se do ta ndjekë procesin hetimor me vëmendje dhe do të veprojë në kohën e duhur nëse do të verifikohet diçka që ka të bëjë me dinjitetin e qeverisë./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono