britania

108861553_pms.jpg
ent ela08:32 | 19/09/2019

Boris Johnson ka 12 ditë kohë për të paraqitur planet e tij të Brexit. Lajmi i publikuar nga BBC citon kryeministrin e Finlandës, Antti Rinne, i cili mban presidencën e radhës të Bashkimit Evropian.

Antti Rinne tha që ai dhe Presidenti Francez Emmanuel Macron ranë dakord që Mbretëria e Bashkuar duhet të propozojë me shkrim planet deri në fund të shtatorit, duke shtuar se në të kundërt “gjithçka mbaron”.

Një burim nga Doëning Street iu përgjigj BBC-së se propozimet britanike do të bëhen “në kohën e duhur”.

Johnson kishte deklaruar më parë se ai besonte se samiti i BE-së në 17 tetor ishte koha dhe vendi i duhur për të gjetur një marrëveshje për divorcin konsensual me Brukselin, por që të ishte i gatshëm për të hequr Mbretërinë e Bashkuar nga Bashkimi Evropian. Por ai ka këmbëngulur që Brexit do të ndodhë deri në afatin e 31 tetorit, edhe nëse një marrëveshje nuk është dakorduar.

Kryeministri britanik mendon se bisedimet me Bashkimin Europian po shënojnë progres dhe se Mbretëria e Bashkuar i ka bërë propozimet e saj për sa i përket klauzolës së pikave të ndalimit për Irlandën e Veriut. Klauzolë që për qeverinë e Londrës është e papranueshme. Por Bashkimi Europian këmbëngul se është ende duke i pritur këto propozime./abcnews.al

johnson.jpg
G. P.21:23 | 05/09/2019

Vëllai i vogël i kryeministrit britanik Boris Johnson ka dhënë dorëheqjen si ligjvënës nga radhët e konservatorëve, duke i hapur probleme vëllait të madh, që po kërkon një shumicë për të imponuar zgjedhjet e parakohshme përpara skadimit të afatit të Brexit, më 31 Tetor.

Jo Johnson, vëllai i vogël i kryeministrit britanik Boris Johnson, ka dhënë dorëheqjen si ligjvënës dhe ministër, duke deklaruar se është i ndarë mes besnikërisë familjare dhe interesit kombëtar.

Ministri për Biznesin dhe njëkohësisht deputet i konservatorëve për zonën Orpington, në jug-lindje të Londrës, citoi “tensione të pazgjidhshme” si shkak për vendimin e tij.

Zoti Johnson votoi pro qëndrimit në BE në referendumin e vitit 2016, ndërsa vëllai i tij udhëhoqi fushatën pro daljes. Jo Johnson dha dorëheqjen nga posti i ministrit vitin e kaluar në shenjë proteste ndaj marrëveshjes së Brexit të arritur nga kryeministrja Theresa May.

Por ai hyri sërish në qeveri gjatë verës, pasi konservatorët zgjodhën vëllain e tij të madh si lider. Dorëheqja e tij vjen pas braktisjes së partisë konservatore nga një deputet i saj që kundërshtonte daljen e Britanisë pa marrëveshje.

Gjithashtu, ajo vjen në një kohë kur qeveria njoftoi se ditën e hënë do t’u japë deputetëve një tjetër shans për të votuar për zgjedhjet e parakohshme. Votimi i ri për zgjedhjet është parashikuar pak kohë përpara se Parlamenti të pezullohet duke filluar nga java e ardhshme deri më 14 Tetor.

Duke komentuar vendimin, një zëdhënës i qeverisë britanike tha se, kryeministri falenderon të vëllain për shërbimin e ofruar. “Ai ka qenë një ministër i talentuar dhe brilant, si dhe një ligjvënës fantastik”, deklaroi zëdhënësi./ABC News Albania 24/7

pushime-ne-france.jpg
G. P.21:07 | 23/08/2019

Një 12-vjeçar ka humbur jetën gjatë pushimeve në Francë. Mediat ndërkombëtare shkruajnë se bëhet fjalë për një britanik, i cili u mbyt në një liqen në një kamp në Berny-Riviere, në Veri të Francës.

Mësohet se i riu u nxorr nga uji dhe u dërgua me helikopter në Paris, ku u shpall i vdekur. Kampi ku ndodhi ngjarja është shumë i vizituar nga turistët britanikë pasi është rreth një orë e gjysmë larg nga Parisi.

“Po punojmë për të kuptuar me cilin operator turistik ka udhëtuar familja e viktimës. Gjithashtu autoritetet lokale po punojnë për të zbuluar shkaqet që çuan në këtë incident të rëndë. Detaje të tjera priten të dalin në ditët në vijim”, thuhej në një deklaratë zyrtare të kampit./abcnews.al

johnson.jpg
G. P.19:07 | 19/08/2019

Qeveria britanike ka vendosur të ashpërsojë qëndrimin e saj në negociatat me Brukselin për Breksit. Londra zyrtare ka paralajmëruar se lëvizja e lirë do të marrë fund në tetor nëse BE-ja nuk negocion një marrëveshje të re dhe jo në vitin 2021, sikurse kishte parashikuar qeveria e Theresa May.

Qeveria britanike ka deklaruar se rregullat që u lejonin shtetasve europianë të jetonin dhe të punonin lirshëm në Mbretërinë e Bashkuar do të shfuqizohen në rast të një daljeje pa marrëveshje nga BE-ja në fund të tetorit.

Qeveria e Theresa May kishte menduar zgjatjen e lirisë së lëvizjes deri në vitin 2021, ose t’u lejonte shtetasve europiane të qëndronin për tre muaj në Britaninë e Madhe derisa të aplikonin për një qëndrim më të gjatë.

Sidoqoftë, të dyja këto opsione tashmë janë hedhur poshtë, në favor të një qasjeje të re të Londrës përballë Brukselit që do të publikohet më vonë. Aktualisht janë rreth 3 milionë qytetarë europianë që jetojnë në Mbretërinë e Bashkuar.

Liria e lëvizjes u lejon atyre që të qëndrojnë dhe punojnë në vende të ndryshme të BE-së. I pyetur lidhur me çështjen, kryeministri Boris Johnson deklaroi se Mbretëria e Bashkuar nuk do të tregohet armiqësore ndaj emigrantëve dhe emigracionit.

Por shtoi se në Britaninë e Madhe ky fenomen do të kontrollohet në mënyrë demokratike. Ndërkohë një zëdhënëse e Downing Street ritheksoi synimin e qeverisë për një sistem të stilit australian, të bazuar në pikë.

Ajo shtoi gjithashtu se rregulla të reja kundër kriminalitetit do të hyjnë në fuqi për personat që do të vijnë në Mbretërinë e Bashkuar./ABC News Albania 24/7

boris_johnson_11_cmexep.jpg
G. P.14:56 | 18/08/2019

Kryeministri britanik Boris Johnson do të përpiqet të bindë liderët europianë që të rinegociojnë marrëveshjen e Brexit. Kërkesën e tij, ndonëse jo me shumë insistim, Johnson do ta bëjë gjatë javës, kur do të vizitojë Berlinin dhe Parisin në prag të samitit të G7-s.

Kryeministri britanik Boris Johnson pritet t’u thotë liderëve europianë kur të takohet me ta më vonë gjatë javës se një marrëveshje e re për Brexit është e nevojshme. Megjithatë, Johnson ka bërë me dije se diskutimet mbi Brexit gjatë vizitave të tij në Francë dhe Gjermani do të jenë të shkurtra, pasi palët do të fokusohen në tema të tjera.

Ai pritet t’u thotë partnerëve europianë se, Mbretëria e Bashkuar do të largohet nga BE-ja më 31 Tetor me apo pa një marrëveshje, shkruan BBC në edicionin online. Ndërkohë, e përjavshmja “Sunday Times” ka publikuar një dokument të qeverisë që paralajmëron për një mungesë të theksuar ushqimi, ilaçesh dhe karburanti në rast të një daljeje pa marrëveshje.

Dokumenti thotë gjithashtu se Mbretëria e Bashkuar mund të përballet për muaj të tërë me një çoroditje të porteve të saj, ndërsa planet për të shmangur një përplasje kufitare me Irlandën e Veriut dhe Republikën e Irlandës do të rezultojnë të mangët.

Duke reaguar, qeveria britanike deklaroi se nuk pret të ndodhë ajo çka thuhet në dokument, por nënvizoi se bëhet fjalë për skenarë që po analizohen në kuadër të opsionit të daljes pa një marrëveshje.

Kryeministri Johnson po bëhet gati të udhëtojë drejt Berlinit të mërkurën, ku do të takohet me kancelaren Angela Merkel; ndërsa të enjten ai do të jetë në Paris për një takim me presidentin Emanuel Macron. Sidoqoftë, thuhet se bisedimet e tyre do të fokusohen në çështje si politika e jashtme, siguria dhe tregtia në prag të samitit të G7-s./ABC News Albania 24/7

brexit-1.jpg
Sej rie18:00 | 04/08/2019

Qeveria e re britanike ka paralajmëruar Brukselin që të rinegociojë marrëveshjen e Breksit, ndryshe do të përballet me daljen e Mbretërisë së Bashkuar pa një marrëveshje. Sipas Londrës zyrtare, zgjedhjet evropiane të muajit Maj kanë sjellë një realitet të ri politik dhe rinegocimi është i nevojshëm.

Liderët e BE-së duhet t’i japin kryenegociatorit të tyre mandat për të rishikuar marrëveshjen e tërheqjes së Britanisë së Madhe, ndryshe ajo do të dalë nga Unioni pa një marrëveshje. Paralajmërimi është bërë nga sekretari britanik për Brexit. Në një shkrim të publikuar në “Mail on Sunday”, Stefen Berklej është shprehur se realiteti politik ka ndryshuar pas zgjedhjeve evropiane të mbajtura në muajin maj.

Sipas tij, 61 për qind e vendeve në Parlamentin Europian u zunë nga elementë të rinj, gjë që përbën një “ndryshim thelbësor”. Berklej i ka bërë thirrje liderëve evropianë që të lejojnë Mishel Barnier të negociojë në mënyrë që BE dhe Mbretëria e Bashkuar të gjejnë terren të përbashkët. Brukseli ka insistuar vazhdimisht se marrëveshja e tërheqjes nuk mund të rinegociohet, por sipas sekretarit britanik, me ndryshimet që ndodhën në PE, Unioni duhet ta alternojë qasjen e tij.

“Zoti Barnier duhet t’u bëjë thirrje liderëve të BE-së që të marrin në konsideratë faktin se, nëse edhe ata duan një marrëveshje, atëherë duhet të negociojnë. Ndryshe, e vetmja rrugë mbetet dalja pa marrëveshje”, ka deklaruar Berklej. Kryeministri i ri britanik, Boris Xhonson i ka mëshuar vazhdimisht dëshirës së tij për ta nxjerrë Britaninë e Madhe nga BE-ja më 31 tetor, në kuadër të zotimit të tij të quajtur “bëje ose vdis”./ABC News Albania 24/7

kim-1280x654.jpg
ent ela15:02 | 13/07/2019

Pas dorëheqjes gati të detyruar të ambasadorit britanik në Uashington, Britania e madhe ka nisur hetimet për rrjedhjen e informacioneve në media, ku u publikuan biseda konfidenciale të ish ambasadorit. Ky i fundit e konsideronte kreun e Shtëpisë së Bardhë Donald Tramp si të paaftë dhe të paqëndrueshëm.

Britania e Madhe policia ka nisur hetimet penale për rrjedhjet e informacionit në shtyp,  të kabllogrameve diplomatike kundër presidentit amerikan Donald Trump, gjë që shkaktoi dorëheqjen e ambasadorit britanik në Uashington.

Njësia anti-terroriste e Policisë Metropolitane te Londrës, e cila ka përgjegjësinë kombëtare për të hetuar akuzat për veprat penale të ligjit mbi sekretet zyrtare, ka hapur një hetim penal, konfirmuan burime zyrtare të policisë londineze në një deklaratë. Hetimet nisën pasi publikimi i opinioneve të ish ambasadorit britanik në SHBA, ku e cilësonte kreun e Shtëpisë së Bardhë si të paaftë dhe të paqëndrueshëm, kanë dëmtuar rëndë marrëdhëniet mes dy vendeve.

Këto rrjedhje informacionesh konfidenciale zemëruan presidentin amerikan, i cili ndërpreu marrëdhëniet diplomatike ambasadorin Kim Darroch, të cilin e quajti një “djalë shumë budalla”. Donald Trump gjithashtu kritikoi ashpër Kryeministren konservatore në largim, Theresa May, e cili tregoi mbështetjen e saj për diplomatin. Ambasadori njoftoi dorëheqjen e tij të mërkurën e kaluar.

Publikimi i këtyre kabllogramëve cilësohet nga autoritet britanike si  “shkelja më e madhe e besimit. Pas këtyre reagimeve të Londrës zyrtare, më i zbutur me këtë situatë është shfaqur dhe  presidenti amerikan Donald Trump, i cili të premten i uroi “fat të mirë” ish ambasadorit britanik si dhe u tha gazetarëve në Uashington se Londra duhej të zgjidhte problemin e saj të “rrjedhjes” së informacionit. /ABC News Alnbania 24/7

trump.jpg
G. P.12:20 | 03/06/2019

Në ditën e parë të vizitës zyrtare në Mbretërinë e Bashkuar, presidenti Donald Trump dhe bashkëshortja janë pritur nga mbretëresha Elizabeth. Krahas pritjes madhështore, mbretëresha e ka njohur presidentin amerikan me librin e parë të Uinston Çërçill për Luftën e Dytë Botërore, në përpjekje për të riafirmuar aleancën e ngushtë mes dy vendeve.

Presidenti amerikan Donald Trump dhe bashkëshortja Melania janë takuar me mbretëreshën Elizabeth në ditën e parë të vizitës në Mbretërinë e Bashkuar. Çifti presidencial u prit në pallatin Bakingem me një ceremoni dhe një drekë private, ndërsa më pas vendosi një kurorë me lule në varrin e ushtarit të panjohur në Uestminster Abej.

Vizita e presidentit përkon me përkujtimin e 75-vjetorit të zbarkimit të aleatëve, event të cilin mbretëresha, zoti Trump dhe kryetarë të tjerë shtetesh do ta ndjekin ditën e mërkurë në Portsmuth. Gjatë takimit, monarkja e njohu Trump me edicionin e parë të librit të Uinston Çërçill “Lufta e Dytë Botërore”, i vitit 1959, me një seri dekoracionesh dhe copëza të flamurit amerikan të qepura me dorë. Shefit të Shtëpisë së Bardhë iu dha gjithashtu një stilolaps Dufold, i dekoruar me emblemën e monarkisë.

Më pas zoti dhe zonja Trump u dërguan për një tur në godinën e Uestminster Abej, ku vendosën një buqetë me lule në varrin e ushtarit të panjohur, ndërsa më pas ndaluan në Klarens Hauz, ku  u pritën nga princi Çarls dhe dukesha e Kornuellit për një çaj. Pak minuta përpara mbërritjes në Mbretërinë e Bashkuar, Trump shprehu përmes Twitterit dëshirën për të qenë aleat i rëndësishëm i Britanisë së Madhe, por pak më vonë, sërish përmes rrjetit social kritikoi kryebashkiakun e Londrës, me të cilin është përplasur në të kaluarën.

Ai u shpreh se Sadik Khan, që më herët kishte deklaruar se Britania nuk duhet të shtrojë tapetin e kuq për Trump, ishte vetëm një dështak. Ndërkohë, bisedimet mes Trump dhe kryeministres Theresa Mej do të nisin ditën e martë, me dy liderët që pritet të diskutojnë ndryshimet e klimës dhe teknologjinë, me theks të veçantë tek firma kineze “Huawei”./ABC News Albania 24/7

angli.jpg
G. P.14:54 | 02/05/2019

Britania e Madhe është vendi i parë në botë që shpall gjendjen e jashtëzakonshme klimatike. Lideri i laburistëve Korbin, i cili dorëzoi dhe mocionin që u miratua nga deputetët britanikë, u shpreh se ky ishte vetëm fillimi.

Dhoma e deputetëve në Britaninë e Madhe miratoi një mocion të prezantuar nga opozita laburiste duke shpallur gjendjen e jashtëzakonshme klimatike. Mocioni përfaqëson një sukses për liderin e Partisë Laburiste, Xheremi Korbin, i cili e kishte dorëzuar personalisht në sallë. Por kjo është një fitore sidomos për lëvizjet ekologjiste që e kishin kërkuar me një seri manifestimesh në shesh. Britania e madhe është vendi i parë në botë që ndërmerr një iniciativë simbolike të kësaj natyre.

Sfida e laburistëve për qeverinë konservatore, synon ndër të tjera një nivel zero emetimesh të dëmshme para vitit 2050 si dhe rritjen e ndjeshme të burimeve të rinovueshme. Në debatin në parlament, ministri britanik i ambientit Majkëll Gov, duke iu përgjigjur Korbin pranoi ekzistencën e një situate emergjente, por nuk arriti deri aty sa të mbështesë mocionin në fjalë.

Përpara një turme ambientalistësh, Korbin u shpreh se ky mund të jetë fillimi i një serie veprimesh. Ai premtoi se do të bashkëpunojë dhe me vende të tjera për të shmangur katastrofat klimatike dhe për t’i bërë të qartë presidentit amerikan Donald Trump. Se nuk mund të injorojë marrëveshjet ndërkombëtare./ABC News Albania 24/7

anija.jpg
G. P.11:31 | 01/05/2019

Tre shqiptarë ranë në pranga pasi tentuan që të hyjnë ilegalisht në Britaninë e Madhe me një anije. Mediat kanë bërë të ditur se ata ishin fshehur në bordin e një anije tregtare që lundronte drejt Ridham.

Por ndërkohë që po bëhej gati të ankorohej, dy prej tyre u hodhën pranë urës Kingsferry. Një dëshmitar në momentin e ngjarjes tha se ata u hodhën nga anija dhe më pas tentuan të largoheshin me vrap përgjatë linjës së hekurudhës.

Disa nga inxhinierët e hekurudhës u përpoqën t’i ndalonin, por nuk mundën. Duhej ndërhyrja e policisë së Kent-it, të cilët filluan të kontrollonin zonën. Ata arritën t’i kapnin dy shqiptarët dhe t’i dorëzonin në Zyrën e Emigracionit.

Këta të fundit sqaruan për mediat se tre shqiptarëve u është ndaluar hyrja në Britaninë e Madhe dhe priten të deportohen. Për sa i përket anijes, ajo mbante minerale për një kompani. Përpara se të shkonte në Britani, ajo kishte kaluar në veri të Spanjës, në Gijon dhe Bilbao./abcnews.al

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono