ambasada

ambasada-amerikane-1280x702.jpg
ad min16:41 | 03/10/2019

Më 1 Tetor, Shtetet e Bashkuara të Amerikës kanë akorduar një fond shtesë prej 920 mijë dollarë në mbështetje të programeve të ligjzbatimit në vendin tonë. Në një reagim në rrjetet sociale, ambasada amerikane në Tiranë thotë se ndihma shtesë do të ketë në shënjestër Drejtorinë e Përgjithshme të Burgjeve.

“Ndihma shtesë do të kontribuojë për Planin e Veprimit për Burgjet 2019 të Ministrisë së Drejtësisë, të cilat do të kenë në shënjestër reformat brenda Drejtorisë së Përgjithshme të Burgjeve për të Profesionalizuar edhe më tej sistemin korrektiv, përforcuar sigurinë publike, dhe zbatuar masa energjike kundër aktivitetit kriminal të organizuar”, thuhet në reagimin e ambasadës.

ambasada thekson se Shtetet e Bashkuara mbreten të përkushtuara për t’i mbështetur përpjekjet për të ndihmuar Shqipërinë që të ndërtojë një sistem drejtësie penale që të jetë i efektshëm dhe transparent.

“Një sistem i përmirësuar burgjesh është thelbësor për përpjekjet e vazhduara të Shqipërisë për të forcuar sundimin e ligjit dhe luftuar krimin e organizuar”, thotë ambasada që me fondin e fundit shtesë e ka rritur totalin e mbështetjes së SHBA tek programet e ligjzbatimit në vendin tonë në 5.1 milionë dollarë.

/abcnews.al

netanyahu.jpg
ad min14:30 | 13/09/2019

Një ish-agjent sekret amerikan është shprehur i bindur se Izraeli spiunonte Shtetet e Bashkuara të Amerikës, pas zbulimit të disa aparaturave që përdoreshin për gjurmimin e celularëve. E ndërsa kryeministri në largim Netanyahu mohon akuzat, presidenti amerikan Trump u shpreh se nuk beson të ketë ndodhur një gjë e tillë.

Izraeli është në prag të zgjedhjeve parlamentare. Të martën e 17 Shtatorit izraelitët do të votojnë për të zgjedhur fillimisht mes kryeministrit në largim Benjamin Netanyahu, i cili kërkon mandatin e tij të pestë në krye të “Likud”; dhe partisë “Bardheblu” të Beni Gantz dhe Jair Lapid.

Netanyahu ka qenë në një gjendje të vështirë, fillimisht në një vizitë zyrtare në Rusi ku u takua me presidentin Vladimir Putin, duke bërë që popullariteti i tij të pësojë rënie duke e renditur në të njëjtin nivel me rivalët.

Facebook bllokoi profilin zyrtar të partisë së tij “Likud” duke nxjerrë jashtë loje për 24 orë sistemin e mesazheve të kandidatit për kryeministër duke e ndaluar të publikojë mesazhe elektorale.

Arsyeja ishte nxitja e urrejtjes nëpërmjet rrjeteve sociale për shkak të një mesazhi të publikuar të enjten, ku qytetarëve u kërkohej të votonin për frontin konservator. Kjo duke i paralajmëruar se fitorja e së majtës do të ligjëronte krijimin e një qeverie arabe e cila do të shkatërronte burra, gra dhe fëmijë.

Netanyahu i cili ka premtuar aneksimin e Luginës se Jordanit të Palestinës në rast fitoreje, u shpreh se mesazhi ishte redaktuar gabimisht nga një anëtar i stafit të tij.  Sikur të mos mjaftonte kjo, Izraeli akuzohet se ka spiunuar Shtetet e Bashkuara të Amerikës.

Lajmi i publikuar nga “Politico” ka vënë në një situatë të vështirë Netanyahun, i cili përgënjeshtroi menjëherë akuzat. Izraeli është një nga aleatët kryesorë të Shteteve të Bashkuara të Amerikës dhe Donald Trump.

Aq sa në vitin 2018, SHBA zhvendosi ambasadën e saj në Jeruzalem. Spiunimi i supozuar, me instalimin e aparaturave për gjurmimin e celularëve, ndodhi pikërisht në momentin që Donald Trump synonte të lehtësonte sanksionet ndaj Iranit.

Ky i fundit një armik i përhershëm i Izraelit. Kreu i Shtëpisë së Bardhë u përpoq t’i hapte rrugë një takimi të mundshëm historik me presidentin iranian Hassan Rohani në kuadër të asamblesë së përgjithshme të Organizatës së Kombeve të Bashkuara në 27 Shtator.

Një ish-agjent sekret amerikan u shpreh i bindur se izraelitët kanë spiunuar ndërsa vetë kreu i Shtëpisë së Bardhë u shpreh se nuk besonte se një gjë e tillë kishte ndodhur./ABC News Albania 24/7

spak.jpg
ad min22:35 | 02/09/2019

Ambasada e Shteteve të Bashkuara të Amerikës ka publikuar një video, me një përmbledhje të zyrtarëve shqiptarë, që kanë ngecur në “rrjetën” e Vettingut. Ambasada thekson se Reforma në Drejtësi dhe procesi i Vettingut në veçanti ka dhënë rezultatet e para.

“Më shumë se 50 gjyqtarë dhe prokurorë janë shkarkuar, për shkak se nuk justifikonin pasurinë dhe kontakteve të papërshtatshme me botën e krimit”, shkruan Ambasada në postimin e saj.

Më tej, në të theksohet se paralelisht me pastrimin e sistemit janë ngritur institucionet e reja, Këshilli i Lartë i Prokurorisë dhe Këshilli i Lartë Gjyqësor.

“Këto institucione kanë nisur nga puna për ngritjen e SPAK dhe shumë shpejt ky institucion do të hetojë zyrtarët e korruptuar dhe krimin e organizuar”, përfundon postimin e saj Ambasada Amerikane në Tiranë./ABC News Albania 24/7

ambasada-amerikane-1280x702.jpg
ad min10:08 | 27/08/2019

Byroja Kombëtare e Hetimit që do të ngrihet së shpejti në Shqipëri është e ngjashme me FBI-në amerikane e cila heton krime të nivelit të lartë në Shtetet e Bashkuara. Shpjegimin ambasada amerikane në Tiranë e dha në rrjetet sociale nëpërmjet një videoje informuese.

Deri sa të ngrihen institucionet e pavarura të drejtësisë, ambasada e Shteteve të Bashkuara të Amerikës ka marrë përsipër të sqarojë rolin e tyre kur të bëhen funksionale. Videoja informuese e radhës është Byroja Kombëtare e Hetimit.

Byroja Kombëtare e Hetimit është njësia hetimore e SPAK. SPAK-u është institucion i ri, i pavarur dhe i pa politizuar kushtetues, detyra e të cilit është të ndjek penalisht korrupsionin, krimin e organizuar dhe krimet e kryera nga zyrtarë të lartë.

“Në shumë mënyra, BKH është e ngjashme me FBI-në Amerikanë e cila heton krimet të nivelit të lartë në Shtetet e Bashkuara. Në fakt, hetuesit e BKH-së do të trajnohen në akademinë e FBI-së në Virxhinia. Ligji mbi SPAK-un po ashtu kërkon që një komision ndërkombëtar të mbikëqyr trajnimin dhe përgatitjet e hetuesve të BKH”.

BKH përbëhet nga një drejtor dhe një ekip hetuesish të cilët duhet të përmbushin standarde të forta të ngjashme me ato të FBI-së. Kryeprokurori i Posaçëm i SPAK dhe dy prokurorë të posaçme  tjerë do zgjedhin drejtorin e BKH-së.

Ky drejtor do drejtojë ekipet e hetuesve pasi të jenë përzgjedhur për këtë organ të rëndësishëm kombëtar, drejtorit dhe drejtuesve të BKH-së do t’u monitorohen llogaritë bankare dhe për tu siguruar që kryejnë detyrën me integritet dhe paanshmëri.

“Pse është e rëndësishme BKH? Në të kaluarën, cilido me para apo me pushtet mund të ndikonte sistemin e gjykatave në favor të tyre. Tani kushtetuta i jep SPAK-ut fuqinë dhe pavarësinë për të goditur korrupsionin e niveleve të larta. Me t’u ngritur SPAK dhe BKH do të jenë në gjendje të hetojnë korrupsioni në nivele të larta dhe Prokurorët e Posaçëm mund t’i çojnë këto çështje të rëndësishme në gjykatë”.

Për ambasadën e Shteteve të Bashkuara të Amerikës zyrtarët e korruptuar dhe bosët e krimit të organizuar do të japin llogari dhe do të përballen me drejtësinë. Prokurorët e Posaçëm dhe BKH, janë këtu për tú siguruar që askush të mos jetë mbi ligjin.

/ABC News Albania 24/7

klp.jpg
ad min12:26 | 20/08/2019

Ambasada e Shteteve të  Bashkuara të Amerikës në Tiranë ka publikuar një video në të cilën tregohet mënyra se si do të funksionojë Struktura e Posaçme Anti-Korrupsion dhe Anti-Krim i Organizuar. Sipas selisë së diplomacisë amerikane në vendin tonë, SPAK ka të gjithë fuqinë që të ndjekë penalisht “të paprekshmit” e Shqipërisë duke përfshirë zyrtarë të sotëm dhe ish-zyrtarë të lartë.

SPAK do t’i kundërvihet niveleve më të larta të korrupsionit. Me SPAK, askush nuk do të jetë mbi ligjin. Është kjo bindja e Ambasadës së Shteteve të Bashkuara të Amerikës që nëpërmjet një videoje shpjegon se si funksionon Struktura e Posaçme Antikorrupsion dhe Anti-Krim i Organizuar.

“Pse nevojitet SPAK dhe si do t’i ndjekë penalisht ky institucion rastet e korrupsionit në nivelet më të larta? SPAK do të jetë një organ i pavarur, jo i politizuar, i cili do të hetojë dhe ndjekë penalisht “të paprekshmit” e Shqipërisë, duke përfshirë zyrtarë të tanishëm dhe ish-zyrtarë të lartë.”

Stuktura e posaçme Anti-Korrupsion dhe Anti-Krim i Organizuar, ose shkurt SPAK është një institucion i ri kushtetues, detyra e së cilit është të hetojë dhe ndjekë penalisht korrupsionin, krimin e organizuar, si dhe krimet e kryera nga zyrtarë të lartë. SPAK përbëhet nga dy pjesë Prokuroria e Posaçme, e cila përbëhet nga prokurorë dhe Byroja Kombëtare e Hetimit e cila përbëhet nga hetues. Ambasada e Shteteve të Bashkuara sqaron se pse nevojitet SPAK.

“Në sistemin e vjetër gjyqësor, zyrtarët e nivelit të lartë të korruptuar dhe bosë të krimit të organizuar ishin “të paprekshëm”sepse gjyqtarë dhe prokurorët e korruptuar ose të kërcënuar nuk i nxirrnin para drejtësisë. Me anë të para lidhjeve, përkatësisë politikë dhe kanosjeve këta gjyqtarë dhe prokuror ishin të prekshëm nga ndikimi politik dhe korrupsioni. Kjo e bënë të pamundur ndjekjen penale të rasteve të korrupsionit në nivele të larta. Çmimin e paguante gjithë vendi..”!

SPAK, do të jetë një organ i pavarur, jo politik, i cili do të hetojë dhe ndjek penalisht “të paprekshmit”e Shqipërisë. Këtu përfshirë zyrtarë të tanishëm dhe ish-zyrtarë të lartë. Prokurorët e Posaçëm do t’i nënshtrohen monitorimit të vazhdueshëm të financave dhe telefonave të tyre për të parandaluar korrupsionin apo kanosjen e tyre. Kjo bazohet në modele që janë përdorur në vende të tjera si Kroacia dhe Rumania.

“Kushtetuta i jep SPAK-ut fuqinë dhe pavarësinë për t’iu kundërvënë korrupsionit në nivele të larta. Duke qenë se është në kushtetutë, kjo do të thotë edhe që të pa prekshmit nuk mund të ndryshojnë atë. Me pak fjalë, SPAK do t’i kundërvihet niveleve më të larta të korrupsionit. Me SPAK askush nuk do të jetë mbi ligjin. Askush nuk do të jetë i paprekshëm dhe gjithë vendi do të përfitojë nga kjo”.

Kjo është video e tretë informuese e publikuar nga Ambasada e Shteteve të Bashkuara të Amerikës. Në dy të parat ajo tregoi se çfarë është procesi i vettingut dhe se si funksionon Gjykata Kushtetuese./ABC News Albania 24/7

Erion-Veliaj-gjate-inspektimit-te-rruges-Sotir-Peci-1-1280x854.jpg
ad min13:44 | 15/08/2019

Hapësirat e vogla mes lagjeve në Tiranë i janë nënshtruar rikonstruksionit. Kryetari i Bashkisë së Tiranës, Erion Veliaj, përsëriti thirrjen ndaj banorëve që të aplikojnë për të rehabilituar edhe fasadat e pallateve.

Kantiere ndërtimi ka hapur Bashkia e Tiranës në rrugët kryesore e jo vetëm. Investime po kryhen edhe në disa xhepa të vegjël siç i quan kryebashkiaku Erion Veliaj hapësirat midis blloqeve të banimit.

“Rruga “Sotir Peçi” është një prej tyre, pra në anën tjetër kemi “Rrugën e Durrësit”, që është aksi tregtar kryesor i Tiranës, ndërkohë sapo kalon rrugën midis bllokut të ambasadave, kemi këto xhepa. Ndaj, jam i lumtur që kemi shfrytëzuar verën, por edhe fondet e mbetura nga buxheti, për këto projekte të vogla nëpër lagje”, tha Veliaj.

Radhën e kanë fasadat e pallateve sipas kreut të bashkisë së Tiranës. Këtu kërkon ndihmën e banorëve të zonës që të nxitojnë të zgjedhin administratorin dhe të aplikojnë për “Fondin e Komunitetit”, për të bashkëfinancuar projektin me bashkinë.

“Lipset që banorët të organizohen e të caktojnë një administrator, dhe me administratorin t’ju japim prapë fonde, që të bëjmë edhe fasadat. Puna e bukur që është bërë në “Rrugën e Durrësit” me fasadat, do të duhet që ta bëjmë edhe në Rr. “Sotir Peçi” apo në të gjitha xhepat e tjera të Tiranës, duke e ndarë shpenzimin bashkë”, tha Veliaj.

Rikonstruksioni i rrugës “Sotir Peçi”, krahas asfaltimit të saj, përfshiu edhe rrjetin e ri të ujësjellës-kanalizimeve, vendosjen e ndriçimit LED, trotuare, si dhe vendosjen e sinjalistikës horizontale dhe vertikale./ABC News Albania 24/7

KEND-LOJRASH-TEK-AMBASADA.mpg_snapshot_00.02-1280x720.jpg
ent ela13:20 | 12/07/2019

50 kënde lojrash pritet t’i shtohen Tiranës katër vitet në vijim. Kryetari i Bashkisë investimet për fëmijët i renditi ndër prioritetet e punës së tij, ndërsa inspektoi punimet e kryera në një tjetër hapësire çlodhëse në kryeqytet.

Ndërtimin e këndeve të lojrave në Tiranë Erion Veliaj premton se do ta ketë prioritet edhe gjatë mandatit të dytë në krye të bashkisë.

“Mbaj mend që kur filluam këtë punë para katër vitesh, kontrasti midis rrugës së Ambasadave dhe këtij vendi ishte Shqipëria e viteve ’90; pra, jashtë shtetit ishte rruga andej, kurse Kandahari dhe gjithë çudirat e Shqipërisë së tranzicionit ishin pas murit të ambasadave. Fakti që sot kemi një sipërfaqe publike të rehabilituar, fakti që pas urbanizimit të zonës kanë ardhur edhe këndet e lodrave, na frymëzon shumë që në mandatin tjetër të bëjmë edhe 50 kënde të tjera”.

Kryetari i Bashkisë ishte pranë bllokut të ambasadave ku u ndërtua një kënd i ri me lodra për fëmijë dhe hapësira çlodhëse për të rriturit.

 “Duam shumë që të mirëmbahen, ndaj u kam kërkuar banorëve, ndërlidhësve të komunitetit, që të hedhin një sy. Ne nuk mund t’i vëmë policë çdo investimi në Tiranë. Kjo kërkon mirëkuptim; shumica e banorëve janë të rregullt, do mundohemi që të disiplinojmë edhe të tjerët që e mbajnë mend Shqipërinë e viteve ’90, që ishte një rrumpallë, ku ti mund ta parkosh makinën tënde me targa angleze ku të duash, diçka që nuk do të ndodhte në Angli, por mendon se Shqipëria nuk ka ndryshuar.”

Paralelisht me ndërtimin e këndeve të lojrave kryebashkiaku thotë se shumë shpejt do të nisë projekti i 100 lagjeve që synon transformimin e hapësirave të përbashkëta në Tiranë. /ABC News Albania 24/7

ambasada-holandeze-1280x715.jpg
nev ila15:42 | 03/07/2019

Pas këtij vendimi Ambasada e Holandës në Tiranë tregon  se më 1 korrik  Komisioni Evropian i ka dërguar një letër ministrit holandez për punët e Jashtme.

Në këtë letër shkruhet se Shqipëria nuk plotëson kushtet teknike për të aktivizuar mekanizmin e pezullimin e vizave. Megjithkëtë Ambasada Holandeze thotë se në letër Komisioni beson se vendi ynë duhet të vazhdojë të intensifikojë përpjekjet për të adresuar çështjen e aplikimeve të pabazuara për azil. Ndërkohë duhet të punojë për të parandaluar dhe luftuar krimin e organizuar.

Holanda sipas Ambasadës në Tiranë do të punojë me Shqipërinë për të parë se si shqetësimet në lidhje me krimin e organizuar, aplikimet e pabazuara për azil dhe klandestinët që përpiqen të kalojnë në Mbretërinë e Bashkuar nëpërmjet porteve të Holandës mund të adresohen në mënyrë më efikase./ABC News Albania 24/7

zgjedhjet-reagimet.jpg
ad min23:51 | 01/07/2019

Në të njëjtën linjë kanë qenë edhe reagimet e institucioneve të tjera ndërkombëtare. Zëdhënësja e BE, Maja Koçijançiç thotë për Abc Neës se procesi ka qenë i rregullt, pavarësisht polarizimit politik. Ndërsa ambasada e SHBA-së, e akredituar në Tiranë, sugjeron për të gjithë ata që kanë kontestime që të presin ngritjen e Gjykatës Kushtetuese për të bërë ankimimet e tyre.

Bashkimi Europian dhe Shtetet e Bashkuara  e vlerësojnë procesin zgjedhor të 30 Qershorit të qetë e të rregullt, por vënë në dukje se ky proces ka qenë i polarizuar politikisht.

Në një prononcim për ABC News, zëdhënësja e BE, Maja Koçijanciç, e vlerëson procesin zgjedhor, pavarësisht situatës politike në të cilën u mbajt.

“Zgjedhjet lokale të mbajtura të dielën e 30 qershorit u zhvilluan në një kontekst të ndarjes politike, por në një mënyrë përgjithësisht të qetë e të rregullt. Ne morëm parasysh të gjitha vërejtjet paraprake të bëra nga Shefi i Misionit të Vëzhgimit të Zgjedhjeve të OSBE / ODIHR. Organet lokale të sapozgjedhura tani duhet të jenë në gjendje të punojnë sipas kompetencave të tyre kushtetuese, në dobi të qytetarëve të vendit”.

Më tej, Koçijançiç bën thirrje për dialog urgjent mes palësh si dhe për çuarjen përpara të reformës zgjedhore.

“Qeveria dhe opozita duhet të tregojnë pjekuri politike dhe të angazhohen urgjentisht në dialog konstruktiv për të kapërcyer situatën aktuale politike. Të gjitha institucionet shqiptare dhe udhëheqësit politikë tani duhet të përqëndrojnë përpjekjet e tyre në vijueshmërinë e zbatimit të procesit të reformës, duke përfshirë rinisjen e reformës së iniciuar më parë të legjislacionit zgjedhor për të adresuar rekomandimet e ODIHR-it”.

Edhe Shtetet e Bashkuara të Amerikës e vlerësojnë në tërësi procesin e 30 Qershorit edhe pse, vënë në dukje se ngërçi politik bëri që të mos kishte zgjedhje në kuptimin e plotë.

“Shtetet e Bashkuara mirëpresin përfundimet e misionit vëzhgues të ODIHR-it, sipas të cilave zgjedhjet bashkiake të 30 qershorit u zhvilluan përgjithësisht në mënyrë të qetë dhe të rregullt, si dhe dhanë një vlerësim të përgjithshëm pozitiv për numërimin e votave. Ne pranojmë, megjithatë, ashtu siç e vuri në dukje edhe misioni i ODIHR-it, se ngërçi dhe polarizimi politik kontribuan për zgjedhje në të cilat votuesit nuk kishin një zgjedhje kuptimplotë”.

Shtetet e Bashkuara të Amerikës u bëjnë thirrje drejtuesve politike të respektojnë shtetin ligjor, ndërsa për të gjithë ata që e kontestojnë rezultatin, vjen ky apel.

“Ata që dëshirojnë të sfidojnë rezultatin e zgjedhjeve, mund të presin Gjykatën Kushtetuese, e cila shpresojmë do të ngrihet së shpejti, me gjykatës të cilët kanë kaluar një proces rigoroz vetingu”.

Në fund, SHBA shprehin gatishmërinë dhe përkushtimin për të ndihmuar Shqipërinë për forcimin e shtetit ligjor dhe ndërtimin e një demokracie më të fortë dhe një të ardhmeje më të ndritur për të gjithë shqiptarët./abcnews.al

ambasada-amerikane-ne-shqiperi-2.jpg
ad min21:13 | 01/07/2019

Në një deklaratë nga rrjetet sociale mbrëmjen e së hënës, ambasada e Shteteve të Bashkuara në Tiranë mirëpriti përfundimet paraprake të misionit vëzhgues të ODHIR-it, sipas të cilave zgjedhjet e 30 Qershorit u zhvilluan përgjithësisht të qeta dhe të rregullta.

Megjithatë, ambasada thekson se pranon se ngërçi politik kontribuuan për zgjedhje në të cilat votuesit nuk kishin një zgjedhje kuptimplotë. Por pavarësisht pengesave, ambasada e SHBA thekson se edhe ato që morën, por edhe ata që nuk morën pjesë në zgjedhje ushtruan të drejtën e tyre demokratike.

“Shtetet e Bashkuara mirëpresin përfundimet e misionit vëzhgues të ODIHR-it, sipas të cilave zgjedhjet bashkiake të 30 qershorit u zhvilluan përgjithësisht në mënyrë të qetë dhe të rregullt, si dhe dhanë një vlerësim të përgjithshëm pozitiv për numërimin e votave. Ne pranojmë, megjithatë, ashtu siç e vuri në dukje edhe misioni i ODIHR-it, se ngërçi dhe polarizimi politik kontribuuan për zgjedhje në të cilat votuesit nuk kishin një zgjedhje kuptimplotë. Pavarësisht pengesave, populli shqiptar – qoftë ata që morën pjesë në zgjedhje, ashtu edhe ata që abstenuan – ushtruan të drejtën e tyre demokratike në mënyrë paqësore dhe ne i përgëzojmë për këtë”, shkruhej në deklaratën e ambasadës.

Më tej ambasada i bën thirrje të gjithë udhëheqësve politikë që të respektojnë shtetin ligjor. Ndërkohë për sa i përket rezultatit të zgjedhjeve, SHBA-të thotë se kudh do që ta sfidojë do duhet të presë Gjykatën Kushtetuese.

“Në këtë çast, ne iu bëjmë thirrje të gjithë udhëheqësve politikë që të respektojnë shtetin ligjor dhe të punojnë brenda institucioneve ngritura për të përcaktuar rrugën përpara për demokracinë shqiptare, përfshi përparimin me reformat e rëndësishme zgjedhore të rekomanduara nga ODIHR. Ata që dëshirojnë të sfidojnë rezultatin e zgjedhjeve, mund të presin Gjykatën Kushtetuese, e cila shpresojmë do të ngrihet së shpejti, me gjykatës të cilët kanë kaluar një proces rigoroz vetingu. Si gjithnjë, Shtetet e Bashkuara janë në krah të popullit shqiptar si një vend partner, një mik dhe një aleat. Ne jemi të përkushtuar të ndihmojmë për forcimin e shtetit ligjor dhe ndërtimin e një demokracie më të fortë dhe një të ardhmeje më të ndritur për të gjithë shqiptarët”, thuhet në deklaratë./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono