athina

kostas-bakojanis.jpg
G. P.12:35 | 03/06/2019

Një tjetër goditje për kryeministrin grek Aleksis Tsipras. Demokracia e re në opozitë, ka fituar zgjedhjet vendore në balotazhin e së dielës. Kryebashkiaku i ri i Athinës është Kostas Bakojanis, djali i kryebashkiakes së parë femër të kryeqytetit grek, Dora Bakojanis.

Apeli i bërë nga kryeministri i Greqisë Aleksis Tsipras, lider i “Syrizës”, që grekët të zgjidhnin një kandidat progresist në balotazhin për zgjedhjet vendore, nuk u dëgjua. E majta greke ka pësuar një humbje të re. Partia greke e qendrës së djathtë, “Demokracia e re”, në fakt ka fituar bashkinë e Athinës si dhe në shumë qytete të tjera të vendi, duke konfirmuar fitoren e radhës pas zgjedhjeve evropiane parlamentare ndaj së majtës së kryeministrit Tsipras.

Dhe pse të dhënat nuk janë ende zyrtare, rezultatet e marra nga” Demokracia e re” janë në një avantazh të ndjeshëm të moderuarve në prag të zgjedhjeve të parakohshme  të përgjithshme që do të mbahen në 7 Korrik. Në Athinë u zhvillua dhe sfida më e fortë për marrjen e bashkisë së kryeqytetit, Kostas Bakojanis, 41 vjeç, ish-guvernator i rajonit qendror të vendit, fitoi me 65% ndaj kandidatit të “Syrizës”, Nassos Iliopoulos.

Kostas Bakojanis përfaqësues i brezit të tretë të një prej familjeve më të njohura në skenën politike të së djathtës në Greqi, dhe djali i Dora Bakojanis, gruas së parë të zgjedhur kryebashkiake e Athinës në vitin 2003, dhe nipi i ish-kryeministrit Konstantin Mitsotakis (1990-1993), është dhe nipi i liderit aktual i “Demokracisë së re”, Kiriakos Mitsotakis, rivalit kryesor të Aleksis Tsipras në zgjedhjet e ardhshme.

Mitsotakis u bëri apel të gjithë votuesve në Athinë që të merrnin pjesë në festën e demokracisë, duke votuar. Ndërsa Kostas Bakojanis u shpreh se Athina nuk po ndryshonte vetëm kryebashkiak, por po ndryshonte epokë.

Bakojanis i cili bëri apel për bashkim në mënyrë që të ndryshohej qyteti, zëvendëson kryebashkiakun në largim Jorgos Kaminis i qendrës së majtë i cili fitoi dy mandate radhazi duke filluar që nga momentet e e para të krizës në vitin 2010.

Dora Bakojanis, nëna e fituesit të garës në kryeqytet u shpreh se populli grek për herë të dytë ka dërguar një mesazh për ndryshim politik dhe besimin që kanë për Kiriakos Mitsotakis. Kandidatët e mbështetur nga “Demokracia e re” kanë fituar në 11 nga 13 rajonet në vend sipas rezultateve.

Që në zgjedhjet parlamentare evropiane të 26 Majit të kaluar, kryeministri i së majtës Tsipras, kishte dalë i humbur: partia e tij “Syriza” mori 6 vende me 23.85% të votave, ndërsa “Demokracia e re” mori 9 vende me 33.27% të votave. Për sa i përket Selanikut, qytetit  të dytë në vend, fitorja është e kandidatit të pavarur Konstantinos Zervas, i mbështetur nga fronti progresist./ABC News Albania 24/7

interpol123.jpg
ent ela13:43 | 13/04/2019

Ekstradohet nga Athina një shtetas shqiptar i dënuar nga Gjykata e Durrësit me 15 vjet burg për veprën penale,”Trafikim i femrave për qëllim prostitucioni”.

Zyra Qëndrore Kombëtare e Interpolit në Tiranë, ekstradoi nga Athina/Greqi, drejt Shqipërisë shtetasin shqiptar: Astrit Dule., 48 vjeç, lindur në Fier.

Ky shtetas ishte person i shpallur në kërkim ndërkombëtar, pasi Gjykata e Rrethit Gjyqësor Durrës e ka dënuar me 15 vjet burg për veprën penale,”Trafikim i femrave për qëllim prostitucioni”.

lulzim-basha-2.jpg
G. P.21:36 | 27/03/2019

Teksa akuzojnë kryeministrin e Shqipërisë së refuzon të angazhohet në zgjidhjen e çështjeve të hapura me Greqinë, mediat e vendit fqinj i kanë kthyer sytë nga lideri i opozitës. Sipas një portali lajmesh, Lulzim Basha shihet në Greqi si personi i duhur për bisedime lidhur me çështjet dypalëshe.

Portali i njohur grek, Newpost.gr, publikon të mërkurën një shkrim analitik për kryetarin e partisë Demokratike, Lulzim Basha. Sipas portalit, Basha është lideri tek i cili investon Athina zyrtare dhe minoriteti grek. Portali u referohet lëvizjeve të Athinës për zgjidhjen e problemeve të hapura dhe normalizimin e marrëdhënieve dypalëshe.

“Mirëpo, një sërë lëvizjesh të Edi Ramës e rënduan klimën”, vlerëson Newpost.

“Ai që gjendet përballë Edi Ramës, është kreu i partisë demokratike Lulzim Basha”, vijon Newpost.

Më tej portali grek paraqet CV-në e shefit të opozitës, me theks në periudhën kur Basha ishte ministër dhe kur sipas Newpost, kishte një marrëdhënie jashtëzakonisht të ngushtë dhe produktive me shefen e atëhershme të diplomacisë greke, Dora Bakojanis, e cila është motra e kryetarit të sotëm të Demokracisë së Re, Kyriakos Mitsotakis.

Portali grek thotë se për shumëkënd, Lulzim Basha pritet të jetë kryeministri i ri i Shqipërisë pas zgjedhjeve të ardhshme. Në të njëjtën kohë, edhe Greqia po shkon drejt ndryshimit të qeverisë, sipas gjithë sondazheve që kanë dalë në dritë, shton Newpost, që njihet dhe për orientimin pro partisë më të madhe opozitare greke.

“Duke synuar edhe votat e shqiptarëve që kanë marrë nënshtetësinë, por edhe të minoritarëve grekë që gjithashtu kanë me shumicë të drejtë vote, Demokracia e Re mëton t’i shtojë dhe penelata rajonale profilit të vet. Si një qeveri e cila do të zhbllokojë negociatat me Tiranën dhe duke lënë të kuptohet se në tryezën e bisedimeve preferon të ketë kishte aleatët e vet ideologjikë, pra demokratët e Lulzim Bashës”.

Vetëm se, Edi Rama nuk duket se ka ndërmend të shkojë në zgjedhje, ndërsa Greqia do t’i mbajë zgjedhjet parlamentare, më së voni, në Tetor të këtij viti./abcnews.al

athina-1-1280x833.jpg
ent ela20:00 | 15/02/2019

Qeveria greke ka deklaruar se nuk ka ndërmend të negociojë me Shqipërinë për çështjen e kufijve. Reagimi sipas agjencisë së lajmeve ANA-MPA, ka ardhur pas deklaratës së kryeministrit shqiptar Edi Rama, se Tirana dhe Athina po bisedojnë lidhur me këtë çështje.

“Nuk ka asnjë diskutim mes 2 vendeve për kufijtë, pasi ata janë përcaktuar në bazë të marrëveshjeve ndërkombëtare, të cilat janë të panegociueshme”, kanë deklaruar burime nga Ministria e Jashtme helene.

Zyrtarët në fjalë kanë nënvizuar se në Traktatin e miqësisë dhe bashkëpunimit që është nënshkruar në Tiranë më 21 mars 1996 parashikohet që të dy shtetet të respektojnë kufijtë ekzistues, të cilët janë të pacënueshëm. Ditën e enjte, në një intervistë televizive, Kryeministri Rama deklaroi se, me Greqinë po diskutohet për kufirin detar, një deklaratë që është përcjellë e cunguar nga mediat greke./abcnews.al

Zaev-and-Tsipras-800x450.jpg
ent ela15:53 | 10/02/2019

Greqia do t’i dërgojë ditën e hënë një notë diplomatike Maqedonisë, për ta informuar mbi ratifikimin e Marrëveshjes së Prespës dhe protokollit të anëtarësimit në NATO. Lajmin e ka bërë të ditur ditën e diel zëvendës ministri i Jashtëm grek Jorgo Katrugalos. Kjo do të thotë se nga e hëna fqinji verior i shtetit helen do të quhet Maqedonia e Veriut dhe jo më Maqedoni. “Marrëveshja e Prespës është e qartë dhe e prerë, vendi fqinj do të citohet në të gjitha organizatat, në marrrëdhëniet dypalëshe dhe në punët e brendshme të tij me emrin e ri kushtetutes”, ka deklaruar Katrugalos. Pasi të marrë notën diplomatike nga Athina topi do të kalojë në fushën e Maqedonisë, të cilës do t’i takojë të bëjë ndryshimet e brendshme dhe t’u kërkojë Kombeve të Bashkuara dhe të gjitha vendeve njohjen me emrin e ri. /abcnews.al

MOSKE-ATHINE-MARREDHENIA-1280x632.jpg
ent ela19:26 | 15/01/2019

Tensionohen sërish marrëdhëniet mes Moskës dhe Athinës. Pas miratimit të ndryshimeve kushtetuese në parlamentin e Shkupit, Moska zyrtare i konsideron si të imponuara nga jashtë. Kjo ka sjellë reagimin e palës greke.

Moska ka bërë një tjetër ndërhyrje të ashpër pas zhvillimeve të fundit rreth marrëveshjes së Prespës. Një deklaratë e ministrisë së jashtme ruse, “godet” njëkohësisht Shkupin dhe Athinën. Deklarata nënvizon se ndryshimet kushtetuese të votuara në parlamentin maqedonas “janë imponuar nga jashtë dhe nuk shprehin  vullnetin e popullit”.

Po ashtu, edhe Athina kritikohet se ka injoruar opinionin e popullit grek që e kundërshton këtë marrëveshje. Deklarata i referohet edhe largimit të Panos Kammenos nga koalicioni qeveritar dhe procesit të votëbesimit për qeverinë Tsipras. Me tone gjithashtu të ashpra ka qenë përgjigjja e ministrisë së jashtme greke. Në reagimin e Athinës shprehet “shqetësimi i përligjur” që deklarata ruse nuk merr parasysh funksionimin demokratik të institucioneve në Greqi, i cili funksionim “nuk përbën terren të përshtatshëm për komente nga palë të treta”.

Gjithashtu Athina nënvizon se deklarata e ministrisë së jashtme ruse “nuk i shkon për shtat nivelit që karakterizon marrëdhëniet Greqi-Rusi dhe lidhjeve shekullore të miqësisë midis të dy popujve”.

Ky është tensionimi i dytë në raportet Athinë – Moskë, që nga vera e kaluar. Atëherë Greqia dëboi dy diplomatë rusë, të cilët u akuzuan se po përpiqeshin të korruptonin zyrtarë lokalë, klerikë ortodoksë dhe qytetarë, me qëllim që ata të zhvillonin protesta kundër marrëveshjes së Prespës. /abcnews.al

TSIPRAS-DEKLARATA-1280x609.jpg
G. P.11:34 | 14/01/2019

Kryeminisitri grek, Aleksis Tsipras, ka këmbëngulur se vendi I tij nuk do të tërhiqet nga Marrëveshja e Prespës dhe finalizimi i procesit. Ai u kërkoi qytetarëve grekë që pavarësisht bindjeve politike ta mbështesin atë.

Athina nuk do të tërhiqet nga Marrëveshja e Prespës dhe do t’i shkojë deri në fund procesit të realizimit të saj, njësoj si vendi fqinj. Ka qenë kjo deklarata e Kryeministrit të Greqisë, Aleksis Tsipras, në konferencën për shtyp për marrëveshjen në fjalë, vetëm disa orë pas dorëheqjes së ministrit të Mbrojtjes Kamenos nga koalicioni qeverisës.

Kreu i ekzekutivit grek dhe njëherë më shumë uroi homologun Zoran Zaev, duke shtuar se me arritjen e kësaj marrëveshjeje Greqia është çliruar nga logjika e nacionalizmit për një çështje kaq delikate kombëtare. E njëjta gjë sipas tij ka ndodhur dhe nga ana e tjetër e kufirit.

Tsipras u tha qytetarëve grekë se ai dhe qeveria e tij nuk do të tërhiqen nga marrëveshja dhe se grekët pavarësisht bindjeve politike duhet ta mbështesin këtë proces./abcnews.al

greqia.jpg
G. P.16:10 | 12/01/2019

Miratimi i ndryshimeve kushtetuese në parlamentin e Shkupit është përshendetur nga Athina zyrtare me telefonata dhe mesazhe urimi. Por opozita në vend ruan ende qëndrimin e saj kundër Marrëveshjes së Prespës.

Athina zyrtare ka përshëndetur miratimin e ndryshimeve kushtetuese në parlamentin e Shkupit. Menjëherë pas votimit, kryeministri grek Aleksis Tsipras i ka telefonuar homologut maqedonas, Zoran Zaev, dhe e ka përgëzuar për finalizimin e procedurës.

Zëdhënësja e shtypit e SYRIZA-s në pushtet, ka deklaruar se votimi i ndryshimeve kushtetuese në Shkup, është “një humbje për nacionalizmin dhe irredentizmin. Është një mesazh paqeje, bashkëpunimi dhe pajtimi në Ballkan. Të dy popujt nuk kanë asgjë për të ndarë, vetëm i bashkon një e ardhme e përbashkët”.

Promotori i Marrëveshjes së Prespës nga ana e Greqisë, ish-ministri i Jashtëm, Nikos Kotzias, në një mesazh në Twitter, bën të ditur se ka shkëmbyer telefonata me shefin e qeverisë Zaev dhe shefin e diplomacisë maqedonase, Dimitrov.

“Fola me Zoranin dhe Nikollën. Kujtuam vështirësitë, lodhjen, tensionet, besimin dhe shpresat që kaluam duke punuar për marrëveshjen. Ëndërruam të ardhmen e përbashkët të dy popujve. Maqedoni e Veriut, mirë se erdhe në jetën tonë. Historia duhet të jetë shkollë dhe jo burg”, nënvizon ish-ministri i Jashtëm grek.

Nga Strasburgu, zv/presidenti i Parlamentit Europian, Dimitris Papadimoulis, që përfaqëson partinë e kryeministrit Tsipras, vë në dukje se tani është radha e Greqisë që të votojë Marrëveshjen e Prespës.

“Maqedoni e Veriut në vend të Maqedonisë, heqje e irredentizmit nga Kushtetuta, qartësim se “Prespa” flet për shtetësi, jo për kombësi. Maqedonia antike mbetet trashëgimi greke. Tani është radha jonë për të thënë PO, pa vonesa”, shkruan në rrjetin social Twitter Papadimoulis.

Nga partia më e madhe opozitare, Demokracia e Re, ende nuk ka ndonjë reagim. Mirëpo kryetari i kësaj partie, Kyriakos Mitsotakis, pas takimit që pati të premten pasdite me kancelaren gjermane Angela Merkel, tha se i shpjegoi mysafires arsyet pse partia e tij nuk e voton marrëveshjen e Prespës.

Kyriakos Mitsotakis: “Jo thjesht pse marrëveshjen e kundërshton shumica dërrmuese e popullit grek. Por sepse është një marrëveshje e keqe që në vend se të zgjidhë probleme të vjetra në Ballkan, mund të krijojë probleme të reja. Dhe ky qëndrim i yni është i panegociueshëm”./abcnews.al

ARRATISJA-E-SHQIPTARIT-MBULIM_ABC-M2-T1.mpg_snapshot_00.02-1280x720.jpg
G. P.12:43 | 18/12/2018

Një shtetas shqiptar është arratisur nga qelitë e paraburgimit, duke vënë në alarm gjithë policinë e Athinës. Ngjarja ka ndodhur në orët e para të mëngjesit të së martës, në drejtorinë policore të Atikës Perëndimore. Shqiptari ka mundur të presë me limë hekurat e qelisë dhe pastaj të dalë e të zhduket në drejtim të paditur. 38 vjeçari ishte plagosur pas një shkëmbimi zjarri me policinë gjatë një grabitjeje me armë, më 27 nëntor, në afërsi të Athinës.

Pasi qe kuruar në spital i ruajtur nga policia, ai po mbahej në paraburgim, në pritje që të transferohej në një nga burgjet e sigurisë së lartë. Krahas operacionit për gjetjen dhe kapjen e tij, është urdhëruar dhe fillimi i hetimeve mbi rrethanat e arratisjes./abcnews.al

MBULIM-REAGON-ATHINA.mpg_snapshot_00.12-1280x697.jpg
G. P.20:39 | 11/12/2018

Ministria e Jashtme greke në një reagim për planin e rikualifikimit urban të Himarës thotë se dhënia e tokave të minoritarëve grekë ministrisë së turizmit është abritrare. “I bëjmë thirrje qeverisë shqiptare që ta anulojë vendimin përkatës dhe të shqyrtojë sërish ligjin, duke u kujdesur që t’u jepen menjëherë titujt e pronësisë gjithë pronarëve të ligjshëm, pa përjashtim”, thuhet në deklaratën e ministrisë së jashtme greke. Më tej nënvizohet se “ky vendim është në kundërshtim me Konventën Europiane të të Drejtave të Njeriut, por edhe me vendimet e autoriteteve gjyqësore shqiptare”. Për Athinën, një akt i tillë “është shkelje flagrante e të drejtave të njeriut, përfshirë të drejtën e pronës të minoritetit grek në Shqipëri./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono