Artan Cuku

jambelli.jpg
Sej rie16:52 | 12/06/2019

Gjykata e Lartë Greke liron Bledar Jambellin, i dyshuar si personi që ka porositur vrasjen e kryekomisarit Artan Cuku.

Prokuroria e Krimeve të Rënda është në pritje të vendimit të plotë nga gjykata greke, në mënyrë që të vendosë për hapat e mëtejshëm që do të ndjekë.

I dyshuari si porositësi i vrasjes së ish-drejtorit të policisë së Vlorës, Artan Cuku lihet i lirë. Deri të mërkurën, asnjë nga autoritetet e vendit duket se nuk e dinin se iu kishte rrëshqitur nga duart Bledar Jambelli, personi që urdhëroi ekzekutimin mafioz të zyrtarit më të lartë të policisë të vrarë deri më tani me një plan të mirëfilltë kriminal.

Autoritetet shqiptare mësohet se ishin informuar në maj të këtij viti për vendimin e dhënë nga gjykata e ë greke për mos ekstradimin e Bledar Jambellit. Por prej një muaji duket se ishin në pritje të zbardhjes së vendimit nga ana e drejtësisë helene e cila duket se ka vlerësuar si nul provat e paraqitura në gjykata bashkangjitur kërkesës për ekstradimin e Jambellit.

Bledar Jambelli rifitoi lirinë, vetëm pak ditë pasi ish-drejtuesi i lartë i policisë Artan Cuku, i vrarë për shkak të detyrës u shpall dëshmor i atdheut.

Përgjigja negative për Jambellin ka mbërritur prej më shumë se 1 muaji pranë Ministrisë së Drejtësisë, por është mbajtur e fshehtë nga autoritetet tona.  Ndërkohë, prokuroria e Krimeve të Rënda është në pritje të vendimit të plotë i Gjykatës së Lartë Greke.

Bledar Jambelli, i njohur ndryshe me emrin Rikardo Muho, u arrestua në dhjetor të vitit të shkuar në Greqi, gati 2 vite pas vrasjes së kryekomisarit Artan Cukut. Ai ishte i shpallur në kërkim ndërkombëtar dhe gjykata e krimeve të rënda i kishte caktuar masën e sigurisë “Arrest në burg” në mungesë. Kryekomisari u vra duke hyrë në shtëpinë e tij në Tiranë më 8 Prilli 2017.

Në baze të hetimeve ka rezultuar se 38-vjeçari Jambelli e urdhëroi vrasjen e Kryekomisarit për shkak se ai e kishte arrestuar në kohën kur mbante detyrën e Drejtorit të Policisë së Vlorës. Për vrasjen e Artan Cukut, vuan dënimin ekzekutori Mikel Shallari, ndërsa është ende në kërkim i akuzuari si bashkëpunëtor, Kristian Leci si bashkëpunëtor./ABC News Albania 24/7

artan-cuku-1280x853.jpg
ent ela13:34 | 09/04/2019

Artan Cuku shpallet “Dëshmorë i Atdheut” dy vite pas ekzekutimi të tij. Sipas ministrit të Brendshëm, po punohet që porositësi i vrasjes së ish-drejtuesit të parë të Policisë së Shtetit të ekstradohet nga Athina drejt vendit tonë.

Numri i lartë i dëshmorëve të Policisë së Shtetit duhet të shërbejë si një thirrje për reflektim të thellë ndaj shoqërisë në tërësi, e po kështu edhe ndaj klasës politike.

Kështu u shpreh ministri i Brendshëm Sandër Lleshaj, gjatë ceremonisë së shpalljes “Dëshmor i Atdheut” të drejtuesit të parë Artan Cuku, dy vjet pas ekzekutuar të tipit mafioz, mbrëmjen e 8 prillit të 2017, pranë banesës së tij në Tiranë.

Sandër Lleshaj: “Shembulli i Artan Cukut dhe i qindra dëshmorëve të tjerë të Policisë së Shtetit është një hipotekë e rëndë, por dhe e paçmueshme krenarie dhe vlerash të larta, që Policia e Shtetit do të ndjekë dhe vlerësojë në shërbimin e saj ndaj qytetarëve dhe ndaj sigurisë publike të vendit. Numri i lartë  i dëshmorëve të Policisë së Shtetit duhet të shërbejë si një thirrje për përkushtim, profesionalizëm, ndershmëri dhe dinjitet për çdo punonjës të saj dhe posaçërisht për ata të rinj që po bashkohen përditë e më shumë në radhët e strukturave të Policisë. Ky numër i lartë, madje jashtëzakonisht i lartë dëshmorësh, duhet të shërbejë edhe si një thirrje për reflektim të thellë, përgjegjësi të lartë ndaj çdo shqiptari, ndaj shoqërisë në tërësi, ndaj klasës politike”.

Lleshaj theksoi se Shqipëria ka nevojë për më shumë policë, por për asnjë dëshmor nga radhët e saj, ndërsa kujtoi se po punohet që të ekstradohet nga Greqi drejt vendit tonë porositësi i vrasjes së Cukut.

Sandër Lleshaj: “Artan Cuku kaloi një karrierë shumë dinamike dhe të suksesshme në radhët e Policisë së Shtetit, duke kryer detyra në nivele të ndryshme drejtimi, nga më të ulëtat, deri të ato më të lartat, ku spikat ajo e Drejtorit të Policisë Vendore të qarkut Vlorës. Dhe e mbylli jetën e tij të re pas një atentati të pabesë, nga një dorë kriminale, me 8 prill 2017. Vrasësi i paguar i Artan Cukut u kap nga Policia e Shtetit në 11.06.2017, kurse porositësi i këtij krimi të shëmtuar është arrestuar me 29.12.2018 në Athinë, prej nga pritet ekstradimi i tij drejt Shqipërisë ku do të duhet të përballet me drejtësinë”.

Rakip Cuku pohoi se vrasja e vëllait të tij ishte një goditje për të gjithë drejtësinë në vend.

Artan Cuku ka mbajtur poste të rëndësishme ne Policinë e Shtetit ne një karriere 16 vjeçare. 42-vjecari u lirua nga policia në qershor të vitit 2013. Cuku ka qenë më herët zv.Drejtor në Policinë e Tiranës para se të emërohej Drejtor në Vlorë, ndërsa ka punuar edhe si shef krimesh në Tiranë, Shkodër e Fier. Nga hetimet u provua se Mikel Shallari ekzekutoi Artan Cuku me 5 plumba. Ai ka statusin e dëshmitarit mbrojtur dhe u dënua me 10 vite burg, teksa pranoi të rrëfejë emrin e Bledar Jambellit personi që e pagoi për vrasjen e Cukut. Sipas Prokurorisë së Krimeve të Rënda, Jambelli u hakmor për një arrestim që Cuku i bëri në qytetin e Fierit si vrasës me pagesë në dhjetor të vitit 2012./abcnews.al

JAMBELLI-1280x720.jpg
ent ela13:27 | 31/12/2018

Arrestohet në Athinë, Greqi, Bledar Jambelli, i dyshuar si porositësi i vrasjes së ish-shefit të Policisë së Vlorës, në 8 prill 2017 në Tiranë. Arrestimi i 38 vjeçarit Jambelli që mbante edhe emrin Rikardo Muho u mundësua nga bashkëpunimi mes Interpol Tiranës dhe Interpol Athinës.

Gati 20 muaj pas ekzkekutimit të ish-shefit të Policisë së Vlorës, Artan Cuku, në hyrjen e pallatit të tij tek Rruga e Kosovarëve në Tiranë, arrestohet një nga personat e dyshuar si porositës i vrasjes.

Policia e Shtetit njoftoi prangosjen e Bledar Jambellit, një nga më të kërkuarit e drejtësisë shqiptare. Ai është prangosur në Athinë, Greqi, falë një bashkëpunimi të Interpol Tiranës dhe Interpol Athinës. Sipas policisë, 38 vjeçari Jambelli përdorte edhe emrin Rikardo Muho.

Jambelli dhe Kristaq Leci, i dyshuari si nërmjetës mes tij dhe ekzekutorit të komisarit të policicë, u shpallën në kërkim pas caktimit të një mase sigurie “arrest në burg” dhënë në mungesë për ta në qershor 2017 nga Gjykata për Krimet e Rënda.

Jambelli dhe Leci u identifikuan pas marrjes së dëshmisë së Mikel Shallarit, një 24 vjeccari nga Kuccova, personit që në 8 prill 2017 qëlloi drejt kryekomisarit Cuku.

Pas arrestimit ai pranoi autorësinë e vrasjes dhe pranoi të bashkëpunojë me prokurorinë duke nxjerrë edhe emrat e porositësve të krimit.  Sipas rrëfimit të Shallarit, Jambelli kishte dëshiruar vrasjen e Cukut pasi pretendonte se e kishte arrestuar me pa të drejtë si të dyshuar për një vrasje të ndodhur në Vlorë në vitin 2012. Në lidhje me këtë ngjarje Jambelli kishte fituar pafajësi nga gjykata.

Për vrasjen e Cukut 24 vjeçarit Shallari i ishin premtuar 20 mijë euro nga Bledar Jambelli, nga të cilat ka marrë më pak se 3 mijë euro.

Ndonëse ishte ekzekutor në vrasje, për shkak statusit të “bashkëpunëtorit të drejtësisë” Shallari u dënua me vetëm 10 vite burg. /abcnews.al

 

 

JAMBELLI-PEZULLIM-MBULIM.mpg_snapshot_00.21-1280x720.jpg
G. P.10:41 | 18/10/2018

Pezullohet për një vit procesi gjyqësor për Bledar Jambellin, i akuzuar nga Prokuroria e Krimeve të Rënda si porositës i vrasjes së ish-oficerit të policisë Artan Cuku në Tiranë.
Bledar Jambelli po gjykohet në mungesë për këtë akuzë, bashkë me Kristaq Lecin. Ai është shpallur në kërkim ndërkombëtar, por ende është i lirë.
Për vrasjen e komisar Artan Cukut po vuan dënimin ekzekutori i tij Mikel Shallari, që ka pranuar se është porositur nga Bledar Jambelli për të kryer këtë krim, në këmbim të një pagese.
Në qershor të këtij viti Mikel Shallari u dënua me 10 vjet burg për vrasjen e Artan Cukut./abcnews.al

ARTAN-CUKU-JAMBELLI-1280x720.jpg
ent ela13:48 | 11/09/2018

Gjykata për Krimet e Rënda e nisi me shtyrje procesin gjyqsor ndaj Bledar Jambellit dhe Kristaq Lecit, të akuzuar për vrasjen e ish-shefit të Policisë së Vlorës, Artan Cuku. Seanca u shty për në 25 shtator për shkak të mosnjoftimit të të pandehurve për gjyqin. Jambellit e Lecit janë persona të shpallur në kërkim bazuar në një masë sigurie “arrest në burg” në mungesë nga Krimet e Rënda. Kryesuesja e seancës relatoi kërkesat e drejtuara policisë së Beratit dhe Fierit për procedurat e njoftimit të të pandehurve dhe faktin se nuk kishte marrë përgjigje prej tyre.

Duke i konsideruar të papërmbushur procedurën ligjore të njoftimit kryesuesja vendosi ridërgimin e njoftimeve dhe vënien në dijeni të Policisë së Shtetit për moskthimin e përgjigjeve nga Policia e Fierit dhe Beratit. Sipas Prokurorisë, Bledar Jambelli është porositësi i ekzekutimit të Cukut në prill 2017. Vrasja u realizua nga Mikel Shallari, i cili falë bashkëpunimit me Prokurorinë u dënua përfundimisht me 10 vite burg./abcnews.al

mikel-shallari.jpg
G. P.18:55 | 21/05/2018

Prokuroria për Krimet e Rënda mbyll hetimet për Mikel Shallarin, të akuzuar për vrasjen e komisarit Artan Cuku. Këtë javë, gjykata do të miratojë kërkesën e prokurorisë për ligjërimin e statusit të bashkëpunëtorit të drejtësisë për të. Në rast pranimi, 24-vjeçari që ka pranuar vrasjen e babait të dy fëmijëve, i shpëton burgut përjetë. 

Prokuroria për Krimet e Rënda ka përfunduar hetimet për Mikel Shallarin, 24-vjeçarin nga Kuçova, të dyshuar si ekzekutorin e ish-shefit të Policisë së Vlorës, Artan Cuku. Shallari akuzohet për veprën penale të “vrasjes së punonjëse të Policisë së Shtetit”, të kryer mbrëmjen e 8 Prillit 2017 në Tiranë, vepër për të cilën Kodi Penal parashikon një dënim nga 30 vjet deri në burgim të përjetshëm. Por gjasat janë që ai të dënohet shumë më pak se aq.

Pas arrestimit, Mikel Shallari shfaqi pendesë. Ai pranoi autorësinë e krimit dhe bashkëpunoi me prokurorinë duke rrëfyer emrat personave që e rekrutuan, punësuan dhe paguan për vrasjen e ish-zyrtarit të lartë të policisë.

Burime pranë Krimet e Rënda bënë me dije për ABC News se bazuar në ndryshimet që ka pësuar Kodi i Procedurës Penale, ditët e fundit Prokuroria i ka kërkuar gjykatës të ligjërojë këtë marrëveshje bashkëpunimit me drejtësinë. Kjo kërkesë pritet të shqyrtohet ditën e enjte.

Në rast miratimi të marrëveshjes nga gjykata, Shallari shmang përfundimisht rrezikun e dënimit përjetë. Burime jozyrtare konfirmuan se prokuroria kërkon një masë dënimi 10 vjet burg në marrëveshjen paraprake mes Shallarit dhe organit të akuzës.

Do të jetë gjykata, ajo që do të vlerësojë marrëveshjen dhe masën e dënimit për 24-vjeçarin.

Nga ana tjetër, familjarët e ish-drejtuesit të lartë të policisë të vrarë për shkak të detyrës, të cilët janë palë në hetim si të dëmtuar nga ngjarja, kanë kundështuar propozimin e prokurorisë, pretendim ky që do të shqyrtohet nga gjykata.

Sipas prokurorisë, komisari Artan Cuku u vra për shkak të shkak të detyrës së tij në Policinë e Shtetit. Ai ka qenë në krye të Policisë së Vlorës në vitin 2012, kur ka arrestuar Bledar Jambellin, si person të dyshuar për një vrasje të ndodhur në qytetin bregdetar. Jambelli fitoi lirinë disa muaj më vonë, por duket se la hapur konfliktin me Cukun.

Dosja penale në ngarkim të Jambellit dhe Kristaq Lecit, të akuzuar si të  përfshirë në këtë ngjarje është veçuar nga Krimet e Rënda, pasi hetimet janë në vazhdim. Ata janë shpallur në kërkim ndërkombëtar, ndërsa fotot e tyre gjenden në kategorinë “wanted” të Interpolit. Kërkimet policore të deritanishme për vendodhjen e tyre kanë rezultuar të pasuksesshme./abcnews.al

bashaa-933x445.jpg
ent ela11:47 | 13/01/2018

105 vjetorin e Policisë së Shtetit, kryedemokrati Lulzim Basha ka zgjedhur të nderojë uniformat me një vizitë në shtëpinë e oficerit të vrarë të policisë Artan Cuku. Duke folur për mediat ai tha se policia është në një moment tragjik, e tradhtuar nga drejtuesit politikë.

Më tej Basha shtoi se nëse më parë kriminelët merrnin arratinë dhe policia ishte në ballë të luftës, sot kriminelët janë në krye të Policisë së Shtetit.

“Drejtuesit e policisë kanë marrë arratinë, ose janë goditur nga krimi, sikurse është oficeri Artan Cuku. Të tjerë janë larguar si Dritan Zagani, pasi denoncuan lidhjet e pushtetit kriminal, lidhjet kriminale të Saimir Tahirit. Të bashkohemi në një aleancë vlerash për të shporrur aleancën e krimit”, u shpreh Basha.

Ne fund kryedemokrati Basha shtoi se vettingu në polici do të mund të bëhet vetëm pasi të largohet aleanca me krimin. Sipas kreut të PD-së, korrupsioni dhe lidhjet e policisë me krimin nisën nga koka e policisë./abcnews.al

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono