Brukseli

tereza-mey.jpg
ent ela14:25 | 02/04/2019

Parlamenti Britanik ka refuzuar të gjitha alternativat ndaj marrëveshjes së arritur mes Kryeministres Mej dhe Brukselit për Brexit.  Tashmë mbeten vetëm dy mundësi: dalja pa marrëveshje nga Bashkimi Europian në 12 prill, ose një votim i katërt për marrëveshjen e arritur nga Mej.

Mbetet ende e bllokuar situata në Britaninë e Madhe për sa i përket Brexit. Parlamenti Britanik rrëzoi sërish katër opsionet e planit B, alternativë e marrëveshjes së divorcit të arritur nga kryeministrja Mej. Propozimet për të mbajtur lidhje ekonomike shumë më të ngushta pas Brexit, mbajtja e një referendum të dytë apo ndalimi i Brexit, për të shmangur një divorc nga Brukseli pa marrëveshje, nuk kanë arritur të marrin mazhorancën e votave në parlament.

Ministri Britanik për Brexit, Stefën Barklei, hodhi hipotezën e një votimi të katërt për marrëveshjen e Tereza Mej. Ai theksoi se në mungesë të një marrëveshjeje të miratuar nga parlamenti atëherë Britania e Madhe do të dalë nga Bashkimi Evropian pa një të tillë.

Barklei propozoi ndër të tjera, një votim të katërt të marrëveshjes së Mej në fundjavë. Lideri i laburistëve Xheremi Korbin, kritikoi përpjekjen e qeverisë për të ripropozuar marrëveshjen e Mej duke përmendur tre dështimet e mëparshme.

Ndërkohë ka reaguar dhe koordinatori i Parlamentit Europian Gaj Verhofstad. Në profilin e tij në Twitter ai shkruante se një Brexit i ashpër është pothuajse i paevitueshëm. Sipas tij e mërkura mbetet mundësia e fundit e Britanisë së madhe për të zhbllokuar situatën./abcnews.al

 

brukseli.jpg
G. P.22:28 | 19/03/2019

Një alarm për bombë ka tronditur të martën zonën e institucioneve europiane në Bruksel. Ka qenë një telefonatë anonime që ka sinjalizuar policinë për shpërthimin e një bombe në një pallat ku ndodhen zyrat e një kompanie konsulence për institucionet e BE-së.

Pas kontrolleve të kryera nga njësitë e specializuara të policisë ka rezultuar se alarmi ka qenë i rremë dhe për rrjedhojë perimetri i sigurisë është hequr. Megjithatë, policia belge ka deklaruar se do të kryejë një proces hetimor në përpjekje për të identifikuar autorin e telefonatës anonime./abcnews.al

europa.jpg
G. P.17:20 | 19/03/2019

Përfaqësues të Parlamentit Europian deklarojnë se midis BE dhe Ballkanit po rritet hendeku dhe se sidomos në Shqipëri, Kosovë dhe Serbi po bëhen hapa prapa.

Komisioni i punëve të jashtme të Parlamentit Europian dhe ai i lirive civile, drejtësisë dhe punëve të brendshme të Parlamentit Europian janë përshirë në një debat të detajuar mbi reformat e shtetit ligjor dhe të drejtave themelore në Ballkan. Drejtori për zgjerimin, Christian Danielsson, ka pranuar se ka hapa prapa në reformat e shtetit ligjor dhe të drejtave themelore në disa vende të Ballkanit.

Përfaqësuesit e botës akademike dhe shoqërisë civile kanë deklaruar, se liderët e Ballkanit kanë mësuar t’ia hedhin Bashkimit Europian me zbatimin e reformave në letër dhe mesazhet e mjegullta të Brukselit merren si inkurajim për mënyrën autokratike të qeverisjes në Ballkan.

Christian Danielsson, drejtor i përgjithshëm për zgjerimin, KE: “Ka një dëshirë nga qytetarët e Ballkanit, që duan të jetojnë në vende me prosperitet dhe me barazi, ku shteti ligjor është i fortë, ku korrupsioni të luftohet, ku sistemi i drejtësisë të jetë i pavarur dhe ku ndryshimi demokratik të vijë përmes zgjedhjeve të lira dhe të ndershme. Dhe le të jemi të ndershëm. Është arritur një progres domethënës në reforma, por dhe në kapërcimin e trashëgimisë shkatërruese të luftës dhe konflikteve në Ballkan. Por asnjë nga vendet e Ballkanit nuk përmbush kriteret e anëtarësimit dhe në disa vende ne kemi parë fatkeqësisht stanjacion, apo siç u artikulua hapa prapa”.

Marko Kmezi, Qendra për studimet mbi Europën Juglindore, Graz: “Për disa vende të Ballkanit Perëndimor, këto hapa prapa kanë filluar menjëherë pas hapjes së negociatave të anëtarësimit. Rekomandimet për të ndryshuar situatën  kanë të bëjnë së pari me monitorimin e plotësimit të kritereve dhe raportimin e tyre. Së dyti, përfshirjen të nxitjes dhe sanksioneve në kuadrin e financimit për vendet e Ballkanit kur bëhet fjalë për performancën lidhur me shtetin ligjor dhe së fundmi jo të kryhet një ushtrim teknokratik, por më shumë shoqëror të fokusuar në potencialin e vetë shoqërisë”.

Naim Rashiti, Qendra hulumtuese për politikat e Ballkanit: “Ka një rritje të hendekut midis Bashkimit Europian dhe vendeve të Ballkanit në kuptimin dhe pranimin e reformave të integrimit. Ky është një shqetësim serioz dhe kjo diferencë duket në Serbi, Kosovë dhe Shqipëri. Në disa raste, zbatimi i reformave në letër vetëm i përkeqëson gjërat. Liderët e Ballkanit Perëndimor kanë mësuar se si t’ia hedhin Bashkimit Europian dhe në disa raste zyrtarët e BE-së e dinë që ua hedhin dhe përballen me vështirësi të axhendave politike që ndryshojnë prioritetet kundër standardeve të shtetit ligjor”.

Marko Kmezi, Qëndra për studimet mbi Europën Juglindore Graz: “Problemi i monitorimit nuk trajton shkaqet e deficencave  të shtetit ligjor në Ballkan dhe mbi të gjitha mënyrën autokratike me të cilën qeverisen këto vende. “Burrat e fortë” të Ballkanit nuk kanë arsye pse të kryejnë reformat, por të ruajnë status-quo. Nga ana tjetër, mesazhet që vijnë nga Brukseli janë shpesh të mjegullta dhe mund të merren si inkurajim për “burrat e fortë ” të Ballkanit. Dhe në emër të stabilitetit, BE-ja po neglizhon devijimet në shtetin ligjor. Duhet merret si model raporti “Priebe” që u bë për problemet e shtetit ligjor në Maqedoni.

Christian Danielsson ka deklaruar, se mënyra e kryerjes së negociatave nuk mund të ndryshojnë çdo vit.  Ai pranuar së mund të bëhet më shumë nga Komisioni Europian lidhur me diplomacinë publike dhe të qenurit më aktivë në terren për rrjedhojat  e mosveprimit dhe të qënurit shumë të qartë kur ka devijim të shtetit ligjor./abcnews.al

be-1.jpg
G. P.21:47 | 18/03/2019

BE ka mbetur i zhgënjyer nga ecuria e reformës në drejtësi në vendet kandidate për anëtarësim. Në një sesion të mbajtur në Parlamentin Europian, pjesëmarrësit kanë shprehur shqetësimin për zvarritjen e këtij procesi nga ish-vendet komuniste, përfshirë Shqipërinë. Ndërkohë, presidenti i Komisionit të Venecias, Gianni Buquicchio ka deklaruar se mentaliteti i shumë liderëve ballkanas se kush fiton zgjedhjet i merr të gjitha, përbën rrezik për shtetin ligjor.

Demokracia, shteti ligjor dhe të drejtat themelore në vendet kandidate kanë qenë në qendër të një dëgjesë publike të organizuar nga Parlamenti Europian me përfaqësues të Bashkimit Europian, të Komisionit të Venecias, të OMN-së dhe shoqërisë civile nga Ballkani. Presidenti i Komisionit të Venecias, Gianni Buquicchio ka cilësuar si të rrezikshëm për shtetin ligjor mentalitetin e fituesve të proceseve zgjedhore në Europë që qeverisin pa asnjë kufizim dhe nuk respektojnë Gjykatat Kushtetuese. Ai ka shprehur zhgënjim për reformën e drejtësisë në vendet kandidate 30 vjet pas komunizmit.

Gianni Buquicchio, Komisioni i Venecias: “Në Europë po përballemi gjithnjë e më shumë me një tendencë populiste, sipas të cilës ai që fiton zgjedhjet i jep të drejtën shumicës që të qeverisë pa asnjë kufizim. Ky mentalitet, sipas të cilit fituesi merr gjithçka, është i rrezikshëm për shtetin ligjor. Në disa vende kandidate, pavarësisht reformave, rezultatet për reformimin e drejtësisë janë zhgënjyese. Si mund të shpjegojmë që pas 30 vjetësh në vende post-komuniste, gjyqësori le shumë për të dëshiruar? Në disa raste është e nevojshme që të pranohen përjashtime, siç ishte rasti në Shqipëri, ku korrupsioni i shtrirë gjerësisht në vend e bëri të nevojshëm Vettingun e gjyqtarëve dhe prokurorëve. Komisioni i Venecias e pranoi këtë nevojë me kusht dhënien e garancive të duhura. Pa vlerësimin tonë pozitiv, gjykatat shqiptare, sipas gjasave, do ta kishin vrarë këtë proces”.

Përfaqësuesi i operacionit të monitorimit ndërkombëtar, OMN, Theo Jacobs ka shpjeguar funksionimin e procesit të Vettingut dhe ka prezantuar rezultatet e tij. Për Jacobs, Vettingu merr kohë:

Theo Jacobs: “Dua të theksoj faktin që procesi i Vettingut po shkon vërtet thellë. Në instancën e parë janë kaluar 111 raste, 18 prej tyre janë në procesin e apelit, 48 janë konfirmuar dhe 46 janë rrëzuar. Kjo do të thotë që gjysma e personave janë rrëzuar nga detyra. Janë 70 largime. Gjykata Kushtetuese, që duhet të përbëhet nga 9 gjykatës; vetëm një është konfirmuar, 8 janë rrëzuar. Gjykata e Lartë, që duhet të përbëhet nga 18 gjykatës, vetëm 3 janë konfirmuar, 15 janë rrëzuar. Pra, po bëhet një proces me rrënjë. Procesi i Vettingut në këtë mënyrë merr kohë, kërkon përgatitje. Ne duhet të fillonim nga fillimi dhe ndaj një proces i tillë kërkon një fazë të gjatë përgatitje”.

Dëgjesa publike mbi plotësimin e kritereve të Kopenhagës është organizuar nga komisionit parlamentar i punëve të jashtme dhe atij të lirive themelore të Parlamentit Europian./abcnews.al

70853Bashkimi.jpg
G. P.13:38 | 14/03/2019

Dy muaj para zgjedhjeve europiane, paritë ekstremiste të djathta kanë shpërndarë teorinë se Bashkimi Europian është krijuar nga nazistët. Këto hamendësime kanë shqetësuar Brukselin, i cili kërkon ndihmën e vendeve anëtare për të luftuar këtë dezinformim.

Bashkimi Europian është i shqetësuar nga rritja e shpejtë e teorive konspirative dhe komplotiste mbi origjinën e Unionit në disa shtete anëtare, por kryesisht në Francë. Sipas këtyre teorive, Bashkimi Europian është krijuar nga nazistët dhe financuar nga CIA. Këto teori paraqitet nga politikanë të ekstremeve të djathta vetëm dy muaj para zgjedhjeve europiane të 26 Majit.

Margaritis Schinas, kryezëdhënës i BE-së: “Ashtu si dhe ju, edhe ne pyesim veten nga vijnë këto teori konspirative apo lunatike në Francë, sipas të cilave Bashkimi Europian qenka krijuar nga nazistët dhe pse ato vijnë tani? Ajo që duam të them, është që në vend që të ketë interesim mbi ata që supozohen në thonjëza të kenë financuar themelimin e Bashkimit Europian, duhet që interesimi të shkojë te financimet e atyre që duan ta shkatërrojnë Bashkimin Europian aktualisht”.

Komisioni Europian ndjehet i vetmuar në këtë betejë kundër dezinformimit dhe i bënë thirrje shteteve anëtare, shoqërisë civile dhe mediave që të luftojnë kundër dezinformimit.

Margaritis Schinas: “Dua të theksoj, se disa herë kemi përshtypjen që jemi  shumë të vetmuar në këtë betejë. Kur sulmohet Brukseli, krijohet përshtypja, se shtete anëtare nuk preken nga ky sulm, Ndaj them, që ndihemi të vetmuar. Në fakt, sa herë që sulmohet Brukseli dhe Bashkimi Europian sulmohen gjithashtu kryeqytetet e shteteve anëtare dhe shpirti i bashkëpunimit të 27 vendeve. Kjo nuk është një betejë që nuk mund të fitohet nga Brukseli”.

Zëdhënësi i Unionit kërkoi marrëveshje dhe mbështetje të institucioneve të tjera europiane, të shteteve anëtare, shoqërisë civile pasi sipas tij, kjo është një betejë komplekse dhe shumë e komplikuar./abcnews.al

be-1280x900.jpg
ent ela21:44 | 11/03/2019

Në një kohë kur data për largimin e Britanisë nga blloku evropian po afron, Brukseli i ka bërë thirrje ligjvënësve britanikë që të marrin vendimin e duhur, në mënyrë që procesi i Breksit të mos zvarritet më.

Bashkimi Evropian ka deklaruar se tashmë varet nga ligjvënësit britanikë të vendoset për Breksit, me Brukselin që mbetet i angazhuar për të arritur një marrëveshje në kohë, në mënyrë që Mbretëria e Bashkuar të largohet nga blloku këtë muaj. Burime nga Brukseli kanë deklaruar se Britanisë i janë ofruar garanci të reja sa i takon çështjes së kufirit irlandez në prag të votimit të radhës që do të mbahet të martën në Parlamentin britanik, mbi marrëveshjen e arritur nga kryeministrja Theresa Mej.

“Tani i takon Dhomës së Përfaqësuesve që të marrë vendimet e duhura”, kanë deklaruar burimet. Laburistët dhe konservatorët i kanë thënë kryeministres Mej se ajo duhet të respektojë premtimin e bërë për mbajtjen e votimit të së martës. Thirrja ka ardhur pas spekulimeve se votimi mund të shtyhet për një ditë tjetër, ose të ketë një rëndësi më të vakët lidhur me efektin e tij. Por qeveria britanike ka konfirmuar se votimi do të mbahet sipas planeve. DAUNING STRIT ka deklaruar se, fokusi i ekzekutivit është vazhdimi i punës për Breksit dhe mbajtja e votimit, në mënyrë që ky proces të mbyllet sa më shpejt. Mbretëria e Bashkuar pritet të largohet nga BE më 29 mars, por në janar ligjvënësit kundërshtuan marrëveshjen e arritur nga Mej në Bruksel, duke kërkuar një seri ndryshimesh në të./abcnews.al

MOGHERINI-HAHN-KOSOVA-1280x720.jpg
G. P.13:18 | 18/12/2018

Me anë të një letre zyrtare Brukseli i bën të qartë kryeministrit të Kosovës Haradinaj se dialogu me Serbinë drejtohet nga presidenti Thaçi. Gjithashtu aty shkruhet se vendimet e njëanshme dëmtojnë atë që është rritur deri tani nga ky dialog.

Mediat në Kosovë kanë publikuar një letër zyrtare dërguar kryeministrit Ramush Haradinaj nga përfaqësuesja e lartë e BE-së, Federica Mogherini, komisionerja për tregti, Sesilia Malmstrom, si dhe komisioneri Johannes Hahn. Në letër bëhet e qartë se dialogu Kosovë – Serbi nga pala kosovare udhëhiqet nga presidenti Thaçi.

Përfaqësuesit e BE-së në këtë letër shkruajnë se rezoluta e miratuar nga Kuvendi i Kosovës është një zhvillim i rëndësishëm dhe do të kontribuojë për ta forcuar peshën e autoriteteve të Kosovës dhe do të duhej të mundësonte lehtësimin, përshpejtimin e vazhdimit të procesit në mënyrë konstruktive, në kuadër të organizimit aktual të Dialogut të Nivelit të Lartë.

“Ne e mirëpresim atë dhe e konsiderojmë si një input në kuadër të qëndrimeve të Kosovës që do të shprehen nga presidenti i saj në dialogun aktual, që përbën për BE-në kornizën e vetme reale për adresimin e normalizimit të marrëdhënieve ndërmjet Prishtinës dhe Beogradit”, thuhet në letrën e përfaqësuesve të lartë evropianë. Ata e akuzojnë Haradinaj se me vendimet e njëanshme është duke rrezikuar përparimin që është arritur në këtë dialog.

Ne fuqimisht nuk pajtohemi me vlerësimin tuaj se dialogu po ngecë. Përkundrazi, dialogu i udhëhequr nga dy presidentët po shënonte dhe ka shënuar progres të qëndrueshëm. Ne e kemi ndarë këtë vlerësim me liderët e BE-së në Këshillin Evropian këtë dhjetor dhe kemi marrë mesazhe inkurajuese të përkrahjes”, thuhet në këtë letër.

Përfaqësuesit evropianë shkruajnë se veprimi i njëanshëm apo deklaratat në kohë jo të duhur, nga cilado palë, mund të jenë vetëm të dëmshme dhe do të ngadalësojnë progresin që mund të arrihet brenda kornizës së dialogut./abcnews.al

MINISTRJA-GJONAJ-ERISA-1280x720.jpg
ent ela14:08 | 04/12/2018

Ministrja e Drejtësisë, Etilda Gjonaj nga Brukseli tha se vetingu ka për qëllim të arrijë një gjyqësor të pavarur, të paanshëm dhe profesional në Shqipëri. Ajo njoftoi se vakumi me rrëzimin e gjysmës së gjyqtarëve dhe prokurorëve do të zëvendësohet me kandidatët magjistratë.

Kryefjala e institucioneve europiane për reformat e integrimit europian në Shqipëri mbetet rezultate të mëtejshme konkrete në zbatimin e reformës në drejtësi dhe luftës kundër korrupsionit dhe krimit të organizuar. Këtë e ka përkuituar sërish drejtori i Përgjithshëm për zgjerimin, Christian Danielsson në samitin e përvitshëm të miqve të Europës mbi Ballkanin Perëndimor në Bruksel. Ministrja e Drejtësisë, Etilda Gjonaj e ftuar në këtë samit, ka theksuar se procesi i  Vettingut është parashikuar që në fillim si fazë tranzitore për të arritur një gjyqësor të pavarur, të paanshëm dhe profesional në Shqipëri.

Etilda Gjonaj, ministre e Drejtësisë: “Procesin e Vettingut e kemi parashikuar si një proces tranzitor për të bërë rivlerësimin e tre elementeveve kryesore; Deklaratës së pasurisë, profesionalizmit dhe integritetit. Kjo bëhet së pari për të rikthyer besimin publik te sistemi i drejtësisë, së dyti për të garantuar paanshmërinë e sistemit gjyqësor dhe së treti, pavarësinë e gjyqtarëve dhe prokurorëve nga politika, si dhe për të prerë të gjitha lidhjet e mundshme me krimin e organizuar”.

Për ministren Gjonaj do të jenë kandidatët magjistratë që po ndjekin shkollën e Magjistraturës, që do të zëvendësojnë në të ardhmen gjyqtarë dhe prokurorë për të mbushur vakumin e krijuar me rrëzimin e 50% të numrit të gjyqtarëve dhe prokurorëve.

Etilda Gjonaj, ministre e drejtësisë: “Sigurisht që është një sfidë e madhe që të mbushen vendet vakante të gjyqëtarëve dhe prokurorëve që janë rrëzuar. Nuk kishim  parashikuar që 50% e numrit të prokurorëve dhe gjyqtarëve do të rrëzohej nga sistemi. Por tani, kemi parashikuar në ligj dhe po marrim masa për të rritur numrin e kandidatëve magjistratë, që do të ndjekin shkollën e magjistraturës dhe që mund të bëhen në të ardhmen gjyqtarë dhe prokurorë”.

Samiti BE-Ballkan i titulluar këtë vit “Zgjerimi, integrimi dhe sfidat e transformimit” mbledh çdo vit përfaqësues të rëndësishëm të vendeve të rajonit, institucioneve europiane si edhe shoqatave joqeveritare dhe fondacioneve në Bruksel. /abcnews.al

rusia.jpg
G. P.23:46 | 27/11/2018

Disa vende anëtare të Bashkimit Europian kanë bërë thirrje për ashpërsimin e sanksioneve ndaj Rusisë, pas sekuestrimit të 3 anijeve të marinës ukrainase në Krime. Por apeli nuk ka gjetur mbështetjen e pritur, duke bërë që të ngrihen dyshime nëse Brukseli do të jetë i unifikuar në këtë nismë.

Politikanë të shumtë europianë ngritën të martën mundësinë e vendosjes së sanksioneve të reja kundër Rusisë, si masë ndëshkimi për sekuestrimin e tre anijeve të marinës ukrainase, veprim që sipas Perëndimit mund të thellojë konfliktin mes dy vendeve.

Deputeti konservator gjerman Norbert Rotgen, aleat i afërt i Merkel, deklaroi se Bashkimi Europian duhet t’i ashpërsojë sanksionet ndaj Rusisë, të vendosura për aneksimin e gadishullit të Krimesë. Por Karin Knajsel, ministre e Jashtme e Austrisë që kontrollon presidencën e radhës të BE-së, tha se Unioni do të veprojë në bazë të fakteve që do të paraqiten nga të dyja palët.

Ndërsa ministri i Jashtëm francez, Zhan Iv Lë Drio, i pyetur nga mediat, refuzoi të përgjigjej. Pro sanksioneve u shprehën Polonia dhe Estonia, dy vende që ndihen të kërcënuara nga Rusia. Zëvendës ministri i Jashtëm polak, Bartosh Çikoki tha se, incidenti në ujërat e Krimesë legjitimon thirrjet e Varshavës zyrtare për një qëndrim më të unifikuar të BE-së ndaj Rusisë.

“Rusia gabon nëse mendon se Perëndimi nuk është i unifikuar, pasi energjia është një gjë dhe mbrojtja është një gjë tjetër”, tha zyrtari polak.

Sidoqoftë, mungesa e unitetit ka ngritur dyshime nëse 28 vendet anëtare do të bien dakord për t’i dërguar një apel Moskës për të liruar anijet dhe marinarët ukrainas. Ditën e diel, në ujërat e Krimesë, e aneksuar nga Rusia në vitin 2014, marina ruse sekuestroi 3 anijet ukrainase dhe më pas dërgoi në to forcat speciale, që anëtarësuan ekuipazhet./abcnews.al

BE-RUMANIA-1280x620.jpg
ent ela22:33 | 19/10/2018

Vendet perëndimore të Bashkimit Europian po hyjnë në një epokë të re përplasjeje me vendet anëtare të lindjes. Shkak janë bërë ndërhyrjet që qeveritë e Rumanisë, Polonisë dhe Hungarisë kanë bërë në sistemet gjyqësore përkatëse, që zhbëjnë reformat e investuara nga Brukseli para anëtarësimit.

Përplasja mes qeverisë dhe gjyqësorit në Rumani ka arritur në pikën kur rrezikon të vërë përballë Bashkimin Europian dhe anëtarët e tij lindorë për respektimin e standardeve demokratike. Ministri i Drejtësisë, Tudorel Toader ka deklaruar se së shpejti do të vendosë për fatin e prokurorit të përgjithshëm, një figurë e rëndësishme në luftën kundër korrupsionit, e vlerësuar nga Brukseli për ekspozimin e rasteve të profilit të lartë, përfshirë atë të kryetarit të partisë Social Demokrate, Liviu Dragnea. Augustin Lazar mbikëqyr rreth 2 mijë e 500 prokurorë, përfshirë njësinë kundër krimit të organizuar dhe atë të anti-korrupsionit. Nëse Toader vendos të nxisë shkarkimin e Lazar, atëherë për prokurorinë rumune do të jetë fundi i një epoke. Më herët gjatë vitit, shefja e njësisë anti-korrupsion u shkarkua, ndërsa shefit të anti-krimit i ka skaduar mandati. Qeveria argumenton në qëndrimin e saj se dy njësitë kanë shkatërruar jetët e personave të pafajshëm. Në muajt e fundit Dragnea, të cilit iu ndalua marrja e postit të kryeministrit për shkak të një dënimi, ka hartuar në muajt e fundit një sërë draftesh për ndryshimin e Kodit Penal. “Ekziston rreziku që gjërat të lëvizin mbrapsht, në një mënyrë që do të dëmtojë jo vetëm demokracinë rumune por edhe rolin e këtij vendi si anëtar i BE-së”, ka deklaruar zëvendës presidenti i Komisionit Europian, Frans Timermans. Por Rumania nuk është i vetmi vend me të cilin Brukseli po përballet në fushën e drejtësisë. Shtete anëtare si Polonia dhe Hungaria kanë ndërmarrë nisma të ngjashme, që synojnë dobësimin e ligjit dhe të pozitës së prokurorëve ndaj rasteve të korrupsionit në politikë. Kjo ka bërë që diplomatët europianë në këto vende të propozojnë sanksione dhe sipas mediave, reagimi i parë do të shihet me rastin rumun. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono