Blendi Klosi

turizmi.jpg
G. P.15:21 | 21/08/2019

Këtë Gusht, Shqipëria ka pritur 16% më shumë turistë se Gushtin e vitit të shkuar. Ministri i Turizmit dhe Mjedisit Blendi Klosi e bëri të ditur, ndërsa foli për një rekord të ri në turizëm në vendin tonë.

Muaji Gusht shënoi rekordin e ri në turizëm, 1 milion turistë të huaj kanë hyrë në Shqipëri, në vetëm 1 muaj. Ministri i Turizmit dhe Mjedisit Blendi Klosi e bëri të ditur nga porti i Sarandës ku priti familjen austriake Forster që shënoi dhe turistin e 1 miliontë.

“Familja Forster u përcaktua si turisti i 1 miliontë në vendin tonë për muajin gusht. Rastisi që turisti i 1 miliontë për këtë muaj të hyjë në Sarandë dhe ne së bashku me kryetarin e bashkisë, drejtoreshën e portit e mirëpritëm me të rinjtë e Smile duke dëshmuar një moment simbolik në këtë ofertë të re turistike që ka Saranda dhe i gjithë bregdeti shqiptar për vitin 2019. Siç e thashë është turisti i 1 miliontë, pra kanë hyrë 1 milionë turistë të huaj vetëm brenda muajit gusht deri në ditën e sotme duke shkuar në rritje me 16% krahasuar me të njëjtën periudhë të gushtit të vitit të kaluar”.

Të surprizuar nga kjo ngjarje turistet vlerësuan mikpritjen shqiptare.

“Është hera e parë që vij në Shqipëri. Miqtë na treguan se Shqipëria është një vend i mrekullueshëm, që duhet ta vizitoni patjetër tani! Na thanë që është një vend i bukur turistik, i qetë, me njerëz të mirë gjithashtu! Ne do të qëndrojmë këtu për 1 javë, me shpresën që do ta shijojmë qëndrimin këtu”.

Për ministrin Klosi kjo është një ngjarje, që flet për sezon të suksesshëm turistik, por që sipas tij, me rritjen e numrit të turistëve, rritet edhe përgjegjësia për të punuar për më shumë standarde./ABC News Albania 24/7

tomorri.jpg
G. P.12:29 | 19/08/2019

Qeveria nuk do të tërhiqet! Malin e Tomorrit do ta rishpallë zonë të mbrojtur në një territor më të gjerë se sa ai që ishte përcaktuar 24 vite më parë. Kjo do të ndodhë para se të ankimojë vendimin e gjykatës, e cila riktheu në punë kompanitë që nxjerrin pllaka guri ndonëse Këshilli i Ministrave kishte vendosur ta rikthente në park kombëtar të gjithë zonën.

“Do të vazhdojmë mbledhjen e firmave nga të rinjtë e Beratit për një peticion drejtuar institucionit shtetëror. Do të marrim një vendim të shpejtë të KKRRT për të miratuar zgjerimin e hartës së Parkut Kombëtar të Tomorrit. Do të marrim një vendim qeverie për ta rishpallur Park Kombëtar malin e Tomorrit, pasi hilet e gjykatave për ta çuar në gjykatë, për të zgjatur me vite të tëra, do ta shkatërronte përfundimisht atë zonë duke e bërë të parikuperueshme. Ne do të vazhdojmë ankimimin gjyqësor për procesin e fundit të Gjykatës së Apelit Administrative të Tiranës”,  tha Klosi.

Ministri i Turizmit dhe Mjedisit Blendi Klosi e quajti korruptiv vendimin e gjykatës ndërsa tregoi se për të ka lobuar i njëjti grup biznesi, i cili në vitin 1995 ndikoi në vendimin e qeverisë për të rrudhur Parkun Kombëtar.

Pas këtij vendimi, të rinjtë e Beratit vijojnë mbledhjen e firmave për ta kundërshtuar ndërsa Ministria e Turizmit dhe Mjedisit  ka çelur një debat publik për të përcaktuar hartat e çdo zone të mbrojtur në vend.

/ABC News Albania 24/7

akullorja.jpg
G. P.16:20 | 18/08/2019

Festat lokale po shihen si një mundësi për të tërhequr sa më shumë turistë. Në Durrës u zhvillua “Akullore si dikur”. Ministri i Turizmit dhe Mjedisit Blendi Klosi i pranishëm në festë deklaroi mbështje për produktin vendas.

Turistë dhe pushues vendas shijuan akulloren që ndër vite njihet për shijen e saj unike. “Akullore si dikur” u zhvillua në sheshin “Liria” në Durrës. Në festën lokale i pranishëm ishte dhe ministri i Turizmit dhe Mjedisit, Blendi Klosi.

Praninë e madhe të qytetareve ministri e sheh si sukses të rikthimit të traditës.

Festat lokale po shihen si një alternativë për të rritur ofertën turistike prandaj ministri Klosi siguroi mbështetjen e Ministrisë së Turizmit dhe Mjedisit për t’i promovuar në të gjitha bashkitë e vendit./ABC News Albania 24/7

spain.jpg
G. P.13:17 | 16/08/2019

Familjen spanjolle që ra pre e një konflikti me pronarin e restorantit në Porto Palermo, e ka vizituar ministri i Turizmit dhe Mjedisit Blendi Klosi. Në profilin e tij në Facebook, Klosi shkruan:

“Në mëngjes me familjen e pushuesve nga Spanja,  që dje përjetuan një eksperiencë konflikti në Himarë, që nuk është as në traditën shqiptare të mikpritjes dhe as në kulturën tonë për trajtimin e miqve”.

Klosi shton se, ashtu sikurse i kishte pohuar edhe përfaqësuesi i familjes Galdon, “një njeri i vetëm nuk përfaqëson Shqipërinë”. Në status, Klosi thotë se familja spanjolle ka vlerësuar reagimin e menjëhershëm të autoriteteve dhe interesimin e drejtpërdrejtë të qeverisë.

/ABC News Albania 24/7

blendi-klosi-1.jpg
nev ila15:20 | 14/08/2019

Ministri i Turizmit dhe Mjedisit i bën thirrje tur operatorëve të përfshijnë festat lokale në ofertat e tyre turistike. Blendi Klosi ishte në Golem ku mori pjesë në festën “Venë dhe Verë”.

“Venë dhe verë” – festa lokale në Golem mblodhi bashkë dhjetëra kantina të zonës së Shqipërisë së mesme dhe turistë të cilët degustuan shijen e verës shqiptare.

Ministri  i Turizmit dhe Mjedisit,  Blendi Klosi u shpreh se aktivitet te tilla tregojnë se në Shqipëri mund të bëhet turizëm potencial,

“Në Shqipëri mund të bëhet turizëm potencial, që prodhon ekonomi, para, punësim, prodhon edhe oferta të ndryshme turistike për ata që vizitojnë vendin tonë”, tha Klosi.

Ministri i Turizmit dhe Mjedisit i bëri thirrje tur operatorëve që të shtojnë ofertën turistike duke përfshirë festat lokale në paketat e tyre për turistët e huaj.

“Është oferta që vjen nga të gjitha produktet bujqësore, nga të gjithë poseduesit e agroturizmit të cilët kanë një ditë të caktuar kur do të bëjnë një festë, ku do të ofrojnë produktin e tyre, do të kenë një alternativë më shumë përgjatë sezonit turistik. Mendoj që më shumë se institucionet vetë biznesi duhet ta gjejë gjuhën me njëri- tjetrin dhe kur të organizohen këto aktivitete në kantina tur operatorët të afrojnë turistët për të vizituar agroturizmin që ata të kenë mundësinë për të bërë reklamim të ofertës së tyre turistike”, tha Klosi.

Ministri Klosi u kërkoi drejtuesve lokalë që të shndërrojnë këto festa në traditë pasi festat lokale sipas tij janë një mundësi e mirë e prezantimit e produktit shqiptar tek turistët e huaj./ABC News Albania 24/7

smile-albania-1280x715.jpg
nev ila21:22 | 06/08/2019

Të gjithë duam që kur të nisemi me pushime verore të gjejmë një ambient sa më të pastër në plazh dhe në mjediset ku do të pushojmë. Ministria e Mjedisit dhe Turizmit në bashkëpunim me kampin “Turtle” në Dhërmi organizuan një konferencë me të rinj e të reja se si të mbajmë pastër ambientet e plazheve.

“Ja dolëm që të realizonim një nga qëllimet që kishte i gjithë projekti “Smile”. Bashkë me promovimin e turizmit dhe sëbashku me evidentimin e vlerave turistike të vendit të kishim edhe shumë më shumë edukim mjedisor. Të 500 studentët që u përzgjodhën për projektin “Smile” gjatë këtyre 2 muajve ishin pjesë e trajnimeve të ndryshme për të bërë edhe atë që është thelbi i funksionit të ministrisë së turizmit dhe mjedisit, për të promovuar turizmin, për të promovuar zonat tona natyrore, pasuritë tona të mëdha në shërbim të turizmit. Besoj se ideja për të qenë sëbashku në një komunitet i cili promovon, studion mjedisin  e bën më të mundur realizimin e objektit. Ne do të vazhdojmë që projekti “Smile Albania” të jetë kudo ku ka turistë dhe ku duhet promovuar turizmi”, tha Klosi./abcnews.al

blendi-klosi.jpg
G. P.15:14 | 02/08/2019

Të rinjtë e projektit “Buzëqesh Shqipëri” do të jenë promotorët e turizmit dhe mbrojtjes së natyrës. Ministri i Mjedisit dhe Turizmit Blendi Klosi  e bëri të ditur ndërsa lançoi tre konkurse për të rinjtë e projektit;  “Video më e mirë”, “Foto më e mirë” dhe “Buzëqeshja më e bukur”.

Një detyrë tjetër u ngarkohet të rinjve të projektit “Buzëqesh Shqipëri” veç asaj për të informuar turistët rreth bukurive që ofron vendi ynë.

“Detyra e smajl-istëve është që të evidentojnë problematikat që kemi në zonat ku ju ushtroni aktivitetin tuaj si mikpritës të turistëve; Të evidentoni problematikat e menaxhimit të zonave të plazhit, një detyrë që duhet ta bëni çdo ditë, problematikat në kuadër të pastërtisë, të sigurisë dhe në kuadër të gjithë sistemit, që duhet të ndërtojmë për mikpritjen”.

Ministri i Mjedisit dhe Turizmit Blendi Klosi iu bëri të ditur në Vain të Lezhës ku tregoi dhe për zhvillimin e tre konkurseve që do zhvillohen.

“Do të kemi edhe nga një çmim, që kanë të bëjnë me atë që thashë më parë; detyrën kryesore që ne kemi për të promovuar vendet tona turistike. Janë 3 konkurse, ku do të zgjedhim foton më të bukur, pra foto që merr më shumë klikime dhe më shumë pëlqime në rrjetet sociale, video më e bukur promovuese për zonat turistike të vendit me prezencën e turistëve tuaj dhe buzëqeshja më e bukur.”

Shqipëria do të jetë e suksesshme tha ministri Klosi nëse do të arrihet që turistët, të mos vijnë në vendin tonë vetëm për plazhet, por edhe për natyrën./ABC News Albania 24/7

TURTEL-FEST.mpg_snapshot_01.41-1280x720.jpg
ent ela19:45 | 29/07/2019

Edicioni i tetë i “Turtle Fest” në Drimadhes mori vëmendjen e ministrit të turizmit dhe mjedisit Blendi Klosi. Në një intervistë me gazetarin e ABC News Maksi Rama, ministri Klosi shprehet se të tilla evente shërbejnë si destinacione të reja të turizmit në Shqipëri, por edhe japin kontribut për biznesin lokal. Ai thekson se këto festivale duhet të mbështeten edhe nga institucionet shtetërore, por pozitiv është fakti sipas tij, që këto festivale po vijnë në Shqipëri për shkak të destinacionit liberal dhe çmimit.

“Është e rëndësishme që vitet e para këto festivale të mbështeten nga institucionet shtetërore. Ajo që unë shoh me kënaqësi është që festivalet po spostohen nga destinacione si Kroacia, Mali i Zi dhe Greqia dhe po shohin mundësinë në Shqipëri për faktin që është destinacion i ri liberal dhe paraja e harxhuar ka vlerë për turizmin pasi nga rajoni çmimet janë rritu shumë ne duhet ta menaxhojmë me rregulla loje dhe jo ta shkatërrojmë”.

Ministri Klosi vuri në dukje edhe rritjen e numrit të turistëve krahasuar me një vit më parë, ndërsa bëri apel për shërbim dhe investime që ketë përfitim.

“Jemi në shifra të kënaqshme sa u takon të huajve të ardhur në Shqipëri. Jemi në 18% më shumë se viti i kaluar dhe po shkoi dhe gushti me këto ritme arrijmë objektivin tonë të shkojmë në 6.7, 6.8 vizitorë të huaj në Shqipëri. Rritja  e numrit të turistëve na rrit përgjegjësitë. Shoqëria shqiptare dueht të mendojë që për të pasur përfitim duhet të ketë edhe shërbim”.

Ndërkaq gazetarja Genta Hodo na sjell edhe prapaskenat e “Turtle Fest” në edicionin e 8-të festivalit të parë të muzikes elektronike në Shqipëri.

/abcnews.al

KLOSI-NE-DRIMADHES.mpg_snapshot_00.38-1280x720.jpg
ent ela15:27 | 28/07/2019

Edicioni i tetë i “Turtle Fest” në Drimadhes mori vëmendjen e ministrit të turizmit dhe mjedisit Blendi Klosi. Gjatë bashkëbisedimit me organizatorë, gazetarë vendas e të huaj Ministri Klosi nënvizoi se duhet investuar në të tilla evente që shërbejnë si destinacione të reja të turizmit në Shqipëri.

Është edicioni i tetë i “Turtle Fest” Me mijëra turistë pjesëmarrës nga e gjithë bota morën pjesë gjatë tri netëve spektakël në natyrë me performancën e mbi 45 DJ-e të njohur nga Shqipëria, Kosova, Mali i Zi dhe Evropa në plazhin e Drimadhes. Organizatori Rubin Beqo tregon fillimet e kësaj iniciative.

“Turtle Fest nisi para 8 vitesh, si një iniciativë tepër modeste e Turtle Camp, që është një nga kampingjet e para në zonë. Nisi si një takim mes miqsh, DJ dhe dashamirësish të muzikës dhe sot pas 8 vitesh jemi krenarë që mund të themi që ka marrë një përmasë deri diku industriale si prodhim dhe tashmë është jo vetem një festival, por një platformë që ka shumë komponentë. Ne mundohemi që përmes Turtle Fest të krijojmë një aktivitet rinor, të komunikojmë mesazhe, shije dhe të promovojmë një nga bukuritë e plazhit të Jugut, si Drimadhes”.

Për Ministrin e Turizmit dhe mjedisit Blendi Klosi, i cili ndoqi ditën e dytë të festivalit, ky nuk është vetëm një event muzikor, por një praktike punë e konsoliduar, që prodhon të ardhura jo vetëm për organizatorët, por edhe për njerëzit e komunitetit, për ata që shërbejnë në këtë festival.

“Bashkë me zëvendesministren, prefektin e qarkut Vlorë dhe stafin tim jemi këtu për të shkëmbyer ide sesi ky event mund të bëhet më mirë vitin e ardhshëm, që Shqipëria të paraqitet si një destinacion i vërtetë europian për turizmin. Por që të jetë i tillë nuk mund të bëhet pa të rinjtë dhe pa ata që në kohën e sotme janë ambasadorët më të mirë“.

Ndaj e sheh me prioritet orgamizimin e festivaleve disa herë më të mëdha në Shqipëri me qëllim krijimin e destinacioneve të reja.

“Tani në Shqipëri, të paktën gjatë këtij sezoni ne kemi organizuar 5 festivale rinore ndërkombëtare. Ndaj na del detyrë të mendojmë për orientimin dhe hartimin e politikave që evente të tilla t’i shndërrojnë në evente shumë më shumë ndërkombëtare dhe çfarë duhet të bëjmë ne nëpërmjet institucioneve që menaxhojnë turizmin në Shqipëri që t’ju ndihmojnë në promovimin ndërkombëtar të festivalit për ta kthyer në traditë dhe në buxhet për të sjelle në Shqipëri artistë të nivelit ndërkombëtar.

Në sytë e ministrit Blendi Klosi evente të tilla i bëjnë një të gjithë pjesëmarrësit, një arsye më shumë që të eleminohen barrierat me qëllim që Shqipëria të promovohet si destinacion turistik i qëndrueshëm në rajon dhe përtej tij.

klosi-1280x720.jpg
nev ila17:12 | 20/07/2019

Nga qyteti bregdetar i Vlorës, ku ministri Klosi mblodhi Task Forcën e Turizmit dhe ku të pranishëm ishin edhe ministri i Brendshëm, ministrja e shëndetësisë dhe zëvendës ministrja e Financave, të deleguarit e Këshillit të Ministrave për drejtimin e grupit ndërinsitucional për menaxhimin e sezonit turistik 2019, u raportuan problematikat dhe u lanë afate për zgjidhjen e menjëhershme të tyre, në shërbim të një sezoni turistik të mirëadministruar dhe në funksion të sigurisë së pushuesve.

“Nga 139 subjekte të kontrolluara në zonën e bregdetit në të gjithë qarkun e Vlorës vetëm 11 prej tyre kanë kontrata me bashkitë, ndërkohë që vetëm këtu ku jemi ka më shumë se 11 që e ushtrojnë këtë aktivitet, madje një numër i konsiderueshëm i këtyre aktiviteteve nuk ka nipt financiar”, tha ministri Klosi.

Ai foli edhe për sigurinë në plazhe, detyrimin që kanë subjektet për tu pajisur me kulla vrojtimi dhe ruajtës plazhesh të certifikuar, që sipas ministrit lë për të dëshiruar.

“Ne patëm 0 jetë të humbura në plazhet e Vlorës vitin e kaluar ndërkohë që sivjet nuk është po i njëjti rezultat sepse edhe shifrat flasin që kemi më pak roje plazhi sesa vitin e kaluar. Vrojtues të certifikuar kemi vetëm 84 ndërkohë që duhet të kishim më shumë. Kemi më shumë pika të ngritura për kulla vrojtimi krahasuar me vjet, por që nuk janë funksionale. Edhe pse është mesi i korrikut akoma nuk kemi realizuar në të gjithë zonën e vijës bregdetare, vijëzimet e detit; ku lejohet notimi dhe ku lejohet levizja e mjeteve te shpejtesise. Vjet patëm përsëri një arritje të madhe në të gjithë zonën e bregdetit me 0 aksidente me jetë të humbura. Ndërkohë që parvjet mungesa e këtyre vijëzimeve na bëri që vetë në Vlorë të kishim 3 aksidente disa edhe me jetë të humbura të turitëve të huaj në qarkun e Vlorës”, tha ministri Klosi.

Ministri tha se në Vlora i ka të gjitha mundësitë që deti të shfrytëzohet gjithmonë e më shumë, e megjithatë kontrolli mbi mjetet që shfrytëzojnë gadishullin e Karaburunit dhe Sazanin është pothuajse minimal.

Nëse vjet kanë qenë 2 sivjet janë 27 mjete që ofrojnë shërbimin në zonën e mbrojtur të Karaburunit që është një arritje për zonat e mbrojtura por përgjegjësia duhet të jetë gjithmonë e më e madhe. Meqë është dita e parë pas miratimit të Kodit Penal ku disa nga shkeljet e krimet mjedisore tashmë janë krime penale, i bëj thirrje institucioneve përgjegjëse të ushtrojnë më shumë kontrolle, për të evidentuar dhe ndëshkuar krimin mjedisor, tanimë me ligj”, tha ministri Klosi.

Për ministrin Lleshaj, mos zbatimi i legjislacionit në fuqi për menaxhimin e stacioneve të plazhit duhet zgjidhur në mënyrë immediate, përndryshe do të nisin ndëshkimet.

“Java tjetër është afati i fundit për nënshkrimin e kontratave për dhënien me qira të stacioneve të plazhit. Nga e hëna, ekipe të bashkisë të shkojnë në çdo subjekt që të firmosin kontratat për marrjen në dorëzim të plazheve ose të ikin përfundimisht, përndryshe do të ketë penalizime dhe procedime penale. Kontrata të jenë me efekt prapaveprues që nga koha kur subjektet kanë filluar të ushtrojnë aktivitetin”, tha ministri Lleshaj.

Nga ana e saj, ministrja e Shëndetësisë tha se janë marrë të gjitha masat për të garantuar shërbim shëndetësor në çdo pikë turistike.

“Kemi përmirësuar cilësinë e shërbimit shëndetësor në 28 qendrat shëndetësore verore që funksionojnë në të gjithë zonat turistike, me trajnimin e vazhdueshëm të ekipeve mjekësore dhe koordinimin e punës nga urgjenca kombëtare në territor. Nga 1 Qershori kanë marrë shërbim mjekësor rreth 20 mijë pushues”, u shpreh Ministrja Manastirliu.

Për zëvendës ministren e Financave, turizmi është një nga sektorët prioritarë dhe strategjik që ndikon drejtpërdrejt në zhvillimin ekonomik të vendit.

“Paketa fiskale që ne kemi sot për një kategori të madhe biznesesh deri në 5 milion lekë është me taskë 0, gjithashtu në ndryshimet e fundit të paketës fiskale, të gjithë subjektet në qarkullim nga 5-4 milionë lekë kanë reduktim me 5% të tatimit nga 15%, që ka qenë më parë. Shumë incentiva janë bërë edhe në fushën e akomodimit dhe shërbimeve në funksion të agrobiznesit, duke nxitur edhe agroturizmin. Por, të gjitha këto lehtësi, duhen shoqëruar edhe me masa ndëshkuese për subjektet që shkelin ligjin dhe ministria e Financës është padyshim pjesë integrale e Task Forcave për mbarëvajtjen e sezonit turistik dhe strukturat e saj kanë nisur kontrollet në terren për të identifikuar subjektet turistike, që veprojnë në shkelje të ligjit, duke cenuar mbarëvajtjen e sezonit turistik”, tha Ikonomi./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono