ardian takaj

ardjan-takaj.jpg
ad min22:30 | 20/07/2019

Presidenti i skuadrës së Skënderbeut, Ardjan Takaj ka zbuluar se do të vazhdojë projektin me juglindorët. Numri një i klubit korçar konfirmon se do të vazhdojë “luftën” me UEFA-n, në Gjykatën Federale të Zvicrës.

Presidenti i skuadrës së Skënderbeut, Ardjan Takaj, ka zbuluar prapaskenat të cilat ndodhën në Gjykatën e Arbitrazhit Sportiv në Zvicër ku skuadra korçare shpresonte tek drejtësia. Numri një i klubit të Skënderbeut thekson se UEFA është munduar ta paraqesë Skënderbeun si grupim kriminal.

Në lidhje me email-in unanim ku u kërcënuan inspektorët e UEFA-s, Takaj tha se ishte gjithçka e planifikuar dhe mohon që klubi të jetë i përfshirë.

Në lidhje me të ardhmen, Takaj thekson se do të vijojë projektin me Skënderbeun. Presidenti i korçarëve thekson se gjoba ishte për të zhdukur skuadrën dhe zbulon se klubi do të vazhdojë ta ndjekë çështjen në Gjykatën Federale në Zvicër.

Skënderbeu u përjashtua me 10 vite nga Kupat e Europës dhe u gjobit me 1 mln euro, një goditje e rëndë për skuadrën dominuese në Shqipëri që korri sukses të jashtëzakonshëm edhe në Kupat e Europës./ABC News Albania 24/7

ardian-takaj.jpg
nev ila16:05 | 17/07/2019

Pritet të vendoset shpejt e ardhmja e Skënderbeut. Mundësitë për presidentin Takaj janë që të vazhdojë me klubin aktual për të pritur 7 vjet, ose të krijojë një klub të ri sërish në Korçë.

Epoka e lavdishme është mbyllur, por nuk është e sigurt nëse do të ketë jetë pas saj.

Skënderbeu i madh, 7 herë kampion i vendit në vitet 2011-2018, dhe dy herë pjesëmarrës në fazën e grupeve të Ligës së Evropës, i përket së kaluarës, dhe frika është se mos do t’i përkasë vetëm historisë.

Dënimi përfundimtar i gjykatave sportive, nga Komisioni i Disiplinës i UEFA-s, deri në KAS-in e Lozanës, e kanë vënë në pikëpyetje vazhdimësinë e klubit me këtë emër, dhe besohet se presidenti Ardian Takaj ka dy alternativa.

E para, tepër e vështirë për t’u realizuar, që të vazhdojë me klubin Klubi Futbollistik Skënderbeu, dhe e dyta që të krijojë një klub tjetër me emër fare pak të ndryshuar, duke mbajtur bazën gjithnjë në Korçë.

Për momentin, Takaj ka pasur takim me kryetarin e Bashkisë, Filon, dhe burimet nga Korça bëjnë me dijë se nga presidenti është kërkuar buxhet më i madh financiar. Për momentin, pushteti vendor jep 300 milionë lekë të vjetër në vit për Skënderbeun, duke pasur edhe 25 për qind të aksioneve.

Hamendësimi është se mes dy drejtuesve mund të jetë diskutuar edhe për krijimin e një klubi tjetër. Për Takajn, avantazhet janë të mëdha nëse vazhdon në Korçë.

Edhe me ndonjë ndryshim emri, skuadra do të jetë po ajo, mund të quhet AFC Skënderbeu, po ashtu stadiumi është gati, madje do të ketë një të ri e modern, ndërsa është ndërtuar edhe kompleksi stërvitor për ekipin e parë dhe për Akademinë.

Vërtet, që do të nisej nga Kategoria e Dytë, por në 3 vjet në rast suksesi, do të jetë në Superligë, ndërsa nga dënimi aktual i UEFA-s kanë mbetur edhe 7 vjet. Aspak e lehtë, por gjithsesi duket si rruga më e lehtë, siç e pohojnë edhe burime nga Korça.

Një rast i tillë ndodhi në Rumani me Steauan e Bukureshtit, skuadrën më të shquar rumune, edhe cila shpalli falimentimin në 2007 dhe presidenti Xhixhi Bekali krijoi klub tjetër, me emrin Football Klub FCSB.

Në këtë mënyrë ai shpëtoi nga 11 milionë euro detyrime ndaj shtetit. Problem për Takajn është gjoba prej 1 milionë eurosh vendosur nga UEFA, e cila duhet shlyer brenda afateve, ndryshe ka rritje në vlerë.

Po ashtu, besohet se ka pagesa të prapambetura për futbollistët, diçka që nuk është vetëm çështje në Korçë, por në shumë klube shqip./ABC News Albania 24/7

ardian-takaj.jpg
ad min20:56 | 12/07/2019

Presidenti i Skënderbeut Ardjan Takaj deklaroi pas vendimit të CAS se do t’i drejtohet Gjykatës Federale në Zvicër për të kërkuar drejtësi. Numri një i klubit korçar zbulon se do të vazhdojë të qëndrojë në krye të Skënderbeut.

Gjykata e Arbitrazhit Sportivë në Lozanë la në fuqi dënimin e UEFA me 10 vite pezullim dhe një gjobë prej 1 milionë euro për skuadrën e Skënderbeut. Një dënim mjaft i rëndë për korçarët të cilët kanë edhe një shans të fundit për të apeluar.

Ajo është Gjykata Federale në Zvicër. Klubi korçar do të kërkojë pafajësinë në Gjykatën Federale. Të paktën kështu shprehet presidenti i skuadrës së Skënderbeut Ardian Takaj për Panorama Sport. Takaj hedh poshtë mundësinë e largimit nga juglindorët dhe beson ende tek drejtësia.

“Jam i shokuar, jo vetëm unë si president, por studio ligjore dhe të gjithë ata që janë marrë me këtë çështje. Unë Skënderbeun nuk e braktis, do vazhdoj luftën. Do e çojmë çështjen në Gjykatën Federale të Zvicrës dhe aty do të marrim drejtësi. Kjo çështje ka kaluar të gjitha limitet, edhe avokatët që na përfaqësojnë e kanë tashmë personale, pasi janë befasuar nga vendimi i padrejtë”, ka deklaruar presidenti i Skënderbeut, Ardjan Takaj.

Takaj hedh poshtë mundësinë e shitjes së klubit dhe merr jetë varianti që mund të arrihet shumë lehtë. Akademia Skënderbeu i mjafton tre vite për t’u ngjitur në kategorinë superiore e më pas të projektohet skuadra drejt kompeticioneve europiane e natyrisht ku president do të jetë pikërisht Ardian Takaj.

Në planin e merkatos, Skënderbeu nuk ka financat e duhura për të nënshkruar me futbollistë të mëdhenj dhe fillimisht priten rinovimet e më pas disa transferime pa shumë kosto./ABC News Albania 24/7

ardian-takaj-1280x715.jpg
ad min22:14 | 07/05/2019

Presidenti i skuadrës së Skënderbeut, Ardian Takaj ka premtuar një premio prej 70 mijë euro në rast se klubi fiton Kupën e Shqipërisë. Fituesja e Kupës kalifikohet direkt për në garat euopiane sezonin e ardhshëm.

Skënderbeu pret vendimin e CAS por për prestigj dhe për të dhënë shumë mesazhe kërkon që të nxjerrë jashtë Kukësin nga Kupa dhe të bëjë të vetën këtë trofe, dhe në një situatë të tillë. Dhe një diçka e tillë do të ishte shumë pozitive edhe për trajnerin Shehi.

Skuadra model e këtyre viteve në futbollin shqiptar tashmë në kampionat ka dështuar dhe i vetmi objektiv mbetet Kupa e Shqipërisë. Ndeshja e parë gjysmëfinale është humbur ndaj Kukësit me rezultatin 2-1, ndërsa shpresohet që në takimin e dytë “Ujqërit e Dëborës” të arrijnë të kualifikohen.

Dhe menjëherë ka ardhur edhe lëvizja inkurajuese e president Takajt, i cili kërkon të mos e mbyllë pa trofe këtë sezon dhe ka menduar që të motivojë futbollistët e tij me një premio të majme.

Sipas Panorama Sport bëhet me dije se drejtuesit korçarë kanë vendosur në dispozicion të skuadrës një premio prej 70 mijë eurosh në rast se fitojnë Kupën.  Pozitat e klubit kampion në fuqi nuk janë të mira, pasi e ardhmja e tyre varet nga vendimi i CAS-it, ata janë të dënuar për 10 vite që të mos marrin pjesë në Kupat e Europës.

Në rast se ky vendim mbetet në fuqi, drejtuesit do të rishikojnë pozitat e tyre, ndërsa në Korçë ka optimizëm se mund të fitojnë apelimin në CAS./ABC News Albania 24/7

sk.png
ad min15:20 | 16/04/2019

Skënderbeu është mbrojtur sot në Gjykatën Sportive në Lozanë të Zvicrës. Klubi korçar kërkon heqjen e dënimit të UEFA-s, ndërsa vendimi pritet të jepet pas disa javësh.

Udhëtimin drejt Lozanës e bënë me humor të mirë. Drejtuesit e Skënderbeut me presidentin Takaj në krye janë në Zvicër, ku patën seancën dëgjimore të gjyqit me UEFA-n. Kampionët e Shqipërisë në fuqi kërkojnë anulimin e vendimit me 10 vite përjashtim nga kupat e Europës, dhe të gjobës prej 1 milionë eurosh.

Takaj është shprehur se optimizmi është i madh dhe se është i sigurt se klubi I tij do të shpallet i pafajshëm nga akuza për trukim ndeshjesh, ndonëse vendimi i KAS-it pritet të merret më vonë.

Gjithsesi, burime pranë klubit janë shprehur për ABC News, se do të mirëpritej edhe një ulje e dënimit deri në 3 vjet, ndonëse kjo nuk duhet të thuhet publikisht.

Për të fituar gjyqin, korçarët kanë pajtuar një agjenci të specializuar zvicerane, për të cilën besohet se kanë paguar 500 000 euro, ndërsa do të mbështeten tek argumentet se nuk ka prova për trukimet, dhe se nuk është e vërtetuar se kush i ka përfituar paratë e basteve.

Skënderbeu ka bërë me dije se ka pasur ndryshime edhe në panelin e UEFA-s që mori vendimin për dënimin.

Skuadra korçare u akuzua se trukoi disa ndeshje në Ligën e Europës dhe në Champions, qoftë në turet kualifikuese, apo në fazën e grupeve, diçka që vazhdon të mohohet prej drejtuesve./abcnews.al

ardian-takaj-1280x715.jpg
ad min22:19 | 07/03/2019

Vendimi i arbitrave për të bojkotuar kampionatin është mbështetur nga presidenti i Skënderbeut Ardjan Takaj. Ai tha për TV Klan se ishte vetë situata e krijuar me dhunën e ushtruar ndaj Eldorian Hamitit në sfidën Kamza – Laçi që shkaktoi këtë situatë.

Ardjan Takaj, president i Skënderbeut: Është e drejtë e arbitrave që ta kërkojnë me këtë situatë dhe këtë që ndodhi. Mua më vjen mirë ta kërkojnë dhe ta kërkojnë deri në fund, sepse është shumë e rëndësishme edhe për futbollin shqiptar.

Për presidentin e Skënderbeut mungesa e policisë në ambientet e brendshme të stadiumit la pasoja që në fillim të kampionatit pikërisht në një ndeshje të zhvilluar në Korçë.

Ardjan Takaj, president i Skënderbeut: Shenjat kampionati i dha që në javën e parë, në Korçë dhe e dinim dhe e kemi paralajmëruar dhe e kemi kërkuar që të kthehet policia. Ne duam që të zgjidhet situata një orë e më parë. Të bëhet një ligj i ri për njerëzit që hyjnë në fushat e futbollit.

TV Klan kontaktoi edhe me përfaqësues të klubeve të tjerë të  Superligës, si Partizani, Kukësi, Tirana, etj të cilët nuk pranuan të prononcoheshin për situatën e krijuar në futbollin shqiptar.

Tv Klan

skenderbeu.jpg
ad min16:40 | 15/12/2018

Skënderbeu kërkon kthesën e rezultateve në Superligë, me një fitore ndaj Luftëtarit. Trajneri Shehi mbetet me besim, por dyshimet janë të mëdha nëse kampionët do të mund të jenë sërish pretendentë.

Ishte fundi i Tetorit, me kampionët në kulmin e tyre. Skënderbeu sapo kishte mundur Partizanin në kryeqytet dhe ishte ngjitur në krye të renditjes së Superligës, veçse u desh pak kohë që shumëçka të shkonte për keq. Disa rezultate negative radhazi bënë që korçarët të mbeteshin prapa Partizanit, madje të rrezikohen për t’u kaluar nga Kukësi apo Teuta, duke vënë në rrezik Europën. Presidenti Takaj sikur e kishte parandjerë që pas fitores ndaj Partizanit, kur tha këto fjalë.

“Këta janë çuna të rinj dhe të rrinë me këmbë në tokë. Duhet t’i marrin ndeshjet një nga një, duhet të jenë seriozë deri në fund sepse kampionati do të ketë eksperiencë. Kemi 3-4 lojtarë me eksperiencë që janë të rëndësishëm për Skënderbeun, edhe këta të rrinj duhet të ambientohen”, tha Takaj.

Skënderbeu sot është në prag të ndeshjes ndaj Luftëtarit, për javën e 17-të të Superligës, dhe dyshimet për ekipin janë të mëdha. Takaj madje zhvilloi mbledhje me ekipin, dhe thuhet se pati kritika, ndërsa ka edhe dyshime se kampionët nuk po japin maksimumin për shkak të përjashtimit nga Europa, që mund të mbetet në fuqi. Po ashtu, përflitet se harmonia në ekip nuk është ajo më e mira, edhe për shkak të largimit të shumë lojtarëve me përvojë. Trajneri Orges Shehi, hedh poshtë dyshimet, madje e sheh gjendjen me pozitivitet, ndonëse do të ketë mungesat e Krasniqit të dëmtuar dhe Ditës së pezulluar.

“Mbledhjet nuk janë për të gjetur fajtorin apo për të goditur dikë. Unë mendoj që pas rezultateve jo të mira janë normale dhe mblehdje të tilla. Unë përgjigjen e lojtarëve e kam marrë prej kohësh. Nuk ka krizë për atë çka shohim ne. Ndoshta brenda tyre mund të ketë diçka, por për atë që shohim në fushë nuk besoj se ka krizë”, tha Shehi.

Barazimi i Partizanit me Kukësin bëri që Skënderbeu të ketë mundësi të afrohet sërish me kreun.

“Na ka ardhur siuata që duhet me fituar patjetër. Duhet me dhënë jo 100%, por 120% për këtë ndeshje. Na interesoi ai barazim. Na jep mundësi që të rikuperojmë pikët, kështu që duhet të japim maksimumin nesër, për të marrë maksimumin”, u shpreh Shehi.

Skënderbeu ka 30 pikë dhe është në vend të tretë në renditjen e Superligës, 6 pikë poshtë Partizanit, që tashmë e luajti ndeshjen e tij të kësaj jave./abcnews.al

partizanii-1.png
ad min14:05 | 30/10/2018

Futbollistët e Skënderbeut e quajnë ekipin e tyre si më të fortin e Superligës. Gjithsesi, trajneri Shehi bën thirrje për kujdes, ndërsa presidenti Takaj flet për strategjinë e klubit të tij.

Tani po që mund të flasim ndryshe. Kështu duket se mendojnë tek Skënderbeu dhe i tillë ishte vlerësimi i rëndësisë së fitores ndaj Partizanit në kryeqytet. Sukses dhe rokadë për vendin e parë, me autoritetin e rifituar mesa duket plotësisht. Njeriu që vulosi shifrat, Devi Bregu, nuk ka dyshim për këtë.

“Që jemi shumë më lart se ekipet tjera kjo duket në fushë, por të ulim kokën dhe të punojmë me seriozitet. Të rëndësishme për ne janë 3 pikët”, tha Bregu.

Shënuesi tjetër, Gjergji Muzaka, e quan normalitet gjithçka që ndodhi.

“Për lojtarët që kanë vite që luajnë aty kjo është diçka normale. Jo  normale është mos ta shikosh në vendin e parë Skënderbeun”, tha Muzaka.

Muzaka flet për lojtarët fitues në tetë vjet dhe i tillë është Marko Radash.

“Ishte fitore e merituar. Ishim një nga favoritët, tani jemi vetëm favoritë”, tha Radash.

Trajneri Orges Shehi ka një paralajmërim, sidoqoftë, për lojtarët e tij.

“Futbolli është shumë i poshtër. Në momentin që ti mendon se ke arritur diçka dhe sa fillon ngre këmbët të ulen direkt. Ne duhet të ngulim këmbët fort dhe tre pikët janë të rëndësihme për ne, si ndaj Partizanit apo kundërshtarit të radhës”, u shpreh Shehi.

Arkitekti numër 1 i suksesit është presidenti Takaj, i cili flet për strategjinë e Skënderbeut për të përballuar edhe ditët e këqija.

“Ne po luajmë me çuna të rinj futboll. Nuk është vetëm pjesa e titullit kampion, por edhe lojtarëve trë rinj, kemi perspektivë në të ardhmen”, tha Takaj./abcnews.al

ardian-takaj.jpg
ad min16:55 | 28/08/2018

Presidentët e Superligës dalin kundër Policisë së Shtetit për sigurinë në stadiume. Pas Safet Gjicit të Kukësit, edhe presidenti i Skënderbeut, Takaj, kërcënon me bojkot.

Ndaj pushtetit mund t’ia dalin më të fuqishmit.

Presidentët e klubeve të futbollit të Superligës, duket se po i bien ndesh edhe një herë vullnetit të politikës, këtë herë për garantimin e sigurisë në stadiume.

Pasi e sfiduan me sukses në zgjedhjen e presidentit të Federatës, Dukës, disa muaj më parë, janë të vendosur të kthejnë mbrapsht vendimin për largimin e Policisë së Shtetit nga stadiumet.

Pas presidentit të Kukësit, Gjici, ja edhe reagimi i numrit 1 të Skënderbeut, Ardian Takaj.

“Ne investojmë për futbollin shuma shumë të mëdha dhe të prishet gara për hir të disa njerëzve të papërgjegjshëm është shumë e rrezikshme për ne që merremi me këtë punë. Prandaj jam dakord me atë që ka thënë Gjici dje dhe i bashkohem apelit të Gjicit për këtë. Jam gati që nesër që të bojkotohet kampionati”, thotë Takaj.

Cili është shqetësimi i kreut të kampionëve?

“Unë e di sa i kanë kapacitetet të gjitha klubet shqiptare për ta përballuar me steëard. U bëj thirrje këtyre që rrijnë edhe presin të bëhet ça të bëhet. Por të çohen sa nuk është vonë. Ka një kosto shumë të madhe dhe në fund asnjë nga këto kompanitë me steëard nuk mund ta përballojnë dhe të marrin përsipër edhe riskun. Policia e Shtetit është në zbatim të ligjit dhe në qoftë se kthehet ligji dhe të funksionojë siç ka qenë më parë atëherë do kalojë në rrjedhën normale sepse nuk është momenti në Shqipëri për hequr policinë nga stadiumi”, sipas Takajt.

Një ditë përpara tij, Gjici ishte shprehur kështu.

“Jam shumë dakord që të gjithë presidentët e klubeve të Superligës, por edhe ata që janë në Kategorinë e Parë duhet të bllokojnë kampionatin nëse policia nuk kthehet tek siguria e stadiumeve”, tha Gjici.

Duket se ka një bashkëpunim mes klubeve të Superligës dhe Federatës Shqiptare të Futbollit, që Policia e Shtetit të vihet nën presion, dhe po ashtu parlamenti përsa i përket Ligjit të Sportit.

Disa ditë më parë, sekretari i përgjithshëm i Federatës, Shulku, i dërgoi një letër Policisë së Shtetit, ku i kërkoi kthimin në stadium./abcnews.al

skenderbeu.jpg
ad min20:33 | 05/07/2018

Ish-portieri Orges Shehi u prezantua zyrtarisht si trajneri i ri i Skënderbeut. Ka qenë vetë presidenti i ekipit Ardian Takaj, i cili ka prezantuar Shehin në rolin e trajnerit.

Ardian Takaj: “Unë jam këtu për të prezantuar trajnerin e ri të Skënderbeut, Orges Shehin. Është një nga kontribuesit më të mëdhenj i gjithë kësaj historie të këtyre 8 viteve. Jemi përballë një beteje shumë të madhe me UEFA-n, por nuk është se kjo betejë ka filluar sot. U bënë dy vjet që ne merremi dhe e kemi luftën në dy drejtime. Kemi qenë shumë të suksesshëm në fushën e futbollit dhe i kemi arritur të gjitha objektivat që kemi pasur në fillim. Tashi jemi përballë gjyqit me UEFA-n. Shpresojmë atje dhe jemi të bindur pëqr të fituar. Ajo do të jetë fitorja më e madhe e Skëndërbeut dhe për të ardhmen e ekipi”.

Orges Shehi: “Sigurisht që është një pozicion ndryshe për vetë faktin që nga fusha kalon në pankinë. Duke e menduar më erdhi pak shpejt, por është një vlerësim dhe do të mundohem të jap maksimumin tim për të shpërblyer besimin e klubit”./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono