barack obama

momenti-erdhi.png
G. P.23:29 | 05/11/2018

Pak orë i ndajnë amerikanët nga hapja e qendrave të votimit për zgjedhjet e mesit të mandatit. Beteja është e ndarë mes republikanëve të presidentit Trump që kërkojnë riafirmimin dhe demokratëve që synojnë revanshin. Të dhënat e fundit favorizojnë të majtën, nisur nga tendenca anti-shtet e elektoratit amerikan.

Momenti erdhi. Pas debateve, sondazheve, fushatës disamujore dhe spekulimeve pa fund, zgjedhjet e gjysmë mandatit në Shtetet e Bashkuara ndodhen pak orë larg. Në disa shtete, votimet kanë filluar prej javësh dhe pjesëmarrja ka tejkaluar kuotat e regjistruara më parë.

Në këtë pikë, demokratët kanë një optimizëm të moderuar sa u takon shanseve për të marrë nën kontroll pushtetin legjislativ. Kongresmenia Nensi Pelozi e kaloi disi cakun kur në shtetin e saj deklaroi se demokratët do ta fitojnë betejën për Dhomën e Përfaqësuesve.

Një rezultat i tillë do të kishte pasoja të menjëhershme dhe drastike për presidentin Donald Trump dhe kapacitetet e tij për të avancuar axhendën politike. Sipas analizës së korrespondentit të BBC, Enthoni Zurker, gjithçka në këtë proces e lëvizin paratë.

Kuotat e parave kesh që derdhen për kandidatët, partitë apo grupet e pavarura janë tregues i muskujve elektoralë për të realizuar publicitet, organizime dhe natyrisht për të nxitur qytetarët të dalin në votime. Dhe në 25 vitet e fundit, mbledhja e fondeve në prag zgjedhjesh ka qenë një nga karakteristikat kryesore të proceseve elektorale në Shtetet e Bashkuara.

Në vitin 1994, donacionet individuale, që janë të kufizuara me ligj, shkuan në favor të republikanëve, të cilët morën nën kontroll Dhomën e Përfaqësuesve, për herë të parë që prej vitit 1949. Ndërkohë, këtë vit, shifrat kanë shkuar në favor të demokratëve, me 649 milionë dollarë kundër 312 milionë të republikanëve. Sidoqoftë, për republikanët situata nuk paraqitet edhe aq e zymtë.

Sipas analizës së Zurker, ata kanë donatorë të shumtë që i kanë xhepat të thellë dhe që derdhin paratë e tyre për shpenzime pa iu dridhur dora. Ndaj, në zonat elektorale kyçe, Partia Republikane lundron në para. Por kur bëhet fjalë për donatorë të vegjël, atëherë shtiza e peshores rëndon qartë majtas. Megjithatë, ai financiar nuk është i vetmi aspekt i zgjedhjeve.

Zgjedhjet e gjysmë mandatit këtë herë janë edhe një test për presidentin në detyrë. Kur janë të pakënaqur me punën e presidentit, votuesit e nxjerrin inatin ndaj partisë së tij. Ndërsa kur kreu i shtetit ka bërë një punë të mirë, atëherë partia shpërblehet, ose, më e pakta, nuk ndëshkohet rëndë.

Një sondazh i Gallup për aprovimin e figurës së presidentit në 60 vitet e fundit tregon se këtë herë tendenca do të ndryshojë. Mbështetja për Donald Trump ka qenë e qëndrueshme, nëse merret parasysh zhurma e aktivitetit të tij në 1 vit e gjysmë. Në fund të Gushtit, mbështetja për presidentin ishte 40 për qind dhe në vigjilje të zgjedhjeve të gjysmë mandatit ajo është sërish 40 për qind. Sipas BBC, kjo nuk është një shenjë e mirë për republikanët.

Që nga marrja e detyrës, kreu i shtetit ka sfiduar gravitetin politik, por këtë herë kjo rënie e popullaritetit të tij rrezikon ta fundosë të djathtën ditën e martë. Trump dhe republikanët e tij e kanë vënë theksin tek shifrat pozitive ekonomike, të cilat sipas tyre janë arsyeja përse ata duhet të vijojnë kontrollin legjislativ edhe për 2 vjet të tjera në Uashington.

Por nëse u referohemi precedentëve historikë, ekonomia në rritje nuk ka qenë kurrë një garanci për suksesin e partisë së presidentit. Në vitin 1994, kur demokratët dorëzuan Kongresin, ekonomia po rritej me mbi 4 për qind, edhe pse papunësia ishte pak më e lartë se 5.8 për qind që është aktualisht. GDP-ja në tremujorin e fundit në Shtetet e Bashkuara ka rënë paksa, pasi preku nivelin 4.2 për qind në tremujorin e dytë.

Kombinuar me papunësinë, që është në nivelin më të ulët në 49 vjet, shifrat janë pa dyshim pozitive. Gjatë fushatës, presidenti Trump u fokusua më shumë tek kontrolli i emigracionit se sa tek ekonomia, sikurse do të donin disa republikanë. Dhe nëse i referohemi historisë, presidenti mund të ketë bërë mirë të këtë hedhur sytë në një çështje tjetër, pasi ekonomia nuk është garanci për sukses.

Por krahas ekonomisë, sondazheve dhe analizave, elementi kyç në një garë elektorale janë vetë kandidatët. Janë pikërisht ata që kanë emrin e tyre në fletët e votimit dhe janë sërish ata që mund të mbeten të papunë nëse batica elektorale shkon kundër tyre. Përballë prespektivës së një turpi elektoral, shumë politikanë zgjedhin tërheqjen e parakohshme.

Por kjo zor se ndikon shumë tek rezultatet. Tërheqja e disa figurave nuk e shpëtoi partinë e Barak Obama nga kasaphana zgjedhore e vitit 2010. Këtë herë, kryetarë të shumtë të komisioneve parlamentare dhe vetë kryetari i Dhomës së Përfaqësuesve, Pol Rajan iu bashkuan tendencës së dorëheqjes, një sinjal ky se republikanët mund të mos jenë mazhorancë edhe për shumë kohë. Gjithashtu, kjo mund të jetë një tjetër tregues i prirjeve anti-pushtet të elektoratit, edhe për faktin se ka më shumë republikanë që garojnë për rizgjedhjen se ç’ka demokratë dhe kjo mund të sjellë një ndërrim pushtetesh në Uashington./abcnews.al

obama.jpg
G. P.12:23 | 03/11/2018

 “Donald Trump gënjen dhe shpik gjërat”.

Nuk ka qenë asnjëherë kaq i ashpër sulmi i ish-presidentit të Shteteve të Bashkuara të Amerikës Barack Obama. Ky i fundit bëri këto akuza gjatë një takimi elektoral për demokratët në Florida.

Obama akuzoi kreun e Shtëpisë së Bardhë se po përçan vendin me linjën e tij të ashpër për emigrantët. Ish-presidenti amerikan theksoi se pasardhësi i tij nuk ka mëshirë dhe se kjo nuk është Amerika që populli do.  /abcnews.al

john-mccain.jpg
G. P.08:55 | 28/08/2018

Senatori John McCain, i cili vdiq të shtunën në moshën 81-vjeçare nga kanceri në tru, ka lënë një letër lamtumire për bashkëkombasit e tij.

“Jetova dhe u largova nga jeta si një amerikan krenar,” shkruan McCain.

“Ne e dobësojmë madhështinë tonë kur ngatërrojmë patriotizmin tonë me rivalitetet klanore që kanë mbjellë armiqësi, urrejtje dhe dhunë në të gjitha anët e globit. Ne e dobësojmë atë kur fshihemi prapa mureve, në vend që t’i rrëzojmë ato, kur dyshojmë në fuqinë e idealeve tona, në vend që t’u besojmë atyre si forcë e madhe për ndryshim, ashtu siç kanë qenë gjithmonë,” thuhet në letër.

“Ne jemi treqind e njëzet e pesë milionë individë, secili me mendimin e vet dhe që debatojmë zhurmshëm. Ne zihemi dhe konkurojmë madje nganjëherë fyejmë njëri-tjetrin në debatet tona të ashpra publike. Por gjithnjë kemi pasur shumë më tepër gjëra të përbashkëta me njëri-tjetrin sesa mosmarrëveshje. Nëse e ngulisim këtë në mendje dhe i japim njëri-tjetrit të kuptojë se ne të gjithë e duam vendin tonë, atëherë do të arrijmë t’i kapërcejmë këto momente sfidash dhe do të dalim prej tyre më të fortë se më parë, ashtu si gjithmonë.”

“Mos e humbni shpresën nga vështirësitë e tanishme, por besoni gjithmonë në premtimin dhe madhështinë e Amerikës, sepse këtu asgjë nuk është e pashmangshme. Amerikanët kurrë nuk largohen nga gara. Ne kurrë nuk dorëzohemi. Kurrë nuk i fshihemi historisë. Ne bëjmë histori.”

“Lamtumirë, vëllezër amerikanë. Zoti ju bekoftë dhe Zoti e bekoftë Amerikën”, përfundon letra e Senatorit McCain.

FLAMURI MBI SHTËPINË E BARDHË

Flamuri mbi Shtëpinë e Bardhë, i cili u ul gjatë fundjavës në gjysmë shtizë si shenjë respekti për senatorin John McCain, u ngrit përsëri i plotë, por të hënën pasdite u ul përsëri.

Ngritja e flamurit mbi Shtëpinë e Bardhë u prit me kritika nga e majta dhe e djathta, duke përfshirë organizatën e veteranëve American Legion.

Ndërkohë, flamuri në selinë e Kongresit vazhdon të jetë në gjysmë shtizë për nder të senatorit të Arizonës.

Presidenti Donald Trump ka shprehur ngushëllimet e tij në Twitter për familjen e senatorit McCain, por deri të hënën pasdite nuk kishte lëshuar një proklamatë për nder të tij.

Të hënën pasdite ai lëshoi një deklaratë ku thoshte: “Megjithë mosmarrëveshjet tona politike, unë e respektoj shërbimin që Senatori John McCain i ka bërë vendit dhe për nder të tij kam nënshkruar një proklamatë për të ulur flamurin amerikan në gjysmë shtize deri në varrimin e tij. I kam kërkuar nënpresidentit Mike Pence të mbajë një fjalim në ceremoninë për nder të senatorit McCain në ndërtesën e Kapitolit të premten”.

Presidenti Trump dhe Senatori McCain kanë shkëmbyer prej kohe kritika mes tyre.

Kodi i Flamurit i Shteteve të Bashkuara të Amerikës kërkon që flamujt të ulen “në ditën e vdekjes dhe të nesërmen e asaj dite për një anëtar të Kongresit.”

Megjithatë, sipas një tradite të hershme, për njerëzit me kontribut të shquar për vendin, flamuri qendron i ulur deri në varrimin e tyre.

Në vitin 2009, pas vdekjes së Senatorit demokrat Ted Kennedy, Presidenti Barak Obama urdhëroi uljen në gjysmë shtize të flamujve në ndërtesat qeveritare, të cilët qëndruan ulur për disa ditë.

Presidenti Trump nuk iu përgjigj gazetarëve në Shtëpinë e Bardhë kur u pyet nëse e konsideronte senatorin e ndjerë një hero.

CEREMONI NË ARIZONA DHE UASHINGTON

Senatori John McCain, i cili vdiq të shtunën pas një beteje të gjatë me kancerin e trurit, do të nderohet me ceremoni në Arizona dhe Uashington.

Trupi i tij do të vendoset së pari në kapitolin e shtetit të Arizonës, ku të mërkurën do të mbahet një ceremoni private, me rastin e 82-vjetorit të ditëlindjes.

Të enjten, në një kishë baptiste të qytetit Feniks do të mbahet një shërbim përkujtimor privat me pjesmarrjen e publikut.

Në Uashington, ku flamujt në institucionet e ndryshme janë ngritur në gjysmë shtizë, trupi i senatorit McCain do të vendoset të premten në ndërtesën e Kapitolit, ku njerëzit do të bëjnë homazhe.

McCain do të jetë senatori i 13-të amerikan, trupi i të cilit nderohet në sallën rrethore të Kapitolit, një nder që u rezervohet “qytetarëve më të shquar” të vendit, sipas zyrtarëve të Kapitolit.

Të shtunën në Katedralen Kombëtare të Uashingtonit do të mbahet një shërbim përkujtimor, ku do të flasin ish-presidentët Barak Obama dhe Xhorxh W. Bush.

Senatori McCain do të prehet në Varrezat e Akademisë Detare në Anapolis të shtetit Marilend, pranë mikut më të ngushtë që ai kishte gjatë viteve të Akademisë detare, Admiralit Chuck Larson./Zëri i Amerikes

obama.jpg
G. P.16:07 | 17/07/2018

Ish-presidenti amerikan, Barack Obama, ka vizituar fshatin e lindjes së babait të tij në Kenia, ku është takuar dhe më përfaqësues të politikës në vend. Më pas, ai do të udhëtojë në Afrikën e Jugut, ku do të mbajë një fjalim me rastin e 100-vjetorit të lindjes së ish-presidentit Nelson Mandela.

Në udhëtimin e tij të parë në Kenia si ish-president i Shteteve të Bashkuara të Amerikës, Barack Obama vizitoi fshatin e origjinës së babait të tij, Kogelo, në kontenë e Siaia, rreth 400 kilometra në lindje të Nairobit.

Ish-kreu i Shtëpisë së Bardhë kërceu në ritmet e muzikës tradicionale së bashku me gjyshen e tij. Gjatë qëndrimit të tij në vend, ai u takua dhe me presidentin e Kenias si dhe liderin e opozitës. Televezioni shtetëror i Kenias transmetoi pamjet e Obamës tashmë të thinjur, i cili ndodhet në vendin afrikan për të mbështetur një projekt për të rinjtë që mbështetet nga motra e tij nga babai.

Pasi të largohet nga Kenia, Obama do të jetë në Afrikën e Jugut për të mbajtur një fjalim me rastin e 100-vjetorit të lindjes së is-presidentit dhe çmimit Nobel për Paqen, Nelson Mandela./abcnews.al

judicial-watch.jpg
G. P.15:04 | 07/04/2018

Judicial Watch, një grup aktivistësh konservatorë amerikanë dhe monitoruesish që hetojnë shkeljet e zyrtarëve të lartë, raporton se ish-administrata Obama e financuar nga George Soros ka dhënë 9 milionë dollar në mënyrë që kryeministri shqiptar Edi Rama të kapë sistemin e drejtësisë në vend.

Presidenti i Judical Watch, Tom Fitton, i cili akuzoi miliarderin George Soros për përfshirjen nëpërmjet fondeve të dhëna administratës Obama në reformën në drejtësi në vendin tonë, në interes të kryeministrit aktual Rama, ka dhënë një intervistë për televizionin amerikan FoxNews. Ai tregoi ndër të tjera se si administrata e ish-presidentit Barack Obama e financuar nga George Soros, ka ndihmuar financiarisht kryeministrin shqiptar, Edi Rama, në mënyrë që ky i fundit të kishte mundësi të kapte sistemin e drejtësisë.

Sipas Fiton, administrata e Obamës dërgoi rreth 9 milionë dollarë për një grup të quajtur ‘Instituti i Menaxhimit Lindje-Perëndim’, organizatë që financonte aktivitetet politike në Shqipëri. Po sipas tij, paratë sollën fuqizimin e qeverisë socialiste dhe të Edi Ramës në Shqipëri.

Ai këmbënguli gjatë intervistës se fondet ndihmuan në sponsorizimin e sondazheve që ‘prodhuan rezultate të tipit, 91 për qind të mbështetjes pro-qeverisë ose thënë ndryshe pro-Sorosit që po financonte Reformën në Drejtësi në një kohë që kjo reform i shërben qeverisjes së majtë.
Sipas Judical Watch, Soros, një miliarder i krahut të majtë hungarezo-amerikan, i ka përdorur paratë e dhëna nga Administrata Obama për të nxitur ‘reformën’ e sistemit gjyqësor shqiptar. Më tej, në raportin e kësaj organizate thuhet se kryeministri shqiptar Edi Rama, i zgjedhur në vitin 2013, është kreu i Partisë Socialiste prej më shumë se një dekade.

Sipas Fitton, e keqja më e madhe është se, Soros financon grupet e tij qe janë të lidhura me organizata aktive anti politikës aktuale amerikane, në Hungari, Guatemalë dhe Kolumbi. Ai pretendoi se organizata të lidhura me Sorosin kanë këshilluar dhe kanë bërë politikën e tij në Shqipëri.

Gjashtë senatorë amerikanë të drejtuar nga senatori Mike Lee i kërkuan sekretarit amerikan të Shtetit të atëhershëm, Rex Tillerson, të bënte një hetim në çështjen Soros-Shqipëri. Një hetim që mendohet se ka nisur tashmë. Judical Ëatch akuzon dhe ambasadorin amerikan në Tiranë Donald Lu si të përfshirë në këtë çështje, por ky i fundit ka mohuar gjithçka. Mediat konservatore në Shtetet e Bashkuara të Amerikës po i japin një hapësirë shumë të gjerë me pasqyrimin e kësaj çështjeje./abcnews.al

grisham-1280x659.jpg
G. P.19:32 | 09/03/2018

Mbreti i thrillerëve ligjorë, John Grisham, librat e të cilit janë përkthyer edhe në shqip, ka kritikuar ashpër lidershipin aktual në Shtetet e Bashkuara, që sipas tij ka futur në krizë institucionale Amerikën.

Është një nga shkrimtarët më në zë në Shtetet e Bashkuara dhe në gjithë botën për romanet e tij me karakter ligjor. Dhe John Grisham, pena e të cilit ka denoncuar gjithmonë problemet dhe padrejtësitë që karakterizojnë “tokën e premtuar” nuk ngurron të kritikojë lidershipin aktual amerikan.

I ndodhur në Milano të Italisë për promovimin e librit të radhës, Grisham ka deklaruar se problemi më i madh me të cilin përballet Amerika sot është hyrja e shfrenuar në borxhe e të rinjve që duan të përfundojnë studimet. Këtë subjekt ai e ka prekur në librin “The Rooster Bar”, që tregon historinë e tre të rinjve, që në përpjekje për të ecur në jetë regjistrohen në një institut në duart e një afaristi njujorkez të paskrupullt dhe papritur gjenden me borxhe deri në fyt.

“Personazhet kryesore të librit tim janë tre vetë, të cilët luftojnë kundër një njeriu negativ, që përfaqëson tre gjëra njëkohësisht: qeverinë, ligjin dhe bankat që japin kreditë”, ka thënë Grisham. Por mbreti i thrillerëve ligjore nuk ndalet me kaq në rebeshin e kritikave. Sipas tij, Shtetet e Bashkuara ndodhen në një krizë të madhe, me institucionet që nuk funksionojnë.

“Duhet një reformë në drejtësi, në sistemin ligjor, sidomos për dënimin me vdekje, procesi për të cilin ka një kosto të madhe. Në burgjet e Amerikës ka disa dhjetëra mijëra të pafajshëm dhe kjo është një nga shqetësimet e mia më të mëdha”, ka thënë Grisham.

Por shkrimtari, librat e të cilit janë përkthyer edhe në shqip, nuk ngurron të shprehë qëndrimin e tij edhe sa i takon lirisë së armëve dhe për këtë nuk i kursen kritikat.

“Jetojmë në një vend të çmendurish. Armët që prodhohen sot janë shumë të rrezikshme, mund të blihen nga të gjithë. Janë armë të shkatërrimit në masë”, ka vijuar Grisham.

Sa i takon shanseve për ndryshim, ai nuk sheh presidentin aktual Donald Trump si personin që do të zgjidhë problemet.

“Na mungon Obama. Sot mund të themi se ai ka bërë një punë të mirë, edhe pse i kishte duart e lidhura. Kongresi ishte në duart e republikanëve, që e urrenin. Për ne është e habitshme se si Trump ka arritur deri këtu. Ai ishte një person i parekomandueshëm 30 vjet më parë e jo më tani”, ka shtuar Grisham./abcnews.al

donald-trump-press-conference-1280x915.jpg
G. P.20:26 | 21/02/2018

Presidenti amerikan Donald Trump ka futur në lojë Prokurorin e Përgjithshëm për skandalin “Russiagate”, duke i bërë thirrje atij që të hetojë edhe parardhësin e tij, Barack Obama.

Presidenti amerikan, Donald Trump, i ka bërë thirrje Prokurorit të Përgjithshëm, Jeff Sessions, që të nisë një hetim mbi parardhësin e tij Barack Obama. Trump e ka akuzuar disa herë Obamën se ka dështuar në parandalimin e ndërhyrjeve të huaja në zgjedhjet e dy viteve më parë, por kjo është hera e parë që ai shënjestron prokurorin e përgjithshëm, të cilin e zgjodhi personalisht për të drejtuar Departamentin e Drejtësisë.

“Nëse të gjitha ndërhyrjet ruse ndodhën gjatë administratës Obama, atëherë përse ata nuk janë subjekt i ndonjë hetimi? Përse nuk bëri gjë Obama për të parandaluar ndërhyrjet? Përse nuk hetohen krimet e demokratëve? Pyesni Jeff Sessions”, u ka thënë Trump ndjekësve të tij në Twitter. Trump ka nisur një revansh ndaj Sessions që kur ish-senatori i Alabamës shpëtoi veten e tij nga të gjitha hetimet mbi fushatën e zgjedhjeve të 2016-s, përfshirë ato që kanë të bëjnë me ndikimin rus.

Vitin e kaluar, Trump e sulmoi ashpër atë po në Tëitter, kur e akuzoi për indiferencë ndaj shkeljeve të kandidates rivale Hilllary Clinton dhe ndaj çështjes së rrjedhjes së informacioneve. “Përse nuk i hetoni krimet e Hillaryt dhe marrëdhëniet me Rusinë?”, u shpreh asokohe presidenti amerikan. Sa i takon deklaratës së fundit, Departamenti i Drejtësisë, që heton vetëm krimet e kryera brenda territorit të Shteteve të Bashkuara, ka refuzuar të bëjë komente./abcnews.al

vlcsnap-error853-1280x720.jpg
G. P.22:30 | 13/02/2018

Policia në Uashington po heton një substancë pluhuri të bardhë që është dërguar në një zarf në adresën e zyrës së ish-presidentit, Barack Obama. Sipas mediave amerikane, ngjarja ka ndodhur gjysmë ore pas mesnate, me orën lokale, në rrugën 24, në veri-perëndim të Uashingtonit.
Obama ka marrë me qira një hapësirë në ndërtesën, që është në pronë të organizatës jofitimprurëse, World Wildlife Fund, që ka dhe zyrat e veta atje. Trafiku i dendur vonoi mbërritjen e skuadrave të emergjencës, që morën nën kontroll substancën e dyshimtë. Ngjarja vjen një ditë pasi bashkëshortja e djalit të presidentit Trump u dërgua në spital pasi preku një letër me pluhur të bardhë, që i ishte dërguar në shtëpi./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono