Blendi Klosi

KLOSI-PER-NDYSHIMET-NE-KODIN-PENAL.mpg_snapshot_00.24-1280x720.jpg
G. P.22:15 | 29/05/2019

Për herë të parë që nga anëtarësimi në 1993, Shqipëria bëhet pjesë e organeve drejtuese të Organizatës Botërore të Turizmit, UNWTO, pjesë e Kombeve të Bashkuara, ku aderojnë 148 shtete anëtare.

Blendi Klosi, ministri i Turizmit dhe Mjedisit, është zgjedhur për të mbajtur postin e zv/presidentit te Asamblesë së Përgjithshme të Organizatës Botërore të Turizmit, siç rezultoi në përfundim të sesionit zgjedhor të Komisionit për Europën të mbajtur në Zagreb të Kroacisë.

Pozicioni i zv/presidentit, i Ministrit të Turizmit dhe Mjedisit, Blendi Klosi, vjen në kohën kur turizmi shqiptar, shënoi në 2018-n rritjen më të lartë statistikore prej 20 % më shumë të numrit të turistëve krahasuar me 2017-n.

Ministri Klosi do të drejtojë disa nga sesionet e takimeve ndërkombëtare për turizmin, që do të mbahen në mbledhjet e Asamblesë së Përgjithshme të Organizatës Botërore të Turizmit./ABC News Albania 24/7

bledni-klosi.jpg
G. P.14:35 | 21/05/2019

Ministri i Turizmit, Blendi Klosi, mblodhi në Durrës Task Forcën për turizmin. Ai tha se është shqetësuese situata me ujërat e ndotura, pasi 18 subjekte turistike i shkarkojnë ato në gropa septike.

Durrësi po bëhet gati për sezonin turistik, por ministri i Turizmit, Blendi Klosi, foli me tone të ashpra për ndotjen e ujërave dhe gropat septike. Në mbledhjen e Taks Forcës për menaxhimin e sezonit, ministri tha se ky sezon i ri turistik duhet të jetë më i pastër, cilësor dhe i sigurtë.

“Por për sa i përket operatorëve privatë, akoma në bregdetin Durrësit edhe pse në numër të vogël kemi operatorë të cilët nuk kanë marrë leje mjedisore, për sa i përket vënieve në zbatim të kushteve të një kontrate me shtetin. Po ashtu kemi akoma që për sa i përket shkarkimit të ujërave, 223 prej tyre bëhen në kolektor, por 18 prej tyre akoma janë te gropat septike”, tha Klosi.

Sipas tij, Inspektorati i Mjedisit dhe Turizmit, por edhe autoritetet e tjera përgjegjëse, përfaqësues të Task Forcës së Turizmit dhe aktorët lokalë, duhet të shtojnë numrin e kontrolleve, për t’i paraprirë problematikave.

“Akoma nuk kemi një dakordësi të fundit për sa i përket bashkisë së Durrësit, bashkisë së Krujës, për sa i përket orareve të zhurmave. Ku do lejohen zhurmat apo muzika në vende të përcaktuara? Kush mund të jetë një ditë e caktuar, apo një zonë e caktuar që do ketë një tolerim për muzikën. Shitësit ambulantë besoj që bashkia ka marrë një vendim që të bllokojë shitësit ambulantë të jenë në zonën e plazhit”, tha Klosi.

Përpara se operatorët turistikë të kërkojnë të marrin një plazh me qira, duhet të kenë një plan të qartë dhe të rregull për mirëmenaxhimin e tij.

“Do duhet që ata që marrin menaxhimin e një hapësire publike siç është rëra, të kenë dhe detyrimet e tyre sa i përket pastërtisë, higjienës, ruajtjes së plazhit, administrimit me kujdes duke siguruar hapësirën publike dhe private. Të gjitha këto duhet të zgjidhen sot”, tha Klosi.

Të pranishëm në takimin e Taks Forcës ishin dhe përfaqësues të pushtetit vendor, të cilët premtuan angazhim maksimal për mbarëvajtjen e sezonit veror./ABC News Albania 24/7

klosi-2.jpg
G. P.15:10 | 17/04/2019

Ministri i Turizmit dhe Mjedisit, Blendi Klosi, iu la detyra të qarta me afate të përcaktuara kryetarëve të bashkive të zonave bregdetare, e kjo për të garantuar një sezon të mbarë turistik.

“Vendimmarrja për bashkitë tani në muajin Prill të ndahet se kush janë operatorët që do të administrojnë plazhin. Brenda muajit Prill, maksimalisht në fillim të muajit Maj do duhet të administrojmë siç duhet hartat e vendosjes së zhurmave”, tha ai.

Siguria e jetës së pushuesve, pastërtia e mjedisit dhe cilësia e shërbimit duhet të jenë në fokus të institucioneve, porositi ministri Klosi.

“Instituti i Higjienës, AKU dhe Inspektoriati i Mjedisit të bëjnë që sot një verifikim në terren të gjithë këtyre subjekteve që ne kemi evidentuar nga tr operatorët që të jenë subjekte që do presin sërish turistë të huaj. Të paktën për gjëra që ne i kemi në dorë, të jemi korrekt dhe të kontrolluar. Edhe eliminimi i gropave septike, apo mekanizmave që iu ka ikur koha për të kryer këtë funksion janë evidentuar nga Inspektoriati i Mjedisit dhe të gjitha këto, Inspektoriati do të ketë një forcë më të madhe për të kontrolluar dhe vendosur deporatorët e standardeve të lejuara për deporimin e ujërave të zeza gjatë sezonit turistik”, tha Klosi.

Synimi i Ministrisë së Turizmit dhe Mjedisit u shpreh ministri Klosi është kthimi i Shqipërisë në një destinacion të qëndrueshëm turistik dhe zgjatja e sezonit turistik përtej periudhës klasike nga Qershori në Shtator. /abcnews.al

blendi-klosi.jpg
G. P.13:10 | 17/04/2019

Shumë shpejt çdo zonë e mbrojtur në vend do të ketë pasaportën e saj. Ministri i Turizmit dhe Mjedisit, Blendi Klosi, e bëri të ditur në konferencën përmbyllëse të projektit të Bashkimit Europian “Natyra 2000”.

Mbi 18% e sipërfaqes së vendit konsiderohet zonë e mbrojtur. Sipas ministrit të Turizmit dhe Mjedisit, Blendi Klosi, prej tre vitesh trajtohet ndryshe dhe është vendosur në shërbim të turizmit.

“Beteja e Ministrisë së Turizmit për mbrojtjen e këtyre zonave dhe sidomos për një betejë që para 1 viti e gjysmë quhej krejtësisht e humbur me zhvillimin e qëndrueshëm të HEC-eve në zonat e mbrojtura sot padyshim ka një rezultat spektakolar. Nuk ka më as kërkesë. Është arritur të kuptohet që zonat e mbrojtura janë të mbrojtura dhe nuk ka më veprimtari ekonomike të cilat i dëmtojnë ato”, tha ai.

Në konferencën përmbyllëse të projektit më të madhe të Bashkimit Europian në fushën e mjedisit “Natyra 2000”, ministri Klosi tregoi se këtë vit çdo zonë e mbrojtur do të pajiset me pasaportën e saj.

“Pse është zonë e mbrojtur gjithsecila zonë? Kush janë arsyet që ajo pasqyron potencial ekonomik edhe vlerë të vërtetë? Kush janë koordinatat e plota që të mbyllet përfundimisht ky evazion dhe ky agresivitet karshi këtyre zonave”, tha Klosi.

Rezultatet e punës së bërë ministri Klosi tha se janë përkthyer në rritje të numrit te turisteve që vizitojnë zonat e mbrojtura në vendin tonë.

ikmt.jpg
G. P.15:05 | 04/04/2019

Ministria e Turizmit dhe Mjedisit mbylli sot gropën e fundit të gëlqeres në Fushë-Krujë. Ministri Blendi Klosi deklaroi se pas një operacioni të mirëkoordinuar nga institucione shtetërore, tani ka marrë fund ky fenomen i paligjshëm.

Sipas ministrit, inspektorët e mjedisit, të rendit dhe agjencisë së zonave të mbrojtura do të jenë gjithmonë në terren, me qëllim moslejimin e hapjes së gropave të reja.

“Për të gjithë shpërdoruesit mjedisorë dhe në kuadër të iniciativave si ajo e 100 fshatrave, nuk do të ketë asnjë tolerim për shkelësit e ligjit”, deklaroi Blendi Klosi./abcnews.al

gazetare.jpg
G. P.17:21 | 29/03/2019

Paketa fiskale që ofron Shqipëria për investitorët e huaj sipas ministrit te Turizmit dhe Mjedisit, Blendi Klosi, është më e mira në rajon. Klosi prezantoi para gazetarëve italianë Shqipërinë si destinacion turistik dhe ftoi sipërmarrësit e huaj të investojnë në vendin tonë.

Turistët e huaj duhet të vizitojnë Shqipërinë jo vetëm për detin, por dhe për natyrën e mrekullueshme dhe trashëgiminë kulturore. Ministri i Turizimit Blendi Klosi i prezantoi vetë bukuritë e vendit tonë përpara 30 gazetarëve italianë të cilëve iu tregoi dhe lehtësitë fiskale që qeveria shqiptare i ofron çdo sipërmarrësi të huaj që dëshiron të investoje në fushën e turizmit.

Këtë paketë fiskale, ministri i Mjedisit dhe Turizmit, Blendi Klosi, e cilësoi më të mirën në rajon ndërkohë që tha se ka nisur të japë frytet e saj. Agroturizmi është një tjetër fushë që po njeh zhvillim vitet e fundit në vendin tonë për të cilën ministri Klosi tha po mësojnë nga përvoja italiane./abcnews.al

blendi-klosiiiiiiiiii.jpg
ent ela16:05 | 25/03/2019

Promovimi i Shqipërisë turistike përtej detit është synimi i ministrisë së Mjedisit dhe Turizmit. Ministri Blendi Klosi e bëri të ditur nga mali i Dajtit, ku inauguroi qendrën për vizitorët që hapi dyert në këtë zonë.

Të gjithë ata që zgjedhin t’i largohen zhurmës së qytetit e të kalojnë pak kohë në qetësinë që ofron mali i Dajtit tashmë do të kenë mundësi të mësojnë më tepër rreth këtij parku kombëtar.

Qendra e shtatë për vizitorët në vend është çelur pikërisht këtu.  Falë financimit prej 130 mijë eurosh të Bashkimit Europian. Ambasadori i BE-së në vendin tonë e inauguroi bashkë me ministrin e Mjedisit dhe Turizmit Blendi Klosi.

Kjo qendre sipas ministrit Klosi do të jetë një pikë që do të ofrojë më tepër mundësi për argëtim. Guidat profesioniste do te jenë aty, jo vetëm për të huajt, por dhe vendasit që dëshirojnë të shëtisin zonën, në këmbë apo me biçiklete.

Turizmi i qëndrueshëm sipas Ambasadorit te Bashkimit Evropian në vendit tonë arrihet duke mbrojtur mjedisin prandaj apeli i tij vjen pikërisht për këtë aspekt.

 “Qëllimi është hapja e këtyre qendrave për të patur një turizëm të qëndrueshëm. Ne që këtu mund të shohim Tiranën dhe kjo qendre mund të shërbejë si qendër komunikimi mes qytetit dhe parkut. Ne shpresojmë se Shqipëria do t’i bashkohet shpejt rrjetit të “Natyra 2000”. Prandaj është e rëndësishme të krijohen qendra të tilla por më e rëndësishme është që të zbatohet ligji”.

Parku Kombëtar i Dajtit  i vendosur 26 km në lindje të Tiranës  zë një sipërfaqe prej 3300 ha dhe njihet për florë dhe faunë të  pasur. Vetëm në tre muajt e parë të vitit ai ka pritur rreth 20 mijë vizitorë./abcnews.al

blendi-klosii-1.jpg
G. P.18:10 | 20/03/2019

Për herë të parë në Shqipëri do të organizohet një festival i përmasave të mëdha ndërkombëtare. Shëngjini është zgjedhur si destinacioni që do të presë më shumë se 7 mijë turistë për UNUM 2019.

Shëngjini do të jetë destinacioni i më shumë se 7 mijë turistëve të huaj nga data 31 Maj deri më 3 Qershor. Në këtë zonë turistike do të mbahet festivali ndërkombëtar i muzikës UNUM 2019. Projekti është prezantuar edhe në prani të ministrit të Turizmit, Blendi Klosi.

Bashkia e Lezhës pranon se kjo është një sfidë e madhe për ta, por që prej muajsh bashkëpunojnë me organizatorët që gjithçka të jetë gati për festivalin dhe sezonin turistik në përgjithësi.

Organizatorët e këtij festivali janë të bindur se kanë zbuluar një vend të mrekullueshëm për të cilin presin t’ua prezantojnë edhe të tjerëve, pasi në fakt të tilla vende duan të eksplorojnë edhe artistët që do të marrin pjesë, pasi në Europë nuk ka të tilla vende.

Promovimi i bukurive natyrore të bregdetit të Shëngjinit nëpërmjet muzikës është një prej arsyeve të këtij organizimi kaq të madh të cilit i janë bashkuar edhe DJ që performojnë në skenat botërore.

Mirëmbajtja e ambientit është një tjetër rëndësi që do të marrë organizimi i këtij festivali, qëllim për të cilin u realizua edhe një fushatë sensibilizuese nga të pranishmit në prezantimin e këtij festivali./abcnews.al

blendi-klosiii.jpg
G. P.22:15 | 18/03/2019

Ministria e Turizmit dhe Mjedisit bën të ditur se vendimi për TEC-in e Korçës ka të bëje me një revokim të përhershëm dhe të pakthyeshëm. Lajmin e bëri të ditur ministri Blendi Klosi gjatë fushatës “Krijo Oksigjenin Tënd” në Ersekë.

Ministria e Turizmit dhe Mjedisit jep përgjigje të prerë për spekulimet për TEC-in me avull që ishte parashikuar të ndërtohej në zonën e Korçës. Gjatë një aktiviteti në Ersekë, ministri Blendi Klosi deklaroi se mosdhënia e lejes për një projekt të tillë është revokim i përhershëm dhe i pakthyeshëm

Blendi Klosi: Pezullimi dhe mendoj që revokimi i përhershëm dhe i plotë e i pakthyeshëm nga Ministria e Mjedisit ka qenë një vendim i drejtë nga pikëpamja inxhinerike, pasi ekspertët arritën të kuptonin se nuk kishte mundësi që afër qytetit të kishte një TEC të tillë pasi krijonte shumë problematika mjedisore për qytetin. Po ashtu pamë edhe opinion e qytetarëve, të cilët janë shumë më tepër në mbrojtje të natyrës, gjelbërimit dhe shumë larg ndërtimeve të tilla. Ai TEC pranë qytetit të Korçës nuk do të bëhet asnjëherë.

Edhe kreu i Bashkisë së Korçës e falënderoi dhe e vlerësoi ministrin Klosi për vendimin në lidhje me TEC-in me avull të Korçës. Deklaratat e ministrit Blendi Klosi për TEC-in u bënë gjatë fushatës “Krijo Oksigjenin Tënd” në zonën e Ersekës ku ka nisur mbjellja e 200 pemëve të gështenjës dhe akacies, të cilat kontribuojnë në mjedis dhe ekonomi./abcnews.al

FILO-KLOSI-PER-TECIN-NE-KORCE_ABC-M2-T1.mpg_snapshot_00.08-1280x720.jpg
G. P.14:42 | 10/03/2019

TEC-i në Korçë sipas kryetarit të Bashkisë së qytetit Sotiraq Filo nuk duhet të ndërtohet. Kryebashkiaku Filo i shkruan ministrit të Mjedisit Klosi dhe ministres së Energjitikës Balluku të mos e aprovojnë projektin. Ndërkohë ministri Klosi thotë se nuk ka leje për një investim të tillë, por vetëm miratim në parim të projektit.

Kryetari i Bashkisë së Korçës Sotiraq Filo shprehet kundër ndërtimit të TEC-it në afërsi të këtij qyteti.

Përmes një letre kryebashkiaku Filo i kërkon ministrit të Mjedisit dhe Turizmit Blendi Klosi dhe ministres së Infrastrukturës dhe Energjisë Belinda Balluku të mos e aprovojnë kërkesën e kompanisë së interesuar për të investuar.

“Ju kërkoj të mos aprovoni vlerësimin e ndikimit në mjedis pasi investitorët nuk kanë paraqitur asnjë garanci për një bilanc pozitiv të ndotjes. Projekti është shumë afër qytetit dhe në toka të frutshme bujqësore. Qendrimi kundër i Bashkisë së Korçës ka qenë i qartë dhe konsistent që në raportin e përgatitur për Komitetin e Investimeve Strategjike  më date  5.12.2017 ku Bashkia Korçë është shprehur JO me arsyetimin e afërsisë me qytetin“.

Ky qëndrim thotë kryetari i Bashkisë së Korçës është mbështetur dhe nga Ministria e Bujqësisë dhe Zhvillimit Rural e cila ka theksuar se projekti cënon funksionalitetin e fushës së Korçës nga fshati Barc deri në Zëmblak.

“Në këto kushte, ju kërkoj MOSAPROVIMIN E KETIJ INVESTIMI, i cili në çdo rast nuk do të mund të realizohet dot në kundërshtim me vullnetin e Bashkisë së Korçës”.

Pas publikimit të letrës ka reaguar dhe ministri I Mjedisit dhe Turizmit Blendi Klosi. Përmes një komenti në facebook Klosi thotë se nuk ka asnjë leje apo autorizimi për ndërtimin e një TEC-it në Korçë, por vetëm miratim në parim si investim strategjik.

“TEC-i Korçës një zhurmë tipike e politikës së sajesave për sherr! S’ka asnjë autorizim e asnjë leje jo e jo, po thjesht një miratim në parim si investim sratetegjik. Për sa kohë s’ka një projekt të standardeve të BE-së, s’ka asnjë shans jo për të nisur punë, po për asnjë autorizim!”

 

/abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono