Armand Duka

duka.jpg
G. P.12:40 | 18/06/2019

Stadiumi i ri kombëtar mund të mos përfundojë as në shtator. Vetë presidenti i Federatës Shqiptare të Futbollit, Armand Duka, shprehu dyshime për mbylljen në kohë të punimeve.

Afatet janë shkelur, dhe fundi ende nuk dihet. “Arena Kombëtare”, stadiumi i ri dhe modern në Tiranë, mund të mos shijohet nga ekipi përfaqësues dhe nga tifozët as në muajin Shtator.

I menduar fillimisht për t’u bërë gati shumë muaj më parë, impianti nuk mundi të përfundonte as në fund të vitit të kaluar, dhe as në Qershor, siç e kërkoi me ngulm kryeministri Rama, në përpjekje për të pasur një sukses sportiv në fushatën zgjedhore.

Shtatori u dha si koha e re e mbylljes së punimeve, dhe këtë gjë e komentoi presidenti i Federatës Shqiptare të Futbollit, Armand Duka.

“Shumë kush e sheh gjysmë plot dhe gjysmë bosh për çka i përket termave kohorë për Shtatorin. Ne i kemi vënë objektiv kompanisë që duam të luajmë në Shtator dhe me të vërtetë e kemi shumë të domosdoshme të luajmë në Shtator në këtë stadium jo vetëm sepse duam ta shijojmë stadiumin e ri, duam të kemi kushte sa më të mira për spektatorin, por duam të arrijmë më shumë rezultat në praninë e më shumë spektatorëve dhe me një atmosferë akoma më të mirë. Kështu që do bëjmë të gjitha përpjekjet dhe kompania gjithashtu po bën të gjitha përpjekjet, por nuk mund të jemi shumë të sigurt për Shtatorin”, tha ai.

Nëse nuk arrihet shtatori, atëherë shpresohet që stadiumi të mund të presë ndeshjen kryesore të grupit tonë eliminator në Euro 2020, atë ndaj Francës. Duka vizitoi Arenën në krah të presidentit të Federatës Çeke të Futbollit, Martin Malik, i cili erdhi në Shqipëri me ftesë pikërisht të palës shqiptare. Së bashku, ata vizituan më pas edhe zyrat e reja të Federatës Shqiptare, që po ndërtohen në ish-kompleksin Dinamo./ABC News Albania 24/7

duka-1-1280x717.jpg
Sej rie22:30 | 26/05/2019

Titulli i Partizanit ishte plotësisht i merituar sepse klubi kryeqytetas këtë vit ishte i qetë me vetveten. Ky ishte komenti i presidentit të Federatës Shqiptarë të Futbollit, Armand Duka, pas dorëzimit të trofeut.

Kënaqësia duhet të ketë qenë vërtet e madhe.

Titulli i Partizanit nuk u shoqërua aspak nga akuzat dhe dyshimet thuajse të përhershme për rolin e Federatës Shqiptare të Futbollit, diçka që me siguri I ka pëlqyer kreut të saj.

Armand Duka doli i qetë nga stadiumi “Selman Stërmasi”, ku të kuqve sapo u ishte dorëzuar kupa, dhe bëri këtë vlerësim.

Duka: “Matematikisht ishte i siguruar Partizani dhe kishte ndeshje në shtëpi. Dëshira e tifozëve dhe klubit ishte që ceremonia të bëhej sot dhe nuk ishte sepse të prishej kjo festë kaq e bukur. Partizani e ka merituar këtë titull. Faktikisht urimin ia kemi bërë më parë, por zyrtarisht kupën ia kemi dorëzuar sot. E ka merituar sepse ka udhëhequr me meritë gjithë kampionatin dhe pothuajse në çdo javë ka qenë i pari në klasifikim”.  

Normal që presidenti duhej të ngacmohej për faktin se Partizani sikur ishte më i qetë ndaj Federatës këtë vit.

Duka: “Ka qenë i qetë me veten e vet, ka qenë i qetë me rezultatet. Në fakt qetësia psikologjike të ndihmon q ëtë arrish rezultatin, në rastin kur gabimin e kërkon tek vetja dhe jo tek të tjerët mendoj që korrigjon më mirë. Të gjithë e kanë merituar dhe e kam uruar dhe e komplimentoj për çfarë ka bërë Partizani në këtë garë”.

Edhe arbitrat nuk u akuzuan aq shumë këtë sezon, të paktën në luftën për kreun.

Duka: “Jo vetëm që jam në këtë pozicion, por mendoj se në çdo kohë çdo gjë shkon në vendin e vet. Çdokush merr atë që kontribuon në kampionat, aq sa luan pavarësisht se gjatë një gare me 36 javë gabimet janë të natyrshme, nga të gjithë palët, si lojtarët, trajnerët dhe arbitrat. E kam thënë gjithmonë se niveli i gjykimit dhe niveli i futbollit kanë shoqëruar njëri tjetrin. Për mua të dyja janë në rritje”./ABC News Albania 24/7

reja-1.jpg
G. P.12:06 | 15/04/2019

Edi Reja është fare pranë zyrtarizimit si trajner i kombëtares shqiptare. Me italianin është arritur marrëveshje për kontratën, por presidenti i Federatës, Duka, do të bisedojë edhe një herë me kandidatët e tjerë

Në stol do të ulet pikërisht ai. Edi Reja, trajneri i njohur nga Italia, do të jetë drejtuesi i ri i kombëtares shqiptare, ndonëse zyrtarizim nuk ka ende.

Presidenti i Federatës Shqiptare të Futbollit, Armand Duka, deklaroi se ende nuk ka një marrëveshje, veçse burime fare pranë tij bëjnë me dijë se tashmë mungon shumë pak nga finalizimi, besohet vetëm 2-3 ditë.

Sipas këtyre burimeve, presidenti diskutoi në mbledhjen e Komitetit Ekzekutiv, këtë fillim jave, pikërisht çështjen e trajnerit duke u shprehur se me Rejën është arritur marrëveshje totale.

Duka u shpreh se do të diskutojë edhe një herë me 2-3 kandidaturat e tjera, përpara sesa të marrë vendimin përfundimtar, ndërsa problemi kryesor me të tjerët, siç është Xakeroni, mbetet çështja financiare, pasi pretendimet e tyre janë më shumë sesa përballon buxheti i Federatës.

Reja ka rënë dakord për pagesën që kishte paraardhësi i tij, Kristian Panuçi, që besohet se është 250 000 euro, plus pagesa e stafit.

Po ashtu, trajneri italian ka pranuar të firmosë një kontratë deri në nëntor, pra në fund të eleminatoreve të Europianit, me të drejtë rinovimi për një edicion tjetër.

Tekniku 73-vjeçar do të jetë i treti italian radhazi në stolin e Shqipërisë, pas Gianni De Biasit që erdhi në Dhjetor 2010 dhe Kristian Panuçit që firmosi në Korrik 2017.

Reja ka një karrierë të pasur, ku ka arritur suksese të rëndësishme me Napolin apo Lazion, duke qenë një nga trajnerët më të dashur për tifozët.

panuci-2-1280x853.jpg
G. P.16:30 | 23/03/2019

Largimi i Kristian Panuçit nga stoli i Shqipërisë mund të quhet një ikje e paralajmëruar. Presidenti Duka kërkoi informacion për fjalët e trajnerit në konferencën për shtyp, përpara se të merrte vendimin.

Ishte ora 09.00 e mëngjesit të kësaj të shtune, kur Armand Duka vendosi të tregonte vendimin e tij. Një telefonatë e presidentit në Federatë njoftoi se Kristian Panuçi nuk do të jetë më trajner i kombëtares shqiptare.

Kishin kaluar vetëm 10 orë nga disfata e hidhur me Turqinë dhe Dukës i ishte mundur mendja plotësisht se nuk mund të vazhdohej me italianin. Ai u mendua në stadiumin “Loro Boriçi” të Shkodrës, ku qëndroi deri në orën 01:30 të natës, në shoqëri të Sekretarit të Përgjithshëm të FSHF-së, Shulku.

Në impiantin shkodran, ai dha edhe porosinë që t’i përgatitej një përmbledhje e fjalëve të Panuçit në konferencën për shtyp pas Turqisë. Padyshim, që mësoi se trajneri lëshoi shprehjen e rëndë për shqiptarët si “popull cirku”.

Kjo duket, ishte pika që derdhi gotën. Edhe në të kaluarën, Panuçi kishte lëshuar shprehje të shumta “me spec”, si ndaj lojtarëve, ashtu edhe ndaj paraardhësit të tij, Xhani De Biazi.

Gjithsesi, pyetja më normale mbetet, përse Duka nuk e shkarkoi trajnerin pas katastrofës me Skocinë?

Ndoshta, kishte ende besim se ai mund ta ndryshonte situatën, nëse nuk do të kishte dëmtime, ose ndoshta sepse nuk mundi të gjente në atë kohë një alternativë të besueshme. ABC News njoftoi nëntorin e kaluar, se presidenti kishte pasur kontakte me trajnerë italianë e kroatë, po ashtu se një trajner shqiptar mund të kishte qenë zgjidhje e përkohshme.

Federata doli me përgënjeshtrim në atë kohë, ndërsa tani pritet emri i trajnerit të ri.Vetë Duka, i pyetur në linjë telefonike, nëse tekniku i ardhshëm do të jetë i huaj apo shqiptar, u përgjigj shkurt: Do të jetë trajner!

Prania e teknikut italian, Edoardo Reja, në stadium, nuk mund të ishte një tregues, pasi ai ishte në rolin e vëzhguesit të lojtarëve, jo kandidaturë për stolin kuqezi.

Sa për Panuçin, ai mbylli ndoshta etapën më të vështirë të karrierës së tij në futboll, si lojtar apo në stol. I ardhur me shpresa të mëdha për të vazhduar aty ku e la De Biazi, nuk mundi të kishte rezultatet me vete.

Në 2018 e 2019, pësoi 7 humbje e arriti dy fitore në 9 ndeshje, me golaverazhin 3 gola të shënuar e 18 të pësuar. Rezultatet duket se ishin thjesht tregues i asaj që ndodhte në skuadër, pasi burime pranë kombëtares tregojnë për nerva dhe ofendime të lojtarëve nga ana e trajnerit, diçka që mund të ketë prishur përfundimisht harmoninë në ekip.

De Biazi u largua i ngritur në qiell nga Federata, qeveria shqiptare, por edhe Ambasada e Italisë në Tiranë. Panuçi, në të kundërt, iku me nerva të shkatërruara duke u grindur me gazetarët në korridorin e “Loro Boriçit”./abcnews.al

armand-duka.jpg
G. P.18:48 | 18/03/2019

Disiplina në kombëtare është mbi gjithçka. Presidenti i Federatës, Armand Duka, flet pas përjashtimit të portierit Tomas Strakosha për ndeshjet e Europianit.

E di shumë mirë se çfarë përfaqëson ky lojtar. Armand Duka e ka të qartë se çfarë humbet ekipin përfaqësues pa Tomas Strakoshës, por gjithsesi, një drejtues duhet të dijë të bëjë vlerësimin e duhur.

Presidenti i Federatës Shqiptare të Futbollit nuk ngurroi të tregonte se çfarë qëndrimi do të mbajë pas përjashtimit të portierit nga trajneri Kristian Panuçi, për ndeshjet e Europianit ndaj Turqisë dhe Andorrës.

“Më vjen keq në fakt për portierin e kombëtares Strakosha. Është një nga lojtarët më të rëndësishëm, më kualitativ të skuadrës, por edhe disiplina është një lojtar akoma më i rëndësishëm për skuadrën. Nga kontaktet që kam pa me trajnerin nuk ka pasur arsye objektive nga portieri për të munguar”, tha Duka.

Duka u shpreh se ekipi i duket mirë, por pati një vërejtje në prag të eleminatoreve.

“Brenda nesh çdo gjë po përgatitet mirë, por në fakt atmosferë për një ndeshje eliminatore kaq shumë të rëndësishme sa është nuk është se e ndiej. Nuk e di pse. Në ambientin përreth ndoshta nuk ka shumë interes”, tha  Duka.

Një shqetësim i madh u ngrit pas ndeshjes së Fushë-Krujës, mes Kastriotit dhe Tiranës.

“Me gjithë respektin për trajneri e Tiranës Ard Mema, që është një personazh shumë i rëndësishëm i futbollit tonë, gaboi që hyri në fushë. Ishte i dënuar me karton të kuq dhe normalisht nuk duhet të hynte në fushë. Unë jam shumë i sigurt që Ard Mema nuk do shkonte me godit arbitrin, por gjithsesi rregullorja të ndalon. Nuk ishte dhunë në fushë, por thjesht ndërhyrje për të eliminuar atë që quhet dhunë”, tha Duka./abcnews.al

duka.jpg
G. P.23:23 | 07/03/2019

Kryeministri i vendit Edi Rama dhe Presidenti i Federatës Shqiptare të Futbollit, Armand Duka kanë zhvilluar pasditen e së enjtes një takim mes tyre për zgjidhjen e problematikës së sigurisë në stadiume, që ka sjellë ngërç në futbollin shqiptar.

Kryeministri i ka shprehur kreut të FSHF-së gadishmërinë e tij për të adresuar të gjithë problematikën, me qëllim rikthimin në normalitetit të sportit më popullor të shqiptarëve.

Ditën e hënë pritet të zhvillohet një tryezë e përbashkët me të gjithë aktorët, e drejtuar nga vetë kreu i qeverisë për të gjetur rrugëzgjidhjet në rikthimin e sigurisë në stadiume, parandalimin e dhunës dhe mbarëvajtjen normale të kampionatit.

Tv Klan

armand-duka.jpg
G. P.19:24 | 11/02/2019

Presidenti i Federatës Shqiptare të Futbollit, Armand Duka, flet për ABC News pas zgjedhjes në Komitetin Ekzekutiv të UEFA-s. Ai tregon strategjinë e përdorur, ndërsa bën kritika për qeverinë dhe paralajmëron klubet e Superligës.

Misionin në UEFA e përfundoi, ndonëse sfidat vazhdojnë. Armand Duka është padyshim krenar dhe i lumtur që u zgjodh në forumin më të lartë të futbollit europian, pas një gare e cila, siç thotë edhe vetë e lodhi jo pak. Pasi bëri nxemjen dy vjet më parë, duke mos ia dalë, cila ishte strategjia fituese?

“Para se të shkoj me ia thënë votuesve ia kam bërë këtë pyetje vetes. Ia kam bërë këtë pyetje disa njerëzve të mi rreth e rrotull. Më thuaj tre arsye pse njerëzit duhet të më votojnë mua dhe me këto tre arsye që unë kam menduar që pse duhet të më votojnë kam shkuar dhe kam kërkuar që të më mbështesin. Tre arsyet që kam kërkuar të jem: eskperienca që unë kam në drejtimin e FSHF dhe duke qenë anëtar dhe drejtues në disa komisione në UEFA dhe në FIFA. Europa përbëhet nga shumë vende dhe ka nevojë Komiteti Ekzekutiv që të ketë në përbërjen e tij përfaqësuesin e një vendi specifik apo të vogël”, tha Duka.

Duka nuk flet për ndarje politike, por e qartë që pati një mbështetje në Perëndim, dhe një kundërshti në Lindje.

“Mbështetja ime ka qenë nga të gjitha rajonet, kryesisht nga Europa Qendrore. Të gjithë vendet e mëdha, duke filluar nga Anglia, Gjermania, Italia, Franca, Spanja, Austria, Hungaria, Polonia, vendet nordike më kanë mbështetur pothujse të gjithë. Vendet nga ish-Bashkimi Sovjetik kanë pasur një lloj skepticizmi ndofta dhe sepse nuk e njohin shumë mirë Shqipërinë, nuk e njohin shumë mirë realitetin”, u shpreh kreu i FSHF-së.

Ndryshe nga sa pritej, Ballkani ishte pozitiv me kandidatin shqiptar, madje edhe Serbia.

“Ky nuk është votim politik, është votim sportiv. Marrëdhëniet me të gjitha federatat janë korrekte. Luajmë kundër njëri-tjetrit. Hyjmë në fushë që të fitojmë kundër njëri-tjetrit. Ka një lloj solidariteti dhe vendet e rajonit në përgjithësi kanë qenë pozitive, e kanë mbështet kandidaturën time”, tha Duka.

Pritet që Shqipëria të fitojë më shumë përkrahje pas zgjedhjes së Dukës, por presidenti e sheh ndryshe.

“Shqipëria nuk ka vuajtur në realizimin e projekteve të veta nëpërmjet FIFA-s apo UEFA-s. Kjo ka qenë dhe arsyeja pse është mbështet kandidatura e Shqipërisë sepse një vend si Shqipëria, të paktën vetëm me dy projektet e mëdha të vitit 2019, stadiumin e Tiranës dhe zyrat, pothuajse asnjë federatë nuk ka finalizuar projekte të tilla. Nuk është ky qëllimi i anëtarësimit në Komitetin Ekzekutiv. Qëlli është për të kontribuar bashkarisht për të tërën”, tha ai.

Armand Duka duhet të ketë një ekzistencë të dyfishtë, në UEFA dhe në realitetin shqiptar.

“Të qenit pjesë e një organizate shumë të rëndësishme si UEFa apo FIFA, pjesa e të qenit anëtar i një komuniteti europian apo botëror i futbollit është patjetër pjesa e kënaqësisë, pjesa e lumturisë e të qenit president i Federatës së Futbollit. Pjesa e menaxhimit të brendshëm të garave, e probleme, e pengesave, policia, arbitri, ankesa, kontestime është pjesa e halleve të mëdha”, tha presidenti i FSHF-së.

Problemet e futbollit Duka i sheh tek indiferenca e aktorëve, si qeveria, parlamenti, drejtësia apo policia. Vlerëson investimet e kryeministrit Rama, por i quan spordike, pa strategji.

“Klubeve dhe Federata kanë një investim Zero. Investime pothuajse përveç këtyre që thamë Zero. Qeveria të marrë një vendim dhe të thotë do të financojmë 200 fusha futbolli në Shqipëri. Kush i dëgjon mund t’i duken shumë, por janë pak. Tirana që vërtetë luajnë futboll të gjithë fëmijët që duan të luajnë futboll, ka nevojë për 100 fusha futbolli. Është e vështirë për hapësirat, por duhet t’i gjejmë dhe to, por buxheti qoftë i Bashkisë së Tiranës, qoftë dhe i qeverisë nuk është se varfërohet për kaq pak para për një sport që shqiptarët e dashurojnë shumë”, tha Duka.

Duka risjell një propozim të harruar të vitit 2013.

“Kur Rama do vinte në qeveri u mendua, madje mbaj mend që Fidel Ylli bëri fushatë me këtë që do kishte Ministri Sporti, e cila do mendonte për sportin dhe realisht kur ka një ministri, kur ka një administratë, e cila bashkon dhe mbledh grupet e interesit dhe prodhon vërtetë strategjira dhe politika të pakteave fiskale që ndihmojnë sportin, gjërat nëse nuk realizohen 100% do realizohen 50”, tha ai.

Problemi tjetër i madh është ai ligjor.

“Tek ne ka një ligj që është qesharak. Më duket se është i ’94-s. Është pakësuar. Kanë lindur herë pas here iniciativa të cilat shuhen shpejt. Iniciativë të cilën e kemi marrë dhe ne. E kemi propozuar një herë një paketë fiskale që shkuam ta mbronim dhe në komision parlamentar dhe çuditërisht ca njerëz të sportit brenda komisionit i dolën kundra dhe u shua dhe ajo”, u shpreh Duka.

Duka vlerëson se Shqipëria duhet të marrë shembull nga Kosova.

“Politika kosovare e mështet sportin më shumë se politika shqiptare. Në mënyrë strategjike dhe jo në mënyrë spontane. Buxhetet që ka Kosova qoftë dhe buxhetet për financimin e sporteve janë 10 ose 20 herë më të mëdha se Shqipëria. Ajo paketë fiskale që për mua nuk është e plotë dhe që ka duhet të jetë dhe më e mirë e Kosovës”, tha ai.

Maksimumi, sipas tij, do të ishte përvoja hungareze.

“Hungaria i detyron kompanitë, shoqëritë e biznesit të shkojnë të bien dakord me një nga federatat e 4 sporteve prioritare dhe të investojnë nga fitimet e tyre. Kjo pjesë nga Tatimet. Në tre-katër vitet e fundit janë shifra marramendëse. Janë ndërtuar fusha futbolli pa fund dhe do ketë ndryshime”, u shpreh Armand Duka.

Pavarësisht nga problemet financiare të klubeve, numri 1 i Federatës e sheh gotën gjysmë plot.

“Nëse do shohim kolonën e të ardhurave dhe shpenzimeve të 10 viteve më parë me sot ndryshimi është më shumë se 200% nga sponsorizimet që kanë vetë klubet, të cilat nuk kanë ekzistuar dikur. Ka të ardhura nga e drejta televizive. Ka të ardhura nga shitjet e lojtarëve dhe vetëm të ardhurat e klubeve nga UEFA nëse 10 vite më parë e gjithë Shqipëria në total kishte të ardhura 700-800 mijë euro, në 3-4 vitet e fundit të ardhurat totale janë mesatarisht 8-9 milionë euro”, tha Duka.

Gjithsesi, ai ka një këshillë për klubet e Superligës.

“Duhet të bëjmë aq futboll sa kemi të ardhurat. Sa prodhojmë në atë lloj niveli gare duhet të jemi. Ekipet e kategorisë Superiore në Shqipëri me një menaxhim të mirë mund të jenë me një bilanc pozitiv. Disa prej tyre janë”, tha Duka.

Përveç këshillës, ja ku vjen një kërcënim.

“Deri më sot ne nuk është se kemi marrë ndonjë masë për të përjashtuar nga aktivitete apo për të zbritur nga një kategtori më poshtë. Duhet të jemi akoma më strikt dhe duhet t’i ndihmojmë që të jenë me bilanc pozitiv dhe në të njëjtën kohë mos t’i lejojmë për të vazhduar me bilanc negativ”, tha kreu i FSHF-së.

Së fundmi, një ngacmim për përzgjedhjet në kombëtaret e moshave, ku përflitet se ka padrejtësi dhe korrupsion.

“Selektimi sot nuk bëhet nga një indidvid. Selektimi bëhet nga i gjithë stafi teknik i Federatës së Futbollit dhe sot e them me bindje, në edicionin që jemi, që nuk ka shans që të selektohet një njeri që nuk e meriton. Të gjitha të tjerat që fëmija im është si Maradona por nuk e thirrin janë legjenda urbane. Është i gjithë stafi, të gjithë trajnerët, drejtori teknik bashkë me ta, të cilët shkojnë në fushë, japin vlerësimet individuale të pavarur nga njëri tjetr pa ia ditur emrin lojratir, vetëm me numra”, theksoi Duka./abcnews.al

armand-duka.jpg
G. P.17:30 | 09/02/2019

Armand Duka nuk priste të merrte 36 vota në zgjedhjet për anëtar të Komitetit Ekzekutiv të UEFA-s. Presidenti i Federatës Shqiptare, do të synojë të fitojë më shumë fonde për infrastrukturën.

Në Shqipëri u kthye disi edhe i habitur për fitoren. Armand Duka u zgjodh në Komitetin Ekzekutiv të UEFA-s, por nuk e priste që të merrte kaq vota. Burime në Federatën Shqiptare të Futbollit bëjnë me dijë për ABC News, se Duka ishte shprehur që më parë se mendonte të fitonte 30 vota, që sërish do të kishin qenë të mjaftueshme për t’u zgjedhur, veçse doli nga procesi elektoral me 36.

Siç ka njoftuar më parë ABC News, presidenti i FSHF-së pati mbështetjen e federatave të mëdha si të Anglisë, Francës, Italisë, besohet edhe të Spanjës apo Gjermanisë. Duka pritet që ta shfrytëzojë postin e lartë në UEFA për të ndikuar që federatat e vogla, si Shqipëria, të kenë më shumë financime. Të njëjtat burime në Federatë pohojnë se theksi do të vihet tek shtimi i fondeve të projektit “Hatrik”, të cilat kanë të bëjnë me infrastrukturën.

“Hatriku” ka bërë të mundur investimet në Shkodër apo në stadiumin e ri kombëtar, si dhe kompleksin e Federatës në Kamzë, ndërsa UEFA parashikon që çdo anëtar të ketë mundësi të marrë fonde deri në 1.9 milionë euro në vit. Në garën e zhvilluar në hotelin “Kavalieri Valdorf Astoria” në Romë, Duka zuri vendin e gjashtë nga 7 anëtarë që u zgjodhën gjithsej. Ai la prapa me 9 vota, përfaqësuesin e Ukrainës, Andrij Pavelko, ndërsa të eleminuar dolën ish-anëtari i Komitetit Ekzekutiv, Boris Mihajlov I Bullgarisë dhe përfaqësuesi i Bosnjë Hercegovinës, Elvedin Begiç./abcnews.al

duka-2.jpg
G. P.13:33 | 07/02/2019

Armand Duka zgjidhet në Komitetin Ekzekutiv të UEFA-s. Presidenti i Federatës Shqiptare të Futbollit mori 36 vota në Kongresin që po zhvillohet në Romë.

Një shqiptar mes krerëve të Europës. Ndodhi në futboll, në Kongresin e UEFA-s që po mbahet në Romë, me Armand Dukën që fitoi garën për anëtar të Komitetit Ekzekutiv. Presidenti i Federatës Shqiptare të Futbollit fitoi me 36 vota, duke ia dalë në një konkurrencë të fortë, në votimin ku merrnin pjesë 54 federatat anëtare të UEFA-s.

Ishte hera e dytë që numri 1 i Federatës kandidonte, pas humbjes së ngushtë 4 vite më parë. Duka ishte optimist që përpara votimit, pasi besonte se mbështetej nga federatat kryesore europiane, si Anglia apo Franca dhe parashikimi i tij doli i saktë.

Kjo është hera e parë që një përfaqësues i futbollit shqiptar arrin kaq lart në hierarkinë kontinentale. Që nga fillimi i vitit, presidenti ka qenë vazhdimisht në udhëtim, në një fushatë të gjatë dhe të fortë. Tani që fitoi, Duka besohet se do të ketë mundësi të lobojë më fort për federatat e vogla në përgjithësi, dhe për atë shqiptare në veçanti.

Komiteti Ekzekutiv ka mandat 4-vjeçar, dhe përbëhet nga 16 anëtarë të federatave europiane, plus presidentin e UEFA-s.  Në kryeqytetin e Italisë pati votim për 8 nga anëtarët, të cilëve u përfundonte mandati dhe po ashtu pati votim për presidentin. Në Kongresin e Romës u rizgjodh presidenti aktual, Aleksandër Çeferin, pasi slloveni mori sërish besimin e anëtarëve./abcnews.al

duka-1-1280x699.jpg
G. P.17:04 | 06/02/2019

Presidenti i Federatës Shqiptare të Futbollit, Armand Duka, do të garojë këtë mesjavë, për t’u zgjedhur në Komitetin Ekzekutiv të UEFA-s. Ai është optimist se këtë herë do të ketë sukses.

Mund të jetë udhëtimi drejt ëndrrës. Presidenti i Federatës Shqiptare të Futbollit, Armand Duka, shpreson të zgjidhet anëtar i Komitetit Ekzekutiv të UEFA-s, në Kongresin që zhvillohet këtë mesjavë në Romë. Forumi më i lartë i futbollit europian do të zgjedhë presidentin e ri, dhe po ashtu 8 anëtarë të bordit drejtues, të cilëve u përfundon mandati pikërisht tani.

Duka do të jetë i vetmi kandidat nga ata që humbën 4 vjet më parë, që do të synojë sërish suksesin. Burime në Federatë bëjnë me dijë për ABC News se ai është optimist, por cilat janë arsyet që Duka beson?

Këto burime theksojnë se presidenti ka mbështetjen e federatave të mëdha, si ajo e Anglisë, presidenti i të cilit vizitoi Tiranën pak ditë më parë, apo edhe të Federatës Franceze. Duka është shprehur se edhe federatat e tjera britanike kanë premtuar se do ta votojnë. Që nga fillimi i vitit, presidenti ka qenë vazhdimisht në udhëtim, në një fushatë lobimi të gjatë dhe të fortë.

Katër vjet më parë, ai humbi vetëm për pak vota, ndaj përfaqësuesit të Federatës Turke, por beson se shanset i ka shumë më të mira këtë herë. Nëse Duka do të arrinte të zgjidhej, në Kongresin e kësaj të mërkure, atëherë besohet se ai do të ketë mundësi të lobojë më fort për federatat e vogla në përgjithësi, dhe për atë shqiptare në veçanti./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono