Angela Merkel

1A772FF2-F47F-42D6-9CBD-11B7B7E17F33_cx0_cy1_cw0_w1023_r1_s.png
Sej rie20:00 | 13/07/2019

Një analist me përvojë i Ballkanit thotë se një marrëveshje gjithëpërfshirëse mes Kosovës dhe Serbisë, nuk mund të mos ta ketë elementin territorit. James Hooper, ish-zyrtar i Departamentit të Shtetit, në një intervistë për Zërin e Amerikës kritikoi kancelaren gjermane Angela Merkel dhe kryeministrin e Kosovës, Ramush Haradinaj, pasi siç tha ai bllokuan një marrëveshje të mundshme pa pasur një alternativë. Në bisedën me kolegen Keida Kostreci, zoti Hooper tha se situata e krijuar kërcënon stabilitetin dhe se Shtetet e Bashkuara e kanë vullnetin të angazhohen por duan të shohin perspektivën për një zgjidhje.

Zëri i Amerikës: Zoti Hooper, procesi i negociatave mes Prishtinës dhe Beogradit ka ngecur për një kohë të gjatë dhe një nismë e Gjermanisë dhe Francës për të ripërtërirë procesin dështoi. Çfarë ndodh më tej? Cila mendoni se është rrugëdalja?

 James Hooper: Tani duhet të presim të shohim a do të ketë një zgjidhje, sepse ka tre alternativa mes Kosovës dhe Serbisë. Nëse duan një marrëveshje, e vetmja mundësi është ajo e një marrëveshjeje gjithëpërfshirëse. Nuk besoj se ka asnjë shans për një marrëveshje graduale ose të pjesshme. Marrëveshja e zonjës (Catherine) Ashton kur ishte shefe e politikës së jashtme të BE-së, ishte e pjesshme dhe graduale dhe asnjëra nga palët nuk e zbatoi atë plotësisht. Shoqata e komunave serbe parashikohej nga marrëveshja dhe nuk u zbatua, nuk u pranua, u bë shumë e debatueshme në Kosovë, ku u pa si një mënyrë për Beogradin të ndërhynte në politikën e Kosovës. Unë e lexoj moszbatimin e marrëveshjes si fundin e perspektivës për ndonjë marrëveshje të pjesshme. Kjo është një nga realitetet e vështira që unë kam kuptuar nga negociatat e viteve të fundit, veçanërisht vitin e fundit dhe muajt e fundit. Presidentët Thaçi dhe Vuçiç po negocionin një marrëveshje gjithëpërfshirëse dhe arsyeja që ajo dështoi ishte në fakt jo se serbët dhe shqiptarët nuk mund të binin dakord, në fakt ishin shumë pranë marrëveshjes. Sigurisht duheshin sqaruar disa detaje por në përgjithësi, për konceptin e përgjithshëm kishin rënë dakord. Problemi ishte se populli i Kosovës nuk donte të pranonte një shkëmbim territori si pjesë të një marrëveshjeje gjithëpërfshirëse. Po ashtu as Gjermania, zonja Merkel nuk donte ta pranonte dhe kështu e bllokoi. Unë i kuptoj shumë mirë ndjeshmëritë që mund të kenë gjermanët për paprekshmërinë e kufijve dhe territorit, që vijnë nga Lufta e Dytë Botërore dhe Lufta e Ftohtë, por kjo nuk funkisonon në Ballkan, atje është ndryshe. …

Zëri i Amerikës: Çfarë nuk funksionon?

James Hooper: Nuk kishte kufi mes Kosovës dhe Serbisë. Ishte një kufi i brendshëm që është zhvendosur dhe ndryshuar brenda Jugosllavisë, nuk ishte një kufi i jashtëm mes dy vendesh, kështuqë kufiri i jashtëm duhej të caktohej dhe për të duhet të arrihej marrëveshje. Sipas mendimit tim, suksesi që pati zoti Haradinaj për ta bllokuar këtë në Kosovë, përmes tarifave dhe suksesi që pati kancelarja Merkel – dhe mendoj që kundërshtimi i saj ishte më vendimtar sesa ai i zotit Haradinaj – për ta bllokuar, do të thotë se Evropa, Bashkimi Evropian, ose më saktë Gjermania nuk është e gatshme të pranojë këmbime territori, si çmim për një marrëveshje gjithëpërfshirëse mes Kosovës dhe Serbisë. Pra realiteti i parë i vështirë është se nuk ka më vend për marrëveshje të pjesshme, graduale. Së dyti, nëse marrëveshja duhet të jetë gjithëpërfshirëse, meqenëse nuk mund të ketë një të tillë të pjesshme. Për ta arritur atë – dhe kjo nuk është pranuar, megjithëse është pranuar nga Presidentët Thaçi dhe Vuçiç – duhet të ketë një këmbim territori. Ky është realiteti. Unë e kuptoj kur shqiptarët e Kosovës, paraqesin kërkesat e tyre maksimale dhe thonë se nuk duan ta pranojnë, por kjo do të thotë se nuk do të ketë marrëveshje dhe mendoj që ajo që bëri zonja Merkel që mendoj se ishte bërë me një koordinim, të paktën de facto, sepse duket se ka ngjashmëri mes veprimeve të tyre, mes bllokimit nga brenda të një marrëveshjeje gjithëpërfshirëse nga ana e zotit Haradinaj në Kosovë, dhe bllokimit në Berlin në nivelin evropian nga kancelarja Merkel. Përshtypja ime është që ata nuk i kuptojnë këto realitete. Dhe nëse unë nëse nuk ka vend për një marrëveshje të pjesshme dhe nuk duan të paguajnë çmimin e shkëmbimit të territoreve për një marrëveshje gjithëpërfshirëse, realiteti i tretë është që rrjedhimisht do të ketë dhunë dhe flas këtu mes Kosovës dhe Serbisë. Ato do të fillojnë të rrëshqasin gradualisht dhe papritur do të shpërthejë dhuna.

Sepse Serbia është një shoqëri shumë nacionaliste dhe siç po shohim edhe Kosova është shoqëri nacionaliste, po të kesh parasysh mbështetjen që pati zoti Haradinaj. Kur ke nacionalistë të fortë nga të dyja anët, mundësia për dhunë rritet në mënyrë të konsiderueshme, sepse ka më pak aftësi që njerëzit të ushtrojnë vetëpërmbajtje. Gjëja kryesore që unë kritikoj është se kancelarja Merkel dhe kryeministri Haradinaj, bllokuan një marrëveshje gjithëpërfshirëse pa pasur një alternativë tjetër nga ana e tyre.

Zëri i Amerikës: Beogradi kushtëzon rifillimin e bisedimeve me heqjen e tarifave të Kosovës ndaj mallrave serbe. Prishtina ngul këmbë se nuk do ta bëjë këtë derisa Serbia nuk ndryshon qasjen ndaj shtetësisë së Kosovës. Si mund të zgjidhet ky ngërç?

James Hooper: Duket se kryeministri Haradinaj do që Serbia të japë që në fillim të negociatave atë për të cilën duhet rënë dakord në fund. Ai e di që nuk ka asnjë shans që Serbia ta pranojë këtë. Kjo nuk do të ishte negociatë, do të ishte thjesht paraqitje e kërkesës maksimale (nga ana e Kosovës). Është një përpjekje për bllokim negociatash dhe për të penguar marrëveshjen. Çështja shtrohet se si t’i çosh përpara negociatat dhe të arrish një marrëveshje mes Kosovës dhe Serbisë, që unë mendoj se do ta rriste konsiderueshëm sigurinë e Kosovës, në një botë që është bërë më e rrezikshme vitet e fundit.

Zëri i Amerikës: Në një intervistë për Zërin e Amerikës para disa kohësh ju thatë se çështja e tarifave i ka dëmtuar rëndë marrëdhëniet mes Prishtinës dhe Uashingtonit. Nga ana tjetër, Presidenti Thaçi ka thënë se nuk mund të ketë negociata pa angazhimin e Shteteve të Bashkuara. Si mund të bashkëekzistojnë këto dy realitete?

James Hooper: Mendoj se Shtetet e Bashkuara janë të gatshme të luajnë një rol shumë aktiv për të ndihmuar Kosovën dhe Serbinë të arrijnë një marrëveshje gjithëpërfshirëse. Dhe mendoj se e ka bërë këtë. Ndihmës Sekretari (në detyrë) Reeker ishte në takimin e nivelit të lartë të Bratislavës dhe ka qenë shumë i angazhuar në proces dhe mendoj se Shtetet e Bashkuara ishin të gatshme të ishin plotësisht të angazhuara për të lehtësuar negociatat dhe për t’i dhënë fund këtij problemi. Kur nuk ka shpresë më për një marrëveshje të gjerë, apo për përparim, nuk është se Shtetet e Bashkuara e harrojnë Kosovën, por kjo çështje bie në listën e përparësivë, bëhet më pak e rëndësishme dhe qeveria amerikane i kushton më pak rëndësi Kosovës. Dhe Kosova kishte më shumë për të humbur se Serbia nuk kishte marrëdhënie të afërt me Shtetet e Bashkuara.

Zëri i Amerikës: Presidenti Donald Trump u ka bërë thirrje dy vendeve që të arrijnë një marrëveshje sa më parë që të jetë e mundur. A mendoni se ekziston ende mundësia për një marrëveshje deri në fund të vitit?

James Hooper: Jo. Sipas gjykimit tim nuk do të ketë marrëveshje gjithëpërfshirëse deri në fund të vitit 2019. Koha më e hershme që kjo mund realizohet është viti 2020. Jam shumë i shqetësuar se vdekja e kësaj marrëveshjeje specifike për të cilën zoti Vuçiç dhe zoti Thaçi kishin rënë dakord, shkaktuar nga kancelarja Merkel dhe kryeministri Haradinaj, asgjësoi perspektivën për një marrëveshje gjithëpërfshirëse. Vështirësia tanë është nëse është e mundur që të ringjallet një marrëveshje gjithëpërfshirëse, që të shfaqet një alternativë që ta pranojnë të dyja palët. Vështirësia tani është që të mbahet gjallë koncepti i një marrëveshjeje të gjerë që të përfshijë shkëmbim territori. Realiteti për Kosovën është që nëse nuk ka një element territorial, nuk do të ketë një marrëveshje gjithëpërfshirëse. Dhe nuk besoj që në Kosovë kanë arritur në pikën që ta pranojnë një gjë të tillë.

Zëri i Amerikës: Të dy presidentët, Hashim Thaci dhe Aleksandër Vucic janë në pushtet për një kohë të gjatë dhe nuk arritën të sigurojnë një marrëveshje. Kur nuk kanë qenë në gjendje ta bëjnë këtë deri tani, pse do të mendohej që tani mund të jenë në gjendje?

James Hooper: Unë mendoj se zoti Vuçiç dhe zoti Thaçi kanë arritur shumë. Ata kanë kapërcyer barrierat e komunimit mes Kosovës dhe Serbisë në nivelin zytar. Ata kanë kanalet e veta të komunikimit. Ata kanë qenë në shumë takime bashkë dhe ky nuk është sekret. Kanë pasur rast, të flasin, të kuptojnë njëri-tjetrin të shohin se ç’perspektivë ka pala tjetër, të shohin se çfarë u duhet të bëjnë për të realizuar një marrëveshje. Mendoj se ata kanë arritur mjaft mirëkuptim dhe kjo është një arritje e jashtëzakonshme. Ata nuk u mjaftuan me kaq. E përdorën këtë mirëkuptim për të arritur një marrëveshje me ndërmjetësimin e zonjës Ashton, dhe për të parandaluar shkallëzime, si edhe në përpjekje për marrëveshjen gjithëpërfshirëse. Arsyeja që nuk e arritën ishte se Gjermania bllokoi zotin Vuçiç dhe zoti Haradinaj bllokoi zotin Thaçi. Mendoj se ishte një arritje e madhe dhe u bllokua nga BE-ja. Dhe kjo është e jashtëzakonshme. Kur të shkruhet historia e kësaj periudhe, njerëzit do të shohin se çfarë zhvillimi i jashtëzakonshëm ishte ky, që Bashkimi Evropian bllokoi një marrëveshje të tillë./VOA

danish.jpg
G. P.23:37 | 11/07/2019

Kancelarja Merkel e ka kaluar e ulur ceremoninë e radhës për të pritur një kryetar shteti, një ditë pasi përjetoi sërish dridhje trupore. Të enjten ajo u shfaq e qeshur përkrah kryeministres daneze, por ndërkohë u përball edhe me një presion në rritje mbi gjendjen e saj shëndetësore.

Kancelarja gjermane Angela Merkel qëndroi ulur të enjten teksa ndoqi një ceremoni publike të mbajtur në nder të kryeministres daneze Mete Frederiksen, që vizitoi Berlinin.

Merkel ndoqi nga karrigia e saj ceremoninë e shoqëruar nga nderime ushtarake, një ditë pasi pësoi sërish dridhje trupore teksa priste kryeministrin finlandez Anti Rine.

Për fat të mirë, këtë herë Merkel nuk shfaqi shenja shqetësuese dhe dhuroi disa herë buzëqeshje përpara kamerave. Megjithatë, kancelarja u përball me një presion në rritje për informacione mbi gjendjen e saj shëndetësore.

“Jam e ndërgjegjshme për përgjegjësinë që kam si zyrtare dhe sa i takon shëndetit tim mund të them se veproj në mënyrë të përshtatshme”, tha Merkel në një konferencë shtypi pas takimit me Frederiksen.

Gjithashtu, shtoi ajo, si person ka interesin më të madh për të patur një gjendje shëndetësore të mirë, “ndaj dhe kujdesem për këtë”, u shpreh Merkel. Kancelarja, që mbush 65 vjeç javën e ardhshme, e kaloi me një buzëqeshje batutën e saj se çdo ditëlindje ndihet më e moshuar.

Merkel nuk ka ndonjë precedent serioz sa i takon gjendjes shëndetësore, por zyra e saj nuk ka dhënë asnjë sqarim për rastet kur ajo është dridhur dhe vetë kancelarja nuk ka folur asnjëherë për këshillat apo trajtimin mjekësor që ka marrë./ABC News Albania 24/7

angela-merkel-1280x640.jpg
nev ila23:59 | 10/07/2019

Kancelarja gjermane Angela Merkel ka deklaruar se ndihet shumë mirë dhe se nuk ka nevojë për shqetësim, pasi u pa të dridhej për të tretën herë rresht brenda një muaji.

Ndërkohë, një zëdhënës i qeverisë deklaroi se kancelarja do të vijojë takimet e parashikuara në axhendën e saj, pavarësisht asaj që ndodhi. Të mërkurën Merkel u pa të shtrëngonte duart në përpjekje për të kontrolluar të dridhurat teksa qëndronte përkrah kryeministrit të Finlandës, Anti Rine.

Sipas gazetës “Fokus”, dridhjet prekën tërë trupin e saj dhe zgjatën mbi një minutë. Por në një konferencë për shtyp të mbajtur të mërkurën, Merkel tha se po punon për ta tejkaluar problemin që u shfaq për herë të parë kur takoi presidentin ukrainas.

Ky proces nuk ka mbaruar dhe më duhet të jetoj me të për njëfarë kohe. Megjithatë jam shumë mirë dhe askush nuk duhet të shqetësohet për mua”, deklaroi Merkel.

Zëdhënësja e Merkel, Ulrike Demer u pyet nga mediat gjermane përse qeveria nuk ka ofruar informacion mbi gjendjen shëndetësore të saj, por Demer u përgjigj duke thënë se nuk kishte asgjë për të shtuar./ABC News Albania 24/7

ursula.jpg
G. P.09:11 | 04/07/2019

BE është një lojë që zgjat tre takime të nivelit të lartë dhe në fund fiton Angela Merkel? Jo. Por për Brukselin, Berlini është një shkollë e mirë. Ursula von der Leyen e e zotëron mirë atë, mendon Maximiliane Koschyk.

Një përplasje, copa, mbase edhe disa plagë të shkaktuara nga prerja. Në realitet nuk ndodh ndonjë gjë e bukur, kur një grua depërton e çan kupolën e qeltë. Një tufë me cifla xhami dhe disa të gërvishura. Më shumë nuk mbetet nga metafora një ditë pas emërimit të Ursula von der Leyenit si gruaja e parë në krye të Komisionit Europian.

E futur me zor si zgjidhje kompromisi, kundër kritikave që thonin se a është ajo në gjendje ta bëjë një punë të tillë. E njëjta gjë pati ndodhur edhe me Angela Merkelin në 2005-n, në atë mbrëmje legjendare kur një ish-kancelar i zemëruar lutej që të qëndronin me këmbë në tokë: Angela Merkel kancelare? E pamundur! Megjithatë kjo gjë ndodhi.

Por të bëhet një grua, një gjermane, që nuk ishte kandidate kryesore e zgjedhjeve europiane presidente e Komisionit të BE? E pamundur, jodemokratike, me siguri nuk do të aprovohet nga Parlamenti Europian. Megjithatë kjo gjë ndodhi. Von der Leyen ishte emëruesi më i vogël i përbashkët, për të cilin qeveritarët europianë mundën të binin dakord.

Deutschland Bundeswehrtagung in Berlin | Angela Merkel & Ursula von der Leyen (picture-alliance/dpa/M. Kappeler)

Kush e provon veten në Berlin, funksionon edhe në Bruksel

Puna kryesore e BE është të ndërmjetësojë midis ekstremeve. Asnjë nuk ka qëndruar në netët e gjata të bisedimeve kaq e sigurt në synimet e saj, sa kancelarja Angela Merkel. Dhe kush e provon veten në Berlin shpesh funksionon edhe në Bruksel. Kurrkush në Europë nuk do të guxonte të krahasonte Gjermaninë me BE, megjithëse ngjashmëritë janë shumë të mëdha: Me një rivierë politike që është liberal-koservator dhe e gjelbërt në perëndim, por në Lindje me nacionalistë kritikë ndaj BE. Me një parlament ku partitë popullore janë të dobta, populistët e djathtë, Të gjelbërit dhe liberalët të forcuar në mënyrë që debatet të bëhen edhe më pluraliste.

Po ashtu si Brukseli edhe Berlini janë të përçarë sa i përket çështjeve të migracionit, krizës së klimës dhe rritjes së tensioneve midis Kinës dhe SHBA. Gjermania ndjek një traditë pacifiste, por duke ndjekur me vëmendje agresionin në rritje të Rusisë në lindje të Europës. Debate të ngjashme ka edhe tek NATO në Bruksel.

Von der Leyen ka 14 vjet që punon në kabinetin e Merkelit

Çdo temë e rëndësishme është diskutuar në Bruksel në mënyrë të ngjashme me diskutimin e bërë në kabinetin e Merkelit.

Ursula von der Leyen është e vetmja që ka qenë që në fillim pjesë e kabinetit, duke mbajtur mbas 14 vitesh lëvizje nëpër poste, vendin e ministres së Mbrojtjes. Një vend që në politikën gjermane shihet si vend që vazhdon me karrierë. Von der Leyen u tregua e butë dhe e manovrueshme në të njëjtën kohë. Duke fituar betejat me ushtrinë gjermane Bundeswehr për traditat dhe qëndrimin politik të ushtrisë, një ushtrie në Gjermaninë demokratike, dhe duke u përleshur me luftën psikologjike në SHBA për buxhetin e NATO-s, duke u prezantuar në të njëjtën kohë me udhëheqjen ushtarake kineze dhe gjithë forumet e politikës së sigurisë në botë.

DOSB-Aktion ,Gewalt gegen Frauen - nicht bei uns Ursula von der Leyen (picture-alliance/dpa/S. Pilick)

Këtë gjë e arrin vetëm një europiane e bindur me vizione që ushqehen nga principet demokratike. Një studiuese e besimit kristian dhe e vetëdijshme për historinë, që ka mësuar të ecë me durim dhe pragmatizëm mes rradhëve të burrave me kostume gri. Një grua që i ngjan në shumë gjëra Angela Merkelit.

Meqenëse Merkeli ia vuri kurorën e pasardhëses, Annegret Kramp Karrenbauerit, mbetet Brukseli hapi i logjikshëm për von der Leyen. Kështu ajo mund të dalë nga influenca e Merkelit, dhe të kthehet nga nxënëse në mjeshtre. Të gjitha gjërat e rëndësishme ajo i ka mësuar nga Angela Merkel. Edhe këtë gjë: kur kriset xhami, e vetma gjë që të mbetet të bësh është të kthehesh dhe të vendosësh ngjitës sipër. Dhe të vazhdosh rrugën. Edhe në Bruksel./DW

G. P.14:40 | 02/07/2019

Shërbimet sekrete të vendeve të huaja po përpiqen të marrin kartelat shëndetësore të kancelares gjermane Merkel. Sipas të përditshmes gjermane Bild, gjuetia ndaj të dhënave mjekësore të politikanes 65-vjeçare ka nisur pas dy episodeve kur ajo është shfaqur duke u dridhur në mënyrë të pazakontë.

Dridhjet dhe shenjat e tjera kanë nxitur shërbimet sekrete të vendeve të huaja, që prej javësh po përpiqen të gjejnë kartelat shëndetësore të kancelares gjermane Angela Merkel.

Pa saktësuar se për cilat vende flitet, gjuetia për të dhënat mjekësore ka nisur pas krizës së parë të dridhjeve  që ndodhi në 18 qershor 2019 gjatë takimit me presidentin ukrainas Volodimir Zelenski.

Tjetra në 27 Qershor 2019, pak para nisjes për në Osaka të Japonisë në kuadër të samitit të G 20-ës. Episode që kanë nxitur kuriozitet, sipas të përditshmes gjermane Bild, e cila thekson se kancelarja nuk ka thënë asnjë gjysmë fjale për dridhjet e saj dhe as ka pranuar të tregojë nëse po merr ndonjë mjekim.

Si pasojë disa shërbime sekrete në botë janë të bindur se kanë disa shpjegime dhe po përpiqen të marrin kartelat shëndetësore të Merkel. Sipas Bild, disa agjentë sekretë janë të bindur se politikania gjermane fsheh një problem neurologjik.

Bild intervistoi disa mjekë të cilët njëzëri u shprehën se bëhet fjalë për një çështje private. Gjithsesi, sipas të përditshmes gjermane, fakti që liderja e CDU-së refuzon të japë shpjegime, perceptohet si shenjë dobësie dhe se ajo ka diçka për të fshehur./ABC News Albania 24/7

merkel-vucic-1280x720.jpg
G. P.13:57 | 08/06/2019

Presidenti i Serbisë Aleksandër Vuçiç, ka zhvilluar një bisedë telefonike me kancelaren gjermane Angela Merkel. Presidenca serbe konfirmoi se Vuçiç i ka kërkuar heqjen e taksës në mënyrë që të rifillojë dialogu me Kosovën.

Presidenca serbe konfirmoi se kreu i shtetit Aleksandër Vuçiç zhvilloi një bisedë telefonike me kancelaren gjermane Angela Merkel. Vuçiç foli për raportet dypalëshe, për situatën në rajon dhe në veçanti për dialogun ndërmjet Prishtinës dhe Beogradit.

Biseda ishte e gjatë dhe miqësore, vijon më tej deklarata për media e presidencës serbe, ndërsa presidenti Vuçiç theksoi se mbetet i përkushtuar për dialog, të ndërmjetësuar nga BE-ja, me qëllim të sigurimit të stabilitetit në rajon duke gjetur një kompromis, dhe një zgjidhje që do të jetë e pranueshme për të dy pale. Mediat serbe raportojnë se ai ka falënderuar kancelaren Merkel dhe presidentin Macron për iniciativën që të mbështesin procesin me takimet në Berlin dhe Paris.

Siç theksohet në deklaratën e zyrës së tij, ai ka kërkuar që Prishtina të pezullojë taksën, në këmbim të kthimit të Serbisë në dialog, duke i kërkuar ndihmë edhe Merkel për të pasur një tregti të lirë. Kjo bisedë vjen pas një forumi të djeshëm në Bratisllavë ku mori pjesë edhe presidenti Hashim Thaçi, e me të cilin janë përplasur rreth çështjes së taksës, asociacionit e marrëveshjes së Brukselit./ABC News Albania 24/7

46637137_303.jpg
G. P.10:20 | 08/06/2019

CDU/CSU dhe SPD shënojnë në një sondazh të fundit nga kuotat më të ulëta në preferencën e popullit. Industrialistët kritikojnë punën e qeverisë. Politika e brendshme gjermane dikton vendimet shkruan Auron Dodi.

Një valë pakënaqësie goditi këtë javë, në sondazhe dhe në forume, qeverinë gjermane, të përbërë nga CDU/CSU dhe SPD. Të dyja aleatet në qeveri shënojnë në sondazhin “Tendenca e Gjermanisë” (“Deutschlandtrend”) të ARD-së nga kuotat më të ulëta në preferencën e popullit. Kurse të Gjelbrit shfaqen në një matje opinioni madje përpara CDU/CSU. Sipas këtij sondazhi, po të zhvilloheshin zgjedhje të dielën në Gjermani, të Gjelbrit do të merrnin 26 përqind të votave, kurse CDU/CSU vetëm 25 përqind. Edhe nëse një sondazh tjetër e sheh CDU/CSU përpara të Gjelbërve, rezultatet ranë si shok te partitë më të fuqishme të Gjermanisë.

Kësaj i shtohet fakti, që kryetarja e re e CDU-së sipas sondazhit ka dhe më tej një fillim të vështirë në post. Me punën e Annegret Kramp-Karrenbauerit (AKK), që shihet si pasardhëse e kancelares Merkel, janë të kënaqur vetëm 24 përqind e gjermanëve, përballë Merkelit, që preferohet nga 53 përqind e gjermanëve. Madje vetëm 13 përqind e gjermanëve sipas këtij sondazhi e përfytyrojnë për momentin AKK si kancelare.

Po këtë javë, përfaqësues të industrisë gjermane deklaruan se e “kanë humbur besimin te qeveria”. Qeveria gjermane i dëmton sipërmarrjet, u shpreh në takimin vjetor kryetari i Shoqatës Federale Gjermane të Industrisë, Dieter Kempf. Kempf tha më tej, se qeveria ka dështuar të zbatojë politika, që do ta ndihmonin industrinë të përgatitet për një rënie eventuale të ekonomisë gjermane. Në vend të kësaj merret me “rishpërndarje” të të ardhurave.

Politika e brendshme gjermane dikton vendimet

Përfaqësuesit e industrisë kërkuan edhe uljen e taksave për sipërmarrjet, nga 35 përqind sa është, në 25 përqind. Mesatarja evropiane është 22 përqind. Ata i thanë kancelares Merkel, se mungesa, sipas tyre e stabilitetit politik në Gjermani – me diskutimin për shpërbërjen e koalicionit qeveritar – heq vëmendjen nga reformat e nevojshme ekonomike.

Nëse për të ardhmen e pasigurt të qeverisë së koalicionit deri dje shiheshin përgjegjës socialdemokratët, që pas dorëheqjes së kryetares Andrea Nahles edhe mund të dalin nga koalicioni, tani duket se CDU-së duket se po i lëkunden vetë pozitat. Kjo kur sa ka nisur në forumet e partisë analiza e rënies së partisë në zgjedhjet evropiane. Sipas sondazhit “Tendenca e Gjermanisë”, 72 përqind e gjermanëve janë pak ose aspak të kënaqur me qeverinë. Mendojnë se nuk i kupton si duhet interesat e tyre. Ky fakt karakterizon debatin në radhët e CDU-së konservatore: si mund të afrohen zgjedhësit? Por veç zhvendosjes edhe më tej nga e djathta, pra theksimit edhe të vendimeve te profilit konservator, nisur nga AKK, për momentin pakkush duket se di si të veprojë më ndryshe. E lehtë kjo nuk është, pasi CDU-ja vitet e fundit ka theksuar politikat e preferuara nga mesi i shoqërisë.

Kancelarja Merkel vë përpara fakte

Fakt është që Gjermania qeveriset nga një koalicion mes konservatorëve të CDU/CSU dhe socialdemokratëve. Një sërë politikash ekonomike diktohen nga ky fakt. Fakt është që CDU është përpjekur ta ulë taksën për personat me të ardhura të larta. Dhe të heqë menjëherë taksën e solidaritetit me Lindjen e Gjermanisë. Por këto janë bllokuar nga socialdemokratët në qeveri.

Në takimin vjetor të biznesit me industrialistët, kancelarja Angela Merkel kujtoi se për të ndihmuar sipërmarrjet, qeveria hartoi ligjin për imigrimin e punonjësve të huaj të kualifikuar. Ajo tha se qeveria po investon para në inteligjencën artificiale. Dhe po planifikon ulje taksash për investime në kërkime shkencore. Ajo i kritikoi nga ana e saj sipërmarrjet e mesme, se janë shumë të ngadalta në digjitalizim dhe në ruajtjen e të dhënave në clouds, në re.

A u jep të drejtë industrialistëve ulja e zhvillimit ekonomik të Gjermanisë?

Po edhe jo. Më kujtohet mirë viti 1998, kur të njëjtat kritika industrialistët dhe madje socialdemokratët e Gerhard Schröderit ia bënë qeverisë që ndërruan, të Helmut Kohlit. E kritikuan se nuk kishte kapur sinjalet e kohës për sipërmarrjet. Po atëherë ekonomia gjermane ishte në gjendje të vështirë, Gjermania kishte probleme strukturore ekonomike. Shihej si “e sëmura e Evropës”. Kurse këtë vit, sipas disa burimeve, ekonomia gjermane pritet të rritet me 0,5 përqind, nga 1,4 përqind rritje vitin e kaluar.

Por ndoshta ekonomia gjermane ndodhet “në fund të një cikli zhvillimi”, siç u shpreh këto ditë politikani me përvojë të gjatë i Gjermanisë, Wolfgang Schäuble. Gjermania nuk ndodhet “në fund të modelit të saj të zhvillimit”, siç u shpreh para tij, Presidenti i Francës, Emmanuel Macron për Gjermaninë.

Sa e cënojnë socialdemokratët stabilitetin e qeverisë federale?

Andrea Nahles, ish-kryetarja e Partisë Socialdemokrate dhe e Grupit Parlamentar ishte mbështetësja kryesore, që socialdemokratët të qendrojnë në qeveri me CDU/CSU. Një treshe politikanësh, që i drejton përkohësisht socialdemokratët janë shprehur pro qendrimit në koalicion.

Bashkëkryetarët e Të Gjelbërve: Annalena Baerbock dhe Robert Habeck

Por po të shtohen shumë zërat kritikë për dalje, nga baza socialdemokrate, kjo edhe mund të ndryshojë. Nga ana tjetër, rënia me 11 përqind në zgjedhjet evropiane, nuk premton kohë të mira së afërmi, për socialdemokratët. Prandaj ata ngurrojnë të dalin nga qeveria – gjë që eventualisht mund të sillte zgjedhje të reja në Gjermani edhe para vitit 2021, kur ato mbahen rregullisht.

Zgjedhje të reja të parakohshme në Gjermani?

Përballë krizës së koalicionit, 52 përqind, pra një shumicë e të pyeturve nga instituti demoskopik YouGov, janë për zgjedhje të parakohshme. Por tek partitë, dëshira për zgjedhje nuk është e madhe. Në matjen e pulsit të votuesve në zgjedhjet evropiane të majit, me përjashtim të të Gjelbërve, të gjithë të tjerët patën rënie.

Po të mbahen zgjedhje, Të Gjelbrit që morën në zgjedhjet evropiane 20 përqind, mund ta rrisin mbështetjen dhe të kenë bazë më të fortë për negociata qeveritare. Por ata e lënë hapur edhe mundësinë e futjes në një qeveri me CDU/CSU-në. Pro futjes në qeveri duket se janë tani edhe liberalët e FDP-së.

Sido që të vejë puna, po të dalin socialdemokratët nga qeveria, deri tani ata nuk formojnë dot një shumicë për një qeveri të re, me Të Gjelbrit dhe partinë e Majta. Kështu që megjithë goditjet e marra dhe sondazhin e fundit, në të gjitha përllogaritjet aktuale CDU/CSU pritet të mbetet në pushtet./DW

haradinaj-samiti.jpg
nev ila18:40 | 07/06/2019

I sapokthyer nga Berlini, ku u takua me kancelaren Angela Merkel, kryeministri Ramush Haradinaj ka prekur çështjen e taksës për produktet serbe duke deklaruar se qeveria e tij është e gatshme ta pezullojë atë vetëm nëse ka një marrëveshjeje të negociuar.

Pas kthimit nga vizita zyrtare në Berlin, kryeministri Ramush Haradinaj tha se në takimin me kancelaren gjermane është vërtetuar serioziteti i Kosovës në çështjen e dialogut. Ndërsa ka përmendur dy opsione për suspendimin eventual i taksës.

Qëndrimi im është konsistent, janë dy opsione. Ose një vendim i madh, pra një konferencë një ditore, atëherë Kosova është e gatshme të suspendoj taksën deri në këtë konferencë, por me marrëveshje paraprakisht të negociueshme për një vendim për përmbyllje me kusht të njohjes, por edhe nëse e suspendojmë disa ditë, nuk e ndihmojmë procesin, se mund të zgjas me ditë dhe vjet”, tha Haradinaj.

Sipas tij Samiti i Berlinit e ka mbyllur çështjen e shkëmbimit të territoreve.

“Samiti i Berlinit e ka mbyllë çështjen e formulave të ndërrimit të territorit,  një çështje e tillë nuk ekziston tek asnjëra palë”, theksoi ai.

Ai ka thënë se nga kjo vizitë i është dhënë një shtytje procesit të liberalizimit të vizave.

Haradinaj ka qëndruar në Gjermani për dy ditë radhazi me ftesë të kancelares gjermane Angela Merkel, ku përveç saj ka zhvilluar edhe takime të tjera atje, ndërsa ka marrë pjesë edhe në lutjen e Mëngjesit./ABC News Albania 24/7

merkel.jpg
G. P.09:35 | 07/06/2019

Süddeutsche Zeitung i referohet takimit të komisionit të Bundestagut për Europën. Merkel thuhet ka refuzuar aty kërkesën e Komisionit Europian për hapje të shpejtë të negociatave me Shqipërinë dhe Maqedoninë e Veriut.

Sipas një raportimi të gazetës së njohur gjermane, “Süddeutsche Zeitung” të premten (07.06) kancelarja gjermane, Angela Merkel i ka bërë një refuzim të qartë kërkesës së Komisionit Europian për hapje të shpejtë të negociatave të anëtarësimit me Shqipërinë dhe Maqedoninë e Veriut. Këtë ajo e ka thënë në një seancë të komisionit parlamentar të Bundestagut për Europën, sipas informacioneve të “Süddeutsche Zeitung”. Merkel  ka bërë të qartë, se një vendim për këtë pritet më së hershmi në tetor.

Me këtë kancelarja del qartazi kundër partnerit në koalicion, Partisë Socialdemokrate, SPD, që përkrah votimin pro për hapjen e negociatave në Këshillin e BE më 18 qershor. Ministri gjerman i Shtetit për Europën në Ministrinë e Jashtme, Michael Roth (SPD) është një nga politikanët gjermanë që është angazhuar fort javët e fundit për hapjen e negociatave me dy vendet e Ballkanit. Ai ka theksuar në intervista të ndryshme, se angazhimi i Shqipërisë për reforma duhet të vlerësohet.

CDU/CSU dhe SPD me qëndrime të ndryshme

Mospërputhja e qëndrimeve brenda koalicionit qeverisës gjerman u vu re hapur pas publikimit të progres-raportit të Komisionit Europian në fund të majit. KE kërkoi hapjen e shpejtë të negociatave si me Shqipërinë ashtu edhe Maqedoninë e Veriut. Por CDU/CSU është e rezervuar edhe këtë vit, ajo ka nevojë për analizë të kujdesshme  raportit. Deputeti gjerman i CDU, dhe kryesues i grupit parlamentar për Ballkanin Perëndimor në Bundestag, Johann Wadepuhl, ka thënë se CDU/CSU do duhet të shqyrtojë me kujdes raportet e progresit mbi Shqipërinë dhe Maqedoninë e Veriut.

“Vetëm në këtë mënyrë mund të marrim një vendim të përgjegjshëm nëse janë plotësuar me të vërtetë kushtet e fillimit të negociatave për anëtarësim të këtyre dy vendeve në BE”, ka thënë Wadephul në një deklaratë të publikuar menjëherë pas publikimit të progres-raportit të KE në fund të majit. Për Wadephul, Shqipëria nuk ka plotësuar asnjë nga kushtet e caktuara në Këshillin e Ministrave të Jashtëm, të datës 28 qershor 2018.

Për shkak të kalendarit të punës të CDU/CSU nuk besohet, se kjo temë do të shqyrtohet para vjeshtës./DW


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono