Astrit Patozi

astrit-patozi.jpg
ger ta17:39 | 13/11/2019

Situata me ngritjen e Gjykatës Kushtetuese duket se i ka shkaktuar të qeshura, kreut të Bindjes Demokratike, Astrit Patozit.

Kreu i BD me ironi pyet se pse të mos kemi 3 gjykata Kushtetuese.

Reagimi i Patozit vjen pas vendimit të Metës për të dekretuar si anëtare të Kushtetueses Marsida Xhaferllarin.

Reagimi i Patozit:

PSE TË MOS KEMI 3 GJYKATA KUSHTETUESE?

Hahaha. Çfarë shteti qesharak! Kishim dy vjet pa Gjykatë Kushtetuese fare, kurse tani, me sa duket, do të kemi dy të tilla njëherësh. Njërën, sipas Edi Ramës, dhe tjetrën, sipas Ilir Metës.

E sigurt është se që të dyja po ngrihen për të mbrojtur interesin publik, ndaj dhe protagonistët duhen falënderuar me gjithë zemër për kontributin dhe sakrificën.

Problemi i vetëm që ka dalë është se pse të mos kishim edhe një Gjykatë Kushtetuese tjetër, sipas Lulzim Bashës. Me këtë rast, ekuilibri do të ishte i plotë, por edhe suksesi i garantuar.

 

astrit-patozii.jpg
ger ta17:07 | 09/11/2019

Astrit Patozi kreu i Bindjes Demokratike ndan shqetësimin se pse po kalohen në heshtje zgjedhjet e brendshme në Partinë Socialiste.

Sipas Patozit lajmi sot ishte mungesa e kryeministrit Rama në takimin e socialistëve dhe jo se çfarë u tha nga përfaqësuesit e tjerë.

Dhe sipas kreut të BD kjo e ka një përgjigje dhe nuk ka të bëjë me faktin se shqiptarët e kanë humbur interesin për politikën, por sepse të gjithë e kanë kuptuar se gjithçka është teatër.

Sepse në partitë tona nuk bëhet zgjedhje, por emërime, dhe kjo epidemi ka prekur të gjithë sistemin politik. Sepse e njëjta histori vijon më pas me listat e deputetëve, emrat e kandidatëve për kryetarë bashkie dhe me çdo të zgjedhur tjetër në këtë vend”, shprehet Patozi mes të tjerash.

Komenti i plotë:

PSE NUK KA LAJM PËR ZGJEDHJET NË PARTINË SOCIALISTE?

Pothuajse po mbyllen zgjedhjet e brendshme të Partisë Socialiste dhe nuk ndjehet të ketë asnjë vëmendje mediatike. Sot lajmi ishte që në takim mungonte Edi Rama dhe jo se çfarë po ndodh realisht me forcën politike, që mban e vetme prej më shumë se dy vjetësh timonin e qeverisë.
Mos i kërkoni më kot arsyet tek frekuenca e lartë e ngjarjeve të pazakonta, që ne prodhojmë si shoqëri dhe aq më pak tek shtypi si pasqyrë e deformuar e tyre. Nuk është faji i publikut që njeh edhe detajet më të imta të jetës së Redian Rrahjes dhe nuk ka asnjë informacion për të ardhmen e partisë më të madhe në vend, sipas zgjedhjeve të fundit.
Dikush mund të thotë se është zbehur interesi i shqiptarëve për politikën në këto vitet e fundit, por kjo është shumë larg të vërtetës. Sepse, është e kundërta, për sa kohë që politIka vijon të mbetet shumë përcaktuese për fatet e tyre.
Problemi është se të gjithë e kanë kuptuar se gjithçka është teatër, ndaj edhe nuk kanë asnjë lloj kurioziteti për ta ndjekur shfaqjen. Sepse në partitë tona nuk bëhet zgjedhje, por emërime, dhe kjo epidemi ka prekur të gjithë sistemin politik. Sepse e njëjta histori vijon më pas me listat e deputetëve, emrat e kandidatëve për kryetarë bashkie dhe me çdo të zgjedhur tjetër në këtë vend.
Ndaj edhe lajmi sot ishte që në mbledhje mungonte Edi Rama, dhe jo se çfarë thanë, bënë apo vendosën gjithë të tjerët, që presupozohet të jenë rreth 100 mijë burra dhe gra në partinë e vetme qeverisëse në Shqipëri. Sepse gjithë të tjerët nuk kanë asnjë vlerë, ngaqë secili prej tyre e ka emrin më laps dhe karriera e gjithëkujt varet thjesht dhe vetëm nga humori i “udhëheqësit”.
Është pikërisht kjo arsyeja pse refuzimi për të reformuar sistemin tonë të dështuar politik vjen kryesisht prej aty, ku gravitacioni i pushtetit të kryetarokracisë është më i fortë. Nga shefat e partive kryesore, të cilët sot mund të jenë të gatshëm të zihen për gjithçka në këtë botë, madje edhe për datën, por jo për ruajtjen e statukuosë, për të cilën duket qartë se ka një pakt të heshtur midis tyre./abcnews.al

 

astrit-patozii-1.jpg
ad min23:04 | 22/10/2019

Astrit Patozi nuk pajtohet me asnjërën nga qasjet e mazhorancës apo opozitës pas vendimit të Këshillit Europian për të mos hapur negociatat për Shqipërinë. I ftuar në studion e Abc News, drejtuesi i Bindjes Demokratike deklaroi qartë se vendi ynë në këtë fazë nuk e meriton hapjen e negociatave me BE.

“Pas lajmit të keq kemi një reagim të ekzagjeruar të dy palëve. Qeveria po e trajton sikur ka një problem Brukseli, nuk ka asnjë problem Tirana. Nga pala tjetër ka një ekzagjerim të madh sikur është fundi i botës, kjo ndodhi për herë të parë. Shqipëria ka pasur shumë stacione të humbura gjatë rrugëtimit të vet drejt Europës. Të dyja qasjet janë patetika.

E vërteta është që ka përgjegjësi shumë të madhe qeveria dhe politika, por qeveria në veçanti. Disa po i vërsulen Macronit duke e sharë edhe nga gruaja por ndërkohë duhet ta mburrin atë. Pra pala që është e mërzitur me Macronin duhet ti jetë mirënjohëse. Macroni në një farë mënyre i shpëtoi nderin qeverisë”, tha Patozi./abcnews.al

astrit-patozii.jpg
ad min20:32 | 22/10/2019

Koordinatori i Bindjes Demokratike, Astrit Patozi, deklaroi këtë të martë se Shqipëria nuk e meriton hapjen e negociatave. Sipas tij edhe nëse vendet anëtare do të kishin marrë një pozitiv, vendi unë nuk e meriton.

Patozi theksoi gjatë një interviste në televizionin ABC News se shqiptarët qeverise më keq se para disa viteve.

“Unë mendoj që edhe në rast se zonja Merkel do ta bindte Macron, për arsyet e brendshme të Brukselit që ta mbyllte një sy dhe të hapeshin negociatat, ne sërish nuk do të ishim të çliruar sepse ne nuk e meritojmë hapjen e negociatave. Mjafton ta shikosh nga Hëna me teleskop dhe të thuash që kurrë nuk mund të jetë anëtare e BE. Ne jemi një vend që nuk bëjmë zgjedhje.

Ne jemi sot një gjysmagjel vend. Kemi një qeveri që ushtron një pushtet që nuk e takon. Kemi një opozitë të ikur nga sistemi. Kemi një president në fije të perit. Një vend krejtësisht anormal. E them me shumë dhimbje por sot mund ta them me plot gojën që shqiptarët vishen më mirë, hanë më mirë, ndoshta lahen më shpesh por qeverisen më keq se para 10 apo 15 vjetësh. Kjo krizë politike është e pashembullt”, tha Patozi.

“Nuk e di duhet ta çonte apo jo. Po të isha vetë që nga Brukseli do thosha që jam gati për zgjedhje të parakohshme. Ne jemi në një truall tjetër. Nuk e njeh këtë përgjegjësi. Minimumi që mund të thoshte meqenëse vendet anëtare kishin problematikat e tyre, por qeveria jonë ndihet përgjegjëse për sa i takon. Dhe një ndjesë të fortë për të gjitha arsyet. Ndonjëherë qeveritë japin dorëheqje për aksidente”, tha Patozi./abcnews.al

ILIR-META-ASTRIT-PATOZI.jpg
ad min16:42 | 05/10/2019

Kreu i Bindjes Demokratike, Astrit Patozi, beson se kriza që po kalon vendi ka bërë që shumë prej aktorëve politikë të ndihen nervozë. Sipas Patozit, Presidenti Meta ndihet i kërcënuar, duke e shprehur këtë në intervistat publike të tij ndërkohë që pohon se në një situatë të ngjashme është edhe kryeministri Rama. 

Shpërthimet e vazhdueshme të Ilir Metës i konsideron legjitime. Astrit Patozi beson se kreu i shtetit në situatën e krijuar në vend ndihet i kërcënuar. I ftuar në emisionin “Provokacija” të gazetarit Mustafa Nano, Patozi flet për udhëkryqin që sipas tij gjendet Ilir Meta.

Nervozizmin e lexon edhe në sjelljet politike të Edi Ramës, i cili sipas Patozit ra në kurthin e dëshirës për pushtet. Reformën Zgjedhore e sheh si një rrugëdalje për krizën në të cilën ndodhet vendi dhe këshillon që aktorët politikë të mos e bëjnë atë si imponim të ardhur nga ndërkombëtarët.

Koordinatori i Bindjes Demokratike ka kërkuar vazhdimisht ndryshim të sistemit zgjedhor, duke ngritur gishtin e akuzës te kryeministri Rama dhe kreu i opozitës Basha si dy personat kryesorë që pamundësojnë këto ndryshime./ABC News Albania 24/7

astrit-patozi-1280x703.jpg
nev ila23:39 | 04/10/2019

I ftuar në emisionin Provokacija me gazetarin Mustafa Nano ka qenë i ftuar koordinatori i Partisë Bindja Demokratike, Astrit Patozi.

Në bisedën e zhvilluar me gazetarin Mustafa Nano Patozi komentoi situatën politike në vend.

Sipas Patozit Shqipëria duhet të zgjidhë mënyrën si ndërtohen partitë politike në Shqipëri, si ndërtohen dhe si financohen ato, si bëhen zgjedhjet brenda një partie.

Nëse kjo nuk bëhet, sipas tij, nuk mund të pretendohet  që të zhvillohen zgjedhje të lira e të ndershme.

Shqipëria nëse nuk zgjidh problemin e partive, si zgjidhen ato, si ndërtohen, si funksionojnë si financohen dhe si bëhen zgjedhjet brenda një partive në sigurisht nuk mund të shkojmë te rezultati që të mund të kemi zgjedhje të lira e të ndershme. partitë tona arrogante nuk shlyejnë detyrimin më minimal që të raportojnë në gjykatë, sipas detyrimit ligjor që kanë, çdo ndryshim lidershipi apo statusor. Partitë politike janë institucione publike dhe e kanë detyrim ligjor të raportojnë dhe të tregojnë ndryshimet që bëjnë“, tha Patozi./abcnews.al

lulzim-basha-4.jpg
ad min15:09 | 26/09/2019

Kreu i PD, Lulzim Basha është i gatshëm të bashkohet me kreun e Bindjes Demokratike, Astrit Patozi, në funksion të realizimit të qëllimit të zgjedhjeve të parakohshme. I pyetur nga ABC News, Basha theksoi se dora e tij do të jetë e shtrirë për këdo që ndan të njëjtat qëllime me demokratët.

Lulzim Basha shtriu edhe njëherë dorën e bashkëpunimit për të gjithë ish-funksionarët e lartë të Partisë Demokratike. I pyetur nga ABC Neës në lidhje me bashkëpunimin e mundshëm me Bindjen Demokratike të drejtuar nga Astrit Patozi, Basha u tregua i gatshëm të bashkëpunojë me çdo person që ndan qëllime të njëjta me opozitën.

Në një intervistë për ABC Neës disa ditë më parë, ish-nënkryetari i PD, Astrit Patozi u tregua i hapur për të bashkëpunuar me Partinë Demokratike për të detyruar qeverinë ta çoj vendin drejt zgjedhjeve të parakohshme.

Kërkesën për një bashkim të gjithë faktorit opozitar e kanë bërë edhe aleatët e Partisë Demokratike. Përmes një platforme bashkëpunimi ata kanë kërkuar krijimin e senatit të opozitës, pjesë e të cilit do të jenë Figura politike dhe qeverisëse të opozitës, si dhe figura intelektuale brenda dhe janë jashtë vendit./ABC News Albania 24/7

astrit-patozi.jpg
ad min15:36 | 18/09/2019

Kreu i Bindjes Demokratike, Astrit Patozi, sheh si zgjidhje për krizën politike që po kalon vendi vetëm zgjedhjet e parakohshme. Në një intervistë për ABC News, Patozi shprehet i hapur për bashkëpunim me Partinë Demokratike, nëse kanë së bashku këtë pikësynim.

Kriza e thellë politike zgjidhjet vetëm me zgjedhje të parakohshme. Kjo është rruga e vetme që Astrit Patozi sheh për një normalizim të situatës politike, ku përballë njëra tjetrës janë një mazhorancë e mbingopur me pushtet dhe një opozite të papërfaqësuar në asnjë institucion.

“Ne sot jemi në kushtet që qeveria dhe mazhoranca vuan mbipeshën nga një pushtet i pamerituar dhe një pjesë që është dhuruar prej opozitës. Nga ana tjetër opozita që vuan gati mungesën totale të gjitha pushteteve. Mendojmë se zgjedhjet e parakohshme janë domosdoshmëri dhe janë e vetmja rrugë për ta zgjidhur këtë krizë përfaqësimi dhe për ta çuar këtë shoqëri në ekuilibrat që sot i mungojnë në mënyrë drastike. Është detyrim ekskluziv i opozitës që ta detyrojë qeverinë që të pranojë zgjedhjet e parakohshme që do t’i japin fund krizës dhe nuk do ta çojnë vendin në zvarritje”, tha Patozi.

Madje Astrit Patozi deklaron se nuk do t’i thoshte jo një ftesë për bashkëpunim me Lulzim Bashën nëse si pikësynim final do të ishin zgjedhjet e parakohshme.

“Unë nuk përjashtoj dhe nuk paragjykoj askënd, sidomos një formacion i cili është opozitar po ashtu si Bindja Demokratike. Unë shpresoj, nuk dua të flas për një gjë që nuk ka ndodhur, për një gjë që është ende në kuadrin e një thashethemi, por ajo që ka rëndësi është që ne të konvergojmë, do doja që çdo formacion opozitar të jepte kontributin e tij në funksion të arritjes së objektivit që janë zgjedhjet e parakohshme. Nëse PD dhe çdo parti tjetër opozitare punon dhe e tregon që është në funksion të këtij qëllimi sigurisht që ne kemi të njëjtin objektiv dhe do të shikojmë të gjitha format e bashkëpunimit”, tha Patozi.

Por kreu i Bindjes Demokratike nuk i vlerëson serioze qëndrimet e kreut të opozitës, Basha, se kriza mund të zgjidhet përmes një dialogu të brendshëm, duke rikthyer në memorie qëndrimet e mbajtura për reformën në drejtësi.

Sa më e rëndë që të jetë situata dhe e tillë është në Shqipëri, aq më shumë nevojë kemi për partnerët tanë ndërkombëtarë të cilët nuk kanë munguar në asnjë rast kur ne kemi pasur kriza. Deklaratat patetike të disa surrealistëve të vonuar apo që këtë funksion e ushtrojnë part time mua gjithmonë më kanë shkaktuar të qeshura sepse kujtoj seancën për reformën në drejtës në Kuvend ku u ngritën 140 kartona jeshilë dhe bashkë me Lulzim Bashën në llozhë bëheshin 141, kjo deviza e ndërtimit të demokracisë është një reminishencë e së shkuarës. Ne kemi shumë nevojë për praninë e ndërkombëtarëve, sidomos për situatën ku gjendemi sepse ne gjëmën më të madhe këtij vendi e kemi bërë kur kanë humbur pak vëmendjen ose kur na kanë lënë ne që ta zgjidhim vetë”, tha Patozi.

Thirrjet e ndërkombëtarëve për reformën zgjedhore Patozi i vlerëson si pozitive, por nuk është shumë optimist për vullnetin e klasës politike dhe më konkretisht i Edi Ramës dhe Lulzim Bashës. Sipas Patozit, kriza nuk do të zgjidhet me ndërhyrje estetike në Kod, por me reformë të thellë në sistem.

“Përse duhet më ky sistem i cili është provuar që nuk prodhon as demokraci dhe as stabilitet. Nuk do ishte e udhës që thjesht dhe vetëm të rregullonim disa nene të Kodit elektoral qoftë duke pasur si busull projektuese rekomandimet e OSBE/ODIHR”, tha Patozi./ABC News Albania 24/7

astrit-patozi-1-1280x608.jpg
nev ila20:33 | 11/07/2019

Mbrëmjen e sotme në ABC News me gazetaren Mirela Milori, ka qenë i ftuar Koordinatori i partisë “Bindja Demokratike”, Astrit Patozi. Duke ndarë opinionin e tij në lidhje me procesin zgjedhor, Patozi tha se “Bindja Demokratike” ka të dhëna për deformim të votës, ai gjithashtu tha se KQZ e goditi që në fillim partinë e tij, duke mos e lejuar të garonte në të gjithë vendin, e për pasojë solli penalizmin e saj. Më tej Patozi deklaroi se do ta ndjekin çështjen e hapjes së kutive edhe më tej, pasi hapja e tyre do të përmbyste rezultatin që është pasqyruar. Për Patozin, zgjedhje të tilla ku të numërojnë militantët e partisë nuk duhet të ketë.

“Shqiptarët nuk patën mundësi të dëgjojnë zërin e bindjes demokratike. Ne kemi të dhëna por nuk kemi prova për deformim të votës. KQZ na goditi që në fillim sepse nuk na la të garonim në të 61 bashkitë. Ne na ndodhi që u penalizuam nga KQZ me dominancë socialiste dhe KZAZ 100 % socialiste, nuk u lejuam të kandidojmë në gjithë territorin, na sulmuan kandidatët të cilët u tërhoqën edhe nga gara dhe na u morën votat në tavolinë. Ne kërkuam të ishim të pranishëm në numërimin e votave dhe nuk u lejuam”, deklaroi Patozi.

Mirela Milori: Si do të veproni më tej?

Astrit Patozi: Ne respektojmë bindjen dhe vullnetin tonë dhe zgjedhësve që atë ditë na u përgjigjën në kulmin e një trysnie politike në kushte ekstreme. U ushtrua trysni mbi zgjedhësin shqiptar dhe kjo i bezdisi njerëzit, padyshim dhe e dëmtoi praninë tonë. Ne për qeverinë ishim të padëshirueshëm në zgjedhje. Ne jemi të detyruar që ta ndjekim këtë çështje por nuk kam shumë besim. Ne kemi të drejtën ta kërkojmë hapjen e kutive.

Mirela Milori: Pritshmëritë tuaja a i arritët?

Astrit Patozi: Jo sepse rezultati ynë u coptua që në hyrje, gjatë fushatës dhe në numërim pra në të gjithë procesin. Edi Rama nëse nuk hap kutitë, atëherë duhet ta pranojë që kutitë brenda janë krejt ndryshe nga cfarë janë shënuar. Mund ta bëjnë provë vetëm me një zonë zgjedhore, mjafton që 1 mostër të hapet dhe ne jemi të bindur që rezultati përmbyset dhe kjo e bën procesin edhe më të shëmtuar.

Mirela Milori: E prisnit këtë sjellje nga qeveria e Ramës?

Astrit Patozi: Jo nuk e prisnim në fillim, mendonim që edhe ata kishin interes për praninë tonë, por ata me sa duket kishin ankthin e pjesëmarrjes etj. Zgjedhje në Shqipëri ku të numërojnë militantët e partisë nuk duhet të ketë më kurrë sepse ne nuk do dalim nga kjo spirale./abcnews.al

astrit-patozii.jpg
ad min20:31 | 11/07/2019

Astrit Patozi komentoi deklaratat e ish-kryeministrit Sali Berisha, i cili disa ditë më parë tha se e vetmja zgjidhje për situatën aktuale është kryengritja popullore me 51 format e mosbindjes civile.

Gjatë rubrikës “Mbrëmje ABC” me Mirela Milorin këtë të enjte, koordinatori i Bindjes Demokratike tha se ajo deklaratë është si serum për militantët dhe që nuk zgjidh asgjë.

Mirela Milori: Zoti Berisha ndërkohë thotë që vazhdon me të njëjtin ritëm kërkesa e njerëzve për mosbindje civile.

Astrit Patozi: Është patetike dhe është një lloj serumi që i jepet militantëve për të mbajtur shpirtin gjallë, por them që nuk zgjidh asgjë. Pse? Palët përpiqen që Shqipërinë ta mbajnë bardhezi. Qeveria thotë që ne kemi bërë më të mirën, kurse opozita thotë që kjo është një skëterrë ku nuk jetohet, ose duhet të ikë Edi Rama ose të largohemi fare nga Shqipëria. Në fakt Shqipëria ka ngjyrat e veta.

Nuk është as bardh, as zi, por që palët i mbajnë në skalionet e tyre të mbledhura është problem i opozitës. Opozita ka nevojë që të marrë shqiptarët që nuk besojnë qorrazi tek partitë se vetëm opozita e ka detyrimin që ti bindë ata që të rrëzojmë qeverinë sepse vetëm nuk ia del dot kurrë dhe sidomos në kushtet e një opozite të djathtë, e cila ka edhe atë rezervuarin fillestar të votës deficitar në raport me palën tjetër. PD duhet të kalojë ylberin për të marrë elektoratin gri. Pala tjetër është më e relaksuar duke ruajtur thjesht militantët e vet. Në rast se do jetë ndeshje fiton gjithmonë qeveria, por sidomos kur është e majtë që është e dyfishtë”./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono