Bajern

bayern.jpg
G. P.21:17 | 09/03/2019

Bajerni doli në vendin e parë të Bundesligës gjermane, me golaverazh më të mirë sesa Dortmundi. Robert Levandovski shënoi dy gola duke vendosur një rekord.

Dy fitore për të vazhduar garën ballë për ballë. Bajerni e Dortmundi i kaluan me sukses sfidat e javës në Bundesligë, ndonëse ndeshjet nuk i ngjanë aspak njëra-tjetrës. Bavarezët nuk patën asnjë problem ndaj Volfsburgut, madje e kthyen në një garë për gola, me rezultatin përfundimtar 6-0.

Robert Levandovski ishte autor I dy rrjetave, për 2-0 në minutën e 37-të dhe për 6-0 pesë minuta para fundit. Sulmuesi polak ka tani 197 gola në Bundesligë, duke iu afruar shifrës simbolike 200. Levandovski është i huaji që ka realizuar më shumë në kampionat, duke lënë pas Klaudio Pizarron e Verderit.

Golat e tjerë kishin për autorë Serzh Gnabrinë, Hames Rodrigezin, Tomas Mylerin dhe Xhoshua Kimihun. Shumë më i vështirë suksesi i Dortmundit. Pjesa e parë në “Signal Iduna Park” ndaj Shtutgartit u mbyll pa gola, ndërsa pas pushimit Marko Rojs me penallti gjeti avantazhin.

Gjithsesi, të rinjtë vendas nuk e mbajtën presionin dhe u barazuan shpejt nga Mark-Oliver Kempf. Ekipi i trajnerit Lysien Favre, u kthye megjithatë tek suksesi, me golat e vonshëm nga Pako Alkaser dhe Kristian Pulishiç.

A do të thotë kjo se u la pas kriza në Bundesligë dhe eleminimi nga Championsi?

Nuk është e lehtë ta thuash, ndërsa gara për titull me Bajernin vazhdon e ashpër. Dy skuadrat kanë nga 57 pikë, por bavarezët kanë golaverazh më të mirë, duke mbajtur vendin e parë./abcnews.al

37-1280x853.jpg
G. P.14:40 | 19/02/2019

Liverpool-Bayern është dueli më i madh i Championsit në raundin e dytë. Dy skuadrat e famshme ndeshen sonte, në orën 21:00, në stadiumin “Anfield”, dhe anglezët janë favoritë për fitoren.

Një udhëtim i tillë do të quhej i mërzitshëm, nëse destinacioni nuk do të ishte ky që është. Bayerni nuk po shkon në një ndeshje të çfarëdoshme europiane, por në atë me Liverpool-in në Ligën e Kampionëve.

Një nga duelet më klasikë të klubeve në kontinent zhvillohet sonte në orën 21:00, në stadiumin e famshëm “Anfiled Road”.

Liverpool-i është qyteti i Bitëllsave, një nga grupet më të mëdhenj të historisë, në mos më i madhi, dhe gjermanët bënë një krahasim të famshëm. Katër prej tyre, Myler, Humels, Nojer dhe Levandovski, imituan kopertinën e njërit prej albumeve të Bitëllsave.

I tillë, albumi “Ebej Roud”, ku Lenon, Mekartni, Starr e Harrison, kalonin në vijat e bardha të rrugës Ebej Roud të Londrës.

Trajneri i bavarezëve, Niko Kovaç, ka shqetësime me mungesat, pasi Tomas Myler është i pezulluar, Toliso e Roben janë të dëmtuar, ndërsa Gorecka e Riberi në dyshim.

“Liverpool ishte shorti më i vështirë që mund të na qëllonte, – pohoi trajneri kroat, – një kundërshtar i madh dhe një stadium i madh me një atmosferë të jashtëzakonshme. Gjithsesi, lojtarët e mirë dinë ta përballojnë presionin”.

Liverpool-i e ka edhe më keq. Qendra e mbrojtjes do të jetë e zbuluar pasi lojtari kryesor, Van Dajk, është i pezulluar, Xho Gomez i dëmtuar, dhe kroati Lovren shumë në dyshim. Sulmuesi brazilian Firmino humbi stërvitjen e fundit, për shkak të gripit, por besohet se do të jetë gati. Ndeshja është vlerësuar si një sfidë personale e Jurgen Klopp, ish-trajner i Dortmundit, dhe gjermani sqaron.

“Nuk ka asgjë personale, nuk e mendoj kurrë kështu, – tha ai, – është duel mes dy skuadrave të mëdha. E vërtetë që isha tek Dortmundi dhe pata rivalitet me Bajernin, por kjo ishte normale. Shpresojmë të kemi sukses, mundësitë janë, por do të jetë shumë e vështirë”.

Përballja është mes dy skuadrave që e kanë fituar nga pesë herë trofeun më të madh të klubeve në Europë, si Champions apo si Kupë të Kampionëve, dhe që kanë që të dy nga 11 trofe kontinentalë.

Si bilanc, Liverpool-i ka fituar dy ndeshje, ka humbur një, ndërsa katër kanë përfunduar në barazim. Anglezët janë kualifikuar dy herë, janë eleminuar një herë, dhe kanë fituar finalen e Superkupës së Europës ndaj bavarezëve në 2001.

Golat janë 9-7 po për Liverpool-in. Liverpool-i jepet favorit për fitore sonte, si dhe lehtësisht favorit për kualifikim./abcnews.al

augsburg.jpg
G. P.21:49 | 16/02/2019

Kritika të forta për Bajernin, pavarësisht fitores në Bundesligë. Trajneri Kovaç u shpreh i shqetësuar në pritje të ndeshjes ndaj Liverpulit në Champions.

U duk jo sikur kishte fituar, por sikur ishte mundur. Rrallë mund të ketë ndodhur që Bajerni të ketë dalë nga fusha me kaq shumë kritika mbi vete. Fitoi në Augsburg dhe iu afrua vendit të parë në Bundesligë, por mediat dhe vetë trajneri Niko Kovaç, i tregoi skuadrës bavareze se kjo nuk mjafton për t’ia dalë mesjavën e ardhshme në Champions.

“Që të gjithë ne duhet të jemi më lart sesa kaq, kur të luajmë ndaj Liverpulit, – u shpreh Kovaç pas ndeshjes, – në fazën mbrojtëse jemi ende dobët dhe Liverpuli është shumë i fortë në sulm”.

Ai e kishte fjalën për dy golat e pësuar, njërin autogol nga Leon Gorecka. Kampionët e Gjermanisë janë ndëshkuar në çdo ndeshje të vitit 2019. Deri tani, në Bundesligë janë pësuar 26 gola, ndërsa vjet ishin 28 deri në fund të sezonit.

“Zydojçe Cajtung” ngacmon bavarezët: Golat e kundërshtarit ishin të shkëlqyer!

Drejtori sportiv, Salihamixhiç, po ashtu u shpreh i pakënaqur: “Kjo paraqitje në mbrojtje nuk mund të lejohet të ndodhë herë tjetër”. Edhe pse diferenca e përkohëshme me Dortmundin është zvogëluar në 2 pikë, sërish përpara bavarezëve qendron pengesa “Liverpul” në Champions. Lajmi i mirë ishte që shënuesi i dy golave, Kingsli Koman, pati dëmtim të vogël në Augsburg dhe është i gatshëm për të luajtur./abcnews.al

niko-kovac.jpg
G. P.23:20 | 07/02/2019

Trajneri i Bajernit, Niko Kovaç, pati kritika për skuadrën e tij, pavarësisht nga kualifikimi në Kupën e Gjermanisë. Tekniku kroat mbeti i pakënaqur nga gabimet e futbollistëve.

Luajti mirë dhe dominoi një ndeshje që pritej shumë më e vështirë. Bajerni la pas disfatën e Leverkusenit në Bundesligë, për t’u kualifikuar në gjysmëfinale të Kupës së Gjermanisë, me suksesin 3-2 në Berlin ndaj Hertës, ndonëse nuk është se kënaqi plotësisht. Sërish u desh të kaloheshin vuajtje të mëdha.

Kampionët fituan vetëm në 30 minutat shtesë, në një shpenzim të madh energjish, që nuk duhej të ndodhte me atë që dhanë në fushë. Trajneri Niko Kovaç nuk ngurroi të gjente arsyen.

“Ne duhet të mos bëjmë gabime të tilla në të ardhmen, – tha ai, – gabuam gjëra elementare. Nëse do të jemi më të vëmendshëm, nuk do të pësojmë 2 apo 3 gola, dhe do ta kemi më të lehtë për të fituar ndeshjet”.

Pa dyshim, fjalët ishin mbi të gjitha për Mats Humelsin që i fali Hertës golin e barazimit 2-2. Shoku i Humelsit në mbrojtje, Niklas Zyle, e mbrojti kolegun duke thënë se këto janë gjëra që ndodhin, veçse tek Bajerni po ngjajnë pak si shpesh.

Mitelshtat shënoi i pari për Hertën, pastaj Serg Gnabri realizoi dy herë për Bajernin, përpara sesa Zelke të barazonte. Në shtesë, Kingsli Koman, i ardhur nga stoli, shënoi golin përcaktues në 98’. Kupa është edhe më shumë objektiv për bavarezët këtë edicion, pasi Bundesliga duket në dorë të Dortmundit./abcnews.al

SHORTI-I-CHAMPIONSIT.mpg_snapshot_00.31-1280x720.jpg
G. P.19:17 | 17/12/2018

Çifte të mëdha dolën nga shorti i turit të dytë të Ligës së Kampionëve. Gjithsesi, disa skuadra të mëdha si Reali, Barcelona apo Mançester Siti patën fat nga goglat.

Liverpool-Bayern, Atletico Madrid Juventus dhe Manchester United-PSG ishin sfidat më delikate që rezervoi edhe shorti për 1-16 e finaleve në UEFA Champions League. Skuadra potenciale e këtij edicioni për këtë trofe, Juventus do t’i duhet të kalojë një ferr të vështirë siç është fusha e “Vincente Calderon” ku Simeone do të kërkojë të ndalë furine e madhe juventine të deritanishme. Një tjetër përplasje klasike është ajo mes Liverpool-it dhe Bayern. Klopp do të rigjejë sërish përballë bavarezët këtë herë me një stil e profil tjetër kompeticioni dhe loje.

Mourinho me Manchester-in edhe ata me një shuplakë nga goglat pasi përballë do të kenë PSG. Do ti duhet të bëjnë shumë në takimin e parë në mënyrë që të kalojnë sa më lehtë të mundshëm sfidën në Paris. Goglat e shortit kanë përkëdhelur dukshëm Manchester City-n dhe Barcelonën. Guardiola do të ndeshet me Schalken dhe takimin e parë do e luajë në Gelsenkirchen, ku do të kërkojë të mbyllë gjithçka aty. Francezet e Lion do të luajnë përballë Barcelonës së Mesit në një sfidë në letër me të superfavorizuar skuadrën e Valverdes.

Ajaks-Real Madrid një tjetër përballje delikate, por me stekën e kualifikimit që anon për nga madrilenët që do të luajnë në fushën e tyre takimin e dytë. Po kështu një tjetër përballje shumë shumë interesante është edhe përplasja anglo-gjermane, Tottenham-Borusia Dortmund, ku të dyja skuadrat janë në ekuilibër të plotë të shanseve për kualifikim. Diçka më e thjeshtë për ekipin tjetër Italian të Romës që do të përballet me Porton, por që do ti duhet të mbyllë gjithcka në sfidën e parë në “Olimpico” në mënyrë që të mos ketë aspak surpriza në kthim./abcnews.al

BAJERNI-LEVANDOVSKI-SUPERKUPA-ABC-M4-T1.mpg_snapshot_00.04-1280x720.jpg
G. P.15:17 | 13/08/2018

Robert Levandovski vendosi një rekord golash në finalen e Superkupës së Gjermanisë. Sulmuesi polak ishte protagonisti kryesor në fitoren e Bajernit.

Bëri rokadë me skuadrat, por sërish ia doli mbanë. Niko Kovaç ishte përsëri trajner fitues, duke marrë trofeun e parë me Bajernin, Superkupën e Gjermanisë. Kroati mposhti 5-0 Ajntrahtin e Frankfurtit, pikërisht në stadiumin e tij “Komercbank Arena”, ndërsa në maj, në stolin e Frankfurtit fitoi Kupën e Gjermanisë luajtur në Berlin ndaj Bajernit. Bavarezët nuk patën vështirësinë më të vogël duke realizuar edhe një hakmarrje për disfatën e finales së Kupës, ndërsa Robert Levandovski vendosi një rekord.

Asnjëherë më parë nuk ishin shënuar 3 gola në finalen e Superkupës, dhe sulmuesi polak i Bajernit u bë i pari që ia arrin. Edhe pse mund të quhet i pakënaqur për shkak se do të donte të ishte tek Reali i Madridit, Levandovski luajti si profesionist i vërtetë, duke bërë detyrën. Ai ishte, madje autor i tre rrjetave të para të ndeshjes, duke qenë vendimtar për fitimin e Superkupës.

Përveç tij, realizuan edhe Kingsli Koman e Tiago Alkantara, me formacionin bavarez që u shfaq sërish si favorit i sezonit gjerman, për çdo konkurrim. Trajneri Kovaç fitoi trofeun e dytë personal në këtë profesion, ndërsa për Bajernin ishte Superkupa e 7-të kombëtare. Skuadra nga Mynihu ka tani 59 tituj në Gjermani, duke qenë rekordmen në çdo kategori, si dhe ka plot 80 suksese gjithsej, duke përfshirë edhe trofetë ndërkombëtarë./abcnews.al

download-1-1280x720.jpg
ent ela12:46 | 20/05/2018

Niko Kovaç i bëri mbylljen më të mirë detyrës si trajner i Frankfurtit, duke fituar Kupën e Gjermanisë. Kroati mposhti në finale Bajernin, skuadrën që do të drejtojë sezonin e ardhshëm

“Mbreti vdiq, rroftë Mbreti”.

Parulla mesjetare franceze i shkon më së miri, ndonëse simbolikisht, Bajernit të Mynihut që sapo humbi një trajner të madh, por që mori menjëherë një tjetër teknik, që duket ai i duhuri.

Jup Hajnkes nuk e mbylli dot me lavdi epokën e tij të fundit si trajner, ndërsa Niko Kovaç u nda nga Frankfurti më së miri, duke i dorëzuar Kupën e Gjermanisë përpara sesa të marrë Bajernin në dorëzim.

Ishte një finale dramatike në stadiumin “Olimpik” të Berlinit, me bavarezët natyrshëm më të mirë, por me Ajntrahtin me besim, qetësi dhe me fat.

Presioni i kampionëve nuk dha atë që pritej, ndërsa mbrëmja ishte e duhura për ekipin më pak favorit.

Në fushën berlineze, ishte kroati tjetër, Ante Rebiç, që bëri protagonistin.

Sulmuesi shënoi golin e parë në 11’, pastaj kaloi në epërsi për së dyti Ajntrahtin në 82’, ndërsa Robert Levandovski kishte barazuar në 53’.

Bajerni goditi dy herë shtyllat (me Levandovskin e Humelsin), por golat ishin të kundërshtarëve, me Mijat Gaçinoviçin që vulosi shifrat 3-1.

Pati po ashtu dhe dy vendime të gjyqtarit të dhëna me ndihmën e teknologjisë VAR.

Fillimisht, për një penallti të pretenduar nga ekipi i Hajnkesit dhe pastaj sërish për një 11-metërsh të pretenduar, por asnjëra nuk u dha.

Një fatkeqësi që karriera e Hajnkesit përfundoi kështu, por në futboll fituesi mund të jetë vetëm një, jo dy.

Bajerni luftoi fort dhe dominoi jo pak.

Mbajti topin 77 për qind, më shumë sesa çdo ekip I Guardiolës, gjuajti 22 herë në portë, ndaj vetëm 8 të kundërshtarit, por shënoi vetëm 1 gol ndaj 3 të Ajntrahtit.

Nuk vlejti as diferenca masive në Bundesligë, me bavarezët kampionë dhe Frankfurtin të 8-in, plot 35 pikë prapa.

Skenat ishin vërtet mbresëlënëse në fund, edhe ato të lojtarëve në fushë, edhe të tifozëve që kishin 30 vjet që e prisnin këtë fitore.

Vjet, Kovaç e udhëhoqi ekipin deri në finale, por aty u dorëzua përpara Dortmundit, këtë sezon arriti majën.

Kroati 46-vjeçar, lindur pranë Berlinit, dhe rritur me shiritin e kapitenit të kombëtares në krah, u provoi drejtuesve bavarezë se nuk ishin gabuar.

BAJERNI-NUK-BIND-1280x720.jpg
ent ela13:02 | 12/04/2018

Bajerni nuk i bindi tifozët e tij pavarësisht kualifikimit për në gjysmëfinale të Ligës së Kampionëve. Skuadra bavareze nuk shkëlqeu ndaj Seviljes, por trajneri Jup Hajnkes nuk ishte aspak i pakënaqur.

Viti 2013 ishte krejt tjetër gjë. Bajerni i asaj kohe shkoi drejt titullit europian pas triumfit të jashtëzakonshëm të Barcelonës, 7-0 në të dyja ndeshjet çerekfinale, ndërsa këtë herë ndaj Seviljes, u duk shumë larg atyre kohëve.

Edhe pse në fushë ishin disa nga heronjtë e asaj epoke, si Roben, Riberi apo Tomas Myler, dhe në stol i njëjti trajner, Jup Hajnkes, skuadra bavareze ishte e lodhur.

U mjaftua me një barazim pa gola në “Alianc Arena” të Mynihut dhe kaloi në gjysmëfinale falë suksesit 2-1 në Spanjë, ku gjithashtu nuk bindi plotësisht.

Sevilja luftoi fort dhe ishte thuajse e barabartë me kampionët e sapokurorëzuar të Gjermanisë.

Ekipi i trajnerit Montela nuk e vuajti shumë humbjen 0-4 në fundjavë në La Liga ndaj Seltës, por iu afrua disa herë golit, duke goditur edhe shtyllën.

Bajerni nuk është se nuk e provoi, veçse nuk e pati shkëlqimin e pritshëm.

Ndoshta, ndikoi fitimi i parakohshëm i titullit në Bundesligë dhe festa, sado e vogël, më pas.

Gjithsesi, trajneri Hajnkes, nuk pati asnjë shenjë pakënaqësie.

Hajnkes: “Ne luftuam fort dhe nuk pësuam gol, diçka që më bëri shumë të lumtur, pasi e kam kërkuar gjithnjë nga skuadra që të mos pësojë gola në ndeshje të tilla. Sevilja luajti shumë mirë dhe tregoi se është ekip I fortë. Barazimi na mjaftonte dhe ne ruajtëm gjakftohtësinë. Përsa I përket shortit, nuk kam asnjë preferencë, pasi në gjysmëfinale ka vetëm skuadra të forta. Ju e patë se çfarë ndodhi me Barcelonën, pra nuk mund të bësh asnjë nënvleftësim. Pavarësisht shortit, synimi ynë është i qartë, të arrijmë finalen, pra duhet të përballojmë çdo sfidë”.

Edhe presidenti Uli Hënes u shpreh i kënaqur me mënyrën sesi shkuan gjërat.

“Duhet të jemi krenarë për ekipin që e meritoi plotësisht kualifikimin, – tha ai, – ju e patë se çfarë ndodhi në Romë dhe në Madrid, ndaj ishte e rëndësishme të mos ndërmerrnim aventura. Ndonjëherë mjafton edhe një rezultat 0-0, dhe skuadra u tregua shumë profesioniste me mënyrën sesi luajti”.

Gjysmëfinalet do të jenë një pengesë tjetër, edhe më e madhe sesa raundi që sapo kaloi, por Bajerni beson se është gati.

Që pas rikthimit të Jup Hajnkesit në stol, optimizmi është maksimal, që do të arrihet triumfi i madh i vitit 2013, kur u fitua edhe Bundesliga, edhe Kupa e Gjermanisë, edhe Championsi. /abcnews.al

bayern-1280x636.png
G. P.15:04 | 20/02/2018

Liga e Kampionëve ka edhe një përballje tjetër që pritet e fortë. Bajerni ndeshet me Beshiktashin turk dhe cilësohet favorit për të kaluar në çerekfinale.

Është dimër në Mynih dhe Championsi pritet me dëborë.
Bajerni, gjithsesi, është i mësuar kështu, dhe nuk shpërqëndrohet aspak nga synimi kryesor që ka, suksesi në ndeshjen e radhës ndaj Beshiktashit, dhe hedhja e hapit të sigurt drejt çerekfinaleve.

Besimin e gjermanëve e shton fakti se ata nuk do të kenë asnjë mungesë në përballjen e sotme në orën 20:45 në “Alianz Arena”, me përjashtim të atij që portierit Manuel Nojer, të lënduar prej shumë muajsh.

Po ashtu, bavarezët ndihen optimistë nën drejtimin e trajnerit Jup Hajnkes, pasi i kanë fituar të katër ndeshjet në këtë konkurrim, me 72-vjeçarin në stol.
Bajerni doli i dyti në grup, ndërsa Beshiktashi i pari, por vendasit janë padyshim favoritë.

Gjithsesi, Hajnkes është aq i zgjuar dhe me aq përvojë, sa të mos i vendosë nën presion lojtarët e tij.

“Nuk është e lehtë të bësh parashikim se kush mund ta fitojë Championsin, – tha ai, – ka shumë skuadra të mëdha në garë, me një traditë të gjatë. Janë 5 ekipe të forta angleze, disa prej të cilave investuan shumë verën e kaluar dhe në dimër. Reali i Madridit, Barcelona dhe Paris SG janë favoritët, por natyrisht edhe ne duam të vazhdojmë traditën”.

Po nga Beshiktashi çfarë pritet?

Kurrë nuk ka qenë e lehtë për turqit t’ia dalin në Europë, ku vetëm Gallatasaraji ka fituar një Kupë UEFA dhe një Superkupë.
Sidoqoftë, formacioni i trajnerit Senol Gynesh, u bë i pari ekip turk që fiton grupin në Champions, ndaj Lajpcigut, Portos e Monakos.

Po ashtu, ka lojtarë me përvojë si portugezët kampionë të kontinentit, Pepe e Kuarezma, kilenin Gari Medel, spanjollin Avaro Negredo, holandezin Rajan Babel dhe shënuesin më të mirë të Superligës turke vjet, brazilianin Vagner Lov.

“Deri më tani, ne e kemi cilësuar veten si favorite në këtë kompeticion, – vërejti trajneri i turqve, – tashmë, për herë të parë ne nuk jemi të tillë. Favorit quhet Bajerni, i cili në letër është shumë më i fortë sesa ne, por gjithsesi, ne do të luajmë futbollin tonë. Pres një ndeshje shumë të ashpër, dhe duhet të jemi shumë të zgjuar për të arritur rezultatin që duam, dhe që të kemi shanse në ndeshjen e kthimit”.

Beshiktashi u prit në Mynih sikur të ishte në Stamboll, për shkak të komunitetit të madh turk në Gjermani.
Problem për miqtë do të jetë, sidoqoftë, mungesa e katër lojtarëve, Kavlak, Atinç, Gëkhan Tëre dhe Toshiç.
Ndeshja e kthimit luhet në 14 Mars në Stamboll./abcnews.al

vlcsnap-error535-1280x720.jpg
us er15:22 | 26/11/2017

Fate të ndryshëm për disa nga skuadrat kryesore në Europë. Bajerni pësoi humbje në Gjermani, ndërsa Interi kaloi një provë të vështirë në Serinë A.

Nuk ishte mundur prej gati dy muajsh.
Jup Hajnkesit iu prish seria triumfale në stolin e Bajernit të Mynihut dhe pikërisht në atë qytet ku pati ditët e lavdisë si futbollist.
Kampionia e Gjermanisë u mposht 1-2 në stadiumin “Borusia Park” të Mynshengladbahut, me Hajnkesin që pësoi humbjen e parë dhe me luftën për titull në Bundesligë që u rihap.
Torgan Hazar me penallti dhe Matias Ginter shënuan golat për vendasit që goditën dy herë brenda 5 minutave dhe Bajerni nuk mundi të rikuperonte.
Goli i Arturo Vidalit vlejti vetëm për statistikë dhe bavarezët mbetën në 29 pikë, ndaj 26 të Lajpcigut të vendit të dytë.
Fat i ndryshëm për pretendentin për titull në Itali, Interin.
Skuadra milaneze kaloi 3-1 në fushën e Kaljarit edhe pse nuk e pati të lehtë.
Dy golat e kapitenit Mauro Ikardi, si dhe pritjet e portierit Handanoviç e ndihmuan në ishullin e Sardenjës përballë vendasve që luftuan fort.
Fillimisht, Ikardi kaloi në epërsi ekipin e trajnerit Luçiano Spaleti, pastaj kroati Marcel Brozoviç dyfishoi rezultatin.
Kaljari ngushtoi shifrat në 1-2 me rrjetën e Pavoletit, por Ikardi nuk vonoi të realizonte përsëri dhe të garantonte fitoren, me Interin që ka 36 pikë duke qenë plotësisht në garë për titullin në Serinë A.

Në Angli, ndërkaq, përballja kryesore përfundoi në barazim.
Liverpuli dhe Çelsi ndanë nga një pikë në stadiumin “Anfild Roud”, në prani të mbi 53 000 spektatorëve.
Mohamed Salah, ish-lojtar i Çelsit, kaloi vendasit në epërsi, dhe nuk festoi në shenjë respekti.
Ky ishte goli i 15-të i egjiptianit këtë sezon dhe ai mund të quhet lojtari më i mirë i trajnerit Jurgen Klop.
Formacioni londinez reagoi dhe arriti barazimin e merituar me golin e shënuar nga braziliani Uillian pak minuta para fundit.
Rezultat i rëndësishëm për trajnerin Antonio Konte që nuk shkëputet shumë nga Mançester Junajtidi i vendit të dytë./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono