anije

ITALI-BE-ANIJA.mpg_snapshot_00.29-1280x720.jpg
ent ela21:10 | 12/09/2019

Italia ka ndryshuar qasje ndaj emigrantëve me daljen jashtë loje të kreut të ekstremistëve Mateo Salvini. Qeveria e re në Romë ka arritur një marrëveshje me vendet e BE-së për ndarjen e emigrantëve që ndodhen në një anije që po i afrohet ishullit të Lampeduzës.

Qeveria italiane deklaroi të enjten se ka arritur një marrëveshje me vendet e BE-së për të ndarë emigrantët që ndodhen në një anije në detin Mesdhe. Bëhet fjalë për marrëveshjen e parë, që do të shërbejë si një test për marrëdhëniet e reja mes Romës dhe Brukselit. Anija “Ocean Viking”, që ka në bord 82 persona të shpëtuar në operacione të ndryshme, ka bërë kërkesë për një port për të ankoruar. Qeveria e Xhuzepe Konte që u betua javën e kaluar ka premtuar një ndryshim të qasjes kundrejt emigrantëve krahasuar me atë të administratës së mëparshme, që në ndikimin e Mateo Salvinit zgjidhte politikën e porteve të mbyllura. Duke folur pas një takimi me ministrat e tij ditën e enjte, kryeministri Konte tha se vende të ndryshme të BE-së kanë pranuar të marrin emigrantët. Marrëveshja u vlerësua edhe nga kryetari i Partisë Demokratike të majtë, Nikola Xingareti, i cili e cilësoi një “akord pozitiv”, të arritur falë përfshirjes së vendeve të tjera të BE-së. Anija “Ocean Viking” aktualisht ndodhet mes Maltës dhe ishullit italian të Lampeduzës. Emigrantët në bord janë të gjithë afrikanë dhe mes tyre janë edhe 17 fëmijë. Linja e ashpër e Salvinit ndaj emigracionit i dha popullaritet partisë së tij Liga e Veriut, që muajin e kaluar u tërhoq nga koalicioni me Lëvizjen 5 Yjet, në përpjekje për të shkuar në zgjedhje të parakohshme. Por marrëveshja e 5 Yjeve me Partinë Demokratike çoi në krijimin e qeverisë së re. /ABC News Albania 24/7

 

anije.jpg
ad min23:50 | 02/09/2019

Të paktën 4 persona kanë vdekur dhe 30 të tjerë konsiderohen të humbur në Kaliforni, pasi varka me të cilën po udhëtonin u shkatërrua nga një zjarr që ra në bord. Sipas mediave amerikane, 5 nga 39 persona që ndodheshin në mjetin lundrues u shpëtuan nga roja bregdetare.

Autoritetet kanë refuzuar të flasin për një bilanc të saktë viktimash, por dyshohet që numri i tyre të jetë i lartë. Zjarri ra teksa varka po lundronte në afërsi të ishullit Santa Kruz, në orët e para të mëngjesit me orën lokale.

Aktualisht anija është e zhytur dhe operacionet e kërkim-shpëtimit janë në zhvillim e sipër, por po hasin vështirësi për shkak të mjegullës. Të dhënat mediatike sugjerojnë se disa prej pasagjerëve mund të kenë mbetur të bllokuar nën kuvertën e anijes.

Ndërkohë, ata që shpëtuan thuhet se kanë fjetur në kabinën kryesore të mjetit dhe jo në ato poshtë. Ata ishin zgjuar përpara mbërritjes së skuadrave të shpëtimit dhe ishin hedhur nga varka në ujë për t’u shpëtuar flakëve./ABC News Albania 24/7

download-2.jpg
ad min19:15 | 04/08/2019

Policia Kufitare e Vlorës dhe forcat “Delta” i vijnë në ndihmë në zonën e Karaburunit një turisti italian i cili kishte nevojë për ndihmë mjekësore.

Falë transportimit të shpejtë për në spital, me mjetin lundrues të forcave “Delta”, turisti italian është jashtë rrezikut për jetën.

Mesditën e sotme salla operative e Drejtorisë Vendore për Kufirin dhe Migracionin Vlorë, është njoftuar me telefon nga kapiteni i një anijeje turistike që ndodhej në zonën e Karaburunit në Shënvasil, se kishte nevojë për ndihmë mjekësore për një turist italian që ndodhej në anije, i cili duhej transportuar për në spital në një kohë sa më të shpejtë.

Menjëherë në ndihmë të turistit ka shkuar në kohë mjeti lundrues i forcave “Delta” që ishte me shërbim në atë zonë dhe ka transportuar shtetasin E.U, 59 vjeç për në Porti e më pas me autoambulancën e spitalit të Vlorës.

Turisti Italian E. U., pas ndihmës së parë mjekësore në spitalin e Vlorës, kaloi rrezikun për jetën dhe në këto momente ndodhet në gjendje të mirë shëndetësore.

Shtetasi E.U., falënderon Policinë Kufitare, forcat “Delta” dhe ekipin mjekësor që i erdhën në ndihmë.

belgjike-ostende.jpg
ad min09:19 | 18/06/2019

Dy persona janë arrestuar nga autoritetet belge pasi dyshohen se do të trafikonin nëntë shqiptarë. Sipas asaj që shkruajnë mediat, ata u zbuluan të premten gjatë kohës që po lundronin në brigjet e Belgjikës pranë Ostendes.

Gjykatësi i çështjes urdhëroi që dy personat, identitetet e të cilëve nuk bëhen publike, të arrestohen për trafikim të qenieve njerëzore. Sipas prokurorit Frank Demeester, viktimat ishin në një situatë të pasigurt dhe jetët e tyre ishin në rrezik. Gjithashtu ata do të nisin një hetim rreth organizatës kriminale.

Roja Bregdetare mori njoftimin të premten në darkë se një varkë kishte probleme me motorin. Menjëherë në ndihmë shkuan një varkë shpëtimi dhe policia kufitare. Ata raportuan se në bord ndodheshin nëntë persona, të cilët pretendonin se ishin me origjinë shqiptare.

Prokurori pretendon se ata po i drejtoheshin Mbretërisë së Bashkuar. “Brussels Times” raporton se kjo është një mënyrë shumë e përdorur nga emigrantët për të arritur në Britaninë e Madhe./abcnews.al

ships.jpg
ad min21:43 | 13/06/2019

Dy anije tregtare që transportonin naftë kanë shpërthyer në Gjirin e Omanit. Incidenti ndodh në një kohë tensionesh të thelluara mes Shteteve të Bashkuara dhe Iranit, duke bërë që të aludohet për shpërthime të qëllimshme.

Dy anije cisternë që transportonin naftë kanë shpërthyer në Gjirin e Omanit, për fat të mirë pa shkaktuar humbje në radhët e ekuipazheve. Autoritetet iraniane deklaruan se shpëtuan të gjithë personat që udhëtonin në dy anijet tregtare, 21 në japonezen “Kokuka” dhe 23 në norvegjezen “Front Alteir”.

Shtetet e Bashkuara kontestuan lajmin e Republikës Islamike, duke deklaruar se ishte marina amerikane që u erdhi në ndihmë ekuipazheve, të cilat kishin braktisur mjetet lundruese.

Ende nuk dihet se çfarë shkaktoi shpërthimet, por ato vijnë në një kohë tensionesh të larta mes Teheranit dhe Uashingtonit. Një zyrtar iranian deklaroi për BBC se, Irani nuk ka gisht në këtë incident.

“Është dikush që po përpiqet të destabilizojë marrëdhëniet e Iranit me komunitetin ndërkombëtar”, tha zyrtari në kushte anonimati.

Incidenti i ndodhur në një nga akset detare më të rëndësishme në botë për tregtinë e naftës vjen një muaj pasi 4 anije cisternë u sulmuan kur ndodheshin në ujërat pranë Emirateve të Bashkuara Arabe.

Asnjë grup nuk mori përsipër përgjegjësinë për këtë incident, që gjithashtu nuk shkaktoi viktima. Asokohe, Shtetet e Bashkuara fajësuan Iranin për episodin, akuza të cilat u hodhën poshtë nga Teherani. Ndërkohë, pas incidentit të së enjtes, çmimet e naftës u rritën me 4 për qind./ABC News Albania 24/7

blendi-klosi-1.jpg
ad min16:02 | 05/06/2019

Në çeljen e sezonit turistik të Sazanit dhe Karaburunit ku i pranishëm ishte ministri Blendi Klosi është inauguruar edhe investimi për anijet të cilat do të transportojnë turistët e huaj drejt këtyre destinacioneve. Klosi deklaroi se çdo investim i tillë është një orientim për turizmin.

Në 5 Qershor ditën ndërkombëtare të mjedisit, ministri i Turizmit Blendi Klosi mori pjesë në çeljen e sezonin turistik në Sazan dhe Karaburun. Këtë verë ka një rritje të kapaciteteve turistike si janë anijet të cilët do të lundrojnë drejt këtyre destionacioneve, tha Klosi.

“Për të hapur një destinacion këtë sezon turistik që është Sazani dhe Karaburuni, duke inauguruar një investim spektakolar të një anije private e cila do bëjë këtë pjesë të biznesit turistik të gjirit të Vlorës duke shënuar kështu një nga detyrat që kemi në kuadër të strategjisë së turizmit”, tha Klosi.

Ai  pranoi se për shkak të situatës politike janë anuluar edhe prenotime nga turistët, por janë në numër të ulët, pa ndikim të madh.

“Mendoj që jemi në një sezon, i cili po fillon shumë mirë dhe që do të realizojë padyshim shifrat e vitit 2018. Në qofë se do të kishim më shumë atmosferë pë zhvillimin e turizmit, ky sezon do ishte një spektakël i vërtetë”, tha Klosi.

Destinacionet më të kërkuara për verën e këtij viti nga turistët e ardhur nga Polonia, Rusia, Çekia, por dhe Bjellorusia janë Sazani dhe Karaburuni./ABC News Albania 24/7

16216551_303.jpg
ad min08:14 | 20/05/2019

Komisariati i OKB për Refugjatë ka kërkuar me ngulm nga Bashkimi Evropian që të ndalojë kthimin e refugjatëve nga Deti Mesdhe në Libi, me shpjegimin, se situata e tyre në këtë vend është tepër e rëndë. UNHCR mendon se duhet parandaluar me të gjitha mjetet që refugjatët të kthehen në Libi, në kampet e atjeshme. “Njerëzit që shpëtohen në Detin Mesdhe nga rojet bregdetare, nuk duhet të kthehen kurrsesi në Libi”, tha drejtori i UNHCR në Gjermani, Dominik Bartsch, për gazetën “Welt am Sonntag”. “Duhen ndërmarrë të gjitha masat e mundshme për të parandaluar një gjë të tillë, me qëllim që të evitohen vuajtjen e njerëzve në këto qendra në Libi.”

Gjendja e refugjatëve dhe migrantëve në Libi, sipas tij, është keqësuar edhe më shumë kohët e fundit. “Gjendja humanitare dhe situata e njerëzve në kampet e Libisë është e mjerueshme. Nuk ka ushqime dhe ujë, ndërkohë që shumë prej tyre kanë nevojë urgjente për ndihma mjekësore. Këtu duhet shtuar edhe fakti që në kryeqytetin Tripoli ka dhe shumë grupe të rrezikshme të armatosura.” UNHCR ka arritur që deri tani të shpëtojë rreth 800 persona nga këto kampe. Kapacitetet e tyre janë të limituara. “Edhe 3300 refugjatë kanë frikë për jetën në këto kampe”, tha përfaqësuesi i UNHCR.

Kërkesa ndaj BE

Bartsch i ka bërë thirrje qeverive të BE që të ndihmojnë, të mos keqpërdorin dhe kriminalizojnë këtë problem për qëllime të veta. “Kufizimet juridike dhe logjistike duhet të pezullohen, sepse dhjetëra mijëra njerëz janë të rrezikuar. Ata po mbijetojnë vetëm duke i falënderuar punës së organizatave joqeveritare.” Vendet e BE duhet të ndihmojnë urgjentisht, tha Bartsch.

Një anije e organizatës gjermane të ndihmës, Sea-Watch u konfiskua nga autoritetet italiane, që i morën 47 refugjatët nga bordi dhe i dërguan në ishullin Lampeduza. Zëdhënësi i organizatës, Ruben Neugebauer kishte thënë më parë, se gjendja në këtë anije ishte keqësuar dhe se kërcënonte “rreziku i vetëvrasjeve”. Në anije kishte fëmijë dhe të sëmurë.

Ministri djathtist i Brendshëm i Italisë Matteo Salvini kishte thënë se limanet e këtij vendi nuk do ta pranojnë anijen “Sea-Watch 3”./DW

F9374F32-2A8E-4330-9C67-39C0467EAA02_cx15_cy0_cw76_w408_r1_st.jpg
ad min08:00 | 08/05/2019

Ushtria amerikane thotë se do të dërgojë një anije ushtarake – spital në rajonin e Venezuelës, treguesi më i fundit i përfshirjes më të madhe të SHBA në krizën që ka përfshirë vendin e Amerikës së Jugut.

Një zyrtar i Pentagonit i tha Zërit të Amerikës se anija – spital e USNS Comfort “do të dislokohet në ujërat e Amerikës Jugore javët e ardhshme”. Zyrtari tha se anija Comfort do të jetë në një “dislokim standard, që do të përfshijë kujdesin për refugjatët venezuelianë”.

Zyrtarët amerikanë kanë thënë kohët e fundit se po konsiderojnë opsionin ushtarak në Venezuelë, ndërsa SHBA intensifikojnë presionin diplomatik dhe ekonomik në vendin e pasur me naftë.

SHBA kanë njohur Asamblenë Kombëtare dhe kreun e opozitës Juan Guaido si president i përkohshëm i Venezuelës dhe i kanë bërë thirrje Presidentit Nicolas Maduro të japë dorëheqjen./VOA

lundrimi-1280x703.jpg
ad min09:30 | 12/03/2019

Era e fortë shoqëruar me det të dallgëzuar mban të pezulluar lundrimin e anijeve të tonazhit të mesëm e ulët në portin e Durrësit. Përkeqësimi i kushteve atmosferike që përfshiu gjirin e Durrësit pas mesnate solli vështirësi edhe në lundrimin e anijeve të peshkimit si dhe në përpunimin e mallrave në kalatën katër dhe pesë të portit detar.

Forca e detit shkon deri 6 ballë, ndërsa shpejtësia erës në 24 kilometra për sekondë, çka sipas Drejtorisë së Përgjithshme Detare e bën të pafavorshëm lundrimin e disa prej anijeve në det. Për këtë arsye u është kërkuar operatorëve në portin e Durrësit që të bëjnë kujdes në 24 orët e fundit pasi era në orët në vijim do të rrisë intensitetin e saj. /abcnews.al

190121132622-01-kerch-strait-ship-fires-0121-exlarge-169.jpg
ent ela22:02 | 21/01/2019

Dy anije që lundronin në detin e Zi janë përfshirë papritur nga flakët, që u kanë marrë jetën të paktën 10 marinarëve. Ngjarja ka ndodhur në zonën detare të kontestuar mes Rusisë dhe Ukrainës.

Të paktën 10 persona kanë humbur jetën si pasojë e një zjarri që përfshiu dy anije tregtare që lundronin në detin e Zi, në afërsi të ngushticës së Kerçit. Sipas agjencive ruse të lajmeve, zjarri ka rënë fillimisht në një anije-cisternë që po transportonte gaz të lëngshëm dhe më pas ka përfshirë anijen e dytë, e cila po furnizohej me karburant nga cisterna. Anijet rezultojnë njëra nga Turqia, me 17 marinarë në bord dhe tjetra nga India me 14 marinarë. Disa prej tyre u hodhën në det për t’u shpëtuar flakëve dhe ekipe të marinës ruse janë vënë në kërkim të tyre, duke shpëtuar të paktën 14 vetë. Nga të dhënat paraprake rezulton se dy mjetet po lundronin në ujëra neutrale të Ngushticës së Kerçit, e kontestuar mes Rusisë dhe Ukrainës. Zona detare në fjalë ndodhet pranë gadishullit të Krimesë, të cilin Moska e aneksoi në vitin 2014 dhe ku në nëntor marina ruse sekuestroi tre anije ukrainase dhe arrestoi 24 marinarët që ndodheshin në bord. Sërish vitin e kaluar, një gjykatë ruse zgjati me 3 muaj burgimin për marinarët, duke shkaktuar reagimin e Kievit zyrtar dhe Perëndimit, që më kot i kërkuan Kremlinit lirimin e tyre./abcnews.al

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono