Ankara

tavolina.jpg
ad min23:48 | 15/10/2019

Qeveria ruse është shprehur e gatshme të ndërhyjë në veri të Sirisë për të shmangur një përplasje ushtarake mes forcave vendase siriane dhe atyre turke, që po avancojnë ofensivën kundër milicive kurde. Për Moskën, një përplasje e tillë do të ishte një katastrofë.

Rusia ka deklaruar se do të angazhohet për të mos lejuar një përplasje turko-siriane, teksa ofensiva e ushtrisë turke në veri të Sirisë vazhdon. “Një gjë e tillë do të ishte e papranueshme, ndaj dhe ne nuk do ta lejojmë”, ka deklaruar i dërguari i posaçëm i Moskës për Sirinë, Aleksander Lavrentjev.

Rusia është një aleate e rëndësishme ushtarake e liderit sirian Bashar al Asad dhe njëkohësisht e presidentit turk Reçep Taip Erdogan. Gjatë një vizite në Emiratet e Bashkuara Arabe, Lavrentjev e cilësoi ofensivën turke “të papranueshme”.

Ai tha se edhe autoritetet ushtarake turke dhe ato siriane janë në kontakt me njëra-tjetrën për të shmangur një përplasje të mundshme. Edhe Ministria ruse e Mbrojtjes bëri të ditur se trupat e saj, që janë vendosur në Siri që në vitin 2015, po patrullojnë vijën e kontaktit mes forcave siriane dhe turke

Ofensiva e Ankarasë, që nisi javën e kaluar pasi administrata amerikane njoftoi tërheqjen e trupave nga rajoni, synon të largojë milicitë kurde nga rajoni kufitar turko-sirian. Ankaraja i konsideron milicitë në fjalë dhe në veçanti Forcat Demokratike Siriane një organizatë terroriste.

Qeveria turke synon të krijojë një zonë të sigurtë në rajonin kufitar, ku të mund të vendosë refugjatët sirianë që strehohen aktualisht në Turqi. Shumë prej tyre nuk janë kurdë dhe kritikët kanë paralajmëruar se kjo mund të çojë në një spastrim etnik të popullsisë kurde./ABC News Albania

fuat-oktay-turqi-1280x720.jpg
nev ila12:57 | 08/10/2019

Nuk ka vonuar reagimi i Turqisë ndaj deklaratave të kreut të shtëpisë së Bardhë Trump, o cili tha se do të shkatërronte ekonominë turke nëse Turqia do të tejkalonte kufijtë me veprimet ushtarake në Siri. Zv/presidenti turk u shpreh se Turqia nuk është një vend që vepron nën kërcënim.

“Mesazhi ynë për komunitetin ndërkombëtar është i qartë: Turqia nuk është një vend që vepron nën kërcënim”.

Është ky reagimi i zv/presidentit turk Fuat Oktay, duke iu referuar fjalëve të presidentit amerikan Donald Trump për një shkatërrim të ekonomisë turke në rast se qeveria e presidentit Erdoan tejkalon kufijtë për sa i përket sulmeve ushtarake kundër forcave kurde në verilindje të Sirisë.

“Kur bëhet fjalë për sigurinë e saj Turqia do të ndjekë rrugën e saj dhe do e bëjë me çdo çmim”, përfundoi zv/presidenti turk.

Gjatë paradites së të martës me anë të një mesazhi në profilin e tij në Twitter presidenti amerikan Donald Tramp deklaroi se nëse me pjekurinë e tij do të konstatonte se Turqia do të tejkalojë kufijtë, atëherë ai do të shkatërrojë ekonominë e vendit. Madje Kreu i Shtëpisë së Bardhë shtoi se e ka bërë dhe më parë një gjë të tillë.

Ai theksoi se së bashku me Europën dhe të tjerët duhet të kontrollohen luftëtarët e ISIS të kapur dhe familjet e tyre.

“Shtetet e bashkuara të amerikës kanë bërë më shumë se kushdo duke shkatërruar 100 për qind kalifatin. Tashmë është koha për të tjerët në rajon, disa prej të cilëve shumë të pasur, që të mbrojnë territorin e tyre shtoi”, përfundoi Tramp postimin e tij./ABC News Albania 24/7

5a83f8710f2544329c4dd0ca.jpg
ent ela15:10 | 12/07/2019

Mbërrin në Turqi pjesa e parë e sistemit të raketave për mbrojtjen tokë ajër, nga Rusia. Ministri i jashtëm turk, por dhe Ministria e Mbrojtjes konfirmuan nisjen e procesit që do të vazhdojë disa ditë duke theksuar se nuk ka pasur asnjë problem.

Procesi i dorëzimit të sistemit raketor rus për mbrojtjen anti ajrore S-400 në Turqi, ka nisur mëngjesin e të premtes dhe do të vazhdojë dhe në ditët në vijjim. Raketat e para mbërritën në bazën e Murted Hava, 35 kilometra në veri lindje të kryeqytetit Ankara. Ministria turke e mbrojtjes në një deklaratë për media konfirmoi se dorëzimi i pjesës së parë ka nisur me sukses dhe se në ditët në vijim do të jenë autoritetet kompetente që do të vendosin se si do të përdoret.

Sipas mediave turke, për instalimin dhe aktivizimin e plotë të raketave duhet pritur të paktën deri në tetor. Presidenti Erdogan mbrojti këtë vendim duke thënë se është i domosdoshëm për të garantuar sigurinë kombëtare dhe sovranitetin e vendit.

Ministri i jashtëm turk gjithashtu konfirmoi fillimin e procedurës së dorëzimit së sistemit mbrojtës nga Rusia në Turqi duke theksuar se nuk kishte pasur asnjë problem.

Blerja nga Ankaraja e sistemit S-400 ka krijuar polemika me Shtetet e Bashkuara të Amerikës muajt e fundit të cilat pretendojnë se ai nuk përputhet me sistemet që përdoren nga NATO. /ABC News Albania 24/7

egje-1280x775.jpg
ad min23:45 | 20/04/2019

Turqia kërkon që Greqia të demilitarizojë disa prej ishujve grekë në pjesën lindore të detit Egje. Deklarata e ministrit turk të mbrojtjes, Hulusi Akarar, ka shkaktuar reagime në Athinë.

Ministri turk i mbrojtjes Hulusi Akar, ka akuzuar Greqinë se shkel konventat ndërkombëtare lidhur me statusin e ishujve të detit Egje.

“Greqia shkel të drejtën ndërkombëtare me armatimin e ishujve të Egjeut, që janë vendosur nën një regjim të demilitarizuar”, deklaroi Akar për agjencinë zyrtare vendase, Anadolu Ajans.

“Athina duhet t’i ndërpresë këto shkelje që bien ndesh me konventat dhe nuk përputhem me marrëdhëniet e fqinjësisë së mirë e të miqësisë. Statusi i demilitarizuar i këtyre ishujve duhet të mbrohet dhe të vazhdojë”, shtoi ministri turk i mbrojtjes.

Akar shtoi gjithashtu se “pres nga homologu im grek, që të marrë masat e domosdoshme për këtë çështje në kuadër të raporteve tona të sinqerta, konstruktive dhe të mira”.

Turqia i mbështet pretendimet e saj në konventën e paqes të Lozanës, të vitit 1923.

Mirëpo Athina zyrtare përgjigjet se militarizimi i ishujve të Egjeut Lindor është vendosur me një sërë marrëveshjes ndërkombëtare të mëvonshme.

Ministri grek i mbrojtjes, Evangelos Apostolakis, ka komentuar se pretendimet e Turqisë nuk kanë asnjë bazë ligjore.

Ndërsa ministria e jashtme në Athinë reagoi me një deklaratë për shtyp.

“Shtrimi i çështjeve të tilla nga pala turke, madje në momentin që kërcënon me luftë, nuk i përgjigjet nivelit të marrëdhënieve që Greqia mëton të kultivojë me gjithë vendet fqinje”, thuhet në deklaratë.

“Turqia të respektojë edhe të drejtën ndërkombëtare, ashtu siç ajo ka efekt, dhe jo siç e interpreton në mënyrë arbitrare” Ankaraja, përfundon ministria e jashtme greke./abcnews.al

erdoganjpg-thumb-large.jpg
ad min23:50 | 28/03/2019

Presidenti i Turqisë Erdogan akuzon Perëndimin për luhatjet e lirës turke. Sipas  tij, ato janë një përpjekje për të manipuluar zgjedhjet administrative, një proces ku partia e kreut të shtetit rrezikon të humbasë bastionet kryesore, përfshirë Ankaranë dhe Stambollin.

Presidenti Recep Taip Erdogan ka deklaruar të enjten se është ai në krye të ekonomisë turke, teksa rriti presionin ndaj bankës qendrore të Turqisë për të shkurtuar normat e interesit, pavarësisht inflacionit me dy shifra dhe lirës së zhvlerësuar.

Për këtë të fundit Erdogan ka akuzuar Perëndimin me në krye Shtetet e Bashkuara, që sipas tij kanë ndërmarrë një operacion për t’i bërë kontrast Turqisë.

“Bëhet fjalë për një përpjekje manipulimi teksa Turqia ndodhet në një periudhë elektorale”, ka deklaruar Erdogan, tre ditë nga mbajtja e zgjedhjeve administrative.

Në këto zgjedhje, partia e presidentit, që qeveris Turqinë që prej vitit 2002, ka gjasa të pësojë humbje të mëdha për shkak të pakënaqësisë së krijuar mes votuesve si pasojë e situatës së rëndë ekonomike.

Ditën e enjte lira turke ra me 5 për qind kundrejt dollarit, pasi bankat nisën të ofronin sërish likuiditet, operacion ky që për ditë të tëra ishte ndaluar nga autoritetet me qëllim përforcimin e monedhës vendase.

“Kush është kryetar shteti tani? Është Taip Erdogan bashkë me 14 ministra. Jam unë në krye të ekonomisë turke”, ka thënë Erdogan në një miting elektoral të mbajtur në Ankara.

Sondazhet elektorale sugjerojnë se partia e tij mund të humbasë kontrollin e kryeqytetit dhe ndoshta edhe të Stambollit, qyteti më i madh i Turqisë ku Erdogan ka shërbyer si kryetar bashkie.

Kjo do të ishte një goditje e rëndë për një parti që ka udhëhequr ndër vite, edhe gjatë periudhës së lulëzimit të ekonomisë turke./abcnews.al

645x344-erdogan-tsipras-leaders-meet-comprehensively-review-turkey-greece-relations-1549387446591.jpg
ent ela23:00 | 05/02/2019

Kryeministri grek Aleksis Tsipras dhe presidenti turk Erdogan kanë lënë pas tensionet që kishin përfshirë dy vendet dhe kanë gjetur gjuhën e përbashkët për zgjidhjen e kontesteve dypalëshe. Në takimin e zhvilluar në Ankara, dy liderët e kanë vënë theksin në çështje si terrorizmi dhe emigracioni.

Greqia dhe Turqia duhet të krijojnë një klimë mirëbesimi dhe të avancojnë marrëdhëniet dypalëshe në çdo fushë. Të këtij mendimi u shprehën të martën në Ankara presidenti turk Recep Taip Erdogan dhe kryeministri grek Aleksis Tsipras. Në konferencën e përbashkët për shtyp, pas një takimi kokë më kokë që zgjati rreth 2 orë, dy liderët folën për një sërë çështjesh, që nga emigracioni deri tek terrorizmi.

“Si aleatë, ne duhet të bashkojmë forcat kundër terrorizmit, sidomos ndaj njësive paraushtarake kurde dhe lëvizjes Gylen”, deklaroi Erdogan, i cili preku edhe çështjen e 8 ushtarakëve turq që kanë kërkuar azil në Greqi.

“I tërheq vëmendjen vendit fqinj se ata janë të arratisur dhe përgjegjës për shumë vdekje”, vijoi Erdogan duke iu referuar viktimave të grushtit të shtetit të vitit 2016.

Nga ana e tij, kryeministri Tsipras falenderoi presidentin turk për mikpritjen dhe i mëshoi nevojës për një dialog të sinqertë mes dy vendeve.

“Dialogu ynë është i rëndësishëm jo vetëm për të ardhmen e popujve tanë, por për popujt e mbarë rajonit”, tha Tsipras. Sa i takon rastit të 8 ushtarakëve, kreu i qeverisë helene theksoi se ai ishte një “gjemb” në marrëdhëniet dypalëshe, njësoj sikurse ishte burgimi i dy ushtarëve grekë në Turqi.

“Greqia, si vend ku sundojnë rendi dhe ligji, duhet të respektojë vendimet e drejtësisë”, tha Tsipras. Pavarësisht dallimeve, shtoi ai, dy vendet duhet të përforcojnë bashkëpunimin në fushën e sigurisë. Kryeministri grek citoi bashkëpunimin dypalësh në vitet 2015-2016, kur kriza migratore arriti kulmin dhe kur për herë të parë dy vendet zgjidhën jo vetëm probleme të dorës së dytë, por edhe ato me rëndësi ndërkombëtare, siç ishte ajo e refugjatëve. Erdogan dhe Tsipras ranë dakord që në kuadër të klimës së re pozitive, të rikthejnë në tryezën e bisedimeve ministrat e Mbrojtjes dhe ata të Jashtëm, për të reduktuar tensionet dhe për të rikthyer besimin reciprok./abcnews.la

wo24-erdogan.jpg
ad min22:34 | 10/01/2019

E ndikuar nga Rusia, Turqia ka ndryshuar tërësisht gjeo-politikën e saj në Ballkan, duke devijuar aksin e marrëdhënieve tregtare nga trevat shqiptare në ato serbe. Në kuadër të kësaj prirjeje të re, Ankaraja ka miratuar një marrëveshje për tregtinë e lirë me Beogradin.

Parlamenti i Turqisë ka ratifikuar një marrëveshje për tregtinë e lirë me Serbinë, një lëvizje kjo që u mundëson produkteve serbe aksesin pa taksa në tregun turk. Lajmin e bëjnë të ditur mediat serbe të cilat citojnë ministrin e Tregtisë, Rasim Ljajiç.

Falë kësaj marrëveshjeje, Serbia do të mund të eksportojë çdo vit në Turqi rreth 5 mijë tonelata mish, 25 mijë tonelata vaj luledielli, 10 mijë tonelata të tjera vaji të përpunuar, 15 mijë tonelata fara luledielli, 5 mijë tonelata sojë, 1 mijë tonelata produkte për ushqimin e kafshëve dhe 500 tonelata të tjera produkte ushqimore.

“Marrëveshja i lejon Serbisë të dyfishojë kuotën e eksporteve me Turqinë”, ka deklaruar ministri Ljajiç, që është shprehur optimist se akordi i arritur mes Beogradit dhe Ankarasë do të shërbejë si shtysë për thellimin e bashkëpunimit dypalësh në të ardhmen.

Sipas zyrtarit serb, vetëm në vitin 2018, të ardhurat nga shkëmbimet tregtare mes dy vendeve kaluan shifrën e 1 miliard eurove. Bëhet fjalë për një ndryshim radikal në politikën e jashtme të Turqisë, që më parë ishte e prirur të investonte në trevat shqiptare.

E gjitha kjo ndodh kur vendi është më shumë se kurrë nën ndikimin e Moskës, me të cilën e pati shumë të vështirë të pajtohej pas rrëzimit në nëntor të vitit 2015 të një avioni ushtarak rus që kishte hyrë në hapësirën ajrore turke. Episodi përkeqësoi marrëdhëniet dypalëshe, por që nga ripërtëritja e tyre aleanca Turqi-Rusi duket e padiskutueshme.

Dhe në fakt, ministri serb Ljajiç në njoftimin e tij ka saktësuar se marrëveshja është arritur në kuadër të negociatave mes vendeve të Unionit Euro-aziatik, ku veç Serbisë bëjnë pjesë Rusia, Bjellorusia, Kazakistani, Armenia dhe Kirgizstani. Grupimi në fjalë nisi të enjten samitin e radhës në Beograd, që do të kulmojë me vizitën e presidentit rus Vladimir Putin më 17 Janar./abcnews.al

wo24-erdogan.jpg
ad min19:49 | 25/12/2018

Pas vendimit të presidentit amerikan Donald Tramp për tërheqjen e trupave ushtarake nga Siria, një delegacion amerikan do të udhëtojë në Turqi këtë javë për koordinimin e tërheqjes nga Siria. Ky vendim i Trump në lidhje me Sirinë, i dha një tjetër frymë raporteve të tensionuara së fundi mes Uashingtonit dhe Ankarasë.

Presidenti turk Erdoan ftoi homologun e tij amerikan Donald Trump që të vizitojë Turqinë në vitin 2019, ndërsa Ankara dhe Uashingtoni forcojnë marrëdhënien mes tyre për të koordinuar tërheqjen e parashikuar të trupave amerikane ushtarake nga Siria. Lajmi është konfirmuar nga Shtëpia e Bardhë. Ndërkohë presidenti amerikan në një mesazh në profilin e tij në Tuiter bën të ditur se aktualisht është përqendruar në krijimin e ekipit të punës për Korenë e Veriut. Kreu i Shtëpisë së Bardhë shkruan se janë shënuar progrese në pritje të takimit të rradhës me Kim Jong Un.
Edhe pse nuk është përcaktuar ende diçka zyrtarisht, Tramp është më se i gatshëm për një takim të tillë në të ardhmen, konfirmoi zëdhënësi i ekzekutivit amerikan. Ndërkohë një delegacion amerikan do të udhëtojë në Turqi këtë javë për koordinimin e tërheqjes nga Siria.

Të dielën pas një bisede telefonike mes Tramp e Erdogan, presidenca turke konfirmoi se dy liderët kanë pranuar të koordinojnë ushtarët, diplomatët dhe liderë të tjerë të vendeve të tyre për të shmangur një boshllëk pushteti që mund të shfrytëzojë largimin e SHBA nga vendi si dhe fazën e tranzicionit në Siri.
Turqia dërgoi të hënën përforcime të reja ushtarake në kufi me Sirinë./abcnews.al

ARABIA-KHASHOGGI-ABC-M1-T2.mpg_snapshot_00.25.jpg
ad min23:45 | 15/11/2018

Kryeprokurori i Arabisë Saudite ka njoftuar se gazetari Jamal Khashoggi është vrarë fillimisht me mbidozë drogë e më pas është copëtuar. Al Moxheb tha se i ka dorëzuar autoriteteve të Ankarasë, idenditetin e një agjenti turk që është marrë me zhdukjen e trupit.

Jamal Khashoggi është helmuar me një dozë vdekjeprurëse droge dhe trupi i tij është copëtuar duke e nxjerrë jashtë konsullatës saudite në Stamboll të Turqisë. Kjo është konfirmuar nga kryeprokurori i Arabisë Saudite, Saud al Mojeb në një deklaratë për televizionin shtetëror. Trupi i gazetarit të vrarë, shkruan Al Arabiya, “I është dorëzuar një agjenti të sigurisë turke jashtë selisë konsullore”. Mësohet se Rijadi i ka dorëzuar Anklarasë “një skicë sinjalizuese të agjentit turk që ka marrë jashtë konsullatës kutinë me trupin e shpërfytyruar. Sipas asaj që ka deklaruar prokurori, ai që ka dhënë urdhërin për vrasjen e Khashoggi-t ishte shefi i ekipit të Rijadit të dërguar në Stamboll për ta riatdhesuar gazetarin në Arabinë Saudite.

Megjithatë ky version nuk është u besueshëm dhe i pranueshëm nga qeveria e Ankarasë. Turqia pretendon dhe është e bindur që urdhëri për vrasjen brutale është dhënë nga princi trashëgimtar i kurorës, Mohammed Bin Salman. Një gjë e tillë është konfirmuar edhe nga vetë presidenti Rexhep Tajip Erdogan, i cili tha se për këto akuza bazohet në regjistrimet audio të kryera gjatë ekzekutimit. Mediat ndërkombëtare kanë raportuar më herët se në audio-regjistrimin e dëgjuar nga drejtuesja e CIA-d, Gina Haspel, dëgjohet një nga vrasësit teksa kërkon që të njoftohet shefi se misioni u përmbush me sukses. Shefi në fjalë besohet të jetë Mohammed bin Salman./abcnews.al

tsipras-erdogan-thumb-large.jpg
ad min16:30 | 01/09/2018

E rrënuar ekonomikisht nga sanksionet financiare amerikane, Turqia vijon përpjekjet diplomatike për të përmirësuar marrëdhëniet me Europën. Apeli i fundit i është drejtuar Greqisë, me të cilën Ankaraja kërkon një kapitull të ri marrëdhëniesh dypalëshe.

Turqia ka bërë thirrje për nisjen e një kapitulli të ri në marrëdhëniet diplomatike me Greqinë, edhe pse e ka akuzuar sërish vendin fqinj se është kthyer në strehë për kriminelët turq. Ankaraja zyrtare i referohet rastit të 8 komandove turq që kanë kërkuar azil në Greqi pasi u arratisën me helikopter pas grushtit të shtetit të vitit 2016. Qeveria turke i konsideron ushtarakët kriminelë të përfshirë në përpjekjen për rrëzimin e presidentit Erdogan dhe i ka kërkuar Athinës që t’i dorëzojë ata.

Por deri më tani, gjykatat helene e kanë hedhur poshtë kërkesën. “Situata aktuale e marrëdhënieve dypalëshe nuk sjell asnjë përfitim për vendet tona. Ngritja e besimit është e rëndësishme, ndaj dhe duhet të hapim një kapitull të ri marrëdhëniesh”, ka deklaruar ministri i Jashtëm Mevlut Çavushoglu. Në një intervistë për numrin e së shtunës të gazetës “Ta Nea”, Çavushoglu ka nënvizuar se palët duhet të vijojnë bisedimet dypalëshe pa kushte. “Kjo është e vetmja mënyrë për të zgjidhur problemet tona”, ka thënë shefi i diplomacisë turke.

Sa i takon rastit të komandove, ai ka akuzuar sistemin gjyqësor greke se ka vepruar ndesh me ligjin ndërkombëtar, duke lënë të lirë fajtorët dhe shkelur të drejtat e viktimave. “Ne mbetemi të vendosur në përpjekjet tona për t’u siguruar që përgjegjësit e grushtit të shtetit të ekstradohen dhe të përballen me drejtësinë në Turqi”, ka shtuar Çavushoglu. Rivalë historikë, dy vendet fqinje përplasen për një sërë çështjesh, më të rëndësishmet prej të cilave janë Qiproja i ndarë etnikisht dhe të drejtat territoriale në detin Egje./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono