arena kombetare

Arena.jpg
Igli Nikolli23:18 | 23/09/2019

Stadiumi i ri kombëtar është pothuajse gati. Të gjithë po presin me padurim për të shijuar nga afër impiantin modern të kryeqytetit, ndërsa mendohet se ai do të jetë gati për duelin e 17 nëntorit Shqipëri-Francë.

Gjatë mbrëmjes së sotme janë kryer disa prova në lidhje me ndriçimin dhe për më shumë ndiqni pamjet në videon e mëposhtme.

Ilir Shulku, i cili mban rolin e Sekretarit të Përgjithshëm të FSHF-së, shprehet se punimet janë në fazën finale të tyre. Dueli kundër kampionëve të botës do të jetë i pari në stadiumin e ri, ndërkohë që tifozët po presin të përjetojnë nga afër emocionet e Arenës Kombëtare. /abcnews.al

STADIUMI-ARENA-KOMBETARE.mpg_snapshot_00.17-1280x720.jpg
ent ela22:30 | 11/09/2019

Në stadiumin “Arena Kombëtare” ka nisur shtrimi i tapetit të gjelbërt. Punimet në impiantin më modern në Shqipëri janë drejt fundit, ndërkohë që parashikohet të jetë gati për ndeshjen Shqipëri-Francë.

Punimet në stadiumin “Arena Kombëtare” janë drejt fundit.  Federata Shqiptare e Futbollit ka publikuar pamje të reja nga impianti më modern në Shqipëri. Aktualisht punimet janë në fazën finale ndërkohë që ka nisur shtrimi i tapetit të gjelbërt dhe pritet të përfundojë brenda pak ditësh. Fusha  do të jetë plotësisht gati vetëm pas një muaji. Shtëpia e re e Kombëtares ka një kapacitet prej 22 mijë spektatorësh. Stadiumi parashikohet të jetë gati për sfidën Shqipëri-Francë në datën 17 nëntor. Më herët FSHF kishte lënë si afat muajin shtator, afat që skadoi pas vonesave në punime. Kostoja e ndërtimit të stadiumit “Arena Kombëtare” kap vlerën 75 mln euro. /ABC News Albania 24/7

ARENA-KOMBETARE-HISTORIA.mpg_snapshot_01.29-1280x720.jpg
ent ela13:48 | 22/08/2019

Arena Kombëtare është vonuar më shumë se 1 vit që nga afati i premtuar për të qenë gati. Problemet në punime dhe konfliktet e Federatës me qeverinë e kanë shtyrë përurimin për në nëntor.

Ishte shkurti i 2016-ës kur u diskutua zyrtarisht për të.

Stadiumi i ri kombëtar, i njohur si Arena Kombëtare, ishte kryefjala e kryeministrit Rama në mbledhjen e Këshillit Kombëtar të Rregullimit të Territorit.

Kaluan pak kohë, dhe në 29 prill të po atij viti, u prezantua projekti i ri, në prani të kryeministrit dhe të presidentit të Federatës Shqiptare të Futbollit, Armand Duka.

Afati I përfundimit të tij u la në qershor 2018, pas 24 muajsh kalendarikë punimesh, ndërsa kostoja prej 50 milionë eurosh u parashikua se do të rritej.

Në 22 maj, në “Qemal Stafën” e vjetër u luajt ndeshja e fundit historike, finalja e Kupës së Shqipërisë mes Kukësit e Laçit, trofe I fituar nga kuksianët.

Kjo ishte lamtumira me objektin sportiv më të shquar në vend, të projektuar dhe ndërtuar nga italianët, tashmë me moshë gati 70-vjeçare dhe të rrënuar ndjeshëm.

Bashkë me të, u zhduk edhe pista e atletikës me tartan dhe shumë salla e palestra të sporteve të tjerë.

Puna për prishjen e “Qemal Stafës” nisi në qershor 2016, ndërsa stadiumi I ri ishte projektuar po ashtu nga një studio italiane e Firences, drejtuar nga arkitekti Marko Kazamonte.

Gjithsesi, afatet e përfundimit do të shkeleshin disa herë.

Fillimisht, vonesat erdhën nga problemet e dala gjatë punimeve, lidhur me strukturat e themeleve apo çështje të tjera.

Më pas, erdhi konflikti mes Federatës dhe Qeverisë për tatimin mbi vlerën e shtuar, TVSH, që e para kërkonte t’i rimbursohej.

Pas shumë përplasjeve dhe ankesave të Federatës, çështja shkoi në gjyq.

Afati i dorëzimit të objektiv u shty në fund të 2018-ës, por as ky afat nuk u arrit.

As viti 2019 nuk hyri me këmbë të mbarë.

Muaji mars, caku i parë i premtuar, nuk qe e mundur të respektohej.

Gjithçka u zhvendos në qershor, në prag të zgjedhjeve vendore, dhe nga kryeministri Rama u kërkua me trysni të madhe që të jepej përshtypja se stadiumi do të ishte gati.

Federata u detyrua të dilte me një deklaratë në mbështetje të tij, por as kjo nuk piu ujë.

Që nga Moldavia, inaugurimi u shty për në 10 shtator, në ndeshjen eleminatore kundër Islandës.

As kjo shënjestër nuk u arrit të goditej.

Tashmë, premtimi i fortë është se festa do të jetë në një ditë vërtet të shënuar, mbrëmjen e 17 nëntorit, kur kombëtarja shqiptare do të presë Francën për Euro 2020. /ABC News Albania 24/7

stadiumi.jpg
G. P.14:45 | 16/08/2019

Janë kryer më shumë se 90 përqind e punimeve në impiantin Arenës Kombëtare në kryeqytet. Kryeministri Edi Rama e cilëson shtëpinë e re të kombëtares shqiptare si më të mirin në Ballkan dhe ndër më të bukurit në Europë.

“Ju kam thënë që s’do të ketë në rajon të dytë si ky dhe do jetë mes stadiumeve më të bukur të Europës😊

(Po jo vetëm kaq, ju kam thënë edhe që ata që shanin e bërtisnin, pse po prishej karakatina e vjetër, do maskohen si tifozë të huaj kur të hyjnë në stadiumin e ri, se do u vijë zor nga budallallëqet e nga pisllëqet që u ka nxjerrë goja).

Dhe ky s’do jetë vetëm një tempull kuqezi për Kombëtaren, as vetëm një stadium për të dielat e futbollit, po një qendër e re graviteti social për Tiranën, me aktivitet ekonomik, sheshe përreth e hapësira publike për të gjitha moshat.

Hë tani, hopa grupi shurupi, filloni e hidhni romuze e lëshoni fjalë pa lidhje, se në fakt ishim më mirë kur ishim më keq dhe e ka fajin populli, që i pëlqen këto fasada e që gënjehet me këto reklama”, shkruan Rama.

Stadiumi parashikohet të inagurohet në muajin nëntor në ndeshjen Shqipëri-Francë e vlefshme për eliminatoret e Euro 2020.

/ABC News Albania 24/7

ARENA-KOMBETARE-FUSHA-NUK-KA-NISUR-_ABC-M4-T2.mpg_snapshot_00.01-1280x720.jpg
ent ela19:15 | 31/07/2019

FSHF po tenton me të gjitha mënyrat të zhvillojë ndeshjen zyrtare me Islandën në impiantin e ri, por është thuajse e pamundur që nuk arrihet. Nuk ka lidhje me parkimin para stadiumit sepse ai është një element që gjen zgjidhje edhe pse mund të cënojë përkohësisht skenografinë, por momentalisht nuk është fusha gati, aty ku do të luhet. Dhe për të qenë fusha gati duhet testuar maksimalisht impianti I vaditjes.

Presioni në këtë pikë karshi firmës kontraktuese është konstant, por edhe vetë president Duka është mëse i qartë që Islandën nuk e kap dot. Sepse janë disa etapa të tjera tërësisht të domosdoshme që duhen kaluar, si ardhja e inspetktorëve të UEFA-s për një konfirmim, por edhe zhvillimi paraprak në mënyrë të detyrueshme dhe të pashmangshme i një ndeshje kontrolli testimi që do të shërbeje për të verifikuar funksionimin e një mijë e një gjërave që do të kalonin më tej në licensimin përfundimtar. Firma ka ulur pak intensitetin e punëve, dhe me Islandën që duhen pikët, thuajse nuk mund të arrihet, vetëm nëse një mrekulli ndodh në gushtin e nxehtë.

Parkimi nuk është problem, por fusha e cila ende nuk ka nisur dhe që kërkon edhe ajo një muaj kohë për të qenë gati. Më pas verifikimet e tjera dhe ndeshja e kontrollit. Kohët shtrëngojnë, teksa FSHF ka planifikuar që ta inaugurojë “Arenën Kombëtare” në muajin nëntor në sfidën zyrtare eleminatore me Francën. Por, ajo që kërkohet me çdo kusht është të arrihet Islanda. 22 mijë vetë në stadium do të ishin për kombëtaren një suport i madh, për pikët që duhen maksimalisht të merren me këtë rival. Pikët nuk ti jep stadium, sidoqoftë një impiant i ri do të kishte efektin e tij. /ABC News Albania 24/7

 

66407905_629235640902438_8243905268987985920_n.jpg
ent ela10:30 | 12/07/2019

Shëmbet ndërtësa para Arenës Kombëtare te sheshi “Italia”. Godina 4-katëshe ishte ndërtuar para disa vitesh në hapësirë publike, dhe në të ishin vendosur disa biznese, bar kafe, restorante, dhe fast-food.

Përmes një postimi në rrjetin social “Twitter”, kryetari i Bashkisë së Tiranës, Erion Veliaj thotë se tashmë tashmë sheshi “Italia” hapet plotësisht në funksion të qytetarëve.

“Çibani i fundit!
Iken ngrehina e mbetur nga aksi qendror i Tiranes per ta hapur plotesisht Sheshin Italia per Arenen Kombetare
Shpronesim per ata me leje, prishje per te fortet qe shtuan katet pa leje ne kohe te Lulit e Kunatit famekeq  #TiranaNukNdalet”, shkruan kryebashkiaku Veliaj.

fasada.jpg
G. P.22:54 | 24/06/2019

Anëtari i komitetit të FSHF-së, Arben Dervishaj, deklaroi këtë të hënë gjatë emisionit “Pressing” të Gerti Çarçanit se punimet për stadiumin “Arena Kombëtare” vazhdojnë. Ai theksoi se Federata Shqiptare e Futbollit ka besimin se do arrijë t’i kapë afatet dhe ta përfundojë ndërtimin e stadiumit në Shtator.

“Në këto momente në “Arenën Kombëtare” vazhdohet të punohet për të arritur atë premtimin që është në Shtator do të jetë gati për të bërë ndeshjen me Islandën. Sot ne ishim përsëri në mbledhje, ishim me kompaninë dhe vetë presidentin për të diskutuar problematikat që ne kemi në lidhje me përfundimin e “Arenës Kombëtare”. Fasada është përfundimin e saj të plotë. Jemi në punimet e brendshme. Jo më larg se para një jave kishim ekipin e ekspertëve të Uefa-s që erdhën dhe check-uan gjithë punimet në stadium dhe nga ajo që panë ata ishin shumë të kënaqur për cilësinë dhe kushtet që kërkon një stadium i kategorisë së 4-ërt. Patën disa vërejtje, të cilat i kemi rregulluar dhe tani po vazhdohet me punimet për të kapur këtë afat. Ne themi se i kapim afatet. Punimet e brendshme kanë avancuar”, tha Dervishaj.

Megjithatë, Dervishaj tregoi edhe një problem që mund të pengojë procesin e punimeve.

“E vetmja gjë që mund të na pengojë dhe që nuk varet nga ne është sheshi para stadiumit. Sheshi përpara stadiumit ka një projekt që është bërë nga ana e bashkisë rreth 200 automjete. Aty do prishet ai objekti 3-katësh dhe do hapet sheshi do bëhet pedonal. Do kenë punime që do kërkojnë kohën e duhur dhe ndoshta ne do na pengojnë për pjesën e Shtatorit. Ne në datë 15 korrik fillojmë punimet për fushën dhe largohen të tëra skelat. Na duhen vetëm 1 muaj që fusha të jetë gati për t’u luajtur. Kemi rënë dakord me përfaqësuesit e Uefa-s që të kemi një kontroll nga ana e tyre me 15 Gusht dhe në shtator stadiumi do jetë gati”, tha Dervishaj.

Përpara se kombëtarja të zhvillojë ndeshje zyrtare në “Arenën Kombëtare”, aty do të luhet një ndeshje kontrolli. Devishaj tregoi se mund të luhet edhe superkupa e Shqipërisë për të shikuar defektet dhe problematikat që mund të hasen./ABC News Albania 24/7

arena-1280x711.jpg
ent ela19:45 | 18/06/2019

Punimet vazhdojnë intensivisht në stadiumin Arena Kombëtare ku janë kryer mbi 90 përqind e punimeve. Impianti modern pritet të jetë gati për ndeshjen Shqipëri-Islandë në muajin shtator.

Janë kryer më shumë se 90 përqind e punimeve në stadiumin Arena Kombëtare. Impianti i ri i Kombëtares kuq e zi parashikohet të jetë gati në muajin shtator në ndeshjen ndaj Islandës në datën 10 shtator por paraprakisht duhet të zhvillohet një test kontrolli për të marrë dritën jeshile. Pjesa metalike dhe e betonit ka përfunduar dhe tashmë stadiumi është në fazën e montimeve të materialeve përkatëse. Mbështjellja e impiantit me dizanjin përkatës është në hapat përfundimtarë.

Ka filluar vendosja e stolave që janë rreth 22 mijë në numër ku mbizotëron ngjyra e kuqe. Puna vazhdon me ritme të shpejta edhe në ambientet e brendshme të stadiumit. Janë drejt përfundimit dhomat e zhveshjes dhe tualetet, ndërkohë që lyerja dhe montimet elektrike vijojnë me ritme të larta. Një pjesë tepër e rëndësishme e impiantit është edhe fusha. Parashikohet që në muajin korrik të filloje vendosja e tapetit që pritet të kushtojë rreth 400 mijë euro.

Problematikat e vetme deri në këtë pikë janë punimet me ritme të ngadaleta në sheshin përpara stadiumit, ku ëshë projektuar edhe hyrja e impiantit më modern në Shqipëri kostoja e së cilës kap vlerën e 50 mln eurove. Puna vijon normalisht edhe në kullën e stadiumit që përbën një pjesë të veçantë të këtij impianti. Një vend i posaçëm është rezervuar edhe për tifiogrupin tifozat kuq e zi.

Në Shqipëri ndodhen prej disa ditësh dy inspektorë të UEFA-s, të cilët monitorojnë punimet. Ditën e sotme në ambientet e Arenës Kombëtare inspektuan punimet Presidenti i Federatës Shqiptare të Futbollit Armand Duka nën praninë e Presidentit të Federates çeke të futbollit Martin Malík së bashku me stafet përkatëse. /ABC News Albania 24/7

duka.jpg
G. P.12:40 | 18/06/2019

Stadiumi i ri kombëtar mund të mos përfundojë as në shtator. Vetë presidenti i Federatës Shqiptare të Futbollit, Armand Duka, shprehu dyshime për mbylljen në kohë të punimeve.

Afatet janë shkelur, dhe fundi ende nuk dihet. “Arena Kombëtare”, stadiumi i ri dhe modern në Tiranë, mund të mos shijohet nga ekipi përfaqësues dhe nga tifozët as në muajin Shtator.

I menduar fillimisht për t’u bërë gati shumë muaj më parë, impianti nuk mundi të përfundonte as në fund të vitit të kaluar, dhe as në Qershor, siç e kërkoi me ngulm kryeministri Rama, në përpjekje për të pasur një sukses sportiv në fushatën zgjedhore.

Shtatori u dha si koha e re e mbylljes së punimeve, dhe këtë gjë e komentoi presidenti i Federatës Shqiptare të Futbollit, Armand Duka.

“Shumë kush e sheh gjysmë plot dhe gjysmë bosh për çka i përket termave kohorë për Shtatorin. Ne i kemi vënë objektiv kompanisë që duam të luajmë në Shtator dhe me të vërtetë e kemi shumë të domosdoshme të luajmë në Shtator në këtë stadium jo vetëm sepse duam ta shijojmë stadiumin e ri, duam të kemi kushte sa më të mira për spektatorin, por duam të arrijmë më shumë rezultat në praninë e më shumë spektatorëve dhe me një atmosferë akoma më të mirë. Kështu që do bëjmë të gjitha përpjekjet dhe kompania gjithashtu po bën të gjitha përpjekjet, por nuk mund të jemi shumë të sigurt për Shtatorin”, tha ai.

Nëse nuk arrihet shtatori, atëherë shpresohet që stadiumi të mund të presë ndeshjen kryesore të grupit tonë eliminator në Euro 2020, atë ndaj Francës. Duka vizitoi Arenën në krah të presidentit të Federatës Çeke të Futbollit, Martin Malik, i cili erdhi në Shqipëri me ftesë pikërisht të palës shqiptare. Së bashku, ata vizituan më pas edhe zyrat e reja të Federatës Shqiptare, që po ndërtohen në ish-kompleksin Dinamo./ABC News Albania 24/7

elbasan-arena-1280x720.jpg
G. P.14:59 | 01/05/2019

Shqipëria nuk do të luajë në Arenën e re Kombëtare, ndaj Moldavisë në 10 qershor. UEFA konfirmon zyrtarisht se ndeshja eleminatore e Europianit do të zhvillohet në “Elbasan Arena”.

Përfundimisht nuk do të jemi aty ku shpresuam. Kombëtarja do të detyrohet ta luajë në “Elbasan Arena” ndeshjen ndaj Moldavisë për eliminatoret e Europianit.

E njofton vetë faqja zyrtare e UEFA-s, duke konfirmuar se dëshira për ta zhvilluar duelin e 10 qershorit në Arenën e re Kombëtare në Tiranë, nuk u realizua.

Pavarësisht se në stadiumin e ri po punohet me ritme të larta dhe deri në orët e vona të natës, është e pamundur që të arrihet afati i vendosur fillimisht nga Federata Shqiptare e Futbollit dhe i kërkuar me këmbëngulje nga kryeministri Rama, me shumë gjasë për ta pasur si një plus në fushatën e mundshme elektorale të zgjedhjeve vendore.

Shpresa mbetet që Arena të jetë gati në 10 Shtator për ndeshjen eliminatore ndaj Islandës, ose në nëntor për duelet ndaj Andorrës dhe sidomos ndaj Francës.

Ekipi përfaqësues ka luajtur këta muaj në “Loro Boriçi” të Shkodrës, me duelet e fundit ndaj Skocisë apo Turqisë, ndërsa në “Elbasan Arena” ndeshja e fundit ishte miqësorja fituar 1-0 ndaj Uellsit./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono