atletiko madrid

spanja.jpg
G. P.11:36 | 17/01/2019

Dy skuadrat e Madridit e patën shumë të vështirë në Kupën e Mbretit në Spanjë. Kritikat janë të shumta pas humbjes së Realit dhe eleminimit të Atletikos.

Ishte një mesjavë e vërtetë futbolli. Jo rrallë ndeshjet e kupës fshijnë çdo lloj hierarkie dhe kështu ndodhi në Spanjë, me dy festa të skuadrave të vogla, që i shkaktuan disfatë klubeve të mëdhenj të Madridit. Reali ia doli që të kualifikohej për në çerekfinale, por pësoi një humbje aspak dinjitoze në fushën e Leganjesit, me shifrat 0-1.

Mungesa e Karim Benzemasë u ndje, pasi francezi nuk luajti për shkak dëmtimi, ndërsa Isco është shumë larg nivelit të mëparshëm, pavarësisht talentit të madh. Nëse i shtohet këtyre, dëmtimi i Bale dhe largimi i Cristiano Ronaldos, atëherë kuptohet më mirë gjendja e madrilenëve.

“Ishim të dobët në Leganes, – pranoi Solari, – sidomos në pjesën e parë. E vërteta është se nuk kemi lojtarë sa duhet, dhe sidomos kemi problem në sulm”.

Pavarësisht problemeve, pakkush priste një nivel të tillë ndaj Leganesit.

“Marka”: Katastrofë! Atletiko eleminohet në të tetat e finaleve nga Girona! Madridi kalon, por sërish jep një imazh të keq!

“AS”: Bomba e madhe plasi në “Uanda”! Simeone: Preferoj të luaj keq dhe të fitoj! Reali, Kejlori dhe askush tjetër!

Siç lexohet edhe në gazeta, Atletiko e pësoi më keq se Reali, pasi u eleminua.

Në një ndeshje thuajse të çmendur, tipike prej Kupe, bardhekuqtë barazuan 3-3 me Gironën, dhe nuk arritën dot në çerekfinale pas rezultatit të përgjithshëm, 4-4. Edhe pse Atletiko nuk quhet ende një superfuqi si Reali apo Barça, sërish prej saj pritej më shumë. Aq më tepër, me shpenzimet e shumta që I kanë dhënë mundësi trajnerit Diego Pablo Simeone që të luajë futboll më të bukur.

“Ka raste, – tha trajneri, – kur luan mirë dhe eleminohesh. Unë preferoj të luaj keq, por që të fitoj gjithnjë. Ishte ndeshje e vërtetë e kupës, e bukur. Përgëzime Gironës që nuk u dorëzua kurrë, ndërsa ne dhamë gjithçka, ndaj nuk mund t’i kritikoj lojtarët”.

Pas kësaj që hoqën dy ekipet madrilene, edhe Barcelona nuk është e qetë.

“Barça, me të gjitha forcat për të përmbysur në Kupë”, shkruan gazeta “Sport”.

Katalanasit luajnë në “Camp Nou” ndaj Levantes, ndërsa e kanë humbur 1-2 ndeshjen e parë./abcnews.al

atleticoo.jpg
G. P.10:53 | 17/05/2018

Atletiko e Madridit fiton Ligën e Europës duke mundur 3-0 në finale, Olimpikun e Marsejës. Trajneri Simeone hyn në histori, ndërsa shqetësimi i vetëm është largimi i mundshëm i sulmuesit kryesor, Griezman.

Spektakli nuk vonoi shumë t’ia linte vendin futbollit. Nga muzika e vallja, në stadiumin e Lionit u kalua tek ajo për të cilën ishin mbledhur dhjetëra mijë njerëz, finalja e Ligës së Europës.

Ish-ylli i Francës, Abidal, prezantoi kupën, ndërsa dy finalistët, Atletiko e Madridit dhe Olimpiku i Marsejës, nuk vonuan të dilnin në fushë. Parashikimet ishin të gjitha për spanjollët e trajnerit të dënuar, Diego Pablo Simeone, të cilët nuk zhgënjyen edhe pse nuk e patën aspak të lehtë.

Përballë talentit, entuziazmit dhe lojës sulmuese të marsejezëve të trajnerit Rudi Garsia, u vunë përvoja, klasi dhe karakteri i fortë i Atletikos. Suksesi u bë më i sigurt nga prania në fushë e një lojtari, sulmuesit kryesor të madrilenëve, Antoine Griezmann.

Ishte francezi që shkëlqeu në qytetin ku u rrit dhe në stadiumin, ku kishte vënë këmbë që i vogël. Ai shënoi dy gola, madje dy të parët, dhe ndryshoi rrjedhën e ndeshjes, të cilën francezët e kishin nisur më mirë.

Simeone e ndoqi ndeshjen në një kabinë të izoluar në tribunë, duke qenë i paduruar si gjithnjë. Trajneri argjentinas, me këtë trofe, u barazua me legjendën tjetër Luis Aragones, si tekniku më i suksesshëm i Atletikos, të dy me nga 6 kupa të fituara.

Diego Simeone: “Natyrisht që jam i kënaqur. Një sukses i arritur pas një pune shumë të mirë vit pas viti, dhe ishte një fitore e merituar. E kam thënë gjithnjë, që mënyra më e mirë për të fituar, është duke e provuar gjithnjë e duke punuar fort. Humbëm dy finale Championsi, vjet humbëm gjysmëfinalen e Championsit, por këtë herë patëm një tjetër mundësi për të fituar. Nuk ishte e lehët pasi Marseja e nisi ndeshjen më mirë, por e morëm veten dhe luajtëm një pjesë të dytë shumë të fortë”.

Problemi i madh për Simeonen tani është e ardhmja e Grizemann-it. Besohet se sezonin tjetër sulmuesi do të veshë fanelën e Barcelonës, që është gati të paguajë klauzolën prej 100 milionë eurosh në kontratën e tij. Vetë Griezmann foli vetëm për ndeshjen, në përfundim të saj.

Antoine Grizman: “Ishte kënaqësi të fitoja një trofe këtu, në shtëpinë time. Kam qenë në këtë stadium si tifoz, ndërsa më pas kam luajtur dhe kam fituar për 14 vjet në Spanjë. Më vjen mirë që fituam me golat e mi, por nuk ishte e lehtë, pasi Marseja është një ekip shumë sulmues dhe na detyroi të mbroheshim fort. Për fat, kemi përvojë në finale dhe ruajtëm gjakftohtësinë”.

Grizman u largua nga gazetari pa e lejuar ta pyesë për të ardhmen, por kësaj pyetjeje nuk iu shmang dot Simeone.

Diego Simeone: “Griezmann tregoi atë që ka treguar gjatë gjithë kohës, që është një nga sulmuesit më të mirë të botës. Nuk është hera e parë që e bën. Shpresoj të jetë i kënaqur dhe i lumtur, dhe shpresoj që të qendrojë me ne. Ka mjaft arsye për ta bërë këtë. Gjithsesi, nëse do të rrijë apo jo, kjo është pyetje për të, jo për mua”.

Atletiko mbylli kështu një sezon të vështirë, ku u eleminua nga Championsi dhe nga Kupa e Mbretit, por ku u shpall nënkampione e Spanjës si dhe fitoi një nga dy trofetë e rëndësishëm kontinentalë.

Kjo ishte Liga e tretë e Europës për klubin spanjoll, që u barazua me gjigandët Liverpul, Juventus e Inter, duke mbetur vetëm prapa Seviljes që ka 5 kupa të tilla.

Edicioni mbyllet këtu, ndërsa pritet me ambicie viti i ardhshëm sportiv. Pavarësisht optimizmit, besohet se Griezmann ka luajtur ndeshjen e tij të fundit për Atletikon./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono