Barcelona

spanja.jpg
G. P.11:36 | 17/01/2019

Dy skuadrat e Madridit e patën shumë të vështirë në Kupën e Mbretit në Spanjë. Kritikat janë të shumta pas humbjes së Realit dhe eleminimit të Atletikos.

Ishte një mesjavë e vërtetë futbolli. Jo rrallë ndeshjet e kupës fshijnë çdo lloj hierarkie dhe kështu ndodhi në Spanjë, me dy festa të skuadrave të vogla, që i shkaktuan disfatë klubeve të mëdhenj të Madridit. Reali ia doli që të kualifikohej për në çerekfinale, por pësoi një humbje aspak dinjitoze në fushën e Leganjesit, me shifrat 0-1.

Mungesa e Karim Benzemasë u ndje, pasi francezi nuk luajti për shkak dëmtimi, ndërsa Isco është shumë larg nivelit të mëparshëm, pavarësisht talentit të madh. Nëse i shtohet këtyre, dëmtimi i Bale dhe largimi i Cristiano Ronaldos, atëherë kuptohet më mirë gjendja e madrilenëve.

“Ishim të dobët në Leganes, – pranoi Solari, – sidomos në pjesën e parë. E vërteta është se nuk kemi lojtarë sa duhet, dhe sidomos kemi problem në sulm”.

Pavarësisht problemeve, pakkush priste një nivel të tillë ndaj Leganesit.

“Marka”: Katastrofë! Atletiko eleminohet në të tetat e finaleve nga Girona! Madridi kalon, por sërish jep një imazh të keq!

“AS”: Bomba e madhe plasi në “Uanda”! Simeone: Preferoj të luaj keq dhe të fitoj! Reali, Kejlori dhe askush tjetër!

Siç lexohet edhe në gazeta, Atletiko e pësoi më keq se Reali, pasi u eleminua.

Në një ndeshje thuajse të çmendur, tipike prej Kupe, bardhekuqtë barazuan 3-3 me Gironën, dhe nuk arritën dot në çerekfinale pas rezultatit të përgjithshëm, 4-4. Edhe pse Atletiko nuk quhet ende një superfuqi si Reali apo Barça, sërish prej saj pritej më shumë. Aq më tepër, me shpenzimet e shumta që I kanë dhënë mundësi trajnerit Diego Pablo Simeone që të luajë futboll më të bukur.

“Ka raste, – tha trajneri, – kur luan mirë dhe eleminohesh. Unë preferoj të luaj keq, por që të fitoj gjithnjë. Ishte ndeshje e vërtetë e kupës, e bukur. Përgëzime Gironës që nuk u dorëzua kurrë, ndërsa ne dhamë gjithçka, ndaj nuk mund t’i kritikoj lojtarët”.

Pas kësaj që hoqën dy ekipet madrilene, edhe Barcelona nuk është e qetë.

“Barça, me të gjitha forcat për të përmbysur në Kupë”, shkruan gazeta “Sport”.

Katalanasit luajnë në “Camp Nou” ndaj Levantes, ndërsa e kanë humbur 1-2 ndeshjen e parë./abcnews.al

BARCELONA-KAMPIONE-E-DIMRIT-1280x720.jpg
ent ela15:58 | 08/01/2019

Barcelona shpallet kampione e dimrit në Spanjë. Katalanasit arritën një fitore të vështirë, ndërsa Reali pësoi një tjetër turpërim, madje brenda në Madrid.

Viti i ri filloi ashtu si i vjetri. Barcelona nisi udhëtimet dhe ndeshjet, një rutinë, që u ndoq nga një tjetër gjë e zakonshme. Në fushën e Getafes, në sfidën e La Ligës, golin e parë për 2019-ën e shënoi Lionel Mesi, dhe ishte viti i katërt radhazi që argjentinasi e bën këtë. Kampionët e Spanjës fituan 2-1, falë edhe një goli të shkëlqyer të Luis Suarezit, dhe u shkëputën në 10 pikë nga rivali më i madh për titullin, Reali. Barazimi 1-1 i Seviljes me Atletikon, bëri që distanca e Barçës me vendin e dytë të rritet në 5 pikë. Gjithsesi, pati kritika.

Getafes iu anulua një gol kur shifrat ishin 0-0, për një faull të diskutueshëm, ndërsa ekipi modest madrilen e vuri në vështirësi rivalin e madh. Gazeta “Marka” ishte e qartë: Ky version i Barçës është i mirë për La Ligën, por jo për Championsin”. Gazeta thekson se katalanasit kanë luhatje të frikshme në lojën e tyre, që mund të ndëshkohen në Europë, siç u ndodhi vjet me Romën.

Gjithsesi, skuadra e trajnerit Valverde duket komode këtë sezon në Spanjë, dhe kjo për faj të Realit, edhe pse sapo u shpall kampion i botës. Madrilenët pësuan turpërimin e radhës, një humbje 0-2 në “Bernabeu” me Sociedadin, edhe pse u përpoqën shumë. Mungesa e qetësisë dhe e ekuilibrit po vret tërësisht sezonin e kampionëve të Europës. Mediat ishin të pamëshirshme.

“Marka”: “Bernabeu” zbrazet dhe ka arsye! Vetëm 53 000 spektatorë ndoqën një katastrofë të re të Realit në La Liga.

Barcelona është kampione e dimrit!

“El Mundo Deportivo” në Barcelonë, vendos në kopertinë foton e Mesit e Suarezit, duke festuar, dhe të Ramosit të dëshpëruar, me titullin: Në 10, pra duke treguar diferencën mes Barçës e Realit!

“Gjithçka shkoi keq për ne, – tha trajneri i Realit, Solari, – pësuam gol shpejt, patëm shumë raste, por nuk i shfrytëzuam, dhe nuk na u dha një penallti e pastër. Gjithsesi, jam i kënaqur me karakterin fitues të ekipit”.

“Nuk mundemi kurrë ta nënvleftësojmë Realin, – theksoi trajneri i Barçës, Valverde, – distanca nuk do të thotë gjë. Jam i kënaqur me fitoren, por e patëm të vështirë me Getafen, një kundërshtar i ashpër për këdo”.

Reali ka ende mundësi për trofe, pasi ndodhet në Champions dhe në Kupën e Mbretit, por mallkimi i kampionatit duket se vazhdon, me vetëm 2 tituj në 10 vitet e fundit. /abcnews.al

 

valverde.jpg
G. P.15:23 | 26/12/2018

Tek Barcelona ka pasiguri për të ardhmen e trajnerit Ernesto Valverde. Pavarësisht suksesit sportiv, nuk është diskutuar ende për rinovimin e kontratës.

Nuk ka asnjë të sharë për rezultatet. Pavarësisht nga dështimi në Champions edicionin e kaluar, sërish Ernesto Valverde realizoi objektivat në vitin e parë në detyrë tek Barcelona. Trajneri fitoi titullin kampion në Spanjë, dhe po ashtu Kupën e Mbretit, ndërsa këtë sezon ndodhet sërish në vendin e parë në La Liga, dhe në plotësisht në konkurrim për çdo titull.

Gjithsesi, kjo nuk ka mjaftuar që e ardhmja e tij të jetë e qartë. I ardhur në klub verën e vitit 2017, pas largimit të Luis Enrikes, Valverde nënshkroi një kontratë 2-vjeçare me të drejtë rinovimi për një vit tjetër. Puna e tij ishte shumë e mirë që ditët e para në “Kamp Nou”, por sidoqoftë nuk ka asnjë sinjal që do të aktivizohet klauzola në kontratë për rinovim. Vetë tekniku sikur i ka shtuar dyshimet për të ardhmen, me përgjigjet që ka dhënë, kur është pyetur për këtë çështje.

“Ne trajnerët jemi gjithnjë në lëvizje, – është shprehur ai, – ne jetojmë ditë pas dite, dhe javë pas jave”.

Privatisht, mësohet se Valverde është takuar me drejtuesit sportivë të klubit, por ka diskutuar për të marrë një qendërmbrojtës në janar, dhe jo për rinovimin e kontratës. Nuk është e qartë se përse Barcelona nuk thotë hapur nëse trajneri do të vazhdojë deri në 2020 apo jo. I vetmi sqarim ka ardhur disa muaj më parë nga presidenti Bartomeu, se nëse Valverde largohet në 2019, duhet të paguajë një dëmshpërblim. Me shumë gjasë, as klubi dhe as trajneri nuk janë plotësisht të bindur se projekti duhet të vazhdojë./abcnews.al

city-1280x720.jpg
G. P.19:35 | 15/12/2018

Manchester City u rikthye në krye të renditjes në Premier Ligë, pas një suksesi 3-1 ndaj Evertonit. Vendimtar ishte sulmuesi i Anglisë, Raheem Sterling.

Gjithçka ishte e merituar.

Manchester City la pas një javë të vështirë, pas humbjes me Chelsea dhe u rikthye në vendin e parë të Premier League-s angleze. Natyrisht, nuk mund të gëzohet para kohe, pasi Liverpool-i nuk ka luajtur ende ndaj Manchester United, dhe një fitore e të kuqve do ta ndryshonte sërish renditjen.

Gjithsesi, trajneri Pep Guardiola u ndje i lumtur me atë që pa në stadiumin “Etihad”. City dominoi ndaj një kundërshtari aspak të lehtë, duke qenë i fortë edhe kur e kishte topin nën kontroll, edhe kur atë e kishte kundërshtari.

Futboll ofensiv i nivelit të lartë, dhe po ashtu presion i fortë, që të kujton stilin e Barcelonës së Guardiolës. Sulmuesi brazilian, Gabriel Jesus, ishte autor i dy golave të parë, diçka që mezi e priste pas kritikave të kohëve të fundit. Gjithsesi, Evertoni reagoi 25 minuta para fundit, dhe Guardiola u desh të bënte lëvizjen që rezultoi përcaktuese.

Hodhi në fushë Raheem Sterlingun, që e kishte lënë në stol për t’u shlodhur. Sulmuesi i Anglisë realizoi golin e tretë me prekjen e parë të topit, 3 minuta pasi hyri në fushë.

Sterling ka qenë vendimtar vazhdimisht për City-n këtë sezon, dhe kjo është arsyeja që atij i është dhënë një kontratë e re me pagesë shumë të lartë. Manchester City ka 44 pikë pas 17 ndeshjeve të luajtura, ndërsa Liverpuli ka 42, me një ndeshje më pak./abcnews.al

 

icardi.jpg
G. P.12:48 | 11/12/2018

Interi dhe Tottenhami kërkojnë sot kualifikimin për në turin e dytë të Ligës së Kampionëve. Italianët duhet të fitojnë ndeshjen e tyre dhe të shpresojnë që anglezët të mos triumfojnë në Barcelonë.

Duelin e kanë sërish së bashku, por këtë herë në distancë. Interi e Tottenhami luajnë sot fatet e tyre në Ligën e Kampionëve në orën 21:00, me italianët që presin PSV Eindhovenin në “San Siro”, dhe anglezët që vizitojnë Barcelonën në “Camp Nou”.

Zikaltërit duan fitore me holandezët, diçka që edhe mund ta arrijnë, por u duhet edhe që Barça të mos lejojë Tottenhamin që të fitojë. Trajneri Luciano Spaleti përpiqet ta shohë gotën gjysmë plot, ndërsa Nainggolan nuk do të luajë.

“Do të jetë ndeshja më e rëndësishme e imja me Interin, – u shpreh ai, – është e qartë se nuk e kemi fatin tonë në duart tona, pasi varemi nga të tjerët, por unë kam besim në profesionalizmin e Barcelonës. Jam i kënaqur me ekipin tim, pasi jemi në kushte normale, që ne të kërkojmë kualifikim me PSV-në dhe Tottenhami me Barçën. Skuadra nuk ka probleme, thjesht të ruajë qendrueshmërinë për 90 minuta”.

Në ndeshjen tjetër, Tottenhamit normalisht i duhet fitorja në “Camp Nou”. Barcelona ka dy mungesa, atë të portierit Ter Stegen, dhe të sulmuesit Luis Suarez. Gjithsesi, trajneri i Tottenhamit, Mauricio Pochettino, nuk mendon se kjo e dobëson skuadrën katalanase.

“Barcelona ka cilësi të jashtëzakonshme në skuadër, – tha ai, – Ka lojtarë që mezi presin rastin të jenë në fushë, pasi është shumë e vështirë që të konkurrojnë me Mesin apo Suarezin. Natyrisht, mungesa e sigurt e Suarezit është një plus për ne. Gjithsesi, ne duhet të bëjmë punën tonë, jo të mendojmë se çdo të bëjë kundërshtari. Jam optimist se mund t’ia dalim edhe në fushën e Barcelonës”.

Nuk dihet nëse trajneri Valverde do të hedhë në fushë Mesi-n, Pique-në, Busquets-in apo Rakitic-in, në një ndeshje që ka vlerë vetëm për Tottenhamin apo për Interin, pasi katalanasit janë jo vetëm të kualifikuar, por edhe me vendin e parë në grup, të siguruar.

Trajneri i vendasve, Ernesto Valverde, e shtoi edhe më shumë misterin, kur u shpreh në konferencën për shtyp, se “do ta merrni vesh vetëm përpara ndeshjes, më herët nuk mund t’iu them gjë”.

Walker-Piters bën debutimin në Champions për Spursat, pasi mbrojtësit e krahut Tripier dhe Orie janë të dëmtuar. Barcelona kryeson grupin B me 13 pikë, Tottenhami e Interi kanë nga 7, ndërsa PSV e eleminuar me vetëm 1 pikë./abcnews.al

 

barca123.png
G. P.21:49 | 11/11/2018

Barcelona pësoi një humbje të papritur në kampionatin spanjoll, madje brenda në stadiumin “Kamp Nou”. Betisi e mundi 4-3, edhe pse katalanasit patën sërish në ekip, kapitenin e tyre.

Duhej të ishte mbrëmja e madhe e rikthimit të Mesit. Vërtet, duhej, pasi nuk ndodhi kështu dhe argjentinasi u prit me një humbje në shtëpi, ndërsa la pas dëmtimin. Festa u prish nga Betisi, skuadër e Seviljes që triumfoi 4-3 në “Kamp Nou” ndaj Barcelonës, kampione dhe kryesuese e La Ligës.

Një ndeshje që filloi dhe përfundoi e tensionuar për vendasit, të cilët ishin edhe të lodhur, por edhe disi të vetëkënaqur pasi kaluan me sukses provat me Interin në Champions. Zhunior Firpo e Hoakin shënuan dy golat e parë për miqtë në pjesën e parë. Pas pushimit, erdhi reagimi i katalanasve, por jo i mjaftueshëm. Mesi shënoi me 11-metërshin e fituar nga Zhordi Alba, por Barça është sot një ekip thuajse pa mbrojtje.

Argjentinasi Zhovani Lo Selso realizoi për 3-1 për Betisin, duke e bërë shumë të vështirë detyën e lojtarëve të trajnerit Valverde. Pati sërish shpresë në “Kamp Nou”, kur Mesi krijoi aksionin e golit të tretë, realizuar nga Arturo Vidal, veçse nuk qe e thënë që kampionët të merrnin të paktën një pikë. Betisi ndëshkoi sërish dobësinë difensive të katalanasve, duke bërë që goli i fundit, realizuar nga Mesi të ishte thjesht një kënaqësi personale.

Edhe pas kësaj humbjeje, Barcelona mbeti në krye të renditjes në La Liga, me 24 pikë, veçse me vetëm 1 pikë më shumë sesa Atletiko e Madridit apo Sevilja. Kampionët e Spanjës nuk po gjejnë dot stabilitet, duke kaluar nga ndeshje të mëdha si ndaj Realit e Interit, në paraqitje të dobëta si ndaj Leganjesit apo Betisit, dhe kjo ia rrezikon objektivin në kampionat dhe në Champions./abcnews.al

barca.png
G. P.18:08 | 10/11/2018

Përplasje të dhunshme mes agjentëve të policisë dhe manifestuesve separatistë në Barcelonë. Këta të fundit u përpoqën të ndalonin një manifestim të agjentëve spanjollë të policisë të cilët kërkonin paga më të larta. Policia katalanase ka përdorur shkopat e gomës kundër protestuesve. Dhe në muajin Shtator u regjistrua një incident i ngjashëm ku mbetëm të plagosur më shumë se 20 persona./abcnews.al

MBULIM-ALARMI-BARCELONE_ABCM2-T1.mpg_snapshot_00.00-1280x720.jpg
G. P.10:15 | 07/11/2018

Autoritetet ndërprenë për disa minuta qarkullimin e trenave me shpejtësi të lartë në Barcelonë. Mësohet se kjo është bërë me kërkesë të ekipeve speciale të Mossos, të cilët dyshonin se në dy trena ka pajisje shpërthyese. Për këtë policia katalanase bëri evakuuimin e këtyre dy trenave. “Kemi kryer kontrolle në stacionin hekurudhor në stacionin AVE dhe Sants, duke ndjekur protokollet”, shkruan në një njoftim në Tuiter policia e Barcelonës. Fillimisht autoritetet ndërprenë qarkullimin e shërbimit në orën 08:21 të mëngjesit. Më pas kanë kryer kontrolle të bagazheve të udhëtarëve të dy trenave. Më pas në orën 09:00 qarkullimi i trenave ka vijuar normalisht. Mësohet se gjatë kontrolleve të policisë është gjetur një granadë dore./abcnew.al

MESI-KTHEHET-NE-STERVITJE-ABC-M4-T2.mpg_snapshot_00.01-1280x764.jpg
G. P.22:10 | 31/10/2018

Lionel Mesi bën një kthim të papritur në stërvitje me Barcelonën. Ylli argjentinas pritej të mungonte disa javë, por ndoshta mund të jetë në fushë që të shtunën.

Pritej të mungonte të paktën tri javë, por me një yll të tillë nuk duhet të nxitohesh. Lionel Mesi bëri hapin e parë drejt riaftësimit të plotë pas dëmtimit, duke u kthyer në stërvitje për Barcelonën, në kompleksin e klubit. Argjentinasi zhvilloi seancë së bashku me shokët e skuadrës, një lajm shumë i mirë ky për tifozët dhe trajnerin Valverde, ndonëse pamjet filmike treguan se nuk e lëvizte shumë krahun e dëmtuar në ndeshjen ndaj Seviljes.

Gjithsesi, mediat flasin për një kthim të tij të mundshëm në fushë që këtë fundjavë, në ndeshjen e ligës spanjolle ndaj Rajos së Vajekanos. Valverde do të presë deri në fund dhe do të këshillohet me mjekët si dhe me vetë futbollistin përpara se të vendosë. Ekziston mundësia që ai të tregohet i kujdesshëm dhe që numri 10 të aktivizohet vetëm të martën e ardhshme, në ndeshjen e Championsit në fushën e Interit. Mesi ishte në formë të madhe përpara dëmtimit, duke shënuar 12 gola në 12 ndeshje të luajtura për Barcelonën, e duke e ndihmuar me vendin e parë në kampionat dhe me tri fitore në tri ndeshje në Ligën e Kampionëve./abcnews.al

MBULIM-NEYMAR-MASHTRIMI.mpg_snapshot_00.00-1280x720.jpg
G. P.17:41 | 31/10/2018

Ylli brazilian i Paris San Zhermen, Neimar, rerzikon deri në 6 vite burg nga gjykata spanjolle. Ai akuzohet se ka mashtruar gjatë transferimit të tij tek ekipi i Barcelonës, nga skuadra braziliane e Santos në 2013-n. Barcelona fillimisht pretendonte se kishte paguar 17.1 milionë euro për kapitenin e Brazilit, megjithatë një ankesë e një anëtarit të klubit hapi procesin gjyqësor për këtë transferim. Ky proces gjyqësor zbuloi se klubi kishte paguar rreth 40 milionë euro, duke arritur kështu një marrëveshje jashtë Gjykatës. Zyra e prokurorit ka thënë se marrëveshja mes Barcelonës dhe kompanisë braziliane ia kishte mohuar mundësinë klubeve të tjera që të blejnë Neymar dhe kjo është në kundërshtim me rregullat e tregut të lirë të futbollistëve./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono