Arta Marku

ARTA-MARKU-RAPORTON-TEK-LIGJET-1280x720.jpg
ent ela21:24 | 11/07/2018

Raportimi vjetor i Prokurores së Përgjithshme të Përkohshme Arta Marku në komisionin e ligjeve, u shoqërua me akuza mbi punën e saj nga deputetët e opozitës. Zgjidhja erdhi nga kreu i komisionit të ligjeve, deputeti socialist Ulsi Manja që mbylli mbledhjen bashkë me debatin e opozitës.

Vendosi të ishte hermetike dhe e nisi me gazetarët, të interesuar për mungesën e evindetuar nga operacioni Ndërkombëtar i Monitorimit gjatë seancën për të në komisionin e vettingut.

Marku: “Ju lutem mos më bezdisni”.

Por bezdia nuk iu nda prokurores Marku deri në përfundim të mbledhjes së komisionit të ligjeve, ku raportoi mbi gjendjen e kriminalitetit për vitin 2017. Krimet me përqindje më të lartë për vitin e shkuar ishin vjedhja e pasurisë, krimet ndaj rendit dhe sigurisë publike, krimet ndaj regjimit juridik të tokës dhe ato ndaj fëmijëve dhe martesës. Në bazë qarqesh, përqindja më e ulët e kriminalitetit i përket Dibrës dhe më e larta, qarkut të Vlorës.

Opozita shfrytëzoi rastin për t’a ballafaquar kryeprokuroren e përkohshme me veprimet dhe mosveprimet e saj dhe institucionit që drejton për ato çfarë selia blu konsideron shkelje të ligjit dhe Kushtetutës.

Paloka: “A ka patur Prokuroria e Krimeve të Rënda në kohën që ju keni ardhur çështje nën hetim për ministra apo deputetë socialistë? Nëse po, pasi erdhët ju çfarë është bërë me këto dosje, mbi ç’bazë janë bërë emërimet e shkarkimet e drejtuesve të Prokurorisë. Si ka mundësi që Prokuroria e Tiranës u vu brenda natës në dispozicion të një trafikanti të dënuar droge siç ishte agron xhafës dhe veproi brenda 24 orëve? Kjo prokurori që duhet të ehtonte agron xhafën veproi 4 ditë pasi ishte dhënë materiali”.

Marku përgjigjet i dha e bezdisur.

Marku: “Ndërhyrjet e mia në cështjet konkrete mi ndalon ligji, dhe ju pyetet për ministra deputetë. Prokuroria nuk ndërhyn në çështje specifike, nuk kam nga ti di. Për emërimet dhe caktimet kam zbatuar kushtetutën dhe ligjin dhe vendimin e gjykatës”.

Ishin mos-përgjigjet ato që nxitën opozitarët.

Noka: “Duhet të raportojë pse sa u ul në karrige ajo mbylli çështjen e Saimir Tahirit? Pse nuk u apelua që ka qënë rregulli normal në Prokurori, të apeloheshin të gjitha vendimet e shkallave të ulëta. Pse nuk u apelua vendimi i Xibrakës? Apo sepse sipas dyshimeve tona ka familjarë të kryeministrit të përfshirë. Pse nuk ka asnjë të dhënë për hetimin e 613 kg kokainë të kapur në Durrës dhe pse dështoi ai aksion. Këto janë çështjet për të cilat duhet të flasë zonja këtu dhe jo të na tregojë përralla”.

Balliu: “Ne erdhëm këtu të presim prokuroren, na sollët këtu “Zonjën nuk e di”. Kjo nuk di asgjë!”.

Kreu i komisionit Ulsi Manja ai që i doli në mbrojtje përfundimisht përmes kartës, tashmë të vjetër, të mbylljes së mbledhjes, duke i mohuar kështu edhe deputetëve të mazhorancës mundësinë e pyetjes së titullares së institucionit të prokurorisë së përgjithshme..

Manja: “Unë këtu e konsideroj të mbyllur mbledhjen e komisionit të ligjeve”.

Për të mbrojtur protezhe-në e tij, sipas opozitës e cila denoncimin e përcolli edhe nga jashtë dyerve të komisionit.

Paloka: “Fakti që Ulsiu, i cili dihet se ka nje lidhje pak më të ngushtë me zonjën, duke parë që zonja ishte në vështirësi bëri një akt duke kërkuar që t’i mbyllë gojën opozitës, mbylli në mënyrë krejtësisht të parregullt komisionin në kulmin e pyetjeve.  Nuk është rasti i parë, këtë e bën Gramoz Ruçi, këtë bëri dhe Ulsi Manja duke mbyllur në mënyrë arbitrare punimet e komisionti të ligjeve”. /abcnews.al

 

paloka-kryesi-1280x712.jpg
ent ela16:45 | 11/07/2018

Nënkryetari i PD-së Edi Paloka, denoncoi mbylljen e punimeve të komisionit të Ligjeve, ku raportonte kryeprokurorja e përkohshme Arta  Marku. Në një deklaratë për mediat nga kryesia e Kuvendit, Paloka theksoi se në kulmin e pyetjeve Ulsi Manja mbylli në mënyrë krejtësisht të parregullt komisionin, pa u bërë pyetjet për kryeprokuroren Marku. Sipas tij kjo seancë nuk është mbyllur, pasi të gjithë do të japin llogari para një drejtësie të vërtetë.

Paloka:Seanca e sotme me të ashtuquajturën prokurore e përkohshme kishte rëndësi të madhe dhe për këtë arsye ne si deputetë të opozitës ishim të pranishëm të gjithë aty, jo se njohim një prokurore që s’ka asnjë tagër kushtetues për të kryer detyrat e prokurorit, por shpresonin se zonja do t’u jepte përgjigje disa prej skandaleve më të rëndësishme. Asaj përveç emrave të tjerë, mund t’i themi edhe zonja “nuk e di”, sepse ajo zbaton urdhrat që i ka dhënë partia. Fakti që Ulsiu, i cili dihet se ka nje lidhje pak më të ngyshtë me zonjën duke parë që zonja ishte në vështirësi bëri një akt duke kërkuar që t’i mbyllë gojën opozitës, mbylli në mënyrë krejtësisht të parregullt komisionin në kulmin e pyetjeve.  

Nuk është rasti i parë, këtë e bën Gramoz Ruçi, këtë bëri dhe Ulsi Manja duke mbyllur në mënyrë arbitrare punimet e komisionti të ligjeve. Kjo seancë nuk është e mbyllur, nuk janë bërë pyetjet për prokuroren, si këta që shkelin rregulloren si ajo që është vënë në krye të Prokurorisë do të japin llogari para një drejtësie të vërtetë”. /abcnews.al

arta-marku.jpg
G. P.15:17 | 11/07/2018

Kryeprokurorja e Përgjithshme e Përkohshme, Arta Marku, po raporton në Komisionin e Ligjeve për veprimtarinë e institucionit për vitin 2017. Në fillim të mbledhjes kishte një debat, pasi opozita kërkoi shtyrjen e raportimit me arsyetimin se ishte shkelur rregullorja, por në fund u arrit konsensusi që raportimi i Markut të realizohej sot.

Deputeti demokrat, Edi Paloka, tha Arta Marku nuk përfaqëson një institucion kushtetues, pasi është zgjedhur vetëm me 69 vota, duke mos marrë dot as gjithë votat e mazhorancës .

Duke raportuar per veprimtarine e institucionit që drejton, kryeprokurorja Arta Marku deklaroi se në vitin 2017 prokuroria ka hetuar vetëm për 17 banda dhe 12 zyrtarë të lartë.

“Numri i vogël i çështjeve nën hetim për korrupsion është i vogël dhe nuk përputhet me gjendjen reale apo raportet e ndryshme për gjendjen e korrupsionit në vend, ç’ka tregon se nuk ka pasur vullnet nga prokurorët për ta luftuar korrupsionin”, tha Marku./abcnews.al

enkelejd-alibeaj.jpg
G. P.14:01 | 04/07/2018

Deputeti demokrat, Enkekeljd Alibeaj, nga foltorja e selisë blu ka akuzuar komisionin e vettingut për përdorim të standarteve të dyfishta, përmes të cilave ka konfirmuar në detyrë prokuroren e përgjithshme të përkohshme Arta Marku. Kjo sipas ish-ministrit të Drejtësisë Alibeaj, jo për shkak të aftësive morale dhe profesionale, të cënuara publikisht përmes dokumentave, por për shkak të shërbimit që ajo i bën pushtetit të ekzekutivit shqiptar.

Pas vendimit të Komisionit të Pavarur të Kualifikimit mbi rivlerësimin kalimtar të prokurores së përgjithshme të përkohshme Arta Marku, nuk vonoi reagimi i Partisë Demokratike.

“Sot në Krye të Prokurorisë është një person i paaftë profesionalisht dhe që meritë të vetme të saj ka besnikërinë ndaj Kryeministrit dhe Ministrit të Brendshëm! Partia Demokratike e konsideron konfirmimin në detyrë të kamikazes së Edi Ramës në Krye të Prokurorisë si një lajm të keq për Reformën në Drejtësi dhe procesin e vettingut. Arta Marku duhet të ishte shkarkuar nga detyra për të paktën 5 arsye të forta, të argumentuara me fakte, të pakundërshtueshme”.

Shkarkimet dhe emërimet e prokurorëve apo titullarëve të të urdhëruara nga Arta Marku gjatë 6 mujorit të saj në detyrën e kryeprokurores së përkohshme; mbajtja në burg e qytetarëve jashtë kritereve ligjore në cilësinë e prokurores në Shkodë në dy raster, një prej të cilëve u artikulua edhe nga përfaqësuesi i Operacionit Ndërkombëtar të Monitorimit, Theo Jacobs gjatë seancës dëgjimore; si dhe deklarimi i një prone ende në proces legalizimi, duke pranuar kësisoj ndërtimin e saj pa leje, janë tregues të qartë për demokratët se..

Nëse procesi i vettingut nuk do të ishte i korruptuar politikisht, sot Arta Marku do të ishte shkarkuar nga detyra. Por kjo nuk ndodhi, sepse procesi drejtohet nga Edi Rama. Prandaj  dhe kushdo që i shërben atij në sistemin e drejtësisë në shërbim të korrupsionit të Qeverisë së tij dhe krimit të organizuar, do ta kalojë vettingun dhe do të qëndrojë në detyrë”.

Nuk do të jetë e largët dita kur drejtësia në Shiqipëri do të bëhet sipas standarteve më të mira europian, thekson Alibeaj duke garantuar në emër të partisë Demokratike se kushdo që ka shkelur ligjin dhe i ka shërbyer jo Kushtetutës por interesave të pushtetit do të përgjigjet përpara drejtësisë. /abcnews.al

 

arta-marku1.jpg
G. P.10:08 | 04/07/2018

Komisioni i Pavarur i Kualifikimit konfirmoi në detyra Prokuroren e Përgjithshme të Përkohshme, Arta Marku. Kryeprokurorja nuk ishte e pranishme në seancë, ndonëse një ditë më parë mungesa e saj u komentua si mungesë lidershimi nga ana e monitoruesit ndërkombëtar.

Me gjithë problematikat e vërejtura në seancën dëgjimore në lidhje me aftësitë e saj profesionale, Komisioni i Pavarur i Kualifikimit dha një vlerësim pozitiv për Prokuroren e Përgjithshme të Përkohshme, Arta Marku.

Vendimi që e konfirmoi në detyrë iu përcoll Markut përmes medias, ose përfaqësuesve të saj në sallë, pasi ajo kishte zgjedhur të mos paraqitej edhe në këtë seancë.

Në seancën dëgjimore të zhvilluar të martën, mosprania e Markut u komentua si mungesë prestigji nga ana e kryesueses së trupit gjykues dhe si zhgënjyese dhe mungesë lidershipi nga ana e vëzhguesit ndërkombëtar Teo Jacobs.

Nga hetimi i thelluar administrativ i KPK rezultonte se Marku kishte pasuri të justifikuar dhe figurë të pastër. Në seancën dëgjimore Komisioni cilësoi si problematike mungesën e transparencës së Markut në vendimarrjet e saj për ristrukturiumin e Prokurorisë, urdhrat për lëvizje të prokurorëe të komanduar, si edhe një rast, kur ajo kishte kërkuar dy herë masën e sigurisë “arrest në burg” për një qytetar të akuzuar për dhënie të automjetit në gjendje të dehur. Në lidhje me këtë rast, avokatja e Markut dha një shpjegim.

Ndërsa një ditë më parë, Teo Jacobs i dërgoi një mesazh Arta Markut për frymë tolerancë në kërkesat për izolim në qeli, pas vendimit avokatja i dërgoi atij një mesazh në distancë.

Në lidhje me komandime e Arta Markut, duke iu referuar edhe një vendimi të Kushtetueses avokatja Çukaj tha se janë bërë në kuadër të vazhdimësisë institucionale./abcnews.al

alibeaj11-1280x693.jpg
ent ela14:58 | 03/07/2018

Në përfundim të seancës dëgjimore në Komisionin e Pavarur të Kualifikimit për kontrollin e figurës së Prokurores së Përgjithshme të Përkohshmë Arta Marku, Partia Demokratike reagoi përmes deputetit Enkelejd Alibeaj.

“Arta Marku, e deleguara e Edi Ramës në Krye të organit të Prokurorisë, pritet të konfirmohet në detyrë, jo sepse përmbush kriteret e vendosura nga ligji, por se kriteret e kualifikimit që po aplikohen kanë si kusht kryesor se cili gjyqtar apo prokuror i shërben më shumë Edi Ramës dhe qeverisë së tij të korruptuar”.

Për të ilustruar argumentin, ish-ministri i Drejtësisë, Alibeaj, referon legjislacionin në fuqi.

“Është fakt i njohur botërisht që Arta Marku në 6 muaj në krye të organit të Prokurorisë, ka shkelur në mënyrë flagrante ligjin, duke bërë emërime e komandime të paligjshme të prokurorëve, duke emëruar e shkarkuar drejtues prokurorie, edhe pse neni 160, pika 2 e ligjit për statusin e magjistratit, ia ndalojnë shprehimisht këtë”.

Neni në fjalë i lejon Prokurorit të Përgjithshëm, që deri në krijimin e Këshillit të Lartë të Prokurorisë të pezullojë prokurorët, por jo të emërojë apo zëvendësojë ata, si ndodhi edhe me kryeprokurorin e Krimeve të Rënda, Besim Hajdarmataj, sot i zëvendësuar nga një tjetër prokurore, Donika Prela, fakte këto që duhen hetuar nga Komisioni i Kualifikimit sipas selisë blu.

“Shkelja e hapur e ligjit tregon jo vetëm mungesë respekti ndaj ligjit, por qartësisht mungesë të theksuar të integritetit moral e profesional, kushte këto të domosdoshme për të kaluar me sukses Vettingun”.

I tillë ishte edhe sinjalizimi nga Operacioni Ndërkombëtar i Monitorimit, thekson Alibeaj, të cilët gjatë seanës dëgjimore.

“Ngritën edhe shqetësimin se Arta Marku gjatë ushtrimit të detyrës si prokurore, ka kërkuar mbajtjen në burg të qytetarëve, jashtë kritereve që parashikon ligji. Ne kemi publikuar dokumenta tronditës, sesi Arta Marku, në cilësinë e Prokurorit në Shkodër, harroi në burg një qytetar për 2 muaj e 13 ditë, duke i hequr në këtë mënyrë lirinë, në mënyrë të paligjshme dhe të padrejtë”.

Do të mjaftonin këto raste, theksojnë demokratët, që Arta Marku të shkarkohej nga organet e Vettingut, duke shprehur mosbesimin e zbatimit të ligjit edhe në këtë rast, sa kohë ky proces, sipas tyre, diktohet nga Edi Rama në funksion të shantazhimit të prokurorëve dhe gjyqtarëve dhe shpërblimit të shërbëtorëve të tyre./abcnews.al

arta-marku1.jpg
ent ela11:02 | 03/07/2018

Mungesa e Prokurores së Përgjithshme të Përkohshme në seancën dëgjimore të vettingut ngjalli reagime negative tek trupi gjykues dhe tek monitoruesi ndërkombëtare. Përmes avokates Marku kërkoi konfirmim në detyre. KPK vlerësoi të pastër pasurinë dhe figurën e kryeprokurores, por pati rezerva në përgatitjen e saj profesionale.

Prokurorja e Përgjithshme e Përkohshme, Arta Marku, nuk guxoi të përballet me treshen gjykuese femërore të Vettingut. Edhe nëse kryeprokurores s’i mungoi guximi, avokatës që e përfaqësonte në sallë i mungoi një justifikim bindës për mungesën.

“Subjekti i rivlerësimit e pa të arsyeshme të mos ishte e pranishme”, tha avokatja Lirime Çukaj.

Mosprania në sallë e njeriut më të rëndësishëm të prokurorisë u vlerësua si mungesë prestigji nga ana e kryesueses Genta Bundo dhe si zhgënjyese nga ana e monitoruesit ndërkombëtar, belgut Teo Jacobs.

Sipas relacionit të lexuar para publikut të përbërë nga stafi i ngushtë i këshilltarëve të Markut, gyqtarë, përfaqësues të ambasadës amerikane dhe gazetarë, kryeprokurorja rezultonte kaluese në filtrin e pasurisë dhe të integritetit. Bashkë me bashkëshortin, ajo zotëronte dy apartamente 103 dhe 60 metër katrorë si edhe një shtesë 9 metër katrorë në proces legalizimi tek i dyti.

Por sita e Vettingut tek kryeprokurorja Marku u bë më e imët tek aftësitë e saj profesionale. Debat ngjalli një dosje e dikurshme, kur Marku si prokurore kishte kërkuar masën ekstreme të sigurisë “arrest në burg” për një qytetar që i kishte dhënë makinës në gjendje të dehur.

“Arta Marku mund të kishte arsyetuar se pse masa ‘arrest në burg’ ishte e nevojshme në këtë rast”, tha trupi gjykues.

Në këtë pikë këmnëguli edhe monitoruesi Teo Jacobs.

“Arta Marku duhet të ishte këtu. Jam i zhgënjyer nga mungesa e saj. Prisja një debat profesional me të. Nuk e shoh këtë si shenjë lidershipi. Unë nuk kam pyetje, por një koment mbi një rast që Marku ka kërkuar dy herë masën ‘arrest në burg’ për një person të ndaluar për shkelje të rregullave të qarkullimit rrugor, pasi kishte pirë pak më shumë raki. Nuk justifikoj veprën penale, por Arta Marku është e vjetër në detyrë. Ajo e di diferencën mes një çështjeje të rëndësishme apo jo. Kërkesa për burg duhet të jetë e argumentuar me rrezikshmërinë e veprës”.

Duke iu referuar përqindjes së lartë të personave të lënë në masën “arrest në burg”, Jacobs tha se Arta Marku duhet të ndryshojë mentalitetin e prokurorisë, të mendohen dy herë para se të kërkojnë arrest në burg. Avokatja e Markut tha se ishte dakord me komentet, por kaloi topin në tjetër fushë, duke thënë se vendimi përfundimtar në caktimin e masave i përket gjykatës.

KPK komentoi edhe ndryshimet e bëra nga Marku pas ardhjes së saj në detyrë për lëvizjen e disa prokurorëve të komanduar nën argumentin e ristrukturimit. Në komunikimet me KPK, Marku kishte pohuar se veprimet e saj ishin në zbatim të ligjit, por sipas Komisionit, ajo nuk kishte depozituar dokumentacion mbështetës dhe se nga janari e në vijim nuk kishte ndërmarrë asnjë hap për të bërë transparente vendimarrjet e saj në krye të organit të akuzës. Vendimi për Arta Markun do të merret të mërkurën./abcnews.al

ARTA-MARKU-KPK-1280x720.jpg
ent ela16:05 | 26/06/2018

Prokurorja e Përgjithshme e Përkohshme, Arta Marku, do të përballet javën e adhshme me një trupe gjykuese për t’iu nënshtruar vettingut. Komisioni i Pavarur i Kualifikimit ka caktuar datën 3 korrik për zhvillimin e seancës dëgjimore për kryueprokuroren Marku. Sipas njoftimit të KPK, trupa gjykuese që do të kalojë në kontroll pasurinë, figurën dhe aftësitë profesionale të Markut do të përbëhet nga Genta Tafa (Bungo), Pamela Qirko dhe Suela Zhegu. Arta Marku u zgjodh si kryeprokurore në 18 dhjetor 2017, pas përfundimit të mandatit të ish-kryeprokurorit, Adriatik Llalla. /abcnews.al

a12eaa96-2738-406d-83e7-1474c92b0a65.jpg
ent ela13:54 | 24/05/2018

Prokurori i Përgjithshëm i Shqipërisë znj.Arta Marku po merr pjesë në një takim të rëndësishëm rajonal në kryeqendrën e Kroacisë, Zagreb.

Në takim merr pjesë Prokurori i Përgjithshëm i Shteteve të Bashkuara të Amerikës, Jeff Sessions, Prokurorët e Përgjithshëm si dhe Drejtorët e Policive të gjashtë vendeve të Ballkanit Perëndimor.

Takimi rajonal zhvillohet në Akademinë e Policisë në Zagreb në datat 23-25 maj 2018 për luftën kundër krimit të organizuar ndërkombëtar.

kld.jpg
G. P.12:05 | 14/05/2018

Magjistratët e rinj i kanë drejtuar një letër KLD-së dhe Prokurores së Përgjithshme të Përkohshme, Arta Marku, përmes së cilës u kërkojnë këtyre institucioneve të ushtrojnë kompetencat kushtetuese për emërimin e tyre në detyrë.

Magjistratët e rinj bëjnë të ditur në letrën e tyre se në 30 Qershor, ata ndërpresin marrëdhënien me shkollën e magjistraturës.

Sipas ndryshimeve ligjore pas reformës në drejtësi, magjistratët duhet të emërohen nga  Këshilli i Lartë i Prokurorisë dhe Këshilli i Lartë Gjyqësor.

Por për shkak të vonesave të procesit të Vettingut për trupën e gjyqtarëve dhe prokurorëve, këto dy institucione të reja të sistemit të drejtësisë nuk janë ngritur ende./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono