babalja

fredi-alizoti.jpg
ad min19:04 | 17/09/2019

Në dëshminë e tij para gjykatës, i pandehuri Fredi Alizoti është shprehur se ish-deputeti demokrat Ervin Salianji, i kishte premtuar 200 mijë euro për realizimin e audiopërgjimit me vëllain e ministrit të kohës Fatmir Xhafaj. Sipas Alizotit, plani ishte bërë që në vitin 2017 nga Albert Veliu. 

Gjykata Penale e Tiranës ka zhvilluar seancën e radhës për të ashtuquajturën dosja “Babale” ku të pandehur për mos kallëzim krimi janë ish-deputeti demokrat Ervin Salianji, gazetari investigativ Jetmir Olldashi, Albert Veliu që vazhdon të jetë në arrati dhe Fredi Alizoti, person ky që dyshohet se ka imituar zërin e Agron (Geron) Xhafaj audiopërgjimin e publikuar nga Partia Demokratike.

Në seancën e kësaj të marte, Fredi Alizoti ka pranoi akuzën e kallëzimit të rremë dhe rrëfeu para gjykatës dhe prokurorëve se ai me Albert Veliun kanë bërë audio përgjimin.

Plani, sipas Alizotit, ka qenë që në Shtator të 2017-s, por nuk është realizuar pasi Veliu nuk kishte gjetur njerëz të besuar në Vlorë. Më tej, Fredi Alizoti thotë së Albert Veliu e ka kontaktuar sërish dhe i ka thënë se do realizojmë planin.

Alizoti u shpreh se ka pranuar ta bënte audiopërgjimin, pasi bëhej fjalë për 200 mijë euro, që sipas tij, ia kishte premtuar Ervin Salianji. Alizoti, deklaroi se ish-deputetit i ka siguruar stilolapsat për përgjim.

I pandehuri tha se mosmarrja e lekëve, e kishte shtyrë që të tregonte të vërtetën, ndërsa theksoi faktin se ishte ndjerë i kërcënuar. Pas pyetjeve të prokurorëve Fredi Alizoti i është përgjigjur edhe pyetjeve të avokatit të Ervin Salianjit, Indrit Sefa.

Avokati ngriti dyshime në lidhje me thëniet e të pandehurit, duke e pyetur se përse në disa përgjime Alizoti fliste miqësisht me drejtorin e Policisë së Fierit. I pandehur është shprehur se nuk i kishte miq, por se tek ata ndihej i sigurtë.

Avokati Sefa shtoi më tej se personaliteti i të pandehurit nuk është i besueshëm dhe se ai ka implikuar në këtë histori njerëz që nuk i njeh dhe as i ka parë ndonjëherë në jetë.

Në seancën e shkuar Gjykata e Tiranës ka marrë edhe dëshmitë e personave të përfshirë në këtë çështje. Në audiopërgjimin e publikuar nga PD dyshohet se vëllai i ish-ministrit të Brendshëm Fatmir Xhafaj ishte i përfshirë në trafik droge./ABC News Albania 24/7

pergjime.jpg
ad min20:31 | 04/09/2019

Në Gjykatën Penale u bë me debate të forta, përballja e dëshmitarëve të akuzës me Fredi Alizotin, për Çështjen “Babalja”. Dëshmi kanë dhënë sekretari i përgjithshëm i PD-së Gazment Bardhi, prokurori Besim Hajdarmataj dhe gazetari Ylli Rakipi.

Gjykata penale zhvilloi seance për atë që njihet si çështja “Babale”, me të pandehur për moskallëzim krimi ish-deputetin e Partisë Demokratike Ervin Salianji dhe gazetarin investigativ Jetmir Olldashi.

I pandehur është edhe Albert Veliu, person në arrati, i njohur si “Babalja”, si dhe miku i tij Fredi Alizoti, personi që dyshohet se ka imituar zërin e Agron Xhafajt në audiopërgjimin e publikuar në PD-ja.

Gjatë seancës në gjykatë pati debate të ashpra midis 3 dëshmitarëve të organit të akuzës, Sekretarit të Përgjithshëm të Partisë Demokratike Gazmend Bardhi, Prokurorit të Krimeve të Rënda Besim Hajdarmataj, gazetarit Ylli Rakipi me avokatët e të pandehurve dhe prokurorët Genc Qano dhe Kol Hysenaj.

Gjatë dhënies së deklarimeve Gazment Bardhi është përplasur më të pandehurin Alizoti, pasi teksa Sekretari i Përgjithshëm i PD-së deklaronte se nuk e njihte, Alizoti pretendonte se kishin konsumuar edhe kafe bashkë.

Në seancë Gazment Bardhi ka debatuar me avokatin Agron Geron Xhafajt, Ardian Vishën.

Ardian Visha, avokati i Geron Xhafaj: Për herë të parë më materialin u njohët kur e publikuat, apo më parë?

Bardhi: Me materialin audio jam njohur para se të bënim denoncimit.

Ardian Visha: Mjetet teknike janë ato të shfaqura në ekran, apo  të tjera?

Bardhi: E kemi marrë në një USB dhe e kemi shfaqur në një ekran. Të njëjtën ia kemi dhënë prokurorisë.

Avokati: Thatë që keni investiguar për të shkuarën e Xhafajt?

Bardhi: Vendimi ka marrë formë të prerë në 2012-n. Geron Xhafaj ishte dënuar për trafik narkotikësh bashkë me një grup kriminal. Kjo tregon për rrezikshmërinë e lartë të tij. Në 2013-n si kreu i komisionit të ligjeve erdhi vëlla i tij erdhi vëllai i tij.

Gjatë dhënies së deklarimeve, gazetari Ylli Rakipi ka deklaruar se gazetari investigativ Jetmir Olladashi e kishte vënë në dijeni dhe i kishte kërkuar mbështetje për të investiguar një rast trafikimi të lëndëve narkotike.

“Gazetarët investigativë kanë mjetet e veta, stilolapsa, ore. Jetmiri i kishte. Unë i kam dhënë 5 mijë lekë të reja vetëm për karburant. Olldashi shkoi. Kur u kthye më tha që kam një material audio. Më erdhi keq që nuk kishte video, sepse pretendohej një përfshirje e vëllait të Ministrit të Drejtësisë”.

Dëshmitari i tretë në këtë seancë ishte prokurori i Krimeve të Rënda Besim Hajdarmataj, të cilit iu rrëzua kërkesa që dëshminë ta bënte pa praninë e medias. Hajdarmataj ka shpjeguar pozicionin e tij si prokuror në këtë çështje dhe veprimet që ka kryer.

“Albert Veliun e kam takuar në Nëntor 17. Recepsioni më komunikoi se ishte dikush që kërkonte takim me mua, pasi do më tregonte diçka të rëndësishme. E prita në zyrë. Më ka prezantuar një fakt. Kishte dijeni se disa persona po përgatiteshin të bënin një trafik droge. Sipas tij, mes tyre kishte policë dhe vëllai i Ministrit të Brendshëm të asaj kohe. E pyeta për personalitetin e tij. Më tha që ishte i dënuar për trafik droge jashtë Shqipërisë. Ai më tha që personat që do bënin trafikimin ishin njohje të vjetra të tij. Meqë bëhej fjalë për policë të përfshirë në trafik dhe vëllain e ministrit lashë takim me një prej drejtuesve të SHISH dhe u kërkova që ta merrnin si rast, për ta përdorur dhe si informator, sipas procedurës së tyre, për ta hetuar nëse ka të dhëna reale për rast trafikimi. Në vijimësi kam kontaktuar me një prej drejtuesve të SHISH. Më ka thënë që nuk kishte diçka konkrete, por se po mblidhnin të dhëna dhe prova. Dua të sqaroj që përfshiva SHISH-in për shkak se personi më tha që në rrjet kishte punonjës policie, si edhe vëllai i Ministrit të Brendshëm të asaj kohe. SHISH ishte institucioni i vetëm që gjatë 2016-2017 na kishte informuar për rastet e trafikut të kanabisit ku ishin të përfshirë dhe punonjës policie”, tha ai.

Gjykata e Tiranës vendosi që të pezullonte për momentin marrjen e dëshmisë së Agron Geron Xhafajt, që po vuan një dënim për trafik ndërkombëtar droge në Itali. Prokurori lexoi deklarimet që Agron Xhafaj i kishte dhënë grupit hetimor, para se të nisej drejt Italisë.

“Paraditen 4.5.18 tre deputetët e PD kanë bërë një denoncim me të dhëna të rreme për të goditur vëllain tim. Dua të sqaroj që është e vërtetë që unë përdor numri me …472. Aty më telefonojnë të gjithë, ata që më duan dhe të kundërtën. Në bisedën e publikuar dyshoj se është Robert Veliu. Ai disa herë më kërkonte para se luante bixhoz. Unë nuk e kam takuar atë njeri. Sa herë më merrte për lekë e kam refuzuar dhe në fund i kam bërë bllok. Nuk është i vërtetë fakti që unë të kem lënë takim me të. Në lidhje me bisedën e pretenduar në lokalin tim, aty nuk jam unë. Ajo nuk është e folura ime, për më tepër që unë kam probleme në shqiptimin e disa shkronjave. Është tërësisht e manipuluar. Nuk njoh askënd me emrin Ermal, veç një kushëririt tim. Po ashtu, nuk njoh asnjë person me nofkën Toto Qorri”.

Në seancën e radhës, në 11 Shtator në orën 12:30, do dëgjohen audiopërgjimet e publikuara nga Partia Demokratike, për këtë çështje./ABC News Albania 24/7

BABALE-1280x720.jpg
ad min13:41 | 17/07/2019

Ka dëshmuar në Gjykatën e Tiranës e ish-drejtori i Policisë së Qarkut Fier, Albert Nushi, në lidhje me dosjen Babale. Bashkë me Nushin ka dëshmuar edhe Erzen Breçani ish-punonjës policie i liruar nga detyra në vitin 2013. Në dëshminë e Nushit në gjykatë, ai pohoi se Fredin Alizotin e njihte për shkak të detyrës.

“Unë doja ta çoja në prokurorisnë e Fierit, por aty me thanë se kishte një çështje te Krimet e Rënda për Fredi Alizotin”. Më tej Nushi shtoi se Fredi Alizoti i kishte thënë se ishte ai që e interpretoi Agron Xhafajn në lidhje me përgjimin e publikuar në ata kohë në media.

Ndërkohë Breçani deponoi se me Alizotin dhe Albert Veliun janë takuar rastësisht te selia e PD.

“Alizoti në atë kohë më tha se kishte besim te unë duke shtuar se ishte përdorur nga pala tjetër”.

Në listë për të dhënë dëshmi janë edhe ish-deputeti i PD-së Enkeled Alibeaj dhe Besim Hajdarmataj ish- kreu i Prokurorisë së Krimeve të Rënda./ABC News Albania 24/7

IMG_8870-1280x853.jpg
ad min16:21 | 06/04/2019

Partia Demokratike ka akuzuar kryeministrin Edi Rama si i përfshirë drejtpërdrejt me bashkëpunëtorë të tij të afërt politikë, në atë që e quan fabrikimin shtetëror të dëshmitarit të rremë kundër opozitës në çështjen “Babalja”.

Deklarata është bërë nga nënkryetari i PD-së Edmond Spaho, që deklaroi se edhe prokuroria është pjesë e skemës së manipulimit shtetëror.

“Gjatë gjithë kësaj jave qytetarët shqiptarë dhe opinioni ndërkombëtar kanë parë dhe dëgjuar përgjimet zyrtare nga Prokuroria, që provojnë skandalin mafioz të fabrikimit shtetëror të një dëshmitari të rremë kundër opozitës dhe medias në çështjen “Xhafaj”.

Qytetarët kanë dëgjuar sesi drejtuesit më të lartë të Policisë së Shtetit kanë paguar para në dorë aktorit të qeverisë, Fredi Alizoti, i dënuar më parë për trafik droge, në mënyrë që të gënjente se ishte ai dhe jo Agron Xhafaj që koordinonte trafikun e drogës nga Vlora.

Përgjimet zyrtare të Prokurorisë tregojnë se ky skenar kriminal është vënë në zbatim nga një bashkëpunim mes drejtuesve më të lartë të Policisë së Shtetit, kupolës politike të Rilindjes dhe qeverisë, me përfshirje direkte të Prokurorisë dhe Shërbimit Informativ Shtetëror.

Një javë pas publikimit të këtij skandali mafioz çdo shqiptar e ka kuptuar se i përfshirë drejtpërdrejt është vetë Edi Rama dhe bashkëpunëtorët e tij më të afërt politikë.  Kapitullimi i shtetit të së drejtës dhe kapja e çdo pushteti në Shqipëri nga Edi Rama me krimin e organizuar, është kërcënimi më i madh për sigurinë dhe të drejtat e çdo qytetari shqiptar.

Ndaj, kauza jetike për të rikthyer sundimin e ligjit dhe për të çliruar qeverisjen nga krimi, ka bashkuar shumicën e shqiptarëve rreth opozitës në betejën për liri, siguri dhe mirëqenie për të gjithë.

Largimi i qeverisë së krimit do të jetë fitorja e parë e kësaj beteje”, tha Spaho./abcnews.al

evis-kushi-1280x730.jpg
ad min17:59 | 02/04/2019

Të tjera përgjime janë bërë publike nga PD-në, ku sipas saj funksionarë të lartë të qeverisë janë të përfshirë në çështjen “Babale”. Lidhur me akuzat dhe fakte e nxjerra nga selia blu, deputetja e PS-së Evis Kushi është shprehu se çështja “Babale” po përdoret i kalë beteja nga opozita.

Mirela Milori: Do doja një reagim të parë pasi gjatë mbrëmjes së djeshme dhe paradites së sotme opinioni është njohur me përgjime të reja dhe me akuza direkte të PD ndaj mazhorancës në lidhje me çështjen “Babale”. Do doja një reagim të forcës tuaj politike në lidhje me këtë.

Evis Kushi: Po çështja “Babale 1”, “Babale 2” dhe mesa duket do të këtë edhe një “Babale 3”, ka qenë një nga kauzat kryesore të opozitës për një periudhë të gjatë kohore,  ka qenë kali i betejës së opozitare. Por mesa duket shumë nga detajet e kësaj çështje dolën blof, të pavërteta opozita u tërhoq. Tani mesa duket ka një ringjallej të kësaj teme por unë besoj se për sa kohë kjo çështje është në Prokurori, për sa kohë ka persona të dyshuar, të akuzuar, ka dosje në lidhje më këtë çështje unë mendoj se duhet të presim drejtësinë që të thotë fjalën e saj. Ajo duhet të vërtetojë Këto që janë akuza, apo që opozita i quan fakte. Të vërtetohen nëse janë të vërteta apo thjesht janë trillime dhe fabrikime. Nëse ka fakte të reja apo duhet të dërgohen në Prokurori dhe është Prokuroria dhe gjykata që duhet të thonë fjalën e tyre.

Mirela Milori: Në fakt Çlirim Gjata ditën e sotme tha se përmes përdorimit të policisë dhe SHISH, ka thënë se Taulant Balla ka sajuar një histori të blerë me para të psita për ta përdorur kundër opozitës. Keni një qëndrim në lidhje me këtë sepse përmendet emri i zoti Balla, supozohet që të jetë dhe Gramoz Ruçi, diku përmendet një person me emrin Gramoz mendohet që mund të jetë edhe kryetari i Kuvendit. Pra një qëndrim sepse po përfshihet sipas PD gjithë kupola shtetërore.

Evis Kushi: Për sa kohë janë thjesht akuza këta duhet të vërtetohen në Prokurori dhe në Gjykatë. Ne nuk mund të themi asgjë më tepër dhe ne i inkurajojmë të gjithë ata persona që pretendojnë se kanë fakte të shkojnë në Prokurori, t’i dorëzojnë atje dhe në fund të mbajnë përgjegjësi. Qoftë ata që janë të implikuar në të tilla çështje të shkojnë para organeve të drejtësisë, por edhe nëse këto janë thjesht sajesa, personat që janë të implikuar gjithashtu të mbajnë përgjegjësi para ligjit./abcnews.al

salianji-dhe-feviu.jpg
ad min09:48 | 02/04/2019

Ish-deputeti i PD-së, Ervin Salianji, ka publikuar mbrëmë në emisionin “Opinion” në TV Klan të tjera përgjime bisedash, pjesë e dosjes së prokurorisë për çështjen e njohur si “Babalja”.

Është fjala për biseda telefonike mes Fredi Alizotit, i arrestuar në Tetor të vitit të kaluar, i dyshuar si personi që aktroi zërin e Agron Xhafajt dhe ish-drejtorit të Policisë së Qarkut Fier, Albert Nushi.

Në përgjime dëgjohet Alizoti të thotë se kërkon të takojë shefin e madh dhe se nuk ka kthim pas nga ajo që ka vendosur.

Po ashtu në një tjetër bisedë telefonike të përgjuar, ish-drejtori i Policisë së Fierit, Nushi, i kërkon Fredi Alizotit të shkojë të takojë prokurorin e çështjes “Babale”. Por sipas ish-deputetit Salianji, për këtë takim mes Alizotit dhe prokurorit nuk ka asnjë procesverbal në organin e akuzës.

Gjithashtu në përgjime është dhe një bisedë e Fredi Alizotit që shantazhon një punonjës të një kompanie private, duke u paraqitur si mik i Aldo Bares. Ish-deputeti demokrat tha në “Opinion” se prokuroria, ndonëse ka në dorë këtë përgjim që implikon Alizotin si gjobëvënës, nuk ka nisur asnjë procedim ndaj tij./abcnews.al

IMG_8426-1280x853.jpg
ent ela15:46 | 27/03/2019

Ish deputeti demokrat Ervin Salianji, nën hetim për çështjen “Babalja” ka publikuar audiopërgjime të komunikimit të dëshmitarit të penduar Fredi Alizoti me zyrtarë të lartë të policisë së Fierit. Salianji tha se “shefi i madh” që lakohet në bisedë është ish-ministri i brendshëm Fatmir Xhafaj.

Janë përgjimet zyrtare të prokurorisë ato që ish deputeti demokrat Ervin Salianji thotë se po publikon për të zbardhur atë që sipas tij është e dukshme nga bisedat e interceptuara, por të pazbardhura qëllimisht nga prokuroria sipas demokratëve.

“Sot po bëjmë publik dy përgjime, që faktojnë jo vetëm se drejtuesit e policisë në Fier paguajnë dëshmitarin e sajuar, Fredi Alizoti, por që, ai qe ka deleguar qepjen e kesaj afere është edhe ai që në bisedë quhet “shefi i madh” dhe që faktet provojnë se ai është Fatmir Xhafaj”.

Për demokratët identiteti i shefit të madh është i qartë se është Fatmir Xhafaj. Në mbështetje të kësaj publikon telefonatën që mban datën 7 qershor.

Një ditë më vonë.

Përmbajtja e bisedës për Salianjin është e qartë. Në një anë Fredi Alizoti, dëshmitari i cili deklaroi se zëri në audio-përgjimin ku pretendohej se ishte regjistruar vëllai i Fatmir Xhafajt asokohe ministër i brendshëm, nuk është Ii vëllait të këtij të fundit, por i tiji. Në anën tjetër drejtori i policisë Fier. /abcnews.al

BABALE-1280x720.jpg
ent ela18:44 | 10/01/2019

Albert Veliu, i njohur si “Babalja”, është arratisur nga Kosova. I dyshuari për “kallëzim të rremë” në lidhje me fabrikimin e një audio-përgjimi të vëllait të ish-ministrit të brendshëm, ka ikur në Hungari. Por avokati i tij në Kosovë, Tom Gashi, tha për ABC News se Babalja i është bashkuar familjes së tij në Belgjikë, ku ka kërkuar azil politik.

Albert Veliu, i njohur si “Babalja”, personazhi që trazoi politikën majin e vitit 2018 përmes audio-përgjimit ku pretendonte të fliste me vëllanë e ish-ministrit të Brendshëm për çështje droge, është arratisur nga Kosova. Teksa po hetohet nga Prokuroria e Tiranës për akuzën e “kallëzimit të rremë”, Veliu, i ndaluar më herët në Kosovë ku edhe kërkoi azil politik, është larguar drejt Hungarisë.

Burime pranë prokurorisë së Tiranës konfirmuan se në fund të Dhjetorit 2018 janë informuar në rrugë zyrtare nga drejtësia e Hungarisë për arrestimin e Albert Veliut në territorin e tyre. Veliu është prangosur për llogari të masës së sigurisë “arrest në burg” dhënë në mungesë nga drejtësia në Shqipëri. Për këtë shkak, drejt Hungarisë ëshë dërguar një kërkesë për esktradimin e tij në vendin tonë për t’u vënë në dispozicion të drejtësisë.

Por situata duhet se do të jetë edhe më e komplikuar. Në një komunikim telefonik me avokatin e tij në Kosovë, Tom Gashi, ABC News mësoi se Albert Veliu nuk ndodhet në Hungari, por në Belgjikë.

“Unë jam informuar se Albert Veliu është arrestuar në 25 Dhjetor 2018 në Hungari. Ai është liruar dy ditë më vonë, në 27 dhjetor, pasi është provuar se anëtarët e tjerë të familjes së tij kishin statusin e azilkërkuesit në Bruksel”, tha avokati. Sipas Gashit, më tej Veliu është liruar dhe lejuar të shkojë në Bruksel tek familjarët e tij, ku edhe ka kërkuar azil politik.

Marrja e deklarimeve të Albert Veliut është një nga veprimet e fundit hetimore të kësaj çështjeje, për të cilën janë nën hetim edhe Fredi Alizoti, i dyshuar si aktruesi i zërit të vëllait të ish-ministrit, gazetari Jetmir Olldashi dhe deputeti Ervin Salianji. Hetimi i kësaj çështje nisi nga Prokuroria për Krimet e Rënda por pas disa muajsh i kaloi për kompetencë Prokurorisë së Tiranës./abcnews.al

BABALJA-TEK-TIRANA-1280x720.jpg
ent ela15:20 | 12/11/2018

Gjykata e Tiranës la të pandryshuara masat e sigurisë të dhënë me herët nga Krimet e Rënda për tre nga katër personat e vënë në hetim për çështjen “Babalja”. Ata akuzohen për “kallëzim të rremë”, në lidhje me audio-përgjimin ku pretendohet se Albert Veliu, Babalja, bisedonte me vëllain e ish-ministrit të brendshëm për çështje droge.

Sipas vendimit të Fredi Alizoti do të vijojë të hetohet më masën e sigurisë “arrest në burg” ndërsa gazetari Jetmir Olldashi në “detyrim për paraqitje”. Gjykata la të pandryshuar edhe masën “arrest në burg” në mungesë për Babalen, masë e paekzekutuar për shkak se ai ndodhet në Kosovë në statusin e azilkërkuesit. Masa ndaj tre të dyshuarve u rivlerësua pasi Prokuroria për Krimet e Rënda shpalli moskompetencë, duke ia kaluar dosjen Prokurorisë së Tiranës. I katërti i dyshuar për këtë çështje është deputeti i PD, Ervin Salianji, i cili hetohet pa masë sigurie. /abcnews.al

albert-veliu.png
ad min16:55 | 26/10/2018

Prokuroria për Krimet e Rënda shpalli moskompetencë për hetimin e çështjes “Babalja”. Dosja me katër persona të akuzuar për “kallëzim të rremë”, mes të cilëve edhe deputeti Ervin Salianji, i ka kaluar Prokurorisë së Tiranës.

Prokuroria për Krimet e Rënda ia ka kaluar Prokurorisë së Tiranës përgjegjësinë e hetimit të çështjes “Babalja”. Më shumë se gjashtë muaj nga nisja e procedimit penal pas publikimit të një audio-regjistrimi ku pretendohej se Albert Veliu, Babalja, fliste me vëllain e ministrit të Brendshëm për çështje droge, Krimet e Rënda shpallën moskompetencë. Shkak është bërë akuza e “kallëzimit të rremë” e ngritur ndaj katër personave për çështjen, vepër penale jashtë kompetencës së Krimeve të Rënda. Nga ana tjetër, kjo prokurori do të vazhdojë hetimin për “trafikun e narkotikëve” veprën penale për të cilën u regjistrua procedimi penal. Dosja “Babalja” u dërgua në Prokurorinë e Tiranës me katër persona nën hetim, deputetin Ervin Salianji, Albert Veliun, Fredi Alizotin dhe gazetarin Jetmir Olldashi.

Hetimi i çështjes “Babalja”, histori që trazoi jo pak skenën politike në vend, mori tjetër rrjedhë pasi Fredi Alizoi pranoi të kishte qenë aktruesi i zërit të Agron Xhafajt, vëllait të Fatmir Xhafajt, në audio-përgjimin e “Babales”. Por, pas arrestimit të tij në Tetor 2018 u publikua një video-përgjim ku pohonte se ishte shoqëruar për Prokurorinë për Krimet e Rënda nga kreu i Policisë së Shtetit. Për llogari të hetimit dhe dinamikave të papritura të tij, Prokuroria për Krimet e Rënda mori deklarimet e më shumë se 15 personave, mes të cilëve edhe deputetët Salianji e Taulant Balla, si dhe ish-kreut të Policisë Bashkike të Tiranës, Florenc Hoxha./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono