bashkepunim

pompeo.jpg
G. P.23:10 | 02/06/2019

Sekretari amerikan i Shtetit, Mike Pompeo ka deklaruar se Uashingtoni është gati të ulet në një dialog pa kushte me Iranin, për zgjidhjen e çështjes bërthamore. Por për Teheranin zyrtar, Shtetet e Bashkuara duhet të tregojnë respekt dhe të heqin sanksionet.

Shtetet e Bashkuara janë të përgatitura për t’u angazhuar në një dialog pa kushte me Iranin mbi programin e tij bërthamor, por Republika Islamike duhet të sillet si një vend normal. Kështu ka deklaruar sekretari amerikan i Shtetit, Mike Pompeo, i cili ka shtuar se dialogu ka qenë një opsion i parapëlqyer prej kohësh edhe nga presidenti Donald Trump.

“Jemi gati të ulemi të bisedojmë sapo iranianët të tregojnë se duan të sillen si një vend normal”, ka thënë Pompeo.

Reagimi i tij ka ardhur një ditë pasi presidenti iranian Hasan Rouhani sugjeroi se Teherani mund të zgjedhë të bisedojë nëse Uashingtoni tregon respekt, por shtoi se nuk do të pranojë kurrë një dialog të kushtëzuar nga presionet.

“Ne jemi gati, pa kushte, jemi gati për t’u ulur në tryezë”, ka thënë shefi i diplomacisë amerikane.

Megjithatë, ai ka shtuar se Shtetet e Bashkuara do të vazhdojnë të punojnë për të penguar aktivitetet dashakeqe të Iranit në Lindjen e Mesme. Vitin e kaluar Pompeo parashtroi 12 kushte që Irani duhet të plotësonte, përfshirë ndërprerjen e mbështetjes për grupet rebele dhe atë të testeve raketore, në këmbim të heqjes së sanksioneve./ABC News Albania 24/7

pranga-1.jpg
G. P.08:15 | 21/05/2019

Observatori i Shoqërisë Civile Kundër Krimit të Organizuar: “Ballkani ka ende punë për të bërë. Sidomos kur vjen fjala tek lufta kundër krimit të organizuar në rajon, i cili ndryshe nga politika bën bashkë të gjithë grupet kriminale, pa dallim kombësie”.

Observatori i Shoqërisë Civile Kundër Krimit të Organizuar në Evropën Juglindore, si pjesë e Iniciativës Globale Kundër Krimit të Organizuar Ndërkombëtar, publikoi të hënën (20.05) në Vjenë raportin me të dhënat e mbledhura nga 20 ekspertë dhe gazetarë vendas nga shoqëria civile në Shqipëri, Bosnjë Hercegovinë, Kosovë, Mali i Zi, Maqedonia e Veriut, dhe në Serbi. Me temën “Zonat problematike të krimit të organizuar në vendet e Ballkanit Perëndimor”, raporti ka si qëllim forcimin e rolit të shoqërisë civile në luftën kundër krimit të organizuar dhe korrupsionit. Ai përmban të dhëna të detajuara mbi qytetet kryesore, zonat bregdetare, pikat kufitare ose nyjet kyçe që janë më të predispozuara për t’u përdorur nga trafikantët e drogës, armëve, qenieve njerëzore, cigareve dhe të tjera veprimtarive kriminale që kryhen në Ballkan.

Harta e zonave problematike të rajonit

Raporti evidenton se krimi i organizuar i përzgjedh vendet ku vepron. Së pari, është pozicioni gjeografik i favorshëm. Ballkani ka vendndodhje strategjike për grupet kriminale që e përdorin atë si tranzit, për të kaluar më pas në tregun e madh dhe fitimprurës të Evropës. Më pas renditet qeverisja e dobët dhe e korruptuar si dhe ekonomia e dobët.

“Janë rreth 40 zona problematike që kemi identifikuar. Janë vende si Durrësi në Shqipëri, për shembull, ose Bar në Malin e Zi. Ballkani është kthyer në një portë të madhe për kokainën që futet nga Amerika e Jugut dhe këto dy qytete janë parë si pika kyçe për hyrjen e kokainës në rajon. Një tjetër zonë është pika kufitare ndërmjet Malit të Zi dhe Kosovës që quhet Kulla, ku vërehet një numër në rritje i aktiviteteve kriminale, duke nisur nga trafiku i drogës apo kontrabanda e cigareve ndërmjet këtyre dy vendeve. Një tjetër zonë problematike është në pikat kufitare mes Malit të Zi dhe Bosnje-Hercegovinës, dhe aty kryesisht kalon kanabisi që vjen nga Shqipëria. Është shumë e lehtë të trafikosh kanabis nga njëri shtet tek tjetri sepse nuk ka shumë kontroll policor dhe nga ana tjetër policitë nuk janë të pajisura me teknologjitë më të fundit që mund t’u mundësojnë gjurmimin e drogave. Gjithashtu është i pranishëm edhe korrupsioni në radhët e forcave policore dhe një pjesë e konsiderueshme e lehtësirave që u krijohen këtyre veprimtarive kriminale mundësohen edhe nga korrupsioni. Jo vetëm korrupsioni nga policët kufitarë por edhe në instancat më të larta” – i tha Deutsche ëelle-s Fatjona Mejdini, koordinatore në terren e Ballkanit Perëndimor për Iniciativën Globale.

Rivalë në politikë, bashkëpunëtorë në trafiqe

“Përveç zonave problematike ne kemi evidentuar edhe pika që i kemi quajtur zonat më vulnerable rajonale dhe e tillë është veriu i Kosovës. Ajo është një zonë gri ku kryhen të gjithë llojet e kontrabandës dhe grupet kriminale shqiptare me ato serbe kanë një bashkëpunim shumë të ngushtë. Veriu i Kosovës është vendi ku krimit nuk i intereson aspak etnia. Ne shohim politikanë dhe qeveri të Ballkanit që nuk bashkëpunojnë pikërisht për çështje të kombësisë dhe etnisë dhe nga ana tjetër kemi krimin që nuk ka pengesa të tilla për të bashkëpunuar me njëri-tjetrin” – thekson koordinatorja Mejdini për DW.

“Karburanti është malli që kalon më shpesh kontrabandë, nga veriu në jug. Më pas vijnë materialet e ndërtimit, ilaçet, makinat, cigaret, ushqime, pije, dhe mallra të tjera. Llogaritet se nga këto aktivitete të paligjshme buxheti i Kosovës humbet çdo javë rreth 750,000 euro nga tarifa doganore të pambledhura. Një pjesë e mirë e këtyre mallrave nuk qëndrojnë në pjesën veriore me popullsi serbe, por transportohen për në jug në zona të Kosovës me popullsi shqiptare. Kjo tregon edhe njëherë se kur vjen puna tek rrjetet e kontrabandës, kriminelët bashkëpunojnë me njëri-tjetrin pavarësisht dasive etnike, apo ndarjeve gjeografike e administrative” – thuhet në raport.

A ka zgjidhje?

Raporti nënvizon, se “ndërtimi i mureve dhe mbyllja e kufijve nuk është zgjidhje afatgjatë e problemeve, të cilët mund të krijojnë më shumë stimuj për aktivitete kriminale. As injorimi apo minimizimi i problemit nuk është zgjidhje. Në këtë mënyrë vetëm sa i jepet më shumë pushtet elitave të korruptuara, çimentohen praktika të padrejta, stimulohet largimi i trurit, shtohet paqëndrueshmëria, dhe largohen investitorët e huaj. Në mënyrë paradoksale, ata politikanë që luajnë rolin e nacionalistit të flaktë shpesh janë përgjegjës për dobësimin nga brenda të sovranitetit të shtetit, dhe janë të gatshëm të venë në rrezik interesat kombëtare për përfitime personale – shpesh duke bërë pazare të fshehta me “armikun,” apo edhe me shtete të huaja”.

Sipas Mjedinit, “bashkëpunimi është zgjidhja më e mirë. Përfshirja më e gjerë e shoqërisë civile, të cilën nuk e shohim shumë të angazhuar në luftën kundër krimit të organizuar. Deri tani, kjo luftë është parë si një luftë që duhet bërë vetëm nga organet ligjzbatuese dhe ky koncept është shumë larg asaj çka duhet bërë”./DW

basha-7.jpg
G. P.13:45 | 29/04/2019

Pas aleatëve edhe demokratët do të prezantojnë platformën e tyre për zgjidhjen e krizës në vend. Lajmin e bëri të ditur vetë kryedemokrati Lulzim Basha.

“Nuk ka asnjë mospërputhje mes PD dhe koalicionit. PD ka përfunduar javën e kaluar të detyrave të qeverisë tranzitore në raport me zgjedhjet e lira dhe të ndershme. Koalicioni opozitar po vazhdon me mirëkuptim, bashkëpunim dhe sinergji të plotë për të ecur përpara. Çështjet e tjera janë detaje të parëndësishme sepse kryesorja është kjo. Zotimi i gjithë koalicionit opozitar është regjistrimi i zgjedhjeve dhe pjesëmarrja në zgjedhje është kur të ketë me të vërtetë zgjedhje dhe jo një tjetër farsë kriminale kusht i padiskutueshëm për këtë mbetet largimi i Edi Ramës nga qeveria dhge një qeveri tranzitore që do të plotësojë kushtet”, tha Basha.

Deklaratën kreu i Partisë Demokratike e bëri në përfundim të takimit zhvilluar në selinë blu me përfaqësues të Institutit Ndërkombëtar Republikan me qëllim adoptimin në partinë demokratike të sistemit të përzgjedhjes së kandidatëve për deputet nga anëtarësia përmes parimit një anëtar një votë./abcnews.al

automatik.jpg
G. P.09:42 | 18/04/2019

Një i ri është arrestuar në Tiranë pasi lëvizte me armë zjarri. Shërbimet e policisë në komisariatin nr. 4 kanë njoftuar se kapja e tij u bë falë bashkëpunimit me qytetarët. 21-vjeçari, me iniciale A.Ç u ndalua fillimisht në rrugën “Fadil Deliu”. Gjatë kontrollit, uniformat blu i gjetën një armë zjarri automatike.

I riu nga kryeqyteti e kishte fshehur armën në një çantë, ku kishte gjithashtu dy krehra dhe një sasi fishekësh. Të gjitha ato u sekuestruan në cilësinë e provës materiale. Për 21-vjeçarin rëndon vepra penale e “Prodhimit dhe mbajtjes pa leje të armëve dhe municionit luftarak”./abcnews.al

i-riu-ne-vlore.jpg
G. P.11:09 | 16/04/2019

Një i ri nga Vlora është arrestuar nga policia pasi qarkullonte me armë zjarri me vete. Në një njoftim, policia thotë se ai qëndronte pranë një lokali në Ujin e Ftohtë. Sapo ka parë uniformat blu, 29-vjeçari E.H. ka tentuar të largohet. Por autoritetet u vunë menjëherë në ndjekje të tij, ku bënë të mundur edhe kapjen e tij në flagrancë.

Gjithashtu sipas policisë, gjatë tentativës për t’u larguar, i riu ka hedhur armën në tokë. Bëhet fjalë për një pistoletë CZ-P09, me 16 fishekë. Gjithashtu ai ka qenë edhe në vitin 2012 i arrestuar për armëmbajtje pa leje.

Në njoftimin e saj, policia thekson se kapja e 29-vjeçarit u bë në bashkëpunim me qytetarët. Ishin këta të fundit që lajmëruan uniformat blu, të cilët falenderojnë qytetarët për bashkëpunimin dhe i ftojnë ata të denoncojnë çdo paligjshmëri duke ju garantuar anonimat të sigurtë dhe reagim të menjëhershëm e të paanshëm./abcnews.al

pauliun-sterkaj.jpg
G. P.22:10 | 12/04/2019

Deputeti i Partisë Socialiste, Paulin Stërkaj, ishte i ftuar këtë të premte në emisionin “Provokacija”. I pyetur se çfarë mendonte rreth grabitjes së Rinasit, Stërkaj tha se kjo ngjarje duhet hetuar në thelb të saj.

Sipas tij, edhe një person i pa inkriminuar më parë, duke parë sigurinë e dobët të aeroportit dhe sasinë e madhe të parave, mund të tentojë ta realizojë një vjedhje të tillë.

Ato janë gjëra në hetim dhe asnjëri nga ne nuk është i njohur se çfarë po bëjnë në hetim të kësaj çështjeje. Unë si deputet, si ish-oficer policie do kisha hetuar në thelb të kësaj gjëje. E kam thënë dhe në disa media të tjera. Këto vjedhje janë në bashkëpunim. Dhe unë e theksoj se kush e di kur lëvizin këto miliona euro drejt Rinasit? Nga kush rrjedh informacioni? Nëse bëhet fjalë për 10 milionë euro mund të ketë njerëz që s’kanë bërë asnjë krim në jetën e vet, por duke e dit që në Rinas te avioni s’ka as armë, as policë, kurrkush me i kap, kam bindjen që edhe ata mund të tentojnë me rreziku”, tha Stërkaj.

Për sa i përket përgjegjësisë, Stërkaj renditi dy arsye; koncesionarin dhe rrjedhjen e informacionit në bankat që bëjnë këto lëvizje transfertash.

“Për mua përgjegjësia shkon në disa pozicione. Për mua kontrata koncensionare i ka dhënë prioritet. Këto kontratat koncesionare i kanë dhënë prioritet koncensionarit dhe vendos ai. Mirëpo u bë  e disata herë që bëhet. Mirëpo fajin e kësaj pune unë ua lë bankave. Që rrjedhin informacione në banka dhe shkojnë në grupet kriminale. Ai është shkaku”, u shpreh deputeti./abcnews.al

52800543_2022993517736358_3572237060154589184_o-1280x853.jpg
ent ela23:06 | 25/02/2019

Ministrja e Mbrojtjes Olta Xhaçka, në një konferencë të përbashkët shtypi me homologen e saj të Maqedonisë së Veriut, përshëndeti bashkëpunimin e shkëlqyer mes dy vendeve. “Anëtarësimi i Maqedonisë në NATO i sherbern sigurise dhe stabilitetit ne rajon”,- theksoi ministrja Xhaçka.

Rajoni i Ballkanit Perendimor është duke ndryshuar pamjen e vet, theksoi Ministrja e Mbrojtjes e Maqedonisë Radmilla Sheqerinska, gjatë takimit të sotëm me homologen shqiptare Olta Xhacka. Maqedonia bëri hapa të rëndësishëm serioz në rregullimin e marrëdhënieve me fqinjët, duke nënshkruar Marrëveshjen e Prespës dhe një varg vendime serioze që mundësuan vendi të jetë shumë më afër integrimeve, tha Radmilla Sheqerinska duke shtuar se Shqipërinë  e sheh si fqinj të mirë e cila midis të parëve ratifikoi protokollin aderues për anëtarësim në NATO

Radmilla Sheqerinska, Ministre e Mbrojtjes e Maqedonisë: “Kështu sillen vetëm vetëm miqët e vërtetë dhe aleatët e  mirë dhe të jeni të sigurtë se këtë e çmojmë dhe nuk do ta harrojmë kurrë. Fakti se vendet e para fqinje nga rajoni Greqia, Shqipëria , Bullgaria dhe Sllovenia të parët e ratifikuan protokollin për aderimin tonë në Nato, dëshmuan se vlerat e NATO-s janë edhe vlera tona”.

Ministrja e mbrojtjes e Shqipërisë Ollta Xhacka gjatë vizitës zyrtare në Maqedoni theksoi se sheh me optimizëm në avancimin e të gjitha vendeve të rajonit, ndërsa Maqedonia  me zgjidhjen e kontestit shuëmvjecar me Greqinë, me ligjin  e gjuhëve, por edhe me një liderizëm të mirë dëshmoi se meriton anëtarësimin në NATO.

Republika e Shqipërisë sivjet do të shënojë 10 vjetorin jubilar të anëtarësimit të saj në NATO ndërsa vetë aleanca 70 vjetorin e ekzistimit. Pikërisht në këtë përiudhë Maqedonia me të gjitha sfidat duhet të jetë anëtare e 30 e NATO-s. Sfidat në planin e brendshëm poashtu edhe në atë të jashtëm edhe më tej janë prioritet me qëllim të përparimit të shteteve në planin ekonomik, kulturor dhe të sigurisë, – theksuan ministrat e mbrojtjes të të dyja vendeve./abcnews.al

VELIAJ-NE-JAPONI_ABC-M2-T1.mpg_snapshot_00.13-1280x720.jpg
G. P.14:48 | 19/12/2018

Kryetari i Bashkisë Tiranë, Erion Veliaj zhvilloi një vizitë në Japoni ku gjatë takimit me zyrtarët e lartë diskutoi për bashkëpunimin mes Tiranës dhe Tokios, si dhe për menaxhimin e emergjencave civile dhe për transportin publik në kryeqytet.

Kryetari i Bashkisë Tiranë, Erion Veliaj zhvilloi një vizitë zyrtare në Japoni ku diskutoi për shkëmbimin e eksperiencave në menaxhimin e emergjencave civile dhe fatkeqësive natyrore, si dhe ato për një transport publik miqësor me mjedisin. Në takimin me Guvernatoren e Tokios, kryebashkiaku Veliaj foli edhe mbi rritjen e marrëdhënieve dhe bashkëpunimit mes dy qyteteve për një sërë projektesh konkrete.

Erion Veliaj, kryetar i Bashkisë Tiranë: “Ajo që dakordësuam është se në fushën e emergjencave civile, vitin tjetër do të fillojmë një projekt të veçantë me Bashkinë e Tokios, kryesisht për të menaxhuar ato që shihen si më problematike, siç janë zjarret, përmbytjet apo të gjithë ndërhyrjet e tjera që duhet të bëjmë në një rrjet infrastrukture që e bën qytetin më të qëndrueshëm”.

Gjatë vizitës së tij në Tokio të Japonisë Veliaj zhvilloi një takim edhe me ministrin e Punëve të Jashtme të Japonisë, ku u vlerësuan marrëdhëniet shumë të mira që ekzistojnë mes dy vendeve tona.

“Qeverinë japoneze e kemi pasur pranë në shumë nga transformimet e Tiranës, qoftë për projektin që po bëhet me qeverinë qendrore, lidhur me kanalizimet e ujërave të zeza të Tiranës dhe asaj që është impianti i Kasharit apo edhe në nivel bashkie, i kemi bërë me ndihmën e agjencive dhe kolegëve japonezë”.

Kreu i Bashkisë së Tiranës vlerësoi gjithashtu rolin që luajnë dy ambasadat respektive në Tiranë dhe Tokio, si ura të forta bashkëpunimi, jo vetëm me shkëmbimet tregtare, por edhe në ato sociale./abcnews.al

BASTET-1280x720.jpg
ent ela15:21 | 22/10/2018

Tri shoqëri të basteve sportive shprehin gatishmërinë për të bashkëpunuar me institucionet shtetërore për respektimin e ligjit për lojrat e fatit.

Në ftesën drejtuar Kryeministrit, ministrit të Financave, kryetarit të Kuvendit dhe komisionit parlamentar të ekonomisë, ato shprehen për reduktim gradual të numrit të pikave të basteve dhe jo mbyllje të menjëhershme të tyre.

Numri i pikave të basteve sekondare deri në vitin 2019 shoqërite kërkojnë të reduktohen në 50% dhe të vijojë në mënyrë konstante vitet pasardhëse.

Shoqërite e basteve janë dakord me zbatimin e distancës deri në 100 metër nga institucionet arsimore dhe fetare, heqjen e reklamave në media, pastrimin e fasadave dhe vetratave të dyqaneve nga elementët e basteve sportive dhe zvogëlimin e përmasave të reklamave identifikuese. Gjithashtu ato shprehen pro monitorimit online të xhiros dhe të ardhurave nga organet shtetërore, si dhe  kontributit për identifikimin dhe trajtimin e personave që kanë varësi nga bixhozi dhe eleminimi i tyre nga pikat e basteve.

Realizimi i këtyre synimeve sipas shoqërive të basteve do të mbrojë interesat e sektorit dhe do të realizoje qëllimin e qeverisë. /abcnews.al

WhatsApp-Image-2018-10-18-at-09.29.14.jpeg
G. P.09:35 | 18/10/2018

Ministri i Brendshëm, Fatmir Xhafaj, ka paralajmëruar se shumë shpejt publikut do t’i jepen lajme interesante, duke nenkuptuar arrestime të rëndësishme apo goditje grupesh kriminale. Këtë deklaratë Ministri Xhafaj e ka bërë të ditur gjatë një deklarate të përbashkët për shtyp me drejtorin e policisë federale gjermane Dieter Roman, i cili ndodhet për një vizitë zyrtare në Shqipëri.

Fatmir Xhafaj, ministër i Brendshëm: “Ministria e Brendshme dhe policia e shtetit do të vazhdojnë ta mbajnë marrëdhënien tonë në mënyrë intensive ndërmjet dy vendeve. Marrëdhëniet tona në fushën e bashkëpunimit kanë hyrë në një dinamikë të re, ndaj është detyra e struktuarave për ta ruajtur këtë ritëm dhe për të vazhduar më tej. Forcimi i kapaciteteve teknike, trajnimi i stafeve policore dhe asistenca që është dhëne për policinë e shtetit ishin temë e bisedave tona. Shumë shpejt, më anë të kërkesës timë do të vendoset një këshilltar gjerman për asistencën teknike me termat afagjatë për policinë e shtetit. Morëm prej tij miratimin për ta asistuar nga afër projektin për kufirin. Një paketë ndihmash për policinë kufitare pritet të vijë nga Gjermania, dëshiroj ta falenderoj zotin Romann për këtë mbështetje kaq të vyer. Në përfundim dua të them se ne nuk jemi Gjermania, duhet ende pune të arrijmë ato standarte por një gjë është e sigurt se ne do të punojmë fort për të arritur këto standarte në punën tonë”.

Dieter Romann, drejtor i Policise Federale Gjermane: “Dëshiroj të shpreh mirënjohje për fjalët miqësore që thatë. Dy vendet tona i lidhin një traditë e gjatë me miqësinë dhe bashkëpunimin me sigurinë e rendit publik. Për ta thënë më specifikisht bëhet fjalë për luftën kundër krimit të organizuar. Ne kemi interesa të cilat po futen 100% me njëra-tjetrën që duhet ti ndjekim për ti realizuar. Puna e policisë, ditët e fundit ka shënuar progres, i lexueshëm në uljen e azilkërkuesve etj. Për këtë shprehimisht faleminderit z.ministër. Që prej vitit 2013 kemi në Tiranë një oficer ndërlidhës. Pas pak kohësh do të angazhojmë një ekspert tjetër që do të ndihmojë në konsolidimin e mëtejshëm të bashkëpunimit tonë. Sot asistuan në dorezimin e 20 mjeteve të asitencës teknike, do të punojmë bashkarisht për një asistencë afatgjatë. Jemi duke punuar për një projekt binjakëzimi të strukturave të policisë dhe angazhimin e përbashkët për shkëmbimin intensiv të informacioneve. Edhe Gjermania nuk është Shqipëria nëse bëhemi bashkë në pikat tona të forta do të jetë në të mirë të popujve tanë”./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono