biznese

amazon_smbhav-1280x820.jpg
So Nila17:07 | 15/01/2020

Amazon pritet që të investojë në Indi, si qëllim rritjen e tregut. Shefi i kompanisë Amazon, Jeff Bezos është shprehur se kombania do të bëjë një investim prej 1 miliard dollarë në digjitalizim të bizneseve të vogla dhe të mëdha, duke u lejuar atyre që të shesin online.

Ndër të tjera në shefi i Amazon ka thënë se shekulli 21, do të jetë “shekulli indian”. Ndërkohë vizita e tij në Indi pritet që të shoqërohet me protesta të shumta.

Mijëra kompani të vogla tregtare nga 300 qytete kanë planifikuar mbajtjen e protestave, për shkak të asaj që e konsiderojnë ndikim negativ të kompanisë Amazon në prodhuesit e tregut lokal.

Ata pretendojnë se Amazon do t’i largojë nga tregu, duke ofruar produkte më të lira, dhe duke ofruar shërbime tjera në platformat që ka.

Tregu online në Indi është i dominuar nga kompanitë Amazon dhe Flipkart. /abcnews.al

b7aa7780-da62-4c4a-a658-2ad32e12e972.jpg
in a21:45 | 18/12/2019

Qeveria nuk ka ende një numër përfundimtar të objekteve të dëmtuara nga tërmeti i 26 nëntorit, por ka përcaktuar përmes një akti normativ rrugën që do të ndjekë për rimëkëmbjen e zonave të prekura nga termeti.  6 do të jenë kategoritë që sipas qeverisë do të përfitojnë nga projekti i rindërtimit, që tashmë do të drejtohet nga ministri i ri i shtetit, Arben Ahmetaj.

Subjekte përfituese janë individët dhe familjet, që kanë humbur një ose më shumë anëtarë të familjes ose kanë pësuar dëme në banesat e tyre dhe kanë mbetur të pastrehë si pasojë e fatkeqësisë natyrore.

Institucionet publike që kanë pësuar dëme në ndërtesat apo infrastrukturën publike në pronësi.

Tregtarët ose shoqëritë tregtare, të cilave si pasojë e fatkeqësisë natyrore u është dëmtuar selia e tyre ose çdo vend i ushtrimit të aktivitetit tregtar.

Qeveria ka vendosur vijën e kuqe edhe për disa kategori që nuk do të përfitojnë nga fondi i rindërtimit.

Nuk është subjekt përfitues individi ose familja që ka në pronësi ose posedim të ligjshëm, më shumë se një banesë, në njësinë ku është shpallur gjendja e fatkeqësisë natyrore.

Në rast se të gjitha banesat në pronësi janë dëmtuar nga fatkeqësia natyrore, individi ose familja përfiton vetëm për banesën që në datën e fatkeqësisë natyrore përdorej si  vendbanim.

Nuk janë përfituese subjektet tregtare në fushën e ndërtimit për ndërtesat ose njësitë brenda një ndërtese në pronësi të tyre, që janë dëmtuar nga fatkeqësia natyrore, kur dëmi ka ardhur si rrjedhojë e gabimeve në projektimin apo ndërtimin.

Por si do të veprojnë qytetarët që morën vulën nga ekspertët se shtëpitë janë të pabanueshme?

Në pikën 10 të nenit të 21 të aktit normativ, qeveria i jep mundësi qytetarëve të banesave të shembura të ndërtojnë vetë ndërtesa në të njëjtin truall, përmes kontraktimit të një zhvilluesi privat, ndërkohë që financimi do të bëhet nga program i rindërtimit. Nëse brenda një periudhe 3 mujore qytetari nuk ka mundur të gjejë një ndërtues për të ngritur objektin e shembur, zhvillimi i pronës do të bëhet nga autoriteti shtetëror ose donatorët, raporton abcnews.al

Akti normativ i qeverisë përcakton edhe procedurën që do të ndiqet me banorët e pallateve që janë shpallur të pabanueshëm nga ekspertët. Përmes financimit nga fondi i rindërtimit apo nga investimet e donatorëve, do të nisë ndërtimi ose rikonstruksioni i ndërtesave të dëmtuara nga fatkeqësia natyrore, në truallin ekzistues ku ato kanë ekzistuar deri në 26 nëntor 2019.

Qeveria përcakton që banesat e reja që do të ndërtohen dhe që do t’i kalojnë përfituesve nuk duhet të jetë më e madhe se banesa  që qytetari kishte në pronësi në objektin e shembur. Por krahas kësaj, qeveria në nenin 24 të i jep të drejtë Entit Kombëtar të Banesave të nis blerjen e banesave nga ndërtuesit në pallate ekzistuese të cilat sot janë të boshatisura.

Qeveria i ka vendosur si kusht Enti Kombëtar të Banesave që vlera e banesës në treg të jetë më e ulët ose e barabartë me koston e ndërtimit. Por në kushtet kur kërkesa e qytetarëve për banesa është i lartë aq sa qeveria nuk ka mundësi të plotësojë kërkesat e tyre atëherë Enti i Banesave mund të negociojë me ndërtuesit edhe për banesa me një çmim më të lartë se vlera e ndërtimit./abcnews.al

anila-denaj.jpg
ad min13:30 | 25/09/2019

Dëmet që kanë pësuar bizneset në Durrës nga tërmeti i 21 Shtatorit do të përballohen nga buxheti i shtetit. Konfirmimin në emër të qeverisë e bëri ministrja e Financave dhe Ekonomisë. Anila Denaj gjatë inspektimeve në disa prej këtyre bizneseve në qytetin bregdetar.

Ngado që hedh sytë sheh pasojat që la pas tërmeti edhe në këtë biznes në Durrës. Tashmë është koha të bëhet vlerësimi i dëmeve që të nisë menjëherë më pas lëvrimi i fondeve nga buxheti i shtetit. Garancinë për t’i rimbursuar ua dha ministrja e Financave dhe Ekonomisë, Anila Denaj.

“Buxheti i shtetit disponon fondet për ta mbështetur të gjithë pjesën e konstatimit të dëmeve, me rimbursim. Ky vlerësim dëmesh duhet të ndodhë këto javë dhe ne pastaj të kemi mundësi që menjëherë të hapim fondin, i cili është i plotë, por do të ketë edhe fonde shtesë. Unë jap garanci që i gjithë ky proces do të mbulohet 100%”.

Gjatë bashkëbisedimit me biznese të zonës, Ministrja Denaj kërkoi mirëkuptimin e tyre për procedurat që do të ndiqen dhe theksoi nevojën për një mirëkoordinim mes strukturave shtetërore, në mënyrë që vlerësimi i dëmeve të bëhet sa më shpejt dhe më pas të vijohet me pjesën e fondeve për rimbursimin e tyre.

“Ne sigurojmë  që fondi i emergjencës ekziston dhe në pamundësi për të qenë i plotë, ne siç e thashë më parë, kemi akoruar disa fonde shtesë për tu vendosur në ndihmë, nga fondi rezervë, për të kaluar te fondi i emergjencës. Në kontekstin e fondeve jemi të qetë. Ajo që ne duhet të koordinojmë është në raport me procedurat për rimbursim sepse edhe nga ana proceduriale është e vështirë që ne të angazhohemi përpara se ekspertët të flasin për vlerën e demit për çdo familje”.

Ministrja Denaj u bëri thirrje të gjithë bizneseve për t’u solidarizuar me familjet dhe bizneset e prekura nga tërmeti./ABC News Albania 24/7

aksioni-informaliteti-1280x851.jpg
ad min15:08 | 11/09/2019

Pas përfundimit të sezonit veror Drejtoria e Krimeve Ekonomike dhe  Financiare në Policinë e Shtetit publikon bilancet për aksionet kundër-informalitet. Në total u kontrolluan rreth 1760 subjekte dhe u arrestuan 39 administratorë e pronarë objektesh që u gjetën me shkelje.

Rreth 1760  subjekte u kontrolluan në kuadër të aksionit anti-informalitet. Drejtori për Krimet Ekonomike e Financiare në Policinë e Shtetit, Lutfi Minxhozi, ka bërë të ditur bilancin e aksionit të gjerë kundër informalitetit që u shtri gjatë verës në disa prej sektorëve kyçë.

Hetimit nuk i kanë shpëtuar punonjës të administratës vendore dhe qëndrore.

“Gjithashtu janë proceduar penalisht 64 zyrtarë të administratës për veprën penale të “Shpërdorimit të detyrës”, nga të cilët, 42 nëpunës të bashkive, 9 nëpunës të sistemit fiskal, 8 nëpunës të Drejtorive Rajonale të ndryshme, 5 nëpunës të IMT-së. Ndër zyrtarë të administratës janë arrestuar 5 vetë dhe 1 është shpallur në kërkim”.

Aksioni anti-informalitet sipas Minxhozit, pati një impakt edhe te pushuesit që zgjodhën bregdetin Shqiptar. Sipas tij u liruan afërsisht 40 mijë m2 hapësirë publike që ishin zaptuar në mënyrë të jashtëligjshme.

“Në kuadër të goditjes së aktivitetit të paligjshëm të subjekteve që ushtronin aktivitet biznesi të shërbimit pa leje dhe lirimin hapësirave publike të zëna në kundërshtim me ligjin në zona bregdetare, në shkallë vendi:Janë liruar 55 hapësira publike me sipërfaqe totale rreth 40 mijë m²; -62 subjekte janë proceduar penalisht; -mbi 6,700 shezllone dhe 3,200 çadra janë sekuestruar”.

Në fund Minxhozi theksoi se, fokusi i departatmentet që ai drejton do të jenë mbi subjektet e mëdha konkretisht tek hidrokarburet, në fushën e ndërtimit dhe tregtia e mallrave të akcizës./ABC News Albania 24/7

PAMPURI.jpg
ad min13:34 | 01/08/2019

Partia Demokratike akuzon qeverinë se pas zaptimit të pronave publike ka nisur shtetëzimin e pronave private. Ish-deputetët e PD, Oriola Pampuri dhe Klevis Balliu mbështetën protestën e 4 bizneseve në rrugën e Kavajës, të cilët  pretendojnë se janë larguar me forcë nga pronat e tyre, pavarësisht se janë në vijim të një procesi gjyqësor.

Pronarët u shprehën se kanë marrë shpërblime qesharake nga qeveria, ndërkohë që vlera e tregut për metra katron në zonë shkon deri në 5500 euro, duke hedhur dyshime se mbi pronat e tyre do të ndërtohet një pallat.

Ish-deputetja e PD, Oriola Pampuri deklaroi se pronarët e ligjshëm po dhunohen nga qeveria. Sipas Pampurit, vendimi për të nxjerrë pronarët nga bizneset e tyre pa pasur një vendim gjyqësor të formës së prerë është i paprecedentë dhe i ngjashëm me shtetëzimet  e pronës në regjimet komuniste./ABC News Albania 24/7

vjedhjet-e-banesave-1280x715.jpg
nev ila15:32 | 09/06/2019

Në muajin maj, mesatarisht çdo 24 orë u raportua në Drejtorinë e Policisë së Tiranës 7 vjedhje objektesh, nga të cilat 5 ishin banesa dhe dy biznese. Qytetarët që lenë banesat vetëm u kujtohet të mos publikojnë vendndodhjen nëpërmjet rrjeteve sociale, por këto njoftime nuk merren parasysh nga një pjesë e mirë e tyre.

Në verë shtohen ditët e pushimeve për shumë njerëz, ndërsa për hajdutët e banesave shtohet puna.

Vazhdimisht ata sofistikojnë mënyrat e vjedhjes së apartamenteve dhe dyqaneve, duke krijuar mënyrë dhe metoda të reja. Policia apelon qytetarët për kujdes të shtuar, pasi gjatë muajit maj në Tirane janë denoncuar në polici mesatarisht 7 vjedhje objektesh, 5 nga të cilat ishin apartamente banimi. Nuk i kanë shpëtuar grabitjes as bizneset, ku çdo ditë sipas uniformave blu janë grabitur rreth 2 të tilla.

Sipas Specialistëve të Krimeve Kundër Pronës, zbulimi i grupeve kriminale dhe dënimi i tyre në gjykatë ka qenë më i lartë krahasuar me të njëjtën periudhë të një viti më parë, por pavarësisht kësaj, numri i denoncimeve të grabitjeve nuk është ulur.

Qytetarët që lenë banesat vetëm u kujtohet të mos publikojnë vendndodhjen nëpërmjet rrjeteve sociale, por këto njoftime nuk marren parasysh nga një pjesë e mirë e pushuesve.

Ndërkohë, fenomeni  i vjedhjeve është një shqetësim edhe  në zonat bregdetare. Ekspertët pohojnë se, një pjesë e mirë e vjedhjeve kryhen nga grupet kriminale që më herët kanë operuar në Tiranë, të cilat gjatë verës zhvendosen në banesat e qytetarëve në bregdet, si Durrës, Golem, Vlorë, Sarandë dhe Shëngjin. Në 7 zonat më të mëdha bregdetare, vitin e kaluar u regjistruan çdo ditë 20 grabitje./ABC News Albania 24/7

biznese.jpg
ad min13:48 | 28/04/2019

Këtë fundjavë kryeministri Edi Rama ka vizituar dy biznese vendase në Elbasan. Shqetësimi kryesor që i kanë shprehur sipërmarrësit është mungesa e profesionistëve.

Bashkëpunimi me Shërbimin Kombëtar të Punësimit u jep punonjës të aftë bizneseve, por nuk mjafton. Ky është një shqetësim i përsëritur nga shumica e tyre e këtë i thotë kryeministrit një prej përfaqësuesve të një kompanie me profil industrial në Elbasan.

“E gjitha historia në këtë ndërmarrje është që, duhet rritur shkolla profesionale,” u shpreh një përfaqësuese e kompanisë.

“Te kapanoni i ri duam të bëjmë edhe klasa, sepse këtu po sjellin tani për praktikë, edhe universitetet, edhe shkollat e mesme dhe i kemi bërë pa asnjë kosto, vetëm t’i sjellin të mësojnë. Rroga mesatare këtu shkon te 80 mijë lekë të reja,” shton një përfaqësues tjetër.

Fabrika e prodhimit të konstruksioneve metalike në Elbasan,prodhon kryesisht për tregun e huaj duke eksportuar në Amerikë, Nikaragua, Gjermani, Francë e Spanjë.

Kryeministri vizitoi edhe fabrikën e re për prodhimin e lëndës së parë për bateritë e makinave, në Bradashesh, Elbasan, investimi më i ri në këtë zonë me vlerë mbi 20 milionë dollarë ku parashikohen të punësohen 200 punëtorë./abcnews.al

grabitja-rinas-servisi-elbasan.mp4_snapshot_00.27-1280x720.jpg
ent ela15:38 | 22/04/2019

Policia e Shtetit njoftoi zyrtarisht ka vënë në pranga katër persona si autorë të dyshuar në grabitjen e 9 prill në aeroportin e Rinasit. Abc News ishte në vendin ku dyshohet se u logua forgoni i grabitjes, ndërsa për të rënë në gjurmët e autorëve që ndihmuan Admir Murataj të përgatiste planin e tij, u sekuestruan rreth 70 kamera të bizneseve Tiranë Elbasan.

Këto janë pamjet nga brenda servisit që ndodhet 6 km larg qytetit të Elbasanit, i cili ishte në administrim të vëllait të Klement Çalës.

Eldi Çala, u shpall në kërkim policor, ndërsa në pranga përfunduan, Saimir Çela i dyshuari kryesor që ka logouar automjetin e modifikuar, i cili u përdor nga Admir Murataj për grabitjen e Rinasit.  Për ti shpëtuar patrullës së policisë që ndodhet në hyrje të qytetit të Elbasanit, autorët kanë zgjedhur një rrugë alternative.

Bashkë me Saimir Çelën, në pranga përfunduan edhe Alkond Bengasi, Renaldo Sula dhe Oltion Veseli.

Ky i fundit u prangos në Fushë Krujë dhe dyshohet të ketë ndihmuar grabitësit, në djegien e njërit prej dy mjeteve të përdorur ne krim.

Ndërkohë, oficerët e policisë gjyqësorë kanë marrë në pyetje edhe pronarin e servisit Gentian Sharra, i cili ka pohuar se servisin e kishte në administrim Eldi Çalës, prej shumë kohësh dhe nuk ishte në dijeni të asaj se çfarë ndodhte brenda servisit. Në kërkim vijon të jetë Klement Çala i cili dyshohet se bashku me Admir Murataj që mbeti I vrarë gjatë shkëmbimit të zjarrit me policinë të jenë ideatorët e super-grabitjes së disa miliona eurove në Rinas.

Për të rënë në gjurmët e autorëve, u sekuestruan rreth 70 kamera të bizneseve nga rreth rrotullimi i Bradasheshit deri në Rinas. Policia njoftoi zyrtarisht pas më shumë se 13 ditësh kur ndodhi grabitja e 9 prillit në aeroportin  e Rinasit, duke bërë të ditur se për të rënë në gjurmët e autorëve të dyshuar u përdorën metoda speciale të hetimit, si  përgjimi ambiental për tre personat me origjinë nga Elbasani e po kështu edhe këqyrja me orëve të tëra të pamjeve të kamerave të sigurisë.

Ndërkohë, u angazhuan tre drejtori Vendore,  të Policisë Tiranë, Elbasan dhe Durrës. Nga kontrollet janë gjetur prova materiale të shumta të cilat do të shërbejnë për thellimin e hetimeve dhe zbardhjen e plotë të ngjarjes. Numri i personave të ndaluar deri tani që po verifikohen është 20 të ndërsa për katër prej tyre, prokuroria e Krimeve të rënda ka kërkon masën e sigurisë atë të arrestit me burg.

Gazetar: Andi Qosja

skynews-donald-trump-us-president_4407328-933x445.jpg
ad min20:47 | 14/04/2019

Demokratët në Kongresin amerikan kanë kërkuar nga institucionet vendase që të bëjnë transparencë nëse bizneset personale të presidentit Donald Trump kanë shlyer taksat. Bëhet fjalë për një betejë të re politike që ka gjasa t’i shkaktojë dhimbje koke shefit të Shtëpisë së Bardhë.

Demokratët në Kongresin amerikan i kanë shpallur një sfidë Shërbimit të Brendshëm të të Ardhurave, duke i kërkuar të publikojë brenda datës 23 Prill dokumentet për shlyerjen e taksave nga bizneset personale të presidentit Donald Trump.

Përmes një letre, ligjvënësit paralajmëruan institucionin që kujdeset për mbledhjen e taksave se dështimi në implementimin e kërkesës së tyre, që përfshin një periudhë 6-vjeçare, do të interpretohet si një refuzim.

Më herët, administrata amerikane tejkaloi një afat të vendosur më 10 prill nga demokratët, të cilët e kanë bazuar kërkesën e tyre tek kompetencat e komisionit të posaçëm parlamentar që mbikëqyrur aktivitetin e IRS-së.

Por sekretari për thesarin Stiven Mnushin ka deklaruar se demokratët po vendosin data arbitrare dhe ka theksuar se në këto rrethana është më e rëndësishme që Shërbimi i Brendshëm i të Ardhurave të mos kthehet në një armë politike.

Mnushin ka thënë se është i prirur të zbatojë ligjin, por nuk ka saktësuar nëse departamenti i tij, që mbikëqyr IRS-në, do të plotësojë kërkesën e demokratëve brenda 23 Prillit.

Sekretari i Thesarit deklaroi më herët gjatë javës se kërkesa e demokratëve ngre shqetësime mbi qëllimet e tyre dhe sa i takon mbrojtjes së privatësisë së taksapaguesve./abcnews.al

bizneset-gjermane-1280x714.jpg
ad min14:33 | 09/04/2019

Situata ekonomike në Shqipëri në këndvështrimin e më shumë se gjysmës së bizneseve gjermane që operojnë në vendin tonë është e keqe.

Dhomat  Gjermane të Tregtisë në Evropën Qendrore dhe Lindore kanë publikuar anketën  e këtij viti për klimën e biznesit dhe investimeve.

Rezultatet e saj u prezantuan në prani të Ambasadores së Gjermanisë në Tiranë Sussane Schutz e cila bëri dhe një krahasim me vitin që lam pas.

Pesimistë shprehen sipërmarrësit gjerman dhe sa i përket asaj që presin të ndodhë me ekonominë në vendin tonë.

45% e tyre mendojnë se nuk do të ndryshojë ndërsa 43% thonë se do të bëhet më keq.  Tregues ky i fundit që ka pësuar rritje të ndjeshme krahasuar me vitin që lam pas kur vetëm 17%  e bizneseve kishin këtë perceptim.

Por çfare i shqetëson më tepër bizneset gjermane në Shqipëri?

Sa i përket kostove të punës, produktivitetit,  motivimit, kualifikimit të punonjësve, arsimimimit akademik, disponueshmërisë e fuqisë punëtore të kualifikuar sipërmarrësit gjermane ndajnë mendim pozitiv.  Megjithatë pyetjes se, sa e ka prekur emigracioni forcën e punës së kualifikuar në Shqipëri, 51% e tyre i janë përgjigjur “shumë”./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono