Angela Merkel

macri-dhe-angi.jpg
gra moz19:07 | 19/06/2018

Me optimizëm, kancelarja Merkel dhe presidenti Macron kanë rënë dakord për zgjidhje gjithëpërfshirëse të problemeve me të cilat përballet sot BE-ja. Por për mediat europiane, optimizmi i dy liderëve do ta ketë të vështirë të bashkojë një Union të përçarë.

Me një pritje të ngrohtë, kancelarja gjermane Angela Merkel duket se i ka kthyer humorin presidentit francez Emmanuel Macron. Takimi kokë më kokë mes dy liderëve i zhvilluar të martën në Berlin duket se ka bërë që ata të harrojnë shijen e hidhur të lënë pas nga samiti i G7-s.

Merkel dhe Macron kanë rënë dakord për një sërë çështjesh, por zor se optimizmi i shfaqur prej tyre do të mjaftojë për t’i zgjidhur ato. Së pari, ata kanë rënë dakord se kriza e refugjatëve kërkon zgjidhje në nivel europian.

“Europa duhet të ketë më shumë kapacitete për të kontrolluar kufijtë e jashtëm të saj, por edhe më shumë solidaritet brenda kufijve të saj”, ka thënë Macron.

Një deklaratë kjo, që vjen në një kohë kur kakofonia mes vendeve anëtare të BE-së që i mëshojnë zgjidhjeve individuale vazhdon. Nga ana e saj, Merkel ka nënvizuar se me Macron ka rënë dakord për një buxhet të përbashkët për Eurozonën, në mënyrë për ta mbrojtur më mirë atë nga 1 mij e 1 hallet që e kanë përfshirë në vitet e fundit.

“Ne jemi të angazhuar për një buxhet të tillë”, ka thënë mes të tjerash Merkel.

Buxheti ka qenë një kërkesë e vjetër e Macron, si instrument solidariteti dhe stabiliteti për 19 vendet që përdorin monedhën e përbashkët. Në konferencën për shtyp, presidenti francez ka saktësuar se buxheti në fjalë mund të jetë gati në vitin 2021. Por se si do të shkojnë gjërat deri atëherë, kjo mbetet për t’u parë dhe pse jo për t’u vënë në dyshim, duke parë përçarjen e thellë në radhët e BE-së./abcnews.al

angela-merkel-1-e1526466537940.jpg
gra moz23:05 | 18/06/2018

Kancelarja Angela Merkel ka pranuar afatet e vendosura nga aleatët qeverisës për zgjidhjen e krizës së emigracionit, duke shmangur kështu krizën qeverisëse. Ndërkohë, ajo ka pritur në një takim kryeministrin e Italisë, të cilit i ka ofruar mbështetjen e Gjermanisë në menaxhimin e çështjes.

Kancelarja Angela Merkel ka pranuar afatin e vendosur nga aleatët e koalicionit qeverisës në lidhje me çështjen e emigracionit, duke shmangur rrezikun e një krize qeveritare. Ministri i Brendshëm, Horst Seehofer i dha kohë kancelares deri në fund të qershorit për të gjetur një zgjidhje europiane, ndryshe do të zbatojë masterplanin e tij.

Vendimin e saj, Merkel e ka bërë në një konferencë për shtyp me kryeministrin e Italisë, Giuseppe Conte, në Berlin. Nga ana e tij, Conte ka nënvizuar se kriza e emigrantëve kërkon një zgjidhje në nivel europian dhe jo nisma individuale që vënë në rrezik ekzistencën e zonës Schengen.

Conte ka deklaruar se BE duhet t’i zgjidhë problemet e emigracionit në vendet e origjinës dhe të tranzitit, në mënyrë që të shmanget trafikimi i qënieve njerëzore dhe udhëtimet e rrezikshme që ato ndërmarrin. Duke iu përgjigjur kërkesës, Merkel është shprehur e gatshme të ndihmojë Italinë.

“Solidariteti i Europës është diçka që Gjermania e pret me krahë hapur”, ka thënë Merkel.

Kancelarja ka vlerësuar faktin se Italia është një nga vendet që pranon dhe ka pranuar shumë emigrantë, ndaj bashkëpunimi i ngushtë është i domosdoshëm.

“Edhe Gjermania është prekur në mënyrë direkte nga emigracioni, ndaj është në interesin e të gjithëve të bashkojmë forcat”, ka shtuar Merkel.

Në debat është përfshirë edhe presidenti Donald Trump, i cili ka deklaruar se Shtetet e Bashkuara nuk do të kthehen në kamp refugjatësh siç është kthyer Europa. Trump ka komentuar rastin e Gjermanisë, duke thënë se popullsia është ngritur kundër liderëve të saj për shkak se emigracioni ka dalë jashtë kontrollit./abcnews.al

conte-1.jpg
gra moz17:26 | 13/06/2018

Qeveria franceze ka reaguar lidhur me tensionin e regjistruar së fundmi me Romën, sa i përket menaxhimit të emigrantëve. Parisi thotë se nuk është vendosur asnjëherë në dyshim angazhimi i Italisë. Kancelarja Merkel ka kërkuar nga BE, që Italia të mos lihet vetëm.

Tensionet e fundit lidhur me çështjen e emigrantëve po rrezikojnë samitin mes presidentit të Francës, Emmanuel Macron dhe kryeministrit italian, Giuseppe Conte, që do të zhvillohet të premten. Kjo pasiguri lidhur me takimin vjen pasi Parisi e cilësoi “cinike dhe të papërgjegjëshme” menaxhinimin e Romës për rastin “Aquarius”.

Franca duket se e ka kuptuar gabimin dhe ka tentuar të ulë tonet. Zëdhënësi i Ministrisë së Jashtme të Parisit është përgjigjur për zhvillimet e fundit duke thënë:

“Ne jemi plotësisht të vetëdijshëm për barrën që ka presioni migrator në Itali dhe përpjekjet e këtij vendi. Asnjë nga fjalët e folura nga autoritetet franceze nuk ka vënë në dyshim gjithë këtë, as nevojën për t’u koordinuar ngushtë midis evropianëve”.

Për hipotezën e anullimit të samitit, autoritetet e pallatit Elize njoftojnë se presidenti Macron ka ftuar kryeministrin italian të premten në Paris në kuadër të dialogut mes vendeve. Në këtë takim, do të punohet për përgatitjen e Këshillit Europian të Qershorit.

Për çështjen e emigrantëve ka reaguar edhe qeveria gjermane e drejtuar nga Angela Merkel, që i bën thirrje BE-së që të mos lëjë Italinë vetëm në menaxhimin e krizave të kësaj natyre.

“Ne jemi për një zgjidhje të unitetit europian lidhur me çështjen e emigrantëve”, u shpreh zëdhënësi i Merkel, Steffen Seibert duke nënvizuar se Roma është një partner i rëndësishëm për Berlinin./abcnews.al

lufta-1280x853.jpg
gra moz10:15 | 12/06/2018

Investitorët i druhen përshkallëzimit të një lufte shkatërruese tregtare pas komenteve të ministrit gjerman të Ekonomisë, i cili tha se nuk sheh zgjidhje të menjëhershme të mosmarrëveshjes tregtare me Shtetet e Bashkuara. Ministri Peter Altmayer i bëri thirrje vendeve evropiane të veprojnë me vendosmëri pas vendimit të Donald Trumpit për të vendosur tarifa për metalet. Por ekspertë të financave thonë se situata e krijuar nuk ka mbritur ende në kufijtë e një lufte tregtare.

Të dielën Presidenti amerikan Donald Trump i habiti aleatët me tërheqjen nga një komunikatë zyrtare e përbashkët, për të cilën udhëheqësit e Grupit të Shtatëshes patën rënë dakort në Kanada. Në dokument përmendej nevoja për “tregti të lirë, të ndershme dhe reciprokisht të dobishme” si dhe rëndësia e luftimit të politikave proteksioniste.

Por sipas ekspertit financiar ndërkombëtar Peter Dixon situata ende nuk mund të quhet një luftë tregtare.

“Problemi fillestar është thjesht paralajmërimi i mosmarrëveshjes. Kjo nuk do të thotë se do të çojë domosdoshmërisht në një luftë tregtare. Mendoj se shkojmë shumë larg po ta themi këtë. Por mendoj se marrëdhëniet kryesisht të Evropës qartësisht Kanadasë dhe Shteteve të Bashkuara, vazhdojnë të jenë të ndryshme. Kemi parë çështjen e tarifave, kemi parë Shtetet e Bashkuara të largohen nga marrëveshja e përbashkët bërthamore me Iranin pavarësisht nga fakti që BE-ja dëshiron të mbetet shumë e angazhuar në të dhe tani kemi debatin e G-7-s që mendoj se i ka sjellë të gjitha këto çështje për diskutim në tavolinë. Për momentin mendoj se kjo të jep përshtypjen, të paktën evropianëve, të një administrate amerikane që thjesht nuk duhet t’i besojnë”thotë Peter Dixon i Commerzbank.

Zoti Trump, i cili i tronditi aleatët duke i goditur me tarifa ndaj importeve të çelikut dhe aluminit, tha gjithashtu se mund t’i dyfishojë këto përpjekje duke goditur industrinë e automobilëve, një çështje veçanërisht e ndjeshme për Gjermaninë, industria e makinave e së cilës mbështetet shumë në tregun amerikan.

“Është me rëndësi që evropianët të veprojnë me vendosmëri”, tha ministri gjerman i ekonomisë Peter Altmaier për radion publike “Deutschlandfunk”. “Për momentin duket se nuk ka asnjë zgjidhje, të paktën jo brenda një kohe të shkurtër“, tha ai.

Zoti Altmaier tha se takimi i udhëheqësve të G 7-s kishte prodhuar “probleme”, duke shtuar se tarifat e mëtejshme nga administrata Trump jo vetëm që do të dëmtonin aleatët e saj, por edhe ekonominë amerikane.

“Problemi është se nëse do të vendosen tarifa për tregtinë, në një përpjekje për të bërë importet më të kushtueshme dhe për këtë arsye do të përpiqeni të pengoni importet dhe t’i bëni konsumatorët të zgjedhin mallra të prodhuara brenda vendit, ajo që do të ndodhë është të detyroni palët e prekura të vendosin tarifave të ngjashme dhe si pasojë edhe eksportet amerikane do të goditen”, thotë ekspertiPeter Dixon.

Të dielën kancelarja Angela Merkel e cilësoi tërheqjen e zotit Trump nga komunikata përfundimtare e takimit të Grupit të Shtatëshes një veprim “disi dëshpërues”. Ajo premtoi një përgjigje të BE-së ndaj tarifave të çelikut dhe aluminit në përputhje me rregullat e Organizatës Botërore të Tregtisë.

Por eksperti Peter Dixon sugjeron që evropianët dhe Kanadaja “ta gëlltisin situatën aktuale dhe të përpiqen t’i kthejnë SHBA përsëri në tryezën e bisedimeve”./Zëri i Amerikës

MBULIM-MERKEL-SHBA.mpg_snapshot_00.01-1280x720.jpg
gra moz15:11 | 07/06/2018

Kancelarja gjermane, Angela Merkel, është përballur për herë të parë që nga krijimi i qeverisë së saj të katërt, me opozitën në parlament. Tema kryesore e diksutimit ka qenë pikërish Italia dhe qeveria e saj e re.

Italia ka qenë një nga temat në qendër të përballjes së parë mes Bundestag dhe kancelares gjermane Merkel që nga krijimi i qeverisë së saj të katërt. Dhe kancelarja i është drejtuar pikërisht pjesës euroskeptike që përfaqëson opozitën në parlamentin gjerman. Merkel u shpreh se mbështet dialogun me ekzekutivin e ri italian dhe se do e bën të qartë që në fillim se Bashkimi Europian mbështetet në respektimin e rregullave nga ana e të gjithëve.

Merkel gjithashtu foli dhe për një klimë jo aq dramatike sa përshkruhet në media të samitit të G7-s, në Kanada. Ajo konfirmoi se është programuar një takim dypalësh me kryeministrin italian, Giuseppe Conte, por nuk tha nëse në fund të takimit do të kishte një deklaratë të përbashkët për shtyp. Kancelarja gjermane u shpreh se po punohet ende për axhendën e bisedimeve pasi këndvështrimet e ndryshme më të rëndësishme janë ato për temat si ndryshimi klimaterik, tregtia dhe marrëveshja për programin bërthamor iranian.

Lideri i liberalëve gjermanë Lindner i kërkoi Merkel të qartësonte deklaratat e saj në një intervistë të fundit, ku ishte shprehur se italianët pas situatës së krijuar në Libi u lanë vetëm që të përballeshin me fluksin e madh të emigrantëve. Kancelarja gjermane u përgjigj se asnjë nuk do të ndryshonte nga kontributi i secilit vend europian për fenomenin e emigracionit të paligjshëm.

Ndërsa deputeti i ekstremit të djathtë Holm provokoi Merkel me pyetjen se sa do të ishte e gatshme të paguante për shpëtimin e një vendi tjetër të Bashkimit Europian.

Me Greqinë kemi negociouar në një mënyrë shumë të ashpër, replikoi Merkel, dhe në fund arritëm një marrëveshje të mirë. Duke iu referuar në këtë mënyrë në bisedë me kryeministrin italian dhe për këtë temë e duke premtuar se do të raportonte për çdo gjë në parlament./abcnews.al

deputeti-gjerman.jpg
gra moz12:38 | 28/05/2018

Gjermania është shndërruar në vendin më të debatueshëm nëse do ta mbështesë apo jo Shqipërinë në hapjen e negociatave me Bashkimin Evropian. Deputeti gjerman i CDU, Mark Hauptman, është në anën e zërave pozitivë për vendin tonë.

Mark Hauptman: “Unë dal në konkluzionin se ky është një proces i mirë si për Bashkimin Evropian, dhe për Shqipërinë për të dhënë një vizion të qartë që ne e duam Ballkanin Perëndimor dhe Shqipërinë anëtarë të Bashkimit Evropian në të ardhmen. Kjo është një rrugë e gjatë dhe e vështirë, që do të thotë se duhet të vemë theksin tek axhenda e reformave për ta bërë këtë një udhëtim të suksesshëm drejt BE-së. Unë mbështes fort atë që është bërë sa i takon axhendës së reformave të Shqipërisë”.

Deputeti Mark Hauptman, i cili është njëkohësisht edhe anëtar i Komisionit të Çështjeve Ekonomike, por dhe i Komisionit të Politikës së Jashtme në Bundestag është i ndërgjegjshëm për debatet brenda Bashkimit Evropian. Megjithatë në këndvështrimin e tij Shqipëria është në rrugën e mbarë të përmbushjes së reformave.

Mark Hauptman: “Duke pasur parasysh këtë axhendë reformash, unë jam i mendimit se ne duhet të fillojmë procesin e negociatave  me Shqipërinë. Unë do të këshilloj kolegët e mi në Parlamentin gjerman të grupit tim parlamentar që të fillojmë procesin e negociatave, sepse ky  nuk është fundi i axhendës së reformave, por fillimi i reformave. kolegë të grupit tim parlamentar dhe kolegë të tjerë të parlamentit gjerman kanë vizituar Shqipërinë, të tjerë do vijnë në javët e ardhshme për të parë nga afër se si është zhvilluar Shqipëria dhe si qeveria i qëndron axhendës së reformave”.

Deklaratën, deputeti gjerman e bëri pas takimit që zhvilloi me kryetarin e grupit parlamentar të Partisë Socialiste ,Taulant Balla./abcnews.al

putin-dhe-merkel-1.jpg
gra moz15:43 | 18/05/2018

Kancelarja gjermane, Angela Merkel, është pritur në Rusi nga Presidenti rus, Vladimir Putin. Ndër temat kryesore të takimit në Soçi ishin gazsjellësi mes Rusisë dhe Gjermanisë, marrëveshja bërthamore e Iranit dhe Ukraina.

Pas takimit me Bashar Al Assad, ka qenë kancelarja gjermane Angela Merkel, ajo që është pritur në Soçi nga Presidenti rus, Vladimir Putin. Kanë qenë të shumta temat ndërkombëtare në rend të ditës mes të cilave dhe marrëveshja iraniane për cështjen bërthamore dhe kriza ukrainase.

Angela Merkel udhëtoi në Rusi, duke shënuar vizitën e parë të kancelares gjermane në Rusi pas takimit të tensionuar të një viti më parë, si pasojë e konfliktit në Ukrainën lindore dhe për ndërhyrjet ruse në zgjedhjet europiane.

Kësaj here kancelarja gjermane dhe lideri i Kremlinit janë më pranë, çdo gjë për shkak  të vendimeve të Presidentit amerikan, Donald Trump, në fushën e politikës së jashtme. Të dy në mandatin e tyre të katërt, Putin dhe Merkel duan të mbrojnë sipërmarrjet e tyre nga sanksionet amerikane, të shpëtojnë gazsjellësin e të “Nord Stream 2” që do të çojë gaz rus në Gjermani dhe të mbrojnë marrëveshjen për programin bërthamor Iranian që u braktis nga Uashingtoni.

Administrata e Trump ka kërcënuar me vendosjen e sanksioneve ndaj kompanive që do të punojnë në gazsjellës, dhe pikërisht një ditë më parë, u bë e ditur se në muajin Prill, Presidenti amerikan i ka bërë një propozim Gjermanisë, i cili nuk i ka pëlqyer Merkelit: të braktisë projektin për gazsjellësin e ri rus dhe në shkëmbim të kësaj, Shtetet e Bashkuara të Amerikës do të negociojnë një marrëveshje tregtare me Bashkimin Europian.

Ndërkohë Berlini dhe Moska bëjnë pjesë në grupin 5 plus 1 që në vitin 2015 negocioi marrëveshjen mbi programin bërthamor Iranian, dhe nuk kanë ndërmend ta braktisin pavarësisht tërheqjes së njëanshme të Uashingtonit. Me vendimin e tij, Trump në fakt ka bërë të mundur një afrim mes Kremlinit dhe Europës, gjë që pas helmimit të ish-spiunit rus Skripal në Britaninë e Madhe, dukej e pamundur. Irani është një nga temat kryesore që do të jetë në qendër të bisedimeve dhe mes Presidentit rus Putin e homologut francez Emmanuel Macron, javën e ardhshme në Forumin Ekonomik në Shën Petërburg.

Në axhendë është dhe kriza në Ukrainën lindore dhe rezoluta e konfliktit sirian sidomos pas vizitës së mënjëhershme të Bashar Al Asad në Soçi. Por përsa i përket sanksioneve europiane të vendosura ndaj Rusisë si pasojë e konfliktit në Ukrainë, Merkel nuk ka ndërmend të tërhiqet./abcnews.al

macron.jpg
gra moz13:00 | 17/05/2018

Presidenti i Francës, Macron, kancelarja gjermane Merkel dhe kryeministrja britanike, May janë shprehur në mbështetje të integrimit të Balllkanit Perëndimor në Samitin e Sofjes. Megjithatë kanë theksuar rëndësinë e proceseve reformuese.

Samiti i liderëve europianë në Sofje e kthen për një ditë gjithë vëmendjen e institucioneve europiane dhe shteteve anëtare të Bashkimit Europian te Ballkani Perëndimor. Gjashtë liderët e Ballkanit duke mbërritur në samitin e Sofjes nuk e kanë fshehur kënaqësinë që ky samit i kushtohet  krejtësisht perspektivës europiane  të vendeve të Ballkanit, projekteve konkrete në rajon dhe një bashkëpunimi më të fortë me Bashkimin Europian në disa fusha.

Të gjashtë kanë buzëqeshur teksa hynin në samitin e Sofjes. Por shtetet anëtare të Bashkimit Europian nuk shprehin të gjitha të njëjtin entuziazëm për anëtarësimin e ardhshëm të vendeve të Ballkanit në Bashkimin Europian. Edhe pse kanë ecur krah për krahu nër samitin e Sofies, tre liderët e shteteve kyçe të BE-së Gjermanisë, Francës dhe Britanisë së Madhe e kanë shprehur qartë këtë ndasi.

Angela Merkel: “Kryeministri i Bullgarisë ka punuar shumë gjatë presidencës bullgare për përafrimin e rajonit të Ballkanit me Bashkimin Europian. Eshtë në interesin e Europës që rajoni i Ballkanit Perëndimor të ketë siguri dhe që të zhvillohet ekonomikisht”.

Emanuel Macron: “Unë jam shprehur mbi këtë pikë. Jam në favor që Ballkani t’i bashkangjitet Europës, por çdo zgjerim i Bashkimit Europian duhet të shihet me shumë kujdes dhe rreptësi. Ka diskutime në vijim dhe duhet të vazhdojmë t’i zhvillojmë. Duhet të ndihmojmë të gjithë vendet që po kryejnë reformat dhe që avancojnë drejt Bashkimit Europian dhe kjo është një zgjedhje gjeostrategjike e imja. Por, nuk jam në favor të zgjerimit para se të kemi të gjitha bindjet e duhura dhe para se të bëjmë një reformë të vërtetë që mundëson thellimin dhe funskionimin më të mirë të Bashkimit Europian. 15 vitet e fundit kanë treguar një rrugë që e ka dobësuar Europën, duke menduar çdo herë për zgjerimin e saj. Dhe mendoj, se kjo nuk i shërben as vendeve kandidate as neve vetë duke pasur një mekanizëm që nuk ka më rregulla dhe që shkon gjithnjë drejt zgjerimit.Por jam në favor që Ballkanit të ketë një dialog strategjik të përforcuar, një perspektivë dhe që ne të ndjekim nga afër reformat që bëhen dhe t’i inkurajojmë ato pa hiprokrizi”.

Theresa May: “Jam e kënaqur që Britania e Madhe do mirëpresë në Korrik raundin e pestë vjetor të samitit të Ballkanit mbi procesin e Berlinit. Ne do të ndërtojmë takimin tonë mbi rezultatin e samitit të Sofies. Ajo që do shohim sot është se si mund të punojmë së bashku në Europë për t’i ofruar stabilitet dhe prosperitet Ballkanit”.

Mesazhi është i qartë. Është koha për të folur për reforma substanciale dhe jo data të caktuara./abcnews.al

hashim-thaci.jpg
gra moz20:44 | 09/05/2018

Nga Berlini, Presidenti i Kosovës, Hashim Thaçi, ka kërkuar përfshirjen e Angela Merkel në dialogun me Serbinë. Nga ana e saj, kancelarja ka rikonfirmuar mbështetjen për Kosovën, por ka bërë thirrje për zbatimin e marrëveshjeve të arritura deri tani.  

Hashim Thaçi, i cili po zhvillon në Gjermani vizitën e tij të parë si president i Kosovës, ka kërkuar aktivizimin e kancelares Merkel në dialogun me Serbinë. Rëndësinë e rolit të Merkel në këtë proces, Thaçi e ka theksuar si në takimet e zhvilluara për promovimin e librit të tij “Shtet i ri, burrë shteti modern”, ashtu edhe në konferencën e përbashkët për shtyp me kancelaren Angela Merkel.

Hashim Thaçi: “Mendoj se BE duhet të vazhdojë rolin ndërmjetësues edhe gjatë fazës përfundimtare, por e mirëpres edhe një rol aktiv dhe ndihmues në këtë proces nga ju kancelare, pasi gëzoni respektin dhe besimin e plotë në Kosovë dhe Serbi dhe jeni shpresa e vetme për Ballkanin perëndimor për të ardhmen europiane”.

Thaçi ka thënë gjithashtu se, dialogu me Serbinë duhet të mbyllet me njohje reciproke, sepse vetëm kjo sipas tij mundëson heqjen e pengesave të hyrjes së Kosovës dhe Serbisë në BE.

Nga ana e saj, Merkel ka thënë se dialogu Kosovë-Serbi nuk është një çështje e thjeshtë, por ka theksuar se në këtë pikë është me rëndësi zbatimi i marrëveshjeve të arritura. Kancelarja ka nënvizuar se Gjermania mbetet një aleat i fuqishëm i Kosovës në rrugën e saj europiane, për të cilën dha dy porosi.

Angela Merkel: “Dua të theksoj se në Ditën e Evropës kemi shumë sfida para nesh, sfida që na presin e që janë luftimi i korrupsionit dhe ulja e papunësisë”.

Takimi i Merkel me Thaçin vjen pas atyre që kancelarja ka zhvilluar më herët me kryeministrin shqiptar Edi Rama dhe presidentin serb Aleksandar Vuçiç./abcnews.al

70853Bashkimi.jpg
gra moz09:30 | 30/04/2018

Gjermania, Franca dhe Mbretëria e Bashkuara kanë kërkuar që SHBA të ndalojë tarifat për importet e BE-së, osë do të ketë kundërmasa. Gjithashtu liderët e tre vendeve u dakordësuan edhe për mbështetjen e marrëveshjes me Iranin.

Angela Merkel, Emmanuel Macron dhe Theresa  May paralajmërojnë SHBA-në: mos impononi detyrime mbi mallrat e BE-së ose Unioni do të veprojë për të mbrojtur veten dhe interesat e saj. Qëndrimin e  përbashkët, e bëri të ditur një zëdhënës gjerman i cituar nga mediat ndërkombëtare, është dakordësuar gjatë një telefonate midis udhëheqësve të Gjermanisë, Francës dhe Mbretërisë së Bashkuar.

Presidenti Amerikan, Donald Trump, imponoi 25% tarifa për importin e çelikut dhe 10% për aluminin, por përjashtoi BE-në nga tarifa deri më 1 Maj, duke rezervuar një vendim pas kësaj date.

Gjithashtu liderët e tre vendeve europiane kanë diskutuar edhe për Iranin. Franca, Gjermania dhe Mbretëria e Bashkuara mbështesin marrëveshjen bërthamo,re iraniane si mënyra më e mirë për të parandaluar Teheranin nga zhvillimi i armëve bërthamore.

Të tre liderët pajtohen, gjithashtu për të ndryshuar tekstin e marrëveshjes, duke e zgjeruar atë në çështjen e raketave iraniane, dhe jo duke përjashtuar “një marrëveshje të re”. Ndërkohë, Trump duhet të vendosë deri në 12 Maj nëse do të tërheqë Shtetet e Bashkuara nga akordi apo jo./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono