Beteja

bashkia-shkoder-1280x713.jpg
G. P.15:27 | 18/08/2019

Bashkia e Shkodrës është institucioni i fundit i qeverisjes vendore që nuk është konstituuar pas zgjedhjeve të 30 Qershorit. Prefekti i qarkut ka thirrur paraditen e të hënës mbledhjen e Këshillit të ri Bashkiak, por dorëheqja e Valdrin Pjetrit do të lërë sërish në detyrë kryebashkiaken aktuale. Burime pranë Partisë Socialiste konfirmojnë se gjatë mbledhjes së Këshillit Bashkiak do të konstatohet vetëm vakanca e kryetarit dhe nuk do të zgjidhet një nënkryetar. Ndërkohë që socialistët pritet që të imponojnë vendimmarrjen në Këshillin Bashkiak me 51 këshilltarë të fituar në zgjedhje së bashku me aleatët.

Voltana Ademi edhe të hënën si çdo mëngjes do të jetë në zyrën e saj në Bashkinë e Shkodrës. Drejtuesja e vetme vendore që nuk ka lënë detyrën e saj pas zgjedhjeve të 30 Qershorit, pavarësisht se nuk mori pjesë në zgjedhje, pas dorëheqjes së Valdrin Pjetrit nuk ka një kryetar që ta zëvendësojë.

Disa metra larg godinës së Bashkisë,  Prefekti i Qarkut të Shkodrës Çesk Millja ka thirrur mbledhjen për konstituimin e Këshillit Bashkiak dhe zgjedhjen e organeve drejtuese; zgjedhjen e përfaqësuesve të Këshillit të Bashkisë në Këshillin e Qarkut Shkodër dhe shpallja e vlefshmërisë së mandatit të kryetarit të bashkisë Shkodër.

Burime të sigurta pranë Partisë Socialiste, konfirmojnë për ABC News se këshilli i ri, do të vendosë për dy nga tre pikat e rendit të ditës,  por nuk do të zgjedhin një zëvendësues për Voltana Ademin.

Të njëjtat burime, konfirmojnë se Këshilli Bashkiak nuk mund të zgjedhë një kryetar të ri, pasi nuk ka fuqi ligjore as të konstatojë përfundimin e mandatit të Ademit e as vakancën për kreun e ri të institucionit. Këtë situatë juridike, ligji nuk e ka parashikuar, e për pasojë, Voltana Ademi do mbetet në detyrë.

Por mbarëvajtja e drejtimit të saj të bashkisë do varet nga marrëdhënia që do ndërtojë me këshillin e ri bashkiak 51 anëtarësh, me socialistë e aleatë të tyre. Kjo mazhorancë absolute, pritet të imponojë çdo vendimmarrje në Bashkinë e re të Shkodrës.

Nga ana e tyre demokratët nuk do të rrinë duarkryq. Pas paralajmërimeve për të mos u thelluar në paligjshmëri, PD do të zhvillojnë një protestë jashtë ambienteve të rektoratit.

Nga kontaktet e ABC News me të dy palët, nuk pritet të ketë tension mes përfaqësuesve të kampeve të ndryshme politike, pasi të qenit banorë të të njëjtit qytet, imponon respektin reciprok. Ndërkohë që Ademi është e gatshme të qëndrojë në detyrë derisa në zyrën e saj të paraqitet një kryetar i për të marrë detyrën./ABC News Albania 24/7

bashkia-shkoder-1280x713.jpg
nev ila15:22 | 12/08/2019

Shkodra do të jetë bastioni i fundit i demokratëve në pushtetin vendor që do të bjerë. Javën e ardhshme Voldana Ademi pritet t’i lëshojë zyrën të zgjedhurit të ri socialist, Valdrin Pjetri, ndonëse selia blu ka vendosur të mos e ndalë betejën ligjore dhe politike ndaj tij.

Bashkia e Shkodrës me gjasë do të jetë godina e fundit e pushtetit vendor që Partia do ti dorëzojë Partisë socialiste, për të nisur drejtimin absolut në 61 njësi vendore në të gjithë vendin.

Pa një vendim final, 21 gushti paralajmërohet se do të jetë data e ndërrimit të pushteteve në kryeqendrën e veriut. Por deri të mërkurën e ardhshme PD paralajmëron zhvillime të forta.

Lulzim Basha i bëri thirrje sot Prokurorisë së Përgjithshme të marrë të pandehur kandidatin e PS në Shkodër në zgjedhjet e 30 qershorit, duke e akuzuar për fshehje të formularit të dekriminalizimit.

“Valdrin Pjetri duhet të merret urgjentisht i pandehur sepse ka shkelur Ligjin e Dekriminalizimit duke fshehur të dhënat mbi të kaluarën e tij si trafikant droge. Por Edi Rama i ka dhënë urdhër prokurorisë së korruptuar që ta mbrojë nga ligji i dekriminalizimit. Por sa kohë Edi Rama është në zyrën e kryeministrit, nuk do ketë as drejtësi dhe as demokraci, banditët, kriminelët dhe hajdutët do të sundojnë Shqipërinë”, shkruan Basha.

Rezistencën për të mos lëshuar bashkinë simbol të qeverisur gjithmonë nga të djathtët, demokratët e paraqitën edhe përmes fotove që shpërndanë në qytet. Në  një fotomontazh, Pjetri prezantohet me logon e kanabisit gjatë momentit të votimit.

Por duket se përballë akuzave të demokratëve, kandidati fitues i PS është shfaqur i qetë. Valdrin Pjetri ka publikuar në rrjetet sociale çertifikatat e pastërtisë së figurës të lëshuara nga shtetit Italian.

Kandidati socialist ka garantuar se ditë më të mira do të vijnë për Shkodrën nën drejtimin e bashkisë prej tij.

Ndërkombëtarët kanë qenë shpresa e fundit për demokratët për të ndalur rotacionin e fundit në bashkinë simbol të së djathtës. Kryebashkiakja në detyrë, Voltana Ademi disa ditë më parë për 120 minuta denoncoi te ambasadori i OSBE-së, Borchard çdo parregullsi në procesin zgjedhor dhe pastërtinë e figurës së kandidatit që kërkon të marrë drejtimin e Bashkisë./ABC News Albania 24/7

MARKAT-RMV-VS-GREQI_ABC-M2-T1.mpg_snapshot_01.09-1280x720.jpg
ent ela15:30 | 27/07/2019

Nuk dihet nëse në Maqedoninë e Veriut ata që duhet të jenë më të shqetësuar nga deklaratat e kryeministrit grek Micotaqis, janë politikanët apo biznesmetë. Kreu i ekzekutivit grek theksoi se në betejën për mbrojtjen e markës tregtare “Maqedonia” do të shfrytëzojë të gjitha mjetet që Greqia të përfitojë sa më shumë. Ekspertët në Maqedoninë e Veriut bëjnë apel për kujdes.

Në tre vitet e ardhshme, derisa zgjasin bisedimet e Komisionit për markat tregtare, dispozitë e dalur nga Marrëveshja e Prespës, gjendja rreth shenjave tregtare dhe shënimin e prejardhjes së produkteve në Greqi dhe në Maqedoninë e Veriut nuk do të ndryshojë. Pas arritjes së pajtueshmërisë do të dihet nëse fryma e Marrëveshjes së Prespës, në plan politik, do të pasqyrohet edhe në fushën e biznesit.

Marin Gavrillovski, Ekspert për Pronë Industriale: “Derisa zgjasin bisedimet nuk ka asnjë lloj restriksioni, asnjë kufizim në lidhje me atë sa kompani maqedonase dhe sa persona fizikë do të mund ta përdorin termin “Maqedoni” ose termet tjera që dalin prej tij, dhe të njejtat t’i mbrojnë si marka tregëtare”.

Por, duke pasur parasysh faktin që për qeverinë greke kjo çështje është e pozicionuar lart në agjendën politike, ndërsa kryeministri Kirjakos Micotakis këtyre ditëve në Kuvend theksoi se edhe procesin e hyrjes së Maqedonisë së Veriut do t’a shfrytëzojë si mjet për përfitim të palës greke dhe për mbrojtje të brendit “Maqedonia”, Gavrillovski pajtohet se janë vështirësuar pozitat negociuse të kolegëve të tij në Komision.

Marin Gavrillovski, Ekspert për Pronë Industriale: “Po, duket se erëra pak më rigjide fryjnë nga jugu. Qeveria e re greke theksoi se pikërisht çështjet e hapura të marrëveshjes, për të cilat do bisedohet në një farë mënyre do të jenë mjet i tyre, nëse jo për frenim, atëherë për ngadalësim të rrugës së vendit tonë drejt BE-së dhe për negociatat që presim të fillojnë. Mendoj se do të ketë ndryshim të vogël në raportin e qeverisë së re greke, për dallim nga ajo që ishte me qeverinë e Cipras, e cila kishte raport më real”.

Gavrillovski vlerëson se kjo çështje për autoritetet greke është më shumë politike sesa tregëtare.

Marin Gavrillovski, Ekspert për Pronë Industriale: “Kjo është më shumë çështje politike, në qoftë se merret parasysh se numri i markave tregëtare të cilat e përdorin termin “Makedonija”, “Macedonia”, “mkd”, ose “mk”, është i parëndësishëm, më pak se 200 marka tregëtare, më saktë Greqia ka  më shumë se 1000. Këtu shihet se në fakt nuk bëhet fjalë për çështje tregtare, nga fusha e pronës industriale, por ajo ngadalë do të shëndrrohet në çështje politike”.

Duke pasur parasysh përparësinë politike të Greqisë, si anëtare e BE-së me të drejtë vote dhe vetoje, Gavrillovski kolegëve të tij në Komisionin për bisedime për prejardhjen e produkteve u apelon:

Marin Gavrillovski, Ekspert për Pronë Industriale: “Ruhuni nga Grekët edhe kur ju sjellin dhurata!” . ABC News Albania 24/7

 

 

mustafa-nano-2.jpg
G. P.22:27 | 28/06/2019

Mustafa Nano mendon se opozita ka bërë disa gabime gjatë betejës së saj që prej djegies së mandateve dhe bojkotimit të zgjedhjeve. Ai listoi gjatë monologut të sotëm në emisionin “Provokacija” katër prej tyre dhe që sipas tij kanë qenë gabime fatale.

Sipas gazetarit, zgjedhjet do të mbahen më 30 Qershor dhe kjo nuk ka asnjë pikë dyshimi. Shkak u bë deklarata e Palmer që njihte datën e zgjedhjeve sipas tij dhe në këtë mënyrë edhe opozita do të qëndrojë urtë, ndryshe siç e imagjinonin demokratët se do të vepronte.

Nano u shpreh se gabimi i parë i opozitës ishte që beteja e saj u zhvillua nën moton “o hiç, o gjithçka”.

“Gabimi i parë: Ajo nuk e kuptoi dot që beteja që po bënte ishte një betejë e destinuar të humbte qysh në krye të herës. Madje jo e destinuar që të humbte, por edhe një betejë që do duhej të humbej prej opozitës. Këtë e them sepse nëse do ndodhte e kundërta, nëse beteja e opozitës do të ishte e suksesshme dhe këtë leksion që do nxirrej, mesazhi që do përcillej do ishte ky: ‘hej miq nuk është e vërtetë lodra demokratike që ne dimë, alternimi i pushteteve nëpërmjet votës. Jo ka një mënyrë më të thjeshtë për të ardhur në pushtet. Ik nga parlamenti, digj mandatet, bojkoto zgjedhjet, prishu me perëndimin, kërcënoju shoqërisë me luftë civile dhe bacë u kry’. Ky ka qenë një gabim fatal i PD-së. Beteja ka pasur si maste të veten moton ‘O hiç o gjithçka’ dhe opozita mori hiç, gjithçkanë e mori mazhoranca dhe kjo është e frikshme. Mendoj se ky është faji i opozitës. Nëse ne do kemi në vijim një Edi Ramë të fortë, një mazhorancë të fortë, një mazhorancë të frikshme është faji i opozitës sepse bëri këtë betejë”, tha Nano.

Gabimi i dytë i opozitës për Nanon është fakti që ju kërcënua vendit me luftë civile.

“Gabimi tjetër që bëri opozita është se ju kanos vendit me luftë civile ose të paktën krijoi këtë përshtypje. Edhe nëse nuk e ka pasur si qëllim pasoja e kësaj beteje kjo ishte, tek njerëzit mesazhi që shkoi ky ishte. Ndërsa ajo që opozita kishte protesta të organizuara orë përpara ndoshta dhe ditë përpara njerëzit pyesnin ‘çfarë do ndodhi?’, ‘do ketë përplasje civile?’, ‘do ketë luftë civile?’, ‘do ketë gjak?’. Unë mendoj që kjo ka qenë një strategji fatalisht e gabuar. Vetëm një mendje idiotike mund ta ketë përpunuar këtë strategji duke menduar që është një strategji gjeniale. Këtu nuk ka asnjë strategji gjeniale. Të bësh një betejë me synimin për të terrorizuar shoqërinë nuk ka asnjë gjë gjeniale, është thjeshtë një strategji budallaqe”, u shpreh Nano.

Gabimi i tretë është mënyra se si opozita u përpoq ta sillte protestën.

“Një gabim tjetër që bëri opozita është se betejën që bëri e solli si betejën mes djallit dhe engjëllit. Nuk ka qenë një betejë midis djallit dhe engjëllit. Ka qenë një betejë midis dy djajve. Njerëzit që kanë dalë në opozitë një pjesë e tyre nuk kanë qenë të merakosur për zgjedhje të lira. Njerëzit që kanë dalë nëpër protesta dhe nëpër sheshe për mua kanë qenë njerëz të lodhur në opozitë, kanë qenë horra që nuk kanë duruar dot që ca horra të tjerë si ata kanë pushtet. Kështu që nuk ka qenë një betejë midis engjëjsh dhe djajsh dhe përpjekja për ta sjellë të tillë nuk ka ngjizur, nuk mund të ngjiste. Edhe më budallai në Shqipëri e ka ditur që kjo nuk mund të ishte një betejë me njerëz që kanë ideale dhe njerëz që në anën tjetër nuk kanë asnjë ideal”, tha Nano.

Ndërsa gabimi i fundit i opozitës sipas Nanos është konflikti i panevojshëm që krijoi me partnerët ndërkombëtarë.

“Gabimi i fundit ka të bëjë me marrëdhënien që PD ka vendosur me partnerët tanë ndërkombëtarë. PD përcolli mesazhin që unë këtë betejë do ta fitoj ndonëse partnerët ndërkombëtarë nuk janë me mua, do ta fitoj për inat të partnerëve ndërkombëtarë. Kjo ka qenë gjithashtu një betejë budallaqe dhe u mor vesh në fund, kur mjaftoi vetëm një telefonatë e bërë nga Matthew Palmer, nga njeriu i Washington-it dhe opozita në datë 30 Qershor do të rrijë urtë. Kjo tregon se sa budallaqe ka qenë e gjithë ajo betejë për të krijuar këtë lloj konflikti të panevojshëm me partnerët ndërkombëtarë”, përfundoi ai.

20190619160037.jpg
ent ela22:15 | 19/06/2019

Nikolas Sarkozi ka humbur betejën për t’i shpëtuar organeve të drejtësisë. Një gjykatë në Francë ka vendosur që ish-presidenti të gjykohet për akuzat e korrupsionit dhe abuzimit me anë të detyrës.

Ish-presidenti francez Nikolas Sarkozi ka humbur në përpjekjen finale për t’i shpëtuar procedimit për akuzat e korrupsionit dhe abuzimit me anë të pushtetit. Konkretisht, Sarkozi akuzohet se është përpjekur të korruptojë një prokuror, duke i ofruar një post prestigjoz në këmbim të informacioneve për një hetim penal që po zhvillohej ndaj partisë së tij.

Gjykata e Lartë e Francës hodhi poshtë apelin e ish-presidentit, duke vendosur se ai duhet të përballet me procesin gjyqësor që do të mbahet në muajt në vijim. Në gjyq do të dalin edhe prokurori të cilit ai u përpoq t’i jepte ryshfet, Gilbert Azibert dhe avokati i tij personal Thierri Herzog. Çështja është e fokusuar tek bisedimet e regjistruara mes prokurorit Azibert dhe zotit Herzog, me hetuesit që po shqyrtojnë deklaratat e tyre se Sarkozi pranoi pagesa të paligjshme nga trashëgimtarja e grupit “L’Oreal”, Lilien Betenkurt për fushatën e tij presidenciale të vitit 2007.

Hetimet gjithashtu kanë treguar se ish-kreu i shtetit dhe avokati i tij përdorën telefonë celularë dhe emra të rremë për të komunikuar mes tyre, me Sarkozy që mbante pseudonimin Pol Bismuth. Nga ana e tij Sarkozi i ka mohuar akuzat për krimet financiare. Vitin e kaluar ai mohoi që të kishte marrë financime për fushatën nga diktatori libian Muamar Gaddafi. Megjithatë, ai u ndalua dhe u mor në pyetje nga hetuesit. /ABC News Albania 24/7

BASHA-PROTESTA-25-MAJ.mpg_snapshot_00.24-1280x720.jpg
ent ela21:32 | 15/05/2019

Protesta e radhës kombëtare e opozitës do të mbahet të shtunën e 25 Majit në orën 19.00. Vendimi u mor pas konsultimeve të kësaj të mërkure në selinë blu, me aleatët e forumet më të larta të Partisë Demokratike. Basha tha se vendi është në kushtet e një grushti shteti e aksioni opozitar do vijojë pa kthim.

Protesta e ardhshme kombëtare e opozitës do mbahet pasditen e të shtunës së 25 Majit. Vendimi u mor pas një të mërkure intensive konsultimesh në selinë blu me aleatët, ish grupin parlamentar e kryesinë e PD. Aksionin opozitar Lulzim Basha e konsideron një betejë për jetë a vdekje

“Tani që na ndajnë 45 ditë nga 30 qershori, se çfarë do të ndodhë? Do të pranohet që grushtii shtetit të çohet deri në fund, dhe në Shqipëri tëinstalohet tirania e krimit në të gjitha nivelet? Sepse kjo jo vetëm do tëinstalonte tiraninë e krimit në pushtetin vendor, por do të çimentonte edhe tiraninë e krimit në qeverisjen qëndrore. Apo do të ketë një përballje totale popullore për ta mposhtur me të gjitha mjetet dhe format e tjera, tiraninë e krimit!

Vendimi unanim i opozitës është përballje popullore me të gjitha format dhe mënyrat. Pak rëndësi ka nëse bëhen në shtator apo në tetor. Rëndësi ka që sot ne ndodhemi në një betejë për jetë a vdekje”.

I pyetur për akuzat e përcjella përmes deputetes Gjylameti se ka porositur një artikull në gazetën gjermane Bild për të nxirë imazhin e vendit, Basha pati akuza edhe ndaj deputeteve socialiste

“Zonja Gjylameti do të ishte së bashku me zonjën Spiropali dhe zonja të tjera, ndër të pandehurit kryesorë, sepse vetë zonja Gjylameti është pjesë e dosjes 184, ndërkohë që zonja Spiropali duket se është pjesë e dosjes së hetimit të Xibrakës.

E gjithë Shqipëria dhe e gjithë bota ka kuptuar se fshihet makthii Edi Ramës, për atë që e pret në rast se zbardhen dosjet hetimore, të cilat provojnë, përmes përgjimeve të prokurorisë, përfshirjen e drejtpërdrejtë të Edi Ramës dhe një grushti politikanësh të kupolës së organizatës së “Rilindjes”, në bashkëpunim me krimin e organizuar, për të vjedhur zgjedhjet në Dibër, si provë gjenerale, për të kaluar pastaj në vjedhjen e zgjedhjeve të 2017-s”.

Qëndrimit se më 30 qershor nuk mund të ketë zgjedhje, Basha I shton si arsye listën e kandidatëve të PS dhe të Bindjes Demokratike që e ironizon me emrin Bashkimet Profesionale, e për herë të parë flet për probleme me listat e adresat e zgjedhësve.

“Në mbi gjysmën e bashkive të vendit do të ketë kandidatë vetëm kupola kriminale e “Rilindjes”, vrasës, përdhunues, trafikantë droge, shokët e Elvis Rroshit që mbeten akoma në Bashkinë e Krujës, si Artur Bushi me shokë, kandidatë të tjerë të zgjedhur me dorë nga banda e abdylajve në Shijak, nga Ymer Lala në Dibër, ku kemi një rekord, se Ymer Lala ka caktuar edhe kandidatin e PS-së, edhe kandidatin e Bashkimeve Profesionale të PS-së”.

Ende nuk ka një materializim të gatishmërisë ndërkombëtare për dialog, por për kërkesave të përsëritura që i përcjellin edhe në mënyrë nominale kundër dhunës, u jep këtë përgjigje.

“Ne kurrë nuk kemi bërë thirrje për dhunë dhe distancohemi nga çdo akt dhune, por mos prit që Lulzim Lulzim Basha të jetë komandantii baballarëve, që u ka vënë kryqin tek shtëpia Edi Rama, i vëllezërve, motrat 3-vjecare të të cilëve i ka helmuar me gaz Edi Rama apo i fëmijëve të prindërve që Edi Rama u theu kockat se donte t’u grabiste shtëpitë, që t’u vidhte 40 milionë euro shqiptarëve dhe të mos shpronësontë as banorët e ligjshëm. Këto janë vetëm 3 skandale. Komandant i zemërimit popullor nuk është Lulzim Lulzim Basha. Zemërimi popullor vetëm do të rritet. Detyra jonë është vetëm të parashtrojmë zgjidhjen politike dhe të thërrasim shqiptarët ta mbështesin këtë kauzë”.

Gjatë konsultimeve të paradites edhe aleatët u shprehën në një linjë me qëndrimin e Bashës. Ndërkohë, duket se bllokimi i akseve kryesore, i përdorur si strategji proteste nga opozita javët e fundit, nuk do të zbatohet këtë të enjte, për t’u përqëndruar në organizimin e protestës së 25 majit, e gjashta kombëtare në 3 muaj aksion opozitar. /ABC news Albania 24/7

 

 

basha-12-1280x762.jpg
Sej rie19:15 | 13/05/2019

Kreu i Partisë Demokratike, Lulzim Basha i është bashkuar protestuesve të opozitës të mbledhur përpara ndërtesës së Kryeministrisë. Ai menjëherë ka marrë fjalën para protestuese të cilët qëndroni poshtë çadrave, ndërsa vetë kryedemokrati ka folur në mes të shiut.

 “Kërkojmë një të drejtë të pakontestueshme të kushtetutës tonë, themelin e vlerave evropiane, votën e lirë dhe të ndershme. Shqipëria dhe kryeministri ilegjitim i dalë nga votat e blera me ndihmën e krimit të organizuar ju përgjigj thirrjes tonë me dhunë, provokime, rrahje, gaz lotsjellës e helmues. Qindra mijëra bashkëqytetarë të Tiranës e ndjenë përgjigjen, zgjidhjen e vetme që ka ofruar Rama për plagën që i ka hapur këtij vendi. Përgjigjja e vetme e Edi Ramës ndaj votës së lirë ishte dhuna.

Ky është një parlament ilegjitim, qeveri ilegjitime, kryeministër ilegjitim. Tash 2 vjet prokuroria ka vetëm një mision, të ndalë hetimin e dosjeve kriminale ku janë kapur Rama në bashkëpunim me kupolën e mafies, për të blerë më të shtrenjtën vlerë që ka çdo shqiptar, votën e lirë.

Edi Rama vjedh shqiptarët, u vjedh taksat, u vjedh pronat gjithçka, sepse nuk jep llogari askund përveç se tek krimi i organizuar. Dhunë ndaj sipërmarrjes, ndaj administratës, dhunë ndaj të papunëve, ndaj të rinjve dhe vogëlushëve, dhunë ndaj vogëlushëve të Unazës. Dhuna është e vetmja zgjidhje që ofron Edi Rama. Jemi sot në këtë marshim për të thënë qartë dhe prerë: E refuzojmë dhunën e qeverisë dhe i përgjigjemi me besimin tonë tek vlerat evropiane, me fuqinë e bashkimit dhe vendosmërisë. Nuk ka shqiptar që nuk e di se këtu kemi ardhur si rezultat i dhunës shtetërore, se dhuna shtetërore është produkt i dhunës zgjedhore. Sepse ajo është e vetmja mënyrë e Ramës për të marrë e për të mbajtur pushtetin.Ne nuk jemi këtu për karrige e për pushtet, por jemi kundër dhunës, kundër krimit e kundër qeverisë së paligjshme të krimit. Ejani me ne që ta çlirojmë Shqipërinë nga krimi dhe korrupsioni. Ne jemi në këtë betejë për kushtetutë, për ligj, për dinjitetin dhe lirinë e çdo shqiptari”, tha Basha./abcnews.al

59747305_2348609481865608_3690188557298696192_o-1280x960.jpg
ent ela13:53 | 09/05/2019

Kolegji zgjedhor ka hedhur poshtë padinë e Partisë “Bashkimi Demokrat Shqiptar” që ka kërkuar cregjistrimin e Partisë “Bindja Demokratike” me argumentin se është shkelur ligji me urdhër politik.

Nëpërmjet një statusi koordinatori i kësaj partie Astrit Patozi e ka cilësuar si fitoren e betejës së parë politike. Për Kolegjin Zgjedhor regjistrimi i Partisë Bindja Demokratike është në përputhje me ligjin duke lënë në fuqi vendimin e Komisionit Qendror të Zgjedhjeve. /ABC news Albania 24/7

blic-kosva-1280x684.jpg
ent ela13:06 | 05/04/2019

“Beteja për epërsinë në Europë që po zhvillohet mes Gjermanisë dhe Shteteve të Bashkuara të Amerikës do të vendoset në Kosovë”. Kështu shkruan e përditshmja serbe Blic.

Për Gjermaninë Kosova është një shtet i pavarur dhe nuk ka asnjë vend për diskutim e aq më pak rreth idesë për shkëmbim territoresh me Serbinë, vijon më tej shkrimi. Për më tepër deputetët gjermanë Peter Bejer dhe Kristian Shmidt i dhanë këtë mesazh të qartë dhe presidentit serb Aleksandër Vuçiç, pak ditë më parë në Beograd.

Një burim diplomatik tha për të përditshmen se është interesant fakti që Berlini ka një qëndrim të vendosur dhe nga ana tjetër shprehet se do të bëjë gjithçka që Prishtina të heqë dorë nga taksat ndaj produkteve serbe. Kjo pasi dialogu mes dy palëve duhet të vazhdojë. Kreu i shtetit serb Vuçiç gjatë takimit me dy deputetët gjermanë i pyeti se për çfarë duhej të flitej në momentin që ata nuk kishin ndërmend të lëviznin nga qëndrimi i tyre.

Gjermania dhe Shtetet e Bashkuara të Amerikës janë vendosur përballë njëra tjetrës. Cfarëdo të thotë kancelarja gjermane Merkel, Shtetet e Bashkuara të Amerikës e refuzojnë. Dhe kjo është shumë reciproke. Është pikërisht kjo arsyeja, sipas të përditshmes serbe, që është kaq e qartë se të dy pushtetet botërore po luftojnë për dominim në këtë pjesë të Europës dhe të dyja palët duan të përfitojnë pikë në rast se arrihet një marrëveshje mes Beogradit dhe Prishtinës.

Ndërsa Gjermania është e vendosur, Shtetet e Bashkuara të Amerikës do të ishin të gatshme të mbështesnin një zgjidhje të re. Për Uashingtonin një shkëmbim territoresh do të ishte zgjidhja ideale, vijon më tej burimi diplomatik për Blic.

Nga ana tjetër burime diplomatike në Berlin shprehen se Shtetet e Bashkuara të Amerikës nuk kanë bërë gjithçka që Prishtina të heqë dorë nga taksa për produktet serbe sepse është e qartë se nëse presioni do të kishte qenë ai i duhuri, atëherë taksa do të ishte hequr. Ata shtojnë se Shtetet e Bashkuara të Amerikës duan të përdorin historinë e taksës për ta përdorur si shkëmbim me Serbinë, në kohën e duhur.

Asistenti isekretarit amerikan të shtetit Metju Palmer është shprehur së fundmi se aktualisht është koha e duhur që Prishtina dhe Beogradi të arrijnë një marrëveshje. Kjo duke përfituar dhe nga mesazhi i presidentit amerikan Donald Tramp sipas të cilit ekipet negociatore duhet të shfrytëzojnë rastin historik.

Duke pasur parasysh se Parlamenti Europian do të shpërndahet në 16 prill, Blic shkruan se mbeten vetëm 11 ditë për arritjen e një marrëveshjeje, por aktualisht vështirë të besohet se një gjë e tillë mund të arrihet.

Derisa një zgjidhje të gjendet, do të ketë hapësira boshe deri në fund, dhe e gjithë çështja do të qëndronte në pritje të administratës së re të Bashkimit Europian.

Nacionalistët po fitojnë terren, kështu që fakti që pas zgjedhjeve parlamentare europiane, askush nuk do ta ketë me nxitim gjetjen e një zgjidhjeje për Kosovën, është i justifikuar. /abcnews.al

evis-kushi-1280x730.jpg
G. P.17:59 | 02/04/2019

Të tjera përgjime janë bërë publike nga PD-në, ku sipas saj funksionarë të lartë të qeverisë janë të përfshirë në çështjen “Babale”. Lidhur me akuzat dhe fakte e nxjerra nga selia blu, deputetja e PS-së Evis Kushi është shprehu se çështja “Babale” po përdoret i kalë beteja nga opozita.

Mirela Milori: Do doja një reagim të parë pasi gjatë mbrëmjes së djeshme dhe paradites së sotme opinioni është njohur me përgjime të reja dhe me akuza direkte të PD ndaj mazhorancës në lidhje me çështjen “Babale”. Do doja një reagim të forcës tuaj politike në lidhje me këtë.

Evis Kushi: Po çështja “Babale 1”, “Babale 2” dhe mesa duket do të këtë edhe një “Babale 3”, ka qenë një nga kauzat kryesore të opozitës për një periudhë të gjatë kohore,  ka qenë kali i betejës së opozitare. Por mesa duket shumë nga detajet e kësaj çështje dolën blof, të pavërteta opozita u tërhoq. Tani mesa duket ka një ringjallej të kësaj teme por unë besoj se për sa kohë kjo çështje është në Prokurori, për sa kohë ka persona të dyshuar, të akuzuar, ka dosje në lidhje më këtë çështje unë mendoj se duhet të presim drejtësinë që të thotë fjalën e saj. Ajo duhet të vërtetojë Këto që janë akuza, apo që opozita i quan fakte. Të vërtetohen nëse janë të vërteta apo thjesht janë trillime dhe fabrikime. Nëse ka fakte të reja apo duhet të dërgohen në Prokurori dhe është Prokuroria dhe gjykata që duhet të thonë fjalën e tyre.

Mirela Milori: Në fakt Çlirim Gjata ditën e sotme tha se përmes përdorimit të policisë dhe SHISH, ka thënë se Taulant Balla ka sajuar një histori të blerë me para të psita për ta përdorur kundër opozitës. Keni një qëndrim në lidhje me këtë sepse përmendet emri i zoti Balla, supozohet që të jetë dhe Gramoz Ruçi, diku përmendet një person me emrin Gramoz mendohet që mund të jetë edhe kryetari i Kuvendit. Pra një qëndrim sepse po përfshihet sipas PD gjithë kupola shtetërore.

Evis Kushi: Për sa kohë janë thjesht akuza këta duhet të vërtetohen në Prokurori dhe në Gjykatë. Ne nuk mund të themi asgjë më tepër dhe ne i inkurajojmë të gjithë ata persona që pretendojnë se kanë fakte të shkojnë në Prokurori, t’i dorëzojnë atje dhe në fund të mbajnë përgjegjësi. Qoftë ata që janë të implikuar në të tilla çështje të shkojnë para organeve të drejtësisë, por edhe nëse këto janë thjesht sajesa, personat që janë të implikuar gjithashtu të mbajnë përgjegjësi para ligjit./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono