Arta Marku

Gazment-Bardhi-1280x853.jpeg
G. P.15:49 | 05/09/2019

Sekretari i Përgjithshëm i PD-së, Gazment Bardhi ka akuzuar Prokuroren e Përgjithshme Arta Marku se ka gënjyer me deklaratën e saj se Posta nuk gjeti dot adresën e kryebashkiakut të Vorës, Agim Kajmaku për ta njoftuar se duhet të depozitojë shenjën e gishtërinjve. Në një dalje nga selia blu, numri dy i demokratëve theksoi se në një rast të paprecedentë, Posta Shqiptare e përgënjeshtroi Arta Markun.

Bardhi kujtoi se përmes këtij veprimi kryeprokurorja në detyrë e mbrojti Kajmakun nga ligji i dekriminalizimit, i cili parashikon që për personin që nuk jep shenjat e gishtërinjve 5 ditë nga marrja e njoftimit humbet menjëherë mandatin.

 “Arta Marku është kapur në flagrancë duke gënjyer shqiptarët dhe partnerët ndërkombëtarë për të mbrojtur kriminelin e Edi Ramës në Bashkinë e Vorës nga dhënia e gjurmëve të gishtërinjve. Në një rast të paprecedentë, Posta Shqiptare e përgënjeshtroi Arta Markun, e cila deklaroi dje se nuk i ka marrë shenjat e gishtërinjve të Agim Kajmakut, për shkak të postierit që nuk i ka gjetur adresën. Mashtrimi publik i Arta Markut për të mbrojtur kriminelin e Edi Ramës në Bashkinë e Vorës u provua si i tillë nga Posta e Tiranës, e cila ka deklaruar se ka të gjitha dokumentet që provojnë se Agim Kajmaku e ka marrë njoftimin për të dhënë gjurmët e gishtërinjve në datën 29 Gusht. Ka një arsye pse Arta Marku është detyruar të gënjejë publikisht për të justifikuar mosdorëzimin e gjurmëve të gishtërinjve të Agim Kajmakut. Sipas ligjit të dekriminalizimit, personi që nuk jep shenjat e gishtërinjve 5 ditë nga marrja e njoftimit, humbet menjëherë mandatin dhe shkarkohet nga funksioni shtetëror”, tha Bardhi.

Disa ditë më parë, PD publikoi dokumentet në të cilat sipas saj rezulton se Agim Kajmaku është arrestuar në Greqi për përdorim dhe shpërndarje të kartëmonedhave false./ABC News Albania 24/7

 

agim-kajmaku-2.jpg
G. P.14:11 | 27/08/2019

Sekretari i Përgjithshëm i PD, Gazment Bardhi ka paraqitur dokumente që sipas tij vërtetojnë se  kryebashkiaku socialist i Vorës, Agim Kajamaku është i njëjti person i arrestuar në Greqi nën identitetin Jorgo Toto për falsifikim parash. Bardhi i kërkoi organit të akuzës të mos zvarrisë verifikimin për kryebashkiakun e PS ndërkohë që informoi se demokratët kanë informuar ndërkombëtarët mbi shkeljet që po kryen prokuroria.

Pretendimeve të kryebashkiakut socialist të Vorës, Agim Kajmaku  se dënimi i një personi me emrin Jorgo Toto nuk e lidh drejtpërdrejtë me atë ngjarje, Partia Demokratike iu përgjigj me dokumente zyrtare. Numri dy i demokratëve, Gazment Bardhi publikoi kopjen autentike të pasaportës së Agim Kajmakut me emrin Jorgo Toto  për të vërtetuar se bëhet fjalë për të njëjtin person.

Gishtin e akuzës sekretari i Përgjithshëm i PD e drejtoi edhe te organi i akuzës, i cili edhe pse ka të gjithë mundësitë të marrë shenjat e gishtërinjve në sistem për shkak se ata posedojnë pasaporta biometrike, sipas demokratëve bën “show” duke thirrur vetë kryebashkiakët e PS.

Në dijeni për zvarritje të hetimeve janë vënë edhe ndërkombëtarët. Rasti i kryebashkiakut socialist të Vorës është denoncuar prej disa ditësh nga Partia Demokratike e cila ka paraqitur edhe dokumentet e dënimit të tij në Greqi për falsifikim në mungesë, dënim të cilin nuk e ka kryer pasi u largua nga shteti grek./ABC News Albania 24/7

PArtia-Demokratike.jpg
nev ila15:40 | 20/07/2019

Partia Demokratike ka kallëzuar në prokurori anëtarët e KQZ-së, komisionerët e PS dhe zyrtarë të lartë për krimet e kryera para, gjatë dhe pas 30 Qershorit.

Sipas PD, në padinë e tyre, kërkohet nga kryeprokurorja Arta Marku që të mos pengojë hetimet për krimet elektorale të 30 Qershorit.

Njoftimi i Partisë Demokratike:

Partia Demokratike i kërkoi Prokurores së Përgjithshme të Përkohshme, Arta Marku, të mos pengojë hetimet për krimet zgjedhore duke i shërbyer axhendës së saj personale për t’u emëruar Kryeprokurore dhe regjimit kriminal të Edi Ramës.

Nëpërmjet një letre të datës 12 Korrik, për të cilën është vënë në dijeni edhe shefja e Misionit të ODIHR, Audrey Glover, Sekretari i Përgjithshëm i PD, Gazment Bardhi, vë në dukje se organi i akuzës në Republikën e Shqipërisë, jo vetëm nuk po heton seriozisht dosjet e vjetra 184/2016 dhe 339/2017, por nuk ka nisur asnjë hetim për asnjë prej shkeljeve të rënda ligjore që u konstatuan gjatë procesit antikushtetues të 30 Qershorit.

Letra e numrit 2 të PD-së shpreh hapur mosbesimin e opozitës për PPP Arta Marku, për shkak të zgjedhjes së saj antikushtetuese nga qeveria e Edi Ramës.

Që prej emërimit tuaj antikushtetues si Prokurore e Përgjithshme e Përkohshme, kontrolli i qeverisë mbi prokurorinë është çimentuar, duke sjellë, njëkohësisht, çimentimin e kulturës së pandëshkueshmërisë ndaj zyrtarëve të lartë shtetërorë. Gjatë drejtimit tuaj, asnjë zyrtar i lartë i qeverisë, asnjë politikan, asnjë funksionar i lartë publik nuk ka dalë para drejtësisë për krimin e korrupsionit apo të krimeve zgjedhore, megjithëse denoncimet publike kanë qenë me qindra.” – thuhet në letrën e Sekretarit të Përgjithshëm të PD.

Duke akuzuar PPP Arta Marku se është bërë mburojë politike për krimet e qeverisë edhe me votimet e paligjshme dhe antikushtetuese të 30 Qershorit, PD rendit të gjitha shkeljet e ligjit, të vëna në dukje prej saj, nga media, misioni ODIHR-it para, gjatë dhe pas 30 Qershorit, si presioni ndaj punonjësve të administratës shtetërore, blerja e votave, mbushja e kutive të votimit, shkelja e ligjit dhe e Kushtetutës nga 4 anëtarë të Komisionit Qendror të Zgjedhjeve etj.

Të vetmit që nuk dëgjojnë dhe nuk shikojnë asgjë nga krimet e mësipërme janë prokurorët e Republikës, që duhet të ishin në krye të detyrës për të mbrojtur Kushtetutën dhe ligjet e vendit”, thuhet në letrën e Partisë Demokratike.

Për të treguar se deri ku shkon nënshtrimi i prokurorisë ndaj qeverisë, Sekretari i Përgjithshëm i PD-së, Gazment Bardhi, nxjerr në pah mosveprimet e prokurorisë për dosjet e krimeve zgjedhore dhe pasojat për vendin.

Mosveprimi i prokurorisë për krimet zgjedhore të partisë në pushtet është i përsëritur. Ai ka prodhuar pasoja të rënda për demokracinë, duke kaluar nga një masakër elektorale tek një tjetër. Në dijeninë tonë, deri tani, prokuroria nuk ka guxuar as të marrë në pyetje personat kryesorë të përfshirë në dosjet penale të krimeve elektorale të viteve 2016 apo 2017, si Edi Rama, Damian Gjiknuri, Ulsi Manja, Pjerin Ndreu etj”, thuhët në letër.

Megjithëse ka sjellë disa argumenta se PPP Arta Marku ka injoruar detyrimet e veta kushtetuese, PD nuk ka hequr dorë nga mundësia për ta vënë zonjën Marku para përgjegjësisë për të vepruar, duke i paraqitur, siç thuhet në letër, “disa indicie publike për krimet e reja zgjedhore.”.

Këto janë 7 pika kyçe që rrëzojnë si të paligjshëm 30 Qershorin.

  1. Moszbatimi i dekreteve të Presidentit me pasojë cenimin e të drejtës kushtetuese të qytetarëve për të zgjedhur.
  2. Regjistrimi i Bindjes Demokratike në kundërshtim me ligjin.

III. Cënimi i të drejtës së opozitës për të marrë pjesë në administrimin e zgjedhjeve

IIII. Mashtrimi dhe manipulimi me të dhënat e pjesëmarrjes në votimet e 30 Qershorit.

  1. Fletët e votimi “kontrabandë” për votimet në Bashkinë e Vaut të Dejës.
  2. Emërimi i komisionerëve në kundërshtim me ligjin nga ana e KQZ.

VII. Krimet zgjedhore në të gjithë territorin: blerja e votave, fshehtësia e votës, presioni në administratë etj.

Të gjitha këto indicie janë të shpjeguara me detaje për shkeljet ligjore të konsumuara gjatë, para dhe pas 30 Qershorit. Ato përfshijnë 9 vepra penale dhe të gjitha bashkë dënohen nga 31-45 vjet burg.

  1. Shpërdorimi i detyrës
  2. Fallsifikimi i materialit zgjedhor dhe rezultateve të zgjedhjeve
  3. Shkelja e fshehtësisë së votimit
  4. Votimi më shumë se 1 herë ose pa u identifikuar
  5. Korrupsioni aktiv në zgjedhje
  6. Përdorimi i funksionit publik për veprimtari politike ose zgjedhore
  7. Kanosja apo dhunimi ndaj pjesëmarrësve në zgjedhje
  8. Marrja ose përdorimi i paligjshëm i dokumenteve të identifikimit

Në letrën për PPP Arta Marku, Sekretari i Përgjithshëm i Partisë Demokratike, Gazment Bardhi, e identifikon atë si një mekanizëm frike që përdoret nga pushteti kundër prokurorëve për të mos hetuar krimet zgjedhore dhe krimet e tjera të qeverisë Rama.

Ju, jeni provuar në mënyrë të vijueshme, si zyrtari publik që, për llogari të pushtetit të shefit tuaj politik, Edi Rama, ushtroni presion të paligjshëm nëpërmjet transferimeve të paligjshme, vlerësimeve negative profesionale për efekt të vettingut, inspektimeve disiplinore etj. në mënyrë që prokurorët t’i binden urdhrave dhe porosive të paligjshme”, vëren në letër zoti Bardhi për t’i shpjeguar PPP Arta Marku përse kërkesa për lejimin e hetimeve po i adresohej asaj.

Në letrën dërguar për dijeni edhe shefes së Misionit të ODIHR-it, Sekretari i Përgjithshëm i Partisë Demokratike, Gazment Bardhi, nxit PPP Arta Marku t’i shërbejë interesit publik dhe axhendës europiane të vendit përpara axhendës së saj personale, duke I dhënë fund pandëshkueshmërisë së atyre që kanë shkatërruar zgjedhjet.

Është koha që ambicia juaj për t’u emëruar Prokurore e Përgjithshme me ndihmën e Edi Ramës të mos pengojë hetimin e krimeve zgjedhore të partisë në pushtet, të korrupsionit të qeverisë së Edi Ramës dhe të krimit të organizuar me lidhje qeveritare”, mbyllet letra e Sekretarit të Përgjithshëm të PD, Gazmet Bardhi./abcnews.al

arta-marku.jpg
ent ela10:45 | 25/06/2019

Të gjithë prokurorët dhe oficerët e policisë gjyqësore do të jenë në terren para dhe pas zgjedhjeve të 30 qershorit. Udhëzimi i firmosur nga kryeprokurorja e përkohshme Arta Marku, mban datën 21 qershor dhe vjen në zbatim të një memorandum të firmosur mes organit qendror të akuzës dhe komisionit qendror të zgjedhjeve.

Qëllimi i këtij udhëzimi është identifikimi i krimeve zgjedhore dhe pa ashtu edhe verifikimi i integritetit të kandidatëve.

Përmes këtij udhëzimi, Marku i lë detyrë drejtuesve të prokurorive që të nxjerrin në gatishmëri prokurorët dhe oficerët e policisë gjyqësore nga ora 7 e mëngjesit deri në 10 të darkës. Por edhe pas orës 22:00 ata do të komunikojë me sallën operative të policisë. /ABC news Albania 24/7

arta-marku.jpg
G. P.13:41 | 20/06/2019

Ndryshe nga deklaratat e shumë politikanëve se përgjimet janë indicie, prokurorja e përgjithshme e përkohshme Arta Marku sqaron se nuk janë të tilla, por mjet në kërkim të provës. Në raportimin e punës së organit të akuzës në seancën plenare, kryeprokurorja e përkohshme u shpreh se ka ardhur koha që këto çështje të zgjidhen.

Tani është momenti që të pastrohen nga pluhurat dosjet 339 dhe 184. Në këtë përfundim ka arritur kryeprokurorja e përkohshme Arta Marku pasi i bën edhe kronologjinë e rrjedhjes së ngjarjeve.

Janë dy çështje që janë regjistruar të dyja në vitin 2016. Nga viti 2016 deri në fund të shtatorit 2018 të vetmet veprime të kryera kanë qenë përgjimet. Ka pasur vetëm transkripto bisedash dhe numrash sporadikë.

Në fund të shtatorit 2018 për të dyja çështjet janë caktuar prokurorë të tjerë. U është kushtuar e gjithë rëndësia e duhur dhe për 339 është caktuar një grup prej 3 prokurorësh dhe 11 oficerësh policisë gjyqësore. 339 në momentin që është marrë nga prokurorët e tjerë ka pasur 7074 CD dhe DVD të patranskriptuara. Aktualisht pas 9 muajsh janë transkriptuar pothuajse të gjitha CD-të. Janë regjistruar 74 emra personash si persona nën hetim, janë dërguar për gjykim shumë prej tyre dhe 12 janë dërguar sëfundmi. Jam dakord me të gjithë ata që mendojnë se këto çështje duhen zgjidhur, ka ardhur momenti që të zgjidhen”.

Zgjidhjen e kërkon edhe për prokurorët që i kanë nxjerrë nga sirtarët e organit të akuzës.

Për nxjerrjen e sekretit po hetohet aktualisht nga Prokuroria e Krimeve të rënda.

Në të njëjtën çështje me 339-n. Nisja e çështjes nuk është bërë pse dolën sekretet dhe përbënte problem nxjerrja e atyre të dhënave. Nisja e çështjes është bërë pasi nxjerrja e sekretit nga oficerët e policisë gjyqësore përbën vepër penale dhe kjo nuk mund të anashkalohet.

E ftuar në këtë seancë parlamentare për të  prezantuar raportin e prokurorisë për vitin 2018, Prokurores së Përgjithshme të Përkohshme i duhet të përballej edhe me komentet e opozitës së re.

“Përgjimet nuk janë as indicie, por janë një mjet për kërkimin e provës”, tha Marku./ABC News Albania 24/7

arta.jpg
G. P.11:28 | 20/06/2019

Kryeprokurorja e përkohshme, Arta Marku, deklaroi këtë të enjte se qarqet Fier dhe Durrës kanë rritjen më të lartë për vitin 2018 sa i përket tendencës së kriminalitetit. Marku paraqiti në seancën plenare raportin vjetor të Prokurorisë së Përgjithshme për vitin e kaluar.

Prokurorja e Përgjithshme e Përkohshme theksoi se numrin më të lartë të procedimeve në vend e ka pasur Prokuroria e Shkallës së Parë Tiranë. Ndërkohë vepra penale me numrin më të lartë të procedimeve është ajo e vjedhjes.

“I janë dërguar gjykatës 570 kërkesa për miratimin e marrëveshjes së fajësisë. Edhe kjo shifër është në rritje të ndjeshme krahasuar një vit më parë. Janë dërguar në gjykatë për pushim 2605 çështje. Numrin më të lartë të procedimeve në shkallë vendi e ka regjistruar Prokuroria e Shkallës së Parë Tiranë. Sa i përket tendencës së kriminalitetit vërehet se rritjen më të lartë për vitin 2018 e ka qarku Durrës dhe Fier. Vepra penale me numrin më të lartë të procedimeve të regjistruara është ajo e vjedhjes së pasurisë, por duhet thënë që ka një ulje të lehtë krahasuar me vitin 2017. Gjatë gjithë aktivitetit të saj prokuroria shqiptare ka patur si qëllim të përmbushë rekomandimet e dhëna nga Kuvendi i Shqipërisë për vitin 2018 dhe po kështu rekomandimet e Këshillit të Ministrave për luftën ndaj kriminalitetit. Rekomandimet e dhënë nga Kuvendi janë përkthyer në një plan të mirëfilltë veprimi dhe i janë dërguar çdo prokurorie për ta mbajtur parasysh gjatë aktivitetit”, tha Arta Marku.

Për sa i përket këtij plani, Marku theksoi se janë kryer më shumë se në vitin 2017 hetime proaktive. Për sa i përket veprës penale të korrupsionit, në vitin 2018 numrin më të lartë të procedimeve e zë vepra penale e korrupsionit pasiv të personave që ushtrojnë funksione publike. Edhe për këtë rast procedimet janë rritur krahasuar me 2017-n sipas Markut.

“Është rekomanduar rritja e numrit të hetimeve në tërësi dhe në veçanti e hetimeve joaktive kundër krimit të organizuar dhe korrupsionit. Rezulton se gjatë vitit 2018 janë kryer hetime proaktive dhe me përdorim të teknikave të posaçme të hetimeve në kuadër të 93 procedimeve penale. Krahasuar me vitin 2017 shifra është në rritje. Kjo veprimtari ka shërbyer në ndalimin e 73 personave si të dyshuar në kryerjen e veprave penale të korrupsionit dhe shpërdorimit të detyrës. Numrin më të lartë të procedimeve të regjistruara për veprat penale të korrupsionit në vitin 2018 e zë vepra penale e korrupsionit pasiv të personave që ushtrojnë funksione publike. Procedimet për këtë vepër janë rritur nga 61 për vitin 2017 në 74 procedime për vitin 2018”, tha Arta Marku./abcnews.al

ARTA-MARKU-MBULIM-ABC-M4-T2.mpg_snapshot_00.01-1280x720.jpg
ent ela10:18 | 17/06/2019

Prokurorja e Përgjithshme e Përkohëshme Arta Marku nuk do të marrë pjesë sot në parlament për të folur për analizën vjetore. Marku ishte thirrur për të bërë publike analizën vjetore të organit të akuzës të drejtuar prej saj.

Vetëm pak orë para se të niset seanca parlamentare Marku e ka anulluar pjesëmarrjen e saj duke dërguar edhe një raport shëndetësorë. Burime nga Prokuroria e Përgjithshme bënë me dije për ABC News që Arta Marku do të jetë të Enjten në parlament për të relatuar para deputetëve, analizën vjetore.

Nga ana tjetër Këshilli i Lartë i Prokurorisë në orën 13:00 ka lajmëruar mbledhjen e radhës ku do të shqyrtojë dokumentet e dorëzuar nga kandidatët dokumentacionin e mbërritur për ta nga institucionet përkatëse për verifikimin e plotësimin e kushteve ligjore të 4 personave që kandidojnë për Prokuror të Përgjithshëm.

Fakti që Marku braktisi parlamentin a mos ka të bëj me mbledhjen e KLP, ku sot pritet që të vendoset dhe renditja përfundimtare e 4 kandidatëve që më pas do t’i kalojnë Parlamentit. /ABC News Albania 24/7

seanca-kuvendi.jpg
G. P.20:34 | 16/06/2019

Këtë të hënë Kuvendi do të mblidhet në një seancë të ngjeshur plenare.

Sipas rendit të ditës, pas miratimit të procesverbalit të seancës së kaluar plenare, gjatë së cilës mazhoranca dhe opozita votuan rezolutën e Partisë Socialiste ku ishin paraqitur argumentet pse ishte antikushtetues dekreti i kreut të shtetit për anulimin e zgjedhjeve të 30 Qershorit do të ketë dy raportime vjetore dhe diskutime për një sërë projektligjesh.

Në seancën e së hënës është parashikuar dhe raportimi vjetor për 2018-n i Prokurores së Përgjithshme të Përkohshme Arta Marku si dhe raportimi vjetori i Inspektoratit të Lartë të Deklarimit dhe Kontrollit të Pasurive dhe Konfliktit të lnteresave për vitin 2018.

Po gjatë seancës së të hënës pritet që të diskutohen disa shtesa dhe ndryshime ne ligjin për regjistrimin e biznesit, disa shtesa në ligjin për procedurat tatimore, disa ndryshime dhe shtesa në ligjin për masat kundër financimit të terrorizmit si dhe në atë për parandalimin e pastrimit të parave dhe financimit të terrorizmit. /abcnews.al

ARTA-MARKU-NE-KOMISION.mpg_snapshot_00.18-1280x720.jpg
ent ela14:45 | 27/05/2019

Zbardhja e 700 CD-ve të Dosjes 339 po ecën me ritme të shpejta. Kështu i është përgjigjur interesimit të deputetit të grupimit demokratik Myslim Murrizi kryeprokurorja në detyrë Arta Marku pas prezantimit  përpara Komisionit të Ligjeve të raportit të Prokurorisë për vitin 2018.

Zbardhjen e Dosjes 339 nuk e kërkon vetëm opozita jashtë parlamentit por ajo Brenda institucionit. Është deputeti Myslim Murrizi që kërkon një përgjigje nga kryeprokurorja në detyrë Arta Marku për 700 CD e përgjimeve që nuk janë transkriptuar.

“700 CD e përgjimeve. Janë përgjuar prej vitesh thotë. Janë përgjuar kot për qejf këta. Është kthyer në call center prokuroria.Po bëjnë videoklip këta? Çfarë është kjo gallatë që harxhohen pare nga taksat e shqiptarëve. A ndiheni përgjegjëse për një anëtar të KLP që rezulton bashkëpunëtor i sigurimit me emrin Venusi, se ka vajt me firmën tuaj?”

Prokurorja e përgjithshme në detyrë Arta Marku pranon se nuk janë zbardhur 700 CD , një çështje e referuar që në vitin 2016 tha ajo.

“Për 700 CD e pazbardhura, janë shumë është e vërtetë. Kam ndërhyrë sipas komptencave. Kjo çështje është referuar që në vitin 2016. Vetëm në vitin 2018, është parë kjo problematikë e përgjimeve të pazbardhura. Duket numri i lartë po është normal duke marrë parasysh volumin e çështjes. Janë dy prokurorë dhe 11 oficerë të policisë gjyqësore që po merren me këtë. Po ecet me ritme të shpejta. Për një pjesë të të pandehurve është ndarë çështja, s’ka lidhje me zgjedhjet, por me trafikimin e narkotikëve, në këtë pikë është edhe dosja 184”.

Këto përgjigje kryeprokurorja në detyrë i dha pas prezantimit përpara Komisionit të Ligjeve të raportit të Prokurorisë për vitin 2018, vit në të cilin janë ndarë edhe pasojat e vettingut tek radhët e prokurorëve tha ajo.

“2018 ka qenë një vit jo i zakonshëm për shkak të Vettingut. Janë bërë shumë shkarkime prokuroresh prandaj kanë qenë pak apatike sepse ky proces i ka bërë të pasigurtë”.

Prokuroria e përgjithshme ka bërë dhe matjen koeficientit të kriminalitetit në vend. Përfundimet kanë nxjerrë Vlorën si qarkun me numrin më të lartë të veprave penale për numër banorësh dhe Dibrën si qarkun me shifrat më të ulëta të rekordeve kriminale. /ABC News Albania 24/7

 

kryeministria-1.jpg
G. P.10:38 | 12/05/2019

Një ditë pas protestës së opozitës, kryeprokurorja e Përkohshme e Përgjithshme, Arta Marku ka mbërritur në Kryeministri. Ajo ka shkuar në godinën e qeverisë rreth orës 9:00. Nuk dihet ende arsyeja e kësaj vizite.

Të shtunën, opozita e bashkuar zhvilloi protestën e saj kombëtare. Tubimi u ndal në tre pika Kryeministri, Parlament dhe Drejtoria e Policisë së Tiranës. Që prej nisjes së saj, protesta u shoqërua me tensione.

Protestues të ndryshëm hodhën molotov dhe flakadanë në drejtim të godinës së qeverisë dhe për pasojë dera hyrëse e saj u përfshi nga flakët. Gjithashtu edhe pas zhvendosjes tek Kuvendi, tubuesit hodhën molotov, flakadanë dhe fishekzjarre. E njëjta skenë u përsërit edhe tek Drejtoria e Policisë së Tiranës.

Ndërkohë nga ana tjetër, policia është kundërpërgjigjur me gaz lotsjellës dhe ujë me presion./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono