Beograd

aleksander-vucic.jpg
ent ela20:33 | 22/08/2019

Presidenti serb Aleksandër Vuçiç deklaroi gatishmërinë e tij për të firmosur një marrëveshje me Kosovën  nga e cila nuk do të kishte as fitues e as humbës. Analistët në Beograd thonë se takimi i tij me Sekretarin amerikan të Shtetit, Majk Pompeo, konfirmon se roli i Amerikës për zgjidhjen e problemit po bëhet vendimtar dhe se presidenti Vuçiç po përgatit publikun për njohje reciproke. 

Takimi i presidentit serb Aleksandar Vuçiq me Sekretarin amerikan të Shtetit, Majk Pompeo, në Nju-Jork sipas analistëve në Beograd, është sinjal se Serbia dalëngadalë po ndryshon qëndrimin ndaj Kosovës. Gazetari i njohur Boshko Jakshiq argument për këtë  merr deklaratën e Vuçiqit, menjëherë pas takimit, se kur është fjala për zgjidhjen e çështjes së Kosovës ‘nuk është i rëndësishëm çmimi politik që do të paguhet’.

“Kjo më flet se ky është vazhdim i procesit të përgatitjes së publikut në Serbi për një zgjidhje që mund të çojë drejt njohjes së ndërsjellë. Pra duket ashiqare se platforma politike e Beogradit ka ndryshuar dhe ka avancuar deri në pikën sa të mendohet për njohje”– ka deklaruar Boshko Jakshiç për televizionin e pavarur serb N1.

Presidenti Aleksandar Vuçiç, ndërkaq në një intervistë të gjatë për seksionin serb të Zërit të Amerikës nuk e ka fshehur se gëzon mbështetjen si të Amerikës, ashtu edhe të Evropës, për shkak se, sikurse thotë, ata e dijnë se ‘është njeri për të cilin ‘kompromisi nuk është disfatë’:

“Mund të bisedojmë për gjithçka, vetëm nëse fjala është për kompromis, por që shqiptarët të fitojnë gjithçka, e Serbia të mos marrë asgjë – firmën time nuk do e merrni kurrë. As mbështetjen time nuk do ta keni për këtë. Në këtë moment jam President I Serbisë, mbase e gjeni dikën tjetër që do të dëshirojë ta pranojë këtë pa kurrfarë kompromisi, duke ndjekur vetëm ultimatumet. Prandaj kam ofruar zgjidhje kompromise”– i tha Vuçiç seksionit serb të Zërit të Amerikës, duke lënë të kuptohet se në takim me Sekretarin amerikan të Shtetit, por edhe me Metju Palmerin, një ndër ndihmësit e tij, si dhe me Dajmon Uillsonin kishte biseduar për modalitete të ndryshme të kësaj zgjidhjeje kompromise, jo vetëm për demarkacionin, por edhe për Doktrinën e Hallsteinit për njohjen e qeverive, shembullin e dy Gjermanive.

Eduard Jozzef, ligjërues në Universitetitn Xhon Hopkins të Uashingtonit ndërkaq thotë se e mira e takimit për rifillimin e dialogut është se Sekretari i Shtetit nuk ka folur me gjuhën e Xhon Boltoit, Këshilltarit të Sigurisë Kombëtare të Shtëpisë së Bardhë se Shtetet e Bashkuara të Amerikës do të mbështesin çfarëdo zgjidhjeje për të cilën merren vesh Serbia dhe Kosova: Do të duhej të  qëndrojnë larg zgjidhjeve të rrezikshme e të debatueshme,-ka thënë Xhozef. Analistët në Beograd vlerësojnë se aktualisht, duke marrë parasysh ndikimin e Uashingtonit mbi Prishtinën, por dhe kontaktet intensive të administrates amerikane me palën serbe duket se roli i Amerikës për arritjen e Marrëveshjes Kosovë-Serbi ka për të qenë vendimtar. /ABC News Albania 24/7

macron-1.jpg
G. P.14:30 | 16/07/2019

Presidenti i Francës Emmanuel Macron ka përfunduar vizitën e tij dy ditorë në Serbi. Ndërkohë presidenti serb Aleksandër Vuçiç u shpreh për mediat se një  takim I radhës mes të dyve mund të ndodhë në Shtator të këtij viti.

Presidenti francez, Emmanuel Macron, mëngjesin e ka kaluar në kalanë e Beogradit-Kalemegdan. Në atë pjesë ai ka shëtitur bashkë me homologun, Aleksandër Vuçiç. Presidenti serb i ka treguar bukuritë e kryeqytetit dhe e ka falenderuar për një vizitë të tillë plotë aktivitete.

Këtu Macron vetëm është falenderuar për mikpritjen dhe më pas ka takuar studentët e fondacionit “Ryco”, organizatës rinore që ka selinë në Tiranë. Presidenti Vuçiç më pas ka folur për mediat serbe duke thënë se Macron e kupton që kompromisi është zgjidhja për Kosovën dhe është ndër të vetmit që e thotë pavarësisht se shumë e mendojnë.

“Duhet pyetur Macron, por unë besoj se një lloj Berlini do të ndodh në shtator. Natyrisht se duhet kohë që të flitet sërish për disa problem dhe unë nuk dua tani të përsëris gjërat si tarifat apo jo”, tha Vuçiç.

Presidenti serb nuk është shprehur pesimist për integrimin në Bashkimin Evropian, pavarësisht qëndrimit të Macron. Shpresën e ka tek puna e tij.

“Kam kërkuar vetëm mirëkuptim që problem i Kosovës nuk mund të zgjidhet ashtu si duam ne të gjithë, por diçka në mes. Këtë e kupton çdo njeri, çdo serb dhe çdo shqiptarë, por bëhemi sikur nuk kuptojmë dhe mohojmë dëshirat e palës tjetër. Unë do të angazhohem gjithë jetën time për kompromis, por vërtetë për kompromis”, tha Vuçiç.

Vizita e Macron është parë si një hap i rëndësishëm për Serbinë pasi ka shkuar në detaje. Opozita serbe nuk ka qenë e lumtur pasi me ta nuk ka patur takim. Por, shtypi serb e ka konsideruar vazhdim të besimit me Francën, sidomos deklaratën e Macron se Serbinë e ka në zemër./ABC News Albania 24/7

6-1280x707.jpg
Sej rie21:00 | 15/07/2019

E kanë prekur edhe çështjen e Kosovës në konferencën e përbashkët për shtyp, Presidentët Emanuel Macron dhe Aleksandar Vuçiç, të cilët janë takuar të hënën në Beograd. Në fjalën e tij, Macron ka deklaruar se Franca dëshiron që të arrihet një marrëveshje mes Prishtinës dhe Beogradit. “Serbia dhe Kosova janë shtete evropiane dhe ne duam që kjo të përkthehet në fakte”, ka theksuar Makron.

Ai ka vlerësuar bisedën “e sinqertë” që ka zhvilluar me homologun Vuçiç lidhur me Kosovën dhe ka shtuar se për këtë çështje do të bisedojë edhe me Kryeministren e Serbisë, lidershipin e Kosovës dhe kancelaren gjermane Merkel. Nga ana e tij, Vuçiç është shprehur se, për Francën Kosova është e pavarur, por për Serbinë jo.

“E di se sa e vështirë është kjo për serbët, por duhet ta kuptojmë”, ka thënë Vuçiç. Sa i takon integrimit evropian të Serbisë, MaCron ka shtuar se më parë BE duhet të reformojë sistemin e saj dhe më pas të zgjerohet./ABC News Albania 24/7

maxresdefault-1280x720.jpg
Sej rie22:00 | 04/07/2019

Gentian Cici është arbitri shqiptar i cili është përzgjedhur për të gjykuar në kampionatin evropian të basketbollit për femra që po zhvillohet në Beograd si dhe do të jetë pjesë edhe në kampionatin botëror të basketbollit që starton në Kinë muajin e ardhshëm.

Prej disa ditësh në Beograd po zhvillohet kampionati evropian i basketbollit për femra ku ajo qe përben interes është padyshim protagozinizmi i arbitrit shqiptar Gentian Cici. Gjyqtari shqiptar është pjesë e elitës së arbitrave evropianë të basketbollit të FIBA. 38 -vjeçarit iu besua ndeshja delikate mes Belgjikës dhe Sllovenisë e fituar nga belgët me rezultatin e 72-67. Kjo ishte sfida e parë në këtë turne ku gjyqtari shqiptar vendosi drejtësi.

Gentian Cici ka gjykuar edhe më parë në fazën finale të kampionatit evropian që u zhvillua në vitin 2017 duke impresionuar me paraqitjet e tij.

Gjyqtari shqiptar është përzgjedhur për të marrë pjesë edhe ne kampionatin botëror të basketbollit i cili do të startojë në muajin Gusht në Kinë. Një turne madhështor ku do të marrin pjesë plot 32 përfaqësuese. Kjo do të jetë hera e parë që në një kampionat botëror të basketbollit merr pjesë një gjyqtar nga Shqipëria. Gentian Cici është një nga 7 gjyqtarët e përzgjedhur nga Ballkani dhe nga 20 gjyqtarët evropianë që do të gjykojnë ndeshjet e botërorit që starton muajin e ardhshëm.

Përfaqësimi i Gentian Cicit në turneun më të rëndësishëm të basketbollit në botë është edhe një vlerësim për basketbollin shqiptar ku gjyqtari është formuar profesionalisht./ABC News Albania 24/7

52-1.jpg
ent ela18:40 | 17/06/2019

Mediat serbe shkruajnë se shtetet perëndimore janë duke hartuar një sërë pikash sipas të cilave do të ndërtohet dhe marrëveshja përfundimtare mes Kosovës dhe Serbisë.

Sipas të përditshmes serbe “Veçerenje Novosti”, vendet perëndimore po përgatisin të gjitha pikat për marrëveshjen përfundimtare Kosovë – Serbi. Sipas mediave serbe Beogradi dhe Prishtina së shpejti mund të marrin udhëzimet për arritjen e një zgjidhjeje përfundimtare për çështjen e Kosovës nga shtetet perëndimore. Sipas tyre brenda “kornizës së caktuar” do të ketë hapësirë dhe për “amandamente” të mundshme. Kjo gjë sipas liderëve perëndimore do të përshpejtojë zgjidhjen e çështjes së Kosovës.

“Novosti” shkruan se Samiti në Paris, nëse realizohet, mund të përcaktojë se çfarë përmbajnë rekomandimet. “Novosti” përkujton se në vitin 2005, grupi i kontaktit  krijoi tri linja kryesore themelore për bisedime në lidhje me statusin e Kosovës: të mos ketë ndarje të Kosovës, të mos ketë kthim të gjendjes para vitit 1999 dhe të mos ketë bashkim të Kosovës me shtetet fqinje.

Ish ambasadori i Serbisë në Berlin dhe Vjenë, Milovan Bozhinovic tha se nga sjellja e aktorëve aktualë në procesin negociator mund të thuhet se ekziston dëshira për arritjen e një zgjidhjeje përfundimtare nga të dyja palët. Shtëpia e Bardhë në apelin e saj ëm të fundit ndaj dy vendeve kërkoi qartë që të mos ketë më ndalin retorika ekstreme dhe të punohet për arritjen e marrëveshjes e cila ka për qëllim “njohjen e ndërsjellë”. /ABC News Albania 24/7

palmer-n1.jpg
ent ela12:50 | 10/06/2019

Zëvendës-ndihmës Sekretari Amerikan i Shtetit, Metju Palmer, në përfundim të takimit me Presidentin serb Vuçiç në Beograd u shpreh se Kosova duhet të heqë taksën e vënë ndaj produkteve serbe. Sipas tij ajo është pengesë për dialogun Prishtinë – Beograd, në rrugën e tyre drejt BE-së.

Sipas mediave serbe, Palmer ka theksuar se Uashingtoni kërkon heqjen e kësaj tarife. Zyrtari amerikan shtoi se Samiti i Pairisit i cili është caktuar të mbahet me 1 korrik do të jetë konstruktiv dhe do t’i çojë “Prishtinën dhe Beogradin drejt marrëveshjes së normalizimit të marrëdhënieve”.

Presidenti i Serbisë, Aleksandar Vuçiç nga ana e tij u shpreh se me Palmer bisedoi për dialogun e bllokuar me Kosovën. Vucic theksoi se qëndrimet mbeten të ndryshme pasi SHBA mbështet pavarësinë e Kosovës, kurse Serbia e konsideron si pjesë të saj.

Ai po ashtu është ankuar për taksën ndaj mallrave serbe.

“E kam njoftuar se nuk është e vërtetë se Serbia ka shfrytëzuar taksën për të bllokuar dialogun me Kosovën. Nëse nuk jeni në gjendje të transportoni një biskotë te një shtet tjetër, ku është kuptimi të bisedoni me ta”, shtoi ai.

“I jam mirënjohës SHBA-së për mbështetjen e ofruar për rrugëtimin evropian të Serbisë. Më tepër kemi biseduar për Kosovën, por raportet tona janë të mira dhe mund të përmirësohen edhe më shumë”, theksoi ndër të tjera Vuçiç. /ABC news Albania 24/7

ambasadori-1.jpg
ent ela16:59 | 30/05/2019

Kajl Skot, ambasadori amerikan në Beograd ka komentuar operacionin e policisë së Kosovës në veri të Mitrovicës, duke thënë se operacione të tilla policore anti korrupsion kryhen edhe në Serbi.

Objektiv i Shteteve të Bashkuara të Amerikës mbetet arritja e një marrëveshje të hollësishme për normalizimin e marrëdhënieve mes Serbisë dhe Kosovës, pavarësisht dialogut të ndërprerë dhe mosbesimit të ndërsjellë. Kështu ka deklaruar ambasadori amerikan në Beograd, Kyle Scott, duke bërë thirrje që Beogradi e Prishtina të gjejnë gjuhë të përbashkët dhe që të evitojnë barrierat e tarifat të cilat pengojnë vazhdimin e negociatave. Diplomati amerikan me këtë rast ka komentuar edhe zhvillimet e së martës në veri të Kosovës.

I pyetur nga televizioni N1 nëse bisedimet Beograd-Prishtinë kanë hyrë në rrugë pa krye, ambasadori amerikan, Kyle Scott, tha se mbetet optimist, pavarësisht zhvillimeve të fundit të disfavorshme.

Kajl Skot, Ambasadori Amerikan në Beograd: “Qëndrimi ynë është se qëllimi mbetet i njëjtë: një marrëveshje e hollësishme për normalizimin e marrëdhënieve mes Prishtinës dhe Beogradit. Që të arrihet kjo, ne mbështesim dialogun e ndërmjetësuar nga Bashkimi Evropian, por duhet që të kemi dialog. Qëllimi duhet të jetë që palët të kthehen në tavolinë dhe të vazhdojnë bisedimet. Për shkak se edhe presidenti Vuçiq e tha se pa bisedime – nuk mund të arrihet marrëveshja,’- deklaroi diplomati amerikan duke vlerësuar debatin në parlamentin serb, lidhur me Kosovën, përkundër mungesës së hollësive, por edhe mungesën e opozitës serbe në të”.

Duke komentuar samitin e paradokohshëm të Berlinit dhe vazhdimin e tij në Paris, në fillim të korrikut, ambasadori Kyle Scott tha se administrata amerikane do të vazhdojë mbështetjen për një marrëveshje gjithpërfshirëse për normalizimin e marrëdhënieve.

Ambasadori amerikan në Beograd, ka komentuar edhe zhvillimet e së martës në veri të Kosovës. Sipas tij aksioni i policisë kosovare, me urdhërarrest të lëshuar nga gjykatësi, kishte për qëllim ndalimin e personave të dyshuar për korrupsion e shpërdorime të ndryshme, një veprim ky i njëjtë si dhe aksione të ngjashme të ndërmarra në Serbi, dëshmitar i të cilave tha se ka qenë edhe vet. Dallimi më i madh ishte se të martën, vlerësoi ambasadori amerikan në Beograd, Kyle Scott, qeveria serbe vendosi ushtrinë në gatishmëri kurse popullata e Kosovës Veriore tentoi të përzihet në operacionin policor duke ngritur barrikada në rrugë:

“Ne besojmë në sundimin e së drejtës dhe të gjitha vendet e këtij rajoni duhet të ndërmarrin masa kundër veprimeve ilegale”– nënvizoi ambasadori amerikan duke rikujtuar se policia kosovare të martën nuk veproi vetëm në veri, por edhe në pjesën jugore të vendit, veprimi ishte pjesë e një aksioni më të gjerë që prej kohësh po ndërmerret në Kosovë dhe shpresojmë se, përfundoi ai, ka për të vazhduar. /ABC News Albania 24/7

PROTESTA-KUNDER-BUKEPJEKESVE-SHQIPTAR.mpg_snapshot_00.08-1280x720.jpg
ent ela21:05 | 27/04/2019

Dhjetra qytetarë në kryeqytetin serb, Beograd, dolën në protestë kundër bukëpjeksave shqiptarë që ushtrojnë aktivitetin atje. Serbët shprehen se janë ndjerë të provokuar nga një foto ku shfaqej një bukëpjekës, i cili bënte shqiponjën dy krenare.

Këta protestues kanë dalë për të protestuar kundër një bukëpjekësi shqiptarë dhe kërkojnë largimin e tyre nga kjo lagje. Ata brohorisin se Kosova është Serbi dhe thonë se bukëpjekësit janë provokator.

E tëra ka nisur pas kësaj fotoje e bërë muaj më parë, që i ka kushtuar pronarit të furrës “Roma”.

Borca është një paralagje e kryeqytetit serb rreth 20 kilometra nga qendra. shqiptarët nga Kosova kanë furra gjithandej, përfshirë edhe disa këtu. Banorët e kanë parë si provokim shqiponjën dy krenare të bërë në foton në kohën e festave dhe ftuan banorët për protesta.

Në rrjetet sociale ka dalë fotoja me komentin që ky pronarë ofendon serbët me foton e tij dhe kjo është e papranueshme. Disa dhjetëra protestues kanë dalë që herët në mëngjes për t’u thënë bukëpjekësve të ikin që aty. Kosova është Serbi dhe i kanë ngjitur gjithandej postër me flamurin serb dhe parulla.

Bukëpjekësit shqiptarë janë mbyllur në shtëpi, ndërsa aty ka arritur edhe policia dhe forcat speciale kanë qenë në gatishmëri.

Dy raste të tilla kanë ndodhur gjashtë muajt e fundit kur bukëpjekësit në njëfarë forme u dëbuan nga Serbia. Përveç protestave, nuk ka patur reagime nga zyrtarët e shtetit.

Gazetar i ABC News: Idro Seferi

vucic-ne-beograd.jpg
nev ila11:45 | 20/04/2019

Në Serbi presidenti Vuçiç mblodhi një tubim madhështor të mbështetësve të tij, një kontrast me protestat katër mujore të opozitës. Në qendër të fjalimit ishte Kosova dhe premtimi se nuk do ketë marrëveshje pa një kompromis.

Kjo është forca e presidentit, Aleksandër Vuçiç në Serbi. Tubimi i fundit në projektin e së ardhmes së Serbisë në sheshin e parlamentit në kryeqytet, por edhe matja e forcave me opozitën pas katër muajsh protesta. Ka paralajmëruar tubimin më të madh në histori që prej 50 vjetësh. Mediat serbe njoftojnë për disa qindra-mijëra të pranishëm nga e gjithë Serbia. Për më shumë se gjysmë ditë gjithçka ka qenë e bllokuar për të dëgjuar të parin e Serbisë. Kosovës i ka thënë “kurrë” pa një kompromis.

Emisarë të ndryshëm nga e gjithë bota vijnë në Beograd dhe më thonë: bëni diçka president, që shqiptarët ti heqin taksat. Përgjigja ime është se pavarësisht se kjo nuk do të jetë e lehtë të përballohet, asgjë nuk do bëjmë. Është koha të silleni në mënyrë të civilizuar. Edhe ju dhe shqiptarët duhet ta dinë se gjëja më e shtrenjtë është fytyra”, tha Vuçiç gjatë fjalës së tij.

Të gjithë rajonet serbe e kanë mbështetur në këtë miting. Përfaqësues nga Bosnja shprehën mirënjohje për punën e Vuçiç, por edhe një mbështetje për sfidat e ardhshme që e presin. Shefi i diplomacisë serbe Ivica Daçiç, në fjalën e tij tha se:

“Fuqinë tonë e kemi treguar edhe me tërheqjen e 13 shteteve të cilat kanë tërhequr njohjen e pavarësisë së Kosovës. Në kohën e opozitës 83 shtete kanë njohur Kosovën. Për herë të parë më shumë shtete kanë tërhequr njohjen në krahasim me ato që e kanë njohur pavarësinë e Kosovës”.

Millorad Dodik, i presidencës boshnjake tha se serbët e atjeshëm kanë ndaluar njohjen e pavarësisë së Kosovës. Në mbështetje ishte edhe shefi i diplomacisë hungareze i cili përcolli mbështetjen e kryeministrit, Viktor Orban, nga Budapesti.

Protestat e opozitës duket se kanë nxitur presidentin që drejton vendin ku përmenden zgjedhjet shpesh, të krijoj fushatën e ardhmja e Serbisë. Zgjedhjet ende nuk janë vendosur edhe pse janë kërkuar shumë./abcnews.al

protesta-ne-serbii.jpg
G. P.17:50 | 14/04/2019

Edhe në Serbi qytetarët kanë protestuar kundër regjimit autoritar të presidentit Aleksandër Vuçiç. Manifestuesit kanë kërkuar respektimin e të drejtave themelore nga shteti dhe pajtim me vendet e tjera të Ballkanit.

Protesta e opozitës në Serbi ka mbledhur qytetarët nga të gjitha qytetet në sheshet kryesore të kryeqytetit. Ata tani kanë thënë se nuk do të ndalojnë pasi kjo mundësi nuk do të kthehet më. E quajtën presidentin serb, Aleksandër Vuçiç si tradhtar dhe uzurpator, ndërsa thanë se i kanë shkruar dorëheqjen, mjafton që ta firmosë.

Çedomir Çupiç, profesor i Shkencave Politike: Duhet ta ndërpresim këtë realitet të hidhur që na e ka shërbyer. Ju përgëzoj për guximin në tërë Serbinë që e keni bërë për të mbrojtur shtetin.

Në protestë ishin edhe liderët e opozitës së bashkuar në Lidhjen për Serbinë. Aty më vonë erdhi edhe ish-presidenti, Boris Tadiç. Mediat thonë se disa dhjetëra mijëra protestues ishin të pranishëm, policia thotë vetëm 7 mijë.

Boshko Obradoviç, i partisë nacionaliste të djathtë, është bërë problem pasi ka qenë pjesa e opozitës e lidhur me incidente. Presidenti Vuçiç e ka pagëzuar si Boshko fashisti.

Boshko Obradoviç, partia “Dveri”: Kjo është një luftë për të drejtat elementare që për 7 vjet në regjimin e Aleksandër Vuçiç janë duke u shkelur, sidomos liria e shtypit dhe e zgjedhjes. Kërkojmë vetëm një dialog normal dhe nuk jemi për dhunë, por duhet të luftojmë deri në fund për këtë.

Ai thotë se përkundër që flasin për Kosovën në këto protesta, me vendet e rajonit duan paqe.

Boshko Obradoviç, partia “Dveri”: E vetmja zgjidhje për rajonin është pajtimi, të tejkalojmë gjërat që na ndajnë në të shkuarën dhe t’i kthehemi gjërave që mund të na afrojnë në të ardhmen. E dimë në çfarë pikash dallojmë, por nuk duhet të merremi me këtë pasi duhet t’i kthehemi së ardhmes.

Më pas protestuesit u nisën drejt qeverisë për të shprehur pakënaqësinë me punën e saj dhe në shëtitje për t’u thyer sërish tek Kuvendi./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono